Saturday, 25 October 2008

استاذ بلال فضل....للدستور عليك فضل

الحكاية بدأت اول ما وقعت عيني على المصري اليوم عدد الخميس 23 اكتوبر 2008
ومحتوى الخبر هو ان الكاتب الساخر بلال فضل ورسام الكاريكاتير العبقري عمرو سليم انضما لأسرة المصري اليوم من خلال مقال يومي في الصفحة الأخيرة لبلال ورسم كاريكاتير في نفس الصفحة لعمرو سليم
طبعا الخبر دة لمن يعرف بلال وعمرو هو خبر مفرح جدا فالأول اشهر من نار على علم في الكتابة الساخرة والنقد والثاني رسام كاريكاتير معبر جدا جريء جدا يستخدم ابسط الرسوم لتوصيل اعمق واجرأ المعاني
واجتماعهما معا مرة اخرى شيء مفرح جدا واضافة حقيقية وقوية جدا للمصري اليوم
ولمن لا يعرف او "مش واخد باله" فبلال فضل وعمرو سليم اشهر ثنائي ساخر في الصحافة المصرية حاجة كدة شبه احمد رجب ومصطفى حسين زمااااااان بس على احدث
بلال وعمرو اشتهرا من خلال صفحات الدستور وبالتحديد صفحة (قلمين)بقلم بلال فضل ورسوم عمرو سليم...وطبعا نجحت "قلمين" بشكل كبير جدا وتحولت من صفحة واحدة لصفحتين وتم طبعها في كتاب يحمل نفس الأسم
بلال فضل هو احد مؤسسي جريدة الدستور في اصدارها الأول في منتصف التسعينات مع ابراهيم عيسى وكان ايامها بلال فضل مش بالشهرة دي طبعا وكانت الدستور هي صاحب الفضل بعد الله سبحانه وتعالى وبعد موهبته فيما وصل اليه من شهرة ومكانة كبيرة ككاتب ساخر وساحر ايضا
وكان مصير الدستور في اصدارها الأول هو ان صودرت ومنعت من الصدور بفرمان سيادي....واختفى بلال فضل تقريبا او خفت نجمه قليلا بعد منع الدستور من الصدور
ومع عودة الدستور في اصدارها الثاني برئاسة تحرير ابراهيم عيسى بزغ نجم بلال فضل مرة تانية والمرة دي من خلال صفحة قلمين)...مع رسوم عمرو سليم
ولا ينكر الا جاحد ان بلال فضل كان من اهم اسباب ارتفاع شعبية الدستور بشكل رهيـــــــــــــــــــب وانا اعرف ناس كتير كانوا بيشتروا الدستور فقط من اجل (قلمين) بلال فضل وعمرو سليم
شوية و "عمرو سليم" خلع من الدستور....وتقريبا كان نتيجة خلافات او لأنه مش مرتاح او مش لاقي نفسه وبقيت (قلمين) بس مع بلال فضل فقط بدون عمرو سليم
شويتين كمان ومفيش "بلال فضل" كمان....بس ارجع انسحابه من الكتابة في الدستور الى انشغاله بكتابة سيناريو مسلسل "هيما" وبالتالي مش فاضي للكتابة سواء اليومية او الاسبوعية
ولأول مرة تصدر (الدستور) بدون بلال فضل....واعتقد انها كانت ضربة قوية للدستور بخسارتها احد اهم كتابها ان لم يكن اهمهم على الاطلاق
وتفرغ بلال فضل فعلا لكتابة سيناريو مسلسل "هيما"...مع بعض الكتابات المتفرقة والنادرة للدستور الأسبوعي, وعرض مسلسل "هيما" وانتظرنا عودة بلال فضل لبيته الدستور من خلال مقالاته اليومية الممتعة ......حتى كان يوم الخميس 23 اكتوبر
بلال فضل في المصري اليوم
مش عارف ليه جالي شعور سلبي تجاه "بلال فضل" بالذاااات مش بلال وعمرو سليم....لأن ارتباط بلال فضل بالدستور ارتباط قديم وعميق...يكفي ان الدستور كانت بتبيع على حس بلال فضل...يكفي ان الدستور وبلال فضل عملوا بعض....بلال فضل صنع اسم وشهرة عريضة للدستور....والدستور هي اللي قدمت بلال وعرفت الناس ان في كاتب رائع اسمه بلال فضل
الدستور دلوقتي جريدة يومية.....والمصري اليوم جريدة يومية...واذا استثنينا جرائد الحكومة والحزب الوطني يبقى اهم جريديتين متنافستين في سوق الصحافة هما المصري اليوم والدستور
لما بلال فضل يترك الدستور ويكتب عمود يومي في المنافس الرئيسي يبقى ممكن نسمي ايه غير انه ضربة في الصميم من بلال فضل لجريدة صنعت اسمه
انا قارىء دائم للمصري اليوم واحترم هذه الجريدة جدااا ولا انكر اني احد عشاق الدستور منذ اصدارها الأول ولا يوجد عندي ادنى اعتراض على المصري اليوم كجريدة.....الا ان اعتراضي على بيع بلال فضل للدستور..اعتراضي على فقدان الأنتماء للمكان...للوطن...الدستور بالنسبة لبلال فضل هي الوطن وبيع بلال فضل للدستور هو بيع للوطن
من وجهة نظري طبعا
كتبت على جروب عشاق الكاتب بلال فضل على الفيس بووك
الكومنت دة على خبر انضمام بلال فضل لأسرة المصري اليوم
مع كامل حبي وتقديري واعجابي ىبالثنائي الناجح بلال فضل وعمرو سليم الا ان تركهم للدستور واتجاههم للمصري اليوم اثبت ان الماديات هي رقم واحد واتنين وتلاتة بالنسبة لهم ومش بعيد نلاقيهم في روز اليوسف قريبا لو دفعوا اكترمعلش انا اسف بس فكرة تخليهم عن الدستور بكل السهولة دي فكرة مش مستساغة على الاطلااااااااااق ويا استاذ بلال ياللي بتنادي بالشفافية والصدق و بتنتقد كذب المسئولين وخداعهم....ماقلتش من الاول ليه ان ترككم للدستور بسبب مشاكل او خلافات او انك مش مرتاح في الكتابة؟ايه لازمة اصلي مش فاضي...وماعنديش وقت وماشتبه...استاذ بلال.......يا خوفي لتبقى ذكرى لبني ادم رائع
اعرف ان الكومنت قاسي وخالي من اللياقة..بس فعلا انا زعلان من فك الأرتباط بين بلال و الدستور..وحاسس ان بلال فضل قد تخلى عن الدستور وسلم نفسه لمنافستها الرئيسية في عالم الصحافة
الا ان المفاجأة ان الاستاذ بلال فضل بنفسه علق على الكومنت القاسي دة بنفسه من خلال السطور التالية
أهلا بيك ياأستاذ أحمد وشكرا على ذوقك وعلى حسن ظنك
بالنسبة للماديات مش عارف أقولك إيه غير إنك تقول عدس عشر مرات لإنك لو سألت هتعرف أن ثمن مشهد في سيناريو بكل اللي ممكن آخده في كل الجرايد مجتمعة.. وده بحمد الله.. وأنا عندما أعرض مصالحي للخطر بسبب مواقفي فإني أفعل ذلك لكي أبرئ ذمتي وأريح ضميري
لن أتحدث بما يسيئ للدستور أبدا ولن أطلب من أحد سوى أن ينظر إلى ماأكتبه وليس إلى أين أكتبه
شكرا لك على حسن ظنك في والمهم أن يكون ماأكتبه عند حسن ظنك
بلال
وطبعا لم يكن من السهل علي ان دة يكون اسلوبي في الحوار مع كاتبي المفضل وان يكون دة رده عليا وبالتالي كان تعليقي التالي
ستاذ بلال انت مش عارف قد ايه انا بحبك وبحترمك وبقدرك ومش عارف قد ايه انا بأحترم المصري اليوم و بأعتبرها هي الصحيفة الأمل والحلم
بس انا كنت بأعتبر تجربتك في الدستور الاصدار الاول مع ابراهيم عيسى هي قصة نجاح لازم نحافظ عليها.....لازم نتحاكى بيها ونتكلم عنهااستاذ بلال بيكون صعب قوي على ناس عاشت حلم الدستور في اصدارها الاول والثاني ان تلاقي الحلم دة بيتلاشى...بينتهي
استاذ بلال انا اسف اذا كنت اتكلمت معاك بأسلوب غير راقي....بس دة والله من حبي واحترامي وتقديري ليك
استاذ بلال انا لما قابلتك في معرض الكتاب اللي فات واتصورت معاك..كان حدث تاريخي..صورة مازلت محتفظ بها على الموبايل لحد دلوقتي دة انا من كتر حبي فيك وفرحتي بالتصوير معاك عملت بوست في المدونة عندي بعنوان
انا اعشق هذا الرجل
وكنت انت هذا الرجل
بلال ا نا اسف على تجاوزي في النقد...لأن دة من العشم
والف شكر لك على اهتمامك وردك لأن دة مش غريب عليك
مع حبي
احمد سمير
انتهى السجال المفاجىء مع استاذ بلال فضل على صفحات الفيسبووك.......رد الاستاذ بلال علي اثبت ان فعلا في شيء ما في علاقة بلال فضل بالدستور سواء بينه وبين ابراهيم عيسى او رئيس مجلس ادارة الجريدة
استاذ بلال
سأستمر اقرأ لك سواء كتبت في الدستور او المصري اليوم او حتى الواشنطن بوست..فأنت كاتبي المفضل شئت ام ابيت....بس ارجوك لا تنكر عليا انزعاجي وضيقي من ذكريات جميلة ارتبطت بصولاتك وجولاتك على صفحات الدستور
ولا تطلب مني ان اتعامل معك بأعتبارك محترف يكتب في اي مكان
فأنت مش لاعب كرة قدم فقد انتماءه للمكان ويلعب من اجل المال والشهرة
فلا انت حسام حسن ولا الدستور هي الأهلي واكيد المصري اليوم مش زي الزمالك

45 comments:

  1. بص بقي يا نجم
    اولا:كويس اني اول تعليق على البوست دة بالذات
    معروف ان بلال فضل اول مابدأ بدأ في روزا اليوسف وبعدين راح الدستور في الأصدار الأول وفي الأصدارالثاني كان بلال فضل كاتب سينمائي كبير وله افلامه وجمهوره يعني الدستور هي اللي استفادت منه وسعت وراه
    معروف كمان ان ابراهيم عيسى مش اكتر من ديكتاتور وعنده شعور لا متناهي من تضخم الذات معروف كمان انه عمل مشاكل مع عمرو سليم وحصلت مشكلة بينه وبين عمرو في اجتماع المحررين وابراهيم قال انه صاحب الشغل هنا واللي عاجبه يقعد واللي مش عاجبه يمشي وغضب عمرو ورحل
    معروف كمان ان مشروع الكتابة في المصري اليوم كان من زمان قبل ماعمرو يسيب الدستور وساعتها ابراهيم عيسى غضب وقال ان الدستور مش هتكون فترينه لعرض شغل الناس علشان التانين ياخدوهم وفضل عمرو سليم البقاء في الدستور - رغم اعتراض الناس في روزا - لأنه كان رئيس قسم الكاريكتير وكان تحت ايده شباب موهوب وهو كان فرحان انه بيعمل جيل جديد من الفنانين الشباب
    معروف كمان ان ابراهيم عيسى عمل بعد كدةمشاكل مع بلال لكن رجع صالحه ورجع بلال يكتب مرة تانية على فترات متابعدة لكن لو تحس ماكانش بنفس الروح زي مايكون بيشتغل سد خانة او مجاملة او حاجة جواه مكسورةوهو بيكتب
    وزي ماهوقالك ان مشهد واحد في السينما قد اللي هياخده في كتابة الصحافة لمدة عشر سنين خصوصا انه كاتب مطلوب دلوقتي في السوق مش بس في السينما لكن في التلفزيون كمان - حساب التلفزيون مختلف عن حساب السينما تماما فاسامةانور عكاشةبياخد 30 الف جنيه في الحلقة ومحمد صفاء عامر بياخد مليون جنيه في المسلسل - بلال بيشتغل في الصحافة لأن اي كاتب موهوب يعشق كتابة الصحافة ويجد لذة في ان يرى عمله على ورق مقروء بين يد الناس بلال مش هيشتغل في مكان إلا لما يكون مرتاح نفسيا فيه لأن اهم حاجة في شغلة الكتابةهي الراحة النفسية واكيد بلال مش لاقي الراحة دي في الدستور ولاقها في المصري اليوم لاقي معاملة افضل وناس بتقدره افضل وحتى لوكان ساب الدستور من اجل المصلحةالمالية - وانا اوكدلك ان مش دة السبب - من حق اي حد يدور على مصلحته عايز اقولك ماتصدقش كل حاجة في الدستور فعيسى ليس ملاك الرحمة كما يصور نفسه وليس رجل الديمقراطية الأول كما يظن الناس ورحيل خالد البلشي وغيره من الدستور معروف
    يا اخي ليس كل مايلمع ذهبا
    اسف على الأطالة ولكن موضوعك شدني اني اكتب كل دة
    تحياتي لك ودمت بخير

    ReplyDelete
  2. انا كنت لسه هقولك اننا ماسمعناش وجهة نظر بلال والله أعلم ايه اللي ممكن يحصل

    وماينفعش يكون الحكم حيادي من غير مانسمعه

    واعتقد انه كده وضح ان في حاجه

    علي العموم ربنا يوفقه في اي مكان يكتب فيه

    ReplyDelete
  3. ردك كان قاسى جدا لان لما شخص بيكون صاحب فكرة معينه او حلم وتلاقيه تخلى عنه لازم تعرف انه اكيد فى حاجة اجبرته لان الرساله لا يتخلى صاحبها عنها بسهولة ابدا ابدا واحنا لازم يبقا عندنا حسن ظن لسبب اننا منعرفش ايه الى حصل لان التخحمينات الشخصية لاشخاص بعيدة عننا مش حاجة كويسة خالص

    ReplyDelete
  4. أنا معاك يا احمد فى إنزعاجك
    لأنى من أشد المتحمسين للدستور من بداياتها زمان و دلوقتى
    بس أنا سبقتك فى زعلك دا من الشاعر على سلامة لما ساب الدستور و أختفى حبتين و بعدين ظهر فى المصرى اليوم
    ساعتها حسيت بأحساسك و قولت ليه كدا يعنى الناس عرفته فى الدستور أزاى يسيبها لصالح المنافس الأول و الاخير لها المصرى اليوم
    و بعدين شوية بشوية بقى عادى
    أصله لو كان كتب فى الجرايد الرسمية كنت قولت بلال سقط من عقلى خلاص
    لكن الراجل راح جريدة لها نفس التوجه تقريباً
    يبقى المساءلة فيها سبب تانى
    هوه عدم الأرتياح فى التعامل مع الأدارة فيها
    لكن يبقى فى النهاية إننا نقرى كلام بلال و على سلامة و غيرهم فى منبر حر
    و بس
    تحياتى ليك يا أحمد و لزوجتك العزيزة

    ReplyDelete
  5. يا استاذ احمد

    المشكلة لما حد يتفق معاك على حاجة وبعدين يخلف وعده و ده اللى عمله الاستاذ بلال فضل مع قراء الدستور
    قال حيريح شهرين تلاتة ويرجع, ريح 6 -7 شهور و رجع بس على المصرى اليوم

    الاستاذ مصطفى ريان

    الاستاذ بلال هو من استفاد من الدستور وليس العكس وشوف انتاجه قبل تجربة الدستور الاصدار التانى وبعده
    وهو مبينكرش ده
    فمالذى تقوله؟

    ملحوظة

    المصرى اليوم ليست الجريدة الموضوعية و الحيادية كما تدعى
    وفى الكتير من الشواهد على كده
    ولكن يكفى التمويل الهائل و الدعاية المجانية اليومية فى القاهرة اليوم الذى تلقاه لتنجح خاصة انها مستقلة عن الدولة

    ReplyDelete
  6. رائع يا احمد
    المشكلة دى بقت تتكرر كتير

    ReplyDelete
  7. اخي ميدو
    انا قلت رأيي الدستور في الأصدار الثاني هي اللي استفادت من بلال لأنه كان وقتها كاتب مشهور ومطلوب في السينما - زي مااحمد قال كان في ناس كتير ( ممكن اكون انا واحد منهم) بتشتري الدستور علشان صفحة قلمين -
    يعني بلال كان عامل رئيسي من عوامل ارتفاع نسبة التوزيع للدستور
    اما عن المصري اليوم قد يكون ماتقوله صحيحا ولكن في رأيي هي رغم كل شيئ افضل بكثير جدا من الدستور
    ومعاملة مجدي الجلاد للناس اكيد احسن بكتير من معاملة ابراهيم عيسى
    دة رأيي اللي مقتنع بيه وارجو انك تتقبله
    تحياتي لك ودمت بخير

    ReplyDelete
  8. لست أرى هذه الفجيعة التى تراها فى انتقال الاستاذ بلاب فضل إلى جريدة أخرى هى المصرى اليوم بعد ان ترك الدستور فكلا الجريدتين يتمتع باحترام واسع فى الشارع المصرى وكلاهما ليس فى ركب النفاق ولا فى ركب الحكومة وبالتالى فهو لم يغير من مبادئه بهذا الانتقال، اما قصة الارتباط بينهما فهى ليست سوى عامل نفسى لاغير

    ReplyDelete
  9. بلال فضل موهوب
    لو ماكانش كتب في الدستور
    كان كتب في اي جريدة اخري و حقق نجاحه
    يعني مفيش جرنال له فضل علي كاتب
    العكس هو الصحيح
    الجريدة دي كيان اعتباري مش شخص و بيتكون من مجموعة من الصحفيين و الكتاب
    محدش له فضل علي حد ده فريق عمل يظل يعمل حتي في غياب احد افراده
    بلال فضل ككاتب موهوب و لم تساهم اي جريدة في تلميعه لأنه موهبته لامعة اساسا

    ReplyDelete
  10. استاذ مصطفى ريان

    يا استاذى الدستور الاسبوعى توزيعها ارتفع بعد رحيل بلال الى 130 الف نسخة مش بلال بس هو عنصر الجذب فى الجريدة

    اما عن المصرى اليوم

    فهى ليست أفضل من الدستور فى شىء اللهم الا المصادر والتمويل و الدعاية و ربح الاعلانات

    المصادر و الاعلانات تخاصم جريدة الدستور وحضرتك عارف السبب
    ورغم ذلك الجريدة ناجحة جدا رغم قلة الموارد

    اما لو قصدت السياسة التحريرية فده شىء اخر ومدارس مختلفة و لها قراءها

    تقول ان بلال يكتب للدستور وجواه حاجة مكسورة مثلا

    طب ايه رأيك فى ده

    بالنسبة للمعاملة

    انت بنيت رأيك على موقف او اتنين بيحصلوا فى كل الجرايد وأسوء من كده
    لكن المعاملة عامة مش زى مبتقول

    فى ايه اكتر من افراد مساحة نصف الصفحة الاولى للجريدة لرسم كاركياتورى للفنان عبدالله احمد الصحفى بالجريدة ويضع صورته مقابلة لصورة رئيس التحرير على مقال رئيس التحرير
    وتقولى المعاملة!!!!!

    اه بالمناسبة
    مجدى الجلاد فصل 17 محرر فى الجريدة اول امبارح
    و طفش الاستاذ محمد الشربينى محرر باب السكوت ممنوع اللى راح على جريدة الطريق
    ومنع مقالات لسعد الدين ابراهيم و صافى نازكاظم

    وشوف الرابط ده
    http://norayounis.com/2008/05/12/295

    تحياتى

    ReplyDelete
  11. لورنس العرب25 October 2008 at 17:14

    بصفه عامه الحرب بين الصحف زي الحرب بين الانديه على اللاعبين، عندك جميع صحف المعارضه بتتخانق مع بعض، حتى الصحف الحكوميه -الاخبار والاهرام- بيتخانقوا مع بعض، يعني انه يترك الجريده ده شيء طبيعي وانه يذهب لأخرى، ولو اني اعتقد ان السبب في هذا الامر هو المتكبر ابراهيم عيسى والله اعلم
    على أي حال الرجل سيعطي كلمته في أي ملعب

    ReplyDelete
  12. أنا لم أعرف بلال فضل إلا من خلال أفلامه
    :)

    خالص تحياتي

    ReplyDelete
  13. قبل مااكمل قراءة الموضوع واعرف راي بلال فضل كنت ح ادخل اعلق واقول لك اكيد ابراهيم عيسى عمل فيه مقلب

    صراحة عدد كبير من الناس متصورة ان ابراهيم عيسى هو اللى عمل الدستور واي حد ساقته الصدف للتواجد في نفس حيز ابراهيم عيسى اتفتحت له طاقة القدر ونسيوا ان كل من لديه موهبة هو فقط من يستمر مع الجمهور

    عن نفسي كنت اشتري الدستور من اجل قلمين ومقال او اثنين لبعض الكتاب المحترمين

    وبمرور الوقت وبعد اختفاء بلال وقبله عمرو سليم لم احتمل ان افقع مرارتي بجريدة مكررة ومستواها ضعيف وحتى لغتها متواضعة فتوقفت عن قراءتها خاصة بعد ان اصبحت يومية ومجرد حشو وخلاص

    بالتأكيد بلال فضل له اسلوب مميز هو من حفر له اسمه في الدستور وجعل للدستور مكانة وليس العكس

    وعلى فكرة الكثير ممن كانوا يكتبون في الدستور واختفوا في ظروف غامضة استغلهم الدستور ثم القى بهم في اول مفترق

    وهذا هو الحال مع الكثير من الصحف التي تستفيد من المواهب ثم تستغني عنهم
    ولكنهم لايعرفون ان هذا الاسلوب قد يصرف القراء عنهم لانهم يتصورون ان الجريدة لها البقاء حتى لو رحل عنها من صنعوها

    نفس الامرحدث مع الاهرام التي كانت صحيفة عريقة في يوم من الايام ثم تحولت لدكان يبيع لمن يدفع واختفى منها الكتاب المحترمين تباعا فلم يعد لها مريدين كالسابق اللهم الا من يريد ورق جرائد لاستعمالها في اغراض اخرى غير القراءة

    اي جريدة تحترم قراءها عليها ان تحترم كتابها قبلهم حتى تحافظ على هؤلاء القراء

    تحياتي

    ReplyDelete
  14. حبيبي أحمد
    طيب ليه مسألتش السؤال ده لما علي سلامه ترك الدستور
    ومحمد المخزنجي ترك مساحه للدهشه في الدستور الاسبوعي
    أكيد هناك جوانب خفيه احنا منعرفهاش
    بس الدستور هتستمر
    وهيستمر بلال فضل يكتب وعمرو سليم يرسم
    وتدور الدائره

    ReplyDelete
  15. انا قلت عند ميدو ...يمكن معكبوش دستور الدستور فراح يدور على دستور تانى
    ........
    فاهم حاجه اصل انا فاهمه يا بلديات
    .....
    ومش هفهمك متحاولش

    ReplyDelete
  16. بصراحة انا لو مكانك كنت هعمل زيك ، لكن بردو مانعرفش ايه اللى خلاه يطلع من الدستور
    أنا لما فكرت فيها لقيت ان انا كمان عملت نفس الشئ ما سبت الشغل اللى كنت بحبه أوي ورحت مكان تانى علشان هاخد منه خبرة
    لكن طبعا تجربة بلال فضل مختلفة عن مجرد ان الواحد يسيب شغله
    اتمنى لبلال فضل التوفيق في المصري اليوم وسواء هو هنا أو هنا ده مكسب للجمهور

    تحياتي لإيجابيتك

    ReplyDelete
  17. هل تريد من تعرف من وراء اسقاط الطائرة المصرية فوق المحيط؟
    هل تريد ان تعرف الجهة وراء محاولة اغتيال حسنى مبارك؟ هل تريد ان تعرف من وراء مقتل سعاد حسنى و أشرف مروان؟ هل تريد معرفة القصة الحقيقية وراء مقتل ضابطة المخابرات الأمريكية فى أحد فنادق القاهرة؟ اذا أردت معرفة كل الأسرار والملابسات الخاصة بكل القضايا السابقة وغيرها من الملفات السرية فتابعنا اسبوعيا لتكتشف كنز من المعلومات الصادمة والغير متاحة الا فى ملفات اجهزة المخابرات

    سري للغاية
    http://toptop-secret.blogspot.com

    ReplyDelete
  18. أعتقد أن دي طبيعة الحياة بلاش نكون رومانسيين المفروض نفرح له جميل أنه يكتب في أكتر من مكان وممكن مش في قدرته أنه يكتب في الأتنين سوا

    كل الكتاب الكبار مروا بمراحل زي دي بيكتب في مكان وبعدين روح غيره وهكذا

    ReplyDelete
  19. مممممممممم

    طبعا بما اني كنت بعيدة عن عالم التدوين والدنيا فانا مش عارفة

    مش قادرة احكم طبعا غير لما اكون ملمة بالموضوع واعرف ايه هي وجهه نظر بلال فضل نفسه


    سيبك انت
    انت عامل ايه
    ؟

    ReplyDelete
  20. ماتصدقش
    1\11
    مؤتمر القلة المندسة
    على الانترنت
    مؤتمر موازي لمؤتمر أكاذيب الحزب الوطني
    مؤتمر القله المندسه
    ردا على اكاذيب الوطنى
    ماتصدقش
    كل سنه بيقولوا نفس الكلام
    كل سنه بيكذبوا نفس الكذب
    بقالهم سنين بيكرروا نفس الكلام عن الفكر الجديد و العبور للمستقبل و الرخاء اللى احنا عايشين فيه
    و الرفاهيه اللى مش حاسسين بيها
    المره دى جايين يعرضوا معجزاتهم اللى حققوها
    من تشغيل كل العاطلين و حل جميع المشاكل و رفاهيه و نعيم
    و مشروعات و ديمقراطيه غير مسبوقه فى تاريخ العالم
    و تعليم ايه و صحة ايه و محاربة فقر و كمان فساد
    احنا بقى اللى هانرد عليهم و نفضحهم فى العالم كله بأراء و أرقام و احصائيات
    و نعرف كل الناس اللى مش عارفين انهم كذابين ..
    وان كنا نشك ان فيه لسه ناس مش عارفين كذبهم
    هانفضح كذبهم
    و نفضح فشلهم
    فى الصحه و التعليم و التنميه و محاربة الفقر و محاربة الفساد
    و نعرف كل الناس إن الاصلاح الحقيقى ضد مصالحهم..
    و إن الفكر الجديد ما هو إلا خدعه و كذبه جديده يضاف لكذبهم
    من 28 سنه
    احنا اللى بيقولوا علينا القله المندسه..
    رغم اننا الشعب ..
    الاغلبيه
    مؤتمر الحزب الوطنى..
    .ماتصدقش
    تابع معانا مؤتمر القله المندسه الالكترونى...
    أول مؤتمر افتراضى فى مصرفى الايام 1 و 2 و 3 نوفمبرعلى الموقع
    www.anti-ndp.com
    برعاية شباب 6 ابريل
    تسجيلات حيه
    لقاءات جريئه مع كبار المفكرين و العلماء
    بيانات للرد على الحزب الوطنى من جميع القوى و الحركات السياسيه الوطنيه
    استمع لرأى الناس فى الشارع يردون على اكاذيب انجازات الحزب الوطنى
    موقع المؤتمر
    www.anti-ndp.com
    أو مدونة المؤتمر
    http://anti-ndp.blogspot.com/
    ........................................................................
    ملحوظة هامة
    ليس هذا إعلان
    ولكنه دعوة للحضور والمشاركة
    شاركنا في
    مؤتمر القلة المندسة
    شباب 6 أبريل

    ReplyDelete
  21. mostafa rayan:
    اولا الف شكر ليك يا مصطفى على اهتمامك ومتابعتك
    ثانيا:
    بلال فضل في الاصدار الاول من الدستور لم يكن كاتبا مشهورا ولا حاجة بالعكس هو كان كاتب موهوب وابراهيم عيسى توسم فيه النبوغ دة وبالتالي استعان به في تأسيس الدستور في اصدارها الاول وكان احد اهم عوامل نجاحها
    بالنسبة لمعاملات ابراهيم عيسى مع زملاءه في الدستور فأنا بصراحة ماعنديش معلومات كفاية بس اكيد انت ادرى لأنك بتتكلم عن وقائع ربما انت عارفها
    القصة كلها يا مصطفى مش قصة ان ابراهيم عيسى مريح ولا لا
    القصة ان الدستور هي بيت بلال فضل ومحدش بيسيب بيته علشان اخوه مضايقه
    الف الف شكر لك على اهتمامك
    تحياتي واحتراماتي

    ReplyDelete
  22. esraa:
    بس انتي لو قريتي البوست يا اسراء هتعرفي ان بلال فضل قال زجهة نظره فعلا في رده عليا
    وهو انه يكتب في المكان الي هو عايزه المهم انه بيكتب كلام محترم
    وقال انه لن يجرح في الدستور
    بس
    تحياتي

    ReplyDelete
  23. هوندا:
    فعلا ردي كان قاسي لاني فعلا احب هذا الكاتب واحترمه
    لم اتخيل ان بلال فضل يسيب الدستور لجريدة منافسة
    حتى لو كانت الجريدة المنافسة دي هي المصري اليوم التي اعشقها واقدرها
    بلال فضل والدستور زواج كاثوليكي لا فرار ولا فكاك منه
    تحياتي واحتراماتي

    ReplyDelete
  24. فاتيما:
    اولا ازيك يا فاتيما وانتي فين من زمااان؟
    اشتقنا لتعليقاتك ومشاركاتك المميزة والمتميزة
    فعلا بتحسي انك فقدتي جزء من ذكرياتك لما بتلاقي كاتبك المفضل انتقل لجريدة اخرى
    زي بالضبط لما تلاقي واحدة صاحبتك الانتيم سابتك لصاحبة تانية
    الناس دي لازم تعرف ان القراء لهم حق وانهم بيحسوا و بيتأثروا مش مجرد الالات
    تحياتي ليكي والف الف شكر

    ReplyDelete
  25. mido:
    القضية يا ميدو ان بلال تعامل مع الدستور بمنطق الجريدة اللي بيكتب فيها في حين ان احنا بنعتبر الدستور هي بيت بلال فضل
    وبالتالي هنا كانت الصدمة
    هو تعامل معاها بمنطق الجريدة والادارة واحنا تعاملنا معاهم بمنطق البيت والاهل
    مش عارف ليه انا بأحس ان في مسحة غرور تسربت للمصري اليوم وان لهجتها اصبحت اخف كثيرا
    يا خوفي تجربة المصري اليوم تتحول هي كمان لذكرى يبقى ساعتها قل على الدنيا السلام
    الف الف شكر على تعليقك القيم وكمان على البوست بتاعك اللي في مدونتك الرائعة
    تحياتي واحتراماتي

    ReplyDelete
  26. ahmed al-sabagh:
    ايه يا عم احمد
    هو الكلام بفلوس؟
    طبعا الف شكر على اهتمامك وتعليقك ولكن كان نفسنا تثري الموضوع بتعليق يتناسب مع احمد الصباغ ودماغه الرائعة
    تحياتي واحتراماتي

    ReplyDelete
  27. mostafa rayan:
    بص يا مصطفى
    انا اكتشفت ان كلنا متفقين على نقطة مهمة جدا
    حبنا لبلال فضل واحترامنا وتقديرنا للدستور والمصري اليوم
    واي خلاف بعد كدة هي خلافات فرعية
    تحياتي واحتراماتي

    ReplyDelete
  28. لورنس العرب:
    بلال فضل فعلا قال كدة برضة
    قال ان المهم مااكتبه وليس اين اكتبه
    بس برضة بتبقى علاقة بلال فضل بالدستور علاقة ارتباط وثيق
    تحياتي

    ReplyDelete
  29. ياسر حسين:
    معقول يا استاذ ياسر؟
    دة بلال فضل اشهر من نار على علم
    بس يمكن علشان تواجدك خارج مصر هو السبب
    ربنا يرجعك بالسلامة
    تحياتي

    ReplyDelete
  30. bella:
    انا بلاحظ ان في ناس كتير من اللي علقوا على الموضوع دة رأيهم سلبي جدا حول ابراهيم عيسى
    بس كل اللي اخشاه واتمنى ان اكون مخطئا ان يكون الاعلام الحكومي هو السبب ويكون زي ما قدر يشوه صورة ايمن نور لدى العامة يكون نجح في دة مع ابراهيم عيسى
    طب ليه ما تقوليش ان هم لما اشتهروا واسمهم لمع تخلوا عن الدستور؟
    وارد جدا يكون دة اللي حصل
    تحياتي

    ReplyDelete
  31. محمد مفيد:
    لك وحشة والله يا محمد
    انت فينك؟
    اكيد طبعا الدستور هتستمر...بس عارف لما تبقى الدستور مرتبطة ببلال فضل ويكون بلال فضل مرتبط بالدستور من البداية ويحصل فك للارتباط دة
    بتكون حاجة محزنة جدا
    تحياتي واحتراماتي

    ReplyDelete
  32. mahasen saber:
    فاهم طبعا يا شرقاوية يا بلدياتي
    اه يانا من لؤم الفلاحين الشراقوة دول؟؟؟
    بس عايز اقول لك حاجة مهمة
    دستور المصري اليوم مش مضمون برضة...جايز جدا يكون دستور الدستور افضل بكتيـــــــــــر
    تحياتي واحتراماتي

    ReplyDelete
  33. قلب مصري:
    انا اسف جدا اني اخليت بالترتيب في الرد على التعليقات بس دة خطأ غير مقصود راجع لتحميل الصفحة
    بالنسبة للموضوع
    اه طبعا هو عامل نفسي مفيش شك...بس برضة لازم لا نغفل العامل النفسي دة في الحكم على الاشياء او درجة تقبلها
    تحياتي واحتراماتي

    ReplyDelete
  34. karakib:
    وهل ممكن اي جريدة تستحمل نقد بلال فضل وسخريته الاذعة الا الدستور؟
    عفوا
    الاثنين افادا بعض تماما
    الدستور اعطت لبلال الشهرة والنجومية وبلال اعطى للدستور الصيت والشهرة والمبيعات
    تحياتي واحتراماتي

    ReplyDelete
  35. mido:
    زي ما تفقنا يا ميدو
    كلنا لا نختلف على حب بلال فضل والدستور
    وبالتالي يصعب علينا ان يسير احدهما في طريقه بدون الاخر
    انا متأكد ان بلال فضل عائد للدستور يوما لا محالة
    تحياتي

    ReplyDelete
  36. الحلم العربي:
    اه
    احنا ممكن ننتقل من عمل لاخر ومن شركة لاخرى
    لأن ماحدش منتظر مننا اي حاجة
    احنا لم نؤسس الشركة اللي احنا فيها ولم نؤسس الاخرى
    الاتنين بالنسبة لنا اماكن للشغل ليس الا
    مصدر لكسب الرزق
    انما في حالة بلال فضل مع الدستور الأمر بيختلف..القضية مش قضية سبوبة
    القضية قضية عشرة وتاريخ
    الف شكر
    تحياتي واحتراماتي

    ReplyDelete
  37. Free Egypt:
    طبعا اريد ان اعرف
    علم يافندم وينفذ في التو
    تحياتي

    ReplyDelete
  38. شباب روش طحن:
    يمكن دة يكون كلام سليم تماما بمنطق البيزينس والعقل والمنطق العملي
    انما لو اتكلمنا بمنطق ارتباط الكاتب بصحيفته وبقراءه
    يبقى البوست دة ينفع
    تحياتي

    ReplyDelete
  39. smraa al nil:
    انا تمام الحمد لله
    و عود احمد للتدوين
    بس على فكرة
    رأي بلال فضل جوة البوست
    تحياتي

    ReplyDelete
  40. انا انسان:
    شكرا لدعوتك
    الف الف شكر
    تحياتي

    ReplyDelete
  41. أنا عارف إن بلال فضل أشهر من نار على علم
    لكن اول ما لفت نظري إليه ..أفلامه
    بمعني أني شفت أفلامه قبل ما أقرأ له
    وليس معنى أني مسافر بره مصر أني غير متابع
    :)

    خالص تحياتي

    ReplyDelete
  42. ياسر حسين:
    طبعا كدة الرؤية وضحت يا فنان
    ماهو مش معقول ياسر حسين بثقافته واطلاعه ما سمعش عن بلال فضل
    انا قلت برضة اكيد في حاجة غلط
    تحياتي واحتراماتي

    ReplyDelete
  43. من بلال فضل مع التحية
    اشكر الأستاذ أحمد على ‘إهتمامه المبالغ بشخصي الضعيف وبأين سأكتب.. واشكر جميع الأصدقاء الذين رد بعضهم بالنيابة عني ووضع الأمور في نصابها
    الحقيقة أنا لاأدري بأي حق يتحدث الأستاذ أحمد بالنيابة عني ويأخذ لي قراراتي ويقرر أين هو بيتي وأين ينبغي أن أكتب..يعني العشم برضه له حدود وإذا كنت تحب كاتبا وتحترم قلمه فمن باب أولى أن تحترم إختياراته في الحياة وتتأكد أنه لايتخذ قرارا بشكل عشوائي بل لديه أسبابه التي ليس مجبرا بالضرورة أن يقولها لك.. عليك أن تحاسب الكاتب ماذا سيكتب وليس أين يكتب.. وتاريخ الصحافة والكتابة مليئ بناس انتقلوا بين صحف ومجلات.. وليس صحيحا حتى إذا ذهبت إلى صحيفة حكومية أني غيرت قناعاتي فأنا كتبت في الشباب والمصور وغيرها ولم أتغير بحمد الله.. حاسب الكاتب على مايكتبه وليس أين يكتب.. بمرور الزمن تزول ظروف وكواليس الكتابة وتبقى الكتابة.. أتمنى أن يكون هناك هدوء وعدم تقمص دور القاضي لكي تطلق الأحكام على من تريد.. وقد رددت عليك إحتراما لك ولمحبتك لي.. لكن أن تنصب من نفسك قاضيا وتختار لي أين أكتب فلماذا بالمرة لاتختار لي ماأكتبه.. أما عن علاقتي بالدستور وأستاذي ابراهيم عيسى فهي علاقة تاريخية لن تتغير ولن تتاثر.. فقط أنت تنسى أنني كتبت في المصري اليوم على مدى العامين الماضيين وهاأنا أعود إليها من جديد لأنه ليس من الضروري أن يتركز كل من تجمعهم نفس الآراء في مكان واحد والمصري اليوم ليست بحاجة لمن يدافع عنها هي تدافع عن نفسها أما أنا فكتاباتي هي التي تدافع عني
    لك تحياتي وتمنياتي بالهدوء والتركيز مع الكتابة وترك الكاتب لمن خلقه لكي يحاسبه

    ReplyDelete
  44. استاذ بلال فضل
    انا من اشد المعجبين بحضرتك واسلوبك
    وكمان كنت اتساءل مثل الجميع وذلك نابع من حبنا لك وللعلاقه الجميله بينك وبين الاستاذ ابراهيم عيسى ومن حبنا لجريده تعبر عنا بمنتهى الصدق والموضوعيه
    ومش معنى كده اننا ننصب لحضرتك محكمه او نتدخل فيما لايعينينا وانا منزعجه من اسلوب حضرتك فى الرد على احمد على الارغم بعد معرفتى به
    ولى ان اذكرك انه عندمه سال ابراهيم عيسى عن صحه الرئيس كشخصيه حاكمه ويهم الجميع امرها نصبوا له محكمه
    فلاداعى ان نتشبه بمن ننتقضهم مع الفارق
    وان تحتد فى الرد وتتهمنا بالهدوء
    وان تقول انك حر تفعل ماتريد وتكتب فى اى مكان تراه الانسب وان تتهمنا بالتجاوز الى حد مايقرب باختيارنا لما تكتب
    ارجو المعذره اذا تجاوزت حدودى ولكنه من شده احترامنا وحبنا لك لانريد ان تهتز الصوره الجميله المتواضعه بداخلنا
    مع قبول احترامى
    سهام سمير
    اكتب فى جريده الوفاق

    ReplyDelete
  45. أنا عارف إن بلال فضل أشهر من نار على علم
    لكن اول ما لفت نظري إليه ..أفلامه
    بمعني أني شفت أفلامه قبل ما أقرأ له
    وليس معنى أني مسافر بره مصر أني غير متابع

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails