Tuesday, 2 December 2008

قتل و اشياء اخرى

احدى الفتاتين هي ابنة المطربة المغربية ليلى غفران والاخرى صاحبة الشقة صديقتها والاثنيتين تدرسان في احدى الجامعات الخاصة ب 6 اكتوبر
اهتمامي بالحادثة دي مش بسبب الشغف والتشوق لمعرفة الجاني على طريقة المفتش كرومبو.....وان كان معرفة الجاني وفك اللغز مهم جدا لبشاعة الحادثة دي والرغبة في التعرف على ملابساتها
الا ان القضية دي بتفجر قضايا وبتفتح ملفات غاية في الخطورة
والحادثة دي للي مش متابع..هو انه تم العثور على جثتين لفتاتين في احدى الشقق الفاخرة بمدينة الشيخ زايد والجثتين لفتاتين الاولى اسمها نادين وهي صاحبة الشقة ووالدها محاسب يعمل بالسعودية وتم العثور على جثتها مذبوحة ومطعونة عدد كبير من الطعنات في انحاء مختلفة من جسدها
اما الضحية الثانية فهي هبة ابنة الفنانة المغربية ليلى غفران وهي صديقة الضحية الاولى ولم تلفظ انفاسها في الحال وانما اتصلت بخطيبها تليفونيا وهي في حالة سيئة واخبرته بأنه تم طعنها بشقة صديقتها وانتقل اليها في الحال لأسعافها الا انها لفظت انفاسها بعد دقائق من دخولها المستشفى للعلاج
اهمية القضية واهتمام الرأي العام بها لعدة اسباب
اولا لبشاعتها وغرابتها وغموضها
ثانيا: لارتباط احد اطرافها بشخصية فنية معروفة في مجتمع يعشق النميمة
القضية دي بتطرح قضايا في منتهى الخطورة وبتدعو للتأمل في عدة اشياء وسلوكيات جديرة بأن يتم التأمل فيها ودراستها
القضية الاولى:
علاقة بعض الاباء بأبنائهم
فما قيل عن علاقات الضحيتين بأسرتيهما ان صحت فهي مهزلة بكل المقاييس
فالضحية الاولى نادين والدها يعمل في السعودية هو وبقية افراد الاسرة اما البنت فتعيش بمفردها......لوحدها
فتاة عندها 23 سنة عايشة لوحدها في مصر وبقية اهلها والدها ووالدتها واختها في السعودية
في الزمن المهبب دة..بنت تعيش لوحدها وفي 6 اكتوبر...اما الوالد فهو ماكينة اموال لا تنضب..وظيفته في الحياة تحويل الاموال......تحول لمضخة بنزين...كل وظيفته في الحياة هو توفير اقصى درجات الرفاهية لبنته ولتذهب التربية والرعاية الى الجحيم
بعض الصحف قالت ان البنت دي مخطوبة والبعض قال انها على علاقة بشاب وبعض المواقع ذهبت لما هو ابعد على اعتبار انها متزوجة ومنذ زمن
كم تساوي سمعة ابنتك بالريالات يا سيدي الفاضل؟؟يا اب يا عظيم
هل عوضتها الشقة الفاخرة والسيارتان عن رعايتك؟
اما الضحية الثانية هبة ابنة الفنانة فهي زي كل افراد الوسط الفني ضحية تمزق اسري وانفصال بين والدها ووالدتها (والدتها تزوجت 4 مرات تقريبا).........
في البداية قالوا عنها انها مخطوبة....وبعد شوية اكتشفنا ان خطيبها مش خطيبها وانما زوجها....قالوا انها متزوجة بدون علم والدتها وبعد كدة قالوا ان والدتها كانت على علم ان ابنتها متزوجة
قالوا ان الشقة مسرح الجريمة لقوا بداخلها زجاجات خمور ولفافات حشيش...وبعد كدة قالوا مفيش الكلام دة...وكل دي اشاعات
الا ان الثابت من كل دة ان في خلل كبير في الابوة والامومة وان الجاني الاول والاصلي هم الاهل اللي انشغلوا اما بتأمين المستقبل على حساب الحاضر او بالنزوات الشخصية وتبديل الرجال الرجل وراء الاخر
القضية الثانية اللي بتثيرها الحادثة دي هي قضية الجامعات الخاصة في مصر
ليه طلبة الجامعات الخاصة عاملين كدة؟؟؟ليه دائما على اغلبهم علامات استفهام؟؟؟؟ليه الرفاهية المبالغ فيها واللي بتصل لحد الافساد اللي اغلبهم بيعانوا منها؟؟؟؟
ليه الدولة فصلت لطائفة معينة من الناس جامعات على مقاسهم لا تناسب عقلياتهم ولا قدراتهم الذهنية ولا مهاراتهم وانما تناسب حاجة واحدة بس
تناسب جيوب اهلهم...تناسب دخول مادية عالية جدا....تناسب شخصيات كل علاقتها بجامعات اولادهم هو شيك بيتم دفعه اول كل سنة وبعد كدة النجاح مضمووون طبعا...ماهو كله بفلوسهم
ايه هي المعايير اللي بيتم تحديد قبول طلبة الجامعات دي؟ وعلى اي اساس بينجحوا؟
القضية الثالثة اللي بتثيرها الحادثة دي هي قضية سلوك الناس اللي عايشين في الاحياء الراقية وازاي ان كما يقال ان الجيران سمعوا مشاجرة الساعة 5 صباحا من الشقة اللي وقعت فيها الحادثة ولكن بلا اي رد فعل وكأن شيئا لم يكن
دة حتى بدافع الفضول كان لازم يطمئنوا ويشوفوا ايه اللي بيحصل؟
الناس دي ليه فقدت الحميمية....ليه الناس دي عايشين مع بعض بعقلية الجزر المنعزلة...محدش له دعوة بالتاني....الناس دي تقريبا مايعرفوش بعض
انا مش بأقول ان الناس تبقى حشرية...بس على الاقل يخافوا على بعض..يخافوا حتى على نفسهم
زمان الناس كانت بتستأمن جيرانها على اولادها اكتر من اهلها
دلوقتي محدش يعرف حد.....ومحدش مسئول عن حد.....انا اعتقد ان لو اي واحد من الجران كان شاف جريمة القتل لم يكن ليتدخل
هايقول لنفسه...وانا مالي يا عم؟ هم كانوا من بقية قرايبي؟؟؟
من القضايا المهمة برضة اللي بتثيرها الحادثة دي هي قضية تعامل الصحافة مع الحادثة
ليه كل جريدة بتسرد وقائع واحداث مختلفة عن الأخرى على الرغم ان الحادثة واحدة والقتلى هم هم واكيد الجاني واحد في كل الاحوال
ليه جريدة تقول انها مخطوبة وجريدة تانية تقول انها متزوجة وليه موقع الكتروني يقول كان فيه خمور وموقع تاني بتكلم عن اخلاق الضحايا وحسن سيرهن وسلوكهن
ليه بعض الشهود او الاصدقاء بيصفوا الفتاتين بصفات فيها انحلال وبيتكلموا عن سهرات للصبح وحفلات واستضافة شباب وبنات في الشقة لاوقات متأخرة من الليل
بينما احدى السيدات بتصف الضحية نادين بأنها كانت مواظبة على الصلاة وانها كانت نفسها تكون داعية اسلامية!!!!!!!!!
يعني يا اما حفلات وسهرات وحشيش ومخدرات......يا اما داعية اسلامية
مفيش وسط؟؟؟؟؟؟
الازدواج والتناقض دة سببه ايه؟
هل هو الرغبة في السبق الصحقي والتوزيع والانفراد بصرف النظر عن الحقيقة؟
ولو البنات دي مظلومة....مين اللي ياخد لهن حقهن؟
وفين المصداقية وحق القارىء والكلام الكبير دة؟
انا لا ابرىء او ادين احد....خاصة ان الحادث غامض لحد دلوقتي على الاقل...وعلى الرغم ان الملابسات مش بريئة...والكلام كتير وكل يوم كلام جديد بيقال
انما من وسط كل الكلام دة بتبقى حقائق مؤكدة بصرف النظر عن القاتل والضحية والاشخاص
عندما يتحول الاب لماكينة صرف الية وتتفرغ الام لأرضاء رغباتها ونزواتها ويصبح المال هو الحل السحري لشراء اي شيء وبلا اي حساب
ساعتها توقع اي حاجة وكل حاجة سيئة...حتى لو كانت النهاية هي الذبح والفضيحة وتلويث السمعة

47 comments:

  1. على فكرة انا متابعه الموضوع ده
    زيك ولما محمود سعد استضاف ابوها فى البيت بيتك
    فكرت قولت انتا زى تقبل تصيب بنت لوحدها فى بلد تانية
    وكمان مسكنها فى فيلا
    وبيقول انا كل شوية بتصل اطمن عليها
    تطمن على مين يا عم الحج
    وهو انتا شايفها وعارف هيا فين
    ازاى تسيبها ده كلو عشان الفلوس
    ورينى الفلوس هتعمل ايه
    اينعم ده قدر ومنقدرش نعملو حتى لو مستخبين جوا قمقم
    بس كفايه انك مكنتش معاها
    وده اللى الصحافة استغلتو انهم يشوهو صورة بنتك
    بجد انتها زمن الرجال

    وبلنسبة للصحافة مش هقول غير حسبى الله ونعم الوكيل
    وبلنسبة للحجة ليلى غفران المحترمة اللى ساايبه بنتها فى بلد لوحدها وعمالة تتجوز
    انا لما قريت من الجرنان انها اتجوزت تانى انا استغربت
    لانى اخر حاجة اعرفها انها اتجوزت مخرج فديو كليب
    اد بنتها كدة
    لمى نفسك بقه واحترمى بنتك
    وكنت تقعدى معاها تراعيها بلدال المسخرة دى
    ربنا يهدى

    ReplyDelete
  2. أحمد ..
    بصراحه متابعتش الموضوع ده ..

    لكن سمعت عنه بعض الامور الطفيفه كما ذكرتها أنت ..

    وطبعا المسؤول الاول والآخير هم الاهل .. ولو انهم لا يسموا أهل فى هذه اللحظه .

    اما الصحف .. فنحن اعتادنا على الصحف الصفراء التى تبحث عن الأثارة فى كلماتها فقط .. حتى لو كانت كلمات تفتقر إلى الصحه .. ولكن الأثارة ستزيد من شعبيه الجريده ..فلا يهم وقتها سمعة أحد .. أو مصداقية الجريده .

    وبخصوص الجيران .. فهذا الأمر للأسف أصبح بمناطق كثييرة جدااا ..حتى فى دى نقلد الغرب .. بعد ما كان ما يميزنا هو الروح التى نراها بين اهل المكان الواحد .. الآن أختلف الأمر تماما.

    أخى الكريم

    لا اقول سوى ان كانوا على خطأ فحسابهم وحساب اهلهم عند الله وحده وتعالى ..

    إن كانوا قد ظلموا فالله وحده قادر على اظهار الحقيقه .. أو محاسبة كل ما شهد عليهم شهادة زور

    حسبنا الله ونعم الوكيل .
    حسبنا الله ونعم الوكيل

    تحيتى لك يا اخى

    ReplyDelete
  3. ما بتخيبش ظنى ابدا يا احمد
    موضوعاتك بحس انها مختارات بلوجر
    دى انا بسميها أعراض الخليج .. أو امراض الخليج
    وما من اسرة تفرغ ربها لجمع الاموال فى الخليج
    الا وتجد مثل هذة الاحداث بصورة او بأخرى
    انحراف او قتل او امراض نفسية او فشل دراسى او ما الى ذلك
    على فكرة انا متابع جيد لمدونتك الرائع
    بس كسول شوية فى التعليق
    يعنى تقدر تقول كدة بتاع مصلحتى اخد غرضى من المدونة واسيبها بدون تعليق
    ههههههههههههه

    الف تحية لك

    ReplyDelete
  4. الصراحة مش متابع الموضوع لأنه ميلزمنيش ولكن هيلزمنا لما قلت العبر من الموضوع

    وكله عند العرب صابون يا حبى

    ممكن يكون فيه حاجات ألعن من كده

    تحياتى

    د إبراهيم

    ReplyDelete
  5. الرد على الموضوع ده بحاجة واحدة بس الناس بقيت مش بتعرف ربنا احنا بعدنا جدا عن ربنا يبئا لازم يحصل اكتر من كده الدنيا لهت الناس وبقيت كل همها
    ربنا يصلح الاحوال ويرحمنا

    ReplyDelete
  6. تساؤلاتك كتير وتثير التساؤل عن سبب جريمة بتتم من أباء كتير
    في البعد عن أولادهم
    لكن خلينا نقول أن في طلبة بالمدن الجامعية أخلاقهم عالية وحياتهم قويمة جدا
    يمكن لأنهم هما المغتربين علشان يتعلموا مش لأن الأب والأم مفضلين الأغتراب علشان جمع الأموال وتاركين أولادهم دون رعاية
    مع أنهم يمكن بيعلوا ده علشانهم
    للأسف الحالات بتختلف بأختلاف الأسر لكن يمكن ترك أولاد بمقتبل الشباب بدون وجود الاسرة امر صعب وبيسهل امور كتير ف غنى عنها

    الموضوع كبير واظن الحديث فيه لا يكفي
    لكن سعيدة بمروري على كلماتك
    دمت بكل الخير

    ReplyDelete
  7. ولله الجماعه في الجامعات الخاصه لهم سلوك غريب
    خد بالك ان كتر الفلوس خاصة في السن الصغيره ممكن يخلي الواحد يتصرف تصرفات مش طبيعيه
    انا عندي في الشغل واحد من الناس دي وهو خريج جامعه من اللي بيدفعوا فيها ألوف
    ومع الأسف لسانه ثقيل جدا من كتر المخدرات
    هو الفساد منتشر في كل مكان صحيح
    لكن الطبقه دي العيال اللي طالعين فيه نسبه مش قليله منهم اخلاقهم زي الزفت

    ReplyDelete
  8. امممممممممممم

    بصي اول نقطه وهي علاقه الفتاتين باهلهم فده مش ذنبهم ده ذنب اهلهم

    اما الجامعات بجد نفسي اعرف ايه المقاييس اللي بيتاخدو بيها غير الفلوس

    اما رد فعل الناس فالساليني انا كل واحد بيقول انا كفايه انهم بيتفرجو وبس

    والصحافه بجد مستغربه رد فعلها كل همهم بيع الاعداد وخلاص

    بوست في وقته بجد

    ReplyDelete
  9. سلامو عليكووووو

    اول هام .. انت واحشني على فكره
    تاني هام .. بما ان الصباغ جاري وابن منتقتي .. اتعديت منه بداء الكسل وبقيت باقرى مواضيع والاقي نفسي مش عارف اعلق اقول ايه .. اقوم واخد بعضي وماشي على امل اني ابقى مظبط الأناني واجي اعلق عندك تعليق بروقان
    تالت هام .. الموضوع اللي انت اتكلمت فيه ده .. مش لاقي حاجه عندي اقولها غير ان الميت ماتجوزش عليه غير الرحمه
    وربنا يستر على ولايانا


    رابع هام بقى .. كل سنه وانت طيب






    سلاموووووووووووز

    ReplyDelete
  10. البنت المشمشية حلوة بس شقية:
    اولا الف شكر على متابعتك لمدونتي المتواضعة
    ثانيا:
    الراجل برضة اعتبر نفسه في مهمة مطلوبة الا وهو توفير الحياة الكريمة لاسرته
    بس ماتبقاش البنت في مكان وبقية العائلة في مكان تاني خاااااااااالص
    بالنسبة للصحافة
    بتجري ورا اي اخبار حتى لو كانت اشاعات
    اما ليلى غفران...ربنا يعينها على نفسها ويصبرها
    تحياتي واحتراماااااتي

    ReplyDelete
  11. كل اللى حصل ده مجرد فرقعه اعلامية
    الحادث كان سرقة وقبضوا على الجانى
    حداد من منطقة شعبية

    ReplyDelete
  12. الغنى ليس دليل على الفسق والفقر ليس دليل على العفه الناس فى الكومبوند مش بيسالوا على بعض لانه كل واحد عايش فى حاله طالما محدش استنجد يا احمد الاب اللى اتغرب وسافر علشان يضمن لولاده حياه كويسه مش هنعلق له المشنقه
    مش كل حد عايش لوحده منحل ولا فى بيته خمور ولا بيسهر فيه ناس مع اهليها ومقضينها مراجيح وكدب وسهر وسفر
    النهايه ده قدر ولو الاب غلط فكان هدفه كويس انا ضد سفر الابهات والغربه وكتبت عن ده
    قبل كده فى النهايه محدش عايش معاهم ومحدش عارف ايه الحقيقه لان ربنا هو اللى يعلم بيها
    فى النهايه الاتنين عند ربنا
    على فكره فيه فقرا مدمنين كتير وبيضربوا بلاوي دي معلومه عامله مش اكتر

    ReplyDelete
  13. انا الى حارق دمى دلوقتى ان القاتل سرق 36 دولار يعنى 200 جنيه منهم 50 جنيه دفعهم للتاكسى
    والموبيل بتاع نادين وهو الى كشفه

    مضايقه جدا

    بصراحة انت فصصت كل النقط الى كانت فى ذهنى انا اكتر حاجة تخيلتها وانا بقرأ المواضيع دى التفكك الأسرى السبب الرئيسى للحوادث دى اعتقد ان الصحف ملهاش غير نشر الجريمه وخخلاص

    انا هستفيد ايه لما اعرف هما مرتبطين ولا متجوزين ولا ولا ولا حرام يعنى ناس ماتت اذكرو محاسن موتاكم حتى

    ربنا يغفرلهم ويرحمهم ويهدى ناس كتير بأهلهم ويهديهم

    ReplyDelete
  14. ضي القمر:
    في اغلب الاحيان بيكون الاهل هدفهم نبيل ومشروع الا وهو توفير الحياة الكريمة للاولاد
    انما التنفيذ هو اللي بيكون غلط
    محدش يقول ان الاسرة كلها تبقى في بلد والولد او البنت لوحدهم في بلد تاني
    بالنسبة للصحافة...في صحف تخصصت في الاثارة وتلاقي بائعي الجرايد عارفينها وراصينها مع بعضها
    اما عن الجيران فالظاهرة اصبحت عامة سواء في الاحياء الراقية او الشعبية
    من الواضح ان الحياة طحنت الناس
    ربنا يرحم ويغفر للجميع
    تحياتي واحتراماتي

    ReplyDelete
  15. AHMED AL SABAGH:
    الله يخليك يابو حميد....الف شكر على الكلام الجامد دة
    انا ياعم غلبان...مااستاهلش الكلام الجامد دة
    بس اسمح لي اختلف معاك يا احمد
    في ناس كتير فهمت القصة وماخلتش فلوس الخليج تدمر اولادها
    قسموا نفسهم صح ما بين الخليج وبين مصر بحيث الاب مثلا يكون هناك والام هنا مع الاولاد وفي اجازة الصيف بتلتئم الاسرة كلها وهكذا
    رب الاسرة هو اللي بيحدد اذا كانت الفلوس هتطغى على كل حاجة في الحياة ام هي مجرد وسيلة ليس الا
    بيسعدني تعليقاتك باستمرار يا احمد
    بطل كسل وما تغيبش كتير
    تحيااااتي

    ReplyDelete
  16. DR.IBRAHIM SAMAHA:
    اكيد في حاجات العن من كدة يا دكتور
    بس فعلا خطورة الحادثة دي مش في الاشخاص
    انما في العبر والدروس المستفادة من الحادثة دي..وهي دروس كتيرة وجد خطيرة
    تحياتي واحتراماتي

    ReplyDelete
  17. انسانة عادية في عالم مش عادي:
    الحياة طحنت الناس خلااااااااااااااااص
    كله دلوقتي بيفكر ويخطط ازاي يعرف يعيش
    مش بس كدة
    ازاي ما ينطحنش في الصراع الدنيوي
    وزي ماحضرتك قلتي
    نسينا الله ....فانسانا انفسنا
    شكرا لتعليقك القيم
    تحيااااتي

    ReplyDelete
  18. سلاموا عليكم

    فاكر فيلم كان عبد العزيز مخيون خاطب معالي زايد
    وطلعوا اشاعة ان سابوا بعض
    والاشاعة كبرت وكل واحد ينقلها يزودها؟؟

    هو ده الشعب المصري
    طلعوا كلام وصدقوه

    ReplyDelete
  19. ياااااااااه سبقتني كان عندي نيه انزل بوست عندي في كل الكلام الي قولته ده بجد مهزله في كل حاجه وكل حاجه غلط في غلط ايه الحياه دي ناس تايهه ولا كان في ربنا ولا صح وغلط ولا اي تربيه ولا اخلاق ولا اي حاجه خاااااااااالص بجد بيصعبوا عليا الي كده الحمد لله على اهالينا ربونا احسن تربيه وعلمونا اننا نخاف من ربنا وعلمونا الصح من الغلط الحمد لله وتحياتي ليك على البوست الرائع ده

    ReplyDelete
  20. اولآ دي ناس ماتت مايجوزش عليهم غير الرحمه
    ربنا يرحمهم و يغفرلهم

    ReplyDelete
  21. اريج السمر:
    طبعا التعميم في اي شيء مرفوض
    فلا يوجد شيء مطلق
    مش اكيد ان كل بنات المدن الجامعية سيئات وطبعا ليست كل من تعيش في كنف والديها قديسة
    ولكن
    ليه التشتت الاسري؟؟
    التشتت الاسري هو السبب في مشكلات رهيبة
    وزي ماتفضلتي وقلتي...الموضوع كبير
    تحياتي واحتراماتي

    ReplyDelete
  22. محمد عبد الغفار:
    يا دماغك يا محمد
    لخصت الموضوع في كلمة واحدة
    بس هي الكلمة
    تحياتي واحتراماتي

    ReplyDelete
  23. لورنس العرب:
    بالتأكيد التعميم مرفوض
    ولكن سلوكيات اغلب طلبة الجامعات الخاصة بتبقى غريبة جدا
    ولو كنت متابع البروم (حفلة التخرج)..بتاعتهم هتكتشف ان الناس دي عايشين في عالم تاني خالص
    بس برضة في منهم شباب ملتزم ومحترم..قد يكونوا اقلية ولكنهم موجودين
    تحياتي واحتراماتي

    ReplyDelete
  24. أوّلا أشكرك على دعوتى لمشاهدة الموضوع ..
    لكن فيما يبدو نحن مختلفان فى رؤيتنا للموقف ككل :) عادى بتحصل ..
    شخصيا لا أرى علاقه بين عمل أبوىّ إحدى الضحيّتين فى الخليج و بين مصرعها فى جريمة قتل
    كما قلت فى تعليقى على الموضوع بمدوّنتى هذا وضع قاسى فعلا لكن لا علاقة له بالحادث !! الناس لا تقتل لأنّها تعيش بمفردها و حتى الأسر التى تعيش معا تأتى على بعض أفرادها أوقات يتواجدوا فيها فى المنزل
    بمفردهم !! ناهيك عن أن الجانى لم يتحرّ كى يختار ضحيّه تعيش بمفردها حتى يكون هناك علاقه سببيه فى
    الموضوع .. فيه ناس بتعيش مع أسرهم فى مناطق غير راقيه -عشان ماقولش شعبيه و ماشعبيّاش :)-
    و بينهم انفصال وجدانى و معنوى رهيب .. و أظن ده شئ واضح و جلىّ دلوقت فى معظم طبقات المجتمع

    سمعة البنت اللّى الإعلام مرمط بيها التراب يسأل عنها هذا الإعلام المنحط الذى لا يراعى حرمه لموتى ولا
    أحياء طبعا .. و الحقيقه أن هذا الحادث أثبت أن كثير جدّا من الصحف التى كانت تدّعى أنّها ليست
    صحف صفراء و لكن صحف محترمه ثبت أنّها صفراء فاقع لونها لا يسرّ القارئين

    احتكاكى بطلبة الجامعات الخاصه محدود جدّا .. و كونهم فى جامعات خاصه بما يتطلّبه هذا من مصاريف
    يوضّح طبعا مستوى الإنفاق الذى سيكونون عليه .. لكن السؤال الذى يلح علىّ فى هذه اللحظه لماذا جامعه
    خاصه مثل الجامعه الأمريكيه ليس على طلاّبها نفس التساؤل و علامات الاستفهام التى على طلاّب الجامعات
    الخاصّه الأخرى؟ .. لا أعرف الكثير عن نظم التعليم فى "أمريكا" و "أوربا" لكن حسبما أعلم من حق
    أى شخص هناك الالتحاق بجامعه ما طالما سيدفع تكلفة هذا و المجّانيه للمتفوّقين فقط .. فلماذا نستغرب الوضع نفسه فى بلادنا؟ يمكن -و ده استنتاجى الشخصى- لشعورنا أن معايير النجاح "وليس الالتحاق" فى هذه
    الجامعات قد يكون مطّاط و مرن حبّتين و هذا استنتاج ليس عليه أى دليل ده مجرّد ظن

    من ضمن الأمور التى أثارت استيائى فعلا موضوع الأحياء الراقيه و سلوك أفرادها إزاء بعضهم البعض !! أنا لا أرى فى تدخّل البعض فى حياة الغير حميميه لكنّى أراه فضولا يحب البعض أن يصوّره أو يتصوّره بوصفه محبّه و حميميه .. فلو هناك شقّه يسكنها شباب و ضيوفهم من الشباب و حدث بينهم مشادّات -كما وصفها الجيران و ليس صراخا كما قيل لاحقا- فهو أمر معتاد لا يتطلّب التدخّل خاصّة لو استغرق دقائق سكن الأمر بعدها تماما .. إذ لماذا سيتصوّر جار "يتخيّل أنّه آمن بفعل الحراسه" أن الضجيج انتهى بسبب قتل المتعاركين و ليس لأن كل شئ عاد لطبيعته و صفت النفوس !! حتى أنت نفسك حين تساءلت عن الأمر قلت لماذا لم يلفت انتباههم ولو بدافع الفضول !! و تحليلى الشخصى للأمر أن نفور الجيران من اتّهامهم بالفضول و التطفّل سبب إضافى لعدم تدخّلهم .. إضافة إلى أن الأحياء الغير راقيه لا تشهد هذه الحميمه و التلاحم الذى تصوّره أعمال "أسامه أنور عكاشه" برومانسيه خياليه .. يمكن جدّا أن يسقط قتيل فى هذه الأحياء على مرأى و مسمع من الناس دون أن يتدخّل أحد .. مابقاش فيه لا فى الأحياء الشعبيه ولا غيرها ما نتخيّله من أخلاق ولاد البلد المجدع إلى آخر هذه الأدبيات التى يحلو لنا تصوّر استمرارها .. لا أريد أن أصوّر الأمر على أن شوارعنا بقت غابه لكنّها لم تعد كذلك هذه الشوارع التى يهب الناس فيها لنجدة بعض دون توجّس أو تردّد

    تعامل الجرائد مع الأمر و تضارب الأقوال يثبت مرّه أخرى صفرة هذا الإعلام و مسئوليته عن الإساءه للضحايا و عليه ينبغى التعامل مع كل ما ينشر على لسانه بحذر و تشكك .. معظم الجرائد نشرت أن جثّة "نادين" وجد بها ماده غريبه تؤدّى لانفجار الرحم !! أين هذه الفكره العجيبه الآن من اعترافات القاتل أو تقرير الطب الشرعى؟ و ما علاقة جريمة القتل بالسلوك الشخصى للضحايا و ذكر أن إحداهن كانت مدمنه ثمّ أقلعت أو أن والد الأخرى كان يرسل لها 5000 جنيه شهريا !! ما هذا الترخّص و الابتذال

    شخصيا أنظر للجريمه بوصفها جريمه قدريه -أخشى أن أقول عبثيه- لم يكن للتخطيط فيها دور كبير إن كان له دور على الإطلاق .. يمكن أن نقول أنّه سوء حظ تضاعف بشكل مأساوى لكل الأطراف

    ReplyDelete
  25. السلام عليكم...
    الموضوع أول مره أعرفه من مدونتك..
    .......
    بالطبع لازم ياخذ الموضوع
    مساحه واسعه..
    للنقاش..
    لأن أهم المقومات موجوده به..
    ..........
    فتيات لوحدهم بشقه..
    بنت فنانه
    جامعات خاصه
    ناس أثرياء
    .............
    والصحافه هذه فرصتهم الذهبيه
    .......
    أنا معاك لماذا لا ينظر لهذه القضايا بعين الوسطيه..
    مش لازم تكون البنت يامتدينه ...يا غير متربيه
    البنت ممكن تكون عاديه ومحدش سمع عنها حاجه..
    وإلي حصل قضاء وقدر..
    ..........
    المفروض الواحد لا يستبق الأمور وينتظر حتى الحقيقه تظهر..
    ........
    ولما الهجوم الشرس على أب البنت
    والترحم المفرط على بنت الفنانه..
    ................
    نسأل الله أن يحسن خاتمتنا ..
    ...........
    دمت بخير

    ReplyDelete
  26. لسلام عليكم
    اول زيارة شدتنى جدا مدونتكم
    اولا كل سنه وانت طيب بمناسبه عيد الاضحى المبارك
    ثانيا اهنيك على الصورة الجميله اللى رسمها الفنان ياسر حسين
    موضوع البوست ده شائك جدا ويتناول عدة ظواهر اجتماعيه سلبيه جديده وللاسف هى دخيله على مجتمعنا
    لاننا كمصريين معروفين بالدفء العائلى واننا شعب بنحب اللمه فى العيله اوفى الحاره او فى القرية
    ولكن للاسف طغت الماده وزحفت على مشاعرنا وخلت الدفء ده بروده وصقيع يلتهم كل الخصال المصريه الاصيله زى الشهامه والجدعنه والنخوة والترابط الاسرى وفعلا ده واضح من كلامك فى البوست .. ولكن مازاد حزنى واسفى ومااثار اشمئزازى هو الكتابات فى الجرائد ..لماذا الخوض فى الاعراض ... ايه يهم القارئ من كل ده مجرد الفضول والسبق الصحفى .. الم نراعى اب مكلوم وحزين حتى ولو كان مقصر ....من منا معصوم ... لابد ان يكون هناك ايجابيه ونتخير الصالح ونترك الطالح ... العبرة من الصحافة هو القاء الضوء على سلبيات معينه ورفضها بدون تجريح او تشهير ...رحم الله الفتيات وغفر لهم ورحم الله عاداتنا وتقاليدنا الجميله
    والاهلى حديد ..انا كمان اهلويه

    ReplyDelete
  27. مولان:
    هي مش غلطة الاهل بس
    هي غلطة اي حد يستغل ثقة اهله فيه بشكل خاطىء
    مش شرط الفتاتين دول...انما انا اتحدث بشكل عام
    بالنسبة للصحافة ففقدت الكثير من رصيدها لدى الناس في القضية دي لأنها قالت اشياء لم تثبت عدم دقتها اصلا انما ثبت كذبها تماما
    تحياتي واحتراماتي

    ReplyDelete
  28. sooooo:
    سووو...ازيك؟
    لعن الله الكسل اللي حرمنا من تعليقاتك القيمة
    انت عامل ايه؟
    واحشني اكتر والله
    ياريت تنسى ان الصباغ ابن منتقتك وماتقلدوش في الموضوع دة
    مستني بقى تعليقاتك على كل موضوعات المدونة
    تحياااااتي

    ReplyDelete
  29. desert cat:
    ومازال الاغلبية متشككة تماما
    حتى والدة القتيلة هبة الفنانة المغربية ليلى غفران متشككة و حاسة ان لسة الموضوع في كلام كتيــــــــر
    تحياتي

    ReplyDelete
  30. معك حق فعلا

    تدوينه جميله

    تقبل مروري من هنا

    وكل عام وانته بخير

    ReplyDelete
  31. appy planet:
    مين اللي قال ان الغنى يعني الفسق والفساد؟
    انا قلت كدة؟
    لا يمكن طبعا
    ازاي وصل ليكي الانطباع دة؟؟
    ومين اللي قال ان الفقراء محترمين ومتديين ومابيعملوش حاجة غلط؟
    ماكنتش ساعتها بلاوي العشوائيات ظهرت وبانت..ولا الادمان والبانجو وشم الكلة
    القصة مش قصة غنى وفقر يا ابي....القصة قصة اهل مش عارفين واجباتهم وحقوق اولادهم عليهم
    الغني باعتبار الفلوس بديلا عنه والفقير باهماله وكسله وعدم اعتنائه باولاده
    الاب مش مطلوب انه يكون مضخة اموال فقط...طبعا الاموال في غاية الاهمية بس دة مايمنعش ان دة يكون مع اعتنائه باولاده وتربيته لهم
    وتاني مرة
    بأكرر
    مش مسألة غنى وفقر
    انما مسألة ادمغة فقط لا غير
    تحياتي واحتراماتي

    ReplyDelete
  32. هوندا:
    ربنا يرحم الجميع ويغفر لهم ويسكنهم فسيح جناته
    تعددت الاسباب والموت واحد
    سواء راحوا مقابل 200 جنيه او 2 مليون جنيه المهم انهم راحوا
    تحياتي واحتراماتي

    ReplyDelete
  33. Nohaz:
    هو شعب يعشق الفضايح وقصص الاثارة
    تحياتي واحتراماتي

    ReplyDelete
  34. حاسوباتية:
    الف شكر على تعليقك القيم
    وبرضة نزلي البوست بتاعك
    تعدد الاراء هو الهدف من وجود المدونات
    تحياتي واحتراماتي

    ReplyDelete
  35. وكل سنة وانت طيب يا احمد

    ReplyDelete
  36. الله عليك
    تناولك للموضوع رائع
    اتفق معاك في كل ما قلته
    اول مره اعرف ان المغنية دي مغربية
    القضية مشدتش اهتمامي
    بعد ما سوزان تميم خلصت علي انتباهي كله

    عيبك الوحيد انك اهلاوي
    بس معلش بكره تشوف الحقيقة

    انظر حولك
    د. خالد عزب

    ReplyDelete
  37. اخلاق جمهور الاهلي
    http://www.youtube.com/watch?v=KOR30b-GuEk

    ReplyDelete
  38. أنا مش مع رأي الاخ اللي بيقول إن ده نتاج إن الاب يعمل في الخليج وبيحاول يعمم الموضوع على كل ابناء العاملين في الخليج
    في حين ان امامي أسر الاب مسافر الخليج والابناء معتدلين جدا وناجحين دراسيا
    يعني الابن اللي عايز ينحرف بينحرف حتى ولو في حضن ابوه
    :)

    ReplyDelete
  39. emy:
    آمين يارب العالمين
    اللهم ارحم موتانا جميعا

    ReplyDelete
  40. زمان الوصل:
    طبعا الاختلاف في الرأي لا يفسد للود قضية
    والقصة مش قصة اب بيشتغل في الخليج...كتير حدا من الناس بيشتغلوا في الخليج ومفيش اي مشكلة
    انما القضية هي قضية بنت وحيدة في بلد وجميع افراد اسرتها في بلد اخرى
    هل دة وضع صحي؟؟
    بصرف النظر عن الحادثة دي وملابساتها..هل يجوز ان تعيش بنت عندها 23 سنة في شقة بمفردها؟
    لا اتحدث عن الضحية نادين على الاطلاق وانما اتحدث بشكل عام
    طبعا اداء الاعلام في القضية دي كان غريب جدااا...كل جريدة اخترعت قصة غير الجريدة الاخرى وكأنهم بيتحدثوا عن ناس مختلفة مش على جريمة واحدة لها نفس الضحايا
    بالنسبة للجامعات الخاصة
    اغلب طلبتها وطالباتها لهم سلوكيات معينة كدة غريبة شوية
    ماقدرش اقول ان كلهم سلوكياتهم عليها علامات استفهام لأن التعميم مرفوض تماما
    انما نسبة العناصر السيئة عالية لو قارناها ببقية الجامعات الاخرى
    اما الجامعة الامريكية فهي مختلفة رغم انها خاصة...عارفة ليه؟
    فعلا الجريمة قدرية بحتة...انما الدروس المستفادة منها كتير قوي
    ربنا يرحم الجميع
    تحياتي واحتراماتي
    لأنها بتتطلب اختبارات علمية ونفسية قبل قبول الطالب بها وبالتالي بيتم غربلتهم

    ReplyDelete
  41. M.K:
    معقووووول
    دي الحادثة دي تقدر تقول عليها حديث المدينة
    بس رب ضارة نافعة
    كويس ان مدونتي بقى لها فائدة اخبارية
    القضية متشعبة وقبل فك طلاسمها الاجتهادات الصحفية اشتغلت وتم التجريح في الكل بداية من الضحيتين واهلهم وجيرانهم وجامعتهم وكله
    وفي الاخر
    طلع القاتل حرامي سرق 200 جنيه
    تحياتي

    ReplyDelete
  42. بس خلاص:
    يارب دي تكون الزيارة الاولى بس مش الاخيرة
    تسرني زيارتك بأستمرار
    بالنسبة للصورة الف شكر ودي مش غريبة على الفنان ياسر حسين
    بالنسبة للفتيات فليرحمهم الله رحمة واسعة
    وفي النهاية لا يتبقى الا كلمة واحدة
    الأهلي حديد
    تحياتي واحتراماتي

    ReplyDelete
  43. اقصوصة:
    مرحبا بكي في اي وقت
    بيتك ومطرحك
    تحياتي واحتراماتي

    ReplyDelete
  44. AHMED AL SABAGH:
    كل سنة وانت طيب يا صباغ
    ماتكترش في اللحمة علشان ترجع تبدع بعد العيد ان شاء الله
    تحياتي

    ReplyDelete
  45. DAKTARA:
    القضية دي حديث المدينة يا دكتور
    وفعلا قبل اكتشاف الجاني كانت القضية بوليسية من الدرجة الاولى وكانت مستحوذة على اهتمام الناس لرغفتهم وشغفهم في فك طلاسمها
    اما بعد كشف النقاب عن الجاني...تحولت القضية لعد المعقولية واصبحت محل شك حتى من اهالي الضحيتين
    بس الظاهر اهتمامك بنكسات الزمالك العديدة مستحوز على كل وقتك يا دكتور
    على فكرة
    جمهور كبير....جمهور عظيم...اديله عمري وبرضة قليل
    منور يا دكترة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails