Wednesday, 26 November 2008

فتش عن الرجل


وراء كل عاهرة رجل دفعها لهذا الطريق

ايه الكلام دة؟
الكلام دة صحيح؟
يعني اي عاهرة في الدنيا....هناك رجل هو اللي القى بها في هذا الطريق؟؟؟؟
تقريبا دي تكملة للحملة القومية لمحاربة الرجل اللي شغالة الله ينور اليومين دول
انا شخصيا مش موافق على الجملة دي
انا من رأيي ان مفيش حد بيجبر حد على اي طريق او اي سلوك في الحياة
كل بني ادم هو اللي بيحدد مصيره ويحدد خط سيره في الحياة
هل كل واحدة انضحك عليها بأسم الحب تحولت لعاهرة؟؟؟؟؟؟
بالتأكيد لا
هل لابد ان يكون سبب انحراف اي فتاة هو شاب؟
بالتأكيد لا
كتير جدا من العاهرات لديهن استعداد بيئي وسلوكي للانحراف بدون وجود اي شاب كان سببا في هذا الانحراف....حرام نعلق سلوك اي فتاة او سيدة منحرفة على وجود شاب او رجل اودى بها للوحل
هل لو افترضنا ان شابا غرر بفتاة...هل هذا مبرر لأن تتحول لعاهرة؟؟؟؟؟؟
طب ليه العكس مش صحيح....ليه كل شاب منحرف وراه فتاة او سيدة كانت سببا في انحرافه؟؟؟
طبعا انا لا اوافق على كدة برضة
انا رأيي ومن الاخر
ان مفيش حد بيكون سببا في انحراف حد...كل واحد مسئول عن تصرفاته..كل واحد بيتحمل نتيجة اعماله واخطاؤه
كفاية تحامل بقى

Thursday, 20 November 2008

كنت هنـــــــــــــــــــــــــاك.....في الكاميرون

عمري ما كسبت في اي مسابقة في الحياة
كنت زمان بأجمع صور البوم (بم بم) وكان دايما بتبقى في صورة مش موجودة في السوق وبالتالي عمر ما البوم بم بم ما اكتمل وبالتالي عمري ماكسبت
بعد الالبومات طلعت هوجة ال 0900 وطبعا عمري ما حاولت مجرد المحاولة الاشتراك في النوع دة المسابقات لسببين:
اولهما :
ان تفاهة الاسئلة تحسسك ان المسابقة نصب *نصب....ماهو مش معقول تكون مسابقة من عينة في اي قارة تقع جمهورية مصر العربية؟؟ مسابقة نزيهة
ثانيهما: ان حتى لو المسابقة حقيقية انا عاااارف نفسي كويس قوي.....المنحوس منحووووووووووووس
ومشيت في الحياة على هذا الأساس...لا امني النفس بأي ضربة حظ...فالحظ لا يأتي الا لمن يستحقه واعتقد اني لست احد هؤلاء
بس بما ان ساعة القدر يعمى البصر ولأن الفرصة بنت جميلة راكبة عجلة ببدال...حصلت المعجزة وكسبت
كســــــــــــــــــــــــــــــــــــــــبــــــــــــــــــــــــــــــــــــــــــــــــــــت
ومش اي مكسب
دة انا كسبت رحلة برة مصر
ومش لأي مكان
الكامــــــــــــــــــــــــــــــــــــــــــــيـــــــــــــــــــــــــــــــــــــــــــرون
كسبت في مسابقة (فودافون) لأجمد 10 اهلاوية في مصر يسافروا مع الأهلي للكاميرون علشان يشجعوه ويرجعوا من هناك بكأس افريقيا
الرحلة لمدة يوم واحد يوم المباراة والعودة بعد المباراة مباشرة
كل اللي عملته علشان اكسب اني اتصلت ب 1010 وقعدت احل مسابقة معلومات عن النادي الاهلي وتاريخه ولا عبيه ومبارياته وكل واحد يجمع نقط اكتر عن طريق حل الاسئلة هو اللي هيكسب يوميا
عندي تليفون ما بأستخدمهوش كتير وفيه كمية رصيد غير طبيعية....قلت ليه لأ؟
هو في حد يعرف عن الاهلي ياد يا احمد اكتر ما تعرف انت؟ هو في حد بيحب الاهلي زيك كدة؟ هو ممكن يكونوا اجمد 10 اهلاوية في مصر وانت مش فيهم؟؟؟؟
طبعا كلا البتة....لا يمكن ابدا...وبدأت احل في الأسئلة واجمع في النقط و العب والعـــــــــب لحد ما جمعت من النقط 2500 نقطة وقلت دة آخري بصراحة
تاني يوم (فودافون) بجلالة قدرها اتصلوا بيا وقالوا لي مبروك يا احمد انت معانا في الكاميرون انت كسبت امبارح
الكلام دة كان يوم الثلاثاء 4 نوفمبر
ومن ساعتها وانا تحولت لأحمد الأفريقي...يوم اروح اودي الباسبورت لشركة السياحة ويوم اروح اتطعم ضد امراض عجيبة جدا عمري ما سمعت عنها ومرة اروح وحدة الملاريا بوزارة الصحة علشان اخد دواء الملاريا قبل السفر
المهم من الثلاثاء 4 نوفمبر لحد الثلاثاء 11 نوفمبر وانا املأ الدنيا ضجيجا وصخب والناس اللي يعرفوني واللي ما يعرفونيش عرفوا اننا مسافر الكاميرون
لحد يوم الاربعاء 12 نوفمبر ماعرفت ان الرحلة في طريقها للألغاء نظرا لعدم اكتمال السعة المقررة لاقلاع الطائرة........طب وانا ماااااااااااااااااااااااااااااااااااااااالي؟
الظاهر كدة ان الفرصة لا بنت جميلة ولا نيلة والظاهر ان المنحوس منحوس
بس بعد التلاعب شوية بأعصاينا طلعت الرحلة وكان التجمع فجر الأحد 16 نوفمبر موعد المباراة



*في مطار القاهرة قبل اقلاع الطائرة



الصحبة كانت فعلا جميلة والطائرة بتجمع ناس بيجمعهم عشثق النادي الاهلي ومن مختلف الاعمار من 15 سنة لحد 60 سنة...ناس من رابطة النادي الاهلي...ناس من المشجعين التقليديين للنادي (قدامى المشجعين).....ناس من فودافون....المطرب ايهاب توفيق.....محمد عباس مراسل قناة دريم....مهيب عبد الهادي مراسل قناة الحياة....وغيرهم كتير





*قبل خطوات من سلم الطائرة


الرحلة استغرقت 4 ساعات ونصف ووصلت مطار جاروا حوالي الساعة 11 صباحا......نزلنا من الطائرة الى الجوازات سيرا على الاقدام ومفيش في المطار غير طيارتنا بس...هو عموما مطار جاروا صعب ان يطلق عليه مطار
بتنزل من الطائرة وتنتقل للجوازات سيرا على الاقدام
اعتقد ان محطات القطارت عندنا في مصر اكبر مساحة من مطار جاروا
دخلنا بدون اي اجراءات تفتيش ولا اي مضايقات او منغصات واكتشفنا ان الكاميرونيين منتظرينا بفرق للفنون الشعبية الافريقية والرقص الافريقي المميز
الأستقبال كان مميز فعلا خاصة اننا كنا معتقدين استقبال سيء جدا بعد نتيجة مباراة الذهاب والمضايقات اللي تعرض لها الفريق الكاميروني بالقاهرة
وبعد ما قرأنا في الصحف المصرية ان الناس هناك مشحونة بشكل غير مسبوق....بس دة مش حقيقة على الاطلاق
الا لو كان المقصود بالشحن من وجهة نظر الصحفيين المصريين هو ان تشير الجماهير لأي مشجع مصري بالرقم 3 ومعناها انهم هيكسبونا بثلاثة اهداف وهو طموح مشروع لهم حتى لو كان في عداد المستحيلات من وجهة نظرنا طبعا




*استقبال حافل بمطار جارو

طبقا لبرنامج الرحلة كان من المفترض ان نتجول جولة حرة بمدينة جاروا الا انهم ابلغونا بألغاء الجولة الحرة و التوجه مباشرة الى الاستاد على الرغم انه باقي على المباراة 3 ساعات كاملة ودرجة الحرارة 41 درجة مئوية والشمس غير طبيعية (ربنا مايوريكوا شمس خط الاستواء دي بتبقى عاملة ازاااااااي)....




*امام البوابة الرئيسية لمطار جاروا

واحنا في الطريق الى الاستاد عرفنا هم ليه الغوا الجولة الحرة في المدينة....لأن بأختصار مفيش مدينة من الاساس....شوارع اغلبها ترابية غير مرصوفة ولا توجد اي مظاهر لحياة مدنية....مجموعة من البيوت الفقيرة المتراصة بجوار بعضها...لا توجد اية محال تجارية ولا شوارع تصلح للتجول اساسا
الفقر بكل ما تحمله الكلمة من معنى
وصلنا الاستاد وسط اجراءات دخول في منتهى السلاسة واليسر (اكيد الأمن الكاميروني ما اسعدوش الحظ واخذ دورات تدريبية على يد الشرطة المصرية وكيفية تعذيب الجماهير).....دخلنا الاستاد بدون تفتيش وسط ذهولنا من سهولة الاجراءات والدخول
من الساعة 12 لحد الساعة 3 موعد المباراة (بتوقيت الكاميرون)....والشمس فوق دماغنا رأسيــــــــــــــأ.....استهلكنا كميات رهيبة من المياه والعصائر والبيبسي في جو غير طبيعي من الحرارة والشمس والرطوبة والدوشة والازعاج الرهيب



*في المدرجات

الأخوة الكاميرونيين مشغلين دي جي في الاستاد بصوت عالي جدا واغاني فرنساوي وتشجيع حماسي للجماهير وكل دة واحنا جايبين اخرنا من حرارة الجو والشمس والرطوبة والارهاق وزاد عليهم كمان الازعاج
المهم ان المباراة بدأت وسط حماس غير طبيعي للجمهور الكاميروني المتحمس الا ان هدف احمد حسن في الشوط الاول قد احبطهم تماما قبل ان يدركوا التعادل بنهاية الشوط الاول وتعود اليهم الحماسة والامل في العودة للمباراة
في الشوط الثاني اعصار كاميروني وحماس غير طبيعي ودي جي اشتغل من جديد وهدف ثان اشعل المباراة تماما واصوات جماهير الكاميرون اصبحت عالية جدا وسط خوف وصمت تام منا ورعب من فكرة ان تفلت المبارة من ايدي لاعبي الاهلي خاصة ان دخول هدف ثالث في الوقت دة سيعقبه لا محالة الهدف الرابع المميت
وحتى لو لم يدخل الهدف الثالث وانتهى اللقاء بهزيمة الاهلي بهدفين فهما كفيلين بالعكننة علينا وضياع جزء كبير من الفرحة الافريقية
الا ان ربنا اراد ان فرحتنا تكتمل بهدف التعادل للنادي الاهلي عكس اتجاه سير اللعب تماما...بس تقول ايه غير ربك لما يريد
انتهت المباراة بعدما اصبحنا محاطين من الكاميرونيين من جميع الجهات ولولا ان الشعب دة طيب بجد احنا كنا اتقطعنا.....بدأت افراح لاعبي الاهلي في الملعب وافراحنا في المدرجات وسط انتظار الجمهور الكاميروني لمراسم تسليم الكأس في تصرف لا يصدر الا عن شعب محترم بيقدر الروح الرياضية فعلا وروح التنافس الشريف
ورأسهم والف سيف الا ياخدوا مننا تذكار سواء التيشيرتات او الكابات او الاعلام اللي احنا ماسكينها....ناس فعلا غلابة بشكل رهيب وبيحبوا مصر والمصريين وبيحبوا الاهلي وبيتعاملوا معانا كشعب متقدم جدا او كأننا دولة نفطية غنية (مش عارفين اللي فيها!!!!!!!!!!)...بس فعلا شعب غاية في الاحترام
المباراة انتهت الساعة 5 بتوقيت الكاميرون وموعد العودة الساعة 11 مساءا..وبالتالي هناك 6 ساعات من الفراغ في بلد لا توجد فيه اي وسيلة للترفيه او تمضية الوقت
ابلغونا اننا هنتوجه الى الفندق اللي بيقيم فيه لاعبي النادي الاهلي وطبعا هنا كانت الفرحة العارمة لأتاحة الفرصة لنا للأحتفال بالكأس مع اللاعبين والبعثة بالكامل
توجهنا الى الفندق وسط تصفيق الكاميرونيين الطيبين ورغباتهم العارمة في الحصول على اي تذكار من ريحتنا
تي شيرت....كاب...نظارة..اي حاجة تيجي من ريحة الحبايب
طبعا الفندق اكيد ممكن تتخيلوه عامل ازاي...هو طبعا مش فندق...هو مجموعة من الغرف الضيقة جدا الملاصقة لبعضها البعض...الغرفة لو وقف فيها اكثر من 3 افراد هيبقى في ازمة وممكن يصاب اي حد بالاختناق
التقطنا الصور التذكارية مع اللاعبين والجهاز الفني والادارة وسط جو من المرح والفرحة الشديدة بالكأس الغالية..واتجهنا للمطار حوالي الساعة 8 مساءا استعدادا للمغادرة والعودة للقاهرة
وصلنا المطار وطبعا كالعادة انهينا الاجراءات في كل سهولة ويسر واريحية تامة واتجهنا للجلوس في مقاعدنا بالطائرة انتظارا للأقلاع
وهنا حانت ساعة الأزمة الكبرى
ازمة مطار جاروا
قاعدين في الطيارة منتظرين انها تتحرك بقى...نصف ساعة وفيش اي بادرة للتحرك....ساعة و مفيش عجلة بتتحرك...الناس بدأت تقلق من الوضع الغريب دة
والتساؤل الهامس بدأ يتحول لأسئلة علنية
في ايه يا جماعة؟؟؟؟؟
قالوا لنا..ان في خلافات مادية بين المطار وبين الطائرة وانها في طريقها للحل
طب ممكن ننزل نقعد تحت شوية خاصة ان تكييف الطائرات وهي على الارض بيبقى ضعيف جدا
بس اكتشفنا انهم شالوا السلم
شالوا سلم الطيارة من الطيارة واحنا جوة الطيارة
طيب ليه كدة يا جماعة؟
اتاري المطار كله مافيهوش الا سلم واحد بس....بعد ما طلعنا الطيارة شالوا السلم علشان لاعبي الاهلي وبقية البعثة تطلع طيارتهم هم كمان
ماهو المطار مافيهوش الا طيارتين...... طيارتنا وطيارة الاعبين وسلم واحد بس
المهم فضلنا قاعدين في الطيارة لحد ماجابوا السلم تاني ونزلنا بعد ماكنا هنتخنق جوة الطيارة من الحر....اول ما نزلنا من الطيارة لقينا طائرة الاعبين بتستعد للمغادرة والاقلاع....وهنا بدأ القلق والتوتر
اللي كان مطمئننا هو وجود طائرة اللاعبين محتجزة معانا ومعنى مغادرة الطائرة دي واحنا لسة موجودين في المطار ان احنا هنفضل قاعدين في جاروا لحد ما يبان لنا صاحب
تساءلنا وبعدين يا جماعة...؟ ايه المشكلة
قالوا ان المشكلة خلاص اتحلت....طائرة الأهلي دفعت 8.5 الف دولار واقلعت وتم الاتفاق على ان تدفع طائرة المشجعين نفس المبلغ وان تقلع بعدها بنصف ساعة
اللي حصل ان طائرة بعثة الاهلي غادرت المطار بعد ما دفعت الفلوس وعلى متنها السفير المصري في الكاميرون....وانتظرنا ان تقلع طائرتنا بعدها بلا جدوى
اتاري الكاميرونيين قرروا اننا ندفع 22.5 الف دولار وليس 8.5 الف دولار زي ما اتفقوا مع السفير قبل ما يغادر مع بعثة النادي الاهلي
يعني احنا اصبحنا في مهب الريح ولا يعلم مصيرنا الا الله عز وجل
طيب امتى المشكلة دي هتنحل؟؟؟؟طيب هنروح امتى؟ طيب احنا ممكن نستمر كدة للصبح؟طيب في مصر حد حاسس بينا؟
طيب لما المياه تخلص هنعمل ايه؟
دة في ناس كبار السن معانا.....وفي بنات كمان.....طيب احنا ممكن نستحمل لحد امتى؟
كم كان محزنا ومؤلما مشهد مغادرة طائرة بعثة النادي الاهلي لمطار جاروا في الوقت اللي بيفترش فيه جمهور الاهلي اللي زحف وراءهم للكاميرون ارض مطار جاروا في انتظار مصير مجهول ربنا وحده اللي يعلمه
وهنا بدأت الأزمة الحقيقية والسخط يزداد على حسن حمدي رئيس النادي الأهلي وعلى السفير المصري في الكاميرون اللي سافر مع بعثة الأهلي للقاهرة تاركا 120 مصري في الكاميرون يواجهون مخاطر السرقة والابتزاز والمصير المجهول
بدأ المخزون من مياه الشرب في الطائرة يتناقص مع ارتفاع درجة الحرارة وعدم وجود اية بوادر لأنفراج الأزمة
كان كل القلق على الناس اللي في مصر...اهالينا اللي منتظرين عودتنا...هل عرفوا ان الطائرة هتتأخر؟ هل عرفوا بالأزمة اساسا؟
هل حد في مصر بدأ التحرك لحل الأزمة ولا ايه اللي بيحصل؟
نسيت اوضح ان اي خط فودافون تجواله لا يعمل داخل مطار جاروا وانما بعد الخروج من المطار وان الخطوط التي تعمل داخل المطار هي تجوال موبينيل فقط
وبالتالي انقطعت صلة اغلبنا بالعالم الخارجي لا ارسال ولا استقبال...لا رسائل ولا مكالمات
اصبح الوضع كالأتي ناس محاصرة في مطار جاروا بالكاميرون ومطلوب منهم دفع 22 الف دولار مقابل اطلاق سراحهم والا هيفضلوا كدة لحد المبلغ ما يتم دفعه وسط قلق وخوف ورعب
سواء تم دفع المبلغ بعد ساعة او ساعتين او بعد يوم او يومين....هيندفع هيندفع


*ازمة مطار جاروا وافتراش الجماهير لأرض المطار

الناس في مصر بدأت تعرف ان في ازمة في مطار جاروا عن طريق مراسل قناة الحياة المتواجد معانا في المطار واللي اتصل بكابتن احمد شوبير وابلغه بالأزمة
بدأت رسائل تصل للموبايلات اللي شغالة في المطار (موبينيل)...من اهلهم في مصر بتقول ان شوبير اثار الازمة دي في برنامجه وانها في طريقها للحل عن طريق اتصالاته بالسفارة المصرية في الكاميرون (اللي سفيرها طار مع الفريق لمصر)..و قبلها اتصالاته بوزارة الخارجية
طلب كابتن شوبير من مراسله انه يعطي الموبايل للمشجعين المتواجدين بجواره كل واحد يعرف نفسه ويطمئن اهله عليه وكنت انا اول واحد.....والحقيقة بدل ما اطمئن اهلي كنت مهتم بشدة اني اصب جم غضبي على ادارة النادي الاهلي والسفير المصري في الكاميرون اللي كان كل همهم انهم يحلوا مشكلتهم هم على حساب الناس اللي تكبدوا عناء سفر شاق وظروف في منتهى الصعوبة وتركوهم مرميين على الارض في الكاميرون ورجعوا مصر يحتفلوا مع جمهورهم بانتصارهم العظيم بكأس افريقيا انما احنا هنا واللي سافرنا وتعبنا مشجعين درجة تانية لا اكثر
فضلنا محتجزين في مطار جاروا وسط انباء من مصر ان الدنيا مقلوبة وان شوبير قالب الدنيا في برنامجه من اجل اطلاق سراحنا...وان المشكلة في طريقها للحل بعد تدخل وزارة الخارجية والسفارة المصرية في الكاميرون عن طريق القائم بالاعمال واللي بعتوا خطاب ضمان لسلطات مطار جاروا بتسديد باقي ال 22 الف دولار بعد ان سدد قائد الطائرة 10 الاف دولار فقط هم اللي كانوا على الطائرة
واخيرا انفرجت الازمة حوالي الساعة 4 صباحا بعد ساعات عصيبة من القلق والترقب والخوف من المجهول
وصلنا مطار القاهرة الساعة 8.30 صباح الأثنين بعد رحلة عودة صامتة تماما
صمت من الارهاق و الغضب والضيق والتعب
انتهت رحلتنا مع الاهلي الى الكاميرون
رحلة لن تمحى من الذاكرة ابدا
رحلة شهدت كل الانفعالات.....الفرحة...القلق....الغضب.....النشوة...الانتصار....الاحباط.....الحماس
كل الانفعالات الانسانية الايجابية منها والسلبية مرت علينا في الرحلة دي
فعلا
هي رحلة المتعة والعذاب
______________________________________
ملحوظة:
لمشاهدة جميع الصور والفيديو الخاص بالرحلة
بالأضافة الى صور ابطال النادي الاهلي
على صفحتي الخاصة بموقع فيس بووك

Sunday, 9 November 2008

اسئلة على كل لون

ليه رئيس اتحاد الاذاعة والتليفزيون عندنا هنا في مصر بيحمل لقب لواء؟
ايه علاقة الفن والفنانين والتليفزيون بالعسكر؟
====================
ليه حسام حسن و اخوه ابراهيم دايما عصبيين وزعلانين من الحياة؟ ليه دائما حاسين انهم مضطهدين؟
ليه دايما حاسين ان الناس كلها غيرانة منهم وبتعطل نجاحهم؟
=====================
ليه الوزير في مصر لما بيخرج من الوزارة ما بيرجعش تاني؟
=====================
ليه الفساتين السواريه اغلبها عارية؟ ايه علاقة دة بالسهر؟ يعني السهرة او الفرح مش هايكون حلو لو النس كلها متغطية؟
=====================
ليه السيارة الرسمية في مصر هي المرسيدس السوداء؟ يعني المسئول هيفقد هيبته لو ركب بي ام دبليو مثلا؟ اومال بقى لو ركب دايو لانوس يبقى الموقف ايه؟
======================
ليه ما بناكلش قطايف الا في رمضان بس؟ وهو احنا لو اكلناها برة رمضان هيحصل ايه؟
=====================
ليه الواد الشاطر او البنت الموس بيقى غالبا لابس نظارة؟؟ مالهاش علاقة بالقراءة على فكرة...انا اعرف ناس كتير بيقرءوا كتير جدا ومش لابسين لا نظارة ولا عدسات
=====================
ليه بنستغل نجاح  اي فيلم او مسلسل استغلال بشع ونصمم نعمل منه جزء تاني وتالت اللي غالبا بيفشلوا وبيغطي ىفشلهم على نجاح الجزء الاول؟
======================
ليه مواعيد المدارس بتبقى الصبح بدري؟ وهو يعني لو العيال راحت المدرسة الساعة 10 ولا 11 الصبح مش هيفهموا؟
احنا ليه بنروح الشغل الصبح؟ ليه مانروحش الشغل الظهر ولا العصر؟ دة حتى في اشغال واعمال مالهاش علاقة بالصبح خالص ومع ذلك مواعيدها 7 او 8 الصبح
======================
لو كانت ثورة 1952 ماقامتش...وكان بيحكمنا دلوقتي الملك احمد فؤاد الثاني....تفتكروا كان مين هيبقى ولي العهد؟
======================
هو احنا ليه لما بنخاف من الحسد بنقول خمسة وخميسة.....ليه مش ستة وستيتة او اربعة وربيعة مثلا؟
======================
لاعب كرة القدم لما بيطلع في برنامج منوعات او فني بيقى لابس حاجات عجيبة جدا..يعني تلاقيه لابس بودي وعليه ترتر او قميص مفتوح للنصف ومكرمش كرمشة غير عادية على اساس ان كدة شياكة بقى وموضة
هم ليه بيلبسوا كدة؟ وهو لو طلع لابس قميص عادي زينا كدة بيقلل من شياكته في حاجة؟
راجع طريقة لبس عمرو زكي بالتحديد
=========================
ليه اغلب علماء الدين مش لابسين دبلة على الرغم انهم متزوجون ويعولوا...هي الدبلة حرام ولا مكروهة؟
==========================
ليه دائما في الاعمال الدرامية بتبقى شخصية القبطي وفي ومخلص ومحترم ولا يخون صديقه على الاطلاق
هو مفيش قبطي شرير او خائن؟
اكيد في طبعا....زي ما في مسلم طيب ومسلم شرير ومسلم حرامي ومسلم امين
ليه لازم تبقى شخصية القبطي عليها هالة من نور
انا مش معترض على فكرة خاااااااالص....انا معترض على وضع خط تحت شخصية القبطي....انا معترض على عدم التعامل معاه عادي يعني..انا عايز القبطي يبقى في العمل الفني مصري مش شرط تعرف في المسلسل او الفيلم انه قبطي خالص خاصة انه لا توجد ضرورة درامية لذلك في اغلب الاعمال الفنية
راجع شخصية صبري عبد المنعم  (مينا)  في هيما وشخصية صلاح رشوان (رفقي عزيز) في الدالي
==============================
احنا ليه لما بنيجي نشتري علبة بيبسي بنقول عليها (كانز)...رغم ان كانز دي جمع مش مفرد
CANS
يعني بتروح تشتري واحدة بيبسي وبتقول للبائع عايز علب بيبسي
والمفروض تقول عايز كان بيبسي
PEPSI CAN
جربت مرة اقول للبائع كدة..بص لي بصة غريبة اني محدث نعمة بقى ومش فاهم....قالي عايز بيبسي كانز يعني؟
للأسف اضطريت اجاريه واقوله 
اااااااااه....عايز واحدة بيبسي كانز
============================
هي ليه التحية الرسمية للفنانين والفنانات هي البوس؟
ليه لما بيتقابلوا في مهرجان او اي مناسبة سعيدة او حزينة بيتحول الموضوع ل (مبوسة) رجالي في حريمي مفيش اي فرق
على الرغم ان الناس العادية اللي زينا كدة لما بيتقابلوا مع بعض في اي مناسبة....الرجال بيبوسوا بعض والسيدات بتبوس بعضها والعملية ما بتبقاش سداح مداح كدة........يا بختهم!!!!!!!
راجع اي افتتاح قديم لمهرجان القاهرة السينمائي.....او راجع يسرا في جنازتي احمد زكي ويوسف شاهين
===============================
ليه الاعمال الدرامية مصممة على تصوير بنت الليل في شكلها التقليدي القديم...ملابس قصيرة,غمزات بالعين,سيجارة بمبسم,راكنة على عمود؟
على فكرة دة كان زمااااااااااااااااااااااااااااااااااااااااااااااااااااااااااااااان
دلوقتي بنات الليل لهم شكل مختلف تماما....وبعدين ما بقوش بنات ليل بس....لا ونهار كمان
العاهرة موديل الالفية واحدة عادية جدا....لبسها عادي جدا...غير ملفتة على الاطلاق...ممكن كمان تكون عمرها ما دخنت سيجارة في حياتها ومالهاش في المخدرات كمان
ممكن جدا كمان تكون محجبة
راجع اي واحد صاحبك ليه في النظام دة وهو هيحكيلك حاجات تشيـــــــــــــــــب
===================================
ليه لما بييجي حد ينادي على حد مش عارفه بيناديه بلقب (كابتن)؟
على الرغم انه ممكن جدا يكون مش لابس شورت وفانلة ولا حتى تريننج سوت
وساعات بيكون النداء ب (باشمهندس).....طب اشمعنى؟
ليه مش يا دكتور مثلا...او يا فنان؟
====================================
ليه كل التيشيرتات والباديهات الرجالي والحريمي الشبابي والبناتي والاولادي والاطفالي بيبقى مكتوب عليها بالأنجليزي؟
ليه مافيش اي تي شيرت او بادي مكتوب عليه بالعربي؟
ليه مثلا التي شيرت بدل ما يكون مكتوب عليه
CUTE GIRL
يبقى مكتوب عليه
بنت حلوة
نفس المعنى....بس لو مكتوب بالعربي هيبقى تي شيرت كوميدي انما لو مكتوب بالانجليزي هيبقى تي شيرت شيك جدا
================================
مين اللي قال لعمرو مصطفى انه لازم يغني؟
حرام عليه بجد والله
انا لو اعرف الشخص دة اقتله واقتل عمرو واقتل نفسي
===============================
ليه العرب بيكتبوا حرف الجيم غين؟
يعني ليه الهمبورجر بيتحول ل (همبورغر)....وليه رونالد ريجان بيبقى (ريغان) في الصحف الخليجية...وايه اللي يخلي (مورجان فريمان)يبقى(مورغان فريمان)..حاجة عجيبة جدا؟
هو الجيم عورة اليومين دول ولا ايه؟
====================================
هم ليه الممثلات والمذيعات اغلبهن او 99% منهن مدخنات؟
ايه علاقة الشهرة بالتدخين؟ او ايه علاقة الشاشة بالتدخين؟
هي الممثلة ما تبقاش ممثلة الا لما تبقى مدخنة؟
===================================
مين العبقري اللوذعي صاحب الفكر اللولبي اللي ابتكر اعلانات السياحة بتاعة اليومين دول؟
اعلانات في منتهى السماجة والردالة والغلاسة......
معذور اي سائح ييجي مصر وعنده انطباع غاية في السلبية عن المصريين
ماهو لو كل المصريين بسماجة وغلاسة ابطال الاعلان دة...ولو كل السائحين بتناكة السائحين اللي في الاعلان دة
يبقى يستحسن ان احنا نلغي السياحة دي من مصر بلا وجع دماغ
===============================
امتى هتتطلع محطة تانية بتنافس نجوم اف ام؟
هو احتكار ولا ايه؟
وليه ماعندناش محطات اف ام كتير زي لبنان وزي الخليج واي دولة في العالم المحترم؟
ليه نجوم اف ام هي اللي محتكرة الفضاء الاذاعي؟
ياترى مين اللي وراهم؟
==================================
لولسة المصريين بيلبسوا طرابيش زي زمان.....ياترى كان هيبقى شكلها دلوقتي عامل ازاي؟
ياترى الموضة والروشنة كانت هتزحف لحد ما توصل للطربوش الاحمر؟
يعني كان ممكن نلاقي الشباب لابس طربوش فوشيا واخضر واصفر وكاروهات ومنقوش؟
ممكن نلاقي طربوش جينز وطربوش كتان؟
مش بعيد والله....ماحنا في زمن العجايب
الحمد لله ان الطرابيش انقرضت
====================================
كم عدد المناصب الرسمية والشعبية والشرفية والعملية والبيزنسية للكابتن الصحفي السياسي المناضل الثوري العروبي الوطني احمد شوبير؟
================================
ماهو مصير قضية هالة سرحان وبنات البيتزا..........؟ولو هي في الدرج يا ترى درج مين بالضبط؟ وياترى هتطلع من الدرج ولا خلصت كدة ولا ايه الحكاية؟
========================================
تحديث:
تم نشر مقتطفات من البوست دة بجريدة الدستور العدد الاسبوعي
الأربعاء 19 نوفمبر 2008

Saturday, 1 November 2008

اسمعونــــــــــــــــــــــــــــــي........افهمونـــــــــــــــــــــــــي


انتم ليه كلكم عليا؟
ليه ماحدش منكم راضي يسمع ويفهم؟
ليه مصممين تجعلوني كبس الفدا لأخطاء مجتمع من اوله لأخره غلط؟
ليه مصممين تتعاملوا معايا بأعتباري حرامي في مولد؟
ليه كل واحد لازم يوجب ويديني قلمين؟
غلطااااااااان......؟ اه طبعا انا غلطان ماقدرش انكر
بس هل انا لوحدي اللي غلطان؟
لااااااااااااااااااااااااااااااااااااااااااااااااااااا والف لا
كلنا غلطانين...كلنا بلا استثناء
ذنبي ايه اني اوصل ل 27 سنة ومش عارف اتجوز؟
ايه غلطتي اني اشتغل سواق على عربية نص نقل وانا متعلم؟
ايه ذنبي وكل المؤثرات الجنسية دي موجودة حواليا؟
مين اللي سمح بكل قنوات الاغاني والكليبات المثيرة دي انها تبث ليل نهار؟
مين المسئول ان البنات تنزل الشارع بالملابس دي؟
كل اب وام مسئول عن مأساتي.....كل واحد سايب بنته او مراته او اخته او خطيبته تنزل الشارع بالشكل دة هو المحرض الأساسي للجريمة اللي انا متهم بيها
اه طبعا انا قليل الأدب
لكن مين المسئول عن سوء تربيتي؟
مين اصلا كان ممكن يهتم انه يربيني في مجتمع الكل بياكل فيه بعضه بلا رحمة......مين هيسأل عن تربيتي في مجتمع الاغنياء يزدادون ثراءا والفقراء يزدادون فقرا والنساء تزداد اغراءا والرجال يزدادون شهوة؟
انا مش متعود على كدة
انا عمري ما عملت كدة ؟
ليه من اول غلطة مصممين تحاكموني على اخطاءكم كلها؟
ليه قررتم تحاكموا بتوع وسط البلد وبتوع شارع جامعة الدول في شخصي الضعيف؟
دة ربنا بيغفر ليه ماحدش منكم عايز يغفر؟
ليه عايزين تتهموني بارتكاب كل حالات الاغتصاب اللي بتحصل يوميا في مصر؟
ليه خلتوني مسئول عن خطايا الشباب والبنات فيكي يا مصر؟
مديت ايدي؟؟؟
اه..................تستاهل قطعها
بس اكتر من كدة ماعملتش
ليه كل عقدكم المجتمعية والانثوية مصممين تحلوها بانهاء حياتي وتدمير مستقبلي؟
سجني هو اللي هيصلح اخلاق الشباب؟
ضياع مستقبلي هو اللي هيمنع التحرش والمعاكسات في الشارع؟
الحكم دة هيعمل مني عبرة؟
كان الأعدام منع جرايم القتل اللي بترتكب يوميا
اذا كنت انا ارتكبت غلطة واحدة في حقها
فعفوا انتم ترتكبون جرائم في حقي
سمعتي اتدمرت
مستقبلي ضاع
اصبحت اعيش بماضي ملوث وحاضر مشوه وبلا مستقبل
وكل دة ثمن غلطة واحدة
ياله من ثمن باهظ
حسبي الله ونعم الوكيل
**********************************************
مجرد فضفضة تخيلية لشريف جبريل المتهم بالتحرش بنهى رشدي المخرجة في يونيو الماضي واللي اتحولت لبطلة وتحولت قضيتها لقضية رأي عام
لم يسمع احد لشريف جبريل وتحولنا جميعا لجلادين
محاولة.....مجرد محاولة لتخيل ما يدور في ذهن الشاب دة
لست معه او ضده
ولكني لا انكر اني مستاء من تحويل قضية لقضية راي عام وتحميل شخص واحد ضعيف مسئولية اخطاء مجتمع مليء بالأخطاء والخطايا
اكيد هو اخطأ؟
بس اكيد برضة العقاب كان قاسي قوي....قاسي بجد
ملحوظة
نهى رشدي اسرائيلية طبقاا" للمصري اليوم" 30 اكتوبر 2008
ياترى المعلومة دي هتغير من موقف جماعات المرأة ودعاة الحرية في شيء...ياترى موقف جمعيات حقوق المرأة هيتغير من القضية لمجرد ان نهى رشدي اسرائيلية؟
محاميتها تخلت عنها فور علمها بالمعلومة دي وقررت ان تقف بجانب المتهم شريف جبريل في الاستئناف
هي القضية كانت ضد التحرش بشكل عام ولا ضد التحرش بالمصريات بس ..........انما غير كدة يجوز التحرش بهن
يعني لو نهى رشدي كانت مصرية يبقى شريف جبريل دة يستحق الشنق.....انما بما انها طلعت اسرائيلية تبقى هي اللي تستاهل التحرش واكتر من كدة كمان؟
فعلا منتهى العبث
*الصورة لوالدة المتهم شريف جبريل عقب النطق بالحكم بسجن ابنها 3 سنوات

fb comments

wibiya widget

LinkWithin

Related Posts with Thumbnails