Wednesday, 27 February 2008

مش انا اكتشفت اني نصاب؟


مش انا طلعت نصاب؟
اه بجد
قريت في الجورنال ان انا نصاب
لا ومش اي نصاب
دة انا نصاب جامد قوي....ومتخصص نصب ع البنات...لا وايه كمان...ومتخصص نصب ع الانترنت
والحمد لله انها جت لحد كدة
كنت ممكن اطلع اني بقلب البنات ومش بعيد كمان اطلع اني بستدرجهم واسرق فلوسهم واغتصبهم كماااان
عايزين تعرفوا الحكاية؟
اقول لكم من البدايـــــــــــــــــــــــــــــــــــــــــة
انا متعود كل يوم ثلاثاء اني اشتري جورنال اسمه وشوشة
وشوشة دة جورنال فني اجتماعي خفيف لطيف بحب اقرأه من باب التسلية والخروج من موود الشغل والصحف السياسية
قاعد في امان الله في عربيتي وبأتصفح الجورنال بسرعة وبأوصل لصفحة 18 واذا بي اجد المفاجأة الكبرى
صورتي في الجورنال
في البداية لعدة ثواني جالي حالة لخبطة لدرجة اني شبهت ع الصورة ومعرفتش نفسي...لحد ما مخي جمع تاني واتأكدت ان هو انا
بعد ما فوقت شوية من صدمة وجود صورتي في جريدة فنية على الرغم اني مش فنان ولا لاعب كرة ولا نجم من نجوم المجتمع....قلت اشوف الناس دي حاطة صورتي ليه من الاساس
وهنا كانت الطامة الكبرى

احنا شباب نصاب

خدوا بالكوا يا بنات من شباب اليومين دول

اكتشفت ان انا احد اربعة نماذج لشباب اليومين دول النصاب اللي كاتب الموضوع مشكورا قرر انه يحذر اخواته البنات مننا
وتحت صورتي اللي احتلت الحجم الاكبر بلا فخر لقيت 3 صور ل 3 شباب نصاب زيي كدة بس معرفش حد منهم على الاطلاق
قلت اقرا الموضوع...يمكن يكون في سوء تفاهم ولا حاجة......لقيت ان كاتب الموضوع واسمه محمد حمدي وبالمناسبة انا معرفهوش اصلا بيحذر البنات من شباب اليومين دول النصابين اللي بيصنفهم ل 4 تصنيفات طبقا طبعا لخبرته العريضة وحكمته البالغة الى
النصاب الرومانسي اللي بيسبل بقى وكدة وبيعاني من مشاكل عائلية او عاطفية وكل حواراته رومانسية ودموع
النصاب الروش طحن: اللي بيروح سيتي ستارز باستمرار وبيصيف في مارينا وان كل كلامه عن العربيات وعن البنات وان كل مصطلحاته اجنبية
النصاب المتدين: اللي بيوقع البنات بالدين وقال الله وقال الرسول
النصاب الخبرة:ودة بقى الشاب العملي اللي محدد اهدافه بدقة وبيكلم بنات كتير ومضبط جدول مواعيده
سيبكوا انتوا بقى من كل الهجص دة .....انا مالي بالكلام دة؟
صورتي انا تتحط على موضوع زي كدة ليه؟ومين محمد حمدي دة اصلا؟ومين الناس اللي صورهم معايا في الموضوع دة؟
يا ترى السيد حمدي دة بقى مصنفني في اي نوع من انواع النصب دة....وهو يعرفني منين اصلا؟
وهل من حق اي حد انه ياخد صورة شخصية لاي حد ويألف موضوع عنه
هل يجوز اني اطلع في جورنال واقول احترسوا يا جماعة في واحد حرامي اسمه محمد حمدي...على الرغم اني ماعرفش حد بالاسم دة اساسا
واضح ان الاخ محمد حمدي استفزته الصور اللي في المدونة استفزاز طبقي او فكري او اي نوع من الغيرة وقرر ينتقم بطريقته....بس للاسف هي طريقة اقل ما يقال عنها انها رخيصة وحقيرة
على الرغم واشهد الله ان الغرض من المدونة دي هو فكر بحت....ولا اقصد بالصور دي اي شيء من اللي اتصوره بعقله المريض وفكره الشاذ
الصور دي موجودة في المدونة باعتبار ان المدونة بالنسبة لي هي ارشيف للافكار وارشيف لك لحياتي ليس اكثر ولا اقل
انا ماكتبتش الموضوع دة بغرض التسلية..وربنا يعلم قد ايه انا متضايق...وقد ايه انا عاجز عن فعل شيء يشفي غليلي من شخص اقل ما يقال عنه انه بني ادم عديم الامانة والاخلاق
عايز بعد ماتقروا الموضوع دة تفكروا لو الموقف السخيف دة حصل فيك او فيكي....هيكون موقفك ايه؟
انا فعلا زعلان وغضبان وحزيـــــــــــــــــــــــــــــــــــــــــــــــــــــــــــــــــــــــــــــن
تحديث:
بعض الاصدقاء الاعزاء اكدوا لي ان محمد حمدي المذكور في الموضوع دة شخص اخر غير مدون اسمه محمد حمدي صاحب مدونة دماغي
نعتذر على هذا اللبس الغير مقصود الناتج عن تشابه الاسماء
تحديث2:
اتصل بي الصحفي محمد حمدي اللي كتب الموضوع في جريدة وشوشة واعتذر لي بشدة وقال ان دة ناتج عن سوء تفاهم وانه كلف واحد صاحبه انه يجيب له بعض الصور من ع الفيس بوك واختار بعض الصور ومنها صورتي على اعتبار اني موافق على نشرها على اساس ان ال3 اشخاص اللي صورهم موجودة مع صورتي في الموضوع دة هم من اصحاب صاحبه دة
وبلغني اعتذاره مع وعد بتصحيح الموضوع دة بموضوع تاني اكثر ايجابية في وقت لاحق

Friday, 22 February 2008

المساواة في التزويغ.....عدل


يااااااااه
التعليم اتغير قوي عن زمان....مش بس التعليم..دة واضح ان سلوك البنات اختلف اختلاف كلي وجزئي في ال 10 سنين الاخيرة
انا كنت في الثانوية العامة من حوالي 12 سنة وبالتحديد سنة 1996
لحد ماكنت موجود في التعليم ما قبل الجامعي...ماكنش لسة مدارس البنات وصلت للمستوى دة
اي نعم كان في بوادر انحراف في اوساط بنات الثانوي...وبدأنا ايامها نشوف حاجات غريبة ماكناش متعودين عليها
تخبلوا ان البنت ايامنا اللي تحط روج وماكياج وهي لسة في ثانوي كانت بتبقى حاجة عيب جدا.....وكانت سيرتها بتبقى على كل لسان
وكل واحد يقابل التاني ويقول له:
شفت فلانة.....تخيل كانت حاطة ماكياج في الدرس النهاردة؟؟؟؟؟؟
وحاجة بقى ايه......فضيحة بجد
والكلام دة مش في ازمنة سحيقة ولا حاجة..دة لحد 1996 مش بعيد قوي يعني
بس واضح ان التطور الرهيب اللي حصل في كل حاجة في حياتنا بيصاحبه برضة تطور رهيب في الانحطاط الاخلاقي
ومش بقصد بالانحطاط الاخلاقي الهروب من المدرسة...انا عن نفسي كنت بنط من فوق السور انا وكل زمايلي على الرغم من اننا كنا في فصول المتفوقين وكمان اخلاقنا كانت بتعتبر مضرب الامثال
انما الانحطاط الاخلاقي بعينه هو ان ظاهرة النط من فوق السور تنتقل لمدارس البنات....يا خبر ابيض
انا مش متخيل ان بنت تتسلق السور وتقف عليه وبعدين تنط من الناحية التانية على مرأى ومسمع من كل الشباب والرجال اللي في الشارع
انا على حد علمي ان البنات زمان كان عندهم حاجة كدة اسمها خجل وحياء...كسوف يعني بالفلاحي
انما الصورة بتقول ان دة كان زمااااااااااااان
وان الجديد دلوقتي ان النط من فوق السور والتزويغ من المدرسة حق لكل طالب وطالبة وان مفيش فرق في كدة بين ولد وبنت
على اساس بقى ان البنت زي الولد ماهيش كمالة عدد
انما السؤال اللي محيرني بجد ومش لاقي له اجابة
يا ترى زي ما النط من فوق السور والتزويغ من المدرسة انتقل لمدارس البنات...يا ترى في حاجات تانية اتنقلت معاه؟
يعني ايه اخبار السجاير والشتائم والمجلات و الكتب الجنسية؟
هنشوفها قريبا برضة في مدارس البنات؟
ولا هي موجودة فعلا حاليا؟
مش عارف والله
واضح ان الدنيا تطورت خالص
وسلم لي على تطوير التعليم

Sunday, 17 February 2008

ومن الفساد ما قتل


الكاتب الكبير فهمي هويدي في كتابه الرائع
"عن الفساد وسنينه"
ذكر حادثة حصلت في مصر غالبا في 2001 ونشرتها جريدة الوفد
هنقل الحادثة بالنص كما ذكرها الكاتب الكبير الاستاذ فهمي هويدي في كتابه
"شهدت منطقة مصر الجديدة ومدينة نصر حادثا بشعا دفع فيه شاب حياته ثمنا لمرور موكب احد المسئولين.
فقد كان طارق الجوهري البالغ من العمر 24 عاما والذي يعمل مديرا للانتاج الفني في طريقه الى عمله وقد سلك فيه احد الطرق الشهيرة بالمنطقة - شارع صلاح سالم- وتصادف انذا مرور احد المسئولين الذي ضم سيارتي جيب شيروكي وسيارة مرسيدس سوداء.
لم ينتبه الشاب الى اقتراب الموكب منه الذي انطلقت سياراته بسرعة جنونية فما كان من احدى سيارتي الجيب الا ان احتكت بسيارة الشاب بسرعة لابعادها عن الطريق.الامر الذي ادى الى قذف السيارة جانبا وارتطامها بشجرة على رصيف الشارع.ادت شدة الارتطام الى شطر السيارة نصفين,في الوقت الذي واصل فيه الموكب سيره بنفس السرعة,دون ان يعبأ قائد سيارة الحراسة بما حدث.
توقف سائق سيارة اجرة شاهد الواقعة لانقاذ الشاب طارق.وكل مافعله ضابط المرور المكلف بالمنطقة انه سحب منه رخصة القيادة,لأن وقوفه تسبب في تعطيل تدفق السير!!!ولم يكترث السائق الشهم بتصرف الضابط,وقام باخراج الشاب من السيارة بصعوبة بالغة
اتصل الشاب الذي كان لا يزال على قيد الحياة عبر هاتفه النقال بأحد اصدقائه وابلغه بما جرى فجاء صديقه على الفور واستدعى سيارة للاسعاف قامت بنقله الى مستشفى هليوبوليس في حي مصر الجديدة
عرض الشاب طارق على الطبيب المختص,وشكا من شعوره بضيق في التنفس,فأمر الطبيب باجراء مسح اشعاعي لصدره ومعدته,وفي اثناء نقله الى قسم العناية المركزة الموجود في طابق اخر بالمستشفى,تعطل المصعد.وظل متوقفا مدة 15 دقيقة كاملة,حتى تم رفعه يدويا
تدهورت الحالة الصحية للشاب من جراء التراخي في اسعافه,وبمجرد دخوله الى غرفة العناية المركزة,لفظ انفاسه الاخيرة,وصعدت روحه الى بارئها
تم تحرير محضر صباح اليوم التالي الذي اعتبر ما جرى نتيجة لوقوع حادث سير عادي,وصرحت النيابة بدفن الجثة مالم تكن هناك شبهة جنائية.
واسدل الستار على القصة حين تم دفن طارق الجوهري...انتهى الخبر"
************************************************************
ذهووووووووووول
قعدت متنح كام دقيقة....وقريت القصة دي تاني....وتنحت بعدها تاني
هو في كدة؟
احنا فين؟ وليه اصلا؟ الشاب دة مات ليه؟اتقتل ليه؟
عربيتين حراسة ومرسيدس سوداء يعني وزير نص ونص...مابالك بقى لو وزير سيادي كان كام واحد مات في الليلة دي
طب الراجل والله يرحمه مخدش باله انه في مصر وافتكر نفسه في بلد محترم المسئولين فيه بيمشوا في الشوارع عادي كدة مع البني ادمين..هو غلط..بدل ما تنصحوه انه يحترم نفسه ويوسع السكة لأسياده تقوموا تخبطوه بالعربية؟
اللذيذ بقى ان طقم الحراسة تعامل مع الموقف كما لو انهم كانوا بيهشوا ناموسة..مش طوحوا بني ادم وعربيته ورموهم ع الرصيف
كله كوم بقى..وضابط المرور اللي زعل قوي ان سواق التاكسي معطل المرور ونزل ينقذ الراجل اللي بيموت دة فراح ساحب منه رخصته....دة بقى كوم لوحده...يا نهار اسود....دة ضابط؟ ضاااااااااااااااااااااااااااابط
مش لاقي كلام اقوله والله
الاسانسير بقى مايعطلش الا والراجل دة بيمووت....يا سبحان الله..بس اغلب الظن ان دة محصلش صدفة على اساس ان الاسانسير دة العادي بتاعه انه يبقى عطلان والاستثناء انه يكون شغال
اما النيابة بقى.....تصريح بدفن الجثة.....عادي حادثة يا جماعة محصلش حاجة...حادثة
طارق الجوهري دة ذنبه في رقبة مين؟
ضابط الحراسة...ولا رئيس طقم الحراسة....ولا المسئول اللي بيحرسوه...ولا اللي عين المسئول اللي بيحرسوه...ولا ضابط المرور اللي مصمم ياخد رخصة سواق التاكسي....ولا الطبيب اللي شافه ومعرفش يسعفه...ولا مدير المستشفى اللي سايب الاسانسير عنده عطلان...ولا وكيل النيابة اللي صرح بدفن الجثة....ولا التربي اللي دفن الجثة
اذا عرفت الاجابة...اتصل على الرقم المجاني لمكافحة الفساد....دة اذا عرفت الاجابة
انا في رأيي المتواضع ان طارق الجوهري هو اللي غلطااان..ايه اللي خلاه يروح صلاح سالم في الوقت دة؟ من خرج من داره اتقل مقداره
الكتاب الرائع "عن الفساد وسنينه" صادر عن دار الشروق...ومليان مما لذ وطاب من عينة الحادثة دي
كتاب رائع انصح بقراءته....بس مع مضادات للأكتئاب

Wednesday, 13 February 2008

تاج وتمن8/1


يا تاجاتك يا بس بس!!!!!!!!!!
بس بس( الروح ) مضبطاني بالتاجات اعلى تضبيط
الاسبوع اللي فات اتحفتني بتاج وكتبت لي ان لي تاج عندها...رحت ادور ع التاج عندها مالقيتش غير سؤال واحد
اتاري التاج عبارة عن سؤال واحد فقط لا غير
طلع تمن تاج بس
بوست ايدي شعر ودقن وقلت اصغر تاج في الحياة
بس بس قررت ان فرحتي لا تدوم وبالتالي اتحفتني بتاج سمين من العيار التقيل من بتوع زمان دول
وبالتالي بقيت مديون لها بتاج وتمن
نبدأ بالتمن الأول:
هل تقبل ان تتزوج امراه مطلقه ؟؟
انا عن نفسي اقبل....ولكن هل المجتمع يقبل؟
الأهل هيكون ايه موقفهم ايه؟
اغلب الظن انهم مش بس هيرفضوا...هم هيحاربوا الفكرة دي بكل ما اوتوا من قوة
بكل الترغيب والترهيب....هيستخدموا سلاح الابوة والامومة وكمان سلاح التهديد والوعيد
احنا مش عايشين لوحدنا...حوالينا ناس..وناس بيحبونا...ماينفعش علشان نسعد نفسنا..نتعس ناس كل ذنبهم انهم بيحبونا وشايفين ان دة غلط ومصيبة
انا عن نفسي مش فارق معايا على الاطلاق حكاية مطلقة او ارملة انما فارق معايا تماما اهلي وناسي اللي اكيد فكرة زي دي ممكن تصيبهم بدمار شامل
اللي يقدر يتغلب على الصعوبات العائلية دي....يبقى مبروك عليه
**************************
نخش بقى على التاج الدسم....اللي فات دة كان زي الشوربة اللي قبل الاكل....نخش ع البهاريز
هل توافق على حزف خانة الديانة من البطاقة الشخصية ؟
خانة الديانة دي مضايقة الناس ليه؟
مالها خانة الديانة؟
انا عمر ما حد شاف ديانتي في بطاقتي...دي حتى مكتوبة في ضهر البطاقة مش في وشها
الخانة دي مطلوبة بشدة لعمليات ادارية واجرائية بحتة ولا شيء غير ذلك ولا اعتقد ان لها اية استخدامات اخرى..وبالتالي انا ضد الغاءها على طول الخط
مش ناقصين نصب والنبي...كفاية
رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
انا شخصيا بقرف منهم
بصراحة..بقرف قوي بالذات من المثليين الذكور
انا بشوف انها مرض نفسي اكتر منها حرية شخصية
لو المريض المثلي معترف انه مريض يبقى لازم نساعده انه يتعالج.....لو هو مصمم ان دي حرية شخصية اوك ماشي
بس يكف اذاه بقى عن الناس ويعيش في حياته بمبدأ
اذا بليتم فاستتروا
اوافق على الاعتراف بيهم علشان يكونوا معروفين في المجتمع بدل ماهم مندسين وسطنا وعارقين منهم قلة ومش عارفين اغلبهم وبالتالي في حالة الاعتراف بيهم هيبقى سهل انهم يتعرفوا
انا ماليش اي اصدقاء مثليين على الاطلاق.....ماقابلتش حد منهم قبل كدة وجها لوجه
هل تعتقد بوجود إضطهاد للمسيحين فى مصر ؟
اضطهاد بمعناه الحرفي....مش للدرجة دي
انما في حاجة غلط.....في وظايف كدة ماشفناش فيها حد مسيحي
سيبك من رئاسة الجمهورية ورئاسة الوزراء والكلام دة لاننا ماشفناش فيها حد مسلم برضة.........قصدي طبعا مسلم غير اللي موجودين فيها دلوقتي..بمعنى انها حكر على افراد معينين بصرف النظر عن دياناتهم
قصدي انها احتكااااااااااااااااااااااار وغير مسموح لاي حد بالقتراب او التصوير...اي حد بصرف النظر عن ديانته
انما هتلاقي الشرطة او الجيش ا و اي جهة سيادية اخرى عددهم بيكون قليل جدا بيصل لحد الندرة....انما هتلاقي ان الاخوة المسيحيين بيسيطروا على قطاع الطب والصيدلة بشكل كبير جدا وملحوظ
على فكرة:
انا مابحبش التقسيمة دي على الاطلاق ولست من هواة التصنيف الديني ولكن اجابتي دي نتيجة للسؤال ليس الا
من هو الشخص الذى تختارة لرئاسة مصر ؟
اي حد نفسه ينضف مصر
اي حد
اي حد
اي حد
بس يكون ناوي يبني دولة اسمها مصر على نضافة...ومش هقول يبنيها من اول وجديد لان مصر عمرها على مدار تاريخها محدش بناها اصلا..واللي فكر نفسه انه بيبني بلد اكتشف انه بيبنيها على اسس هشة
إذا قت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟هل توافق على مشاركة كل من : الإخوان المسلمين - الأقباط فى الحكم ؟
اي حد ان شاء الله يكون بوذي....هندوسي......سيخي حتى
الاهم من كل دة
انه يكون بيحب البلد دي....مش بس بيحبها
بيعشقــــــــــــــــــــــــــــــهـــــــــــــــــــــــــــا
مصر عايزة ناس بيحبوها اكتر من نفسهم...مش مهم اسمهم ايه
احمد او محمد او جورج او كوهين...المهم انه يكون جنب اسمه:
مصري
فى رأيك الشخصى .. ما هى أفضل مدونة على بلوجر قمت بزيارتها ؟
اي مدونة احس انها بتتكلم عن موضوع يخصني
انا مش بقيم مدونات...انا بقيم موضوعات
اذا تزوجت وأنجبت ولدين وبنتين .. أى الأسماء تحب أن تسمى ؟
سيف الاسلام ونور الدين بالنسبة للأولاد
فريدة و سارة بالنسبة للبنات
هل تعتقد أن توريث الحكم فى مصر . . سيتم فعلا أم لا ؟
لا اعتقد على الاطلاق
مصر لسة فيها ناس....لسة بتنبض
لسة لم تمت
مصر مش زي سوريا
مش هيحصـــــــــــــــــــــــــــــل
هتمرر التاج لمين
قصدك التاج وتمن 1/8
امرره لأي حد بيحب يقرا للعبد لله الفقير
اي حد فكر يرد عليا
اي حد بيقدر اني زرت في مدونته وقرر يرد لي الزيارة
وفي النهاية
اللي بيحبنا مايضربش نار

Saturday, 9 February 2008

و رحل الفارس

انا لله وانا اليه راجعون


مجدي مهنا

رحيــــــــــــــــــــــــــــــل الفــــــــــــــــــــــــــــــارس

فليرحمك الله

Sunday, 3 February 2008

انا اعشق هذا الرجل


السنة اللي فاتت كتبت بوست بعنوان
"يوم في معرض الكتاب"
وحكيت عن جولتي في المعرض وسلبياته وايجابياته من وجهة نظري طبعا
السنة دي كنت ناوي اكتب بوست بعنوان
"يومان في معرض الكتاب"
نظرا لأني رحت المعرض السنة دي مرتين مش مرة واحدة
مرة مع خطيبتي ومرة مع احد اصدقائي المثقفين
طبعا كل مرة منهم كان لها طعم مختلف والمرتان كانوا احلى من بعض.(بس طبعا المرة اللي مع خطيبتي كانت احلى بكتيـــــــــــــــر...النت متراقب يا جماعة)....والمعرض السنة دي كان افضل بكتير من السنة اللي فاتت ...اكثر تنظيما...لوحات ارشادية اكتر...كتب اكتر..دور نشر اكتر
لسة الشروق ومدبولي وميريت وجرير هم معرض الكتاب....لسة الاهرام واخبار اليوم ودار المعارف لديهم قدرة غريبة عجيبة على معاقبة الناس على مجرد التفكير في دخول اجنحتهم
الفرق بين جناح الأهرام وجناح دار الشروق مثلا..زي بالضبط الفرق بين القطاعين العام والخاص...زي بالضبط الفرق بين شركة بيع المصنوعات المصرية ومحلات هارودز الشهيرة بلندن
بالنسبة للمؤسسات الصحفية الكبرى زي الاهرام ودار المعارف عندهم يقين تام ان الناس اللي داخلة اجنحتهم دول مجموعة من اللصوص وبالتالي ممنوع منعا باتا الدخول بأي نوع من الحقائب او الكتب ولازم تسيب الشنط اللي معاك برة في الامانات
وما ادراك ما الامانات؟
كشك متناهي الصغر جواه موظف واحد وقدامه حوالي 30 او 40 بني ادم عايزين يسيبوا شنطهم فيه علشان يدخلوا جناح الاهرام اللي طبعا من وجهة نظر المسئولين عنه هو الجنة ونعيمها
ولك ان تتخيل المعادلة الحسابية
كشك متر *مترين ومطلوب وضع كمية مهولة من الشنط بانواعها جواه مع ضرورة كتابة بيانات اي شنطة هتتحط فيه واستخراج فاتورة بالامانات ودة مطلوب من موظف واحد بس انه يعمله
وطبعا اي بني ادم عنده ربع احترام لنفسه وادميته هيلعن ابو الاهرام على اخبار اليوم على دار المعارف على اللي عايز يدخلهم.....وسلم لي بقى ع المؤسسات الصحفية
الغريب والعجيب ان دور النشر الكبرى اللي عايزين ينجحوا وعايزين يبيعوا مفيش عندها المهزلة دي على الاطلاق...ادخل بأي شنط انت عايزها واتصفح كل الكتب اللي انت عايزها..لأن الناس دي عايزة تنجح وعايزة تبيع وعايزة تكسب وقبل كل دة عايزة تنشر ثقافة وفكر قبل اي شيء
ببساطة لأنه مش مال سايب
اما بقى عن الكتب اللي اشتريتها وانطباعاتي الاخرى فده مش مهم لأن كل دة بيتضاءل قدام الحدث الاعظم بالنسبة لي في معرض السنة دي
بلال فضل
انا بعشق الراجل دة
...لحد يوم الجمعة اللي فاتت كنت بعشقه لكتاباته الساخرة ولنقده للأوضاع السيئة المزرية بأسلوب لا يخلو من الفكاهة ولكنها الفكاهة المريرة...حيث ان شر البلية ما يضحك
من يوم الجمعة اكتشفت ان الراجل دة يستحق فعلا حب الناس وان من حبه ربه حبب فيه خلقه فعلا
ايه البشاشة دي...ايه الاحترام دة....ايه الاخلاق والروح العالية والتواضع دة
قابلته في دار ميريت...فوجئت انه اطول كتير مما كنت اعتقد...كل اعتقادي كان ان بلال فضل قصير وتخين...ماكنتش متخيل على الاطلاق انه طويل وعريض
ماصدقتش نفسي...لقيته حواليه عدد كبير من الاشخاص بيطلبوا انهم يتصوروا معاه...وهو بمنتهى الاحترام والبشاشة وسعة الصدر بيلبي طلبهم دة بكل سرور
بلال لم يرفض اي طلب لأي حد...انا اعتقد ان لو حد كان طلب منه في هذه اللحظة نسخة مجانية من كتابه الرائع (قلمين)لم يكن ليبخل بها ابداااااا
بلال كان موجود علشان يوقع على كتابه الجميل "قلمين" لزوار جناح ميريت بالمعرض..ومن سوء حظي اني كنت اشتريت الكتاب قبل المعرض وبالتالي لم احظ بشرف توقيعه على نسختي..انما صديقي العزيز هو من نال الشرف دة
بلال فضل لا يكتفي بمجرد التوقيع انما كالعادة بيكتب دعابة خفيفة على غلاف الكتاب
بلال فضل اتمرمط كتير وهو نفسه اللي بيعترف بكدة ولكنه بني ادم مش ناقص.....الشهرة لم تغيره على الاطلاق.....تحس انه اخوك صاحبك...تحس انك فعلا تعرفه من زمااااان قوي
بلال:
بقدر حبي وتقديري واحترامي واعتزازي وفخري اني قابلتك وكلمتك واتصورت معاك...بقدر كرهي وغضبي الشديد من اللي حرمونا من اطلالتك الجميلة الساحرة علينا في برنامج بحجم "القاهرة اليوم.."يوميا
بس بجد مقابلتي ليك طمنتني ان زي مصر ما فيها ممتاز القط واسامة سرايا ومحمد على ابراهيم....مصر كمان فيها بلال فضل
انا اعشق هذا الرجل.

fb comments

wibiya widget

LinkWithin

Related Posts with Thumbnails