Saturday, 1 November 2008

اسمعونــــــــــــــــــــــــــــــي........افهمونـــــــــــــــــــــــــي


انتم ليه كلكم عليا؟
ليه ماحدش منكم راضي يسمع ويفهم؟
ليه مصممين تجعلوني كبس الفدا لأخطاء مجتمع من اوله لأخره غلط؟
ليه مصممين تتعاملوا معايا بأعتباري حرامي في مولد؟
ليه كل واحد لازم يوجب ويديني قلمين؟
غلطااااااااان......؟ اه طبعا انا غلطان ماقدرش انكر
بس هل انا لوحدي اللي غلطان؟
لااااااااااااااااااااااااااااااااااااااااااااااااااااا والف لا
كلنا غلطانين...كلنا بلا استثناء
ذنبي ايه اني اوصل ل 27 سنة ومش عارف اتجوز؟
ايه غلطتي اني اشتغل سواق على عربية نص نقل وانا متعلم؟
ايه ذنبي وكل المؤثرات الجنسية دي موجودة حواليا؟
مين اللي سمح بكل قنوات الاغاني والكليبات المثيرة دي انها تبث ليل نهار؟
مين المسئول ان البنات تنزل الشارع بالملابس دي؟
كل اب وام مسئول عن مأساتي.....كل واحد سايب بنته او مراته او اخته او خطيبته تنزل الشارع بالشكل دة هو المحرض الأساسي للجريمة اللي انا متهم بيها
اه طبعا انا قليل الأدب
لكن مين المسئول عن سوء تربيتي؟
مين اصلا كان ممكن يهتم انه يربيني في مجتمع الكل بياكل فيه بعضه بلا رحمة......مين هيسأل عن تربيتي في مجتمع الاغنياء يزدادون ثراءا والفقراء يزدادون فقرا والنساء تزداد اغراءا والرجال يزدادون شهوة؟
انا مش متعود على كدة
انا عمري ما عملت كدة ؟
ليه من اول غلطة مصممين تحاكموني على اخطاءكم كلها؟
ليه قررتم تحاكموا بتوع وسط البلد وبتوع شارع جامعة الدول في شخصي الضعيف؟
دة ربنا بيغفر ليه ماحدش منكم عايز يغفر؟
ليه عايزين تتهموني بارتكاب كل حالات الاغتصاب اللي بتحصل يوميا في مصر؟
ليه خلتوني مسئول عن خطايا الشباب والبنات فيكي يا مصر؟
مديت ايدي؟؟؟
اه..................تستاهل قطعها
بس اكتر من كدة ماعملتش
ليه كل عقدكم المجتمعية والانثوية مصممين تحلوها بانهاء حياتي وتدمير مستقبلي؟
سجني هو اللي هيصلح اخلاق الشباب؟
ضياع مستقبلي هو اللي هيمنع التحرش والمعاكسات في الشارع؟
الحكم دة هيعمل مني عبرة؟
كان الأعدام منع جرايم القتل اللي بترتكب يوميا
اذا كنت انا ارتكبت غلطة واحدة في حقها
فعفوا انتم ترتكبون جرائم في حقي
سمعتي اتدمرت
مستقبلي ضاع
اصبحت اعيش بماضي ملوث وحاضر مشوه وبلا مستقبل
وكل دة ثمن غلطة واحدة
ياله من ثمن باهظ
حسبي الله ونعم الوكيل
**********************************************
مجرد فضفضة تخيلية لشريف جبريل المتهم بالتحرش بنهى رشدي المخرجة في يونيو الماضي واللي اتحولت لبطلة وتحولت قضيتها لقضية رأي عام
لم يسمع احد لشريف جبريل وتحولنا جميعا لجلادين
محاولة.....مجرد محاولة لتخيل ما يدور في ذهن الشاب دة
لست معه او ضده
ولكني لا انكر اني مستاء من تحويل قضية لقضية راي عام وتحميل شخص واحد ضعيف مسئولية اخطاء مجتمع مليء بالأخطاء والخطايا
اكيد هو اخطأ؟
بس اكيد برضة العقاب كان قاسي قوي....قاسي بجد
ملحوظة
نهى رشدي اسرائيلية طبقاا" للمصري اليوم" 30 اكتوبر 2008
ياترى المعلومة دي هتغير من موقف جماعات المرأة ودعاة الحرية في شيء...ياترى موقف جمعيات حقوق المرأة هيتغير من القضية لمجرد ان نهى رشدي اسرائيلية؟
محاميتها تخلت عنها فور علمها بالمعلومة دي وقررت ان تقف بجانب المتهم شريف جبريل في الاستئناف
هي القضية كانت ضد التحرش بشكل عام ولا ضد التحرش بالمصريات بس ..........انما غير كدة يجوز التحرش بهن
يعني لو نهى رشدي كانت مصرية يبقى شريف جبريل دة يستحق الشنق.....انما بما انها طلعت اسرائيلية تبقى هي اللي تستاهل التحرش واكتر من كدة كمان؟
فعلا منتهى العبث
*الصورة لوالدة المتهم شريف جبريل عقب النطق بالحكم بسجن ابنها 3 سنوات

64 comments:

  1. ولله شوف، كله كوم وانها طلعت اسرائيليه كوم، انا لما قرأت الخبر ده فضلت أضحك لعاية لما كنت هاموت، مش عارف رد فعل الناس هيكون ايه، بعض الفلاسفه قالوا وايه يعني اسرائيليه المهم الجريمه نفسها، وطبعا ده كلام فارغ ومتخلف ، لأن لو هي اسرائيليه تروح في ستين ألف داهيه، لكن السؤال اللي مش لائي له اجابه ازاي امن الدوله اللي عارف اني بصلي في الجامع فاتت عليه ان البت دي اسرائيليه؟؟؟
    ولو كان عارف- وهوفعلا عارف- سكت ليه؟
    طيب بلاش دي
    ازاي القاضي ووكيل النيابه اللي حققوا في الموضوع سكتوا؟
    لم يقول أحد لها طلعي البطاقه مثلا؟

    عندك اجابات عن الاسئله دي؟

    وياترى رد فعل البنات اللي اخدوها قدوه هو ايه؟
    زماذا لو نجحت المحاميه اللي قالت عليها انها مدمنة القواضي اللي من النوع ده عشان تحقق مكاسب في اناه تجيب للراجل براءه- ايه اللي هايحصل؟

    ReplyDelete
  2. والله يا احمد اللي بيحصل عموما بئا حاجة تجيب مغص واكتئاب وحرقة دم والواحد زهق بجد من كل حاجة ومبقاش حتى ليا نفس اتابع الأخبار

    ReplyDelete
  3. الكلام ده كله طلع هجص

    صرح زياد العليمى محامي نهي رشدي اول فتاة تقاوم التحرش لشبكة الاعلام العربية " محيط " بأن ما إثارته نجلاء الإمام المحامية بالنقض ونشرته جريدة " المصري اليوم " والتي قالت إنها توصلت لمعلومات عن المدعية، جعلتها تقرر التخلي عنها بعد 3 أيام من صدور الحكم، هي أن نهي من عرب 48 ومولودة في يافا شمالي تل أبيب وتحمل جواز سفر إسرائيلي ، ان هذا الكلام غير صحيح بالمرة وقال :" الأستاذة نجلاء ليست محامية نهي من الأساس وانني احمل توكيلا من نهي في القضية ، كما ان نهي ابنه لام مصرية واب مصري وأن جدها يحمل حق اللجوء الفلسطيني في مصر وان ابوها لم يدخل فلسطين قط " .

