Wednesday, 17 December 2008

كل شهر....جزرة جديدة




بادىء ذي بدء.....لو في مصطلح مش فاهمه او حاجة صعبة عليك ممكن تلاقي شرح لها في معاني الكلمات اخر البوست


لو انت بتشتغل مندوب دعاية طبية
يبقى الموضوع دة هيهمك
ولو انت بعيد عن المجال دة تماما...يبقى الموضوع دة برضة هيهمك لأنه اكيد بيتكرر في مهن اخرى كثيرة
اي مهنة مرتبطة بالمبيعات بتعاني مما يعانيه اهل الدعاية الطبية
لو انت قديم في الشغلانة دي يبقى هتحس قوي بالكلمات دي وهتحس انك سمعتها كتــــــيـــــــــــر قبل كدة
لو انت جديد في الكار دة يبقى دي فرصة انك تتعرف على بعض اصول الشغلانة والليلة دي ماشية ازاي
عدد كبير من المديرين (السوبرفايزرز)* بيحبوا يتعاملوا مع مندوبيهم بمنطق الجزرة
ومنطق الجزرة دي لمن لا يعرفه هو مصطلح يطلق على التحفيز المستمر
يعني يعلق لك الجزرة كحافز لك على العمل وكل ماتحاول توصل للجزرة دي تلاقيها بتبعد اكتر فتحاول توصل لها فتلاقيها بتبعد وهكذا
ولأنك في سباق وطحن مستمر....طوال السنة....فلابد من تصبيرة او تحفيزة او حتى تهديد علشان تعرف تواصل السباق بنجاح ساحق
ولأن ماينفعش رسالة التحفيز او التهديد تبقى ثابتة على مدار السنة والا ستصاب بالتبلد وعدم الاقتناع
اصبح لكل شهر من شهور السنة الأثنى عشر رسالته الخاصة به....او بمعنى اخر الجزرة الخاصة به
مجرد محاولة من العبد لله لنقل خبرات 7 سنوات دعاية انتقلت خلالها عبر 3 شركات ادوية في مصر وخارجها
وللعلم الكلام دة واحد في جميع شركات الأدوية المحلية منها والعالمية سواء في مصر او خارجها وكأنه كتاب محفوظ عن ظهر قلب
******************************
يناير: دة اول شهر في السنة يا رجالة......لو بدأنا بقوة يبقى السنة كلها هتبقى قوية وهنقفل السنة بقوة.....لازم يكون طموحنا كبير
احنا عارفين كويس قوي ان انتم تعبتم الكام شهر اللي فاتوا علشان نقفل السنة كويس
ولازم نجاحنا اللي حققناه السنة اللي فاتت يستمر وبنجاح اكبر السنة دي
فبراير: كلنا طبعا عارفين اهمية الكوارتر* الأول واللي بنبني على اساسه نجاحات السنة كلها
فبراير شهر في منتهى الأهمية.....لازم بقى نفوق بعد الراحة اللي ريحناها في يناير (دة على اساس ان احنا ريحنا في يناير)..لازم نشد شوية احنا في نص الكوارتر
مارس: التقفيلة* يا رجااااااالة.....الكام يوم اللي جايين دول هيتحدد على اساسهم السنة كلها
الكوارتر الأول مهم جدااااااااااااا
مفيش اجازات لحد نهاية شهر مارس...معلش نستحمل شوية
احنا ريحنا الشهرين اللي فاتوا ولازم نشد شوية علشان نلحق السنة
ابريل: الف شكر يا رجالة على المجهود اللي بذلتوه في الكوارتر الاول....بس الكوارتر الاول مش هو نهاية المطاف...ولو ماحافظناش على النجاح اللي حققناه في الكوارتر الاول يبقى اكننا ما عملناش حاجة
الكوارتر التاني في منتهى الاهمية لأن دي تقفيلة واذا قفلنا السيمستر* صح يبقى هنقفل السنة صح
لازم نشد من الأول علشان الوقت ما يسرقناش
مايو: شدوا حيلكم يا رجالة....هاااااااااانت...احنا في نص الكوارتر....ما تبوظوش الطبخة علشان شوية ملح
هنتعب الشهر دة ....نرتاح بقية السنة وتقفل السيمستر زي الفل
يونيو: السيمستر يا شبااااااااااب......عايزين نقبض السيمستر دة
الكام يوم اللي جايين دول هم اللي هيحددوا السنة دي وهم اللي هيريحونا بقية السنة
هنتعب الشهر دة.....هنرتاح بقية السنة ونعرف بقى نصيف براحتنا
مش عايز افكركم ان مفيش اجازات.....عايزين 12 زيارة في اليوم....ننسى بقى اجازة يوم الخميس....لو تعرفوا تشتغلوا يوم الجمعة يااااريت
لازم كلنا نبقى على مستوى المسئولية الكام يوم اللي فاضلين دول
يوليو: احنا عارفين يا رجالة ان احنا تعبنا قوي في السيمستر اللي فات...واكيد كلنا محتاجين ناخد اجازات ونسافر ونرتاح
بس معقول نضيع اللي احنا عملناه والمجهود المبذول دة علشان نصيف
كلنا هناخد اجازة بس لازم نعوض الاجازة دي بعد ما نرجع
يعني بدل ما بنعمل 8 زيارات نعمل 10.....واللي بيعملوا 10 زيارات يعملوا 12 زيارة
لازم نعوض الاجازات....لازم نلحق الكوارتر الثالث من بدري
لو الوقت سرقنا في الكوارتر دة...مش هنعرف نقفل السنة كويس
الكوارتر التالت هو عنق الزجاجة بجد
اغسطس: ايه يا رجالة؟ البيع فين؟
عارفين اه ان الدكاترة في اجازات بس الارقام ما بترحمش
لازم نلحق نفسنا .....الكوارتر هيضيع مننا....شدوا حيلكم
سبتمبر: لازم الكوارتر التالت يقفل كويس يا شباب
فاضل كام يوم.....عايزين نعوض يوليو واغسطس بعد الاجازات اللي اخدناها (على اساس ان احنا كنا مقضينها في يوليو واغسطس)....سبتمبر هو شهر البيع
لو ما بيعتوش في سبتمبر اومال هتبيعوا امتى؟؟؟
نركز شوية يا جماعة
مفيش اجازات لحد اخر سبتمبر....الخميس شغل.....مش مقبول اقل من 12 زيارة
اكتوبر: اخر كوارتر يا رجالة.....السنة خلصت
ماينفعش نضيع مجهود السنة كلها في اخر 3 شهور
نشد شوية.....نتعب الشهرين تلاتة اللي فاضلين علشان نقبض
عايزين وحوش في الفيلد......مش متصور اننا مانحققش بعد المجهود الكبير اللي بذلناه السنة دي
نوفمبر: الشتا دخل يا رجالة.....احنا في عز البيع.....عايزين طلبيات على قد ما نقدر....بيــــــــــــــــــــــــــــع.....بيــــــــــــــــــــــــــــــــع
مفيش اجازات.....الخميس شغل والجمعة كمان
فاضل 60 يوم والسنة تخلص......عايزين 60 يوم من نااااااااااااااااااااااار........ماينفعش ما نحققش
اللي محقق 100% ليه ما يحققش 120%......واللي فاضل له حاجة بسيطة لازم يتصرف....مفيش وقت
يا اما نحقق.....يا اما كل اللي عملناه دة مالوش اي قيمة
ديسمبر: السنة خلصت يا رجالة
مجهود السنة كلها متوقف على الكام يوم دول
يا نتعب شوية علشان نرتاح بعد كدة.....يا اما نضيع مجهود السنة كلها علشان شوية دلع
مطلوب من كل واحد 12 زيارة....الاجازات ممنوعة منعا باااااااااااااااتا
ماينفعش حد ينام في بيتهم.....اعتبروا نفسكم في حالة طوارىء
كلها كام يوم يا نحقق ونقبض يا مانحققش اي حاجة
نتعب شوية وهنلاقي وقت كتيـــــــــــــــــــــــــــــــــر نرتاح فيه بعد كدة
كله يضبط بيعه ويضبط كمان زياراته
بيــــــــــــــــــــــــــــــــــــع حتى الموووووت

وتنتهي السنة على خير او على شر.....علشان تبدأ سنة جديدة بيناير جديد بدورة جديدة بكلام قديـــــــــــــــــــــــــــــــــــم
وبتكتشف ان كل الشهور مهمة وكل الأيام شغل وكل الأجازات ملغية وكل شهر اهم من اللي قبله وكل يوم اهم من اللي فات
وان لا وقت للراحة ولا وقت للدموع
-*-*-*-*-*-*-*-*-
معاني الكلمات
مندوب دعاية طبية:
هو شخص خريج احدى الكليات الأتية
صيدلة-طب بشري-طب بيطري
و احيانا (مش في كل الشركات) علوم
وظيفته هي زيارة الأطباء في عياداتهم او المستشفيات او المستوصفات لعمل دعاية لمستحضر طبي او اكثر واقناع الأطباء بوصفه للمرضى
وهو شخص غالبا يرتدي بدلة كاملة او بنطلون وقميص وكرافتة او بنطلون وقميص بدون كرافتة ودائما يحمل في يده حقيبة
اكيد انت شفت منه كتير في الشارع او في العيادات لو كنت من مرتادي العيادات الطبية
ويكون هناك مستهدف للبيع من مستحضراته الطبية لابد من بيعه شهريا
واذا حقق المستهدف من البيع يحق له ان يقبض عمولة تختلف قيمتها تبعا لكل شركة من شركات الأدوية
ومندوب الدعاية مسئول عن عدد يومي من الزيارات للعيادات الطبية تتراوح مابين 8 الى 10 زيارات في اغلب الأحيان قد تقل عن ذلك تبعا لعوامل كتيرة
--------------------
سوبرفايزر=superviser=مدير يعني
هو بني ادم كان مندوب دعاية عادي بس لما اترقى الكرسي غيره
--------------
الكوارتر=3 شهور
وتنقسم السنة في الدعاية ل 4 كوارتر
يناير فبراير مارس=quarter1
ابريل مايو يونيو=quarter2
يوليو اغسطس سبتمبر=quarter3
اكتوبر نوفمبر ديسمبر=quarter4
و زي ما شوفنا كل كوارتر اهم من اللي قبله و الأربعة ما يتخيروش عن بعض
----------------
التقفيلة: هي اجمالي المبيعات التي تم بيعها بعد فترة زمنية معينة
ممكن تلاقي حاجة اسمها تقفيلة الشهر يعني اجمالي البيع بعد نهاية شهر معين
وفي حاجة اسمها تقفيلة السنة يعني اجمالي المبيعات اللي تم بيعها بعد سنة كاملة
وغالبا السنة بتقفل على صباعنا
----------------
السيمستر=6اشهر
وبالتالي تنقسم السنة ل 2 سيمستر
السيمستر الأول من يناير وحتى نهاية يونيو
السيمستر الثاني من يوليو وحتى ديسمبر
وبطبيعة الحال يحتوي كل سيمستر على 2 كوارتر
وطبقا للعرف السائد في بعض شركات الأدوية المحترمة يتم قبض نسبة من العمولة في نهاية السيمستر الأول في حالة تحقيق مندوب الدعاية للبيع المستهدف
------------------
الفيلد=الحقل
وطبعا مش المقصود هنا الحقل بمعنى الغيط انما المقصود هو المجال الطبي او الوسط من شركات ادوية وعيادات طبية وصيدليات....الخ
زي الوسط الفني كدة
------------------

41 comments:

  1. :)))))
    جميل جدا يا احمد
    بس هو مش مرتبط فعلا بالدعاية الطبية
    مبدأ الجزرة تقريبا بيتبعه كل صاحب عمل مع الموظفين بتوعه
    بس بوست جميل اوى

    ReplyDelete
  2. ههههههههههههههههههههههههههههههههههه كل يوم بحمد ربنا اني بنت لاني مش ملزوم عليا اشتغل والله فعلا بتتعبوا معلش بقى استحملوا وبجد مجال المبيعات ده فعلا صعب اعرف ناس شغاله فيه وبرضو صعب عليهم ربنا معاكم

    ReplyDelete
  3. انا بصراحة مطلعتش بأى حاجة من الموضوع لانى لسه بدرس ومش بستفيد حاجة
    بس كل اللى سمعتو وقريتو عندك كمان
    ان اول السنة فى حاجة هتحصل
    بلنسبة للمبيعات مش للادوية بس بس حاجات تانية اعرف ناس مستنين السنة الجديدة ه عشان فيه حاجة هتتحسن ايه هيا بقه
    تقريبا بيقولو هيبطلو استيراد من برة وكلو هيعتمد على المحلى

    علىفكرة انا مش فاهمة اى حاجة من اللى بقولها لانى متاخرة على الكليه انا قولت اعلق قبل مانزل سلامووووووز

    ReplyDelete
  4. فيه سؤالين دايما يحيّرونى فى موضوع الدعايه الطبيه ده
    أوّلا لو زرت طبيب و شرحت له مزايا المنتج الطبّى تعرف منين و تتأكّد أنّه سيقوم فعلا بوصفه لمرضاه !! ما يمكن يبدو لك مقتنعا و هو فى النهايه لا هيوصفه ولا حاجه

    كمان إزّاى تعرف إن النسبه الفلانيه خاصه بالمندوب العلاّنى؟ يعنى انت رحت لطبيب و اقنعته بالدوا و هو وصفه للمرضى و المرضى نزلوا يشتروه من الصيدليه .. مفيش اى حاجه بتربط الدوا اللى تم شراؤه فى آخر السيكل بالزياره بتاعة المندوب الفلانى للطبيب فى اولها .. يا ريت تقول لى بتتحدد ازاى العلاقه دى

    و شكرا على الإفاده :)

    ReplyDelete
  5. ماهو انتو لو تيجو فمواعيدكو هتبيعو كويس

    واللى تلاقيه جاى فمعاده جاى ب ايده فاضيه معلش يادكتور فى نقص فالعينات ههههههههههه اومال والنبى تاعب نفسك وجاى ليه يكونش الدكتور مخه دفتر وهيفتكر البرودكت بتاعك من وسط غيرك عشان خاطر عيونك

    بس معلش والنبى بما انك مندوب هوا ليه المندوبات الفيميلز عاملين كدا

    يعنى ليه النحنحه والميك اب الاوفر ولا كانها رايحه السيرك واللبس الديق واللت والعجن انا بيجيلى صداع على ماتقول الشريط اللى حافظاه تلت اربع مرات وتدلعلها شويه وتسبل للدكتور لو راجل كام شويه كل دا عشان خاطر يكتبلها البرودكت اللى هوا فالاخر شويه مطهر وتلف مصر بالعرض والطول وفالاخر ترجع بيتهم الساعه واحده ولا اتنين

    لكن المندوبين الميلز بصراحه بينجزو ويجيبو من الاخر وفالسريع بحترمهم اكتر من اللى جايين يستعرضو جمال خطوتهم دول

    ReplyDelete
  6. والله يا ابوسمره يا اخويا الجزرة دي موجودة في كل مكان
    بس بيني وبينك موضوع نشد حيلنا الشهر دا عشان ريحنا الشهر اللي فات..تكرارها يبقى اسعباط

    ربنا يعينك ويعينيا معاك ياباشا
    محمد سمير

    ReplyDelete
  7. الله يكون ف عونك يا احمد والله
    انا لسة امبارح كنت ف مستشفى وكان الصبح بدري
    وكانو المندوبين لسة مستنيين ياخدوا التصريحات عشان يدخلو على الدكاترة
    يبدو ان موضوع التصريحات ده جديد عشان فيه إعلانات متعلقة تفيد بأهمية التصريح للمندوب قبل الدخول

    حقيقي بهدلة وتعب
    ربنا يعينكم

    ReplyDelete
  8. حلو اوى الموضوع ده

    كمل النقط على الحروف عندى

    جزاكم الله كل خير

    ReplyDelete
  9. انا جايه امسى وارمى السلام بما انى مفهمتش حاجه والدنيا اييييييه

    :))))))

    ReplyDelete
  10. انت فكرتني بأيام تقيلة على قلبي بجد

    كنت شغال فيها الشغلانة المتعبة دي

    وكانت برضو غصب عني لظروف عائلية


    لكن الحمد لله ربنا تاب علينا منها ولله الحمد

    ربنا يعنيك يا باشا وانا عارف ومقدر كل كلمة قلتها في التدوينة دي وحاسس بطعمها الان

    ربنا معاك ويتوب عليك منها لو مش كنت بتحبها زيي


    سلام يا جميل

    ReplyDelete
  11. السلام عليكم ورحمة الله وبركاته

    هههههههه

    كلهم هذا الرجل

    بس مين اللي قال ان الشتا عز البيع دا الشتا بيبقي البيع فيه زي الزفت ولا شهر 9 ده دخول مدارس وعيد صغير ، والشغل بيبقي زي الزفت برضو

    ومش عاوزه اقولك بقي علي فبراير وفي قول آخر فقراير

    بس عاوزه اقولك ان لو حققت ميه في الميه السنه دي السنه الجايه بيعلوا التارجت وبدل مثلا مايكون 100 علبه من صنف معين يبقوا ميه وخمسن او متين

    يا ابني شركات الادويه دي طاحونه بتطحن اللي بيشتغلوا فيها عشان كده دايما بيشترطوا في مندوب الدعايه انه يكون اقل من 28 عشان يقدر علي المرمطه اللي بيمرمطوهاله ليل ونهار


    والناس ال ايه بتحسد مندوب الدعايه علي العربيه والفلوس ، يجوا يشوفوا البهدله اللي بيبقي فيها ولا لما مايحققش وياخدله كلمتين في العضم ويتخصم منه الحوافز ومايقبضش الارباح


    صحيح الصيت ولا الغني

    ReplyDelete
  12. انا قريت البوست ده في النوت عندك في الفيس بوك يا ابو حميد
    :D
    روح اقرا التعليق هناك بقي
    :D:D

    ReplyDelete
  13. يمكن اكون جديد فى عالم التدوين
    لكنى باتابع مدونتك من زمان
    واتمنى انال شرف زيارة مدونتى
    موضوع جميل زى باقى المدونة

    ReplyDelete
  14. خبر الموسم23 December 2008 at 10:06

    اشرف حمدى صاحب مدونة كاريكاتوز
    يفتعل قصة وهمية عن سرقة رسوماته سعيا لمزيد من الشهرة الوهمية
    ويتهم شخص وهمى اسمه كمال نور بانه قام بسرقة الكاريكاتير واسم المدونة
    وقام بكتابة بوست كامل يسب فيه الشخصية الوهمية التى اخترعها لجذب الانتباه
    لمشاهدة الموضوع
    http://caricatooz.blogspot.com/2008/12/blog-post_22.html

    ReplyDelete
  15. ahmed al-sabagh:
    دة مبدأ تقريبا ماشي في مصر كلها يا احمد
    من الواضح كدة انه بقى سلو بلدنا
    ربنا يستر
    تحياتي واحتراماتي

    ReplyDelete
  16. حاسوباتية:
    هو صحيح انتي بنت بس مين قال لك انك مش ملزومة تشتغلي؟
    الشغل للبنات اصبح شيء مهم واساسي
    وبعدين وقت فراغك بتقضيه ازاي؟
    عموما
    اي شغلانة مرتبطة بالمبيعات بتكون في منتهى الصعوبة في سوق صعب جدا زي السوق المصري
    تحيااااتي

    ReplyDelete
  17. البنت المشمشية حلوة بس شقية:
    لو ركزتي شوية هتفهمي الموضوع كويس
    هي القصة قصة قهر شركات ومديرين لموظفيهم بحق وبدون
    وبعدين انتي مستعجلة على ايه
    بكرة تتخرجي وتعااااااااااااااااني زي اللي سبقوكي
    تحياااااتي

    ReplyDelete
  18. زمان الوصل:
    مبدئيا انت بتعرف اذا كان الطبيب بيكتب المنتج بتاعك ولا لأ عن طريق الصيدليات المحيطة بعيادة الطبيب
    طبعا انت عارف ان كل طبيب حواليه 4 او 5 صيدليات من خلالهم يمكن معرفة مدى وصف الطبيب للدواء دة من عدمه
    بالنسبة للسؤال التاني
    كل مندوب مسئول عن مناطق محددة بمعنى اني مثلا ممكن اكون مسئول عن مدينة نصر ومصر الجديدة بينما زميلي مسئول عن منطقة المهندسين والدقي وبالتالي اي طلبيات لاي صيدلية في منطقة مصر الجديدة تحسب لي بينما صيدليات المهندسين مثلا يتم حسابها لزميلي وهكذا
    ارجو ان اكون افدتك
    تحيااااتي

    ReplyDelete
  19. انا بشتغل في مجال السياحه بقالي 4 سنين اهو
    وصدقني اللي انت كاتبه ده موجود عندنا بالنص
    يعني منقول
    :D
    كل شهر يقولولنا كده
    وكل موسم
    الصيف .. ده الموسم اللي بترتاح الناس فيه.. احنا بقي بيطلع عينينا زياده
    الشتا .. شدور حليكم يا جماعه ده موسم الفي اي بي
    الربيع
    يا جماعه انا عارف ( المدير بتاعنا هو اللي بيتكلم ) اننا تعبنا بس مش معقول يعني هنبدا السنه واحنا كده لازم نعالج سلبيات السنه اللي فاتت ونحضر كويس للصيف
    والخريف
    يا جماعه السياح .. لازم نهتم بالسياحه الخارجيه
    لازم ولازم ولازم
    وكل لازم انقح ممن اللي قبلها
    تحياتي

    ReplyDelete
  20. حقيقي .. شغلانه متعبة
    ربنا يعوضك خير
    :)

    ReplyDelete
  21. جميل انك تنقل خبرتك

    ليا اصحاب كتير شغالين فى المجال ده

    نورتنى فى مدونتى

    ReplyDelete
  22. انا حرة:
    ماهو الاطباء لو يعرفوا ان العينات دي مش بنلاقيها في الشارع
    ماكانوش يطلبوا عينات عمال على بطال
    وبعدين عينات ايه؟
    دة اغلب الاطباء بيبيعوها او بيركنوها في عياداتهم لحد ما تاريخها ينتهي وتبوظ
    لا بيستفيدوا منها ولا بيخللوا غيرهم يستفيدوا
    بالنسبة للمندوبات البنات
    مش كلهم على فكرة بيبقوا كدة
    في بيبقى كدة وفي منهن بيكونوا في غاية الاحترام
    وة بيكون على حسب الشركة
    يعني الشركات الكبيرة واللي لها اسم كبير بتلاقي المندوبات بتوعها محترمات ومش ملفتين خالص (مع بعض الاستثناءات طبعا) اما الشركات اللي احنا بنسميها شركات بير السلم فدي اغلب مندوباتها من اياهم (مع بعض الاستثناءات طبعا) لأن الشركة بتعتمد على كدة علشان تبيع
    تحياتي واحتراماتي

    ReplyDelete
  23. غمض عينيك:
    تقريبا يا بو سمير يا خويا الجزرة دي هتبقى منهج حكم في البلد
    دة ان مابقتش فعلا
    ربنا يستر على البلد دي
    تحياتي

    ReplyDelete
  24. الالام وامال:
    عارف التصريح دة ليه يا محمود؟
    دة حضرتك احدث وسيلة لابتزاز وتقليب شركات الادوية من قبل المستشفيات
    بمعنى انك علشان تدخل المستشفى لازم تطلب تصريح وعلشان تاخد التصريح لازم تروح لرئيس القسم او مدير المستشفى اللي بدوره بيشترط خدمة معينة او جهاز او اي حاجة للمستشفى (مشيها للمستشفى علشان خاطري) مقابل انه يسمح لك بدخول المستشفى او القسم تشوف شغلك
    هي دي مصر 2008
    تحياتي واحتراماتي

    ReplyDelete
  25. dr ibrahim samaha:
    الف شكر ليك
    دة شرف كبير ليا
    تحياتي واحتراماتي

    ReplyDelete
  26. shaymaa:
    معلش ياشيماء يا بنتي
    هسيبك للأيام وهي تعلمك
    ربنا معاكي
    تحيااااتي

    ReplyDelete
  27. صاحب المضيفة:
    انا بقى شغال الشغلانة دي بقالي 7 سنين وداخل في الثامنة
    مفيش شك انها شغلانة متعبة و لكن اللي مخليها كدة هو الوسط الطبي في مصر
    برة في اوروبا والدول المتقدمة الوظيفة دي لها دورها ولها احترامها انما هنا لأن العشوائية هي كلمة السر فكان لابد ان تكون وظيفة عشوائية
    معلش
    ربنا يتوب علينا احنا كمان
    تحياااااتي

    ReplyDelete
  28. بصراحه يااحمد انا شايفه ان الشغلانه دى مناسبه للميلز اكتر

    اصل البنت يعنى ملهاش الشحططه واللف والتعب دا كله وكمان بتتنقل بين المناطق ومواصلات كتير وكتير يغلسو عليها وترجع بيتها متاخره وفالاخر ليه يعنى

    بالنسبه للعينات انا والله العياده اللى انا فيها بنوزع العينات اللى بنحتاجها فتخصصنا ولو مش محتاجينها الدكتور بيتصرف فيهم ههههههههههههههههه انا مليش دعوووووووه

    ReplyDelete
  29. يعنى انتم بتسألوا فى الصيدليات المحيطه بالطبيب إذا كان الطبيب كتب الأدويه دى فى روشتاته ولاّ لأ !! و همّا بيعطوكوا هذه المعلومات؟ يعنى اللىّ واقف فى الصيدليه بيبص على اسم الطبيب اللىّ مكتوب فى الروشته و بيفضل فاكر أسماء الأدويه التى وصفها !!

    و بعدين مش يمكن المريض يشترى الدواء اللىّ رشّحه المندوب من صيدليه ليست بجوار الطبيب خصوصا لو بيكرّر الدوا؟ يعنى أنا ممكن أشترى أوّل علبة دوا من الصيدليه اللىّ جنب الدكتور بس لو هاكرره هاشتريه طبعا من جنب بيتنا و بالتالى هيضيع على مندوب الدعايه حقّه بعد أوّل مرّة شرا ..

    شكرا على التوضيح و أعتذر على الأسئله الغريبه ..

    ReplyDelete
  30. خمسة فضفضة:
    ايه الخبرة دي يا دكتورة
    دة انتي مش خبرة صيدليات بس....لا دي خبرة دعاية كمان
    شكلك كدة اتقرصتي منها زينا
    شغلانة.........................استغفر الله العظيم
    ربنا يعيننا جميعا
    تحياتي واحتراماتي

    ReplyDelete
  31. zika:
    علم يا باشا وتم قراءته وبعناية وبأهتمام كمان
    الف الف شكر
    تحياتي

    ReplyDelete
  32. كمال نور:
    يا فندم عالم التدوين نور
    وان شاء الله تكون اضافة قوية للمدونات
    اعتبرني صديق دائم لمدونتك
    تحياتي واحتراماتي

    ReplyDelete
  33. خبر الموسم:
    NO COMMENT

    ReplyDelete
  34. اسماء عوني:
    البوست دة يا اسماء تقدري تسميه اسلوب ادارة
    ومش مهم ادارة ايه
    يعني الاسلوب دة هتلاقيه في شركات الادوية وشركات السياحة وشركات النسيج وحتى اقسام البوليس
    دة منهج تعامل
    تحياتي واحتراماتي

    ReplyDelete
  35. ياسر حسين:
    آمين يارب العالمين

    ReplyDelete
  36. ARSENALAWY:
    مجال صعب جدا يا ارسنالاوي
    لو سألت اصدقائك هتلاقي كتير منهم مش مبسوطين
    ربنا يوفق الجميع
    تحياتي واحتراماتي

    ReplyDelete
  37. انا حرة:
    طبعا الشغلانة دي بتكون مناسبة اكتر للميلز مفيش شك في كدة
    بس بيني وبينك بقى ومن غير ماحد باخد باله
    ساعات البنات بيعملوا شغل افضل من الشباب بكتير
    ودة طبعا بيرجع للتركيبة الشخصية لبعض الاطباء
    انتي فاهماني طبعا
    بالنسبة للعينات
    طبعا في اطباء محترمين بيعطوا العينات دي لمن يستحقوها فعلا من المرضى المحتاجين
    بس انتي عارفة طبعا ان اي مهنة فيها وفيها وبالنسبة لمهنة الطب بالذات فيها من النوعين كتييير
    الف شكر لأهتمامك بالتعليق
    نورتيني
    تحياتي واحتراماتي

    ReplyDelete
  38. زمان الوصل:
    طبعا في عدد كبير من الصيدليات بيعطي معلومات حقيقية ومفيدة وعدد تاني كبير برضة بيعطي معلومات مضللة اما عن عمد او عن جهل
    وطبعا الصيدلي بيكون فاكر لأن دي شغلته
    هو شغلته الروشتات فبيكون واخد باله كل دكتور بيكتب ايه وما بيكتبش ايه
    وطبعا الفرض اللي بتقول دة حقيقي ممكن جدا المريض يصرف الدوا من الصيدلية اللي مش تحت عيادة الطبيب
    بس دة للأسف هو المقياس اللي بيتم القياس عليه ولم يتم اختراع مقياس اخر للمبيعات
    هم بيبرروا الكلام دة ان نسبة صرف المريض للعلاج من منطقة اخرى لا تزيد عن 20 او 30% من اجمالي المرضى
    انما هي في الواقع اكبر من كدة شوية
    تحياتي واحتراماتي

    ReplyDelete
  39. انا مندوب و الكلام ده بيحصل بالضبط

    بوست رائع يا عم الريب
    :)

    ReplyDelete
  40. عندي سوءال مش لاقيله اجابة
    ليه الشغل في يناير وفبراير نايم اوي اوي اوي
    حد عنده تفسير

    ReplyDelete
  41. أنا صيدلانية ويمكن مليش أدنى علاقة بمجال الدعاية

    لكن حقيقي

    احنا في الوطن العربي ومن خلال رؤيتي لأمور كثيرة داخل وخارج مصر

    نعانى من سوء الادارة

    نحن غالبا نتمتع وبكل فخر بنظام اداري فاشل بلا منازع

    وقد قرأت بحثا في احدى السنوات الماضية في مجال التسويق والادارة للشركات

    فأثار اعجابى مفهوم عكسه هذا الكتاب وركز عليه

    ألا وهو أننا ندرس الادارة على الورق وننتهى بها على الورق وتستمر في الورق وليس لدينا ايدولوجية خاصة بنا حيث نحن ندرس في الادارة مفاهيم أبعد ما تكون عن فهم واقعنا وبالتالي تتشكل فجوة واسعة وبينية بين الواقع واحتياجاته من النظم الادارية وبين المدروس في فن الادارة

    ويؤسفنى أن مبدأ الجزرة في أغلب القطاعات الخاصة يتمتع بالغباء والحماقة من وجهة نظري

    والعفو للفظ ولكنى لا أقصد مسبة ولكنه وصف شامل جامع دقيق لرؤيتى الشخصية لمعظم الأنظمة الادارية

    اذ أن المدراء لا يحسنون تحفيز أصحاب العمل بالصورة التي تدعوهوم للعمل الدئوب بدون احباط

    معظم شكاوي أهل الدعايا التي سمعتها تتركز في أنهم يتسابقون لترقي في الوظيفة ويسعون لسنوات من أجل هذا ويتنافسون ويكدون ويتعبون دون جدوى نهائية لهذا

    في نهاية ألمر ستسأل كيف يكون لي وجهة نظر دون أن أكون داخل دائرة الدعايا

    اني بكل صدق طمحت وتعبت لكى احصل على فرصة للعمل في داخل شركات الأدوية كوالتي أشورانس واكتشفت أن تقديري العالى وتميزي العلمي ومثابراتي ورغبتى الطموحة لن تشفع لي أبدا في تحقيق هذا دون واسطة

    ومادامت الشركات تتمتع بقاعدة المحسوبيات فتوقع أنها تتمتع بنظم ادارية فاشلة ...لا تطمح أن تأخذ كوادر شابة صغيرة لربما منها من هو قادر على تغيير مسار شركة من الشركات أو رفع اسهمها مثلا
    انها لا تهتم بهذا وتركز وفقط غالبا على صيادلة العلاقات بصرف النظر أن هناك من هو أكفأ أو أفضل

    عادي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails