Thursday, 29 May 2008

انسف....تخلص من محافظك القديم



الوجه مطموس المعالم اقصى يمين الصورة هو وجه السيد محافظ الدقهلية السابق
واللوحة دي لوحة نفاق عادية جدا موجود زيها في جميع انحاء مصر من اسكندرية لأسوان
بس الراجل اللي عامل اللوحة دي ماعملش حسابه ولا وضع في اعتباره ان التغيير سنة الحياة
ولم يخطر بباله ان المحافظ ممكن يتغير في يوم من الأيام (اصله كان طول قوي في منصبه).......بس سبحان من يغير ولا يتغير
المهم ان الراجل وقع في حيص بيص لما حركة المحافظين الأخيرة طلعت والمحافظ اتقلش
طب يشيل اليافطة خالص؟؟؟
طبعا لا....لسة في صورة في اليافطة عايزينها...لسة ماتغيرش
وعلشان الراجل ما يبقاش موقفه وحش مع المحافظ الجديد....وعلى طريقة الفراعنة الأزلية وهي ازالة اثار القدماء
قرر طمس معالم وجه المحافظ القديم وكأن شيئا لم يكن في انتظار صورة عظيمة للسيد الوزير المحافظ الجديد
السؤال هنا
المحافظ القديم هل كان يتخيل وهو شايف صورته ان دة هيكون مصيرها بعدما يترك موقعه؟
السؤال الأهم:
هل كان يتخيل انه هيترك موقعه اساسا؟
السؤال الأكثر اهمية:
في صورة تانية في اللوحة.....ياترى هيكون ايه مصيرها بعدما يترك موقعه بأرادة الهية طبعا؟
السؤال الأخير:
فين صور عبد الناصر والسادات اللي كانت الشوارع مليانا بيهم في عهديهما؟
وليه اللي بعدهم لم يتعظ ومنع مثل هذا النوع من النفاق الرخيص؟
بس في النهاية ومع وضع صور المحافظين في شوارع محافظاتهم وكأنها املاكهم الخاصة لا يسعني الا ان اقول
اذا كان رب البيت بالدف ضارب فشيمة اهل البيت الرقص

Saturday, 24 May 2008

عفوا....معالي الوزيرة حامل



اسبانيا في خطـــــــــــــــــــــــــــــــــــــــــــــــر
الظاهر كدة ان الأسبان باعوا بلدهم ومش فارق معاهم امن اسبانيا القومي واستقرارها
تخيلوا.....تخيلوا ان في اسبانيا وزارة الدفاع بتتولاها واحدة ست
وزير الدفاع الأسباني......سيـــــــــــــــــــــــــــــــــــدة
مش مصدق....مش متصور....مش متخيل
الناس الأسبان دول مش خايفين على بلدهم ولا ايه؟
ازاي وزير الدفاع اللي المفروض والمعقول والمطلوب انه يكون جنرال جامد جداااا يرتدي بدلة عسكرية كاملة مرصعة بالأوسمة والنياشين وخاض اربع او خمس حروب يكون واحدة ست؟
معقول كدة؟
دة معنى كدة بما ان وزير الدفاع مش جنرال يبقى اكيد المحافظين ورؤساء الأحياء ورؤساء الأندية ونواب البرلمان هم كمان مش جنرالات سابقين؟
ازاي الأسبان عارفين يعيشوا؟ ازاي اسبانيا ممكن تتقدم كدة؟
ازاي مابيستفيدوش بخبرات رجال الجيش والشرطة في كل موقع وكل مكان؟
هم ما يعرفوش ان العسكرية يعني الوطنية..يعني العمل..يعني النظام
طيب يستفيدوا من خبراتنا.....اذا كانوا هم مش خايفين على بلدهم احنا خايفين عليها....ييجوا يشوفوا ازاي العسكريين السابقين بيحتلوا كل المواقع المدنية في مصر..وازاي كل المواقع دي ماشية زي الساعة
وزير الدفاع.............سيدة؟
دة احنا عندنا رئيس هيئة النظافة لواء سابق يا جدعاااااااان
لا لا لا .....في حاجة غلط......اسبانيا في خطر يا بشر
على فكرة
وزيرة الدفاع الأسبانية 38 سنة حاااااااااااااااااااااااااااااااااااااااااااااامل
ولا تعليق
فروق حضارات بقى.....بس طبعا الفرق لصالحـــــــــــــــــــــــــــــــنا
قال وزير الدفاع واحدة ست قااال.....مسخرة وقلة ادب وقلة وطنية.....ناس ما بتحبش بلدها ولا عارفة مصلحتها
وبعدين 38 سنة؟ كمااااااان؟
يعني مش كفاية مصيبة انها واحدة ست ومصيبة تانية انها حااااامل لا...والمصيبة التالتة انها 38 سنة كمان؟
مايعرفوش ان الدهن في العتاقي ولا ايه؟
مايعرفوش ان في افريقيا والدول العربية المتقدمة زينا كدة الوزير لما يبقى في الخمسينات بيسموه الوزير الشاب؟
انا مش متضايق الا علشان قادة الجيش عندنا في دولنا العربية المحافظة على تقاليدها العسكرية الصارمة لو اضطروا يعملوا اجتماع مع نظراءهم الأسبان هيبقى ايه الوضع؟
لا لا لا....مش قادر اتخيل.......دي جريمة بشعة في حق اسبانيا
يااااااااه....الواحد مش عارف لو ماكانش مصري كان هيعيش ازاااااااااااااااااااااااااااي؟!!!!!!!

Wednesday, 21 May 2008

تاج الأحلام


عود احمد للتاجات النفسية الدسمة اللي بتزغزغ النفس كدة وتطلع اللي جوة
والمرة دي التاج من جانا (جنى الجنتين دان) والف شكر لها
نبدأ التاج على بركة الله
أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
اول حلم:
ماكنتش هدخل كلية الصيدلة رغم حبي لها واعتزازي بكوني صيدلي الا اني كان ليا ميول تانية اقوى لو رجع بيا الزمن كنت هحققها
كنت هدخل كلية الالسن قسم اسباني او ايطالي وهابذل قصارى جهدي وانبغ بجد واخد كورسات وابقى مترجم بارع جدا
ثاني حلم:
كان لازم اقضي الصيف وانا طالب فيما هو مفيد ونافع ليا مستقبلا بدلا من الهيافة والتسكع في الشوارع اللي كنت بعمله
كان لازم الصيف يقضى في كورسات كومبيوتر ولغات واللي بعد مااتخرجت من الكلية واشتغلت لم تتح لي الفرصة والوقت للقيام بها
ثالث حلم:
كان لازم اهتم بالرياضة وانا صغير خاصة اني طويل القامة وطولي دة كان بيؤهلني اني العب سلة او كرة طائرة...بس مالقتش اللي يشجعني..بس لو رجع بيا الزمن مش هفوت الفرصة دي
رابع حلم:
كان لازم اهتم بالثقافة الدينية اكتر من كدة....انا مهتم بالقراءة ولكنها غالبا قراءات سياسية وادبية وثقافية انما انا مقل ومقصر في القراءات الدينية..ربما لو رجع بيا الزمن كنت اهتم بالنوعية دي من القراءات
خامس حلم:
لو رجع بيا الزمن كنت هأهتم اكتر بصلة الرحم اللي انا حاسس اني مقصر فيها الى حد كبير وكنت هابقى اجتماعي اكتر واكثر اختلاطا بالناس
أذكر خمس أحلام على الاقل ..تخص مستقبلك
اول حلم:
اني لا اصاب بالمرض.....نفسي اموت من غير ما اتبهدل....المرض محنة صعبة جدا وذل ما بعده ذل...ربنا لا يكتبه على احد
ثاني حلم:
اموت وربنا راضي عني....نفسي قبل ما اموت اكون كفرت عن اي حاجة وحشة عملتها في حياتي
ثالث حلم:
اني اعيش مستور طول عمري..ماحتاجش لأحد....اصعب حاجة على نفسي اني احتاج لحد..فعلا شعور تقيل جدا
واحسن دعوة فعلا ربنا ما يحوجك لحد
رابع حلم:
اني مااتحرمش من حد بحبه
الموت وحش جدا بس للأسف هو قدر وحق وشر لابد منه
طبعا هو حلم مستحيل لأننا كلنا الى فراق والى زوال...بس برضة يفضل حلم
خامس حلم:
اني اعمل الحاجة اللي انا بحبها...مش الحاجة اللي المفروض اعملها
شعور جميل جدا لما تبقى بتشتغل شغلانة انت بتحبها مش شغلانة لازم تشتغلها علشان دة المتاح حاليا
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
هو شخص واحد بس
خطيبتي
وبأهدي ليها اغنية وردة
اه لو قابلتك من زمان......كانت حياتي اتغيرت
أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..
هم مش شخصين هم قيمتين او صفتين
العدل..........................................................والديمقراطية
*************
انتهى تاج الأحلام
والأن الى الأهداءات
تهدي التاج لمين يابو حميد........
الى السادة الاتية اسماؤهم

Friday, 16 May 2008

كشف الهيئة


اللي قرأ رواية عمارة يعقوبيان للكاتب الرائع علاء الاسواني اكيد يعرف مين هو
طه الشاذلي
وللتذكرة للي قراها وللتوضيح للي ماقرأهاش
طه الشاذلي هو ابن البواب واللي كان حلم حياته هو الالتحاق باكاديمية الشرطة....انما طبعا اصطدم بواقعه الاجتماعي وبالتالي رسب في كشف الهيئة والتحق بكلية الحقوق وتصاعدت الاحداث الى ان انضم للجماعات المسلحة وكانت نهايته انه قتل في اخر الفيلم
انما الموضوع دة مش عن طه الشاذلي ولا عمارة يعقوبيان انما عن
كشف الهيئة
وكشف الهيئة دة هو مسمار جحا اللي بيتخذ حجة او ذريعة لرفض دخول شخص ما الى كلية من الكليات العسكرية او النيابة او القضاء او السلك الدبلوماسي

اماكن ووظائف الصفوة في البلد دي

وانا اقصد اني اقول في البلد دي...لأن في اي بلد تانية مفيش شغلانة للصفوة وشغلانة لأولاد البطة السودة على اساس ان الكل بيخدم بلده...الكناس بيخدم بلده زي رئيس الجمهورية بالضبط

جمعتني مناقشة بين اتنين من اصدقائي احدهما مؤيد وبشدة لكشف الهيئة والاخر معارض له تماما وبيعتبره تعنت وظلم

صديقي المؤيد له بيرى ان كشف الهيئة دة بيمنع بلاوي وان لولاه لحدث ما لا يحمد عقباه
وان ازاي قطاعات مهمة زي الجيش والشرطة والقضاء يلتحق بيها ابناء البوابين والفلاحين والفقراء اللي اغلبهم بيكون مليان عقد نقص ومركبات نفسية معقدة جدا
وان القطاعات الحساسة دي لازم اللي يلتحق بيها تكون عينه مليانة وابن ناس علشان يتعامل مع الناس بلا اي مركبات او عقد نقص وبرضة علشان ما يستفيدش من وظيفته
صاحبي دة برضة بيشوف ان الفترة اللي شهدت تراخي في تطبيق كشف الهيئة وما صاحبه من التوسع في القبول بالكليات العسكرية شهدت دخول ضباط انقلاب يوليو للجيش المصري وما ادى اليه من حدوث انقلاب يوليو العسكري
والغريب والعجيب ان نفس الضباط دول بعد ما تمكنوا من حكم مصر سدوا الباب على ابناء الفقراء من دخول الكليات العسكرية وطبقوا كشف الهيئة بس بطريقتهم الخاصة طبعا
يعني طلعوا على السلم ولما وصلوا كسروا السلم علشان ماحدش يعرف يطلع تاني
صاحبي دة بيشوف ان الواطي واطي.....وبيبرهن على صحة رأيه بالمثل الشعبي الشهير
ديل الكلب ما ينعدل ولو علقوا فيه قالب
اما صديقي المعارض لكشف الهيئة فبيشوف انه انانية وبشاعة وانه ضد الانسانية وحقوق الانسان وقبل كدة وكدة انه ضد الاديان اللي بتحض على المساواة وعدم التفرقة بين الناس على اساس الحسب والنسب
وان مش بالضرورة ان اي حد بسيط ومن اصل متواضع انه يبقى واطي....وان كل عظماء مصر على مدار تاريخها من البسطاء وابناء فلاحين ولا يملكون الحسب والنسب
وان المعيار الحقيقي لالتحاق اي شخص بأي وظيفة في الدنيا هي كفاءته ومدى قابليته لأداء الوظيفة دي وليس بمدى اسم عائلته ووظيفة والده او توصية عمه او خاله
****************************
الجدل مستمر.....انا عن نفسي مقتنع بجزء من كلام صاحبي الاولاني عن ان كشف الهيئة مهم وانه بيحوش بلاوي وفي نفس الوقت مقتنع تماما بمبدأ تكافؤ الفرص وان كل بني ادم من حقه يحصل على فرصته طبقا لمهاراته وكفاءته فقط لا غير
كشف الهيئة......مفتري ام مفترى عليه؟

Tuesday, 13 May 2008

لسة بخمسة

بجد شعب جبـــــــــــــــــــــــــــــــــــــــــــــــــار
من رحم المأساة والحزن.....بتخرج الفكاهة والبسمة
شعب بيعوض عجزه عن الثورة والغضب والاضراب والاحتجاج والصدام...بيعوض دة كله بالنكتة
بس هل النكتة هتحل مشكلة؟ هل هتفك ازمة؟ هل هتقضي على الفساد والقمع والديكتاتورية والاحتكار؟
مااعتقدش
ماكانش حد غلب
عموما
اهم حاجة واللي مطمئنة الناس بجد ان منيو الخمسة لسة بخمسة...ودة في حد ذاته انجاز عظيم
مع الاعتذار لماكدونالدز

Thursday, 8 May 2008

اوعى تقول احلف بسماها وبترابها

البريد الالكتروني بيورد عليه رسايل اشكال والوان من ناس نعرفهم واغلبها من ناس مانعرفهاش اساسا
وصلني ميل من صديق مقيم في السعودية
الميل كان بعنوان
(Common Mistakes)
اخطاء شائعة
من وجهة نظر مبتكر الميل دة ان دي

حاجات المفروض انها على لساننا بأستمرار بس للأسف هو شايف انها مش بس حاجات غلط...دي كمان حرااااااااام
اتارينا بنرتكب اخطاء دينية جسيمة وسط كلامنا...بتندرج تحت بند الحرام من غير ما نعرف
والراجل عايز يكسب فينا ثواب
وبالتالي شاف ان من واجبه ان ينبهني اني بأرتكب افعال محرمة وعلي ان اقلع عنها فورا
النوع دة من الرسائل الاليكترونية منتشر بشدة...بعضها مفيد جدا ومقنع تماما...والاغلب غريب عجيب لا يتناسب ويتناسق مع اي عقل واي منطق
والبوست دة عينة من غرائب وعجائب احتوتها رسالة واحدة من عشرات الرسائل من نفس النوع ترد لصناديق البريد الالكتروني يوميا
ونخش في المفيد

اول مرة في حياتي اعرف ان حكم الشعب للشعب يتناقض مع الاسلام (دة من وجهة نظر صاحبنا طبعا) وحسب رأيه
صاحبنا بيرى ان حكم الشعب للشعب جملة دينيا خاطئة على اساس ان الله هو الحكم
وهل هناك اي تعارض بين ان يحكم الشعب الشعب وبين ان الله هو الحاكم؟
غريبة جداااا
طب مش ممكن يكون حكم الشعب للشعب بشرع الله عز وجل
وهل حكم الشعب للشعب هو حكم الجاهلية؟؟؟
انا اعرف ان حكم الجاهلية هو حكم الغاب والقوة...ولا اعتقد ان حكم الشعب للشعب تندرج تحت حكم الجاهلية
مستغرب جدااااا بجد والله
ايه العلاقة بين (حكم الشعب للشعب) وبين عدم الحكم بشرع الله
اللي فاهم يفهمني علشان انا مش فاهم

يا سلاااااااااااااااااام
نجاح سلام دي الى جهنم وبئس المصير
بتقول نعيش لمصر ونمووووت لمصر؟
الزنديقة....الفاجرة!!!!!!!!!!!!!!!!
وهل الجهاد في سبيل الوطن ليس تقربا الى الله عز وجل
وهل هناك تعارض بين ان احيا من اجل مصر ورفعتها وازدهارها او اموت فداءها وفداء ترابها وبين كون صلاتي ونسكي لله عز وجل
طيب ماهو شيء بديهي جدا ان يكون حبي لوطني وحياتي من اجله او موتي فداءا لله عبادة وتقربا لله عز وجل
اوليست الشهادة في سبيل الوطن شهادة في سبيل الله عز وجل؟
ثم ان من سيقبض روحي فداءا للوطن او من سيعينني على تنميته...اليس الله عز وجل
غريبة جدا بجد
لو حد فاهم الفكرة يوضحها لي.....هتجنن يا اخواننا


حااااااااضر
من هنا ورايح هاقول
اعداءنا المسيحيين....ولاد عمنا المسيحيين
محدش يقول اخواننا المسيحيين تاني
وبعدين بنفس المنطق ما ينفعش حد يقول اخواننا العرب كمان...على اساس ان مش كل العرب مؤمنين...في عرب مسلمين وليسوا في مصاف المؤمنين..وفي كمان عرب ملحدين...يبقى بالتالي لا يجوز اطلاق كلمة اخوة الا على المؤمنين
اموت واعرف
ايه التعارض بين مقولة اخواننا المسيحيين وبين انما المؤمنون اخوة
لن افتي او ازعم شيئا دينيا لست على علم به ولكنه سبحانه وتعالى لم يقل انما المؤمنون هم الأخوة..قال تعالى انما المؤمنون اخوة
وبالتالي لم يكن هناك تخصيص..او حصر الأخوة في المؤمنين فقط
دة تفسير لغوي ونحوي فقط وليس تفسيرا دينيا
حد برضة فاهم؟


لاااااااااااااااااااااااااااااااااااااااااااااااااااااااااااااااااااااااااااااااااااااااااا تعليق
دة على اساس ان عبد الحليم حافظ كان واقف بيحلف يمين....ولا واقف في محكمة
دي اغنيــــــــــــــــــــــــــــــــــــــــة.....والله العظيم اغنية
الراجل لا كان بيحلف ولا بيقسم....دي مجرد اغنية
وياليتها اغنية عاطفية.....دي كمان اغنية وطنية....واحد بيغني لبلده
ربنا يرحمه ويرحمنا معاه
رحمتك ياااارب

دة بقى فعلا اللي بيسموه حديث في غير موضعه على الاطلااااااااق
الاية الكريمة لها اسباب نزول ليس من بينها قضية المساواة بين الرجل والمرأة على الاطلااااق
وقوله تعالى ليس الذكر كالانثى ليس معناه ان الذكر افضل عند الله من الانثى
طبعا ليس الذكر كالأنثى فلكل نوع تكليفات وواجبات معينة وطبيعة جسمانية تختلف عن النوع الاخر وبالتالي لا تعارض بين المساواة في الحقوق والاحترام وبين اختلاف طبيعة الذكر عن الانثى
مش كدة ولا ايه؟
وكفاية كدة
الميل كان في حاجات كتير من النوع دة.......بس لحد كدة ومرارتي
الانسان عبارة عن ايه غير مرارة وشوية حاجات فوق بعضها
ايه الهدف من النوع دة من الرسائل؟
هل مصمم الرسائل دي هدفه نبيل فعلا؟ يعني هل هو مؤمن تماما انه يقوم بعمل يتقرب به الى الله ورسوله؟
ربنا يستر على الاسلام بجد
اذا كان دة تفكير المسلمين في القرن الحادي والعشرين...يبقى سترك يارب

Tuesday, 6 May 2008

تاج نفساوي



بعد طول غياب .....تعود التاجات بقوة
ومش اي تاج...ولا من اي حد

دة تاج نفساوي عميق...دة اللي بيسموه (سبر اغوار النفس البشرية).....ايه الكلام دة؟...ما علينا

.ومن رانيا ولما نقول رانيا يبقى الفيلينج والاحاسيس كلها
وبما ان رانيا قررت تصوب التاج دة ناحيتي....يبقى لازم اتحلى بصفات الفرسان وارفض الأنسحاب من المعركة...واسيبها تسبر اغوار نفسي براحتها
والى المعركة..........................

...هجووووووووووووووووووووووووووووووووووووم
-----------------------------------------------------------------
اتكلم عن نفسك في 10 نقاط


الأولة
احمد سمير.....29 سنة الا 3 شهور......صيدلي.....بحب الصيدلة..على الرغم ان مصر مافيهاش صيدلة اساسا..بس اهو قدرنا
وبحب مدونتي الأغلبية الصامتة.....
وبحب اهلي وناسي وبلدي واصحابي
خاطب ولا اعول....وبأحب خطيبتي...اي خدمة
************************************

الثانية:
ليبرالي حتى الثمالة.....بيؤمن بحق اي فرد وكل فرد في ان يعتنق ما يشاء من الأفكار.....وان يطرح ما يشاء وما يريد من الأراء....وان يعبر عن نفسه بما يتراءى له
بشرط
الا يسيء للأديان السماوية والا تتعدى حريته حدودها لتصطدم وتتعارض مع حقوق وحريات الأخرين

**************************************

الثالثة:
اهلاوي حتى المووووووووووت
الأهلي ثم الأهلي ثم الأهلي
ممكن تسمي حبي للنادي الأهلي تطرف....سميه هبل....سميه زي ما تسميه بس هو حقيقة واقعة
انا اعشق النادي الأهلي
مش هبالغ لو قلت ان انتصارات النادي الأهلي او لا قدر الله انكساراته النادرة ولله الحمد هي اللي بتحدد لي مزاجي العام ومووودي بشكل عام
العجيب بقى...ان خطيبتي زملكاووووووية.....يا للهول
لا تتعجب انها ارادة الله

***********************************************

الرابعة:
خايف من بكرة
مرعوووووووب
الدنيا ضلمة ومش باين لها ملامح
وحاسس ان هييجي الوقت اللي نترحم فيه على ايامنا دي
ونسميها الزمن الجميل

***********************************************

الخامسة:
بحب البلد دي قوي...قوي
واكتشفت اني ما ينفعش اعيش غير فيها
جربت اعمل زي غيري واساير الموضة واجري ع الخليج اغرف و اعبي
سنتين مفيش غيرهم....ولقيت نفسي في اوضتي تاني
الظاهر اني فقري
************************************************

السادسة:
بيقولوا عليا عصبي......ممكن اكون فعلا كدة
بس اعترف اني اتحسنت كتير جدا عن الأول
يعني في امل
ما بعضش.....انتم خفتم كدة ليه؟

************************************************

السابعة:
بأكره الحزب الوطني....ونادي الزمالك....وتامر امين....واحمد شوبير.....وفتحي سرور...وكل ضابط شرطة بينسى انه في يوم من الأيام كان طالب ثانوي او شاب من غير دبورة وكان له نفس احلام الناس اللي كل مهمته بعد ما علق الدبورة انه يجهض احلامها
**************************************************

الثامنة:
احترم منى الشاذلي و عمرو اديب ومجدي الجلاد وخيري رمضان واي حد في موقع مسئولية عارف كويس قوي ان الكرسي مش دائم ومؤمن تماما بالحكمة القائلة
لو دامت لغيرك....لما وصلت اليك
****************************************************

التاسعة:
مدمن انترنت.....وحاسس ان لو لا قدر الله الكومبيوتر عطل ممكن اقعد اخبط دماغي في الحيط واهرش واقول
ابوس ايديكوا...نت...نت..مش قااااااااااااااااااااااااااااااااااااادر حد يدخلني اونلاين!!!!!!

***************************************************

العاشرة:
لا ادخن.....ولا احترم المرأة المدخنة على الاطلاق..اما مشاعري تجاه الرجل المدخن فهي حيادية لا ايجابية ولا سلبية
ومحدش يقول لي اشمعنى؟
علشان انا كنت عامل بوست ع الموضوع دة قبل كدة..وقتل بحثا

***********************************************
خلاااااااااااااااااااااااااااااااااااااااااااااااااااااااص
تمت المهمة الأولى بنجاح
اختار خمسة واهدي لهم التاج

الروح...........بس بس
انين الحزن.......وزة
مايكل
جيداء
كارتونيا......ياسر حسين
لازم تبلغهم
حاضر يا فندم.....جاري التنفيذ

Thursday, 1 May 2008

صمت القبور


ايه اللي هيستفز الناس اللي ماشية في الشارع دول وينفجروا؟
كل حاجة ممكن تستفزهم حصلت فعلا وما استفزتهمش؟
المصريين دول ايه؟ معمولين من ايه؟ بيشربوا حاجة غير البشر؟ بياكلوا حاجة غير اللي كل البني ادمين في الدنيا دي بياكلوها؟
هل الانسان المصري جبان بطبيعته؟ بيخاف من العصاية والكرباج؟
هل الجبن جين ممكن يتواجد في شعب ولا يتواجد في شعب اخر؟
فقر ومتكيف........ فساد ومتعايش و بيتعامل معاه....... جوع وشغااااااااال......تزوير انتخابات وعادي جداااا......اهانة وقلة ادب امنية ومفيش اي مشكلة
المصريين بياكلوا حاليا لحوم حمير وكلاب وقطط ومع ذلك الدنيا ما اتهدتش....ومش بعيد يكونوا حبوا طعمها كمان...الخوف بقى ييجي علينا زمن مانلاقيش فيه قطط ناكلها
اخر مرة المصريين ثاروا كانت سنة 1919 من حوالي 90 سنة وبعد كدة سكتم بكتم
يحكمهم تراكوة يحكمهم مصريين يحكمهم مدنيين يحكمهم عساكر ولا بتفرق معاهم....صمت القبور
نظامهم ملكي و بعدها جمهوري ديكتاتوري وبعدها يبقى ملكيجهوري (ملكية جمهورية يعني) ولاااااا يهمهم الكلام دة في شيء...ولا فارقة معاهم
يحكمهم اشتراكيين وبعدها رأسماليين وبعدين محتكرين....وعااااادي جدا واحنا مالنا؟
يحكمهم الجيش وبعدها تحكمهم الشرطة والدنيا ماشية
تتغير المسميات والمصريين لا يتغيروا من مجلس الامة لمجلس الشعب...من القلم السياسي لأمن الدولة....من الملك للرئيس....من المعتقلات للسجون
تتغير اشكال الحكم واساليبه وتتغير الوجوه وتمر السنين والقرون ويبقى المصري مصري
كائن غير قابل للاستفزاز...بني ادم رافض للاحتجاج....جثة لشخص ميت لا حول له ولا قوة
في شعب في الدنيا ممكن يستحمل كل هذا الكم من الفساد ولا يثور...والغريب ان دي القضايا اللي انكشفت ما بالك بقى باللي لسة لم يكتشف؟
في بني ادم في الدنيا يتبهدل البهدلة دي كلها علشان يحصل على لقمة عيش...ومع ذلك لا يحتج حتى؟
في شعب في الحياة دي....الشرطة بتعامله بكل هذا القدر من القسوة والاهانة والبهدلة ولا يهتز له رمش؟
والله انا بتكلم وبتساءل بجد فعلا؟
الانسان المصري هل في جيناته جين خاص بالاستسلام والخضوع والتساهل مع الاهانة؟
ليه احنا شعب بيترعب من الكرباج والعصايا على الرغم ان شعوب كتير جدا كسرت العصاية دي من زماااان جدا
بس فعلا مشكلة الشعب دة ومأساته هي الصمت
صمت القبور


fb comments

wibiya widget

LinkWithin

Related Posts with Thumbnails