Saturday, 25 October 2008

استاذ بلال فضل....للدستور عليك فضل

الحكاية بدأت اول ما وقعت عيني على المصري اليوم عدد الخميس 23 اكتوبر 2008
ومحتوى الخبر هو ان الكاتب الساخر بلال فضل ورسام الكاريكاتير العبقري عمرو سليم انضما لأسرة المصري اليوم من خلال مقال يومي في الصفحة الأخيرة لبلال ورسم كاريكاتير في نفس الصفحة لعمرو سليم
طبعا الخبر دة لمن يعرف بلال وعمرو هو خبر مفرح جدا فالأول اشهر من نار على علم في الكتابة الساخرة والنقد والثاني رسام كاريكاتير معبر جدا جريء جدا يستخدم ابسط الرسوم لتوصيل اعمق واجرأ المعاني
واجتماعهما معا مرة اخرى شيء مفرح جدا واضافة حقيقية وقوية جدا للمصري اليوم
ولمن لا يعرف او "مش واخد باله" فبلال فضل وعمرو سليم اشهر ثنائي ساخر في الصحافة المصرية حاجة كدة شبه احمد رجب ومصطفى حسين زمااااااان بس على احدث
بلال وعمرو اشتهرا من خلال صفحات الدستور وبالتحديد صفحة (قلمين)بقلم بلال فضل ورسوم عمرو سليم...وطبعا نجحت "قلمين" بشكل كبير جدا وتحولت من صفحة واحدة لصفحتين وتم طبعها في كتاب يحمل نفس الأسم
بلال فضل هو احد مؤسسي جريدة الدستور في اصدارها الأول في منتصف التسعينات مع ابراهيم عيسى وكان ايامها بلال فضل مش بالشهرة دي طبعا وكانت الدستور هي صاحب الفضل بعد الله سبحانه وتعالى وبعد موهبته فيما وصل اليه من شهرة ومكانة كبيرة ككاتب ساخر وساحر ايضا
وكان مصير الدستور في اصدارها الأول هو ان صودرت ومنعت من الصدور بفرمان سيادي....واختفى بلال فضل تقريبا او خفت نجمه قليلا بعد منع الدستور من الصدور
ومع عودة الدستور في اصدارها الثاني برئاسة تحرير ابراهيم عيسى بزغ نجم بلال فضل مرة تانية والمرة دي من خلال صفحة قلمين)...مع رسوم عمرو سليم
ولا ينكر الا جاحد ان بلال فضل كان من اهم اسباب ارتفاع شعبية الدستور بشكل رهيـــــــــــــــــــب وانا اعرف ناس كتير كانوا بيشتروا الدستور فقط من اجل (قلمين) بلال فضل وعمرو سليم
شوية و "عمرو سليم" خلع من الدستور....وتقريبا كان نتيجة خلافات او لأنه مش مرتاح او مش لاقي نفسه وبقيت (قلمين) بس مع بلال فضل فقط بدون عمرو سليم
شويتين كمان ومفيش "بلال فضل" كمان....بس ارجع انسحابه من الكتابة في الدستور الى انشغاله بكتابة سيناريو مسلسل "هيما" وبالتالي مش فاضي للكتابة سواء اليومية او الاسبوعية
ولأول مرة تصدر (الدستور) بدون بلال فضل....واعتقد انها كانت ضربة قوية للدستور بخسارتها احد اهم كتابها ان لم يكن اهمهم على الاطلاق
وتفرغ بلال فضل فعلا لكتابة سيناريو مسلسل "هيما"...مع بعض الكتابات المتفرقة والنادرة للدستور الأسبوعي, وعرض مسلسل "هيما" وانتظرنا عودة بلال فضل لبيته الدستور من خلال مقالاته اليومية الممتعة ......حتى كان يوم الخميس 23 اكتوبر
بلال فضل في المصري اليوم
مش عارف ليه جالي شعور سلبي تجاه "بلال فضل" بالذاااات مش بلال وعمرو سليم....لأن ارتباط بلال فضل بالدستور ارتباط قديم وعميق...يكفي ان الدستور كانت بتبيع على حس بلال فضل...يكفي ان الدستور وبلال فضل عملوا بعض....بلال فضل صنع اسم وشهرة عريضة للدستور....والدستور هي اللي قدمت بلال وعرفت الناس ان في كاتب رائع اسمه بلال فضل
الدستور دلوقتي جريدة يومية.....والمصري اليوم جريدة يومية...واذا استثنينا جرائد الحكومة والحزب الوطني يبقى اهم جريديتين متنافستين في سوق الصحافة هما المصري اليوم والدستور
لما بلال فضل يترك الدستور ويكتب عمود يومي في المنافس الرئيسي يبقى ممكن نسمي ايه غير انه ضربة في الصميم من بلال فضل لجريدة صنعت اسمه
انا قارىء دائم للمصري اليوم واحترم هذه الجريدة جدااا ولا انكر اني احد عشاق الدستور منذ اصدارها الأول ولا يوجد عندي ادنى اعتراض على المصري اليوم كجريدة.....الا ان اعتراضي على بيع بلال فضل للدستور..اعتراضي على فقدان الأنتماء للمكان...للوطن...الدستور بالنسبة لبلال فضل هي الوطن وبيع بلال فضل للدستور هو بيع للوطن
من وجهة نظري طبعا
كتبت على جروب عشاق الكاتب بلال فضل على الفيس بووك
الكومنت دة على خبر انضمام بلال فضل لأسرة المصري اليوم
مع كامل حبي وتقديري واعجابي ىبالثنائي الناجح بلال فضل وعمرو سليم الا ان تركهم للدستور واتجاههم للمصري اليوم اثبت ان الماديات هي رقم واحد واتنين وتلاتة بالنسبة لهم ومش بعيد نلاقيهم في روز اليوسف قريبا لو دفعوا اكترمعلش انا اسف بس فكرة تخليهم عن الدستور بكل السهولة دي فكرة مش مستساغة على الاطلااااااااااق ويا استاذ بلال ياللي بتنادي بالشفافية والصدق و بتنتقد كذب المسئولين وخداعهم....ماقلتش من الاول ليه ان ترككم للدستور بسبب مشاكل او خلافات او انك مش مرتاح في الكتابة؟ايه لازمة اصلي مش فاضي...وماعنديش وقت وماشتبه...استاذ بلال.......يا خوفي لتبقى ذكرى لبني ادم رائع
اعرف ان الكومنت قاسي وخالي من اللياقة..بس فعلا انا زعلان من فك الأرتباط بين بلال و الدستور..وحاسس ان بلال فضل قد تخلى عن الدستور وسلم نفسه لمنافستها الرئيسية في عالم الصحافة
الا ان المفاجأة ان الاستاذ بلال فضل بنفسه علق على الكومنت القاسي دة بنفسه من خلال السطور التالية
أهلا بيك ياأستاذ أحمد وشكرا على ذوقك وعلى حسن ظنك
بالنسبة للماديات مش عارف أقولك إيه غير إنك تقول عدس عشر مرات لإنك لو سألت هتعرف أن ثمن مشهد في سيناريو بكل اللي ممكن آخده في كل الجرايد مجتمعة.. وده بحمد الله.. وأنا عندما أعرض مصالحي للخطر بسبب مواقفي فإني أفعل ذلك لكي أبرئ ذمتي وأريح ضميري
لن أتحدث بما يسيئ للدستور أبدا ولن أطلب من أحد سوى أن ينظر إلى ماأكتبه وليس إلى أين أكتبه
شكرا لك على حسن ظنك في والمهم أن يكون ماأكتبه عند حسن ظنك
بلال
وطبعا لم يكن من السهل علي ان دة يكون اسلوبي في الحوار مع كاتبي المفضل وان يكون دة رده عليا وبالتالي كان تعليقي التالي
ستاذ بلال انت مش عارف قد ايه انا بحبك وبحترمك وبقدرك ومش عارف قد ايه انا بأحترم المصري اليوم و بأعتبرها هي الصحيفة الأمل والحلم
بس انا كنت بأعتبر تجربتك في الدستور الاصدار الاول مع ابراهيم عيسى هي قصة نجاح لازم نحافظ عليها.....لازم نتحاكى بيها ونتكلم عنهااستاذ بلال بيكون صعب قوي على ناس عاشت حلم الدستور في اصدارها الاول والثاني ان تلاقي الحلم دة بيتلاشى...بينتهي
استاذ بلال انا اسف اذا كنت اتكلمت معاك بأسلوب غير راقي....بس دة والله من حبي واحترامي وتقديري ليك
استاذ بلال انا لما قابلتك في معرض الكتاب اللي فات واتصورت معاك..كان حدث تاريخي..صورة مازلت محتفظ بها على الموبايل لحد دلوقتي دة انا من كتر حبي فيك وفرحتي بالتصوير معاك عملت بوست في المدونة عندي بعنوان
انا اعشق هذا الرجل
وكنت انت هذا الرجل
بلال ا نا اسف على تجاوزي في النقد...لأن دة من العشم
والف شكر لك على اهتمامك وردك لأن دة مش غريب عليك
مع حبي
احمد سمير
انتهى السجال المفاجىء مع استاذ بلال فضل على صفحات الفيسبووك.......رد الاستاذ بلال علي اثبت ان فعلا في شيء ما في علاقة بلال فضل بالدستور سواء بينه وبين ابراهيم عيسى او رئيس مجلس ادارة الجريدة
استاذ بلال
سأستمر اقرأ لك سواء كتبت في الدستور او المصري اليوم او حتى الواشنطن بوست..فأنت كاتبي المفضل شئت ام ابيت....بس ارجوك لا تنكر عليا انزعاجي وضيقي من ذكريات جميلة ارتبطت بصولاتك وجولاتك على صفحات الدستور
ولا تطلب مني ان اتعامل معك بأعتبارك محترف يكتب في اي مكان
فأنت مش لاعب كرة قدم فقد انتماءه للمكان ويلعب من اجل المال والشهرة
فلا انت حسام حسن ولا الدستور هي الأهلي واكيد المصري اليوم مش زي الزمالك

Monday, 20 October 2008

انا والشروق والحكيم

اول حاجة بأعملها اول ما ادخل مول "سيتي ستارز" حيث فسحتي المفضلة في القاهرة هو التوجه الى جناح "دار الشروق"....لدرجة اني بتعمد اني ادخل من الباب الخارجي المؤدي لها بسهولة بدلا من الدخول من الباب الرئيسي للمول لأني فعلا بأكون متشوق للدخول لدار الشروق فعلا ومعنديش وقت اضيعه في اللف في المول
الأول اشبع رغبتي في التوجه لدار الشروق وبعدين ممكن اعمل اي حاجة تاني
والحقيقة ان "دار الشروق" في كل مرة لا تخذلني وانما (تبهرني) ....طريقة عرض مغرية جدا...كتب جديدة كل مرة...ركن للأكثر مبيعا...ركن للأحدث........ركن للتراث واخر للسياسة واخر للاقتصاد...وهكذا
عدد الكتب كبير جدا قياسا بحجم الجناح وهو ما يؤدي الى ان عددا كبيرا جدا من الكتب يكون متواريا عن النظر ولابد من البحث والتدقيق من اجل الوصول الى الكتاب المراد او مجرد تصفح الكتب دة طبعا اذا كنت لا تفضل الاستعانة بأحد العاملين بالمكتبة وهم شباب على درجة عالية من اللياقة والكياسة وحسن المظهر
واذا قررت طلب المساعدة ستجد الاجابة على تساؤلك فورا حيث ان المكتبة بالكامل مجدولة ومفهرسة على الكومبيوتر وبالتالي سءالك عن اي كتاب بالتأكيد ستجد عليه جوابا فوريا
الجميل برضة في جناح "دار الشروق" انه لا يبيع مؤلفات واصدارات دار الشروق فقط وانما جميع الاصدارات لجميع دور النشر فستجد هناك اصدارات "ميريت" و"الدار" و"اكتب"و اصدارات معظم دور النشر العربية واللبنانية وبالتأكيد بالنسبة لي كقارىء غير قاهري بيكون اكثر راحة لي اني الاقي جميع الاصدارات لجميع دور النشر في مكان واحد يتميز بسهولة العرض والشياكة والفخامة ناهيك عن انه كمان في احد اكبر مراكز التسوق والترفيه في مصر وبالتالي هتضرب اكثر من عصفور بحجر واحد
معظم قراءاتي خلال الفترة الماضية تركز اكثر على الاجيال الجديدة من الكتاب والمؤلفين...وبالأخص اصدارات "ميريت"..معظم اصدارات ميريت بتكون لوجوه جديدة بتشق طريقها في عالم الأدب زي احمد مراد وروايته الجميلة "فيرتيجو" وسبق لي ان كتبت عنها تدوينة وزي "ان تكون عباس العبد" وزي كمان "قمر على سمرقند"....الخ من الكتب والاصدارات الجميلة
لم يسبق لي على الاطلاق ان قرأت رواية لأحد فطاحل الادب المصري الراحلين زي احسان عبد القدوس ويوسف ادريس ويوسف السباعي وتوفيق الحكيم...الخ
كنت دايما اقول لنفسي وانا اقرأ للناس القديمة دي ليه؟ تلاقيهم بيكتبوا كتابة قديمة بمصطلحات قديمة وبأسلوب غير مستحب وغير مستساغ بالنسبة لي....انا عايز يا عم اقرأ حاجة واقعية بتمسني وبتمس حياتي ومجتمي وبتنكأ جرح في نفسي مش في نفس ابويا او جدي
وفضلت ماشي على النهج دة في القراءة والثقافة لحد زيارتي الاخيرة في العيد لدار الشروق
قلت اتفرج على الكتب اللي مش ع الوش...الكتب اللي مش (على وش القفص).....الكتب اللي مستخبية....وقعت في ايدي رواية اسمها "عودة الروح" لتوفيق الحكيم...انا كنت اسمع ان في مؤلف لتوفيق الحكيم اسمه "عودة الروح" انما ماعنديش اي معلومات عنها هل هي قصة ام مسرحية ام رواية
مش عارف ليه اتشديت للرواية دي وقررت اقتنيها واقرأها على الرغم ان دة ضد نهجي الثقافي..بس قلت اجرب مش هاخسر حاجة لو طلعت رواية حلوة يبقى كسبت اني قرأتها ولو طلعت مش ولابد بالنسبة لي طبعا يبقى كسبت اني اثبت ان مزاجي الثقافي لا يتفق مع ادب العمالقة واني كنت صح
بعد قراءتي للرواية دي اقر واعترف وانا في كامل قواي العقلية اني غلطاااااااان غلطان غلطان وان توفيق الحكيم دة اديب حرام انه ما يبقاش عالمي
وعلى الرغم ان الرواية دي تم كتابتها سنة 1927 وتم طرحها للأسواق عام 1933 الا انها تبقى صالحة للقراءة وبث المتعة لقارءها عام 2008
الرواية بتقع احداثها قبيل ثورة 1919 واقدر اقول عنها بالفم المليان انها رواية شاملة كاملة فيها الكوميديا وفيها التراجيديا فيها الجد وفيها الهزل فيها السياسة وفيها الرومانسية فيها عظمة الفلاح المصري وفيها قهره .....فيها الثورية والوطنية..رواية هتضحك وهتبكي هتتفاعل مع ابطالها هتحزن لما تنتهي من قراءاتها لأحساسك انك هتفتقد الناس دي
بعد انتهائي من قراءة الرواية بحثت عنها على الانترنت لأعرف ما كتب من نقد وتحليل لرواية "عودة الروح" اكتشفت معلومات مذهلة لأول مرة اولها ان بطل الرواية ومحور الاحداث "محسن" هو توفيق الحكيم نفسه وان رواية "عودة الروح" انما هي سيرته الذاتية في فترة حياته الاولى كطالب في الكفاءة وهي توازي اولى ثانوي حاليا
عرفت كمان ان الرئيس(جمال عبد الناصر) قلده قلادة الجمهورية سنة 1958 تقديرا له على رواية (عودة الروح) اللي تنبأ فيها سنة 1927 بظهور البطل المنتظر اللي هيلتف حواليه المصريين خصوصا الفلاحين نحو هدف واحد وهو النهوض بمصر و رفعها عاليا في مصاف الامم المتحضرة
بعد انتهائي من رواية "عودة الروح" قررت ان اكون "حكيمي" اي من دراويش ادب توفيق الحكيم وان احاول اقتناء مجموعته كاملة سواء الروايات او المسرحيات او الكتب الفلسفية (له اكثر من 100 مسرحية و 62 كتاب بين قصة ورواية وفلسفة)...وان شاء الله سأتمكن من ذلك
شكرا لدار الشروق اهتمامها بأعادة طباعة روائع الأدب العربي طباعة فاخرة واحياء تراث كبار الأدباء والكتاب حتى يستفيد صغار القراء
حقا القراءة متعة...ومتعتها تكمن في ان تنفصل تماما عن عالمك و تغوص في اعماق شخصيات اخرى تعيش وتتعايش معهم بقلبك وعقلك ومشاعرك لعل هذا التقمص والتعايش ينسيك ولو لدقائق واقعك المؤلم
ربما العودة لمصر1919 تكون هي العزاء لأحباطات مصر 2009

Thursday, 16 October 2008

تاج......والتاج دين

تاج وصلني مرتين من اختين عزيزتين
بس بس : مدونة الروح
رانيا:feelings مدونة 
وبالتالي اصبح التاج امر واجب النفاذ
نبدأ بقى التاج على بركة الله
---------------------------------------
بدأت تدوين من أمتى ودخلت عالم التدوين ده أزاى ؟
بدأت تدوين بالضبط يوم 30 ديسمبر 2006 وكان اول يوم في عيد الأضحى بالمناسبة...ودخلته بعد ما سمعت عن حاجة اسمها مدونات وهي عبارة عن صفحات شخصية اي حد بيكتب فيها اي حاجة هو عايوها سواء اكانت شخصية او انطباعاته واراءه في قضايا عامة
أيه كان أنطباعك فى البداية ؟
مش اكتر من راحة وسعادة لتفريغ افكار وخواطر من الدماغ لشاشة الكومبيوتر عبر الكيبوورد وبالتالي بتحس ان دماغك فضيت وفضيت مكان جواها لأفكار وخواطر تانية وهكذا
مين أكتر واحد بتهتم بتعليقه على بوستك الجديد ؟
كل تعليق على اي موضوع بحطه فوق دماغي....يكفي ان الشخص دة عبرني وكلف خاطره وضحى بوقته علشان يقرأ الموضوع بتاعي ومش مجرد انه يقرأه دة كمان يعلق عليه
بجد بأقدر دي جدااا
أيه أهم حاجة أتعلمتها من عالم التدوين ؟
ان في افكار عجيبة جدا في الحياة....وان اللي يعيش ياما يشوف...وان زي مافي مدونات وهي اغلبية بتحتوي على افكار قيمة وثمينة وخواطر رائعة
في كمان مدونات شاذة جدا ضد الأديان وضد الاخلاق العامة وضد الطبيعة والفطرة
بس التدوين وتصفح المدونات علمني اني لا اندهش ولا اتعجب
انها ارادة الله
أيه أكتر حاجة كرهتها ؟
التعالي من بعض المدونين في التعامل مع التعليقات ومع زوار مدوناتهم
بتلاقي في مدونين كتير ولا داعي لذكر اسمهم بيفرحوا قوي بكم التعليقات اللي بتنهال على مدوناتهم ولا يهتموا بالرد على التعليقات دي
مش كدة وبس دول حتى لا يهتموا برد الزيارة للي علقوا عندهم
وكأنهم اعلى واكبر من انهم يعلقوا عند اي حد
او يمكن وقتهم الثمين بيمنعهم من كدة
حاسس أن التدوين له تأثير ؟
انا بأشوف ان لسة التدوين لم يقدم التأثير المطلوب في المجتمع
لسة برضة مجتمع التدوين محدود وقاصر على افراده الا قلة من المدونات المعروفة بالاسم واللي انتقلت بالتالي من خانة التدوين لخانة المكتبات وتم طرح موضوعاتها في كتب
انما لو سألت مثلا 10 شباب بشكل عشوائي تعرف ايه عن المدونات؟
اعتقد ان 6 منهم ممكن يكونوا مايعرفوش يعني ايه تدوين من الاساس......
انا بأشوف ان لسة المدونات لم تؤثر في الناس ولا المجتمع
******************************************
اهدي التاج دة لكل الاهل والاقارب والخلان واللي مشرفنا
واللي يحبنا ما يضربش نااااار

Sunday, 5 October 2008

قطط بريئة وسط غابة من الذئاب



في موضة اليومين دول طالعة جامد قوي الا وهي
اضطهاد الجنس اللطيف في مصر
افتح جورنال الاقي موضوع عن التحرش الجنسي المنتشر في مصر بشدة لدرجة ان 83% من بنات وسيدات مصر يشكون من التحرش الجنسي بهن
افتح تليفزيون الاقي سيدة مجتمع تشكو من اضطهاد المرأة في مصر وعدم حصولها على حقوقها المهنية والوظيفية على الرغم من كفاءتها ونبوغها
افتح الراديو الاقي موضوع عن انعدام الذوق او كما سماها المذيع "الجنتلة" من شباب مصر ورسائل قصيرة تنهمر كالمطر على البرنامج من بنات وانسات ومدامات يشكون مر الشكوى من انعدام الذوق واللياقة ويا حسرة على الجنتلة اللي على حد تعبير احدى المتصلات بالبرنامج:
الجنتلة.......الله يرحمها
قفلت الراديو وبصيت في المرايا تخيلت نفسي بعد كل الشكوى دي في صورة ذئب بشري....وحش ادمي....عمال ينقط من فمه دماء انثى مضطهدة متحرش بها مهيضة الجناح لا حول ولا قوة الا بالله
طبعا كما هو واضح...فالأمر ليس بهذه الصورة التي تحاول وسائل الاعلام تصوير المرأة المصرية بها..او التي تحاول بنت مصر موديل 2008 ان تصور نفسها
فأذا ناقشنا مثلا ظاهرة التحرش الجنسي...سنجد ان مصطلح التحرش الجنسي كما شملته الدراسة يشمل من المعاكسة اللفظية وحتى الاغتصاب الجنسي
بمعنى ان لو واحدة ماشية في الشارع وحد قال لها....(يا جميــــــــــــــــــــــــــــــــــــــــــــــــــل) مثلا..فانها تعتبر نفسها متحرش بها جنسيا زيها بالضبط زي من تعرضت لأغتصاب جنسي
وبالتالي ظهرت النسبة لمن تعرضن للتحرش الجنسي بهذه الضخامة
انما السؤال هنا
يا ترى المتحرشات مش فاكرين هم كانوا لابسين ايه لما تم التحرش بهن؟
يا ترى بنطلون جينز ضيق ولا جيبة قصيرة ولا بادي ناري؟
ليه بتحرموا على الشباب ان يستثاروا وبتحللوا لنفسكم الاثارة
اعلم طبعا ان عدد غير قليل من المتحرش بهن ملابسهن محترمة وغير مثيرة على الاطلاق..بس يا ترى اخبار النظرة ايه؟ اخبار طريقة المشي ايه؟
وهي الاثارة ملابس فقط؟؟؟؟؟؟؟
اما بقى من يشكون من اضطهاد المرأة مهنيا وعدم حصولها على فرصتها وظيفيا فهو عار تماما من الصحة على الاقل من خلال مجتمعي و احتكاكي بعدد كبير من المؤسسات الخاصة
فأنا عن نفسي مديرتي المباشرة سيدة ومديرتها سيدة واغلب الوظائف القيادية بمكتب الشركة تحتلها سيدات....وهو حال عدد كبير من الشركات والمؤسسات العاملة في مجال الدواء وصناعته
فأغلب قيادات الصيدلة سواء في وزارة الصحة او الشركة المصرية لتجارة الأدوية من السيدات
وبالتالي بالنسبة لي على الاقل فأن اي شكوى من اضطهاد حواء في العمل لا يمكن الرد عليه الا بكلمات لا اسمح بنشرها في مدونتي على اعتبار انها مدونة نظيفة
اما الاخوات بتوع الراديو اللي بيشتكوا يا حرام من انعدام الذوق او اللي بيسموها "الجنتلة"من الشباب المصري المتوحش...وانهن يا حرام بيعانين من قلة الذوق واللياقة سواء في المواصلات العامة او حتى الخاصة وبيشكون مر الشكوى من ان الشباب لا يحترم انوثتهن ويزاحمهن على المقاعد في وسائل المواصلات وعلى الطوابير المختلفة وان معدش في حاجة اسمها
في هذا الزمن الرديءLadies First
اقول لهن....نفسي اعرف انتم ليه ما بتفتكروش انكم بنات الا في المواقف دي بس...في مترو الانفاق...في طابور عيش....الخ
ليه ما بتفتكروش "الجنتلة" وانكن مكسورات الجناح عند التقدم لوظيفة...وبتطالبن بالمساواة وان البنت زي الولد
ليه البنت بتكون زي الولد بس في الجامعة لنا بتتخانقوا على تقدير وتعيين...وليه ساعتها مش حاسين انكن كائنات ضعيفة لا حول لها ولا قوة؟
ليه ساعة ما بتطلب معاكوا مساواة و قوة بيبقى البنت زي الولد...ماهيش كمالة عدد وان البنت اكثر جدية وكفاءة من الولد ولازم تاخد حقها تالت ومتلت؟

وليه ساعة ما تحتاجوا الحصول على مزايا الانثى بيختفي الكلام عن المساواة والعدالة والذي منه....وتبدأ اسطوانة (مفيش اخلاق يا بشر....فين النخوة بتاعة زماااان.....شباب بايظ......مفيش تقدير للأنوثة في البلد دي ولا ايه؟).....جننتونا بجد
في النهاية
انا لست ضد المرأة على الاطلاق....ولكني ضد التهويل والمبالغة وادعاء الاضطهاد بلا اي سبب واي مبرر...ضد تصوير مجتمعنا على انه مجموعة من القطط البريئة تحيا وسط جماعات من الذئاب البشرية المتوحشة
اذا كنا مجموعة من الذئاب.....فأنتن ايتها القطط الجميلة من تثرن غريزة الشر والتوحش في نفوسنا

fb comments

wibiya widget

LinkWithin

Related Posts with Thumbnails