Thursday, 25 September 2008

رأي واحد زهقان من تليفزيون رمضان

اوشك الموسم الدرامي الرمضاني على الانتهاء بحلوه ومره
بالتأكيد كمية الدراما الرمضانية هذا العام سواء كوميدية او تراجيدية كانت كبيرة جدا..تصيب اي متابع بالتخمة وعسر الهضم
اتحدى اي مشاهد ان يكون قد تابع جميع الاعمال الدرامية الرمضانية....مهما تفرغ لهذه المهمة الصعبة..فكمية القنوات الفضائية زاد بشكل رهيب عن العام الماضي لدرجة "التورم" او التضخم
كمية المسلسلات الدرامية ازدادت بشكل هيستيري...كمية برامج الفكاهة اصبحت مبالغ فيها جدا....ناهيك عن البرامج الحوارية وكم الاعلانات التليفزيونية الفظيعة
البوست دة للذكرى...تقييم متواضع من مشاهد لمواد اعلامية وتليفزيونية تم عرضها في رمضان....رأي قد يحتمل الصواب او الخطأ..قد يحتمل التأييد او الخلاف معه..لكنه يبقى مجرد رأي
*****************************
اولا: الاعلانات
طبعا نجم الاعلانات السنة دي بيتنافس عليه "فودافون" و"كريم عبد العزيز" بحملة اعلاناته المميزة عن كوكاكولا
فودافون عملت كمية اعلانات السنة دي رهيبة...حملة اعلانية ضخمة فعلا ومبذول فيها مجهود كبير ويمكن تقسيمها لحملتين اعلانيتين
الحملة الاولى وابطالها نجوم الفريق الكروي بالنادي الاهلي وهي اعلانات قصيرة جدا قد لا تتجاوز مدة الاعلان الواحد 10-20 ثانية ولكنها معبرة عن رمضان بجملة او جملتين
الحملة الثانية و هي حملة "نتكلم بالليل" اللي اعتقد انها حققت نجاحات جماهيرية كبيرة جدا ولاقت استحسانا من الجماهير لخفة ظلها و عدم معقوليتها ومن هنا بتكمن طرافتها الشديدة
الغريب والعجيب ان الحملة الاعلانية "نتكلم بالليل" ووجهت بانتقادات من بعض الاشخاص باعتبارها تعبر عن سلبية المصريين وانا اعتقد ان دة فيه تحميل للاعلان اكثر مما يحتمل
اما حملة "كوكاكولا" بطولة "كريم عبد العزيز" فلفتت الانظار بشدة وجذبت انتباه المشاهدين لخفة دم كريم عبد العزيز طبعا...ولأول مرة تنجح الحملة الاعلانية لكوكاكولا في مواجهة الحملة الاعلانية لغريمتها اللدود "بيبسي" بقيادة احمد حلمي
على الرغم ان "احمد حلمي" يتفوق كوميديا بخطوات واسعة على"كريم عبد العزيز" الا ان اعلانات كوكاكولا كانت اقوى بكثير من اعلانات بيبسي
ربما ان تكلفة الانتاج كانت اكبر...ربما ان سيناريو الاعلان كان افضل..الا ان هذا هو ما حدث فعلا
بس انا عن نفسي وبعيدا عن حرب الاعلانات..بتبقى بيبسي بالنسبة لي هي الافضل طبعا
اما بقية طوفان الاعلانات...فسيختفي بمرور الوقت بدون اي بصمة او اثر على المشاهد
من الحملات الاعلانية المميزة برضة حملة "اتصالات" (مرن بقك)..طريفة برضة وجديدة خاصة تمرينات البق العجيبة اللي في الاعلان
فكرة جديدة وغير متوقعة
انما طبعا لا يمكن ان ننسى غتاتة ورخامة بعض الاعلانات....اللي كادت ان تفسد صيامنا زي اعلان بطاطس "فوكس" للممثل "احمد التهامي" بما تحتويه من بلاهة في الفكرة والتمثيل والممثلين





********************************
ثانيا: المسلسلات
طبعا تميز رمضان السنة دي بكمية كبيرة من المسلسلات بشكل غير مسبوق...لدرجة انك لو بتتابع اكثر من مسلسل ممكن جدا يحصل تداخل بين المسلسلات واحداثها مع وجود نفس الممثل في اكثر من مسلسل
واضح ان تيمة المسلسلات الرمضانية السنة دي هي (العشوائيات)....وكأنهم افتكروا فجأة ان في مصر ناس "عشوائيين"....بس الغريب ان الممثلات اللي المفروض انهن عشوائيات..مش عارفين يكونوا عشوائياااات خالص...ملامحهم مش جايبة ملامح عشوائية خااااااااالص
تخيل بقى لما تبقى داليا البحيري عشوائية ولا غادة عادل بتاعت شاي ولا هند صبري خادمة......اومال انعام سالوسة تطلع في دور ايــــــــــــــــــــــــــــــــــــه؟؟؟؟؟؟؟؟
من ضمن المسلسلات اللي تابعتها عن قرب او حتى تابعتها عن بعد.."طشاش" يعني قائمة ببعض المسلسلات:
الدالي: صراااااااااااااااااااااااااااااااااااااااااااع صراع..المسلسل عبارة عن حرب بين نور الشريف والمافيا...وانا بتفرج على مسلسل الدالي بأحس ان الدنيا صغيرة قوي..الحياة لا يوجد بها الا صراع الدالي مع المافيا
طبعا نور الشريف اداءه اكثر من رائع وكذلك معظم ابطال العمل بس الصراع ممكن يصيب المشاهد بالملل خاصة المبالغة في الصراع دة اللي محدش شايف له نهاية
في اشاعة عن جزء ثالث من المسلسل.............ياريت بلاااااااااااااااااااااااااااااااااااااااااااااااااااااااااااااااااااااااش
شرف فتح الباب: مش عارف اقيم المسلسل دة......تحس كدة بوجود حاجز نفسي يمنعك انك تحب المسلسل دة....هالة فاخر لما بتخرج من عباءة الكوميديا بتكون فعلا مبدعة جداا...يحيي الفخراني كان اكثر ابداعا في "حمادة عزو" السنة اللي فاتت..او يمكن من كتر نجاح "يتربى في عزو" السنة اللي فاتت في حالة فتور تجاه شخصية "شرف فتح الباب"...او يمكن القصة كئيبة....او يمكن القصة مكررة..او لأنك من السهل توقع الاحداث....في حاااااجة غلط
هيمة: مش هاقول غير كلمة واحدة
....بلال فضل
كلمة السر في نجاح المسلسل دة
ايه السيناريو دة؟ قوي جدا....سيناريو تحس ان اللي كاتبه مش عايش في برج عاجي...مصطلحات فعلا بتاعت الناس اللي تحت....كلمات بتاعتنا..مننا...احنا فعلا بنقول كدة
هو دة بلال فضل
احمد رزق.....كان ممكن الدور دة ما يبقاش بتاعه...ممكن نتقبل اي ممثل تاني...الدور اضاف له لكنه هو لم يضيف للدور كثيرا
عبلة كامل.....واضح انك استقريتي خلاص في دور السيدة الشعبية...من خالتي فرنسا وحتى ام هيمة..ربنا يرجعك بالسلامة
قلب ميت: انا عن نفسي بأرشحه احسن مسلسل رمضاني....شريف منير اكثر من رائع....مولود من بطن امه بيمثل..هو ماعدش ليه في مواهب بالشكل دة الايام دي...غادة عادل..ممكن يتقال عليها...(شغااال)..على الرغم انها مش عارفة تتخلى تماما عن ارستقراطية ملامحها..بس ماشي
قصة جميلة...شيقة..سيناريو قوي....اخراج جامد جدا
مسلسل حلـــــــــــــــــو
اما بقى عن بقية المسلسلات وما اكثرها فهي يا اما متابعة حلقة اه و 10 لا يا اما عن بعد تماما يا اما ماعرفش عنها اي حاجة على الاطلاق
ملحوظة
فكرت في اول رمضان اني اتابع مسلسل خالد صالح وهند صبري (بعد الفراق)...بس اول ما شفت خالد صالح طالع في دور طالب جامعي...اتصدمت صدمة شديدة جدا كان من نتيجتها الامتناع تماما عن متابعة المسلسل دة لسببين:
السبب الاول هو ان الكتاب بيبان من عنوانه وبالتالي الكتاب بانت لبته من الحلقة الاولى
السبب التاني اني اتعودت عدم احترام من لا يحترمني...وبما انهم لم يحترموني -كمشاهد طبعا- باعتبار خالد صالح ينفع يكون طالب جامعي يبقى بالتالي وجب عدم احترام عملهم



**********************************
ثالثا: برامج الست كوم
كعادة الشعب المصري في جميع المجالات
استغلاااااااال النجاح
ونظرا لنجاح "راجل وست ستات" ومن قبله"تامر وشوقية" فلقد قرر المنتجون اغراق القنوات الفضائية بمسلسلات الست كوم
واللي اغلبها ان لم يكن كلها طلعت ماسخة وبلا اي طعم او لون او رائحة وهيكون مكانها الطبيعي هو النسيان التااااام
دة حتى اللي اثبتت نجاح قبل كدة زي راجل وست ستات او تامر وشوقية اظهرت فشلا غير عادي السنة دي و دة برضة بسبب نفس العلة الازلية اياها
استغلال النجاح
بيستغلوا نجاح الجزء الاول في انتاج الثاني...وبيستغلوا نجاح الثاني في انتاج الجزء الثالث وهكذا وغالبا كل جزء بيكون اضعف كثيرا من اللي قبله
لدرجة ان الممثلين التراجيديين واللي عمرهم ما مثلوا كوميديا قرروا يدخلوا سبوبة الكوميديا من خلال الست كوم....لما بسمة تبقى كوميديانة ولا خالد النبوي يكون نجم الكوميديا الاول يبقى دة نسميه ايه غير انه سبوبة
بجد بقى ارحمووووووووووووووووووووونا
ومع كامل احترامي وحبي لمسلسل "راجل وست ستات" وكمان "تامر و شوقية" الا انه كفاية قوي كدة عليهم.....راجل وست ستات عملوا 5 اجزاء
وتامر و شوقية في الجزء الثالث ومع انسحاب "هيثم دبور" من بطولة الحلقات فقد المسلسل الكثير من شعبيته وقوته


****************************
رابعا: الافلام
لا افلاااااااااااااااااااااااااام في رمضان
سبحان الله....الواحد مالوش اي طقطان يتفرج على اي فيلم في رمضان
بجد والله كان الله في عون صناع السينما لما رمضان يبتدي يقرب من شهور الصيف يوليو و اغسطس.....دة كدة ممكن جدا نتوقع افلاس صناعة السينما في ال 10 سنوات القادمة بسبب تعارض شهر رمضان مع الموسم السينمائي الصيفي
بس هو برضة فرصة كويسة لعمل صيانة سنوية لدور العرض السينمائي
******************************
خامسا: القنوات الفضائية
تنافس رهييييب بين القنوات الفضائية والارضية في رمضان مع التورم في عدد المحطات الفضائية سواء كانت عامة او متخصصة
كل المحطات الفضائية ازدحمت بالبرامج والمسلسلات والحصريات
بس انا شايف ان رمضان السنة دي هو رمضان قناة (الحياة) او قناتي الحياة لانهم قناتين واحدة عامة والثانية مسلسلات
فعلا قناة الحياة في رمضان قناة متميزة جدا....افضل المسلسلات....افضل البرامج سواء الترفيهية او الدينية
الجميل فعلا ان القناة دي قناة مصرية...ودة صراحة بيرضي غروري كمصري بعد سنوات طويلة من التفوق الواضح لل (ام بي سي) و (ايه ار تي) السعوديتين
كمان رمضان السنة دي برزت فيه بشدة قنوات مصرية زي (بانوراما دراما) و زي (او تي في)..معلش بقى نوع من التحيز للاعلام المصري الغير حكومي طبعا بس فعلا هي قنوات تستحق لانها بذلت مجهود كبير



******************************
سادسا: الممثلين
نور الشريف: عملااااااااااااااااااااااااااااااااااااااااااااااااااااق....بس وحشتنا يا استاذ نور في اعمال جديدة..سنتين دالي مرشحة لانهم يبقوا 3 سنين كتير....اشتقنا لأبداعات جديدة
يحيى الفخراني: واضح ان لعنة حمادة عزو هتستمر معاك لسنة كمان....شخصية (شرف فتح الباب)..ما اقدرتش تنسينا شخصية (حمادة عزو)..تراي اجين لااااتر
خالد صالح: ركز في السينما شويــــــــــــــــــــــة..حاول تأخد اجازة من التليفزيون....معلش يا عبقري محدش بياخد من الدنيا كل حاجة..انت استاذ تمثيل بس واضح ان هواك مش جاي مع الشاشة الصغيرة
احمد رزق: انت ممثل جامد كوميدي وتراجيدي....و"هيمة" مسلسل جامد نصا واخراجا....وكاست التمثيل معاك جامدين جداا...بس برضة في حاجة غلط....شكل الدور ماكانش لك من الاول يا بو حميد
شريف منير: انت فيــــــــــــــــــــــــــــــــــــــــن يا راجل من زماااااان؟
والنبي ما تبقى تغيب عنا قوي كدة
بعد اللي شفناه في "قلب ميت" هننتظر ابداعاتك سنويا
بس وحياتك يا شيخ ما تدخلش الغيبوبة تاااااااااااااااااااااااااااااااااااني
مجدي كامل: ابدعت بجد والله..ربنا يوفقك....بس حظك السيء انك جسدت الشخصية دي بالذات..كان الله في عونك من محبي قبل كارهي الشخصية دي
احمد صفوت: شخصية "خالد الدالي" اثبتت انك ممثل مبدع....وشخصية "المشير عامر" اثبتت انك ممثل واعد....مستنيين بقى الشخصية اللي هتثبت لنا انك ممثل هاااااايل و قدير


********************************
سابعا: الممثلات
عبلة كامل: اخرجي بقى من عباءة "خالتي فرنسا" و "رزقة" عفاريت السيالة..اكيد عندك اكتر من كدة بكتيـــــــــــــــــر
غادة عادل: مع كامل احترامي لمجهودك الكبير المبذول في "قلب ميت" الا ان ملامحك لم تقنع الكثيرين انك "بسمة" بتاعت الشاي...معلش بقى قدرك كدة....دي ضريبة الجمال
هند صبري: ماقدرتش اتابعك بعد صدمة الحلقة الاولى لما شفتك انتي و"خالد صالح" مراهقين في الجامعة....هحاول مرة تانية بعد رمضان ان شاء الله
سوسن بدر: نضوج فني كبير جدا.........الدهن فعلا في العتاقي
هالة فاخر: مبروك عليكي خروجك من عباءة الكوميديا الهزلية.....اهلا بيكي في التراجيديا والدراما الهادفة
دورك في فيلمي "هي فوضى" و "حين ميسرة" اثبتوا انك فعلا كنتي مظلومة وظهرتي كفنانة متأخرة جدا....و دورك في "شرف فتح الباب" اثبت ان شاهين كان عنده حق
الهام شاهين: "قصة الامس" مسلسل محترم وهادف......ياريت تكوني استوعبتي بقى دروس الماضي والأدوار اياها .....بس اعتقد ان الادوار اياها ماعدش لها مكان بحكم الزمن
يسرا: لم اتابع مسلسلك السنة دي بعد ما عرفت قصته بوجه عام وعرفت ان "يسرا" سفيرة الامم المتحدة اصبحت هي اللي بتتحكم في اختيارات "يسرا" الممثلة
السنة اللي فاتت مسلسل عن قضية الأغتصاب والسنة دي مسلسل عن اطفال الشوارع
بعد كدة هنتظر عرض مسلسلاتك على قتاة الأسرة والطفل
في النهاية:
دة كان رأيي انا وليس فرضا ان يكون رأي الكل او حتى الأغلبية فلولا اختلاف الأذواق لبارت السلع
كل رمضان وانتم بخير وسعادة وصحة..........
ومين عارف......يمكن رمضان الجاي يرجع لنا الناس اللي غابت عن رمضان دة و اثرت فينا كلنا طبعا
الواحد حاسس ان رمضان السنة دي ناقصه حاجة في غاية الأهمية
انا طبعا بأتكلم عن
بكــــــــــــــــــــــــــــــــــــــــــــــــــــار

Wednesday, 17 September 2008

كيف تنظر الى دينك؟


المصريون متدينون  بطبيعتهم
شعب بيحب دينه سواء كانوا مسلمين او اقباط
حتى المصري اللي مش متدين تلاقيه محايد دينيا يعني لا يهاجم الدين... قد لا يلتزم بتعاليمه ولكنه لا يكرهه ....ممكن تلاقي مسلم مابيصليش بس هو معترف في قرارة نفسه ان دة تقصير من ناحيته وليس عدم اقتناع منه بأهمية الصلاة مثلا
واعتقد ان هناك اقباط غير منتظمين في الذهاب للكنيسة وغير منتظم بتعاليم الصوم ولكنه يبقى مسيحي ويبقى معتزا بمسيحيته
هل نحن كمصريين ظاهرة استثنائية؟يعني فيه ناس زينا ولا احنا اللي متفردين بتديننا كشعب؟
الدين بيمثل لك ايه في حياتك؟
انا عن نفسي الدين بيمثل لي القانون اللي امشي عليه في حياتي...الحكم اللي بنحتكم ليه في الامور الخلافية....اسلوب للحياة...الاوامر والنواهي اللي بتنظم لنا حياتنا
المرجع اللي بينظم لنا حياتنا وعلاقاتنا مع بعضنا وطبعا علافاتنا برب الكون سبحانه وتعالى
دة مفهومي عن الدين في حياتي...اعتقد ان في ناس كتير بتتفق معايا في المفهوم دة او في ان دة دور الدين في حياتها
اكتشفت ان في ناس بتحط الدين في امور مش مطلوب انه يكون فيها بشكل مباشر.....ناس بتوظف الدين وتفسر بيه اي حاجة واي حدث في الدنيا دي
في ناس بتؤمن ان القرءان الكريم ممكن يحتوي على نظريات فيزيقية ومعادلات كيميائية ويحتمل انه يتفسر من خلاله نظريات علمية وظواهر كونية
وانا في رأيي المتواضع جدا ان دة تحميل الدين ما لا يحتمل وتحميل للقرأن الكريم ماهو ليس مطلوبا ان يحتمله....والله اعلم
ناس تانية بتعزي اي حاجة سيئة تحصل لأحد اعداء الاسلام والمسلمين انه انتقام رباني وانه نصر من الله لعباده المسلمين...ومش بالضرورة ان ده يكون حقيقي فحكمة ربنا فوق كل خيالاتنا وافكارنا
يعني مثلا قالوا ان تسونامي هو انتقام رباني من البوذيين الاسيويين عبدة الاصنام..وبنفس منطقهم هل كان زلزال اكتوبر 1992 انتقام رباني برضة بس من المصريين؟
...ربنا سبحانه وتعالى له حكمه واياته وليس بالضرورة تفسيرها بنظرية مع او ضد
مش بالضرورة ان تكون كارثة الدويقة مثلا عقاب الهي للشعب المصري كما قيل من بعض العلماء.....ممكن تكون كدة فعلا فلله في خلقه شئون...وممكن جدا ان تكون مجرد ابتلاء من الله سبحانه وتعالى
وهل اذا اصاب شخصا ما مرض عضال فهل معنى ذلك غضب من الله على هذا الشخص؟
طبعا لا
المقصود هو ان تحميل الدين ما لا يحتمل او يطاق من معادلات كيميائية ونظريات فيزيقية و  تفسيرات انتقامية و  معاني غريبة جدا شيء عجيب جدا من وجهة نظري
فكما ذكرت فالدين من وجهة نظري المتواضعة هو ميثاق عمل....دستور اخلاقي....دليل حياة....شريعة نهتدي بها ونسير على تعاليمها...اما غير ذلك فلا اعتقد
والله تعالى اعلم
انما يبقى السؤال
كيف تنظر الى دينك
هل ككتاب سماوي معلم ومرشد للقيم والاخلاق والسماحة....اسلوب حياة ومنهج عمل؟
ام تنظر اليه
ككتاب سماوي يحتمل ان يحتوي على كل شيء....بمعنى انه لا غرابة في ان يحتوي على حقائق علمية او طبية او دنيوية؟
هو دة السؤال

Thursday, 11 September 2008

يعمل ايه؟


مش عارف يعمل ايه؟
طول عمره نفسه يعرف هو صح ولا غلط؟
يسافر يشتغل برة زي كل الناس ما بتسعى لكده؟
ولا يقعد هنا في بلده هو مش حمل غربة وقرف؟
طب لو سافر.....
هيستحمل الوحدة والذكريات وغدر الاصدقاء في الغربة؟
طيب لو ما ستحملش كدة.......هيرجع؟
طيب لما يرجع.....هيستحمل الظروف الصعبة والتزاحم على اكل العيش هنا؟
دة كل يوم الدنيا بتضيق اكتر من اليوم اللي قبله..والناس لو طالت تاكل بعضها هتعمل كدة
طيب لو سافر واستحمل وعصر على نفسه ليمونة
هيفضل طول عمره هناك؟
معقولة دي؟
هيتحول من بني ادم لماكينة طبع فلوس؟
لمضخة بتضخ فلوس لمصر وهو بيتعذب هناك؟
دة غير طبعا ان اخلاقه وطباعه هتتطبع بطباع الخلايجة اللي هو اساسا بيكرههم كراهية التحريم
طيب يعمل ايه؟
ينتحر؟
بس دة حرام.....
يصبر؟
يصبر على ايه؟اذا كان هو نفسه مش عارف يعمل ايه؟

هي الدنيا بقت ضيقة كدة ليه؟

هو بكرة بقى ضلمة كدة ليه؟

هو النهاردة بقى صعب قوي كدة ليه؟

هو امبارح بقى ذكرى حلوة مش هتتكرر تاني كدة ليه؟

يعمل ايه؟

Thursday, 4 September 2008

انا مش منهم


واحد منهم اتهموه بتهريب فياجرا.....واحد تاني اتهموه بجريمة قتل واخد اعدام......كتير منهم متهمون بالبلطجة والتزوير .....كتير منهم تم الحكم عليهم في قضايا قروض.....منهم من تم اتهامه في قضايا مخدرات....منهم من تم اتهامه في قضية دعارة (قضية سميحة)....منهم من هو متهرب من اداء الخدمة العسكرية.....منهم من لا يجيد فك الخط
كتير منهم استاذ في الحصول على الامتيازات الخاصة وخرق القانون.....منهم من قال على نفسه انه صايع (انا صاااااايع)....منهم من احتكر مصر كلها
منهم من يستغل عمله الاعلامي في النفاق ومسح الجوخ وتصفية الحسابات مع خصومه وغالبا هي خلافات شخصية
واخيرا وليس اخرا
منهم من هو متورط في جريمة قتل مشينة
الحمد لله ان انا
مش منهم

fb comments

wibiya widget

LinkWithin

Related Posts with Thumbnails