Wednesday, 26 November 2008

فتش عن الرجل


وراء كل عاهرة رجل دفعها لهذا الطريق

ايه الكلام دة؟
الكلام دة صحيح؟
يعني اي عاهرة في الدنيا....هناك رجل هو اللي القى بها في هذا الطريق؟؟؟؟
تقريبا دي تكملة للحملة القومية لمحاربة الرجل اللي شغالة الله ينور اليومين دول
انا شخصيا مش موافق على الجملة دي
انا من رأيي ان مفيش حد بيجبر حد على اي طريق او اي سلوك في الحياة
كل بني ادم هو اللي بيحدد مصيره ويحدد خط سيره في الحياة
هل كل واحدة انضحك عليها بأسم الحب تحولت لعاهرة؟؟؟؟؟؟
بالتأكيد لا
هل لابد ان يكون سبب انحراف اي فتاة هو شاب؟
بالتأكيد لا
كتير جدا من العاهرات لديهن استعداد بيئي وسلوكي للانحراف بدون وجود اي شاب كان سببا في هذا الانحراف....حرام نعلق سلوك اي فتاة او سيدة منحرفة على وجود شاب او رجل اودى بها للوحل
هل لو افترضنا ان شابا غرر بفتاة...هل هذا مبرر لأن تتحول لعاهرة؟؟؟؟؟؟
طب ليه العكس مش صحيح....ليه كل شاب منحرف وراه فتاة او سيدة كانت سببا في انحرافه؟؟؟
طبعا انا لا اوافق على كدة برضة
انا رأيي ومن الاخر
ان مفيش حد بيكون سببا في انحراف حد...كل واحد مسئول عن تصرفاته..كل واحد بيتحمل نتيجة اعماله واخطاؤه
كفاية تحامل بقى

32 comments:

  1. كلام حضرتك صحيح جدا الانسان اللى اتربى صح وعلى الاخلاق والقيم عمره ما يسمح لشخص تانى يغيره حتى ولو حاول بكل الطرق كل انسان لو حقيقى جوه الاخلاق والقيم هيفضل متمسك بيها مهما حاولت الظروف والناس تغيره

    ReplyDelete
  2. وراء كل عاهرة رجل دفعها لهذا الطريق
    العنوان قوى جدااااا بس مش دايما ومحدش يقولى اللى عندو اخلاق مش هيعمل كدة كل واحد بيختار طريقو بنفسو مفيش ظروف بتجبر الانسان على حاجة ده لو هتشحت متعملش كدة الموضوع قوى عايزاك تنور مدونتى وتقولى رايك انا متبعاك من فترة ويهمنى رايك

    ReplyDelete
  3. الحكمة العربية القديمة بتقول: الحرة لا تاكل بثدييها
    ومعناها ف رايي واضح ومفهوم.. الانسانة الشريفة مفيش حاجة ممكن تدفعها لبيع الجسد .. دا كلام خايب بيقولوه العالم الهبلة بتاعة تحرير المراة ويا نساء العالم اتحدن
    الانسان الشريف بيفضل متمسك بمبادئه، والانسان اللي عنده استعداد للانحراف مش مستني ظروف تدفعه للسكة الغلط
    تحياتي

    ReplyDelete
  4. ماهو لو كل غلطان دور على شماعة

    يبقى مش هنخلص و هنعمل زي الدومنو المرصوصو ورا بعضه تلطش اول كارت يقع كله ورا بعضه

    انا معاك ضد الحركة الغريبة لمهاجمة الرجل و تحميله مسئولية اي نملة خلعت جناحتها حتى

    ReplyDelete
  5. بص يا سيدى طبعا الكلام ده كله هبل فى هبل
    يعنى هما كده لغوا شخصية تلك المرأه
    وخلوها شخصيه مقلده
    كمان هما كل شويه يطلعوا يقولوا الراجل الراجل مش عارف احنا هنروح فين من الناس دى
    ده احنا اللى محتاجين نتساوى بيهم

    ReplyDelete
  6. هي السبب الاول والأخير
    لكن خد بالك ان الاوساخ دائما بيروحوا لبعض
    زي المغناطيس

    ReplyDelete
  7. يعني نفهم من كده ان كل البيوت المشبوهه واللي غالبا لم بيتقبض عليهم بتكون اللي بتدير الشبكة واحدة ست
    وراء انحرافهن رجل؟؟؟؟!!!!!!!!
    يعني خلاص الست لغت عقلها وبسبب خداع رجل لها تقرر الانتقام من نفسها ومن جسدها وتصبح للجميع
    كلام طبعا غير منطقى ولا يجب تعميمه
    قد يكون أحد أسباب إنحراف بعض الساقطات رجل
    وهذه حالات فردية وقبل أن يطلق هذا الشعار لابد من عمل احصائيات مدروسة

    ReplyDelete
  8. نعم فالأنسان مخير وليس مسير

    فعنده عقل ليختار الصواب من الخطأ

    تحياتى

    د إبراهيم

    ReplyDelete
  9. اخى احمد .
    أولا ان شايفه أن مفيش حمله ضد الرجل ولا حاجه .. كل اللى اعرفه .. إن المرأة دايما بتطالب بحقوقها والله اعلم حقوقنا دى هتنتهى إمتى ..؟؟هههه
    اعتقد ان الفارق الوحيد بين المرأة والرجل دلوقتى .. هو أن الأطفال بيحملوا نسب الرجل .. ولو ان بعض النساء نادوا بأن الطفل يحمل اسم والدته ..ههههههه
    (شكلى دخلت فى قصه تانيه خالص .. ما علينا .. ههههه )

    وطبعا انا معاك فيما كتبت . دى كلها حجج مش أكثر .. مثل اى حجج غير منطقيه بنسمعها ..

    وغير كده كمان .. إن اللى بيقول كده بيدنى من التفكير العقلى للمرأة . المرأة مش كائن منقاض . مادام ليها فكر وعقل وشخصيه .. فالحجه عليها مش ليها وقتها .
    شكرا لك يا اخى .
    بوست رائع كما اعادتنا منك دوما

    ReplyDelete
  10. بص يا سيدي انا متفقه و مختلفه معاك في نفس الوقت
    المحترم بيكون محترم لانع عايز يكون كده
    و الزباله بيكون زباله لانه حابب كده

    بس احيانا لما اب يجوز بنته الي عندها 16 سنه لواحد عنده 65 سنه
    و يتاجر بيها و يبيعها من ده لده علشان الفلوس يبقي حولها لايه

    تحياتي

    ReplyDelete
  11. انا فى رائى وراء كل عاهرة بيئه عاهرة ايضا
    تحياتى

    ReplyDelete
  12. ككنت حكتبلك كومنت وبعدين لم اضغط علي بوست لاني كنت خكتب نفسه اللي كتبته إيمي
    وبعدين ايه خكاية الحملة ضد الرجل دي؟؟
    :)
    تحخياتي

    ReplyDelete
  13. ..ونفسا وما سواها الهمها فجورها وتقواها..صدق الله العظيم

    مفيش حد مسئول عن انحراف حد
    بس فيه ممكن كتير حد مسئول عتن تعاسة او سعادة حد او بالاحرى سبب بس يا بلديات

    ReplyDelete
  14. لا مش صحيح وراء كل عاهره رجل ... لكن العاهرات لايمكن الانحراف اذا امتنع الرجال عن شراء بضاعتهن ... الرجل هو المستهلك لتلك البضاعه ولو زاد العرض وانعدم الطلب لبارت البضاعه ... مش مسآله حمله للهجوم علي الرجل ولا للدفاع عن الست ولكن الست المنحرفه لازم ليها راجل يدفع تمن انحرافها وعهرها واذا رفض الرجل الدفع وامتنع عن شراء البضاعه - البضاعه تبور وتبوظ - وشكرا

    ReplyDelete
  15. انسانة عادية في عالم مش عادي:
    كلام سليم مية في المية وموافقك عليه تماما
    محدش بيؤثر على حد.....محدش بيحدد مصير حد تاني
    كل واحد هو اللي بيختار طريقه
    تحياااااتي

    ReplyDelete
  16. البنت المشمشية حلوة بس شقية:
    ماهو اللي شدني اني اعمل الموضوع دة هو قوة العنوان
    العنوان استفزني بصراحة
    اعتبريني صديق دائم لمدونتك ان شاء الله
    تحياتي

    ReplyDelete
  17. الله أعلم


    ماالذي يدفع البعض لممارسة العهر والبغاء الموضوع برضه فيه آراء متنوعه

    ReplyDelete
  18. والله يا احمد الاخلاق والتربية مش لازم يكون وراها دافع
    زى المتحرش كدا
    واحد سافل وقليل الادب خارج من بيئة زبالة علشان كدا مش بيحترم اى حد وبيمد ايده على اللى تقابله وحجته هى السبب
    كذلك العاهرة انسانة فاقدة لكل معانى الاخلاق والتربية فلا لوم الا على اهلها اللى مش علموها يعنى ايه كلمة اخلاق
    بس برضه اللى بيروح لها ده يبقى ايييييه اكيد هو كمان عاهر يعنى مفيش واحد محترم مهما كانت المغريات اللى قدامه هيندلق زى الجردل سورى يعنى ويروح لعاهره
    :)

    ReplyDelete
  19. bobo:
    في ناس كتير بتقوووووول دة كان زمااااااااااااااان
    دلوقتي الزمن اتغير
    ادمغة بقى
    ربنا يستر
    تحياتي

    ReplyDelete
  20. محمد الكومي:
    وكأن الجنس اللطيف دي كائنات ملائكية نورانية لا تخطىء
    حاجة عجيبة جدا يا محمد
    ربنا يلطف بينا
    تحياتي

    ReplyDelete
  21. اوعى تفكر:
    انت بتقول فيها؟!!!!!
    انا والله جنبهم حاسس بالاضطهاد
    وفي الاخر يقولوا مساواة
    ربنا ينتقم منهم

    ReplyDelete
  22. لورنس العرب:
    مش دايما بيروحوا لبعض يا لورنس والا الحياة كانت هتبقى اسهل من كدة بكتير
    ساعات كتير بيبقوا بيننا بس من غير ما نحس بيهم
    تحياتي

    ReplyDelete
  23. ياسر حسين:
    في مصر المحروسة لا مكان للاحصائيات المدروسة يا فنان
    تحياتي

    ReplyDelete
  24. dr ibrahim samaha:
    بس دعاة المرأة والشاعرون بالاضطهاد بيعتبروا المرأة كائن ضعيف مهيض الجناح يحيا كرد فعل لتصرفات الرجل وليس كفعل
    تحياتي

    ReplyDelete
  25. ضي القمر:
    المرأة دلوقتي اعتقد ان المطلب الجديد لها ان الرجل لازم هو اللي يرضع الاطفال وممكن كمان لو يعرف ينجبهم يكون افضل
    دة احنا غلاااااااااااااااااااااااااابة
    تحياتي واحترامااتي

    ReplyDelete
  26. emy:
    طبعا مفيش شك ان في حالات استثنائية
    بس مش ممكن تكون القاعدة ان اي واحدة منحرفة في راجل بيكون سبب لانحرافها
    تحياااااتي

    ReplyDelete
  27. رئيسة حزب الاحلام:
    برضة مش قاعدة.....يخلق من ضهر العالم فاسد والعكس
    تحياتي واحتراماتي

    ReplyDelete
  28. micheal:
    انت مش واخد بالك يا مايكل ان احنا مضطهدين؟
    الحملة القومية لاضطهاد الرجال
    تحيااااتي

    ReplyDelete
  29. mahasen saber:
    و هو لازم وحتما ولابد ان يكون السبب هه الرجل؟
    تحياتي لكي يا محاسن

    ReplyDelete
  30. اميرة بهي الدين:
    فعلا....تعليق متوازن جداااااا
    تحياتي واحتراماتي

    ReplyDelete
  31. maksofa:
    كل بني ادم له مبرر لأي فعل بيفعله
    حتى العاهرات.....لديهن اسبابهن
    من وجهة نظرهن طبعااااااا
    تحياتي واحتراماتي

    ReplyDelete
  32. يdesert cat:
    هو البوست دة مش الغرض منه محاباة الرجل في كل شيء
    وانما الرض منه وضع الامور في نصابها الصحيح
    مش ااي غلطة لاي سيدة سببها الرجل
    تحياااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails