Monday, 28 January 2008

انا كمان عايز اتصل بيهم


بتنتهي مباراة مصر من هنا...وبتبدأ السعادة والفرح الشديد والانتشاء واقعد اقلب في المحطات المختلفة علشان اتابع الاستوديوهات التحليلية واعادة الاهداف واللقطات المهمة مع خلفية موسيقية لاغاني وطنية سواء حديثة او قديمة
وتستمر حالة السعادة دة لحد ما يجروا الاتصال اياه بالبعثة في غانا ويفرحنا رئيس البعثة ويبلغنا ان السيد علاء مبارك اتصل بيه وابلغه سعادته الشديدة وتهانيه وتمنياته القلبية للاعبين
فورا...وبلا سابق انذار تتحول حالة السعادة لحالة من التساؤل وتقعد كدة شوية علامات استفهام تتراقص قدام عيني وتلعب في دماغي التعبانة كام سؤال كدة مالوش اي معنى...بس تقول ايه بقى...ماهي دماغ تعبانة ليس عليها حرج
ليه الاستاذ علاء بيتصل ببعثة المنتخب؟ وبأي صفة؟
هل بصفة انه مواطن مصري بيحب منتخب بلاده؟ طب مانا كمان مواطن مصري وبموووت في منتخب بلادي بس ما بتصلش ببعثة المنتخب لا في غانا ولا حتى في القاهرة
طب ازاي بيعرف يتصل بيهم؟ معاه نمرة رئيس البعثة؟ طب نمرة رئيس البعثة دي بيجيبوها منين؟ انا عايز نمرة رئيس البعثة
طب هو بيشغل منصب رسمي علشان كدة بيتصل بيهم؟
محدش بلغنا بحاجة زي كدة
طب ليه الاستاذ جمال مش بيتصل بيهم ويطمئن عليهم؟ هو مش مصري هو كمان وبيحب منتخب بلاده؟
طب ايه سر السعادة اللي بتكون على وش رئيس البعثة او مدرب المنتخب وهو بيبلغنا خبر ان الاستاذ علاء كلمه في التليفون؟
طب هل لو انا اللي كلمتهم بالتليفون كان هيبلغ الشعب المصري الفرحان بالخبر السعيد دة؟
وليه لما بيبلغوا اللعيبة بالخبر السعيد دة بيقولوا ان الحماس دب في الاعبين وان عنيهم دمعت من التأثر والحاجات دي
هو فيه ايه؟
دستوريا...وانا اسف على ذكري كلمة ابيحة زي كدة...انا والاستاذ علاء مواطنان مصريان لنا نفس الحقوق وعلينا نفس الواجبات...بس الفرق بيننا ان الاستاذ علاء بيعرف يتصل ببعثة المنتخب وانا بكتفي اني افرح ان الاستاذ علاء اتصل ببعثة المنتخب
الحكاية دي فكرتني بمشهد من فيلم قديم كان عادل امام طالع كومبارس وبيطلع ينضرب في الافلام وكان يوسف شعبان طالع في دور بطل الفيلم
دور عادل امام كان بينحصر في انه ينضرب بس..وكل شوية يعيدوا المشهد بتاع الضرب لحد ما الراجل اتهرى وفاض بيه
فقال للمخرج..انا عايز ابوس......
المخرج رد عليه وقال له لا انت هتنضرب بس
فرد عليه عادل امام....اشمعنى الاستاذ يوسف شعبان بيبوس
المخرج قال له كلمة حكمة والله..قال له
الاستاذ يوسف شعبان يبوس.....انما انت تنضرب بس

بس خلاص

Sunday, 20 January 2008

لا سامحك الله


في 15 يناير من كل سنة بيكون عيد ميلاد جمال عبد الناصر صاحب انقلاب يوليو 1952
وفي 15 يناير السنة دي كان عيد ميلاده التسعين لأنه من مواليد 1918
لو كان عبد الناصر لسة عايش...حي يرزق...تفتكروا كان زمانه بيحكم مصر وهو في التسعين؟
اكيد طبعا...كان زمانه بيحكم مصر البائسة لحد دلوقتي وكان زمان خالد عبد الناصر رجل اعمال بيمتلك المليارات وكان اكيد السيد عبد الحكيم عبد الناصر كان هيبقى ماسك لجنة السياسات بالاتحاد الاشتراكي
بس المؤكد والاكيد ان ساعتها ماكانش هيكون في حاجة اسمها حركة كفاية لأنهم قبل ما يكملوا كلمة كفاية وهم لسة بيقولوا كفــــــــ.....كانوا هيبقوا ورا الشمس دة طبعا في حالة ان لسة في شمس لم تختفي
وطبعا لو اي ناصري عاشق ومتيم بالقائد الملهم الزعيم قرأ البوست دة هيصب عليا لعناته وانتقاداته بأعتبار ان عبد الناصر هو اللي حرر مصر واسس مصر وعمل مصر وعلم الشعب وملِك الفلاحين وكسا العريانين وانشأ المصانع والمدارس والجامعات والحاجات والمحتاجات
ودايما ينسوا او يتناسوا انه هو اللي اعتقل محمد نجيب في بيته ومات بحسرته وهو اللي استولى على الحكم وهو اللي كرس الحكم العسكري الى الان وهو اللي خلى كل الوظائف المدنية القيادية يشغلها ضباط جيش سابقين وهو اللي سلم الجيش لواحد صاحبه وشلته علشان يجامله وكانت النتيجة المئات من شبابنا اللي استشهد في حروب بلا اي سبب او داع
وهو كمان اللي بعت الجيش يحارب في اليمن معرفش ليه؟ وبينسوا كمان انه هو اللي اسس المحاكمات العسكرية للمدنيين اللي مازلنا بنتكوي بنارها الى الان..(اسألوا عنها اهل معتقلي الاخوان المسلمين)...هو كمان اللي في عهده ظهر مصطلح (ورا الشمس)..عبد الناصر هو اللي استبدل ملك واحد بعشرين ملك ركبهم وملكهم رقبة الشعب الغلبان دة
المتيمين عشقا براعي العروبة والوطني الحر المخلص بيتناسوا دايما حرب 67 اللي دخلها بلا اي استعداد وبناء على استشارة اصدقاؤه الغارقين في الملذات
الغريب والعجيب ان الاخوة الناصريين بيردوا دائما على الكلام دة بأنه كان مضحوك عليه من الشلة المحيطة به..وهو والله لعذر اقبح من ذنب
دايما يرد الناصريون على منتقديهم بانجازات السد العالي والمصانع الحربية والوطنية وامتلاك الفلاحين للاراضي الزراعية وكأن لم يكن من المفترض ان يكون له انجازات على الاطلاق
وهو حد في الدنيا يحكم بلد ومايكونش له انجازات؟....طب ما السادات له انجازات ومبارك كمان له انجازات..انما القياس يتم بالانجازات وايضا بالكوارث والنكبات والسياسات الخاطئة الكارثية
لما تتأمل احوال البلد دي من بيروقراطية وفساد وحكم عسكري وحكم حزب واحد ويكتاتورية وتخلف علمي وسياسي...فتش عن عبد الناصر ونظامه قبل ما تسأل عن نظام مبارك
فتش وحاكم اللي امتلك فرصة تغيير الاوضاع وتكريس حكم ديمقراطي وعودة الجيش لثكناته وتسليم مصر لمجتمعها المدني يحكمها زي اي دولة محترمة..ولكنه فضل الكرسي الوثير والشهرة على نهضة بلد وحركة ديمقراطية كانت اثارها هتمتد الى كل الدول المحيطة عربية وافريقية
السيد البكباشي جمال عبد الناصر صاحب انقلاب يوليو 1952:
لا سامحك الله
ومن غير عيد ميلاد سعيد كمان

Tuesday, 15 January 2008

يا اهلا بالتاجات

اول تاج في 2008.....استعنا على الشقا بالله
وطبعا بما ان التاج من بس بس صاحبة ومديرة مدونة الروح يبقى التاج امر
ونخش في الموضوع:
لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
كنت هقول دة شعب ماعندوش كرامة ولا عزة نفس..ممكن يبيع ابوه علشان القرش...المصري لو قلت له اقلع ملط وامش في الشارع وهديك الف ريال او درهم مش هيقول لا
وان كان الامر لا يخلو من شوية ناس محترمة في الشعب دة ولكن قلة نادرة...دة حتى المهن اللي المفروض صاحبها بيتمتع بقدر من العلم والثقافة زي الاطباء والصيادلة والمهندسين اللي بييجوا عندنا بلادنا معدوش بيختلفوا عن النجارين والعمال..كلهم بيجمعهم عبادة المال وشعارهم لا كرامة لنا امام الريال والدينار

ملحوظة:
انا طبعا باتكلم بلسان الخليجي..مش بلساني..يعني انا بانقل وجهة نظر الاغلبية العظمى من سكان الخليج العربي تجاه المصري..وان كان المصري هو سبب كدة بالطبع

لوكنت أوروبي أو غير مسلم هتبقي إيه نظرتك للعرب والمسلمين؟
شعوب همجية متخلفة..لا تفكر الا في شهواتها وبس...ناس بتلبس حاجات غريبة وبتحط حاجة اغرب فوق دماغها ولما بينزلوا اوروبا عندنا بتلاقيهم في الكباريهات وموائد القمار واحضان العاهرات
شعوب بتتحكم بالجيوش والديكتاتوريات ولا يصلح معها اي ديمقراطية ولا حقوق للانسان
ناس لا تجيد لا الاستماع ولا الحديث...كل حواراتهم عبارة عن معارك حربية....
دول بتمتلك بحيرات من النفط اكتر من ثلاثة ارباع عائدها بيروح لجيوب الحكام والربع الباقي بيتصرف على بذخ واسراف لا مبرر له
باختصار
هي اغنى دول العالم وافقر شعوب الدنيا
لوقالولك إنت بقيت رئيس جمهورية هتعمل إيه؟
هقبض على كل اللي واكلينها والعة وارميهم في السجن
وادعو كل وطني حر وقلم شريف لمؤتمر موسع لاتخاذ خطوات ووضع خطة زمنية محددة لجعل مصر وطن بحقق وحقيقي وبما تحمله الكلمة من معنى
هيبقى هدفي ان مصر تتحول ليابان الشرق الاوسط...وهي قادرة على كدة
لوسمح لك برؤية الرسول عليه الصلاة والسلام وإنك تقوله كلمة واحدة ؟
هاقول له عليه الصلاة والسلام....هم المسلمين هيفضلوا كدة ليوم الدين...ولا ممكن تاني نرجع نحكم العالم؟
لو كنا في عصر ازدهار الأندلس كنت تتخيل نفسك إزاي؟
كنت اتوقع اني اخد طيارة احضر ماتش ريال مدريد وبرشلونة اللي اكيد اساميهم ماكنتش هتبقى بالشكل دة...واتعشى في مايوركا...واخد طيارتي وارجع
ماحنا دولة اسلامية واحدة بقى
ملحوظة:
ماكناش هنستعين بمانويل جوزيه لتدريب النادي الاهلي..على اعتبار انه ساعتها ماكانش هيبقى خبير اجنبي..كان هيبقى مواطن اندلسي عربي

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
على الرغم ان السؤال دة مالوش علاقة بماقبله باعتبار ان التاج كان ماشي سياسة بس هجاوب
في حالة الحب والرغبة في الحياة..مفيش حاجة تخلي البني ادم ممكن يتخلى عن حبيبه
ايه اللي يضمن للطرف السليم انه لما يتجوز او تتجوز مايخلفش طفل معاق..او عااق...وايه اللي يضمن انه هيخلف او هتخلف اساسا
انا اعتبر دة نصيب زي بالضبط الرزق في الفلوس....والله اعلم
لو طلعت القمر هتكتب عليه ايه؟
هكتب عليه
انا مصري وابويا مصري
بس المرة دي من غير صورة جمال وباباه...زي اللي في الكليب الشهير
لو مررت التاج لحد وماجاوبش هتعمل ايه؟
هدور في مدونته او مدونتها يمكن جاوب عليه قبل كدة
بس لو ماكانش جاوب عليه قبل كدة وكمان ماجاوبوش
مش هعمل اي حاجة...عادي يعني كل بني ادم حر
تمرر التاج لمين؟
لأي حد بيحب يدخل المدونة دي وبيقرا لبني ادم اسمه
احمد سمير

Wednesday, 9 January 2008

الطبقة المتوسطة

سمعتها كتيرا ولم تلفت نظري....لم انتبه اليها...حسيت انها جملة موضة بتتقال في برامج كتيرة
لقد تآكلت الطبقة االمتوسطة ولم يعد لها وجود
انتبهت للجملة
تآكلت؟؟؟اومال احنا ايه؟
انا لسة الحمد لله لم اتآكل...مازلت موجودا..حيا ارزق...صحابي برضة لم يتآكلوا...كلهم اعضاءهم سليمة
وانا اعتقد ان مجتمعي وناسي واصحابي وقرايبي 99.9% منهم من الطبقة الوسطى اللي بيقولوا انها انتهت وتآكلت
وعلى الرغم ان مفيش تعريف دقيق للطبقة المتوسطة دي بس ممكن نعرفها كدة مع بعضنا بالبلدي الفصيح
المفروض ان الطبقة المتوسطة دي هي طبقة بين طبقتين..(والا ماتبقاش متوسطة)...فهي بين طبقة الاثرياء سواء اثرياء بحق او اثرياء الزمن دة..وبين طبقة الفقراء الكادحين اللي لا يملكوا قوت يومهم
بالنسبة لطبقة الاثرياء...بتوع القطامية هايتس وبورتو السخنة وافراحهم اللي بيتعزم فيها وزراء وكبراء وسفراء وبيحييها عمرو دياب ونانسي عجرم ودينا....فدي طبقة معروفة وسهل انك تعرفهم من ستايل حياتهم
وبالنسبة للفقراء الكادحين اللي لا يجدوا قوت يومهم فدي برضة موجودة في مناطق كتير في البلد دي من فلاحين لعمال لموظفين لعاطلين..وسهل برضة انك تعرفهم من ستايل حياتهم البائسة اليائسة اللي لا فيها لا سفراء ولا فقراء ولا عمرو دياب ولا حتى دينا
اما بقى الاغلبية الكاسحة من الشعب دة فهي الطبقى المتوسطة اللي بيزعموا انها تآكلت وانقرضت
مين اللي قال كدة؟؟
لما يبقى مفيش طبقة متوسطة..اومال 70%من موظفي الدولة يبقوا ايه....الاطباء والمهندسين والمحامين والصيادلة (بصرف النظر عن الحيتان منهم طبعا)والمدرسين...الخ
كل الناس دي لا هي اثرياء من بتوع مارينا ولا كمان فقراء متسولين....كل الناس دي ابويا وابوك وامي وامك اللي بيشتغلوا علشان يجيبوا قرش يعلموا ولادهم بيه كويس ويعيشوهم كويس ويفسحوهم في الاجازات ويشتروا لهم هدوم ويشحنوا لهم موبايلاتهم ويدوهم دروس خصوصية..كل دول طبقة متوسطة
عايشين كويس....مستورين والحمد لله
الطبقة اللي بيقولوا عليها انها انقرضت دي انا في اعتقادي بتمثل 70% على الاقل من ابناء الشعب دة
معقول 70% ينقرضوا ويتآكلوا؟
اي نعم الطبقة الوسطى جواها نفسها شرايح...يعني الشريحة العليا من الطبقة المتوسطة مثلا ممكن تلاقيها بتضم الاطباء والصيادلة وكبار الموظفين والتجار.....الخ
وكمان تلاقي شرايح دنيا بتضم صغار الموظفين وذوي الدخل المحدود وبعض الحرفيين وصغار التجار..
ولكن يبقوا كل دول جميعا من ابناء الطبقة المتوسطة اللي لسة فيها الروح والحمد للهاي نعم الفقر انتشر بشكل كبير..واي نعم طبقى المعدومين زادت والعشوائيات اثرت بشكل كبير في انتشار طبقة فقيرة وعشوائية
الا ان الاحوال المادية ادت الى زيادة الشرائح الدنيا من الطبقة المتوسطة على حساب الشرائح العليا...الا انها لسة موجودة كطبقة كبيرة بتمثل اغلبية المجتمع
انا كل مجتمعي تقريبا من ابناء الطبقة دي..واعتقد ان انت او انتي كمان معظم اللي حواليكم بينتموا لنفس الطبقة
دي الطبقة المتوسطة دي هي الاغلبية الصامتة في البلد دي
الطبقة المتوسطة موجودة
لم تتآكل علشان محدش يقدر ياكلها واحنا على وش الدنيا

Friday, 4 January 2008

يوم في احد شوارع مصر



يوم في احد شوارع مدينة مصرية
بتعمل ايه لما تلاقي عربية راكنة تحت بيتك والكاسيت عالي ومشغل اغنية شعبية بشعة..والغريب ان صاحب العربية الهايصة والمنعنشة والمنتعشة دي مش موجود فيها اساسا
يجوز نزل يشتري حاجة من السوبر ماركت..وكسل انه يمد ايده ويطفي الكاسيت قبل ما ينزل من العربية
ممكن كمان تلاقي ان صاحب السيارة الغنائية دي واقف جنبها..بس هو مزاجه انه يعلي الكاسيت ويقف جنب العربية..هو كدة...بيحب كدة...ربنا خلقه كدة......هتعمل ايه يعني؟!!!!
في اوروبا والدول المتقدمة السلوك اللي زي كدة بيستدعي تدخل الشرطة فورا وغرامة فورية وتعهد بعدم تكرار الفعل دة مرة تانية..وطبعا الشرطة بتيجي بمجرد ابلاغ سيادتك ليهم
السؤال البريء هنا بقى:
ايه هيبقى رد فعل شرطة النجدة في بلدنا مصر المحروسة لو اتصلت بيهم في يوم كدة وقلت لهم انا بأقدم بلاغ عن سيارة راكنة تحت بيتي والكاسيت بتاعها صوته عالي وعامل ضوضاء؟!!!!!!!!!!!!
انا عن نفسي متوقع الرد.....بس بما اني اعلنت مدونتي مدونة نظيفة,اعفوني من كتابته احتراما لاعينكم الكريمة من التلوث اللفظي
************************************************************************************
نفسي اعرف ليه العربيات النقل في مصر مزاجها تاخد الجنب الشمال في اي طريق سريع على الرغم ان من بديهيات قواعد المرور في مصر ان النقل الثقيل يلزم اليمين
من يوم ما وعيت ع الدنيا وانا راكب مع ابويا العربية ويادوب بفك الخط وانا بشوف اليافطة دي على كل الطرق
"النقل الثقيل يلزم اليمين"
لكن لما كبرت شوية لقيت ان مفيش الكلام دة...يمكن دة لأن كل سواق نقل بيفتكر انه مش نقل تقيل وان في اتقل منه وبالتالي الكلام مش موجه له من الاساس؟
عموما
لو عايزين النقل اليمين يلزم اليمين فعلا....يبقى القواعد المرورية لازم تتعدل واليافطة يبقى مكتوب عليها
"النقل الثقيل يلزم اليسار"
ساعتها اؤكد ان كل النقل هتلاقيه واخد يمينه
هي دي الشخصية المصرية
خالف..........................تعرف
************************************************************************************
تم اعلان مدينتي..مدينة خالية من السيارات الراكنة
اه والله
واضح ان منظر اي عربية راكنة بيستفز السادة قادة المرور وبالتالي تم اعلان جميع الشوارع الرئيسية شوارع خالية من السيارات الراكنة حتى لو كان الشارع عرضه كيلو
انا حسيت ان منظر السيارة فتنة...على اعتبار انها مؤنث...وانها لازم تستخبى في الشوارع الجانبية وماينفعش ركن اي عربية في اي شارع رئيسي (الا طبعا سيارات السادة الضباط على راسنا من فوق)..بدون اي سبب منطقي
انا افهم ان الشوارع الضيقة او ذات التكدس المروري يتم تطبيق النظام دة فيها انما اي شارع والسلام...؟
منطق عجيب فعلا
طب اصحاب السيارات يودوا عربياتهم العورة دي فين؟!!!!!ما الشوارع الجانبية اللي هي ضيقة اساسا تكدست بالقليل من السيارات...ومافيش اصلا جراجات يتحط فيها العربيات...طب الحل ايه؟
الحل واحد من اتنين:
يا اما تكون ضابط.....يا اما تبيع عربيتك وتقضيها موتورجل
*************************************************************************************
هي الاتاوة اللي بندفعها لما نيجي نركن العربيات في الشوارع (دة على فرض انك لقيت ركنة اساسا)...واللي بيحصلها واحد ما بيقولش غير جملة واحدة:
كل سنة وانت طيب يا باشا
وساعات بيقعد يقول تعالى...تعالى..تعالى..لما تبقى بترجع بضهرك وقال ايه بيطلعك يعني
الاتاوة دي بقى اللي هي 2 جنيه حاليا (كانت جنيه واحد من كام سنة)..ياترى مصيرها بيروح فين؟؟
يعني اللهم لا حسد..مين اللي بيلهف الايراد :
يا ترى الاخ بتاع كل سنة وانت طيب...ولا مجلس المدينة..ولا حد تالت خالص ولا الموضوع ريحته مش ولا بد ..ولا ايه الحكاية؟
بس على فكرة....شغلانة مربحة جدا
***********************************************************************************
بعد بقى ما التزمت بالتعليمات المرورية القراقوشية وقررت بقى اركن قي الشوارع الجانبية وبعد جهود مضنية من البحث عن مساحة فاضية ارمي فيها العربية واشوف مصالحي بقى...وجدتها
ولسه جاي اركن...لقيت واحد ظريف لطيف كدة طلع لي على غفلة وقال لي...لو سمحت ماتركنش هنا علشان باب المحل......
وجهة نظر برضة....على اساس اني هقفل عتبة الرزق بتاعتهم لما عربيتي تسد باب المحل بتاعهم
وجايز جدا الزباين تبقى ناوية تيجي تشتري منهم بس لما تلاقي عربيتي راكنة قدام باب المحل يغيروا رأيهم...
وممكن برضة يكونوا بيعتبروا عربيتي نحس او نذير شؤم على المحل وما يصحش انها تقف قدام باب المحل....ممكن جدا
المهم...مارضيتش اقاوح معاه علشان ماكنتش في مووود خناق وكان مزاجي عالي شوية ومش طالبة معايا عكننة
قلت اشوف مكان تاني برضة في اي حارة او زقاق جانبي..لعل وعسى
اخيرا وجدتها تاني
بس المرة دي صاحب المحل اللي المفروض اركن العربية قدامه طلع ناصح وحاطط قالب طوب كبيــــــــــــــر قدام المحل بتاعه
واللي جانبه حاطط موتسيكل قدام المحل..واللي جنبهم حاطط كرسي....واللي قبلهم حاطط عجلة...اما بقى الشيك اللي فيهم فحاطط قصاري زرع قدام المحل بحوالي مترين...من باب تجميل البيئة برضة
يبقى لا انا عارف اركن في الشوارع الرئيسية بسبب التعليمات المرورية القراقوشية ولا انا عارف اركن في الشوارع الجانبية بسبب التعليمات التجارية التفاؤلية والتشاؤمية
طب اعمل ايه في عربيتي اليتيمة دي اللي محش راضي يتقبلها..لا لشوارع الرئيسية عايزاها..ولاالجانبية قابلاها...اوأدها وارتاح يعني؟!!!!
***********************************************************************************
ياسلام بقى لو رحت تمون في بنزينة....وانت كدة منهمك او مش واخد بالك او سرحان....تلاقي شخص ماتعرفش طلع لك منين وهج على زجاج عربيتك بمياة وصابون....وش كدة
يعني مش بفوطة مثلا علشان ماتقولوش لا مش عايز....لا دة بصابون على طول
وبكدة سيادتك اتحطيت قدام الامر الواقع..هيكمل هيكمل...المصيبة انه ياريته بينضف الزجاج....دة بيبهدله..وبتفضل اثار صابون على الزجاج..وبدل ما كان زجاج سيارتك مجرد عليه شوية تراب...بقى مليط وملحوس وحالته بالبلاء..والمصيبة انك بتدفع فلوس مقابل بهدلة زجاج سيارتك الكريم
انا بقول نروح بقى البيت ...بلاش بهدلة في الشارع اكتر من كدة
اصل في مصرنا المحروسة
من خرج من داره......اتقل مقداره

fb comments

wibiya widget

LinkWithin

Related Posts with Thumbnails