Friday, 12 December 2008

مانديلا مصر

من صغري وانا معجب بالرجل دة
وكنت اقعد اتفرج على جلسات مجلس الشعب اللي بتيجي بعد نشرة 6 في القناة الأولى (كنت باتغاظ منها بصراحة علشان كتير كانت بتكون السبب ان مسلسل 7 وربع ما يتذاعش)..بس مش دة موضوعنا
واول ما تيجي الصورة على النائب الشاب دة كنت بأفرح قوي واسأل والدي
مين الراجل الصغير دة يا بابا؟
وفضلت معجب بالراجل دة ومتابعه ومع تطور الاعلام المصري وظهور محطات فضائية شبه مستقلة وصحف معارضة بدأت اتعرف على الراجل دة اكتر
طول عمري واخده نموذج يحتذى به....نائب شاب..معارض شرس....حضور طاغي...جاذبية....وسامة...شياكة
وبما انه في بلدنا المحروسة او المخروسة من الصعب ظهور شخص بالمواصفات دي بدون ان يحارب في الف جبهة وجبهة....كان نتيجة حتمية ان اعداءه يزدادوا يوم عن يوم
اصله خرج عن المألوف....خرج عن قواعد واصول اللعبة....في بلد يعتبر الوزير الخمسيني شابا...يبقى المعارض الثلاثيني مجرد طفل يلهو
بس لو المعارض الثلاثيني دة كان معارض بجد....مش ملتزم بالنص اللي محطوط له يبقى خطر وخطر جدا كمان
وعندما تقف اعزل امام امكانيات امنية رهيبة مسخرة بالكامل لخدمة النظام واركانه يبقى القضاء عليك اسهل من القضاء على ذبابة برشة بيروسول
لو الناس في بلدنا بتعرف تقرأكويس..كانت هتقرأ برنامجه اللي وضعه في انتخابات الرئاسة 2005 ولو كانوا قرأوا برنامجه يبقى كان لازم يكون رئيس مصر الحالي
انما الناس في بلدي لا تقرأ....الناس في بلدي بيحبوا اللي يعرفوه على اساس انه احسن من اللي متيعرفهوش
حتى لو اللي يعرفوه دة اذاقهم الويل والمرارة.....برضة احسن من اللي ما يعرفوهوش
منطق العجزة والكسالى
الناس في بلدي اتعودت على الجلد....بقى عندهم مرض التلذذ والاستمتاع بالتعذيب سواء تعذيب انفسهم او الاخرين
مش عارف ليه كل ما اجيب سيرة الرجل دة قدام حد يرد عليا:
دة مزور......دة عميل......دة معندوش خبرة سياسية
الغريب ان الحد دة اللي بيقول كدة بيكون معندوش اي خبرة او معلومة سياسية انما هو يردد كلام سمعه من غيره واكيد غيره دة مصدره جريدة حكومية من بتاعت تمام يا فندم
من اعجابي به واحساسي بالظلم الشديد الواقع عليه قررت اكرمه على الاقل في المكان الوحيد اللي امتلكه وهو مدونتي
حطيت صورته وفوق الصورة كتبت
مانديلا مصر
عدد كبير من الاصدقاء علقوا على الصورة
منهم من استنكر ومنهم من تساءل واكيد منهم من ايدني
اكتشفت ان عدد كبير من المدونين وغير المدونين معلوماتهم مغلوطة او ناقصة عن الراجل دة
اما مفيش معلومات خالص....واما معلومات مضللة كلنا طبعا عارفين مصدرها
وكان من الواجب ابراز لمحة مختصرة عن ايمن نور ليس كما اراه ولكن كما هو
ايمن عبد العزيز نور مواليد 10 اكتوبر 1964
يعني في 2005 موعد الانتخابات الرئاسية التي حل فيها ثانيا كان عمره 41 سنة
طبعا دة بالمنطق المصري عيل صغير.....رضيع سياسيا....وطبعا لأننا ماشيين في حياتنا بمبدأ(الدهن في العتاقي)....كانت النتيجة معروفة
تدرج في مراحل التعليم المختلفة حتى تخرج من كلية الحقوق جامعة المنصورة
انما طبعا احنا في مصر تبهرنا حاجتين:
البدلة العسكرية.....فلا نقبل ان يحكمنا الا العسكر على اساس ان مصر طوال عمرها مستهدفة وهتفضل كدة ليوم الدين
الجامعة الامريكية: اللي لو ماكنش المسئول متخرج منها...يسقط من نظرنا على طوووول
التعليم عندنا يعني الجامعة الامريكية ومؤخرا انضم اليها اخواتها الجامعة البريطانية والكندية والفرنسية والالمانية....الخ
المهم انه يكون تعليم اجنبي والسلام
عقدة الخواجة بقى
انما لو حد من جامعاتنا اللي كلنا متخرجين منها............لااااااااااااااااااااااااا ما ينفعش طبعا معندوش خبرة
عمل صحفيا بجريدة الوفد حتى اتجه للعمل الحزبي بنفس الحزب (حزب الوفد)..حتى اصبح نائبا لرئيس الحزب
يعني احنا قدام موهبة سياسية وصحفية فذة....صعد السلم من اوله ...لم يهبط علينا بالباراشوت
هل تعتقد ان شخص غير كفء وغير مؤهل وغير ناضج يمكن ان يتدرج السلم الوظيفي ليصبح نائبا لرئيس اكبر حزب معارض في مصر؟
سيبك من السياسة ومن ايمن نور ومن كل الكلام دة
بالله عليك
هل يمكن لأي شخص ان يصل الى منصب الرجل الثاني او الثالث او حتى الرابع في اي مكان او مؤسسة الا لو كان يمتلك الكفاءة الازمة لذلك؟
اعلم تماما ان الوصول للمناصب في مصر لا يتطلب المهارة والكفاءة فقط وانما يتطلب ايضا الكثير من الذكاء والدهاء والحكمة
وهو ما يتوافر في ايمن نور تماما (كما يظهر من تاريخه)......وهو ما يعلي من قدراته وشأنه وخبراته وليس العكس
اصبح عضوا بالبرلمان المصري عن دائرة من اكبر دوائر العاصمة (دائرة باب الشعرية)...ووقتها كان يبلغ من العمر 30 عاما تقريبا

