Sunday, 29 June 2008

جيل حافظ مش فاهم


من الاخر كدة وعلى بلاطة
انا مش متعاطف مع العيال بتوع الثانوية العامة
لا ومش كدة وبس...دة انا متأكد ان الحملة الصحفية دي وراها اهداف شخصية لا تخفى على احد وان كانت خافية احب اكشفها
الاستاذ مجدي الجلاد رئيس تحرير المصري اليوم متبنية الحملة القومية للتعاطف مع طلاب الثانوية الغلابة ابنه طالب في الثانوية العامة
ودة سبب الاحساس ان المصري اليوم من بداية الامتحانات وهي الصدر الحنين للطلبة المقهورين.........ما علينا
انا مش مصدق ولا اعترف بحاجة اسمها امتحان صعب....مش من المنهج
مفيش حاجة اسمها امتحان صعب...صعب يعني ايه؟
انا اعرف واصدق حاجة اسمها امتحان طويل ويحتاج زمن اطول للأجابة انما امتحان صعب...دة صعب
ودة مش علشان انا عبقري لا سمح الله ولا حاجة..انا ياما مرت عليا امتحانات توهمت برضة انها صعبة زيي زي الطلبة دول
كل ما هنالك ان طلبة الثانوية العامة موديل 2008 بيشربوا العلم بالمعلقة..والمدرسين الخصوصيين بتوعهم بيتفننوا في تلخيص المناهج لأقل قدر ممكن من الورق وتبسيط المنهج في اسئلة واجاباتها علشان العيال ترتاح وما ترهقش نفسها في المذاكرة وقرفها ويوفروا مجهودهم للعب الكرة والبلاي ستيشين
المدرسين عملوا اللي عليهم ولخصوا على قد ما يقدروا.....والعيال عملت اللي عليها وعصروا على نفسهم ليمونة وذاكروا الملخصات الغلسة دي
انما واضع الامتحان قليل الذوق قرر انه يضع امتحان فيه شوية تفكير..حقه ولا مش حقه؟
بس للأسف المذكرات والملخصات لا تعترف بالتفكير والدروس الخصوصية موديل 2008 شعارها احفظ...صم....انت لسة هتتعب نفسك وتفكر؟
وهنا كان الصدام بين طلبة ذاكروا بأسلوب معين من الحفظ والصم والتلقين وعدم اعمال العقل وبين واضع امتحان قرر يختبر قدرة الطلبة على فهم المعلومة وليس حفظها
مش ذنب واضع الامتحان انه قرر يختبر قدرة الطالب على الفهم لأن دة واجبه بس المصالح الخاصة قررت ان تجعل منه رجلا لا يصلح لوضع الامتحان بل لابد ان يوضع بمستشفى الامراض العقلية!!!!!!!!!
مأساة الاجيال الجديدة من طلبة الثانوية العامة انها اجيال حافظة مش فاهمة...وبالتالي اي امتحان لابد ان يكون صعبا عليهم
الامتحان الوحيد اللي هيقولوا عليه انه سهل هو
اكتب ما تعرفه وما تحفظه من المنهج الدراسي
انا لا اقسو على الطلبة بس دة رأيي....الطلبة اتعودوا على الدلع وعلى الامتحان الجاهز وعلى الاسئلة المباشرة ودي موضة بطلت من العالم كله والطريقة دي لا تصنع حضارة بل تهدم بلد بأكملها
انما التعاطف المبالغ فيه دة من قبل وسائل الاعلام سواء دة كان لأسباب خاصة او لا..هو تعاطف مدمر للأجيال دي وبدلا ما نقعد نلعن الامتحان واللي وضع الامتحان..لازم نلعن اللي وضع المنهج دة والاسلوب دة في التعليم..لازم نلعن اللي اشاع الفوضى والاستسهال في النظام التعليمي المصري...لازم ننسف نظامنا التعليمي الفاشل دة ونبدأ على نظافة نتعلم صح زي كل مخاليق ربنا اللي بيعيشوا في بلاد محترمة تحترم العلم والتعليم

Monday, 23 June 2008

احلى حاجة في مصر


المصري اليوم في عدد 14 فبراير الماضي عدد (عيد الحب)...طرحت سؤال هو السهل الممتنع فعلا
"ايه احلى حاجة في مصر"
السؤال دة يبان لأول مرة سؤال ساذج جدا...ممكن يكون سهل جدا...او صعب جدا لبعض الناس
السؤال دة لو سألتوا ل 100 مصري ماشي في الشارع ممكن حوالي 75 منهم يجاوبك..انت شايف اصلا حاجة حلوة من حواليك؟
مفيش اي حاجة حلوة في البلد دي...البلد دي ظالمة ومفترية وفاسدة وقاسية وفقيرة...البلد دي كوسة وظلم وقاتلة للمواهب والابداع...البلد دي متسلطة وقمعية ومقبرة لأي بني ادم شريف
الكلام دة مش كل الصورة....الكلام دة جزء من الصورة
انا عن نفسي لو كنت سئلت السؤال دة من حوالي 5 او 6 سنين كنت هجاوب نفس الاجابات اللي فيها نسبة كبيرة من الصحة
في منتصف سنة 2003 سافرت السعودية اشتغل هناك في احدى شركات الادوية...طبعا اسباب السفر معروفة وهي تأمين المستقبل والرغبة في تكوين ثروة في اقل وقت ممكن بالأضافة لجاذبية السفر والاعتماد على النفس
ومانكرش ان السفرية دي كانت نقطة فاصلة في حياتي كلها طالت او قصرت لأنها وضحت لي اشياء كتير قوي كانت غايبة عني وحددت شكل حياتي المستقبلية اذا كان في العمر بقية
قبل يوليو 2003 كنت بني ادم مختلف تماما يكره البلد دي بشكل رهيب....عصبي المزاج....يثور لأتفه الاسباب....ماكنتش بشوف في البلد دي اي ميزة على الاطلاق...كل حاجة حلوة ممكن جدا الاستغناء عنها....الفلوس تصنع المعجزات
بعد التاريخ دة اكتشفت اني كنت اكبر مخطىء او مغفل فعلا....حسيت بقيمة البلد دي...حسيت قد ايه مصر فيها حاجات حلوة كتير قوي في ايدينا وبنعيشها واحنا مش حاسين بيها ومش هنحس بيها الا لو جربنا اننا نفقدها
مصر فيها سلبيات رهيبة....مشاكل لا حصر لها...احباطات...فوضى...عشوائية...زحمة...تخبط...سرقة
كل دة موجود....بس موجود كمان متع ا ربنا انعم بيها علينا
مصر فيها العيلة اللي بتجتمع كلها يوم الجمعة ع الغداء وسط تجمع الاولاد والاحفاد
مصر فيها الاصدقاء او ماتبقى من الاصدقاء بعد ما تفرقت السبل بالجميع
مصر فيها الفسحة الحلوة والغدوة او العشوة الجميلة مع اللي بنحبهم
مصر فيها الجدعان والناس الخدومة الطيبة اللي مابيقبلوش انهم يشوفوا حد واقع في ضيقة من غير ما يساعدوه
مصر فيها الافراح بجد والاحزان بجد...مصر فيها صدق في المشاعر سواء فرح او حزن
مصر فيها الجرايد المستقلة والاصوات الحرة اللي لسة بتحارب الفساد وبتقول لا
مصر لسه فيها الاهلي والزمالك وجمهورهم اللي بيعاير بعض بكل خفة دم
مصر فيها اوضة نومك الخاصة...مملكتك...المكان الوحيد اللي بتلاقي فيها نفسك
مصر فيها كل الذكريات الجميلة وكمان التعيسة...فيها كل احلامك المستقبلية وفيها برضة رعبك من اللي جاي
مصر فيها حاجات جميلة قوي....ممكن تكون بتشوفها دلوقتي حاجات بلا قيمة...حاجات مالهاش لازمة..حاجات لا تسمن ولا تغني من جوع
بس والله...الحاجات دي لا تقدر بتمن...مشاعر وانت في الغربة تتمنى تعيشها ولو ليلة واحدة بس
وانا في الغربة كنت مستعد اسافر مصر خميس وجمعة بس وارجع السبت الصبح..ورغم تكلفة حاجة زي كدة الا ان دة كمان ممنوووووووع
انت في سجون بلاد الخليج لست اكثر من عبد..لا تملك من امرك اي شيء
مصر لسة جميلة
مصر فيها حاجات كتير قوي حلوة...من كتر الحاجات الحلوة هتحتار تختار ايه هي
احلى حاجة في مصر؟

Monday, 16 June 2008

حسدوني ومش باين في عينيهم

نحن نعيش في مجتمع الحسد فوبيا
ومصطلح فوبيا طبيا تعني الخوف المرضي
وانا بلاحظ ان الخوف من الحسد اصبح بيتحكم في حياتنا بشكل كبير..اكبر من الازم واكثر مما ينبغي
اعلم جيدا واقر تماما ان الحسد موجود وانه مذكور في القرأن الكريم
الا ان الحسد له شروط...علشان نقدر نقول عليه انه حسد او ان فلان او فلانة حسودة
دة على حد علمي وفهمي...ولا ازعم اني فقيه دينيا
الحسد هو تمني زوال النعمة من الغير
عارف كويس جدا انه يوجد في مجتمعنا ناس حسودة وحقودة وتتمنى زوال النعمة من الغير بل وزوال الغير نفسه الا ان السؤال هو:
هل عدد الناس دي كبير للدرجة دي ان يبقى الخوف من الحسد هو المحرك الأساسي لأفعالنا وتصرفاتنا؟
انا اعرف في حياتي اشخاص بيرجعوا كل الأحداث السلبية اللي بتحصل لهم الى الحسد
كثير مننا بيخلط ما بين الحسد والغبطة....وهو خلط رهيب والفرق بينهم كبير جدا...
فالغبطة هي تمني النعمة بدون زوالها من اصحابها...بمعنى تمني ان يبقى عندي عربية زي فلان...بس مش بالضرورة اكون بأتمنى ان فلان تتحرق عربيته
و الغبطة طبعا هي اللي موجودة ومنتشرة بكثرة ولا اعتقد ان في منها اي ضرر
اما الحسد فهو الكره والحقد بعينه
ودي بعض المظاهر الغير طبيعية توضح الرعب من الحسد اللي اصبح بيسيطر علينا حتى في اتفه الأمور:
السيارات الجديدة والحرص على تلطيخها بالدماء وتشويه منظرها اتقاءا للحسد...نادرا ما تلاقي حد شاري عربية جديدة من غير تلطيخها بالدماء اتقاءا للحسد على حد زعمه
اي واحد يتخانق مع خطيبته او زوجته...على طوووول يكون السبب الرئيسي في المشكلة هو الحسد ليس الا....وغالبا ان الزوجين ما بيكونش فيهم حاجة تتحسد على الاطلاق
المذاكرة.....ودي طبعا منتشرة بعنف بين الطلبة الأمواس وغالبا ما بيكون هذا الطالب الموس عنده فوبيا الحسد ويوهمك انه ضارب الدنيا صارمة على الرغم انه حافظ الكتاب برقم الصفحة
التفاؤل الشديد برقم 5 عمال على بطال ووضع رقم 5 في اي جملة مفيدة حتى لو مالهاش لازمة
بعض الناس لما تشتري حاجة تكره جدا حد يسألها بكااام؟؟
على اساس طبعا انه هيضطر يقول على سعرها وبالتالي هيتعرف انه معاه فلوس وبناءا عليه هيتحسد
اوعى تشوف طفل او طفلة حلوة وماتقولش بصوت عالي قدام والدتها "بسم الله ما شاء الله" لأنك لو ما قولتش ولا قدر الله الطفل او الطفلة اصيب بنزلة برد..فأنت المتهم الأول حتى لو حلفت ع المية تجمد انك مالكش دعوة
شوف كام خمسة وخميسة معلقة في السيارات والمحلات والصيدليات والكافيهات
خدي بالك من الخرزة الزرقاء اللي معلقة في رقبة اي بنت او سيدة او حتى شاب
اوعى تبدي اعجابك بأي حاجة ايا كان حتى لو على سبيل المجاملة وممكن ما تكونش الحاجة دي عجباك اصلا بس بتجامل.....اوعى تعمل نفسك عم المجامل لأن اي اصابة او تلفيات او حتى خدش لهذا الشيء هتكون انت مسئول عنه تماما وربما يتم وضعك في البلاك ليست بأعتبارك قرااار وعينك وحشة ودي مصيبة لو تعلم
وعلشان تبقى بييييس وفي السيف سايد
اكفي خيرك شرك...لا تعجب بحاجة ولا محتاجة..خليك بارد ومحايد
يتقال عليك قليل الذوق....احسن ما يتقال عليك حسوووود

Wednesday, 11 June 2008

الة الزمن



عارفين الة الزمن؟
الة الزمن دي اختراع قديم ظهر في افلام الخيال العلمي القديمة بيفترض انك بتركب الة الزمن دي وترجع بيها للوراء او تطلع بيها قدام
في ناس تحب تركب الة الزمن وتطلع بيها نحو المستقبل علشان يعرفوا ايه اللي هيحصل مستقبلا
وفي ناس هتفضل انها ترجع بالة الزمن دي للماضي علشان تمنع حاجات حصلت فعلا
في 2008 والة الزمن جاهزة للعمل والمطلوب انك تضغط على زرار واحد من اتنين
زرار الماضي وزرار المستقبل
هتضغط على اي زرار وتتوكل على الله؟
زرار المستقبل علشان تشوف اخرتها ايه وايه اللي هيحصل بعد 20 او 30 سنة من النهاردة؟
ولا زرار الماضي علشان تمنع كوارث حصلت وتتمنى انها ماكنتش حصلت؟
انا هأجاوب عن نفسي وهطرح السؤال دة لكم للاجابة في التعليقات
انا مش هضغط بالتأكيد على زر المستقبل...مش عايز اطلع 20 او 30 سنة لقدام...هشوف ايه يعني؟
اخاف ماعرفش ارجع تاني لسنة 2008 ونعيمها...واقول زماااااااان في 2008 كان في اكل ومية وفسح وناس ووطن
خاصة ان المؤشرات بتقول ان بعد 20 او 30 سنة هتختفي ملامح البلد وسط الزحام....مفيش وطن..... في تلوث وزحام وبطالة وفساد وناس بتقطع في بعضها
انا عن نفسي هأرجع للخلف...هأرجع بالضبط 20 سنة لحد ما يبقى عندي 9 سنين...وطبعا مش هفتح كتاب مانا بقى عرفت اللي فيها وعرفت اني لما ذاكرت ايه اللي حصل لي
وهأتعلم لعب الكورة...والوقت اللي ضيعته في المذاكرة والكلام الفارغ دة هستفيد بيه في لعب الكرة اللي هتأكلني الشهد
او هأتعلم التمثيل....مانا بقى هبقى عرفت مصيري لما اصابتني الخيبة وطلعت صيدلي ايه اللي حصل لي...يبقى لازم افلح واجتهد وابقى فنان قدير ويا حبذا لو كوميدي
وهأبطل قراءة...هو انا اللي موديني في داهية غير دماغي؟!!!هافضي دماغي ع الاخر هخليها بالوووونة مليانة هيليوم علشان تبقى خفيفة وفاضية
انا عملت حاجات غلط كتير قوي يا جماعة سنة 1988 ونفسي الزمن يرجع بي تاني علشان اكفر عنها
انا ذاكرت.....واكتشفت في سنة 2008 اني جاتني نيلة.....ياريتني كنت فلحت
وكنت عيل خانقة وبقرا مجلات وكتب......واكتشفت بعد كدة ب 20 سنة ان الكلام دة مش بيجيب همه يا ريتني كنت استفدت ولعبت كرة في الوقت اللي ضيعته في القراءة
وكنت ولد مؤدب وبسمع الكلام.....واكتشفت في 2008 ان دة بيسموه عيل مش روش وخنيق وعبقرينو وعايش الوهم والبنات مش بتحب النوع دة من الاولاد
لا...انا مش هاركب الة الزمن دي تاني
لا المستقبل مشرق....ولا الماضي يفرح
انما السؤال:
هتتعامل (ى) مع الة الزمن ازاي؟
هتطلع لقدام ولا هترجع ورا؟
مع العلم ان الفترة الزمنية لعمل الة الزمن 20 سنة بس....هترجع 20 سنة لورا وتشوف انت عملت ايه وماكنش لازم تعمله او هتكرر اللي انت عملته تاني؟
ولا هتطلع بيها 20 سنة لقدام وتشوف ممكن يحصل لك ايه بعد 20 سنة؟

Monday, 2 June 2008

بورتومارينا...بتحب الصيف؟



اكيد ماحدش ماشافش اعلانات جولف بورتومارينا الجديدة بتاعة
انا بحب الصيف
واللي مش فاكرها هافكره بيها سريعا
الاعلان عن اسرة من ملاك احدى الشقق بجولف بورتومارينا وكل واحد من افراد الأسرة بيقول هو بيحب الصيف ليـــــــــــــــــــــــــــــــه؟
رب الاسرة بيحب الصيف علشان بيلاقي حد يلعب معاه جولف
حقه.....حد عنده اعتراض؟
ربة الاسرة بتحب الصيف علشان بتحب تقعد في البلكونة قدام الخضرة الواسعة وكمان علشان البيت بيتوضب لوحده ولما بتسافر بيتأجر لوحده
ناس مش بتاعة بهدلة صحيح
البنت الصغيرة بتحب الصيف علشان بتلاقي حد ترقص معاه في اشارة لأكبر نافورة راقصة في الساحل الشمالي
اما الولد الصغير فبيحب الصيف علشان المية في اشارة لأكبر ملاهي مائية في الساحل الشمالي
كل دة مفيش فيه مشكلة على الاطلاق....ناس بيحبوا الصيف وهم احرار
بس فكرة الاعلان اوحت لي بفكرة عن رأي اسرة تانية خالص اقصى احلامهم مش انهم يروحوا بورتو مارينا...لا دة مجرد يتفرجوا على اعلان بورتومارينا في التليفزيون
الأسرة التانية دي بقى للأسف بتكره الصيف ولهم اسبابهم المنطقية برضة زي اسرة بورتومارينا
رب الأسرة بيكره الصيف علشان الميزانية...المصيف حمل رهيب على ميزانيته التعبانة اصلا ثم انه كماليات فارغة وتقليد اعمى
اما المدام فبتكره الصيف علشان بيحتاج غيارات كتير والهدوم بتتوسخ بسرعة وبالتالي بتحتاج تتغسل كتير وبالتالي مسحوق كتير وبالتالي كهرباء كتير وبالتالي مصاريف اكتر
اما بقى الاولاد فلهم مبرراتهم انهم يكرهوا الصيف
من فراغ قاتل علشان بابا مش مشترك لهم اساسا في اي نادي وبالتالي لا يمارسوا اي نوع من الترفيه والرياضة وبيفضلوا محبوسين في البيت
لناموس رهيب علشان المجاري غالبا بتكون طافحة في الشارع
لحر قاتل ما بتنفعش معاه المروحة التعبانة اللي متعلقة في السقف...وطبعا مجرد ذكر لفظ (تكييف) كفيل ان بابا يرنهم علقة محترمة علشان نفوسهم المريضة لا تسول لهم انهم يفكروا التفكير المنحرف دة تاني
الغريب والعجيب ان الاسرتين مصريتين...بس الفرق الكبير ان رب الاسرة الاولى بيلعب جولف والتانية بيلعب في مناخيره...وان ربة الاسرة الاولى بتقعد قدام الخضرة والتانية بتقعد قدام بركة مجاري طافحة في الشارع...وان الاطفال في الاسرة الاولى بيلاقوا حد يرقص معاهم والاطفال في الاسرة التانية مابيلاقوش حد يصوت معاهم
الكوميديا السوداء بقى بتتجلى لما تراقب تعبيرات وشوش افراد الاسرة التانية التعبانة لما بيتفرجوا على الاسرة البورتومارينية في التليفزيون
هتموووت من الضحك...بس للأسف عينك هتدمع في اخر الاعلان

fb comments

wibiya widget

LinkWithin

Related Posts with Thumbnails