Thursday, 20 November 2008

كنت هنـــــــــــــــــــــــــاك.....في الكاميرون

عمري ما كسبت في اي مسابقة في الحياة
كنت زمان بأجمع صور البوم (بم بم) وكان دايما بتبقى في صورة مش موجودة في السوق وبالتالي عمر ما البوم بم بم ما اكتمل وبالتالي عمري ماكسبت
بعد الالبومات طلعت هوجة ال 0900 وطبعا عمري ما حاولت مجرد المحاولة الاشتراك في النوع دة المسابقات لسببين:
اولهما :
ان تفاهة الاسئلة تحسسك ان المسابقة نصب *نصب....ماهو مش معقول تكون مسابقة من عينة في اي قارة تقع جمهورية مصر العربية؟؟ مسابقة نزيهة
ثانيهما: ان حتى لو المسابقة حقيقية انا عاااارف نفسي كويس قوي.....المنحوس منحووووووووووووس
ومشيت في الحياة على هذا الأساس...لا امني النفس بأي ضربة حظ...فالحظ لا يأتي الا لمن يستحقه واعتقد اني لست احد هؤلاء
بس بما ان ساعة القدر يعمى البصر ولأن الفرصة بنت جميلة راكبة عجلة ببدال...حصلت المعجزة وكسبت
كســــــــــــــــــــــــــــــــــــــــبــــــــــــــــــــــــــــــــــــــــــــــــــــت
ومش اي مكسب
دة انا كسبت رحلة برة مصر
ومش لأي مكان
الكامــــــــــــــــــــــــــــــــــــــــــــيـــــــــــــــــــــــــــــــــــــــــــرون
كسبت في مسابقة (فودافون) لأجمد 10 اهلاوية في مصر يسافروا مع الأهلي للكاميرون علشان يشجعوه ويرجعوا من هناك بكأس افريقيا
الرحلة لمدة يوم واحد يوم المباراة والعودة بعد المباراة مباشرة
كل اللي عملته علشان اكسب اني اتصلت ب 1010 وقعدت احل مسابقة معلومات عن النادي الاهلي وتاريخه ولا عبيه ومبارياته وكل واحد يجمع نقط اكتر عن طريق حل الاسئلة هو اللي هيكسب يوميا
عندي تليفون ما بأستخدمهوش كتير وفيه كمية رصيد غير طبيعية....قلت ليه لأ؟
هو في حد يعرف عن الاهلي ياد يا احمد اكتر ما تعرف انت؟ هو في حد بيحب الاهلي زيك كدة؟ هو ممكن يكونوا اجمد 10 اهلاوية في مصر وانت مش فيهم؟؟؟؟
طبعا كلا البتة....لا يمكن ابدا...وبدأت احل في الأسئلة واجمع في النقط و العب والعـــــــــب لحد ما جمعت من النقط 2500 نقطة وقلت دة آخري بصراحة
تاني يوم (فودافون) بجلالة قدرها اتصلوا بيا وقالوا لي مبروك يا احمد انت معانا في الكاميرون انت كسبت امبارح
الكلام دة كان يوم الثلاثاء 4 نوفمبر
ومن ساعتها وانا تحولت لأحمد الأفريقي...يوم اروح اودي الباسبورت لشركة السياحة ويوم اروح اتطعم ضد امراض عجيبة جدا عمري ما سمعت عنها ومرة اروح وحدة الملاريا بوزارة الصحة علشان اخد دواء الملاريا قبل السفر
المهم من الثلاثاء 4 نوفمبر لحد الثلاثاء 11 نوفمبر وانا املأ الدنيا ضجيجا وصخب والناس اللي يعرفوني واللي ما يعرفونيش عرفوا اننا مسافر الكاميرون
لحد يوم الاربعاء 12 نوفمبر ماعرفت ان الرحلة في طريقها للألغاء نظرا لعدم اكتمال السعة المقررة لاقلاع الطائرة........طب وانا ماااااااااااااااااااااااااااااااااااااااالي؟
الظاهر كدة ان الفرصة لا بنت جميلة ولا نيلة والظاهر ان المنحوس منحوس
بس بعد التلاعب شوية بأعصاينا طلعت الرحلة وكان التجمع فجر الأحد 16 نوفمبر موعد المباراة



*في مطار القاهرة قبل اقلاع الطائرة



الصحبة كانت فعلا جميلة والطائرة بتجمع ناس بيجمعهم عشثق النادي الاهلي ومن مختلف الاعمار من 15 سنة لحد 60 سنة...ناس من رابطة النادي الاهلي...ناس من المشجعين التقليديين للنادي (قدامى المشجعين).....ناس من فودافون....المطرب ايهاب توفيق.....محمد عباس مراسل قناة دريم....مهيب عبد الهادي مراسل قناة الحياة....وغيرهم كتير





*قبل خطوات من سلم الطائرة


الرحلة استغرقت 4 ساعات ونصف ووصلت مطار جاروا حوالي الساعة 11 صباحا......نزلنا من الطائرة الى الجوازات سيرا على الاقدام ومفيش في المطار غير طيارتنا بس...هو عموما مطار جاروا صعب ان يطلق عليه مطار
بتنزل من الطائرة وتنتقل للجوازات سيرا على الاقدام
اعتقد ان محطات القطارت عندنا في مصر اكبر مساحة من مطار جاروا
دخلنا بدون اي اجراءات تفتيش ولا اي مضايقات او منغصات واكتشفنا ان الكاميرونيين منتظرينا بفرق للفنون الشعبية الافريقية والرقص الافريقي المميز
الأستقبال كان مميز فعلا خاصة اننا كنا معتقدين استقبال سيء جدا بعد نتيجة مباراة الذهاب والمضايقات اللي تعرض لها الفريق الكاميروني بالقاهرة
وبعد ما قرأنا في الصحف المصرية ان الناس هناك مشحونة بشكل غير مسبوق....بس دة مش حقيقة على الاطلاق
الا لو كان المقصود بالشحن من وجهة نظر الصحفيين المصريين هو ان تشير الجماهير لأي مشجع مصري بالرقم 3 ومعناها انهم هيكسبونا بثلاثة اهداف وهو طموح مشروع لهم حتى لو كان في عداد المستحيلات من وجهة نظرنا طبعا




*استقبال حافل بمطار جارو

طبقا لبرنامج الرحلة كان من المفترض ان نتجول جولة حرة بمدينة جاروا الا انهم ابلغونا بألغاء الجولة الحرة و التوجه مباشرة الى الاستاد على الرغم انه باقي على المباراة 3 ساعات كاملة ودرجة الحرارة 41 درجة مئوية والشمس غير طبيعية (ربنا مايوريكوا شمس خط الاستواء دي بتبقى عاملة ازاااااااي)....




*امام البوابة الرئيسية لمطار جاروا

واحنا في الطريق الى الاستاد عرفنا هم ليه الغوا الجولة الحرة في المدينة....لأن بأختصار مفيش مدينة من الاساس....شوارع اغلبها ترابية غير مرصوفة ولا توجد اي مظاهر لحياة مدنية....مجموعة من البيوت الفقيرة المتراصة بجوار بعضها...لا توجد اية محال تجارية ولا شوارع تصلح للتجول اساسا
الفقر بكل ما تحمله الكلمة من معنى
وصلنا الاستاد وسط اجراءات دخول في منتهى السلاسة واليسر (اكيد الأمن الكاميروني ما اسعدوش الحظ واخذ دورات تدريبية على يد الشرطة المصرية وكيفية تعذيب الجماهير).....دخلنا الاستاد بدون تفتيش وسط ذهولنا من سهولة الاجراءات والدخول
من الساعة 12 لحد الساعة 3 موعد المباراة (بتوقيت الكاميرون)....والشمس فوق دماغنا رأسيــــــــــــــأ.....استهلكنا كميات رهيبة من المياه والعصائر والبيبسي في جو غير طبيعي من الحرارة والشمس والرطوبة والدوشة والازعاج الرهيب



*في المدرجات

الأخوة الكاميرونيين مشغلين دي جي في الاستاد بصوت عالي جدا واغاني فرنساوي وتشجيع حماسي للجماهير وكل دة واحنا جايبين اخرنا من حرارة الجو والشمس والرطوبة والارهاق وزاد عليهم كمان الازعاج
المهم ان المباراة بدأت وسط حماس غير طبيعي للجمهور الكاميروني المتحمس الا ان هدف احمد حسن في الشوط الاول قد احبطهم تماما قبل ان يدركوا التعادل بنهاية الشوط الاول وتعود اليهم الحماسة والامل في العودة للمباراة
في الشوط الثاني اعصار كاميروني وحماس غير طبيعي ودي جي اشتغل من جديد وهدف ثان اشعل المباراة تماما واصوات جماهير الكاميرون اصبحت عالية جدا وسط خوف وصمت تام منا ورعب من فكرة ان تفلت المبارة من ايدي لاعبي الاهلي خاصة ان دخول هدف ثالث في الوقت دة سيعقبه لا محالة الهدف الرابع المميت
وحتى لو لم يدخل الهدف الثالث وانتهى اللقاء بهزيمة الاهلي بهدفين فهما كفيلين بالعكننة علينا وضياع جزء كبير من الفرحة الافريقية
الا ان ربنا اراد ان فرحتنا تكتمل بهدف التعادل للنادي الاهلي عكس اتجاه سير اللعب تماما...بس تقول ايه غير ربك لما يريد
انتهت المباراة بعدما اصبحنا محاطين من الكاميرونيين من جميع الجهات ولولا ان الشعب دة طيب بجد احنا كنا اتقطعنا.....بدأت افراح لاعبي الاهلي في الملعب وافراحنا في المدرجات وسط انتظار الجمهور الكاميروني لمراسم تسليم الكأس في تصرف لا يصدر الا عن شعب محترم بيقدر الروح الرياضية فعلا وروح التنافس الشريف
ورأسهم والف سيف الا ياخدوا مننا تذكار سواء التيشيرتات او الكابات او الاعلام اللي احنا ماسكينها....ناس فعلا غلابة بشكل رهيب وبيحبوا مصر والمصريين وبيحبوا الاهلي وبيتعاملوا معانا كشعب متقدم جدا او كأننا دولة نفطية غنية (مش عارفين اللي فيها!!!!!!!!!!)...بس فعلا شعب غاية في الاحترام
المباراة انتهت الساعة 5 بتوقيت الكاميرون وموعد العودة الساعة 11 مساءا..وبالتالي هناك 6 ساعات من الفراغ في بلد لا توجد فيه اي وسيلة للترفيه او تمضية الوقت
ابلغونا اننا هنتوجه الى الفندق اللي بيقيم فيه لاعبي النادي الاهلي وطبعا هنا كانت الفرحة العارمة لأتاحة الفرصة لنا للأحتفال بالكأس مع اللاعبين والبعثة بالكامل
توجهنا الى الفندق وسط تصفيق الكاميرونيين الطيبين ورغباتهم العارمة في الحصول على اي تذكار من ريحتنا
تي شيرت....كاب...نظارة..اي حاجة تيجي من ريحة الحبايب
طبعا الفندق اكيد ممكن تتخيلوه عامل ازاي...هو طبعا مش فندق...هو مجموعة من الغرف الضيقة جدا الملاصقة لبعضها البعض...الغرفة لو وقف فيها اكثر من 3 افراد هيبقى في ازمة وممكن يصاب اي حد بالاختناق
التقطنا الصور التذكارية مع اللاعبين والجهاز الفني والادارة وسط جو من المرح والفرحة الشديدة بالكأس الغالية..واتجهنا للمطار حوالي الساعة 8 مساءا استعدادا للمغادرة والعودة للقاهرة
وصلنا المطار وطبعا كالعادة انهينا الاجراءات في كل سهولة ويسر واريحية تامة واتجهنا للجلوس في مقاعدنا بالطائرة انتظارا للأقلاع
وهنا حانت ساعة الأزمة الكبرى
ازمة مطار جاروا
قاعدين في الطيارة منتظرين انها تتحرك بقى...نصف ساعة وفيش اي بادرة للتحرك....ساعة و مفيش عجلة بتتحرك...الناس بدأت تقلق من الوضع الغريب دة
والتساؤل الهامس بدأ يتحول لأسئلة علنية
في ايه يا جماعة؟؟؟؟؟
قالوا لنا..ان في خلافات مادية بين المطار وبين الطائرة وانها في طريقها للحل
طب ممكن ننزل نقعد تحت شوية خاصة ان تكييف الطائرات وهي على الارض بيبقى ضعيف جدا
بس اكتشفنا انهم شالوا السلم
شالوا سلم الطيارة من الطيارة واحنا جوة الطيارة
طيب ليه كدة يا جماعة؟
اتاري المطار كله مافيهوش الا سلم واحد بس....بعد ما طلعنا الطيارة شالوا السلم علشان لاعبي الاهلي وبقية البعثة تطلع طيارتهم هم كمان
ماهو المطار مافيهوش الا طيارتين...... طيارتنا وطيارة الاعبين وسلم واحد بس
المهم فضلنا قاعدين في الطيارة لحد ماجابوا السلم تاني ونزلنا بعد ماكنا هنتخنق جوة الطيارة من الحر....اول ما نزلنا من الطيارة لقينا طائرة الاعبين بتستعد للمغادرة والاقلاع....وهنا بدأ القلق والتوتر
اللي كان مطمئننا هو وجود طائرة اللاعبين محتجزة معانا ومعنى مغادرة الطائرة دي واحنا لسة موجودين في المطار ان احنا هنفضل قاعدين في جاروا لحد ما يبان لنا صاحب
تساءلنا وبعدين يا جماعة...؟ ايه المشكلة
قالوا ان المشكلة خلاص اتحلت....طائرة الأهلي دفعت 8.5 الف دولار واقلعت وتم الاتفاق على ان تدفع طائرة المشجعين نفس المبلغ وان تقلع بعدها بنصف ساعة
اللي حصل ان طائرة بعثة الاهلي غادرت المطار بعد ما دفعت الفلوس وعلى متنها السفير المصري في الكاميرون....وانتظرنا ان تقلع طائرتنا بعدها بلا جدوى
اتاري الكاميرونيين قرروا اننا ندفع 22.5 الف دولار وليس 8.5 الف دولار زي ما اتفقوا مع السفير قبل ما يغادر مع بعثة النادي الاهلي
يعني احنا اصبحنا في مهب الريح ولا يعلم مصيرنا الا الله عز وجل
طيب امتى المشكلة دي هتنحل؟؟؟؟طيب هنروح امتى؟ طيب احنا ممكن نستمر كدة للصبح؟طيب في مصر حد حاسس بينا؟
طيب لما المياه تخلص هنعمل ايه؟
دة في ناس كبار السن معانا.....وفي بنات كمان.....طيب احنا ممكن نستحمل لحد امتى؟
كم كان محزنا ومؤلما مشهد مغادرة طائرة بعثة النادي الاهلي لمطار جاروا في الوقت اللي بيفترش فيه جمهور الاهلي اللي زحف وراءهم للكاميرون ارض مطار جاروا في انتظار مصير مجهول ربنا وحده اللي يعلمه
وهنا بدأت الأزمة الحقيقية والسخط يزداد على حسن حمدي رئيس النادي الأهلي وعلى السفير المصري في الكاميرون اللي سافر مع بعثة الأهلي للقاهرة تاركا 120 مصري في الكاميرون يواجهون مخاطر السرقة والابتزاز والمصير المجهول
بدأ المخزون من مياه الشرب في الطائرة يتناقص مع ارتفاع درجة الحرارة وعدم وجود اية بوادر لأنفراج الأزمة
كان كل القلق على الناس اللي في مصر...اهالينا اللي منتظرين عودتنا...هل عرفوا ان الطائرة هتتأخر؟ هل عرفوا بالأزمة اساسا؟
هل حد في مصر بدأ التحرك لحل الأزمة ولا ايه اللي بيحصل؟
نسيت اوضح ان اي خط فودافون تجواله لا يعمل داخل مطار جاروا وانما بعد الخروج من المطار وان الخطوط التي تعمل داخل المطار هي تجوال موبينيل فقط
وبالتالي انقطعت صلة اغلبنا بالعالم الخارجي لا ارسال ولا استقبال...لا رسائل ولا مكالمات
اصبح الوضع كالأتي ناس محاصرة في مطار جاروا بالكاميرون ومطلوب منهم دفع 22 الف دولار مقابل اطلاق سراحهم والا هيفضلوا كدة لحد المبلغ ما يتم دفعه وسط قلق وخوف ورعب
سواء تم دفع المبلغ بعد ساعة او ساعتين او بعد يوم او يومين....هيندفع هيندفع


*ازمة مطار جاروا وافتراش الجماهير لأرض المطار

الناس في مصر بدأت تعرف ان في ازمة في مطار جاروا عن طريق مراسل قناة الحياة المتواجد معانا في المطار واللي اتصل بكابتن احمد شوبير وابلغه بالأزمة
بدأت رسائل تصل للموبايلات اللي شغالة في المطار (موبينيل)...من اهلهم في مصر بتقول ان شوبير اثار الازمة دي في برنامجه وانها في طريقها للحل عن طريق اتصالاته بالسفارة المصرية في الكاميرون (اللي سفيرها طار مع الفريق لمصر)..و قبلها اتصالاته بوزارة الخارجية
طلب كابتن شوبير من مراسله انه يعطي الموبايل للمشجعين المتواجدين بجواره كل واحد يعرف نفسه ويطمئن اهله عليه وكنت انا اول واحد.....والحقيقة بدل ما اطمئن اهلي كنت مهتم بشدة اني اصب جم غضبي على ادارة النادي الاهلي والسفير المصري في الكاميرون اللي كان كل همهم انهم يحلوا مشكلتهم هم على حساب الناس اللي تكبدوا عناء سفر شاق وظروف في منتهى الصعوبة وتركوهم مرميين على الارض في الكاميرون ورجعوا مصر يحتفلوا مع جمهورهم بانتصارهم العظيم بكأس افريقيا انما احنا هنا واللي سافرنا وتعبنا مشجعين درجة تانية لا اكثر
فضلنا محتجزين في مطار جاروا وسط انباء من مصر ان الدنيا مقلوبة وان شوبير قالب الدنيا في برنامجه من اجل اطلاق سراحنا...وان المشكلة في طريقها للحل بعد تدخل وزارة الخارجية والسفارة المصرية في الكاميرون عن طريق القائم بالاعمال واللي بعتوا خطاب ضمان لسلطات مطار جاروا بتسديد باقي ال 22 الف دولار بعد ان سدد قائد الطائرة 10 الاف دولار فقط هم اللي كانوا على الطائرة
واخيرا انفرجت الازمة حوالي الساعة 4 صباحا بعد ساعات عصيبة من القلق والترقب والخوف من المجهول
وصلنا مطار القاهرة الساعة 8.30 صباح الأثنين بعد رحلة عودة صامتة تماما
صمت من الارهاق و الغضب والضيق والتعب
انتهت رحلتنا مع الاهلي الى الكاميرون
رحلة لن تمحى من الذاكرة ابدا
رحلة شهدت كل الانفعالات.....الفرحة...القلق....الغضب.....النشوة...الانتصار....الاحباط.....الحماس
كل الانفعالات الانسانية الايجابية منها والسلبية مرت علينا في الرحلة دي
فعلا
هي رحلة المتعة والعذاب
______________________________________
ملحوظة:
لمشاهدة جميع الصور والفيديو الخاص بالرحلة
بالأضافة الى صور ابطال النادي الاهلي
على صفحتي الخاصة بموقع فيس بووك

52 comments:

  1. السلام عليكم ورحمة الله وبركاته

    حمد الله علي السلامه يا احمد وعقبال كل مره ان شاء الله

    عاوز اقولك ان العيب مش علي الاهلي ولا الاداره بتاعه

    العيب الاساسي علي السفير اللي ماهتمش انه يحل الا مشكلة طيارة اللاعبين وخلاص لانهم من وجهة نظره اهم من الجمهور مع ان الاتتنين جزء لا يتجزأ فالنادي الاهلي مابقاش اهلي الا بالجماهير دي اللي بتسانده في كل حته حتي بلاد الواق واق

    بس هو زيه زي وزارة الخارجيه كلها اللي بتعامل المواطنين المصريين في كل بلاد العالم بلامبالاه، طالما المواطن مش مهم يبقي خلاص يضرب دماغه في الحيط

    حل مشكلة الطياره التانيه وركبها وسافر وخلاص مش مهم الناس اللي محبوسين واللي ربنا لوحده يعلم كان ممكن يحصل لهم ايه

    عبت علي شوبير انه حمل النادي المسئوليه وخد الموضوع سبب انه يهاجم الاداره زي عادته بس لو بصينا بعين الحق هنلاقي ان
    العيب عيب سفاره وسفير ومن قبلهم وزاره بحاله بتعامل المصريين علي انهم حشرات يجب التخلص منها


    عموما حمد الله علي السلامه وعقبال ماتروح اليابان

    سلام

    ReplyDelete
  2. اه نسيت اقولك مبروك علي مقال الدستور بتاع امبارح

    مش انت برضو ؟؟؟

    :))))))))))

    ReplyDelete
  3. هوا اننننننت

    هههههههههههه

    معلش بقى عين الحساد جت فيكو وكله فدا الاهلى

    ولا ايه

    الف مبروك علينا كلنا

    ReplyDelete
  4. هو المنحوس منحوس برضو

    :):):):):)

    بس بجد الله ينور عليك انك اتكلمت بحرقة في البرنامج وبقيت تقولهم كده هلى الهوا

    يا اخي برضو المصريين مصريين ولو راحوا ا اخر الدنيا :):):)

    حمد لله على السلامة يا جميل

    ReplyDelete
  5. الاول طبعا حمدا لله علي السلامة


    تصدق


    و انا بقرأ البوست في الاخر كده اندمجت معاك و حسيت اني واحدة من المحتجزين
    حسيت اني اتخنقت و عايزة اعيط

    بس اللي مش فاهماه

    ليه

    ليه تدفعوا فلوس اصلا

    انتو كنتومخطوفين ولا ايه


    ولا ديه مصاريف عادية


    معلش اعذرني اصل مش فاهمة


    المهم


    الحمد لله ان ربنا فرج الازمة



    و رجعت تاني يوم


    لو علي تقدير الخارجية المصرية كانوا سابوكوا اسبوع كده علي ما يكونوا فاقوا و بعد كده يبدأوا اتصالاتهم المكثفة زي ما بيسموها



    الحمد لله

    ReplyDelete
  6. بص بقى موضوع الطيارة ده أنا من يوم ما اتولدت و شجعت الأهلى مش شفت الموقف ده قبل كده
    تقريبا يا أبو حميد العيب فيك أنت
    و المنحوس منحوس على رأيك
    ههههههههههه

    ReplyDelete
  7. رحله بجد جميله اووووووي

    ReplyDelete
  8. يااحمد ... دايما الحلو ما بيكملش ... فزت في المسابقه واتطعمت ضد الملاريا ورحت تشجع فريق الاهلي وفزنا ورجع الفريق بالكاس وقضيتم يوم كله انفعالات مختلفه .. عادي بقي انه يختم بنكد .. لان السفير مشي وسابكم - مش انتم احسن برضه من الدكتور بتاع السعوديه اللي عمالين يجلدوه ومش لاقي حد يقوله انت فين ... السفير مشي ورجع مع الكاس واكيد كان عارف ان اخر المتمه الكاميرونيين حيزهقوا منكم ويسيبوكم تمشوا ... الحلو ما يكلمش ... حد عبقري زمان قال كده وطلع عنده حق ... حمد الله علي السلامه وكل كاس والاهلاويه والمصريين بخير و... فيه مثل تاني برضه العبقري بتاع زمان قاله - قال علشان الورد ينسقي العليق - وعلشان النادي الاهلي والكاس ننسي السفير والكاميرون ونفتكر بس فرحتنا ... وبيب بيب اهلي

    ReplyDelete
  9. ايها الأخوه والأخوات اصحاب المدونات
    ندعوكم لزيارة مدونة البرنامج الأذاعى الأول من نوعه عن النت والمدونات من الأذاعه الرئيسيه لمصر والتعليق على ما نكتبه من موضوعات لتذاع فى حلقات البرنامج.
    البرنامج يذاع يوميا صباحا عدا الجمعه الساعه التاسعه وعشر دقائق.من أذاعة مصر الرئيسيه اى أذاعة البرنامج العام كما يمكن الستماع اليه من رابط فى موقعنا ونرجوا ان تسمحى لنا باذاعة مقتطفات من انتاجك
    والمدونه عنوانها
    http://netonradio.blogspot.com
    الموقع
    http://dear.to/cairo

    ReplyDelete
  10. مبروك العودة بالسلامة
    وعقبال ما تكسب رحلة لليابان

    ReplyDelete
  11. يا احمد يا جااااااااااامد
    مبروك يا ريس
    وصورتك مه ابو تريكه جامده جداً

    ReplyDelete
  12. لللمرو المبليون مبروك للأهلي
    سؤال هو ايه فايدة أس سفارة مصرية في أي مكان في العالم؟؟؟
    نشوفك في اليابان علي خير
    تحياتي

    ReplyDelete
  13. لورنس العرب22 November 2008 at 10:03

    وانا اقول انت اختفيت فين
    يا سيدي الف مبروك للأهلي- ولو ان دمي اتحرق بعد ما دخل الجول التاني للقطن
    اما بالنسبة للسفاره
    فأسأل اي حد مصري خارج مصر وهو يقولك ان سفارة مصر بخير

    ReplyDelete
  14. دكتور الف حمد للة على السلامة الحق يلا كورة بتقول جالك ازمة تنفس فى هجمة الشوط الاول لما القطن ضيع فرصة
    http://www.yallakora.com/arabic/news/Details.aspx?id=64215&Catid=1
    الف مبروك الكاس يا باشا وعقبال النهائى في اليابان ان شاء اللة

    ReplyDelete
  15. يا سيدي يا سيدي\


    حمدالله عالسلامة

    بس الاكيد

    انها مش هتتنسي

    ReplyDelete
  16. حمدالله علي سلامتك يااحمد

    أكيد رغم صعوبة الرحله والجو وكل حاجه بس كان وقت ممتع

    والاكيد بجد انك عمرك ماهتنساها وكل ماتفتكر اللي حصل انتم راجعين هترجع تضحك عليه

    (:

    ReplyDelete
  17. بلدياتى راح الكاميرون طب لو كنت اعرف بدرى شويه كنت وصيتك تجيبلى اسدين وفيل فى ايدك وانتا جاى
    الف الف مبروك
    والف لا كام الف زيهم حمدالله على السلامه
    وعبال ما تروح تحج
    وتلف العالم كله ..مش على كعوب رجليك يا ابو نيه وحشه.. لا بالطياره برضه انا مردلكش البهدله

    بجد حاسه بفرحتك ومبسوطالك قوى قوى يا احمد

    ReplyDelete
  18. شكلها الرحله وايد حلوه

    استمتعت بقراءه التفصيل

    وان شالله تتكرر:)

    ReplyDelete
  19. تصدق أحلى حاجه المغامره الأخيره دي


    الحمد لله على سلامتك

    ReplyDelete
  20. حمدلله ع السلامة يا اهلاوي يا جامد
    انت حققت معجزة بانك فزت في مسابقة بالمحمول
    :))))))))

    خالص تحياتي

    ReplyDelete
  21. اولا الحمد لله ان نحس المسابقات اتفك
    وبحاجة صعبة
    يعني المرة الجاية تدخل اي مسابقة وانت مطمن ومعاك كام بطيخة صيفي لزوم الانتخة

    تاني حاجة بقي هو الموبايل ده كان فيه كام؟؟
    2500 نقطة يا راجل
    يا تري دول 2500 دقيقة ؟؟؟؟؟

    المهم بقي حركة السفير حللوة

    المهم انكم رجعتم بالسلامة
    وناخد من هنا برده عظة انه يبقي معانا خط موبينيل وفودافون للطوارئ
    انا مش مهتمة بالكورة اوي بس طبعا تابعت الازمة
    وقلت ايه اللي خلاهم يسافروا دول كام ساعة ويرجعوا .. ما كانوا يفضلوا في بلدهم زي الناس ويتفرجوا في التليفزون
    المهم شوف المميزات
    نحس المسابقات اتفك
    سافرت
    اطعمت
    شجعت الاهلي
    مش ناقصك حاجة اهو

    تحياتي

    ReplyDelete
  22. هيا دى مصر ياريت تنور مدونتى المتواضعه هستنا زيارتك

    ReplyDelete
  23. عايز اقولك اني فضلت صاحي ومتوتر جدا وكنت قاعد بتفرج علي شوبير لانه كان متابع اوي اللي بيحصلكوا هناك وكان بيعمل اتصالات كتيره جدا عشان يشوفلكوا حل وفضل فاتح البرنامج لحد ما عرف ان الازمه هتتحل واتكلتوا علي الله
    وعموما حمد الله عالسلامه
    ومبروك للاهلي
    واوووووووووووووووووووه اهلاوووييي

    ReplyDelete
  24. خمسة فضفضة:
    هم تقريبا يا دكتورا بيعلموهم كدة في الخارجية
    ماهو مش معقول يكون صدفة ان جميع سفرائنا بالشكل دة
    اكيد اكيد
    دي تعليمات
    لو شفت اي مصري في الغربة...اسحله علشان تترقى
    بالنسبة لمقال الدستور
    الف الف شكر ...هو انا فعلا
    كلك ذوق
    تحياتي

    ReplyDelete
  25. انا حرة:
    هو انا بعينه
    واي حسوووود.....دي الرحلة كانت منقوق عليها نق مش طبيعي
    تحياااااتي

    ReplyDelete
  26. صاحب المضيفة:
    فعلا الشدائد هي اللي بتبين معادن الرجال
    ساعة الازمة كان ممكن تكلم اي حد بأي طريقة
    في اللحظاتا اللي زي دي فيش بروتوكولات ولا اي حاجة
    ربنا لا يعودها ازمة
    تحياتي

    ReplyDelete
  27. mony:
    دي تقدري تقولي عليها اتاوة بس معمولة بشكل شيك شوية تحت مسمى رسوم للمطار وتنمية موارد وحاجات من دي
    طبعا لو كنا اعتمدنا على الخارجية كان ممكن جدا اكون بأكتب البوست دة من ياوندي
    الحمد لله ربنا ستر
    تحياتي واحتراماتي

    ReplyDelete
  28. ahmed al khashab:
    انت بتقول فيها؟؟؟؟
    انا نفسي بقيت بأشك في نفسي
    الحمد لله على كل حال
    تحياتي

    ReplyDelete
  29. 2500 نقطه خبطه واحده !!!!!!!!!!!!!
    انا فعلا مستغرب
    انا ممكن اتفرج علي المباريات و لكن اني اعرف شكل لا عب من لاعب او غير كده من المعلومات فده صعب جدا عندي
    لكن اجمع معلومات عن تاريخ النادي كمان و احل اسئله ب2500 درجه فده غريب جدا عندي
    مبروك علي الرحله و كنت اتمني لك انها تكون اسعد من كده
    بس لو كان فيه مسابقه للاهلي للسفر لليابان
    اخسر فيها اللي وراك و اللي قدامك
    تحياتي

    ReplyDelete
  30. لا حول ولا قوة الا بالله قليل البخت يلقى العظم فى الزبادى
    اتفك نحس المسابقات جه نحس الطيياره اعتقد دة اول مرة تحصل
    المهم انه كان وشك حلو والاهلى رجع فايز
    حمدالله على سلامتك يابطل

    تحياتى لحضرتك

    ReplyDelete
  31. مولان:
    فعلا هي تجربة جديدة وفريدة من نوعها
    ودي احلى حاجة فيها
    تحياتي

    ReplyDelete
  32. اميرة بهي الدين:
    الحمد لله ان العين جت فينا وماجاتش في البطولة
    والحمد لله انها جت على قد كدة
    نورتيني يا اميرة
    تحياتي

    ReplyDelete
  33. انت تسأل والكومبيوتر يجيب:
    دعوة مقبولة
    الف شكر

    ReplyDelete
  34. قليل من التفكير:
    يسمع من بقك ربنا
    بس تفتكر دة ممكن يحصل؟؟؟؟
    يا ريــــــــــــــــــــــــــت
    تحياتي

    ReplyDelete
  35. محمد مفيد:
    الله يبارك فيك يا محمد
    يا ريتك كنت معانا
    بجد كنت هتنبسط
    بس قبل ازمة الطيارة طبعا
    تحياتي واحتراماتي

    ReplyDelete
  36. MICHEAL:
    للمرة المليون الله يبارك فيك يا مايكل
    اما بقى عن فايدة اي سفارة مصرية في العالم فهي التشريفة اللي بتترص في المطار لما رئيس الجمهورية يزور البلد دي
    بس هي دي وظيفتها الوحيدة
    تحياتي واحتراماتي

    ReplyDelete
  37. لورنس العرب:
    اعتقد ان السفير لو كان عمل حاجة غير كدة..كان ساعتها هيبقى في حاجة غلط
    تحياتي

    ReplyDelete
  38. رئيس جمهورية نفسي:
    اه..ما انا قرأتها فعلا
    بس الحمد لله مش انا..كان معانا في الرحلة احمد سمير تاني....وصيدلي برضة
    الحمد لله
    الف شكر
    تحياتي

    ReplyDelete
  39. دكتور حر:
    ودي حاجة تتنسي برضة يا دكتور
    لا ممكن ابداااااااااا

    ReplyDelete
  40. ESRAA:
    طبعا الحمد لله يا اسراء...ذكريات جميلة ورحلة جديدة ومختلفة وبطولة غالية وصحبة ممتعة
    فعلا يوم تاريخي في حياة الواحد
    صعب...بل مستحيل انه يتنسي
    تحياتي واحتراماتي

    ReplyDelete
  41. MAHASEN SABER:
    انا كنت ناوي يا محاسن ارجع بأسود ونمور ونسانيس وكل الحاجات الافريقية اللطيفة دي
    وكنت واخد معايا اقفاص علشان كدة
    بس للأسف لقيت الحاجات دي كلها خلصت قبل ما نوصل
    تحياتي

    ReplyDelete
  42. اقصوصة:
    هي فعلا كانت رحلة جميلة
    ان شاء الله تتكرر والبطولات تزيد
    تحياتي واحتراماتي

    ReplyDelete
  43. DR IBRAHIM SAMAHA:
    لا يا دكتور......هي دي سفارات مصر مش هي دي مصر
    تحياتي

    ReplyDelete
  44. MAKSOFA:
    هي فعلا مغامرة جميلة وماتتنسيش
    تحياتي واحتراماتي

    ReplyDelete
  45. ياسر حسين:
    ماهي فعلا سبب الفرحة هو المفاجأة
    عمرها ما حصلت لي ولا حصلت لحد اعرفه قبل كدة
    بس فعلا وبدون تحيز او مجاملة
    فودافون غير.......يا فنان
    تحياتي واحتراماتي

    ReplyDelete
  46. KOCHIA:
    لا 2500 نقطة مش 2500 جنيه
    النقط دي جت بعد ما اخدت 3 نقط عن كل اجابة صح ونقطة واحدة عن كل اجابة غلط
    فكانت النتيجة 2500 نقطة
    الحمد لله الرحلة في مجملها كانت ناجحة تماما
    زي مانتي قلتي
    سافرت واتفسحت واتطعمت وشجعت وكسبت بطولة
    واهم من كل حاجة......اتعرفت على دور سفاراتنا في الخارج...وعلى فكرة اللي شاف غير اللي سمع خاااااالص
    تحياتي

    ReplyDelete
  47. البنت المشمشية حلوة بس شقية:
    دة لازم ان شاء الله
    اعتبريني صديق دائم لمدونتك الجميلة
    تحياتي واحتراماتي

    ReplyDelete
  48. ZIKA:
    الحمد لله ان الازمة انتهت على خير
    الف شكر على اهتمامك
    صداقتك تسعدني
    تحيااااتي

    ReplyDelete
  49. ذو النون المصري:
    اصلك مش عاااارف
    الاهلي دة بالنسبة لي ادماااااااااااااااان
    وعلى رأي الفنانة هدى
    الأهلي اعز عليا من اهلي
    تحيااااتي

    ReplyDelete
  50. المستنصر بالله:
    الله يسلمك
    والحمد لله انها جت على قد كدة
    تقول ايه بقى في قلة البخت
    الاهلي بيسافر شمال وجنوب وشرق وغرب وعمر ما حصلت معاهم مشكلة زي دي
    تفتكر مين السبب؟؟؟؟
    ههههه
    تحياااتي

    ReplyDelete
  51. هههههههههههههههههههه

    المهم انك اتبسطت وسافرت ببلاش .........فينك يابرنس؟؟

    واحشنى جدا مع الاعتذار لخطيبتك يعنى هيهيهيهي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails