Sunday, 9 November 2008

اسئلة على كل لون

ليه رئيس اتحاد الاذاعة والتليفزيون عندنا هنا في مصر بيحمل لقب لواء؟
ايه علاقة الفن والفنانين والتليفزيون بالعسكر؟
====================
ليه حسام حسن و اخوه ابراهيم دايما عصبيين وزعلانين من الحياة؟ ليه دائما حاسين انهم مضطهدين؟
ليه دايما حاسين ان الناس كلها غيرانة منهم وبتعطل نجاحهم؟
=====================
ليه الوزير في مصر لما بيخرج من الوزارة ما بيرجعش تاني؟
=====================
ليه الفساتين السواريه اغلبها عارية؟ ايه علاقة دة بالسهر؟ يعني السهرة او الفرح مش هايكون حلو لو النس كلها متغطية؟
=====================
ليه السيارة الرسمية في مصر هي المرسيدس السوداء؟ يعني المسئول هيفقد هيبته لو ركب بي ام دبليو مثلا؟ اومال بقى لو ركب دايو لانوس يبقى الموقف ايه؟
======================
ليه ما بناكلش قطايف الا في رمضان بس؟ وهو احنا لو اكلناها برة رمضان هيحصل ايه؟
=====================
ليه الواد الشاطر او البنت الموس بيقى غالبا لابس نظارة؟؟ مالهاش علاقة بالقراءة على فكرة...انا اعرف ناس كتير بيقرءوا كتير جدا ومش لابسين لا نظارة ولا عدسات
=====================
ليه بنستغل نجاح  اي فيلم او مسلسل استغلال بشع ونصمم نعمل منه جزء تاني وتالت اللي غالبا بيفشلوا وبيغطي ىفشلهم على نجاح الجزء الاول؟
======================
ليه مواعيد المدارس بتبقى الصبح بدري؟ وهو يعني لو العيال راحت المدرسة الساعة 10 ولا 11 الصبح مش هيفهموا؟
احنا ليه بنروح الشغل الصبح؟ ليه مانروحش الشغل الظهر ولا العصر؟ دة حتى في اشغال واعمال مالهاش علاقة بالصبح خالص ومع ذلك مواعيدها 7 او 8 الصبح
======================
لو كانت ثورة 1952 ماقامتش...وكان بيحكمنا دلوقتي الملك احمد فؤاد الثاني....تفتكروا كان مين هيبقى ولي العهد؟
======================
هو احنا ليه لما بنخاف من الحسد بنقول خمسة وخميسة.....ليه مش ستة وستيتة او اربعة وربيعة مثلا؟
======================
لاعب كرة القدم لما بيطلع في برنامج منوعات او فني بيقى لابس حاجات عجيبة جدا..يعني تلاقيه لابس بودي وعليه ترتر او قميص مفتوح للنصف ومكرمش كرمشة غير عادية على اساس ان كدة شياكة بقى وموضة
هم ليه بيلبسوا كدة؟ وهو لو طلع لابس قميص عادي زينا كدة بيقلل من شياكته في حاجة؟
راجع طريقة لبس عمرو زكي بالتحديد
=========================
ليه اغلب علماء الدين مش لابسين دبلة على الرغم انهم متزوجون ويعولوا...هي الدبلة حرام ولا مكروهة؟
==========================
ليه دائما في الاعمال الدرامية بتبقى شخصية القبطي وفي ومخلص ومحترم ولا يخون صديقه على الاطلاق
هو مفيش قبطي شرير او خائن؟
اكيد في طبعا....زي ما في مسلم طيب ومسلم شرير ومسلم حرامي ومسلم امين
ليه لازم تبقى شخصية القبطي عليها هالة من نور
انا مش معترض على فكرة خاااااااالص....انا معترض على وضع خط تحت شخصية القبطي....انا معترض على عدم التعامل معاه عادي يعني..انا عايز القبطي يبقى في العمل الفني مصري مش شرط تعرف في المسلسل او الفيلم انه قبطي خالص خاصة انه لا توجد ضرورة درامية لذلك في اغلب الاعمال الفنية
راجع شخصية صبري عبد المنعم  (مينا)  في هيما وشخصية صلاح رشوان (رفقي عزيز) في الدالي
==============================
احنا ليه لما بنيجي نشتري علبة بيبسي بنقول عليها (كانز)...رغم ان كانز دي جمع مش مفرد
CANS
يعني بتروح تشتري واحدة بيبسي وبتقول للبائع عايز علب بيبسي
والمفروض تقول عايز كان بيبسي
PEPSI CAN
جربت مرة اقول للبائع كدة..بص لي بصة غريبة اني محدث نعمة بقى ومش فاهم....قالي عايز بيبسي كانز يعني؟
للأسف اضطريت اجاريه واقوله 
اااااااااه....عايز واحدة بيبسي كانز
============================
هي ليه التحية الرسمية للفنانين والفنانات هي البوس؟
ليه لما بيتقابلوا في مهرجان او اي مناسبة سعيدة او حزينة بيتحول الموضوع ل (مبوسة) رجالي في حريمي مفيش اي فرق
على الرغم ان الناس العادية اللي زينا كدة لما بيتقابلوا مع بعض في اي مناسبة....الرجال بيبوسوا بعض والسيدات بتبوس بعضها والعملية ما بتبقاش سداح مداح كدة........يا بختهم!!!!!!!
راجع اي افتتاح قديم لمهرجان القاهرة السينمائي.....او راجع يسرا في جنازتي احمد زكي ويوسف شاهين
===============================
ليه الاعمال الدرامية مصممة على تصوير بنت الليل في شكلها التقليدي القديم...ملابس قصيرة,غمزات بالعين,سيجارة بمبسم,راكنة على عمود؟
على فكرة دة كان زمااااااااااااااااااااااااااااااااااااااااااااااااااااااااااااااان
دلوقتي بنات الليل لهم شكل مختلف تماما....وبعدين ما بقوش بنات ليل بس....لا ونهار كمان
العاهرة موديل الالفية واحدة عادية جدا....لبسها عادي جدا...غير ملفتة على الاطلاق...ممكن كمان تكون عمرها ما دخنت سيجارة في حياتها ومالهاش في المخدرات كمان
ممكن جدا كمان تكون محجبة
راجع اي واحد صاحبك ليه في النظام دة وهو هيحكيلك حاجات تشيـــــــــــــــــب
===================================
ليه لما بييجي حد ينادي على حد مش عارفه بيناديه بلقب (كابتن)؟
على الرغم انه ممكن جدا يكون مش لابس شورت وفانلة ولا حتى تريننج سوت
وساعات بيكون النداء ب (باشمهندس).....طب اشمعنى؟
ليه مش يا دكتور مثلا...او يا فنان؟
====================================
ليه كل التيشيرتات والباديهات الرجالي والحريمي الشبابي والبناتي والاولادي والاطفالي بيبقى مكتوب عليها بالأنجليزي؟
ليه مافيش اي تي شيرت او بادي مكتوب عليه بالعربي؟
ليه مثلا التي شيرت بدل ما يكون مكتوب عليه
CUTE GIRL
يبقى مكتوب عليه
بنت حلوة
نفس المعنى....بس لو مكتوب بالعربي هيبقى تي شيرت كوميدي انما لو مكتوب بالانجليزي هيبقى تي شيرت شيك جدا
================================
مين اللي قال لعمرو مصطفى انه لازم يغني؟
حرام عليه بجد والله
انا لو اعرف الشخص دة اقتله واقتل عمرو واقتل نفسي
===============================
ليه العرب بيكتبوا حرف الجيم غين؟
يعني ليه الهمبورجر بيتحول ل (همبورغر)....وليه رونالد ريجان بيبقى (ريغان) في الصحف الخليجية...وايه اللي يخلي (مورجان فريمان)يبقى(مورغان فريمان)..حاجة عجيبة جدا؟
هو الجيم عورة اليومين دول ولا ايه؟
====================================
هم ليه الممثلات والمذيعات اغلبهن او 99% منهن مدخنات؟
ايه علاقة الشهرة بالتدخين؟ او ايه علاقة الشاشة بالتدخين؟
هي الممثلة ما تبقاش ممثلة الا لما تبقى مدخنة؟
===================================
مين العبقري اللوذعي صاحب الفكر اللولبي اللي ابتكر اعلانات السياحة بتاعة اليومين دول؟
اعلانات في منتهى السماجة والردالة والغلاسة......
معذور اي سائح ييجي مصر وعنده انطباع غاية في السلبية عن المصريين
ماهو لو كل المصريين بسماجة وغلاسة ابطال الاعلان دة...ولو كل السائحين بتناكة السائحين اللي في الاعلان دة
يبقى يستحسن ان احنا نلغي السياحة دي من مصر بلا وجع دماغ
===============================
امتى هتتطلع محطة تانية بتنافس نجوم اف ام؟
هو احتكار ولا ايه؟
وليه ماعندناش محطات اف ام كتير زي لبنان وزي الخليج واي دولة في العالم المحترم؟
ليه نجوم اف ام هي اللي محتكرة الفضاء الاذاعي؟
ياترى مين اللي وراهم؟
==================================
لولسة المصريين بيلبسوا طرابيش زي زمان.....ياترى كان هيبقى شكلها دلوقتي عامل ازاي؟
ياترى الموضة والروشنة كانت هتزحف لحد ما توصل للطربوش الاحمر؟
يعني كان ممكن نلاقي الشباب لابس طربوش فوشيا واخضر واصفر وكاروهات ومنقوش؟
ممكن نلاقي طربوش جينز وطربوش كتان؟
مش بعيد والله....ماحنا في زمن العجايب
الحمد لله ان الطرابيش انقرضت
====================================
كم عدد المناصب الرسمية والشعبية والشرفية والعملية والبيزنسية للكابتن الصحفي السياسي المناضل الثوري العروبي الوطني احمد شوبير؟
================================
ماهو مصير قضية هالة سرحان وبنات البيتزا..........؟ولو هي في الدرج يا ترى درج مين بالضبط؟ وياترى هتطلع من الدرج ولا خلصت كدة ولا ايه الحكاية؟
========================================
تحديث:
تم نشر مقتطفات من البوست دة بجريدة الدستور العدد الاسبوعي
الأربعاء 19 نوفمبر 2008

54 comments:

  1. فكرتني باغنية من غير ليه

    ReplyDelete
  2. أنا طبعا ماعرفش الاجابات عن الاسئله دي كلها

    يعني اشمعني رئيس التليفزيون يعني اللي مش عايزه يبقي لواء
    وهو كان ماال اللواء ومال اي حاجه تانيه بيمسكوها

    الوزير مش بيرجع لأنه غالبا بيظهره ملف اسود, او زعل الراس الكبيره, لأنه لو كان لسه ماشي معاهم كويس مكني اتغير أصلا

    علي فكره بقي مش كل الشطار بيلبصو نظارات
    (:

    أكيد ولي العهد كان هيكون ابن أحمد فؤاد حضرتك

    لأن الدبله بدعه ياباشا
    (:

    القبطي عندنا زي الافروأميرمان في الافلام الاجنبي بالظبط
    حاجه عشان تقول ان المجتمع زي الفل

    بيبوسو بعض عشان هم ناس متحرره ومش متخلفين ورجعين زينا

    عشان مفيش حرف غ في الانجليزي
    فبياخدو الجيم علي انه غ بس هم مش عارفين ينطقوه
    (:

    اديني درجه حلوه ربنا يخليك
    (:

    ReplyDelete
  3. يا خرابى يا احمد كل دى اسئلة ؟؟!!
    يدينا و يديك طولة العمر و تعرف الإجابات
    بس فكرتنى بالمتنبى
    و مبكيات مصر الضاحكة

    ReplyDelete
  4. هي الأسئلة كتير شوية هقولك بقي على اللي علق معايا
    انا متفق معاك في معظم ارائك خصوصا حوار السايحة جة بجد حاجة تكسف خصوصا ان اللي بيمثلو فيها اعلانات يعني احنا بنوريهم خيبتنا بنفنسا كان ممكن الأعلان يبقي احسن من كدة بكتير واكثر احتراما لكن حكومتنا غاوية تهزق نفسها وتحرجنا معاها
    انا شايف ان عمرو مصطفي حد صوته مختلف ومزيكته والحانه مختلفة وعنده حاجة جديدة عايز يقولها
    هو بجد حد كويس ( اسمعله اغنية انا نسيتك خلاص )
    اغنية هتعجبك
    تحياتي ليك يا جميل ودمت بخير

    ReplyDelete
  5. ايه يا عم احمد ده كل سؤال منهم محتاج لبوست لوحده

    ReplyDelete
  6. أنا هأجاوب على بعض الأسئلة
    وآسف على الاطالة مقدما
    س1:ليه رئيس اتحاد الاذاعة والتليفزيون عندنا هنا في مصر بيحمل لقب لواء؟

    ايه علاقة الفن والفنانين والتليفزيون بالعسكر؟

    ج1: تمام زي علاقة المزيكا باللواء الموسيقار محمد عبد الوهاب
    ---------------------------------------------
    س2:ليه حسام حسن و اخوه ابراهيم دايما عصبيين وزعلانين من الحياة؟ ليه دائما حاسين انهم مضطهدين؟
    ليه دايما حاسين ان الناس كلها غيرانة منهم وبتعطل نجاحهم؟
    ج2: ده مرض نفسي أسمه الوسواس القهري والشعور بالاضطهاد
    ----------------------------------------------
    س3:ليه الوزير في مصر لما بيخرج من الوزارة ما بيرجعش تاني؟
    ج3: لأ فيه وزارء طلعوا ورجعوا في التشكيل الوزاري الجديد
    -----------------------------------------------
    س4: ليه الفساتين السواريه اغلبها عارية؟ ايه علاقة دة بالسهر؟ يعني السهرة او الفرح مش هايكون حلو لو الناس كلها متغطية؟
    ج4: لأن غالبا قاعات الافراح بتكون مزدحمة والجو بيكون حر فالهدوم الخفيفة بتكون مريحة خصوصا لو حد قام رقص
    ------------------------------------------------
    س5:ليه ما بناكلش قطايف الا في رمضان بس؟ وهو احنا لو اكلناها برة رمضان هيحصل ايه؟
    ج5: تمام زي الفوازير التلفزيونية مش بتتذاع غير في رمضان والمسلسلات الجديدة كذلك ، مع انهم لو ذاعوا الحاجات دي طول السنة مش هيحصل حاجة
    -------------------------------------------------
    س6:
    ليه بنستغل نجاح اي فيلم او مسلسل استغلال بشع ونصمم نعمل منه جزء تاني وتالت اللي غالبا بيفشلوا وبيغطي ىفشلهم على نجاح الجزء الاول؟
    ج6: عملا بمبدأ اللي تعرفه احسن من اللي متعرفهوش وأهي سبوبة للعاملين بالمسلسل
    ----------------------------------------------
    س7:لو كانت ثورة 1952 ماقامتش...وكان بيحكمنا دلوقتي الملك احمد فؤاد الثاني....تفتكروا كان مين هيبقى ولي العهد؟
    ج7: ولي العهد هيكون أحمد فؤاد الثالث
    -----------------------------------------------
    :س8
    هو احنا ليه لما بنخاف من الحسد بنقول خمسة وخميسة.....ليه مش ستة وستيتة او اربعة وربيعة مثلا؟
    ج8: لأن كف البني آدم فيه خمس صوابع مش ستة ولا أربعة
    ------------------------------------------------
    س9:ليه دائما في الاعمال الدرامية بتبقى شخصية القبطي وفي ومخلص ومحترم ولا يخون صديقه على الاطلاق
    هو مفيش قبطي شرير او خائن؟
    ج9: فيه .. راجع فيلم عمارة يعقوبيان وفيلم حسن ومرقص هتلاقي النماذج دي
    -----------------------------------------------
    س10:هي ليه التحية الرسمية للفنانين والفنانات هي البوس؟
    ج10: بلاش حقد بقى .. الناس بتحب بعض ومفيش غيرة ولا حقد بينهم ولا حد بيخطف دور من التاني ولا بيشتموا بعض على صفحات الجرايد ولا حاجة خالص:)
    -----------------------------------------------
    س11:مين اللي قال لعمرو مصطفى انه لازم يغني؟
    ج11: عمرو مصطفى الملحن هو اللي قال لعمرو مصطفى أنه يغني .. أذواق يا دكتور .. أنا شخصيا بأحب أسمعه
    -------------------------------------------------
    بصراحة الموضوع عجبني والاسئلة بتستفز الواحد أنه يدور على اجاباتها
    خالص تحياتي

    ReplyDelete
  7. أنا مش هاجاوب على الأسئلة دى هنا
    أنا هاجاوب عليها فى دماغى وأقعد أفكر فيها كويس جداً

    ReplyDelete
  8. شايل ومتدرب على حمل اللواء او البدل عادى يعنى ومشيها بدل رجالى مش رقاصات ههههههه
    ====================
    علشان شبه بعض وبهديه لهم اغنيه يا حلاوتك يا جمالك
    =====================
    لو رجع هيقلب الحوادث وممكن يخبط حد فى طريقه هههههههه
    =====================
    علشان دى الحقيقه العاريه ههههههههههه
    =====================
    بتيجى لهم هدايا ومستر بينز هو اللى بيبعتها يا ريس لا على فكره فيه فولفو انما بى ام عامه الشعب ركباها هههه
    ======================
    علشان الراجل الرخم مش بيعملها غير فى رمضان
    =====================
    علشان يبقى مثقف وشايف مستقبله كويس هههههههه لا بجد للحفاظ على النظر من انه يقل
    =====================
    لوهو ليه يعنى ملا واحد يفتح محل كشرى وينجح تلاقى اللى جنبه فتح رزق الهبل على المجانين يا حج
    ======================
    علشان لو مروحناش بدرى المدير هيضايق مال يعكنن على مين لاااا بجد الصحيان بدرى فيه فوائد كتير يعنى انا الحمد لله بقالى يومين اساسا منمتش ومهيسه على الاخر ههههههههه
    ======================
    ولى العهد هيثم احمد فؤاد
    ======================
    كبه كده مش عارفه دى
    ======================
    انا بشجع الاسماعيلى وكلم بيلبسوا برتقال فمش عارفه يعنى القشره واحده هههههههههه
    =========================
    لا علشان يظبطوا ههههه
    لا عيب بجد فيه رجاله بتضايق من الدبله
    ==========================
    خوووووووووووف مش اكتر من الفتنه ا
    ==============================
    لا انا بقول كان على فكره ولو حد تنح بريح دماغى وامد ايدى اخدها
    يب ليه يا ابنى بيقفوا فى المواقف فى المحافظات يقولك مصر ميقولش القاهرة ليه هههههههههه
    ============================
    بوس هادف هههههههههه
    ===============================
    ايه واحد صحبك ماشى همشيها بس معنديش اجابه ههههههههه
    ===================================
    انا بقولها تريقه
    ====================================
    مفيش حاجه اسمها بنت حلوة
    على فكره اللغه الانجليزيه تحديدا ارق اللغه فى التعبيرات احنا لغه الضااااد يا حج
    ================================
    والله ما انا يا بيه
    ===============================
    اه ولازم محرم للحرف ده
    ====================================
    امممممممممم علشان مش عارف
    ===================================

    انت هتقر عليه
    ================================
    كلواالبيتزا خلاص ده الوليد يا عمنااااااا

    على فكره انت رغاى اوى وزهقتنى مش هعلق عندك عشر بوستات ههههههه

    ReplyDelete
  9. احمد انت ليك اسئله غريبه جدااااااا

    يا ابنى دع الخلق للخالق ..هههههه

    بلاش تسأل نفسك بأسئله مالهاش اساسا غير اجابات واحدة ..

    اللى عاجبنا هنعمله .. بأى شكل وفى اى وقت

    شكرا لك على جمال اسئلتك :)

    ReplyDelete
  10. فلتسمح لى بهذه المساحة الإعلانية

    اذا أردت ان تكتشف من وراء مقتل سعاد حسنى ، فالاجابة لدى فى المدونة

    سري للغاية
    www.toptop-secret.blogspot.com

    ReplyDelete
  11. ليه العرب بيكتبوا حرف الجيم غين؟
    يعني ليه الهمبورجر بيتحول ل (همبورغر)....وليه رونالد ريجان بيبقى (ريغان) في الصحف الخليجية...وايه اللي يخلي (مورجان فريمان)يبقى(مورغان فريمان)..حاجة عجيبة جدا؟
    هو الجيم عورة اليومين دول ولا ايه؟
    ================================
    عشان المفروض فى اللغة العربية اصلا الجيم هى الجيم المعطشة ،حرف الجيم اللى احنا بننطقه ده مالوش وجود اصلا فى اللغة ، فعشان يفرقوا بين الاتنين بيكتبوا حرف غين مكان اللى مش معطشة ، و ده فى الكلمات المترجمة

    ReplyDelete
  12. انا جيت
    و لما جيت لاقيت فيه امتحان مكون من يجي 100 سؤال
    حروح اذاكر شوية و ارجع اجاوب


    ايه يا عم كل الاسئلة جيه
    ده ياعيني تلاقيك مش بتنام بلليل من كتر الاسئلة اللى دماغك
    تصدق
    ديه اسئلة تفرس بجد
    هههههههههههههههههه

    ReplyDelete
  13. متهيالى ان هو ده الفكر الجديد لمستقبل بلدنا
    ان العسكر يمسكوا كل حاجة فى البلد



    مش عارفة صحيح
    ودايما عصبيين جدا
    وبيغلطوا كتير ويقلوا ادبهم
    وتلاقى الجمهور والمعلقين وكل الناس بتغفرلهم غلطهم ده بحجة انهم معروفين انهم عصبين
    فعادى بقى يقلوا ادبهم براحتهم



    وعايزه يرجع تانى ليه
    ماكفاية عليه كدة


    العرى عموما بيخلى شكل البنت احلى ومزة اكتر
    يعنى اقولك على حاجة
    فيه غلط كبير اوى بيقع فيه اغلب الشباب والرجالة المتجوزين
    انهم يقولوا عايزين واحدة حلوة ومزة وجامدة زى هيفاء وهبى مثلا
    اوك عايز مراتك تبقى حلوة كدة
    اديها فلوس خليها تروح تعمل شعرها ومكياج وتلبس فستان سواريه عريان وضيق
    هتلاقى مراتك احلى الف مرة من هيفاء واليسا
    وساعتها الواحد يحمد ربنا ان مراته محجبة او محتشمة فى لبسها




    طب لو ركبوا 128 هيروحوا النار



    قول لبتوع القطايف يبيعوا قطايف فى غير رمضان
    هتلاقينا كلنا بناكل قطايف




    مالهاش علاقة
    انا بلبس نضارة مؤخرا
    وده مالهوش علاقة بالشطارة
    ده ليه علاقة بضعف النظر بعيد عنك


    مش عارفة
    مش عارفة
    مش عارفة
    مش عارفة
    مش عارفة
    مش عارفة


    وراجع كمان سميحة ايوب فى مسلسل اوان الورد


    بحكم التعود
    وللاسف الغير بيجبرنا فى بعض الاوقات اننا نتكلم غلط
    لانهم بيستنكروا الصح اللى بنعمله
    واحنا بطبيعتنا بنتكسف من الاستنكار فبنضطر اننا نجريهم فى غلطهم



    مالهاش علاقة بالفنانين
    فيه ناس كتير جدا بقى حكاية البوس دى عندهم عادى
    متهيالى حسب البيئة اللى اتربوا فيها





    ايوة انا مرة شوفت بنت ليل منقبة


    مش عارفة
    مش عارفة



    مين عمرو مصطفى ؟



    مش عارفة
    مش عارفة
    مش عارفة
    مش عارفة
    مش عارفة



    ايوة فعلا احمد شوبير بقى مرطرط اوى الايام دى


    مش عارفة


    بس خلاص
    انا جاوبت على الاسئلة اللى اعرفها

    بس دى اسئلة كتير اوى يا احمد



    سلام
    اختك خيخة

    ReplyDelete
  14. أسئله في محلها...وبجد تضايق أي حد

    ReplyDelete
  15. يانهار ابيض

    كل دى اسئله

    ممكن احل الامتحان فورقه وابقى اجى انقشه فكومنت بعد شويه يامستر

    بس اللى ضحكنى اوى سؤالك عن عمرو مصطفى انا بكره البنى ادم دا بشكل

    ص2وته بيجيبلى العصبى تحس انه بيغنى بس عنده اللحميه او مناخيره مسدوده او حاجه كدا

    بس هوا ملحن جامد

    ReplyDelete
  16. لا يا عم انا مش لاعبه
    اسئلة وقطايف وجيم وغين
    الله يديلنا طول العمر

    ReplyDelete
  17. هما بصراحة شوية اسئلة تحفة

    هما مش عايزين اجابات اكتر من انك

    تتامل فيهم شوية كدة

    وتضحك

    ReplyDelete
  18. اسئلة فعلا محتاجه لاجابات مش اجابة واحده بس

    ربنا يعين فعلا


    شكرا لدقة ملاحظتك الجميلة دي

    كل التحية

    ReplyDelete
  19. بصراحه موش لاقيه إجابات لبعض الأسئلة المطروحه


    إلا أن البوست رصد هائل لثقافة وممارسات مجتمع

    ReplyDelete
  20. بص بجد موضوع الكنافه والقطايف ده
    قرب يبقى مختفى حتى فى رمضان
    نتيجه للغلاء الفاحش
    والفانين ياسيدى العجيب انهم بيبوسوا تلات بوسات سونه
    حاجه تنقط

    تحياتى

    ReplyDelete
  21. ههههههههههههه

    تقريبا هو ده التعليق اللي ظاهر عليا طول مانا بقرأ البوست


    عماله اقول

    اه صحيح,ليه؟؟

    هههههههههههههههههه

    هي ليها اجابات طبعا


    بس اعتقد انك اكيد عارفها

    بس السؤال هنا للاعتراض

    يعني كأك بتقول اشمعني

    ReplyDelete
  22. ماما امولة:
    للأسف هو دة الرد المناسب
    من غير ليه
    تحياتي واحتراماتي

    ReplyDelete
  23. esraa:
    رغم انك طنشتي اسلة كتير وانتي بتجاوبي
    بس برضة
    ممكن اديكي درجة النجاح
    يالا
    طلعتي بمقبول

    ReplyDelete
  24. فاتيما:
    ولسة الحياة المصرية يا فاتيما
    مليانة اسلة مالهاش اي اجابة منطقية
    تحيااتي

    ReplyDelete
  25. mostafa rayan:
    ماهو اكيد يا مصطفى في ناس بتتحرش بالسائحات
    بس هل دول هم الاغلبية؟
    بالضبط زي لما يصور السياحة في مصر انها واحدة بترقص
    بقى هي دي مصر؟؟
    اعلانات غاية في السطحية والاستفزاز
    بالنسبة لعمرو مصطفى يا بخته انك معجب بيه...من حظه والله
    تحيااااتي

    ReplyDelete
  26. السلام عليكم و رحمة الله و بركاته

    هو ليه ميرو دخلت هنا موش عارفه والله انا لقيت الصدفة بعتتني بس ااااااااااه
    افتكرت

    عرفت ليه دخلت هنا عشان اقول كلمة واحده بس برافوووووووووووووووووووو

    اللي يفك ويحط التساؤلات دي يبقى بجد عاقل جدا ومنطقي جدا ودماغه موزونه اوي

    عشان ارد على كل تساؤل هحتاج مدونات اكتب فيها بس بجد احييك على البوست ده

    اول مرة أٌرأ بوست بالشكل ده وموش توقعت بجد يكون كده
    تساؤلات فعلا منطقية جدا وعجبتني جداااااا وكلها اهم من بعض
    ربنا يبارك فيك

    برافووووو حقيقي

    ليه بنقول برافو وموث بنقول ممتاز او جيد او شطور هههههههههه

    هقولك ليه لأن برافو بالنسبة لي تعني إنك فقت في التفكير كل حاجه
    وبجد رائع وبرااااااااافو
    في رعاية الله

    ReplyDelete
  27. اخت بالك من الجزيرة كانت بتكتب بكين بجين فى الاولومبياد الأخيرة

    أسئلة عويصة فعلا بالذات السؤال بتاع أحمد شوبير

    والسؤال الاول واهم سؤال السؤال بتاع الكانز وانا باه هاقول عليه كانز مستحيل أقول لواحد او حد يقولي كان من غير ما يحصل الآتي انى أبرق ووداني تطرشق لبره ولساني يدلدل قدام مني شبرين

    وماكلش دعوة بالفانونين فى المهرجان احياة عنيك شفت فسات نادية الجوندي ماتفكرنيش يا أبو حميد بالله عليك

    علشان لو كنت شفته قبل 2/8 كان هايتغير حاجات كتير قوي :))

    الحمد لله ان مدامتي مش عارفة ايه هي المدونات فبالتالي

    مش هاتقرأ التعليق ده

    ReplyDelete
  28. محمد مفيد:
    والله فكرة يا محمد
    ممكن نفك البوست دة بييجي 20 بوست
    تحياااتي

    ReplyDelete
  29. ياسر حسين:
    مش عارف ليه يا استاذ ياسر كل ما الاقي راجل عسكري حتى لو كان متقاعد في منصب مدني....بأكره نفسي
    اما بالنسبة لحسام واخوه ففعلا حاجة عجيبة...على طول غضبانين من الناس
    مش عارف ليه؟
    بالمسبة للفساتين السواريه وانها علشان تساعد ع الرقص يبقى من باب اولى ان الرجال يحضروا الافراح دي بالشورت
    اعتقد ان احمد فؤاد الثاني كان هيسمي ابنه محمد فاروق الثاني على اعتبار ان ابوه فاروق سماه فؤاد على اسم جده
    واضح ان الاسلة عجيبة فعلا واجاباتها بتدعو للتأمل
    تحياتي

    ReplyDelete
  30. قلب مصري:
    نصيحة بلاش
    علشان هي اسلة اغلبها مالهاش اجابات منطقية
    ممكن تجاوبها بجملة واحدة
    يبقى انت اكيد في مصر
    تحياتي واحتراماتي

    ReplyDelete
  31. appy:
    دة انتي بأجاباتك اوحيتي ليا بأسلة جديدة
    حرام عليكي هو انا ناقص؟
    كفاية النمل اللي عمال يمشي في دماغي وخلااها منملة
    ربنا يسامحك
    تحياتي واحتراماتي

    ReplyDelete
  32. ضي القمر:
    الف شكر طبعا على الكلام الجميل دة
    بس انا كان نفسي اعرف اجاباتك عن بعض الاسلة العجيبة دي
    على فكرة الاجابات بتلاقيها في احيان كتير بتفتح المجال لأسلة تانية
    تحياتي واحتراماتي

    ReplyDelete
  33. free egypt:
    على الرغم اني مش شاغل نفسي قوي بمعرفة من قتل سعاد حسني
    الا اني هحاول ادخل واشوف
    شكرا للدعوة
    تحياتي واحتراماتي

    ReplyDelete
  34. يا نهار أبيض ..هو أنا كل ما أخش مدونة اليومين دول الاقي أسئلة تعجيييز كده
    :)
    حجاوب علي كام واحد منهم عشان ضغطي بيعلي بسرعة
    حسام وابراهيم عندهم طبع العصبية من زمان وكانوا ممكن يطلعوه في الملعب إنما بعد ما بطلوا دلوقتي حيطلعوه علي الحكام من كرسي المدرب
    مالك بقي بسيادة اللواء..ما هما الخير والبركة
    :)
    بيبسي كانز بتغظني جدا
    الفنانين ده ُعرف عندهم كده زي ما عندنا عرف البوس بين الرجالةو بس وبين الستات بس ولو أني لا أحبذ البوس مطلقا لانه بينقل عدوي بحاجات كتير الواحد في غني عنها وبعدين أنا محبش ابوس ولد زيي حتي ولو كان أنتيخي لاني شايف ان ده منظر منفر وطبعا متفهمنيش غلط لاني لم ابوس بنات من قبل
    :)
    بالنسبة للثورة فأكيد كان حيكمنا ولي العهد للملك أحمد فؤاد بس علي الأقل كنا حنبقي عارفين انها ملكية مش زي دلوقتي جمهورية بالإسم
    موضوع مسلسلات الأجزاء اغلبه بيفشل بس فيه استثناءات زي ليالي الحليمة ورافت الهجان ويوميات ونيس مع الإعتراف ان الجزء الخامس في ونيس والحليمة كان أقل الأجزاء
    التي شيرتات موضة والسلام واحنا بنموت في الهيافة
    كفاية كده
    ومبرووووووك للأهلي

    ReplyDelete
  35. بسم الله ما شاء الله
    ايه ده يا بلديات انتا فيلسوف كبير بئه وانا مكنتش مركزه فى الموضوع ده

    دى رؤيا فلسفيه شرقاويه عميقه للامور
    الله ينور
    بس لذيذ موضوع المسئول والمرسيدس والبى ام مالها نصر 128 ولاا العجله مش زى وزراءاليابان

    بس بجد يا سمير من اجمل والذ ما قريت ليك

    واسفه على التاخير يا بلديات انا عارفه البيت بيتى بئه

    ReplyDelete
  36. ايه يا عم دي ولا اسئلة الثانويه العامه
    وبعدين دي مش اسئله ليها اجبات
    دي زي ما كانوا بيقولولنا في حصص العربي
    استفهام غرضه الاستنكار
    :D
    تحياتي

    ReplyDelete
  37. حقيقى انت معاكحق ف تساؤلات كتيرة بس من فضلك امسح سؤال شوبير لان لولا اتصالاتة وحواراتة كان زما ن ناس صحابناانضموا لقبائل الهوتو والتوتسى

    ReplyDelete
  38. shams el kharif:
    معلومة جديدة بالنسبة لي
    الف الف شكر
    تحياتي

    ReplyDelete
  39. واحدة مفروسة:
    ماهو لو ماكنتش تفرس يا مفروسة ماكنتش عملت لها بوست مخصوص
    تحياتي

    ReplyDelete
  40. بنت خيخة واي كلام:
    يا لهوووووووووووووووي انا احلم
    بنت خيخة بتعلق عندي ع المدونة
    يا للهول ياللهول
    انا من كتر الذهول مش هأعلق
    تحيااااتي

    ReplyDelete
  41. ايما ام البنين:
    بس للاسف كتير منها بلا سبب وبلا اجابات
    تحيااااتي

    ReplyDelete
  42. انا حرة:
    كنت عملت بوست زمان عن اللي مابيرضاش بحاله وباصص لغيره رغم ان اللي في ايده قيم فعلا
    وكان منهم عمرو مصطفى
    اللي ما بصش لانه ملحن جامد جدا وطمع في شهرة المطربين
    بس حقيقي هو مستفز جدااااااااا
    تحيااااااتي

    ReplyDelete
  43. desert cat:
    وما خفي كان اعظم كمان
    ولسة الدماغ مليانة اسئلة من كل الالوان
    تحيااااتي

    ReplyDelete
  44. كراكيب عادل:
    بس في عدد كبير منهم هتضحك بس ضحك كالبكاء
    شر البلية ما يضحك
    تحيااااتي

    ReplyDelete
  45. صاحب المضيفة:
    الف شكر لتعليقك الجميل
    دمت بكل خير
    تحياااااتي

    ReplyDelete
  46. كباريه:
    ولسة المجتمع مليء بالسلبيات المضحكة والمبكية
    تحيااااتي

    ReplyDelete
  47. nody_1987:
    هي جت ع القطايف والكنافة
    دة احنا نفسنا قربنا نختفي
    تحياتي

    ReplyDelete
  48. mony:
    طبعا الاسئلة اغلبها استنكارية وليست استفهامية
    بمعنى هو اشمعنى كدة
    وبالتالي ليس المطلوب اجابات بقدر ماهو مطلوب التأمل والتفكر في الظواهر العجيبة اللي في الاسئلة دي
    تحياتي

    ReplyDelete
  49. mero-mooory:
    الف الف شكر على الكلام الجامد دة اللي انا اكيد ما استهلوش
    انتي بجد اخجلتي تواضعي
    الف شكر
    تحياااتي

    ReplyDelete
  50. monzer:
    اللي انت بتقوله دة يا منذر قاله كل المتزوجون قبلك وهيقوله كل المتزوجين بعدك
    بس للأسف
    ان حد يتعظ؟؟؟؟؟؟
    ابداااااااااااااااا
    تحياااااتي

    ReplyDelete
  51. micheal:
    طيب وكفاية كدة ليه؟
    متعنا بتعليقاتك متعنا يا عم مايكل
    بقى ما بتحبش تبوس اولاد
    ماشي يا سيدي
    الف مبروك للاهلي وعقبال كل بطولة ان شاء الله
    تحياتي

    ReplyDelete
  52. mahasen saber:
    انتي اول مرة تعرفي يا محاسن اني فيلسوف ولا ايه؟
    لالالالا
    دة انا مش سهل...دي الدماغ دي دماغ شرقاوية متكلفة
    البيت بيتك طبعا بس ما تبقيش تتأخري في التعليقات كدة علشان ما ادكيش مخالفة
    تحيااااتي

    ReplyDelete
  53. zika:
    هو دة بالضبط المقصود
    استنكار لأوضاعنا السلبية
    تحياتي واحتراماتي

    ReplyDelete
  54. salamu alykom .......ala feekra majnoon beys3al majnaeen ........bas ra7 ajaweb ala kol al3as3ela .......lama al3eee ajwebah .............nice i like it ....thanx

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails