Thursday, 17 July 2008

اخر ايام العزوبية


اكتب هذا البوست وانا اتنسم اخر نسائم العزوبية
العزوبية جميلة قوي يا جماعة
نعمة ربنا ما يحرمكم منها
فعلا الواحد ما بيعرفش قيمة الاشياء الا بعد ما تروح منه
انا طبعا بأخمن...انا لسة لم اتزوج حتى الان
ومين عااااارف؟
مش يمكن يكون الجواز امتع واكثر استقرارا؟
مش ممكن يكون الجواز نهاية لعصر الفوضى والمرمطة؟
ممكن جدا....ووارد بقوة
انما بما ان الانسان عدو ما يجهل.....فبالتالي العزوبية حتى الان هي نعمة بيتخلى عنها الانسان بارادته الحرة
العزوبية لها برضة مميزاتها ....الصعلكة...والصياعة..والروشنة...والحرية في اتخاذ القرار والاستبياع..ومفيش حاجة بتهمك...لا حكومة تهمك ولا سجن يلمك
انما بعد الجواز بما له من مميزات كتيــــــــــــــــــــــــــــــــــــــــــر جدا الا انك فقدت استقلاليتك وثوريتك واصبحت تحسب الف الف حساب لأي قرار تتخذه....ما انت مش عايش لوحدك يا معلم
يعني بعد الجواز هتلاقي حكومة تهمك...وهتلاقي سجن يلمك
يعني ممكن الجواز يكون عدو الحرية.....يارب اخلف ظني
ومن خبرات السابقين....اقدر اقول لكم ان ماحدش ريحني وقال لي ع الخلاصة اللي انا عايزها
ناس تقول لك....اوعى تعملها يا ابني...ما تبقاش مجنون زيي..ودول الاغلبية بس اغلبية مش صامتة
وناس تانية تقول لك الجواااز؟؟؟؟يا سلام ع الجواز....هو فيه زي الجوااااز؟
دة نعمـــــــــــــــــــة.....نعمة واللي يكرهها يارب يعمى....ودول قلة بصراحة
بس موجودين....ويارب اجعلني من الطائفة التانية
خاصة اني متفاءل...ومستبشر خيرا.....ويا خوفي لأغني بعد كام شهر اغنية
كلهم بيقولوا كدة في الأول....وانا قاعد بأتذكر كلمات الخطوبة ورومانسيتها
وبعد هذه المقدمة الغير مبشرة على الاطلاق......يسعدني ان اعلن هذا الخبر
فرحي ان شاء الله يوم الاربعاء الجااي 23 يوليو
يعني باقي من الزمن كام ساعة بس
استأذنكم في اجازة زواج ...واعود بعدها لممارسة نشاطي التدويني
ربما اكون اكثر نشاطا تدوينيا....ربما اكون اقل نشاطا بعد العودة
كل دة في علم الغيب....بس اهم حاجة اني حبيت انكم تشاركوني فرحتي
دعواتكم بقى...والى اللقاء

Friday, 11 July 2008

الأب.....و الابن....وربما الحفيد...مين عااارف

الرئيس مبارك تولى حكم مصر سنة 1981.......يعني بيشهد كل سنة من 1982 وحتى تاريخه 2008 تخريج دفعات جديدة من طلبة الكليات العسكرية والشرطة
يعني من 1982 وحتى 2008 شهد الرئيس حسني مبارك حفلات تخريج 26 دفعة.....والعدد مرشح للزيادة ربنا يدي له الصحة والعمر المديــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــد
ولو افترضنا ان الطالب خريج الكلية الحربية مثلا تخرج عام 1982 وهو عنده 21 سنة...يعني الطالب دة الأن عنده 47 سنة.....ولو افترضنا ان الطالب دة تزوج مثلا وهو عنده 25 سنة.....يبقى غالبا الطالب دة خريج 1982 عنده ابن دلوقتي عنده تقريبا 22 سنة
واكيد الرئيس مبارك شهد برضة حفل تخرج الابن دة من الكلية الحربية عام 2008
وبكدة يبقى الرئيس مبارك شهد حفل تخريج الأب....والأبن.....وان شاء الله الحفيد....من نفس الكلية...لأن فخامته وعدنا انه سيظل يحكمنا طالما في جسده قلب ينبض
وبكدة تثبت مصر دوما انها بلد العجائب والغرائب واللطائف

Monday, 7 July 2008

الفنانة الراقصة



هل تعتبر الرقص الشرقي فنا؟
على فكرة السؤال دة مش استنكاري كما يبدو للوهلة الأولى...هو سؤال استفهامي في المقام الأول
انا فعلا اتساءل....ممكن حد يكون بيعتبر الرقص الشرقي فنا؟
انا عن نفسي بألاقي صعوبة شديدة في تصنيف الفعل دة (اللي هو الهز والرقص) على انه فن
مش ممكن يكون فتاة او سيدة عارية تماما تقريبا بتتمايل وتهتز قدامك يتقال عليها فنانة
انا اعرف ان مصطلح فنان او فنانة بيقال لكل من ابدع او ابتكر اي نوع من الفنون اللي هي اصلا غذاء للروح
لو طبقنا معنى كلمة فن على الرقص الشرقي هتلاقي انها مش ماشية خالص مع هذا العبث
فهز الوسط والارداف ليس ابداعا على الاطلاق و مشاهدة جسد عاري يتمايل امامك لا اعتقد انه ممكن يكون غذاءا للروح...هو بالتأكيد غذاء للشهوة...انما للروح...صعب جدا
لما الرقص الشرقي يبقى فن....طيب الأوبرا مثلا-وبالمناسبة انا لست من عشاقها-تبقى ايه؟
وبعدين نفسي اعرف من زمان ليه الراقصة لازم ترقص شبه عارية؟ ايه الحكمة في كدة؟
هو الرقص هيبقى فن لو كان من غير هدوم ومش هيبقى كذلك لو كانت الراقصة لابسة هدومها؟
حقيقة....انا بأستفز (بضم الألف وفتح الفاء) ممن يعتبر الرقص الشرقي فنا والراقصة الشرقية فنانة...دة سب علني للفنانين والمبدعين
يعني معقول يبقى بيكاسو فنان ونجيب الريحاني فنان وتبقى دينا هي كمان فنانة زيهم
بمنطق الأخوة محبي الرقص الشرقي....ليوناردو دافينشي زي فيفي عبده كلاهما فنانا ومبدعا في مجاله
بقى دة كلام ناس عاقلين؟
عموما...الرقص الشرقي مطلوب برضة بس في فرح...في قعدة مزاج...في قعدة بنات مع بعضهم بيروشوا....انما فكرة ان يتم تصنيفه كفن وان يتم تصنيف نجماته كفنانات ومبدعات.....حرام بجد
مع كامل اعتذاري لنجمات الرقص الشرقي في مصر واللي اكيد مش من زائري مدونتي

fb comments

wibiya widget

LinkWithin

Related Posts with Thumbnails