    ويتابع قائلا " من المعروف أن الجامعات المصرية لا يدخلها الإسرائيليين ونهي خريجة جامعة القاهرة كلية الحقوق عام 2005 فكيف اذا انها إسرائيلية " .

    والحقيقة كما جاءت علي لسان زياد "ان نهي تقابلت مع الأستاذة نجلاء عقب برنامج 90 دقيقة وتعرفت عليها وعرضت مساعدتها عليها تضامنا معها كما كان موقف ثلاثه محاميات اخريات وهم المحامية صفاء حلمي من المنظمة المصرية لحقوق الإنسان والمحامية أمل من المركز المصري لحقوق المرأة ، والأستاذة نجلاء كانت من منظمة بريق .

    ويكمل " لكن المشكلة حدثت عندما طلبت الأستاذة نجلاء من نهي أن تظهر معها بعد الحكم في برنامج 90 دقيقة أيضا وتعلن انها محاميتها كنوع من الدعاية لها ولكن نهي رفضت وكانت من هنا المشكلة بين نجلاء ونهي ويشهد علي ذلك معد برنامج 90 دقيقة أستاذ ممدوح ويمكنكم أن ترجعوا له فهو كان شاهد علي هذه المشكلة " .

    وعن ظهور نهي في برنامج علي قناة " ام بي سي " قال : " نهي فعلا ظهرت في برنامج أذيع علي القناة ولكن شرائط البرنامج موجودة ويمكننا الرجوع إليها ولكن لم تقل أن "إسرائيل دولة محترمة " ولم يقل المذيع إن حوادث التحرش لا تحدث في إسرائيل " ولا كل ما ذكر على لسان الأستاذة نجلاء ".

    " وقعت الأستاذة نجلاء في الفخ الذي نصبته لنهي هكذا علق زياد علي كلامها قائلا :" يعتبر كلام أستاذة نجلاء للمصري اليوم جريمة سب وقذف علانية وهذه جريمة اقل حكم فيها سنة كما أن هناك بعض الثغرات في كلام استاذة نجلاء تلفت نظرا أي شخص دارس قانون وهي أنها قالت أنها سوف تستأنف الحكم ضد المتهم الرئيسي ومعروف انه في نوعيه قضايا الجنايات لا تستأنف وإنما يطعن بالنقض " ، كما أن المادة 80 من القانون ينص انه يحق لنقابة المحامين ان تفصل محاميا تخلي عن موكله لصالح المتهم " .

    وأكد زياد ان نهي تحمل وثيقة لجوء سياسي ولذلك لا يسعها ان تحمل باسبورا اخر .



    وكمان فيه رد نهى على فيسبوك

    فوجئت بالسيدة نجلاء الإمام، تكيل لي الاتهامات الباطلة ببرنامج 90 دقيقة مساء الأربعاء 29/10/2008، كما قرأت بجريدة المصري اليوم، بعددها الصادر بتاريخ 30/10/2008 أقولاً منسوبة لذات السيدة، وقد جاء بها العديد من المغالطات التي أريد أن أوضحها وهي:

    أولاً: تعرفت على السيدة/ نجلاء لأول مرة أثناء حضورنا كضيوف في حلقة من برنامج 90 دقيقة، قبل جلسة محاكمة المتهم بأربعة أيام، وطلبت مني بعد الحلقة قبول حضورها للتضامن معي في الجلسة، ولم أعطها توكيلاً للحضور به، ولكنها أثبتت حضورها مع أربع محاميين أخرين من مراكز حقوقية مختلفة أثبتوا حضورهم في الجلسة للتضامن ليس إلا.

    ثانياً: بتاريخ 21/10/2008 وبعد صدور الحكم فوجئت بالسيدة/ نجلاء تتصل بي هي وأحد معدي برنامج 90 دقيقة، لتطلب مني الظهور معها إعلامياً باعتبارها محاميتي، وهو ما رفضته، لأنها ليست محاميتي التي قامت بالدفاع في القضية ولكنها صاحبة أحد مركز حقوق الإنسان، حضرت للتضامن مثل محامين آخرين أثبتوا حضورهم في الجلسة للتضامن، ورأيت وقتها أن ظهوري معها يمكن أن يمثل دعاية للمركز الذي ترأسه وهو مالم أكن راغبة فيه.

    ثالثا: جاء بأقوال المذكورة أنني ولدت بيافا، والحقيقة أنني ولدت بتاريخ 5/9/1981 بطرابلس، بدولة ليبيا (مرفق صورة شهادة ميلادي)، حيث كان يعمل والدي ، وانتقل قبل أن أتم أعوامي الأربعة لأعيش مع أسرتي بمصر.

    رابعاً: جاء بأقوال المذكورة أنني أحمل جواز سفر إسرائيلي، والحقيقة أنني مولودة لأم مصرية، وأب فلسطيني ـ لم يتمكن من زيارة فلسطين منذ ميلاده ـ حاصل هو وجدي على حق اللجوء بجمهورية مصر العربية ومقيمين بمصر منذ ما يزيد على الستين عاماً (مرفق صورة جواز سفري)، وقد درست بالمدارس والجامعات المصرية حتى تخرجت من كلية الحقوق، جامعة القاهرة عام 2005.

    خامساً: جاء بأقوال السيدة/ نجلاء أنها ستستأنف الحكم الصادر ضد المتهم، والحقيقة التي يعلمها أي دارس بكلية الحقوق هي أن الأحكام الصادرة في مواد الجنايات لا يجوز استئنافها، ولا يجوز الطعن عليها إلا بطريق الطعن بالنقض.

    سادساً: جاءت أقوال السيدة/ نجلاء متضاربة حيث أوردت بأقوالها أنني موكلتها بتوكيل لم تظهره عندما سؤلت عنه، وفي ذات الوقت قالت أنها ستقوم بالطعن على الحكم لصالح خصمي، وهو ما يمثل تمثيل مصالح متعارضة طبقاً للمادة 80 من قانون المحاماة، وهو ما يعرض السيدة/ نجلاء لعقوبة تصل إلى المنع من مزاولة المهنة ومحو الإسم نهائياً من جدول المحامين طبقاً لنص المادة 98 من ذات القانون.

    سابعاً: تعلمنا من دراستنا بكلية الحقوق أن "الحكم القضائي هو عنوان الحقيقة"، والحكم الصادر على المتهم جاء بناءاً على اعترافه أمام سلطات التحقيق بالواقعة، وشهادة الشهود الذين أقر المتهم بحضورهم الواقعة، وتحريات المباحث التي أكدت حدوث الواقعة، أصبح الحكم حقيقة لا يمكن أن يغيرها إلا بموجب حكم صادر من محكمة النقض، ومن المعلوم لدى كل دارس للقانون أن النيابة العامة هي التي تمثل المتهم والمجتمع في الادعاء الجنائي، وهي التي أكدت حدوث الواقعة بتحقيقاتها مع المتهم.

    ثامناً: أحتفظ بحقي كاملاً في اتخاذ الإجراءات القانونية ضد ما سبق وارتكبته السيدة/ نجلاء ضدي من أفعال، وهي الأفعال التي تشكل جريمة السب والقذف المعاقب عليها بنص المادة 302 من قانون العقوبات بعقوبة تصل إلى الحبس لمدة سنة، كما شكلت أفعالها أيضاً تمثيل مصالح متعارضة طبقاً للمادة 80 من قانون المحاماة، والتي تصل العقوبة فيها إلى حد المنع من مزاولة مهنة المحاماة، ومحو الإسم نهائياً من جدول المحامين طبقاً لنص المادة 98 من ذات القانون. وفي النهاية وبعد أن تبين بالمستندات عدم صحة كل ما جاء على لسان السيدة/ نجلاء، وجدت أن هناك مالا يستحق عناء الرد مثل مثل الادعاء بأقوال منسوبة إلي في قناة فضائية، وليس هناك أدل على عدم صحة هذا الادعاء من أن البرنامج المذكور أذيع على الهواء وليس به أي من الأقوال المنسوبة إلي، وكنت أنتظر من صحفيي المصري اليوم أن يقوموا بواجبهم الصحفي ويحاولوا تقصي حقيقة مثل الواقعة قبل نشرها

    ReplyDelete
  4. http://noteandpen.blogspot.com/2008/10/blog-post_906.html
    اللينك ده يمكن يوريلك اد ايه احنا ما بنصدق جنازة ونشبه فيها لط فيه الحوار مع نهى والمحاميه الواطيه الكدابه
    اما عن حوار شريف مع نفسه افتكر قصه سيدنا يوسف مع امراه العزيز والنساء الجميلات وافتكر قصه سيدنا موسى برضه افتكر ان فيه شباب كتير محترمين
    افتكر برضه ان اللى بيركب عربيه بيطلع يشوف رزقه مش يمسك بنت من منطقه حساسه
    عرب 48 مش اسرائلين البنت اثبتت بالورق على الهواء
    ابقى اتفرج وراجع شويه اللى انت كتبته

    ReplyDelete
  5. اللي عرفته ان والدها من اصل فلسطيني و امها مصريه و لا يجب اعتبارها اسرائيليه علي هذا الاساس و ايضا بالنسبه للحكم فثلاث سنوات كثيره لكن الولد يستاهل سواء كان عنده ضغوط نفسيه جنسيه او غير
    لان مش معني اننا مش قادرين نتجوز و مجتمعنا بيحاصرنا بالمغريات اننا نعتدي علي بنات الشارع و لبس البنت مهما كان لا يوجب العدوان و لالتحرش
    فقط يوجب النصح
    و الارشاد

    ReplyDelete
  6. أنا بس هعلق علي الجزء بتاع نهي

    البنت ماطلعتش من عرب 48 وقدمت الورق اللي يثبت انها مواليد طرابلس ليبيا وان باباها عمره ماشاف فلسطين

    عرب 48 مش يهود

    ولو كانت نهي منهم فده مايمنعش انها كان ليها حق وكانت لازم تاخده

    ReplyDelete
  7. بص يا أحمد
    مش عارفة هتقبل كلامى و لا لأ
    بس هقوله
    الحكم كان قاسى من وجهة نظرى
    بس بصراحة رادع
    يعنى أى واحد دلوقتى هيفكر يتحرش بست هيفكر الف مرة
    و أى بنت هتتعرض لتحرش هتلم الدنيا و تمسك فى المتحرش لأنها بقى عنده طمأنينة أنها ممكن تاخد حقها
    هيا جت فيه هوه لكن معلش ...
    المفروض أنه خارج لشغله مش حاجة تانية
    و زمان قبل القانون كان فيه قوة تانية رادعة إسمها الاخلاق و نظرة المجتمع
    دلوقتى الشاب ممكن يمد ايديه على اى بنت و ميهموش لا أخلاق و لا نظرة الناس اللى فى الشارع ...
    يبقى مفيش غير القانون بقى
    حكاية إسرائيلية فلسطينية أى جنسية مش دى المهمة
    و بعدين يعنى لو فيه سياح إسرائيلين ماشيي ن فى وسط البلد و تعرضت واحدة فيهم لتحرش مش القانون ملزم يحميها برضو
    مدام دخلت أرضنا يبقى لازم أنت كمصرى تحميها طالما وافقت على دخولها عندك
    المهم المبدأ
    بس كدا
    تحياتى يا أحمد

    ReplyDelete
  8. لو البنت كانت اسرائيلية كان المتحرش هيلاقوه منتحر في زنزانته
    :)
    الموضوع مش موضوع مصرية ولا اسرائيلية
    الموضوع انثى تعرضت للتحرش
    وأكيد الشخص المتحرش هيلاقي لنفسه بينه وبين نفسه مليون عذر لفعلته
    وهيبرر دوافعه من كبت وحرمان ومثيرات خارجية
    اي إنسان لما يعمل أي حاجة غلط بيدور على مبررات حتى يهرب من عذاب الضمير
    فما بالك لما شخص يرتكب جريمة ويتم القبض عليه ويأخذ حكم


    خالص تحياتي

    ReplyDelete
  9. شارك في الحملة الشعبية للقيد بالجداول الانتخابية وادعو غيرك
    ضع بنر الحملة علي مدونك والبنر موجود علي مدونتي

    ReplyDelete
  10. تفتكر ايه الحل.. انه يصلح غلطته ويتجوزها!؟

    :)))

    ReplyDelete
  11. يمكن انت بتقول كده علشان حسيت بالمشكلة من ناحية الشاب
    لكن عمرك حطيت نفسك في موقع بنت كل ذنبها انها ماشية في الشارع مهما كانت لابسة
    ازاي أي حد مهما كانت مشاكله يعطي لنفسه الحق في انتهاك حرمة واحدة ست مهما كان شكلها و مهما كانت جنسيتها
    اللى عمله الولد ده حصل مع واحد أيام الرسول عليه الصلاة والسلام و النبي عليه الصلاة والسلام مرضيش ياخد من الشاب ده البيعة غير لما تاب توبة نصوحة و عزم انه لن يفعل ذلك أبدا
    يعني الفعلة دي كانت هتحرمه من دخول الإسلام ...انت متخيل هي قد ايه كبيرة؟؟
    انا عن نفسي من أسعد الناس بتجريم الأفعال دي و سعيدة بتغليظ العقوبة فيها
    و بقولهالك مرة تانية : انت ما عشتش كبنت في مجتمعنا و ماجربتش الإحساس ده
    احساس انها مستباحة لأي شخص مريض ماشي في الشارع و للأسف المجتمع بيديله العذر لأنه رجل و ظروفه وحشة و بالعكس بيجيب الغلط على الضحية
    اعذرنى على انفعالى في الرد لكن انا مش قادرة اتعاطف معاه اطلاقا
    تحياتي

    ReplyDelete
  12. للاسف كمية افكار مغلوطة سواء منك يا محمدو مكنتش متوقعة منك انت بالذات لرجاحة عقلك ف يمواضيع تانية لكن يعني لكل جواد كبوة زي ما بيقولوا
    او من بعض المعلقين

    اولا
    مش معنى ان ظروف المجتمع منيلة بنيلة و مقرفة ان ده يدي لشريف مهما كان مظلوم اي حق انه يتحرش باي ست و يمسك جسمها في وسط الشارع بالمنظر ده
    انا لو القاضي كنت حكمت بقتله كمان مش تلات سنين سجن
    بصراحةا نا مندهشة من تخيلك لتبريرات بالشكل ده
    لو دي الحالة يبقى نسمح بالسرقة و بالقتل و الادهى و الامر انه فيه بنات وصلوا لسن متاخرة و مش قادرين يتجوزوا
    هل يا ترى نسمح لهم بفعل الرذيلة بقى عشان هي كمان تسد حاجاتها؟؟
    بصراحة مش مبدا ابدا نعتمد عليه لتبرير تصرفات غلط من فئة مننا
    مش معنى ان شريف متعلم لكن الظروف خلته يبقى سواق
    انه يروح يمسك اجسام الستات
    و يفش خلقه بنهى
    يرضى هو ان حد يتحرش باخته او مراته او حتى صديقته بالمنظر ده؟؟؟


    ثانيا
    اللي بيقولوا لو اسرائيليه تبقى تروح في داهية فده يعني تفكير غريب شوية
    مش فاهمة يعني ايه لو اكنت من جنسية مختلفة تبقى تتحرق؟؟
    طيب لو قلنا ان بنت مسلمة او عربية مسافرة في بلاد برا و حد اتحرش بيها او اضطهدها
    يا ترى حيكون رد فعلنا احنا ايه؟؟
    لكن للاسف الازدواجية متمكنة مننا بشكل مش طبيعي و بشكل مقرف جدا

    ثالثا
    و دي الاهم
    ابوها لنهى طلع من عرب 48 يعني جنسيتهم الأسرئيليه حتى لو طلع معاهم الجنسية فعلا مش بايدهم و لا دي تسئ ليهم باي شئ
    مليان فلسطينين مسلمين و مسيحين و دروز لكن جنسيتهم او باسبورهم اللي بيتعاملوا بيه اسرائيلي
    فمش فاهمة ايه المشكلة هنا؟؟
    مش عيب اننا نمنع وصول حق لصاحبه بس عشان جنسيته؟؟
    و نرجع بعد كدا نشتكي ان الغرب الكافر المنحل بيعاملنا وحش
    ما هو لو احنا عاوزين بلاد برا تعاملنا كويس و تحترمنا
    لازم احنا كمان نحترمهم و لا ايه؟؟


    شكرا و تحياتي

    ReplyDelete
  13. ولو ولو يا أحمد...مفيش أي كلام يبرر موقف هذا الحيوان المتحرش وإن كنت كده حظلم الحيوانات لانها لا تتحرش جنسيا ببعضها إنما يكون الجنس بالغريزة
    لازم شريف ده يكون عبرة عشان غيره يفكر الف الف مرة قبل ما يتنيل يعمل حاجة..صدقني مفيش غير كلمة معلش وهي جت علي ده اللي موديانا في داهية
    اللي يأخذ رشوة 1000 جنيه زي اللي يأخذ مليون حتي لو كان ابو الف ده واخذها عشان يستر العيال والكلام ده وابو مليون واخذها عشان يزود كرشه
    وبعدين علي راي إيبي..سواق يجري علي رزقه مش يطلع إيده بره ويعمل الحركو الزبالة دي..هو في إيه ولا إيه في إيه
    وبعدين حتقولي سن جواز اتأخر..طب يبقي البنات اللي سن جوازهم اتأخر يروحوا هما كمان يتحرشوا بأي واد أو يروحوا بيت دعارة ويشتغلوا ويطفوا شهوتهم
    لازم يبقي فيه تحكم يا ابو حميد
    احنا بني ادمين في النهاية وربنا مدينا القدرة علي التحكم في غريزتنا واللي كنا كلنا نقعد نأكل وخلاص طول ما فيه قدامنا أكل مثلا
    تحياتي

    ReplyDelete
  14. اولا بشكرك علي اهتمامك وتعليق عندي وبما انك علقت عندي في مدونتي اذن ننقل الحوار علي ساحه المدونه يا سيدي الفاضل اعتقداغلب التعليقات ماشيه في نفس الطريق الذي سلكته في راي تجاه ما كتبته ولا عجب ان اجد من يندهش منك يا احمد يا صاحب العقل الراجح والكثير منا يقدر هذا العقل مازالت عند راي اني مصدومه فيك واعذرني علي صراحتي ولكنها الحقيقه انت شرحت انك بتحاول تتخيل وتسمع دوافع هذا لشخص وانك مش بالضروره توافق علي اللي عامله طيب تقدر تفسرلي انك شايف ان العقوبه قاسيه قاسيه ايه يا دكتور انت متعاطف مع هذا الشخص وما تفسيرك لهذا التعاطف انك قابل مبرارته وشايف ان ليها وزن وعايز تقول كده بالعربي ايه يعني اتحرش هو اغتصاب عشان ياخد 3 سنين اسفه عن صراحتي ولكنها طريقنا للحوار والنقاش انت بتقلل اوي فيما فعله وده واضح في تعاطفك هناك اسباب لا شك ومن لا يقول ذلك يكون غير عاقل واتفق معك ان بعض الفتيات تكون مسؤله عن اثاره الرجال لكن دعني ندقق في الكلام اثاره وغير ان تجعله يفكر ان يتحرش بيها وبالعقل فعل التحرش ده يعبر عن مدي نظره الاحتقار للبنت من الرجل لانه من الطبيعي انه من خلال هذه الحركات لن يشعر بمتعه ولن يفرغ طاقاته الجنسيه المكبوته ولن يشعر باي تلذذ هو محروم منها هي حركه دونيه جدا تعبر مدي احتقاره للفتاه وممكن تفسرلي ضحكته الساخره منها بعد ما فعل ببساطه عايز يقول ومادامت انتي انثي لتلقي نصيبك من الاهانه هي تملك جسد اذن فانتهكه واستحله هذه هي الحقيقه علاء الاسواني كتب وحلل هذه الظاهره وارجعها في اساس الظاهره هو امتنهان المرأه واحتقارها وتدنيها في نظر المتحرش وانا موافقه جداااااااا الراي ده لاننا منذ زمن نعاني من نفس المشاكل الفقر وعدم القدره علي الزواج وكل زمان ومكان كان له الادوات الخاصه بيها ليجد اي انسان ما يريده من موبقات واشياء تثيره ويشاهدها فقبل زمن الفضائيات والكليبات كان يوجد الكتب والصور والاماكن الخاصه لعرض الفيديوهات ولا احب ان اذكرك ان مصر في بدايه القرن العشرين كانت مهنه البغاء فيها تمارس بشكل معلن ومصرح من الدوله المحتله اقصد من القول ان في كل زمان ومكان ادواته الخاصه في عرض وشرح موبقات عصره ولكن في كل زمان ومكان توجد الاخلاق والدين والرجوله التي تعصم من اي شيء نحن نعيش زمن لا توجد فيها هذا الثالوث
    صدقني يا عزيزي انك يجب ان تجرب للحظات انك انثي ويفعل هكذا في جسدك ستشعر بمدي فداحه الموقف ومدي جرمه ومدي ضعفك انك الشيء الذي تملكه وهو جسدك لا تملك الدفاع عنه وانه مباح ومستباح لكل حيوان يريد ان ينهش في لحمه لمجرد انك انثي او عذرا جدا يجب ان تشعر ان لك انسانه عزيزه علي قلبك فعل به هذا الموقف الخسيس لتشعر بمدي كرهك لهذا الشخص وانه لو بيدك لقتله وشنقته ولن تكتفي بسجنه وفقط
    ماسك الجمر غير من يشاهدها من بعيد ويتسأل في تعجب ياتري ماذا يشعر وهو ماسكها
    عذرا لاطاله ولكنك ممن يملكون عقل احترامه فيجب علي مناقشته وحواره وشكرا لسعه صدرك لنقدي وتحواري معك
    تحياتي واحتراماتي

    ReplyDelete
  15. بدون تعليق ع الموضوع حبيت بس اقولك انك واحشني يا باشا
    محمد سمير

    ReplyDelete
  16. هو كل اليى قلته ده ي سمير مؤثر بس مش مبرر ودافع المفروض اننا بشر ربنا خلقنا بعقل نقدر نتحكم فى تصرفاتنا بيه مش حيوانات يعنى معنى كده ان كل الناس فى الشواطئ لازم تتحرش ببعض ولاا ايه وبعدين موضوع التحرش ده قديم قوى من ايام فتاة العتبه يعنى قبل الفضائيات وانتشارها وكانت محجبه اعتقد

    هو غلط وارتكب جرم وهيا دافعت عنحقها عقابه 3 سنيين ممكن يكون صعب من وجهة نظرك بس عشان يكون رادع لغيره ولاحظ ان موضوع التحرش ده على اخره فى مصر فلازم ترهيب واهه المفروض حصل
    .........

    ReplyDelete
  17. شريف جبريل مخطئ وليس معنى أن ينال عقابه أنه يعاقب نيابة عن أخطاء المجتمع كله فليس ذلك صحيحا، فلو التزم شريف بالمطلوب منه وهو غض البصر لما وصل لحالة الشهوة التى تملكته بغض النظر عن الكليبات وإغراءات البنات فى الشارع فربط تصرفه بتصرفات الآخرين عبث لا يصح القول به فعليه أن يفعل واجباته ولا يهتم بالآخرين وإلا كان ذلك مبررا لكل من سرق ولكل من قتل بان كثيرين سرقوا وقتلوا.

    أما موضوع جنسية نهى رشدى فليس هو مقياس الحكم على الأمور فالجريمة فى الفعل وليس فى شخص المجنى عليه، أما السيدة المحامية فهى تتلاعب بمشاعر المجتمع لتحقيق شهرة جديدة لها لأن توكيل القضايا يذكر به وبوضوح ديانة وجنسية الموكل بجوار اسمه مباشرة مما ينفى معه جهلها بجنسية نهى رشدى من البداية.

    أرجو ألا نحيد بالقضية عن مسارها الصحيح فهى واقعة تحرش تستلزم العقاب وعلينا أن نعزل تصرفات الاخرين وجنسياتهم ودينهم ومواقفهم السياسية والثقافية بعيداً عن أصل الواقعة لأنه من المفترض ألا تؤثر هذه العوامل على درجة العقاب.

    أعتذر عن الاطالة
    تحياتى

    ReplyDelete
  18. والله لو هى يهودية اسرائيلة فدا لا يبرر ابدا التحرش الجنسى اللى حدث لها
    بس سؤال هو المتهم يعنى مكشوف عنه الحجاب وعرف انها يهودية او اسرائيلة فعمل كدة ولا كان ممكن جدا انها اى بنت مصرية عادية .؟؟
    اكيد هو كان بيتحرش للتحرش فعل شيطانى
    كما ان الاسلام لم يدعم ابدا فكر التحرش لا بالمسلمات ولا بغيرهن
    تحياتى

    ReplyDelete
  19. يوم الجمعه 14/11بأذن الله
    هنروح نزور دار ايتام فى بورسعيد اللى يحب يشرفنا
    ياريت تنورنا ونحاول نرسم بسمه ونتعاون على البر والتقوى
    وبعدها هنقعد مع بعض شوية طبعا لو تحبوا
    التفاصيل عندى بالمدونة
    اعتذر لكنه ليس اعلان لكنها دعوه للخير

    ReplyDelete
  20. أنا مش قادرة أفهم أنت إزاى متعاطف مع البنى أدم دا.. وإزاى بتقول إن العقوبة قاسية.. قاسية ايه بس وبتاع ايه.. فى ايه؟؟!! لو مراتك حد مسكها من صدرها كدا كنت هتقول ساعتها إن الحكومة قاسية عليه ولا كنت هتاكله بسنانك؟؟ ثانى حاجة لو كل البلد فيها حرامية وجم فجأة حكموا على حرامى منهم بالحبس هنقول ساعتها دا حرام وظلم وحكم قاسى جدا زى ما حضرتك قلت وللا هنقول لما باقى الحرامية يشوفوا واحد اتحبس هيخافوا ومش هيسرقوا تانى ولو استمروا فى السرقة يبقى يستاهلوا الحكم بالحبس زى الحرامى الاول..

    اللى اسمه شريف دا ميفرقش حاجة عن أى حرامى بياخد حاجة مش بتاعته.. وأما حكاية بقى إنه معهوش فلوس يتجوز فمفيش أى دين فى الدنيا بيقول إن اللى مش قادر يتجوز يتحرش ببنات الناس أو يتفرج على كليبات قذرة كل هدفها إثارة الشباب.. رسولنا بيقول " من استطاع منكم الباءة فليتزوج ومن لم يستطع فعليه بالصيام" صدق رسول الله .. طيب مش هيصوم طول عمره ماشى لكن يبعد عينه عن المثيرات وميلقيش بغلطاته على غيره ويستحل حرمات الناس..

    ReplyDelete
  21. أحمد
    أسلوبك مؤثر جداا جدااا
    لو قرأه القاضى هيعطيه براءه فوراااا
    لكن ميمنعش انى معاك أن كل دى اخطأء فى المجمتع .. لكن ماهى الاخطاء دى على غيره برضه
    ..
    والحكم فعلا صعب .. لكن علشان اول شخص يطبق عليه القانون .. علشان كده احنا شايفنه صعب ..

    بس ياريت كل بنت تتقى ربنا فى اللى بتعمله .. علشان ما يروح ضحيه حريته شباب اضعف من رغابتها .

    شكرا لك ولقلمك يا اخى

    ReplyDelete
  22. انا حسأل سؤال لكل من يتعاطف مع هذا الشخص اللي تحرش بالفتاة

    لو الراجل ده -اللي إنته متعاطفين معاه-

    مد إيده ومسك صدر والدتك أو أختك أو مراتك قدام عينك

    حتعمل إيه..؟

    ReplyDelete
  23. مع احترامى ليك يا احمد
    هو المتحرش بياخد بطاقة البنت الاول ويشوف جنسيتها وبعد كدا يقرر يتحرش بيها ولا لاء
    سنفترض جدلا ان نهى اسرائيلية بالرغم من انها طلعت على الهوا فى الحياة اليوم وعرضت جواز السفر بتاعها واثبتت بالاوراق انها مش من مواليد يافا زى ما ادعت المحامية اللى شكلها خريجة العباسية وليست احدى كليات الحقوق
    هل جنسية البنت تبرر التحرش بيه هل المصريات لا يتم التحرش بيهم ؟؟؟
    امال الفضايح اللى كل يوم فى الجرايد دى ايه ومين قال ان شريف بس هو كبش الفدا ما فى ولاد اتقبض عليهم من شارع جامعه الدول وفى انتظار المحاكمة دلوقتى .. القانون الرادع لاى ظاهره سيئة مينفعش معاه تعاطف
    انت متعرفش ان بعض الدول بتحذر السائحات من النزول مصر لتحرش الرجال المصريين بيهم
    كفاية فضايح
    بلدنا مش تستاهل مننا ناذيها بالشكل المقزز ده .. الشباب مش لاقى يشتغل ومش لا قى يتجوز ومش لاقى ياكل البنت مالها هى ذنبها انها بنت علشان يفرغ كبته فيها وبعد كل ده بتدور له على مبرر طيب ايه رايك فى المحجبات والمنقبات اللى بيتعاكسو دى ؟؟؟؟ ويبقى كداب اللى يقول مبيحصلش لان التحرش الجماعى اللى كان فى وسط البلد وفى شارع جامعه الدول كان فيه منقبات ومحجبات وبشهود العيان اللى كانوا موجودين فى الشارع
    حتى لو عريانه لو ماشية ملط المصرى اللى بيقل ادبه هنا على بنت بلده بيسافر بره مش بيقدر يرفع عينه فى واحده ماشية ملط لسبب بسيط ان فى قانون رادع مجرد ما تشتكى هينال عقابه
    يبقى طالما مش عارفين نحترم بعض بالذوق وبالاخلاق وبالتربية اللى اهالينا علموها لنا اذن لابد من تشريع قانون وباقصى سرعه علشان كل واحد مش يتعدى حدوده وينتهى العنف ضد المرأة فى شتى صوره
    متزعلش من كلامى بس مينفعش اى جريمة يبقى لها مبرر لانى لو سكت وبررت النهارده للمتحرش يمكن بكره يتحرش باختى ولا بنتى ومحدش يقول مش بيحصلهم لهم كدا لاء بيحصل لهم واسخم بس فى ناس مش بتتكلم وبتخاف تقول لاهلها اللى بيرتكب جريمة مش بيهمه شكل المجنى عليه ايه المهم الغرض ايه
    تحياتى

    ReplyDelete
  24. عزيزى
    هو العقاب قاسى لشئ واحد بس
    انه مش بيطبق دايمن على ناس كتير بتعمل كده واكتر من كده

    بس مسنوده

    انا مش ضد العقاب بس على الاقل يكون عقاب معقول واظن لو 6 اشهر حبس هيبقا عقاب معقول

    والخوف بقه فى ناس ممكن ستات تلبسهم قضايا بالشكل ده

    ويبقا سلاح للمراه ضد الرجل

    وانت عارف مصر عدالتها بتودى لفين

    والمشكله مالك العبارة يطلع براءه وجمعيات حقوق المراه والرجل صوةتهم واطى

    وواحد زى كده عملين ليه كل الفليم ده

    ربنا يستر ومتجيش واحده حد يسلطها علينا فى يوم

    ومش بتفرق جنسيتها ايه فى الموضوع ده

    بس اللى يقرث انها عملت ثضيه قبل كده فى بلد تانى

    واظن انها يمكن غاويه مهرجانات زى دى

    والله اعلم

    تحياتى
    سلام

    ReplyDelete
  25. احممممممممممم

    انا بس عملت موضوع وجايب سيرتك

    فحبيت أجى أقول

    اللهم بلغت اللهم فأشهد

    http://mshmuwafk.blogspot.com/

    سلام

    ReplyDelete
  26. ندعوكم للانضمام لجروب
    لا للعنف ضد اطفالنا بالمدارس
    وهذا هو لنك الجروب على الفيس بوك
    http://www.facebook.com/group.php?gid=43106767017

    يسعدنا انضمامكم

    ReplyDelete
  27. المراه هى المراه فى كل المجتمعات يجب احترامها
    بعدين دا فى حاله الحرب حرام تقتل امراه او طفل او شيخ او تقطع شجره دا دينا الاسلامى فما بالك فى واحد ماشيه فى امان الله رضينا بدخولها بلدنا واعطينالها الامان
    بعدين عاوز تفهمنى ان المتحرش تحرش بيها عشان اسرائيليه؟؟
    ياه دا طلع متحرش وطنى اهو واحنا مكنش عندنا فكره
    بص اللى بيحترم نفسه بيكفى الناس شره وبيكفوه شرهم انما الغلطان ياخد على راسه مدام غلط ومينفعش نبرر غلطه وانا حقولك على شىء الوضع اصبح فى اشياء صعبه من جهه البنات والبنين واصبح ظاهره وانا رايتها بعينى فى شوارع التحرير فى العيد وبقيت ماسكه نفسى من العياط لانى مش متخيله ان دى امتى ودول اهلى اخرجوا اجيال فاسده بنات وشباب وعرفت سبب النكبه التى نعانى بها وهى تخلينا عن الاخلاق مش حقولك عن الدين عشان متقولوش ارهابيه ولا متخلفه
    لا عن الاخلاق
    اعتقد ان فى امريكا والدول المتقدمه فيها برضوا حدود للبس بدليل تطبيق قانون الحبس لست اشهر فى كندا لمن يرتدوا نوع معين من السراويل
    وسيبنا من امريكا المفروض كمجتمع شرقى له عادات وتقاليد البنات تتحشم فى اللبس مش بقول نقاب وحجاب لكن حشمه مش نقلع ونغنى ظلموه
    وبالرغم من هذا برضو لا يبرر المعاكسات والتحرشات لان مش عشان الناس غلط نقلدهم ونمشى وراهم
    وعموما الولد اللى اتحبس دا شال مسؤليه كل المتحرشين من الرجال واعطى لهم رادع واعطى لبعض البنات واعظ الى حد كبير

    ReplyDelete
  28. طبعا تصرف الشاب غلط ودة اللي احمد قاله
    بس كمان نهى مش الست خضرة الشريفة وانا شوفتلها صورة في احد المدونات بصراحة لبسها مستفز جدا وبجد
    الله يكون في عون الشباب لأنه بجد تعبان وماحدش حاسس بيه
    وكمان بنزود اعبائه وضغوطه
    انا بس عايز اسأل سؤال هل لو كان المتحرش دة ابن حد كبير في الدولة كان الموضوع اتصعد للدرجة دي
    ولا في البلد دي ماحدش بيقدر غير بس على الغلبان ؟
    سؤال ياريت بس الناس تجاوب عليه بصراحة
    استاذة حفصة : حضرتك بتقولي انك لو مكان القاضي تحكمي عليه بالأعدام معلش سامحيني يعني ايه تعدمي واحد وحضرتك قاعدة في بيتك هل التحرش يساوي القتل .. دة حتى القتل بياخد مؤبد مش اعدام ياريت بلاش الغضب يشوش على تفكرينا وقرارتنا

    ReplyDelete
  29. سؤال بردو وياريت الناس تفكر بعقل فيه ليه نهي رفضت ظهور المحامية نجلاء معاها في الأعلام وحتى لو ماكانتش هي المحامية بتاعتها ومن احد مراكز حقوق الأنسان هي مش وقفت معاها بردو
    هو مش اقل شيئ تعمله للناس دي تعطيهم حقهم في الظهور الأعلامي ولا هي كانت عايزة تكون لوحدها في الصورة من غير شريك وايه التفسير للرغبة دي؟

    ReplyDelete
  30. لورنس العرب:
    والله موضوع اسرائيلية دة فيه كلام
    خاصة انها نفت الكلام دة
    وحتى لو كدة اعتقد انها هتبقى من عرب 48 اللي لابد ان يحملوا الجواز الاسرائيلي حتى لو غصب عنهم علشان يعرفوا يعيشوا
    اما بقى ازاي الاجهزة الامنية ماعرفتش
    الله اعلم
    بس اعتقد انهم ما ركزوش مع الموضوع باعتباره لا يمس امن الباب العالي
    تحياتي واحتراماتي

    ReplyDelete
  31. الام وامال:
    فعلا والله يا محمود بك
    الجو تحس كدة انه مرشوش خنقة
    تحياتي

    ReplyDelete
  32. anonymous:
    الف الف شكر على الرد الوافي وعلى الاهتمام

    ReplyDelete
  33. appy:
    بالتأكيد انا لا ابرر فعلا شريف ولا اقرها على الاطلاق
    ولكن في حاجة في الدنيا اسمها رحمة ومغفرة
    الواد دة كان يكفي انه ياخد له قلمين والخضة اللي اتخضها دي كانت هتخليه يمشي زي الالف بقية حياته
    انما انا شايف انها حبت الموضوع ولقيت القضية هتبقى قضية رأي عام يبقى ليه لأ نسحل الواد
    عموما
    انا بأشوف ان الواد اخطأ انما هي اضاعت مستقبله تماما
    تحياتي

    ReplyDelete
  34. ذو النون المصري:
    وتفتكر كدة لو شاب راح ينصح بنت بضرورة مراعاة لبسها وسلوكها
    مش هتعمل له قضية تحرش؟؟؟
    دة مش بعيد تلبسه قضية اغتصاب
    تحياتي

    ReplyDelete
  35. esraa:
    يا اسراء
    سواء طلعت يهودية او فلسطينية او امريكية
    دة لا يغير من الامر في شيء
    انا باشوف ان الواد اخطأ وخطأ كبير انما كان في فرصة انه يتقرص ودنه قرصة صغيرة مش 3 سنين سجن وسوابق ومستقبل يضيع
    تحياااااتي

    ReplyDelete
  36. الولد يتقرص ودنة قرصة صغيره
    !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
    انا قلت مافيش فائده محدش مصدقني
    لنا الله

    ReplyDelete
  37. فاتيما:
    اكيد طبعا هأقبل كلامك يا فاتيما
    بس تفتكري ان حكم الاعدام منع جرائم القتل؟
    اكيد قللها ولكنه لم يمنعها
    المجتمع كله شباب وبنات عايز اصلاح يا فاتيما
    لازم الاصلاح من المنبع
    مرة اخرى اقرر الاعتراف بالخطأ
    تحياتي

    ReplyDelete
  38. ياسر حسين:
    زي ما قلت يا فنان
    اي انسان مهما ارتكب من جريمة له اسبابه ودوافعه التي يبررها لنفسه
    انا لا ابرر لشريف جبريل فعلته ولكني اطلب الرحمة وعدم تحميله اخطاء مجتمع وتربية خطأ لأجيال قبله
    تحياتي

    ReplyDelete
  39. م/الحسيني لزومي:
    حاضر هشارك ان شاء الله
    ولو اني عارف ان صوتي مالوش اي لزمة بدون وجود قاض على الصندوق
    ربنا يسهل
    تحياتي

    ReplyDelete
  40. marvel:
    الحل اكبر منه ومنها بكتييير
    الحل في حل ازمات مجتمع بتعصف به مشاكل بطالة وفقر وعنوسة وكبت جنسي
    الحل في التربية الصح
    الحل ان كله يربي اولاده على الاخلاق بس لما يتوفر لهم الحد الادنى من الحياة الكريمة
    تحياتي واحتراماتي

    ReplyDelete
  41. الحلم العربي:
    اولا مهما كانت لابسة دة مصطلح غريب شوية
    اعتقد ان كل واحدة عارفة كويس قوي هي لابسة ايه ومتأكدة تمام التأكد ن لبسها دة هيعرضها لأيه
    والغريب والعجيب ان تلاقي البنت عارفة كويس قوي مناطق الانوثة فيها ومع ذلك تصر على ابراز المناطق دي بمنتهى الاثارة
    انا طبعا لا ابرر لشريف جبريل فعلته...فهو خطأ فاحش ولكني لا اريد تحميله اخطاء من قبله ومن بعده
    ولا اعفي اي بنت تتعمد الاثارة من المسئوليه
    تحياتي واحتراماتي

    ReplyDelete
  42. hafss:
    احمد يا باشا مش محمد دة اولا
    ثانيا
    اكيد طبعا هي مغلوطة من وجهة نظرك وبالتأكيد ليس كل من يخالفك الرأي افكاره مغلوطة
    ثالثا:
    طبعا انا اقر اخطاء هذا الشاب ولكن لكل فعل رد فعل مساو له في المقدار
    هو اخطأ واخذ جزاء خطأه
    انه باشوف انه جزاء قاسي وانت بترى انه جزاء غير رادع ولكننا متفقين انه اخطأ
    ثالثا:
    سؤالي بخصوص جنسيتها وتغيير رد الفعل بعد العلم بجنسيتها هو سؤال استنكاري وليس تأييدا لمن تخلوا عنها
    تحياتي و احتراماتي

    ReplyDelete
  43. micheal:
    يا مايكل انا مش مختلف معاك ان الولد دة اخطأ ولكني ارى ان العقوبة كانت في منتهى القسوة
    وتقريبا مستقبله ضاع
    وكنت ارى ان ممكن قرصة ودن تخليه يمشي زي الألف
    انما انا غير مختلف معاك خالص في موضوع انه اخطأ وكان يستحق العقاب
    تحياتي

    ReplyDelete
  44. ايناس لطفي:
    اولا الف شكر على اهتمامك بالمشاركة في الحوار
    ثانيا:
    كلنا معرضين للاختلاف في الرأي يا ايناس ومش معنى اننا نختلف في الرأي ان نصدم في بعض
    الموضوع مش محتاج صدمة ولا حاجة
    انا مش متعاطف معاه والله اتعاطف مع واحد بيمد ايده على بنات الناس؟
    دة كلام.......؟
    انما انا بأشوف ان الولد دة ضحية ظروف كتيرة قوي اكبر منه بكتيييير
    ضحية مجتمع قاسي وظروف بلد في منتهى الصعوبة
    انتي عارفة طبعا يا ايناس ان الناس كلها مش على نفس الدرجة من الاخلاق والتدين والعلم
    وبالتالي فالولد دة اخطأ تماما طبعا لأنه لم يستطع التحكم في غرائزه و رغباته
    برضة يا ايناس البنات او لنقل عدد كبير منهن يتعمد اثارة الشباب وارجوكي توافقيني ان دة بيثير في نفسهن او في نفس بعضهن الشعور باللذة
    وهل كل الشباب على درجة واحدة من الوعي؟
    يبقى البنات برضه عندهم دور مهم في الحد من ظاهرة التحرش
    ولو قلنا ان البنات مالهمش ذنب يبقى احنا ماحطناش ايدنا على المشكلة
    الف شكر ليكي مرة تانية
    تحياتي واحتراماتي

    ReplyDelete
  45. غمض عينيك:
    الله يخليك يا بو حميد
    بس شكلك بقيت مشغول جداا
    وماعنتش بتتابع
    ربنا يوفقك
    تحياتي

    ReplyDelete
  46. mahasen saber:
    والله كلام في الجول يا محاسن
    اكيد انتي حسيتي ان انا لا ابرر لشريف جبريل فعلته وانما ارى انها كانت القاضية بالنسبة له واضاعت مستقبله
    ومن منا لا يخطىء
    كل ما هنالك اني بأطالب بالرحمة دة ربنا بيرحم
    تحياتي

    ReplyDelete
  47. قلب مصري:
    طبعا انا لا ابرر الفعل وانما ارى ان العقوبة قاسية جدا
    ثانيا:
    بالنسبة لموضوع الجنسية انا كنت اتساءل سؤال استنكاري لحقوق المرأة اللي تخلوا عنها فور علمهم بأنها اسرائيليه
    و طبعا مفيش اطالة ولا حاجة
    تحياتي واحتراماتي

    ReplyDelete
  48. نهر الحب:
    اوافقك تماما في كل ما قلت
    انا بأتكلم عن القدرة على الصفح والرحمة والمغفرة وعدم ضياع مستقبل شاب اخطأ
    فقط ليس الا
    تحياتي

    ReplyDelete
  49. نهر الحب:
    جزاك الله كل خير
    ويجعله في كميزان حسناتك
    تحياتي واحتراماتي

    ReplyDelete
  50. barbie girl:
    والله العظيم موافقك تماما
    الحدث كبير و الولد دة اخطأ خطأ لا يغتفر
    انما برضة في حاجة اسمها الرحمة
    لو بصيتي لصورة امه وهي بتبكي منهارة على ضياع ابنها وسمعته و مستقبله
    ممكن جدا تعرفي ان الرحمة فوق كل شيء
    بس على فكرة
    مفيش اي دين في الدنيا يقرر ان البنت تثير غرائز الشباب بلبسها ومشيتها وكلامها وحركاتها بداعي شعار حرية المرأة
    تحياتي واحتراماتي

    ReplyDelete
  51. ضي القمر:
    انت كدة جبت المفيد
    اسمح لي استعير اخر جملة في التعليق عندك
    ياريت كل بنت تتقي ربنا في اللي تعمله
    بجد والله
    لا فض فوك
    تحياتي واحتراماتي

    ReplyDelete
  52. the rock:
    هأكتفي اني ارنه علقة واوديه اقرب قسم شرطة يدوله هم كمان الطريحة اللي هي
    بحيث كل ما يشوف واحدة ماشية في الشارع يستخبى لحد ما تعدي
    بس يمكن برضة دة كلام نظري على اساس ان اللي ايده في المية مش زي اللي ايده في النار
    تحياتي واحتراماتي

    ReplyDelete
  53. desert cat:
    انا مش معترض ومش فارقة معايا انها تكون اسرائيلية او حتى هندية
    انا كنت بسأل السؤال دة استنكاري بحت
    كنت بتساءل عن جمعيات حقوق المرأة ودعاة نصرة المرأة هيكون رأيهم ايه في الموضوع دة
    انا طبعا مش زعلان من كلامك
    انا رأيي ان شريف جبريل اخطأ وكان يجب ان يعاقب ولكن العقاب لا يعني تدمير مستقبله
    بس خلاص
    تحياتي واحتراماتي

    ReplyDelete
  54. احساس لسة حي:
    انت عبرت بالضبط عما اقصده بالتحديد
    انا لست ضد مبدأ العقاب
    ولكن العقاب بلا تدمير
    العقاب من غير ما نضيع مستقبل واحد غلط زي ما كل الناس بتغلط الاف الغلطات اليومية
    ممكن جدا نكون بنغلط غلطات اقل من كدة وممكن جدا بنكون بنغلط غلطات اكثر بشاعة بدون ما نشعر
    الرحمة فوق كل شيء
    بالنسبة لموضوعك
    ان شاء الله هتابعه
    تحياتي واحتراماتي

    ReplyDelete
  55. اعلان هام:
    شكرا على الدعوة الكريمة

    ReplyDelete
  56. سومة:
    لا طبعا هو لم يتحرش بيها علشان هي اسرائيلية ولا حاجة
    انا مش فارق معايا اسرائيلية او سعودية انا اللي فارق معايا الواد اللي كان اخره علقة مووت وخلاص فأذ به يفاجأ ان القضية تحولت لقضية رأي عام ويلبس 3 سنين وضياع مستقبل
    بيني وبينك بقى ومن غير زعل
    لو البنات راعت لبسها شوية....الظاهرة دي هتقل جدااا
    تحياااتي

    ReplyDelete
  57. mostafa rayan:
    لا فض فوك يا مصطفى والله
    والله العظيم يا مصطفى لو البنات راعوا ربنا في لبسهم وطريقة مشيتهم وتصرفاتهم كانت كتير من الظواهر السلبية هتختفي من شوارعنا
    يلبسوا ويدلعوا وييجوا يقولوا شباب مش متربي
    حاجة لها العجب والله
    تحياتي واحتراماتي

    ReplyDelete
  58. ايناس لطفي:
    ما بتفوتيش كلمة انتي يا ايناس
    تحيااااتي

    ReplyDelete
  59. طيب و تفسيرك ايه للرجالة اللي بتتحرش بالمحجبات و المنقبات؟؟ ما هما متغطيين اهو الله ينور و مع ذلك برضو بيتم التحرش بيهم و في النهاية لبس البنت مالهوش دعوة
    انا عاوزة واحد من الرجالة لمتحرشين الاشاوس دول يسافر برا و يحاول يتحرش ببنت عشان لابسه حاجة مستفزاه و نشوف حيحصله ايه
    دي اسمها قلة ادب معلش
    لبس البنت مش السبب
    دي مرض عن الراجل

    ReplyDelete
  60. السلام عليكم و رحمة الله و بركاته

    انا عايزة أرد و أقول كتير في الموضوع ده بس ردي هيبقى مقالي كبير بس بجد إنت اوحتلي بفكرة لموضوع كنت عايزة أكتبه من زمان وهكتبه خلاث بعد ما اوحتلي بالجزء اللي ناقص فيه

    وفي الموضوع هيكون ردي على تساؤلك تجاه قضية التحرش ضد المصريين ناخد حكم ولو اسرائيلية زي نهى رشدي نتركها ولا تستاهل ولا ايه

    ميرسي كتير ليك

    وبجد بحييك على اختيارك موضوعاتك

    بارك الله فيك

    في رعاية الله

    ReplyDelete
  61. hafssa:
    طبعا مش اي واحد هيشوف واحدة لابسة مش محترم هيتحرش بيها
    اكيد دي حاجة بتخضع للاخلاق والتربية وقبلهم الدين
    بس هل انتي بتشوفي ان لبس لبنت مالوش اي علاقة بالموضوع؟؟؟
    خالص يعني؟؟؟
    معقول؟؟؟؟؟؟؟؟

    ReplyDelete
  62. mero-moony:
    الف شكر ليكي على الكلام الكبير دة اللي اكيد انا لا استحقه
    في انتظار موضوعك القيم ان شاء الله
    تحيااااتي

    ReplyDelete
  63. يااحمد ... نهي رشدي اسرائيليه ؟؟؟؟ كلام كذب انما لو حقيقي هل ده مبرر او عذر للاخ اللي تحرش بيها انه يتحرش بيها ؟؟؟ ايه الكلام ده .. ثانيا سلوك المحاميه بتاعتها اللي غيرت موقفها سلوك غير مقبول مهنيا واخلاقيا ولا يجوز ليها تعمل طعن بالنقض للمتهم لان ده مخالف لقانون النقابه والحقيقه انا مش فاهمه ايه موضوع اسرائيليه وبتعمل افلام وثائٍقيه عن مصر والكلام الغريب ده ايه علاقه ده بهتك عرض نها رشدي ؟؟؟؟ ثالثا .. يااحمد سيبك من حكايه الراي العام وسيبك من الدوشه - المتهم ارتكب جنايه هتك عرض ( بلغه القانون ) ودي جنايه من زمان قبل الدوشه وقبل الكلام عن التحرش وعقوبتها شديده .. حكايه بقي انك تخيلت المتهم بيتكلم عن نفسه ويشكي .. انا محاميه وقابلت مليون متهم وكل واحد منهم يقدر يقعد يشكي عشر سنين ويحكي لك عن المبررات اللي دفعته ياحرام لارتكاب جريمته - اللي بيسرق لان فقير او لانه نفسه في حاجات ايده مش طايلاها او لان اللي اتسرق زغلل عنيه بالساعه ولا بالعربيه واللي بيختلس فلوس شغل ضعف زي عماد حمدي في ام العروسه واللي بيضرب غلبان وانفعل واللي بيقتل زي مدرس اسكندريه ماكانش قصده ... مبررات المتهم وحديثه وبكاءه وتفسير ليه ارتكب جريمته يخلينا نسيب كل الناس تعمل اللي نفسنا فيها وانسي القانون وانسي النظام وخليها غابه اكتر ماهي وخليها فوضي اكتر ماهي و،،،،،،، ماينفعش يااحمد .. ماينفعش نلتمس الاعذار والمبررات لاي حد ارتكب جريمه ونقول ليه ارتكبها ( ياحرام ياحرام ) وانا لسه بتعرف عليك جديد وعماله الف في مدونتك - ياريت تخش مدوناتي تتفرج عليها وتشاكسني انت كمان زي ماانا باشاكسك كده - تحياتي

    ReplyDelete
  64. اميرة بهي الدين:
    يا اميرة
    اولا الف الف شكر على اهتمامك
    ثانيا:
    انا لا التمس اي عذر للمتهم شريف جيريل فهو اخطأ بكل المقاييس انما انا التمس الرحمة ليس اكثر ولا اقل
    الواد دة اتعاقب بما فيه الكفاية
    انا التمس العفو عند المقدرة ليس اكثر
    ثالثا:
    استني بقى مشاكساتي ومناوشاتي والبادي اظلم
    ههههههههههه
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails