Sunday, 30 March 2008

شوية هلوسة


هو رسام الكاريكاتير الدنماركي صاحب الرسوم المسيئة للرسول محمد صلى الله عليه وسلم عايش هنا في مصر؟
طب هو الراجل طلع بيعرف عربي؟
طيب الراجل الرسام دة من مشاهدي الفضائية المصرية؟
يبقى ليه العربيات ماشية في الشوارع عليها ملصق مكتوب عليه
الا رسول الله
طيب ليه كنت بتفرج على ماتش كورة مابين فريقي الاتحاد السكندري وفريق تاني ولقيت في المدرجات يافطة عليها
الا رسولي
هو حد هنا في مصر رسم رسوم كاريكاتورية بتسخر من الرسول الكريم عليه الصلاة والسلام
احنا ليه بنخاطب نفسنا.....اليفط والملصقات دي موجهة لمين؟
ما انا وانت وهو وهي متفقين على كل الكلام دة من غير يفط ولا ملصقات
يا جماعة
احنا ليه بنكلم نفسنا....ليه مش بنخاطب العالم الخارجي
نفس منطق تعاملنا مع امريكا واسرائيل نقعد نغني و نرد على بعضنا
يارب تب علينا بقى
------------------------------------------------------------
غريبة جدا اني ابقى مسئول جامد جدا وبالحجم دة والناس اللي المفروض اني مسئول عنهم بتقطع بعضها وبتموت بعض في طوابير العيش ومش لاقية تاكل
وابقى قاعد انا والمدام في المقصورة بنتفرج على ماتش كورةةةةةةةةةةةةةة
اللي يعيش ياما يشوف
وكم ذا بمصر من مضحكات ولكنه ضحك كالبكاء
-----------------------------------------------------------------
هي علا غانم دي عايزة ايه بالضبط؟
هتفضل حرانة كدة على طول؟
نفسي الاقيها مرة غلطانة وطالعة في دور محترم
ربنا يشفيها
------------------------------------------------------------------
القاهرة اليوم بقى برنامج مسالم جدا
ومثالي جدا (من وجهة النظر الحكومية) طبعا
القاهرة اليوم اللي كانت حواراته وخبطاته الصحفية بتقلب الدنيا اصبح مهتم بالموضة ومسابقات الطبيخ
بركاتك يا وثيقة الفقي
--------------------------------------------------------------------
سمعت ناس بتقول لازم ناخد حقنا وناخد بتارنا من الامريكان اللي قتلوا المواطن المصري في قناة السويس المصرية
ضحكت طبعا
امريكاااااااااااااا......مرة واحدة
طيب مش لما ناخد بتار المصريين اللي بيتسحلوا على ايد الخلايجة برة وجوة
-------------------------------------------------------------------------
خبر قريته ان 60% من المصريين مايعرفوش شكل ورقة ال 200 جنيه
تخيلوا
يعني من كل 100 بني ادم ماشي في الشارع في 60 منهم عمرهم ما مسكوا ورقة ال 200 جنيه في ايديهم
يعني على كدة لو الواحد ضاعت منه ورقة ب 200 جنيه في اي مكان نسبة انه يرجع يلاقيها مكانها حوالي 60 % على اساس ان 60% من الاشخاص المتواجدين في المكان دة مش هيعرفوا ان دي فلوس اساسا وبالتالي محدش هيمد ايده وياخدها
حاجة لطيفة جدااااااااا
---------------------------------------------------------------------------
القمة العربية انطلقت النهاردة
حد متابع؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
-----------------------------------------------------------------------------
اللي فوق دة كله هلوسة مالهاش اي علاقة ببعضها
تفاعلات جوة دماغ العبد لله من ضمن تفاعلات اكتر بكتير لسة في الدماغ
كل شهر ان شاء الرحمن هحاول اهلوس شوية
يمكن اريح دماغي شوية

Tuesday, 25 March 2008

بهائي...هندوسي...سيخي

الناس اللي معترضة على كتابة كلمة (بهائي) في البطاقة الشخصية للبهائيين امرهم عجيب جدا
دلوقتي احنا قدام واقعة محددة....ناس سموا نفسهم (بهائيين) وعايزين يكتبوا كدة في خانة الديانة ببطاقاتهم الشخصية...احنا زعلانين ليه؟
طيب هم سموا نفسهم بهائيين...وكان ممكن يسموا نفسهم وائليين او تامريين او خليليين...اي حاجة والسلام.....احنا واخدين الموضوع على اعصابنا ليه؟
ناس قررت تكفر....كفرت....خلاص..هم اللي هيتحملوا وزرهم عند ربهم
ممكن حد يقول ان الموافقة على كتابة بهائي هو اعتراف بالدين دة....واعتراف بوجود حاجة اسمها البهائية
يا سلاااااااااااااااااااااااااام
مين اللي قال الكلام دة
هو انت لما تقول ان فلان بوذي او علان هندوسي او ترتان دة سيخي...هل معنى كدة ان انت مقتنع ان البوذية ديانة....او الهندوسية دي ديانة او ان السيخي دة راجل مؤمن؟
دة اقرار واقع....في ناس بتقول احنا بوذيين وناس تانية بتقول احنا هندوس....وانت بتتعامل معاهم على هذا الاساس
انت لا تملك محاسبتهم عقائديا وبالتالي لا تستطيع توجيههم
ليه بقى لا نتعامل مع البهائيين دول بنفس المنطق؟
انت بهائي؟ ماشي يا عم البهائي
بس انت عارف كويس قوي انه كافر...و مؤمن بعقيدة غير سماوية
نفس فكرة اللي ماشي يقول على نفسه
انا اهبل....انا اهبل...انا اهبل
اكيد اول ما تشوفه هتقول له
ازيك يا اهبل؟ عامل ايه يا اهبل؟
بناءا على كلامه
ليه بقى لا نتعامل مع البهائي بنفس منطق التعامل مع الاهبل؟
عايزين نصيحتي:
ريحوهم....اكتبوا زي ما هم عايزين بهائي
ودة لن يغير من امرهم شيئا.....عمرهم ما هينتشروا ولا هيزيدوا عن عددهم الحالي
عاملوهم زي البوذيين او الهندوس او عبدة النار
ما يفرقوش كتير عنهم

Wednesday, 19 March 2008

صنعوه واحنا قاعدين....دفنوه واحنا قاعدين

فاكرين الدكتور عادل عبد العال؟
الدكتور عادل عبد العال دة كان راجل بيطلع على قنوات تليفزيونية كتيرة وخاصة قناة المحور ويتكلم على الطب الشعبي والعلاج بالاعشاب وكان له حاجة لكل حاجة
بدءا من حب الشباب وانتهاءا بالعقم
معندوش مشكلة....كل داء وله العشب او مجموعة الاعشاب بتاعته
الراجل دة كان وصل انه اصبح في وقت من الاوقات موضة
مفيش قناة الا ولها برنامج بيقدمه او بيشارك فيه الدكتور عادل عبد العال
مفيش كتاب بيتباع في السوق الا كتاب الدكتور عادل عبد العال
مفيش حديث بين اتنين عن اي مشكلة مرضية الا وتيجي فيه سيرة الدكتور عادل عبد العال...ورأي الدكتور عادل عبد العال...ونصيحة الدكتور عادل عبد العال
وطبعا لأن الدكتور عادل عبد العال اصبح ستار في بلد لا يصح فيه ان يكون هناك اي ستار الا ال ستار
star
فظهر تيار مضاد للدكتور عادل عبد العال وطبعا بيتزعم التيار دة كبار الاطباء اللي سوقهم وقف وسبوبتهم اتقطعت
واصبح ترمس وحلبة وشيح عادل عبد العال خطر على ادوية فايزر و جلاكسو ونوفارتس
وبدأت اتهامات لعادل عبد العال انه لا دكتور ولا حاجة وانه خريج تربية رياضية وانه نصاب ومدعي.......الخ
وفجأة
مفيش عادل عبد العال....وزي ما اصبح عادل عبد العال هو حديث المدينة في يوم وليلة اصبح في يوم تاني وليلة تانية ممنوع ظهوره ووجوده وكلامه لحد ما يتلاشى تدريجيا من قنوات التليفزيون والصحف وبالتالي من عقول الناس وذاكرتهم
ولا عزاء للمشاهدين
طب بالله عليك او عليكي
شعورك كان ايه مع اول سطر من البوست دة وانا بتساءل
فاكرين الدكتور عادل عبد العال؟
هل افتكرته بسهولة؟ هل ماافتكرتوش على طول؟
ولو افتكرته بسهولة....ما سألتش نفسك الراجل دة راح فين؟
احنا كنا وصلنا في وقت انك ممكن تفتح الحنفية تلاقي الدكتور عادل عبد العال دة نازل منها من كتر انتشاره
اللي عايز اوصل له....ان احنا مجرد لعبة في ايد الفضائيات بتلعب بينا زي ما هي عايزة
شوية بتلهينا بعادل عبد العال وشوية بهالة سرحان وشوية بعصام الحضري
وكله ماشي بشعار
يومينهم وهييجي غيرهم
ايام ما كان الدكتور عادل عبد العال حديث المدينة صدعونا بيه...ويوم ما جاءت التعليمات انه يختفي وكفاية عليه كدة يبقى يختفي ونصنع حد تاني واي قضية تانية
وليذهب المشاهدون الى الجحيم
اللي ينطبق على عادل عبد العال بينطبق برضة على شخصيات تانية كتير وقضايا صدعونا بيها برضة وبعدين اتدفنت
فاكرين هالة سرحان؟
طب فاكرين العبارة؟
حوادث القطارات؟
طب فين الحبيب علي الجفري اللي كان موضة في عالم الدعاة؟
راح فين عصام الحضري اللي طلع في يوم من الايام على اربع فضائيات في 4 برامج ورة بعض؟
وغيرهم وغيرهم وان كانت الذاكرة لا تسعفني...ماهو انا كمان بأنسى
يا اخوانا
نحن ليس اكثر من مجموعة من البلهاء قاعدين قدام شاشة بنتفرج على ما يقرره غيرنا اننا لازم نتفرج عليه
بس خلاص

Thursday, 13 March 2008

ابو بلاش....كتر منه

لو افترضنا ان كل لاعبي الاهلي اصبحوا بين يوم وليلة ابو تريكة, او ان كل لاعبي الزمالك تحولوا فجأة الى حازم امام في مهاراته وابداعاته
هل دة هيصب في مصلحة الفريق؟
عدد كبير ممكن يقول يا ريــــــــــــــــــــــــــــــــــــــت... دة احنا نفسنا في 100 ابو تريكة او 200 حازم امام
انما الحقيقة العلمية بتقول ان دة هيؤدي الى انهيار الفريق فورا وان فريق كل لاعبيه من عينة ابو تريكة هيكون مصيره هزائم ساحقة طبعا
لأن فريق كرة القدم مش مطلوب ان يكون فيه 11 مهاجم او 11 مهاري انما اي فريق كرة في العالم بيحتوي على 11 لاعب متنوعين منهم حارس المرمى والمدافع والمهاجم منهم الاعب السريع والاعب البطيء منهم الجناح ومنهم صانع الالعاب.
مأساة مصر ان ال 80 مليون بني ادم عايزين يكونوا ابو تريكة...قصدي الشعب كله بيتعلم علشان يكونوا اطباء وصيادلة ومهندسين
المأساة دي اسمها
مجانية التعليم
اللي كل الناس بيتغنوا بيها بأعتبارها انجاز ما بعده انجاز لانقلاب 1952 على الرغم انها وبال وكارثة على البلد دي والسبب الرئيسي لجيوش العاطلين اللي بتزداد سنويا بارقام فلكية
انقلاب 1952 حول التعليم الى حق مكتسب للجميع اوتوماتيكيا....بدون اي مجهود او مشقة..العيال بتطلع من ابتدائي لاعدادي ومن اعدادي لثانوي ومن ثانوي للجامعة ببلااااااااش....مجانـــــــــــــــــــا
وطبعا شعار المصريين منذ الأزل..ابو بلاش كتر منه
وكانت النتيجة ان كله بيتعلم مجانا اللي يستحق واللي ما يستحقش وجامعات بتتملي وبتفضى بلا اي قيمة لخريجيها واكنهم ماتعلموش من اساسه
طب انت عايز ايه....عايز الشعب يفضل جاهل..مايتعلمش؟!!!
لا طبعا
انما يجرى ايه لو كان التعليم الابتدائي والاعدادي مجـــــــــــــــانا....ويمشي برضة بالشعار القومي المصري ابو بلاش كتر منه
ومن الاعدادية ييجي بقى مفترق الطرق...
المتفوق واللي يستحق يحصل على المجانية ويكمل تعليمه الثانوي...واللي مالوش في التعليم وما اكثرهم يتجه الى التعليم الفني اوتوماتيكيا...ويخرج حرفيين البلد في امس الحاجة ليهم فعلا
اما القادر ماديا ولا يستحق المجانية يدفع تكاليف تعليمه ويكون مكلف فعلا...والفلوس اللي بيدفعها امثال هؤلاء تستخدم لتطوير التعليم المتدهور واللي وصل لحالة مأساوية
لو اتحققت الفكرة دي
اولا: هيتخرج اجيال من الفنيين اللي هيفيدوا البلد على حق من نجارين وسباكين وعمال ودول شغلهم مضمون لانهم هيكونوا اتعلموا كويس وعلى اسسس سليمة وهيبقوا مطلوبين برة وجوة
ثانيا: قللنا الاعداد الرهيبة اللي بتتخرج في التعليم اوتوماتيكيا وهي غير راغبة فيه وبتاخد اماكن هي لا تستحقها وبيكون مصيرها القهوة او الاحباط او الانحراف
ثالثا: وفرنا اموال كتيرة هيدفعها القادرين لتطوير كل انواع التعليم سواء العادي او الفني
رابعا: رجعنا للكليات المنهارة هيبتها بتقليل الاعداد الرهيبة اللي بتدخلها سنويا لدرجة انها اصبحت كليات للأسف الشديد بلا اي قيمة زي الحقوق والتجارة والاداب.....الخ
خامسا: المجتمع هيصبح مجتمع متوازن فيه اطباء وصيادلة ومهندسين وعمال وفلاحين.....الخ
هيبقى اللي عايز يتعلم ويدخل الكلية اللي هو عاوزها قدامه حل من اتنين:
يا اما يتفوق وينبغ ويستحق المجانية
يا اما يدفع
مالهاش حل تالت
التعليم مش كالماء والهواء
كفاية بقى....البلد مش ناقصة...كفاية شعارات
ارحمونا بقى
ابو بلاش مش هنكتر منه
لأن مش هتفضل حاجة ببلاش اصلا

Sunday, 9 March 2008

لوغاريتمات مرورية مصرية


راكب عربيتي لا بيا ولا عليا...ورايح شغلي وكافي خيري شري...بسمع اعلانات نجوم اف ام اللي اصبحت اعلانات يتخللها شوية اغاني على خفيف
اليوم هو السبت...ولما نقول السبت..يبقى نقول اول الأسبوع....يبقى نقول اكتئاب...يبقى نقول على طول خنقة...يبقى نقول يا فتاح يا عليم يا رزاق يا كريم...اكفنا شر المستخبي ياااااااااا رب
يطلع لي من تحت الأرض عسكري مرور...وشه مألوف..اغلب الظن انه كان بيشتغل مزارع قبل ما يلتحق بالمرور او ربما لسة بيشتغل مزارع لحد دلوقتي بالأضافة لكونه عسكري مرور
شاور لي اني اقف بالعربية....انا وقفت...وانا هخاف من ايه؟ انا ورقي كله سليم...انا راجل مية مية...عارف كويس قوي ان الانسان اصله ورقة وبالتالي علشان تعيش في البلد دي محترم....يبقى لازم تكون مضبط ورقك وكله عشرة على عشرة
المهم..الراجل بريفيته اللذيذة قال لي: الرخص يا باااااشاااا
طلعت له الرخص...عادي
قال لي: بص يا باشا....انت النمر الأودمانية (الأمامية يعني) بتاعتك حالتها بالبلا (مذرية) يعني...وانا مضطر اعمل لك مخالفة لوح امامية
يا نهااااار اسود
دة اختراع جديد دة بقى ولا ايه....يعني خلاص
عربياتك يا مصر كاملة المعاني قوي ومفيش غير لوحي الأمامية اللي عاملة مشاكل ومبوظة المرور
مفيش حد لوحاته سودا ولا حد طامس رقم من ارقام اللوحة ولا حد فيكي يا مصر مركب نسر وحاجب رقمين من ارقام اللوحة ولا حد كاتب ارقام العربية بخط مايتقريش بالميكروسكوب حتى؟
كله بقى تمام ومفيش غير لوح عربيتي اللي بايظة؟
مسكت اعصابي على قد ما اقدر...وقلت له:
تصدق بالله....انا مستلم اللوحات دي من المرور بشكلها دة....يعني انتم مسلمنها لي كدة...طب اعمل ايه؟
قال لي: ماليش دعوة يا استاذ والله ياريت حضرتك تركن على جنب الأول
طبعا ركنت على جنب....ماهي رخصي معاه
نزلت له وقلت له فين الضابط؟قاللي هناك اهه
بيني وبينكم مارضيتش اروح للضابط..قلت ماهو يمكن الليلة دي تخلص مع الراجل دة ويبقى يادار مادخلك شر...ويا بخت من نفع واستنفع برضة
لقيتني بحط ايدي في جيبي علشان اطلع المحفظة واخلص الليلة دي ببريزة كبيرة ولا حاجة
بس مش عارف ليه قلبي ما طاوعنيش....حسيت اني هزعل من نفسي قوي لو عملت كدة
قلت له: يا عم انا مستلمها كدة...انا ذنبي ايه انها حالتها بالبلاء ولا ملكة جمال؟
تخيلوا يرد عليا يقول لي ايه؟
يا باشا ماهما مسلمينها لك كدة علشان احنا بقى نحرر لك مخالفات عليها...ماهم لو سلمها لك سليمة مش هنعرف نعمل مخالفة انما كدة هنعمل لك مخالفة لانها مش سليمة
يا سلاااااااااااااااااااااااااااااااااااااام....دي ساعتها تبقى مش شرطة..دة يبقى ليها اسم تاني خاااااااااالص
المهم انا حاطط ايدي في المحفظة والشيطان بيقول لي خلص بقى وادفع وافدي رخصك...وقلبي بيقول لي لا يا بوحميد...مش انت اللي تعمل كدة...والراجل حاطط ايده على دفتر المخالفات وعايز يحرر المخالفة
اعتقد ان الحل واحد من اتنين:
يا اما 10 جنيه تطلع وتستقر امنة مطمئنة جوة دفتر المخالفات وبالتالي الرخص بتاعتي تستقر نائمة هادئة في محفظتي
يا اما نمشيها رسمي بقى ونروح للضابط اللي طبعا لا هاخد معاه لا حق ولا باطل والرخص هتستقر في ادارة المرور حتى اشعار اخر والى اجل غير مسمى
اللي حصل بقى لا كدة ولا كدة
اللي حصل ان العسكري راح مديني الرخص وقال لي اتفضل رخصك يا باشا...انت طلعت جدع وانا هستجدع معاك
اه والله....دة اللي حصل
طب ليه؟ وعلشان ايه؟ وانا ماستجدعتش ولا نيلة؟طب وقفني ليه اصلا؟طب رجع لي الرخص ليه اساسا...طب الراجل الضابط دة واقف قرطاس جوافة كدة ولا ايه؟
طب هو دة كان اختبار امانة للمواطن ولا ايه؟
بيشوفني هطلع رشوة ولا لا؟ وبما اني ماطلعتش رشوة يبقى انا نجحت في الامتحان؟
من لديه تفسير يتصل على
0900
نتعلم من كدة ايه يا اولاااااااااد:
اولا: ان مهما تكون اوراقك سليمة ومضبط امورك...الداخلية قادرة على تلبيسك مصيبة من حيث لا تدري
ثانيا: وانت بتستلم اي لوح معدنية خاصة بعربيتك اعرف ان دة كمين محطوط لك...والاسلم ليك انك اوعى تروح المرور من غير واسطة...هتتبهدل اخر بهدلة
ثالثا ودة الاهم: حذاري من يوم السبت...لو عرفت تاخد السبت من كل اسبوع اجازة تبقى الحاجة دعيالك
ومبروك الرخص وعودتها سالمة غانمة
ملحووووظة:
طبعا الصورة اللي في الموضوع دة مالهاش علاقة خاااالص بالعسكري اللذيذ بطل القصة
طبعا بطل القصة اشيك بكتييير وملابسه مهندمة جداااااااااا دة غير انه ماكانش حاطط مسدس اصلا لأننا بلد الأمن والأمان
عماااااااااااااااااااااااااااااااااااااااااااااااااااااااااااااااااار يا مــــــــــــــــــــــــــــــــصــــــــــــــــــــــــــــــــــــــر




Monday, 3 March 2008

مصر التي في خاطري


احزاب على كل لون...دة ليبرالي ودة قومي ودة بقى اشتراكي ودة حزب عمالي اما دة بقى فحزب اسلامي ودة كمان حزب ديني بس حزب مسيحي
صحف جديدة بتصدر كل يوم دي ليها توجه رأسمالي ودي جريدة عمالية ويا سلاااااام على الجرايد الليبرالية وخد دي بقى جريدة جديدة اشتراكية
اما اللي هناك دي فدي بقى جريدة الاخوان المسلمين والتانية اللي جنبها دي جريدة اسمها الشباب المسيحي
الشهر اللي جاي انتخابات البرلمان....كل الاحزاب بتتنافس محدش عارف مين اللي هيكسب الانتخابات...احتمال محدش ياخد الاغلبية المطلقة وتتشكل حكومة ائتلافية......استطلاعات الرأي مش مرجحة فوز حزب بعينه والمناظرات التليفزيونية على اشدها
الأرض اللي هناك دي الفاضية دي كانت زمااان معتقل من المعتقلات اللي اتهدت وهيتبني مكانها مصنع كبيــــــــر قوي
هيستوعب الاف من الشباب العاطل
مفيش حاجة اسمها امن مركزي ولا امن دولة خالص استبدلناها بقوات مكافحة الشغب ودي عددها محدود جدا ولو لا قدر الله الامر تطلب قوات اكبر فقوات الجيش موجودة بتؤدي مهمتها وترجع لثكناتها فورا
اما امن الدولة فاستبدلناه بالامن السياسي ودة بيشتغل في نطاق المؤامرات الكبرى اللي بتستهدف امن مصر الوطن مش مصر الحكومة
انشاء المحطات الفضائية والاذاعية متاح لجميع الناس مفيش فيها خيار وفاقوس واي حد من حقه يقول او يعرض في قناته او اذاعته اي حاجة هو عايزها
لاني زي ما اديت الفرصة لليبرالي اديتها كمان للاخوان المسلمين والمسيحيين والقنوات الراسمالية والقنوات العمالية وقنوات الاهلي والزمالك وهلم جر
مصر معندهاش تفرقة بين مواطن والتاني على اساس الانتماء السياسي او الدين او اي حاجة
بس بشرط
اوعى تجرح في اللي بيختلف معاك
هنا خط احمر وميثاق شرف ممنوع اي حد يتخطاه
زي مااخدت حريتك...احترم كمان حريتي
*********************************************
دي كانت جزء بسيط جدا من مصر اللي نفسي فيها
مصر التي في خاطري
معقول في حد مش نفسه مصر تبقى كدة؟
احنا ازاي مش كدة
في اي منطق بيبرر ان دة مايبقاش موجود في بلده؟
احنا مانستحقش كدة؟
هل احنا مخلوقات اقل من شعوب تانية كتير عايشة في كل اللي انا كاتبه ؟
ليه مستكترين علينا اننا نكون اصحاب قرارنا
مصر مش بتاعت حد
مصر محدش اخد توكيلها
مصر ملكية عامة
مصر دي بتاعتنا كلنا

fb comments

wibiya widget

LinkWithin

Related Posts with Thumbnails