بااااااااااااااااب الشعـــــــــــــــــــرية
واحد كان نائب الشعب عن دائرة باب الشعرية لدورتين متتاليتين متحديا كل اساليب التزوير اياها والبلطجة والتعنت الامني والغير امني...وللعلم دائرة باب الشعرية دي دائرة في منتهى الصعوبة لانها احياء شعبية وبالتالي فهي مليئة بالهموم والمشكلات المصرية المزمنة من عشوائية وبطالة......الخ
والمفارقة انه في الدورة الاولى هزم مرشح الحزب الوطني وفي المرة الثانية هزم ابنه
ومعلوماتي تقول ان شعبية ايمن نور طاغية في تلك الدائرة الهامة من دوائر القاهرة
واحد بالقدرات والملكات دي....شخص بالخبرات السياسية دي
بالله عليكم....كيف يقال عليه انه غير ناضج سياسيا او لا يمتلك الخبرات الازمة لممارسة السياسة او لكونه زعيما يؤتمن على مستقبل البلد دي؟
اسس حزب الغد المصري وتقدم عن حزبه بصفته رئيسه في الانتخابات الرئاسية عام 2005 وهي اول انتخابات تجرى بالأقتراع وحل ثانيا في النتائج النهائية للانتخابات
لا فعلا...........باين انه راجل ما بيفهمش في السياسة خااااااااالص!!!!!!!!!!!!!!!!!!!!!!!!!
غير مؤهل بتاتا!!!!!!!!!!!!!!!!!!!!!!!!!!!!
المفروض انه يكون احد الشخصيات الكاريكاتيرية اللي اتقدمت للانتخابات دي...علشان يكون بيفهم في السياسة او مؤهل تماما
وهو برضة غلطان
علشان كان يفضل رئيسا لحزبه ونائبا لدائرته كان لزاما عليه ان يلبس طربوشا ويقرأ الفنجان ويبايع رئيس الجمهورية منافسه في الانتخابات
اما انه راجل ما بيفهمش في السياسة فعلا

اتهم بتزوير توكيلات تأسيس حزب الغد له حيث تم حبسه . وينادي كثير من الناشطين السياسيين والحقوقيين بالإفراج عنه ، ويستعدون لإقامة هيئة للدفاع عنه . وقد حُكم عليه بالسجن لمدة 5 سنوات في محاكمات وصفها البعض بالسريعة والمثيرة للجدل ، وبذلك يكون فقد حقه في الترشح للأنتخابات الرئاسية التى تجرى في عام 2011 .

رجل حصل على 500 الف صوت انتخابي.....ونائبا بالبرلمان عن واحدة من اكبر دوائر القاهرة الانتخابية يعجز عن توفير توكيلات لتأسيس حزبه السياسي ويضطر لتزويرها
على الرغم انه يلزمه 50 توكيل تقريا لتأسيس الحزب...انما لأن التزوير مزاج اضطر لتزوير التوكيلات
بس لا تتعجب ولا تستغرب..............انت في مصر
وحيث ان مصر ام العجايب...............يبقى مفيش داعي للأستغراب والدهشة
وبعدكل التاريخ دة....بيطلع ناس معرفش مصادر معلوماتهم ايه يقولوا ايمن نور غير مؤهل لقيادة مصر
واحد بيمارس السياسة وهو مراهق..............لا يمتلك الخبرة الكافية
اتولد بيننا واتعلم في مدارسنا واتخرج من جامعاتنا واكل من اكلنا وشرب من المية اللي كلنا بنشرب منه ومع ذلك.............لا يمتلك الخبرة الكافية
صحفي ومحامي وسياسي ومعارض بارز ولامع ومع ذلك....................لا يمتلك الخبرة الكافية
نائب برلماني وهو عنده 30 سنة عن دائرة من اصعب واكبر دوائر القاهرة ومع ذلك..............لا يمتلك الخبرة الكافية
رئيس حزب سياسي ووصيف الانتخابات الرئاسية متحديا سطوة الحكومة والامن والاعلام ومع ذلك...............لا يمتلك الخبرة الكافية
مناضل وصامد وصابر على الظلم والسجن والقسوة والمرض ومع ذلك............لا يمتلك الخبرة الكافية
من وجهة نظركم يا اصحاب (لا يمتلك الخبرة )....من يمتلك الخبرة لتولي حكم البلد دي؟
شخص يرتدي بدلة كاكي....ولا شخص خريج الجامعة الامريكية....ولا شخص لديه الجينات الرئاسية الوراثية؟
من اذن بالله عليكم يستحق حكم مصر؟
السطور اللي فاتت دي كانت عن ايمن نور اللي انا اعرفه كمعارض بارز وزعيم سياسي واشهر سجين مصري واكثر بني ادم شنت عليه واسرته صحف الحكومة اعنف واشرس بل واقذر حملات التشنيع والسب والتطاول
رجاءا لمن ينتقد ايمن نور ان يذكر لي ايمن نور اللذي يعرفه هو اما ايمن نور الذي اعرفه فلقد كتبت عنه
ملحوظة
المعلومات الواردة في البوست من موقع ويكيبديا العربية
على الهامش:
لست عضوا في حزب الغد...ولا اسعى للأنضمام لأني غير مقتنع بالتجربة الحزبية في مصر ومع كامل احترامي لحزب الغد الا ان الجو والمناخ السياسي العام في مصر في غاية التلوث وبالتالي لقد اخترت ان اكون ضمن الاغلبية الصامتة
----------------
دور السيدة جميلة اسماعيل وموقفها البطولي المساند لزوجها يثبت صحة مقولة ان وراء كل رجل عظيم امرأة
----------------
لو يدري دراويش الحزب الوطني ومجاذيب الحكومة ان هجومهم العنيف الغير مبرر والذي يصل ل (قلة الأدب) في احيان كثيرة على المعارضين بجد زي ايمن نور وجماعة الاخوان المسلمين لا يؤدي الا الي زيادة رصيدهم وارتفاع اسهمهم لدى رجل الشارع ..لو يدروا لتوقفوا عن الهجوم فوراااا
----------------

27 comments:

  1. فعلا الحكومة بتهبل وخلاص حتى مفيش ذكاء يا دكتور

    هما مفكرين الناس هتهجص وراهم وهتهيص فى المولد

    لا بالعكس دا بيقلل من شعبية الحكومة واللى جابها

    وبيزيد من المعارضة

    ولكن هناك الكثير من ابناء مصر قد يكونون مانديلا كأيمن نور ولكن النور لم يأتى عليهم

    تحياتى

    د إبراهيم

    ReplyDelete
  2. فك الله اسره واسر جميع الشرفاء المعتقلين خلف الاسوار

    ReplyDelete
  3. شكرا للمعلومات
    أنا ع العموم واثق من زمان أنهم مالوظينله التهم
    :)

    ReplyDelete
  4. ايمن نور وزوجته من الشخصيات التى تحترم
    سواء اتفقنا معه او اختلفنا

    ReplyDelete
  5. انا بحترم الراجل ده
    لانو من الشرفاء بجد
    الحكومة فاكرة الناس هبلة مش فهمة اى حاجة

    ReplyDelete
  6. ولله شوف
    أفضل شيء أنك اخترت الاغلبيه الصامته لأن الكل يجري وراء مصلحته ولا أح يجري وراء مصلحة البلد
    أما بالنسبة لأيمن نور- يكفي أنه كان عضوا بمجلس الشعب- نحن لا يوجد لدينا انتخابات في مصر، فمعنى انه كان عضوا بالمجلس يعني انه دخله بالتزوير وهو يعلم هذا جيدا- عندنا مثلا في دائرة المعادي في الانتخابات الاخيره نجح واحد ولكن اللي دخل المجلس واحد تاني
    هذا الرجل هو من صناعة الحكومه المصريه ولكن انقلب السحر على الساحر أو بمعنى أصح دوره انتهى
    وزوجته ولله الحمد بتلف اوربا عشان تمنع عن البلد المعونه
    ولا يوجد منافسه بينه وبين مبارك على الاطلاق- فلو أراد مبارك أن يسحقه لفعلها من زمان- لكنه تركه عشان يبان انه رجل ديمقراطي بمعنى الكلمه
    كلهم بيمثلوا على بعض
    والدليل على كده ان له عمود في جريدة الدستور ولا أعرف الحقيقه ازاي يكون معتقل وبيكتب في الجرنال ويشتم كمان الرئيس!!!!!!
    وفي الحقيقه هو لا يوجد لديه شعبيه في الشارع المصري لأن فيه ناس اصلا لا يعرفون من هو ايمن نور، هو فقط شعبيته داخل دائرته باب الشعريه وحتى مش كل باب الشعريه
    ومن يقف معه يقف متعاطفا أو يقف بجانبه لأنه يكره الرئيس والحكومه الحاليه

    ReplyDelete
  7. اكيد الدكتور ايمن نور شخصيه يجب ان تحترم
    من جانب اى حد عاقل وبيحب البلد دى
    فعلا هو مننا وعاش واكل واتربى واتعلم زينا
    واتظلم لانه ضد التيار
    لكن السؤال
    هل مانديلا لما اتسجن ظلم بعت خطاب يستغيث بيه برئيس امريكا ؟
    طب وامريكا علشان تبقى امريكا
    استغاثت بمين؟

    ReplyDelete
  8. ليس كل ما يلمع ذهبا وليس كل من يسجن بطلا وتحياتى لماما امريكا

    ReplyDelete
  9. يا راجل طيب وباعت جواب لزفت الطين الجديد ليه واضح انك اللى مش متابع كويس حرام عليك مانديلا
    طيب ايه رايك فى الشوو اللى عمله دلوقتى علشان الصلاه فى المسجد يا راااااااجل حرام عليك انت بتقول حاجات مغلوطه طيب بناء على ايه برضه انا الحمد لله كلامى مش من مصدر واحد يعنى والمهازل اللى بتحصل

    ReplyDelete
  10. عاوزة اقولك على حاجه وكيبدي دى النس اللى بتكتب فيها يعنى افراد عاديه يعنى برضه ممكن يخلطوا البتنجان فى بعضه

    ReplyDelete
  11. احييك بجد يا احمد على البوست الرائع ده

    ولو انى اختلف معاك اننا كشعب مبيعرفش يقرا عايز الى يعرفه واهو احسن من الى ميعرفوش

    للاسف يا احمد لولا الكوسه والبتنجان والبلطجه مكنش الراجل ده يكون التانى ابدا
    كان فى فرصه ولو ضئيله لمستقبل مختلف لولا زى ماقلنا الكوووووووووسه
    انما ان الناس هيا السبب ماظنش وان كانت السبب فى حاجات تانيه الا انها فى اعتقادى الخاص مش السبب فى الى حصل

    وتحياتى مره تانيه على بوست رائع عن راجل احترمه جدا

    ReplyDelete
  12. عارف رغم ما يقال عنه انه صناعة امريكية إلا اني لو كان عندي بطاقة انتخابية كنت رشحته هو لأني كأي شاب في عشرينات العمر من حقي اشوف اللي بيحكمني شاب زيي عمره مايزدش عني باكتر من عشرين سنة شاب في الأربعينات بيحلم احلام الشباب وبيفكر بطريقتهم
    على الاقل كان هيشيل جيش العسكر اللي حاكمنا دة من حقنا كشعب نتحكم مرواحدة حكم مدني
    لكن يبدو انه حلم صعب التحقيق في ظل واقع غبي معاش
    تحياتي لك ودمت بخير

    ReplyDelete
  13. dr ibrahim samaha:
    مصر مليانة بالشرفاء والمثير والمحزن انهم هم اللي بيتحاربوا في الزمن دة
    تحيااااتي

    ReplyDelete
  14. احمد سعيد بسيوني:
    امين يارب العالمين
    تحياتي واحتراماتي

    ReplyDelete
  15. اولا ازيك يا احمد

    في الواقع بما اني قارىء نهم في مجال علم النفس وفنون القياده أرى ان أيمن جيد في بعض الأماكن وليس كقائد

    وعدم وجود صفات القائد لا تعني انه شخص سيء .. ولكن شتان بين القائد والشخصيه المحوريه..
    ايمن نور يصلح كمركز فعال في تروس السياسه وليس قائدا لها ..
    واذا اردت ان ترى معنى القائد فانظر إلى جمال عبد الناصر او غاندي او هتلر ..
    لهم القدره على قياده الاخرين ويستجيب الاخرين لهم ..
    رغم ان لكل منهم اسلوبه تحياتي

    ابدأ في قراءه فن القياده التي تحدث عليها الكثيرون مثل وارين بينيس ولسوف تدهش من الزعماء الذين لا يملكون من القياده سوى الكرسي

    تحياتي لفكرك المتميز

    ReplyDelete
  16. كل عام وانتم بخير :)

    ReplyDelete
  17. micheal:
    اي خدمة يا مايكل
    بس الحقيقة هم مقلوظينها قلوظة محترمة جدااااااا
    محبوكة
    تحيااااتي

    ReplyDelete
  18. mahasen saber:
    ماهو السؤال هنا يا محاسن
    اختلفنا ليـــــــــــــــــه؟
    انا في البوست كتبت عناصر ومعلومات اعتقد انها تشرف صاحبها ولا تدينه
    يبقى اكيد اللي مختلف مع الناس دي لديه مبرراته
    نفسي حد يقول لي ايه هي المبررات دي
    تحياااااتي

    ReplyDelete
  19. البنت المشمشية حلوة بس شقية:
    الرجل دة بيمثل النموذج المثالي للسياسي المصري
    بس للأسف قوى الشر اقوى منه ومنا بكتيـــــــــر
    تحياتي واحتراماتي

    ReplyDelete
  20. لورنس العرب:
    الاغلبية اصامتة هي حزب الاغلبية الكاسحة في بلادنا المنكوبة بعساكرها
    على فكرة مش كل اعضاء مجلس الشعب دخلوا بالتزوير....طبعا لا انكر انهم الاغلبية الكاسحة خاصة اغلبية الوطني
    الا ان ساعات بتبقى ارادة الناخبين اقوى بكتير من ارادة التزوير وبيكون النجاح رغما عن انف المزورين
    زي دوائر الاخوان المسلمين ودوائر اقطاب المعارضة زي ايمن نور وحمدين صباحي
    وبعدين ايمن نور دخل دورتين والاتنين كانوا باشراف قضائي فبالتالي لا مجال للتزوير خاصة اذا كان القاضي غير متواطيء
    هو انا عموما لا اتبنى نظرية المؤامرة في حياتي على الاطلاق سواء في السياسة او غيرها
    وبالتالي لن استطيع تبني وجهة نظرك
    وبيني وبينك
    لما يبقى النظام المصري عميل لامريكا وايمن نور عميل للنظام وابراهيم عيسى عميل للنظام واسرائيل عميلة لامريكا والناس عميلة للحزب الوطني اللي هو عميل للاخوان
    كدة نبقى احنا بنعيش في فيلم كبير قوي
    تحيااااتي

    ReplyDelete
  21. nody_1987:
    لما الظلم يحيط بكي من كل الجهات
    ويبقى انتي واقفة لوحدك قدام نظام باطش بالاته القمعية والتعذيبية والعسكرية
    ويبقى الناس حاجة من اتنين:
    يا اما موالسين وراكبين الموجة
    يا اما ساكتين عن الحق...شيطان اخرس
    ساعتها ممكن تبعتي رسالة للشيطان مش بس لرئيس امريكا
    ثم انه مابعتش لحد غريب يعني......دي امريكا...وانتي اكيد عارفة العلاقة بين ماما امريكا وحلفاءها في الشرق الاوسط
    تحياتي واحتراماتي

    ReplyDelete
  22. anonymous:
    كلام جميل وكلام معقول مقدرش اقول حاجة عنه
    فعلا ليس كل ما يلمع ذهبا بدليل ان كتير قوي من اللي برة السجن لازم كانوا يبقوا جواه من زمااااااااااان
    تحياااااتي

    ReplyDelete
  23. appy:
    انتي ليه متحاملة كدة على ايمن نور يا آبي؟
    على فكرة السؤال مش استنكاري بقدر ما هو استفهامي
    انا فعلا محتاج افهم ايه سر التحامل بالشكل دة؟
    جايز انتي تعرفي حاجات انا مش واخد بالي منها
    وبعدين هو انتي اللي مضايقك انه بعث جواب لاوباما؟
    دة على اساس ان دة شأن داخلي والكلام الكبير دة
    الكلام دة لو كان الخلاف بينه وبين النظام خلاف نظيف ومتكافىء
    مش خلاف بين مواطن اعزل ونظام حكم بكل اجهزته الامنية والعسكرية والقمعية
    وبعدين انتي هتحولي ضيقك من ايمن نور على غضب على ويكيبديا ولا ايه؟
    تحيااااتي

    ReplyDelete
  24. shaymaa:
    الف شكر لكي يا شيماء
    احترم واقدر رأيك جدا
    ولكني مصمم ان الشعب المصري شعب لا يقرأ
    شب تقلصت كل اهتماماته في مطحنة الحياة فقط لا غير
    تحيااااتي

    ReplyDelete
  25. mostafa rayan:
    الظاهر كدة يا مصطفى ان دة قدرنا ودة واقعنا المؤلم
    واذا كنا ننتظر التغيير...فدة هيبقى دور الاجيال القادمة ان شاء الله
    واضح ان احنا مالناش نصيب
    تحيااااتي

    ReplyDelete
  26. ahmed mubarak:
    الف شكر يا احمد على الكلام القوي دة
    انا ارى ايمن نور سياسي موهوب لديه مقومات النجاح وكل عوامل القوة السياسية
    قد يبدو لا يصلح كقائد ربما لأنه لم يختبر...انما هو افضل من ناس كتير قوي موجودين في مواقع قيادية لا يستحقوها او مرشحين لمواقع لا يستحقوها
    تحياااااااااااااتي

    ReplyDelete
  27. اقصوصة:
    كل عام وانتي بكل صحة وخير وسعااادة
    تحياااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails