Friday, 29 August 2008

طبقوه على الكل....ربنا يكرمكم




لو المطلوب اني اشتري مثلث واحد....هشتري 10 مثلثات
ولو مطلوب اني اشتري شنطة اسعافات اولية ب 40 جنيه....هشتري واحدة ب 400 جنيه
بس والنبي....والنبي يا اخوانا يا قادة المرور في البلد دي
طبقوا القانون على الكل.....على الكل بلا استثناء
نفسي ما يبقاش انا شايل مثلث المرور في عربيتي بس سيادة المستشار غير ملتزم بالموضوع دة لأنه مستشار
ونفسي حضرة الضابط يكون هو كمان حاطط شنطة الاسعافات الاولية في عربية سيادته مش معفي منها لأنه ضابط وفوق القانون
هي دي الضمانة الاساسية لأنضباط الشارع في البلد دي
لو الكل ايقن ان القانون بيطبق على الكل بدون اي اعتبار لعائلة فلان او وظيفة علان...الكل هيلتزم...الكل هينفذ القانون بكل روح طيبة وبرضا كامل
انما لو استمرت العادة المصرية الازلية بتاعت فلان فوق القانون وعلان انت مش عارف انت بتكلم مين؟ وترتان اللي لاطع النسر او الميزان على اللوحة المعدنية
يبقى قل على القانون دة يا رحمن يا رحيم
مش كدة وبس
اعتقد ان القانون دة لو لم يطبق على الجميع بلا استثناء هيكون سبب رئيسي جدا في زيادة حالة الغليان والاحتقان بين الناس اللي الله اعلم هتنفجر امتى؟
بس اللي اكيد ان ربنا بيسبب الاسباب وربما يكون التطبيق الخاطىء لقانون المرور الجديد دة سبب رئيسي لأنفجار الشارع المصري
وفي الحالة دي اعتقد ان فلان بك وعلان باشا هيندموا اشد الندم يوم لن ينفع الندم

ملحوظة:

بعد ما يقرب من شهر من تطبيق قانون المرور الجديد:

لسه العربيات بتقف صف تاني

لسة العربيات النقل بتاخد يسار الطريق وليس يمينه

لسه المحلات والعمارات بيحطوا متاريس واحجار وقصاري زرع لمنع الوقوف امام منشأتهم

لسة السير عكس الاتجاه عادة مصرية اصيلة خاصة في الاقاليم والطرق الصحراوية

لسة السادة الضباط ووكلاء النيابة والقضاة لا يقفوا في اي كمين ولا تطبق عليهم اي قوانين
لسة سائقي الميكروباصات بيبلطجوا في الشارع وبيحملوا في وسط الطريق

الغريب بقى

ان حصيلة المخالفات المرورية في ازدياد مستمر.............

هو قانون المرور الجديد دة بيطبق على مين في البلد دي؟

Thursday, 21 August 2008

دمائك مسلمة ام مسيحية؟



في احدث دراسة طبية مصرية ثبت علميا الاعجاز الطبي الاتي
لقد ثبت علميا ان دم المواطن المصري المسلم يختلف في تركيبته تماما عن دم المواطن المصري المسيحي
حيث وجد داخل دماء المواطن المصري المسيحي كرات دم حمراء وبيضاء وصفائح دموية وصلباااان (جمع صليب)..وهوما يميز الدم المصري المسيحي عن الدم المصري المسلم
والغريب والعجيب انه عند تحليل دم احد المصريين المسلمين وجدت بعض الخلايا على شكل اهلة (جمع هلال) وهو ما اثار دهشة العلماء بشدة نظرا لتفرد المصريين بهذه الخواص البيولوجية الغريبة
وبناءا على هذه الدراسة الفريدة فلقد اوصى العلماء بمنع التبرع بالدم بين المسلمين والاقباط حرصا على سلامة المتبرع والمتبرع له طبيا
كما اوصى علماء الدين الاسلامي بعدم جواز تبرع القبطي بدمه للمسلم لأن ذلك قد يدخل ضمن الردة..اما علماء الدين المسيحي فلقد اوصوا بعدم جواز تبرع المسلم بدمه للقبطي لأن ذلك قد يخرجه عن الملة
كما انه بناءا على تلك الدراسة المدهشة فلقد اتخذت نقابة الاطباء المصريين قرارا تاريخيا بحظر نقل الاعضاء بين المسلمين والاقباط
لأنه ثبت ان كلية المواطن المصري المسلم تختلف في شكلها تماما عن كلية المواطن المصري القبطي
فلقد ثبت ان كلية المسلم على شكل هلال (طبعا مسلم بقى)....اما كلية المواطن المصري المسيحي فطبعا ثبت علميا بما لا يدع مجالا للشك انها على شكل صليب (مسيحي متدين بقى).....وطبعا حرصا على صحة الجميع وعلى تدينهم في نفس الوقت وعدم تدنيس اصحاب الديانة الواحدة بدماء من ديانة اخرى
فلقد اتخذت نقابة الاطباء المصريين هذا القرار التاريخي الهام للحفاظ على جميع المصريين الاقباط والمسلمين على حد سواء
وان نقابة الاطباء لتأسف بشدة لهذا القرار الذي يبدو للوهلة الاولى انه يدعو للتفرقة بين ابناء الوطن الواحد على اساس الدين الا ان الهدف الحقيقي لهذا القرار التاريخي هو راحة كل المصريين و الحفاظ على صحتهم بغض النظر عن دياناتهم
*****************************************
طبعا لا في دراسة طبية ولا يحزنون..انما البوست دة الغرض منه التعجب والسخرية من قرار نقابة الاطباء او ما اشيع عن حظر نقل الاعضاء بين المسلمين والاقباط
فطبقا لموقع مصراوي
فان منظمة حقوقية قررت مقاضاة نقيب الاطباء بسبب قرار حظر نقل الاعضاء بين المسلمين والاقباط
انا شخصيا متشكك في صحة قرار الحظر دة..لأنه بالتأكيد وبكل المنطق الموجود في الدنيا هو قرار بلا اي منطق او عقل....انا اتفهم قرار حظر نقل الاعضاء بين المصري وجنسية اخرى لمنع الاتجار في الاعضاء البشرية استغلالا لفقر الشعب المصري
انما حظر النقل بين المصريين انفسهم لاختلاف الديانة فلا يوجد ادنى مبرر او منطق لهذا القرار العجيب
وهنا كانت الافتكاسة موضوع البوست..لأن الدراسة السيريالية التخيلية العجيبة دي ممكن تكون هي المبرر الوحيد لهذا القرار الحلمنتيشي الرهيب دة
ملحوظة:
طبقا لموقع العربية نت
نقابة اطباء مصر تتراجع عن قرار حظر نقل الاعضاء بين المسلمين والمسيحيين
انما هو السؤال:
هو القرار دة..........كان سببه ايه من الاساس.........هتجنن بجد والله

Saturday, 16 August 2008

اصلها بقت بلد كفتة فعلا


مذيع نصف مشهور اسمه (شريف مدكور) بيقدم برنامج عن الطبيخ على قناة النيل للأسرة والطفل
الأخ شريف مابيطبخش..كل علاقته بالبرنامج انه بيقعد يسلي الشيف وهو بيشتغل ويرد على تليفونات المشاهدات ويرغي معاهم في اي كلام بعد طبعا انت امووور قوي يا شريف..انت دمك خفيف موووت يا شريف....انت هاااايل يا شريف وهكذا
وطبعا الأمر لا يخلو من ادخال مكالمة على الهوا لمشاهدة بتنتقد شريف مع مراعاة الا تزيد نسبة هذه النوعية من المكالمات عن واحد من الف في المية من مكالمات الحلقة وان تكون مكالمة النقد دي في اول الحلقة حتى يتسنى الرد عليها ب 100 مكالمة من بتوع انت تحفة يا شريف انت تجنن انت محصلتش
ولا يهمك يا شريف....كل دة حقد يا شريف...الخ
اهو دة كله كوم والموقف اللي هاحكيه كووم تاني
كون الاستاذ شريف مذيع امووور وقاعد بيسلي الشيف وبيهزر مع المشاهدات..لا يعطي له الحق انه يفتي فيما لا يعنيه ولا يفقه فيه ويوزع نصائحه الغالية على المشاهدات والمشاهدين
مشاهدة كريمة اتصلت بالاستاذ شريف وبعد كلمات المديح والاطراء المعتادة طبعا..اشتكت له ومش عارف ليه من ان صيادلة التأمين الصحي بيعاملوها وحش وبيصرفوا لها ادوية بديلة غير اللي مكتوبة لها ولما بتشتكي بيقولوا لها هو دة اللي عندنا
السؤال هنا..ايه علاقة برنامج عن الطبيخ بالتأمين الصحي؟
السؤال التاني...ايه علاقة مستر شريف بصيادلة التأمين الصحي؟
السؤال التالت بقى والأهم....يا ترى شريف رد عليها بأيه؟
استعدوا للصدمــــــــــــــــــــــــــــــــــــــــــــــــــــــــــــــــــــــــة
قال لها......روحي اعملي فيهم محضر في القسم
اه والله.....افتى للسيدة انها لازم تجرجر صيادلة التأمين الصحي في القسم....هو كدة..هو دة النظام
ما هو لو عنده الحد الادنى من المعلومات كان عرف ان صيدلي التأمين الصحي واقف على رجله طول النهار في حرارة خانقة وظروف غير ادمية ومتحمل سخافات ورزالات مرضى من نوعية الست دي مقابل 400 او 500 جنيه على اقصى تقدير
مش واحد بيقوم من النوم علشان ينزل يهزر مع الطباخ في استوديو مكيف ويسمع عبارات المدح والاطراء من السيدات والانسات ويا حرام بياخد كام الف في الشهر
مش كدة وبس..دة سيادته بدل ما يفتي بجرجرة الصيدلي المسكين دة لقسم الشرطة ممكن يكلف نفسه ويسأل هم بيطلعوا ادوية بديلة ليه اصلا؟
بيطلعوا ادوية بديلة يا شريف بك لأنهم ملتزمين بأدوية معينة في كراسة التأمين هي اللي متوفرة عندهم في الصيدلية وغير كدة مش موجود عندهم وبالتالي هم مش بيطلعوا ادوية بديلة كيف يعني وغلاسة على خلق الله

صيدليات التأمين الصحي تختلف كليا وجزئيا عن صيدليات القطاع الخاص في انها لا يتوافر فيها جميع الاصناف..انما ما يتم توريده الى وزارة الصحة من خلال مناقصات

اما بقى سبب ان السيدة دي بتتوهم انهم مضطهدينها وبيعاملوها وحش....فممكن تسأل وزارة الصحة عن الظروف الغير صحية بل والغير ادمية اللي الصيادلة دول بيعملوا فيها

انما لا لا لا ......جرجريهم يا سيدتي على القسم.....روحي اعملي لهم محضر.....الدكتور شريف قال كدة
ماهو اللي ما يعرفش يقول عدس
فعلا........بما ان الموقف دة حصل في برنامج للطبخ
يبقى لا يصح الا ان نقول
انها بلد كفتة فعلا

ملحوظة:
صحيح انا صيدلي..بس ما باشتغلش في التأمين الصحي......ولا لي علاقة به.....وعمري ما اشتغلت في اي جهة حكومية من قبل....انما انا فعلا الموقف اثارني مهنيا وانسانيا في المقام الاول

لذا لزم التنويه

Sunday, 10 August 2008

ما النا الا الدبابة



بعدما استبشرنا خيرا بالتجربة الديمقراطية الموريتانية واعتبرناها الأمل اللي هنعيش عليه ونحاول نقلده في مجتمعاتنا المنكوبة بحكم العسكر
واعتبرنا ان الموريتانيين فتحوا لنا جميعا كعرب وافارقة الباب نحو ديمقراطية سليمة زي كل خلق الله...فيها الحكم للشعب وللمدنيين والجيش للعسكر
اتاري كل الكلام دة كان وهم وسرعان ما عادت ريما لعادتها الأزلية القديمة......وكأن الشعوب المتخلفة امثالنا حرام عليهم الديمقراطية....الديمقراطية لم تخلق للي زينا...الديمقراطية دي معمولة للناس المحترمة بس....للناس اللي عندهم الجيش وظيفته حماية حدود البلاد وليس الأستيلاء على حكم البلاد و اذلال العباد
سرعان ما عادت موريتانيا للحظيرة العربية وقعدت جنب اخواتها تحت الحكم العسكري..تحت حكم الجنرالات...بلا ديمقراطية بلا وجع دماغ
هو في احلى من ان الواحد يصحى يوم الصبح يركب دبابة ويحتل قصر الرئاسة ويعتقل رئيس الجمهورية المنتخب ويقعد مكانه وينصب نفسه حاكما للبلاد؟
ويبقى مصيره واحد من اتنين:
يا اما الحكم حتى الموت....ثم التوريث والتوريث والتوريث
يا اما واحد يصحى الصبح قبل منه يلبس بدلته العسكرية ويركب دبابته ويعتقله لتبدأ رحلة حكم عسكري جديد
الشعوب العربية شعوب لا تستحق الديمقراطية...لا تستحق الحياة الكريمة...الحياة المحترمة الادمية....شعوب لا تستحق الا حكم العسكر والجنرالات....حكم الأحذية والنعال ....حكم بالروح بالدم....حكم سأظل احكم طالما في الجسد قلب ينبض
هنيئا للموريتانيين عودتهم لحضن اخواتهم...هنيئا للجنرالات العرب فشل التجربة الديمقراطية الموريتانية فطبقا لوجهة نظرهم لا يصح الا الصحيح والصحيح بالنسبة لهذه الشعوب المتخلفة الهمجية هي الحديد والنار لا الديمقراطية وحقوق الانسان...هنيئا لكتاب السلطة والموالسين نجاح رهانهم بأعتبار ان حكم العسكر يكسب...وطول مانت في جزمة الحاكم وفي خدمة مصالحه انت في امان
ولا عزاء لبتوع الديمقراطية وحقوق الانسان وحكم الشعوب والدستور والقانون و الكلام الفارغ دة.....الحكم ليس لشعب لم ينضج بعد...انما الحكم لمن امتلك الدبابة وقدر يسوقها ويحتل بيها القصر الجمهوري
اما بقى الاخوة اللي بيراهنوا على المجتمع الدولي وجمعيات حقوق الانسان ودعاة الديمقراطية
مش هاقولهم غير حاجة واحدة بس
مصر.........مصر.............مصر عضوة بمجلس حقوق الانسان التابع للأمم المتحدة
بذمتكم
في مسخرة اكتر من كدة؟

Sunday, 3 August 2008

حسن و مرقص


فيلم (حسن و مرقص) فيلم جميل
جمع بين حاجات كتير مطلوبة في الفيلم السينمائي...من القضية الجادة للكوميديا الراقية...للواقعية النسبية...للميزانية العالية للفيلم
كل دة انتج فيلم حلو.....انتاج ضخم فعلا....فيلم اعجب به كل من شاهده
للمرة الاولى يتخلى عادل امام عن عادته الأزلية والتي استمرت معه لمدة تزيد عن 30 سنة منذ بداية بطولاته المطلقة سواء السينمائية او المسرحية الا وهي الاستعانة بأحدى الجميلات واستخدام الجنس او على الاقل الافيهات الجنسية داخل العمل السينمائي
الفيلم دة يخلو تماما من اي اسفاف او عري...ودي بصراحة حاجة غريبة جدا وغير معتادة في سينما عادل امام
اول مرة...الاقي فيلم لعادل امام يخلو من قبلة واحدة...مفاجأة فعلا..
هل اصبح عادل امام مؤمنا بالسينما النظيفة؟؟؟؟؟؟؟؟؟؟؟؟
طبعا الفيلم يناقش بشكل جريء العلاقة بين المسلمين والاقباط في مصر عن طريق محاربة بطلي الفيلم عادل امام وعمر الشريف اللي بيمثلوا المنهج المعتدل اسلاميا ومسيحيا للتيارات الدينية المتطرفة الاسلامية و المسيحية على حد سواء
طبعا الفيلم لا يخلو من المبالغة الكوميدية لحالة الاحتقان بين المسلمين والاقباط..ولكن طبعا المبالغة هي التي تصنع الكوميديا..فلا كوميديا بدون مبالغة كما انه لا كاريكاتير بدون مبالغة والا اصبح فوتوغرافيا
اداء عمر الشريف اعجبني ولكنه لم يبهرني...مش دة عمر الشريف..يمكن لأنه بيمثل دور شيخ مسلم وهو مالم نعتاده من دونجوان السينما المصرية السابق
واعتقد ان تدين عمر الشريف في الواقع لم يساعده على اتقان الدور
تحس ان مستر عمر الشريف العالمي..مش راكب على دور الشيخ محمود المسلم المنتمي للطبقة المتوسطة والذي يمثل التيار الاسلامي المعتدل
مش عارف هل دة كان شعوري انا بس ولا شعور عام لمن شاهد الفيلم
من اهم عيوب الفيلم من وجهة نظري هو الحرص على التوازن في كل شيء بين المسلمين والاقباط في الفيلم.......فلو ظهر شيخ متطرف لابد ان يقابله قس متطرف....ولو هاجم احدهم الدين المسيحي لابد ان يكون المشهد التالي لأحد الاقباط ينتقد المسلمين....ولو تلقى عادل امام ضربة لابد ان يتلقى عمر الشريف ضربة
ولو ظهر قس يحرض الاقباط على الاسلام والمسلمين ويدعوهم للعنف لابد ان يكون المشهد التالي مباشرة لشيخ متشدد يحذر المسلمين من عذاب جهنم اذا تعاملوا مع الاقباط او صادقوهم او هنأوهم بأعيادهم
تحس ان المؤلف يمسك بميزان حساس خوفا من ان ينتقده احد الجانبين وهو ما يؤدي بالتأكيد الى عدم المصداقية
فبكل تأكيد لابد ان نعترف ان التطرف الاسلامي اقوى تأثيرا واثرا ونفوذا من التطرف المسيحي ودة بالتأكيد راجع للفرق العددي بين المسلمين والاقباط في مصر
وبالتالي لا يصح على الاطلاق ان يساوي الفيلم بين قوة وتأثير الجماعات المتشددة الاسلامية بقوة ونفوذ وتأثير الجماعات المتشددة المسيحية...وهو للأسف ما حدث في الفيلم ولكن ذلك من اجل التوازن المنشود ليس الا
الفيلم في مجمله جميل وقوي من حيث القصة او الكوميديا او الانتاج وهو خطوة هائلة في طريق النجومية لعدد من الوجوه الصاعدة زي محمد امام و شيري
وهو طبعا زيادة لرصيد عادل امام الجماهيري و الفني ونقلة جديدة لنوعية ادواره
من الاخر كدة و خلاصة الكلام
الفيلم دة حلو قوي.....شوفوه

fb comments

wibiya widget

LinkWithin

Related Posts with Thumbnails