Monday, 20 October 2008

انا والشروق والحكيم

اول حاجة بأعملها اول ما ادخل مول "سيتي ستارز" حيث فسحتي المفضلة في القاهرة هو التوجه الى جناح "دار الشروق"....لدرجة اني بتعمد اني ادخل من الباب الخارجي المؤدي لها بسهولة بدلا من الدخول من الباب الرئيسي للمول لأني فعلا بأكون متشوق للدخول لدار الشروق فعلا ومعنديش وقت اضيعه في اللف في المول
الأول اشبع رغبتي في التوجه لدار الشروق وبعدين ممكن اعمل اي حاجة تاني
والحقيقة ان "دار الشروق" في كل مرة لا تخذلني وانما (تبهرني) ....طريقة عرض مغرية جدا...كتب جديدة كل مرة...ركن للأكثر مبيعا...ركن للأحدث........ركن للتراث واخر للسياسة واخر للاقتصاد...وهكذا
عدد الكتب كبير جدا قياسا بحجم الجناح وهو ما يؤدي الى ان عددا كبيرا جدا من الكتب يكون متواريا عن النظر ولابد من البحث والتدقيق من اجل الوصول الى الكتاب المراد او مجرد تصفح الكتب دة طبعا اذا كنت لا تفضل الاستعانة بأحد العاملين بالمكتبة وهم شباب على درجة عالية من اللياقة والكياسة وحسن المظهر
واذا قررت طلب المساعدة ستجد الاجابة على تساؤلك فورا حيث ان المكتبة بالكامل مجدولة ومفهرسة على الكومبيوتر وبالتالي سءالك عن اي كتاب بالتأكيد ستجد عليه جوابا فوريا
الجميل برضة في جناح "دار الشروق" انه لا يبيع مؤلفات واصدارات دار الشروق فقط وانما جميع الاصدارات لجميع دور النشر فستجد هناك اصدارات "ميريت" و"الدار" و"اكتب"و اصدارات معظم دور النشر العربية واللبنانية وبالتأكيد بالنسبة لي كقارىء غير قاهري بيكون اكثر راحة لي اني الاقي جميع الاصدارات لجميع دور النشر في مكان واحد يتميز بسهولة العرض والشياكة والفخامة ناهيك عن انه كمان في احد اكبر مراكز التسوق والترفيه في مصر وبالتالي هتضرب اكثر من عصفور بحجر واحد
معظم قراءاتي خلال الفترة الماضية تركز اكثر على الاجيال الجديدة من الكتاب والمؤلفين...وبالأخص اصدارات "ميريت"..معظم اصدارات ميريت بتكون لوجوه جديدة بتشق طريقها في عالم الأدب زي احمد مراد وروايته الجميلة "فيرتيجو" وسبق لي ان كتبت عنها تدوينة وزي "ان تكون عباس العبد" وزي كمان "قمر على سمرقند"....الخ من الكتب والاصدارات الجميلة
لم يسبق لي على الاطلاق ان قرأت رواية لأحد فطاحل الادب المصري الراحلين زي احسان عبد القدوس ويوسف ادريس ويوسف السباعي وتوفيق الحكيم...الخ
كنت دايما اقول لنفسي وانا اقرأ للناس القديمة دي ليه؟ تلاقيهم بيكتبوا كتابة قديمة بمصطلحات قديمة وبأسلوب غير مستحب وغير مستساغ بالنسبة لي....انا عايز يا عم اقرأ حاجة واقعية بتمسني وبتمس حياتي ومجتمي وبتنكأ جرح في نفسي مش في نفس ابويا او جدي
وفضلت ماشي على النهج دة في القراءة والثقافة لحد زيارتي الاخيرة في العيد لدار الشروق
قلت اتفرج على الكتب اللي مش ع الوش...الكتب اللي مش (على وش القفص).....الكتب اللي مستخبية....وقعت في ايدي رواية اسمها "عودة الروح" لتوفيق الحكيم...انا كنت اسمع ان في مؤلف لتوفيق الحكيم اسمه "عودة الروح" انما ماعنديش اي معلومات عنها هل هي قصة ام مسرحية ام رواية
مش عارف ليه اتشديت للرواية دي وقررت اقتنيها واقرأها على الرغم ان دة ضد نهجي الثقافي..بس قلت اجرب مش هاخسر حاجة لو طلعت رواية حلوة يبقى كسبت اني قرأتها ولو طلعت مش ولابد بالنسبة لي طبعا يبقى كسبت اني اثبت ان مزاجي الثقافي لا يتفق مع ادب العمالقة واني كنت صح
بعد قراءتي للرواية دي اقر واعترف وانا في كامل قواي العقلية اني غلطاااااااان غلطان غلطان وان توفيق الحكيم دة اديب حرام انه ما يبقاش عالمي
وعلى الرغم ان الرواية دي تم كتابتها سنة 1927 وتم طرحها للأسواق عام 1933 الا انها تبقى صالحة للقراءة وبث المتعة لقارءها عام 2008
الرواية بتقع احداثها قبيل ثورة 1919 واقدر اقول عنها بالفم المليان انها رواية شاملة كاملة فيها الكوميديا وفيها التراجيديا فيها الجد وفيها الهزل فيها السياسة وفيها الرومانسية فيها عظمة الفلاح المصري وفيها قهره .....فيها الثورية والوطنية..رواية هتضحك وهتبكي هتتفاعل مع ابطالها هتحزن لما تنتهي من قراءاتها لأحساسك انك هتفتقد الناس دي
بعد انتهائي من قراءة الرواية بحثت عنها على الانترنت لأعرف ما كتب من نقد وتحليل لرواية "عودة الروح" اكتشفت معلومات مذهلة لأول مرة اولها ان بطل الرواية ومحور الاحداث "محسن" هو توفيق الحكيم نفسه وان رواية "عودة الروح" انما هي سيرته الذاتية في فترة حياته الاولى كطالب في الكفاءة وهي توازي اولى ثانوي حاليا
عرفت كمان ان الرئيس(جمال عبد الناصر) قلده قلادة الجمهورية سنة 1958 تقديرا له على رواية (عودة الروح) اللي تنبأ فيها سنة 1927 بظهور البطل المنتظر اللي هيلتف حواليه المصريين خصوصا الفلاحين نحو هدف واحد وهو النهوض بمصر و رفعها عاليا في مصاف الامم المتحضرة
بعد انتهائي من رواية "عودة الروح" قررت ان اكون "حكيمي" اي من دراويش ادب توفيق الحكيم وان احاول اقتناء مجموعته كاملة سواء الروايات او المسرحيات او الكتب الفلسفية (له اكثر من 100 مسرحية و 62 كتاب بين قصة ورواية وفلسفة)...وان شاء الله سأتمكن من ذلك
شكرا لدار الشروق اهتمامها بأعادة طباعة روائع الأدب العربي طباعة فاخرة واحياء تراث كبار الأدباء والكتاب حتى يستفيد صغار القراء
حقا القراءة متعة...ومتعتها تكمن في ان تنفصل تماما عن عالمك و تغوص في اعماق شخصيات اخرى تعيش وتتعايش معهم بقلبك وعقلك ومشاعرك لعل هذا التقمص والتعايش ينسيك ولو لدقائق واقعك المؤلم
ربما العودة لمصر1919 تكون هي العزاء لأحباطات مصر 2009

32 comments:

  1. ومش توفيق الحكيم بس
    أكتر الأدباء دول كده لو مكنوش كلهم
    انت لازم تقرألهم كلهم
    (:

    ReplyDelete
  2. انا عندى شبهه زهايمر ف موضوع الروايات ده
    ممكن انسى احداث الروايه
    الروايه دى انا متأكده جدا انى قريتها
    موش عارفه ليه دى الروايه الوحيده تقريبا



    لآ موش اللى فاكراها
    بالعكس اللى موش فاكره عنها اى حاجه نهائىىىىىىىى مع انى متاكده انى قريتها ومش من زمان اوى يعنى
    حتى كلامك عن محسن والسيره الذاتيه للحكيم بردو مفكرنيش بحاجه
    بس هحاول ادور عليها واقراها تانى بعد الكلام ده

    ReplyDelete
  3. بص انا هقولك على حاجه انا لما بنزل مصر ما بتحركش من ستي ستارز لاني انا كمان بموت فيه وغير كده في كل حاجه فما بأحتجش اخرج منه بس تخيل عمري ما شفت دار الشروق هي بيتدخل لها من اي بوابه ياريت تقولي لان انا مدمنه قراءه وبجد كويس انك غيرت فكرتك عن الحكيم وعقبال الباقي بجد هتحبهم جدا وكمان في يوسف عزالدين عيسى رائع واجمل رواياته الواجهه تحفه بجد وغريبه جدا بس للأسف قليل جدا اللي قروها وفهموها وفي يوسف السباعي رائع برضه وعبد الحميد جوده السحار بجد ياريت
    تقرالهم كلهم بجد الناس دي مش هتتعوض

    ReplyDelete
  4. هناك كتاب اخر لتوفيق الحكيم اسمه عودة الوعي
    وهي مراجعه منه لهذه الرواية
    حاول ان تقراها

    ReplyDelete
  5. الكتب من اغلى المقتنيات عندي

    وفعلا المكتبه بالنسبالي كمنجم الذهب

    شي ما اقدر اقاومه ابد:)

    ReplyDelete
  6. انا زيك بالظبط اول حاجه ادخل على دار الشروق و دايما بالاقى كتب كتيره و مغريه و غاليه و ده بيخلينى اكره المحتكر المفترى اللى هو دار الشروق
    و زيك برضه باحب اصدارات ميريت اللى فعلا تحس انك مع ناشر له رساله
    بس انا كنت بدأت زمان اقرأ للكتاب الكبار قبل الكتاب الجدد و الحكيم له مسرحيات لها فكر عالى جدا لكن زى ما قالت سها بعد موت عبد الناصر شارك الحكيم فى الهجوم عليه و كتب عوده الوعى لذا فرغم اعجابى بكتابته و فكره الا انه سقط فى نظرى
    يا ريت تقراله اكتر و تقولنا رأيك
    تحياتى

    ReplyDelete
  7. انا بحب توفيق الحكيم اكتر في الروايات والمقالات الأجتماعية بتوه منه في المسرحيات
    لكن هو فعلا راجل سابق عصره بكتير

    ReplyDelete
  8. انا شخصيا اول مابدأت اقرأ بدأت بالقديم احسان وادريس ومحفوظ والسحار ومحمد عبد الحليم عبدالله احسنهم طبعا في القصة يوسف ادريس هو
    (وزكريا تامر كاتب سوريا العظيم وشاعرالقصة القصيرة وفارسهاالأول )
    دلوقتي بدأت اقرأ للجديد عملا بنصيحةاديب شاب اني لازم اقرأ ابناء جيلي فلو تعرف حد جديد ومتميز ويستحق اني اشتري له كتاب ياريت تقولي خصوصا في مجال القصة القصيرة
    تحياتي لك يا جميل

    ReplyDelete
  9. اكتر شئ بيسعدنى لما الاقى الورق والكتاب ليه احترام وتقدير عالى وراقى بالشكل ده
    ...
    وبعدين الحكيم كانبالنسبه ليا زمان بادبه هو الادب فى صلابته ليه معرفش ...
    اما كان معشوقى واليى بحبه فى كل حالاته الادبيه والقصصيه هو يوسف ادريس كانت كل كلمه من كلماتها بتبهرنى
    ...
    يله ذكرتنى بعالم ساحر وبايام حلوه كنت بفتش فيها عن الكتب بالكشاف بس دلوقتى نظرى ضعف شويه...
    عارف مكتبة الاهرام يازقازيقى كنت ايام ثانوى ببات فيها....

    ReplyDelete
  10. انا جبت عنوان المدونه من كتاب مصر قى قطعة جاتوه...اقصد العدد التانى ...المهم افتكرتك احمد المسلمانى الصحفى وقولت معقول ازاى فين ليه طبعا فكره ساذجه لكن فعلاا معرفش ليهحركتنى جامد بعد ما كنت قفلت الكومبيوتر والى بيفتح بعد نص ساعه فتحته تانى...أول ما شوفت صورتك قولت يا خساره تشابه اسماء! بس الفضول خلاانى اشوف المدونه فيها ايه ....انا دلوقتى مش ندمانه انى استنيت نص ساعه على مالكومبيوتر يفتح

    ReplyDelete
  11. فاتك كتيييييييييير انك ماقريتش للحكيم من زمان


    يكفى ان نجيب محفوظ قال ان كان فى ادباء مصريين احق منه بجايزة نوبل دى زى توفيق الحكيم

    اهلا بيك فى نادى توفيق الحكيم :)

    ReplyDelete
  12. يبق احنا كده ضمنا انه هايبقى فيه بوستات ليوسف السباعي وليوسف إدريس وإحسان عبد القدوس

    وابقي قارن كده بعيون قارئ طبعا مش ناقد ما بين الروايات دى والروايات الجديدة
    منذر
    والتعليق ليه صعب كده

    ReplyDelete
  13. رائع وجدت من يحب توفيق الحكيم بجد هذا الرجل روائي ومسرحي ومتأمل وبتاع فلسفة وقصص وكل حاجة بس نصيحتي اقرأ المسرحيات بتاعته هناك مجموعة كاملة له اقرأها تحياتي لك

    ReplyDelete
  14. كويس إنك اكتشفت انك غلطان لأنك كان هايفوتك كتير، الأدباء دول اسمائهم فى سجل العمالقة مش من فراغ ولا لأنهم أبهروا جيلهم هما فى سجل العمالقة لأن قدرة أدبهم على الإبهار قدرت تستمر لأجيال بعد كده.
    سعيد بالبوست ده وتسلم ايدك

    ReplyDelete
  15. على فكرة انا عملت مدونة جديدة اسمها يعنى ايه سياسة على الرابط ده
    http://ya3niehsyasa.blogspot.com/
    مستنى زيارتك

    ReplyDelete
  16. انت عايز تفهمني ان دة مش اعلان لدار الشروق

    هههههههههه

    طبعا بهزر دار الشروق مش محتاجة اعلان

    شوقتنا للاماكن دي هنا في الكويت الكتب اسعارها نار ومفيش طلبك

    ReplyDelete
  17. ازيك يا بلديات اخبارك ايه
    يا رب تكون بالف خير
    .......
    قولت اتطمن بس
    بحكم صلة المحافظه هههههههه..اعترض بئه

    ReplyDelete
  18. esraa:
    فعلا
    الناس دي عظيمة
    كان عندي اعتقاد ان الناس دي بيعبروا عن عصرهم بس
    غير اني اكتشفت ان اعمالهم تصلح لكل زمان
    تحياتي واحتراماتي

    ReplyDelete
  19. saso:
    بالعكس
    انا في الروايات دي بالذات الحمد لله عندي ذاكرة كويسة
    ممكن طبعا انسى التفاصيل الدقيقة لكن بافتكر دايما الخطوط العريضة للرواية
    حاولي تدوري عليها وتقريها فعلا
    مش هتندمي
    تحياتي

    ReplyDelete
  20. نيجار:
    بصي يا ستي
    دار الشروق في المبنى الجديد لسيتي ستارز اللي هو امتداد للقديم
    بتدخليه من بوابة سيتي ستارز اللي جنب فندق هوليداي ان من امتداد مكرك عبيد
    او لو عارفة الفووود كورت اللي تحت..هو بقى امتداد الفوود كورت دة
    فعلا انا ان شاء الله قررت اقرأ للناس القديمة دي
    كان عندي اعتقاد قبل كدة ان الناس دي مناسبة لعصرهم بس
    بس اكتشفت انهم كانوا سابقين عصرهم
    تحياتي واحتراماتي

    ReplyDelete
  21. سها السباعي:
    دورت عليه ولسة مش لاقيه
    بس قالوا لي انه تحت الطبع
    الف شكر

    ReplyDelete
  22. اقصوصة:
    الف شكر ليكي على تعليقك الجميل
    فعلا
    ماكدبش اللي قال ان الكتاب خير صديق
    تحياتي واحتراماتي

    ReplyDelete
  23. mohra:
    مشكلة دار الشروق قد تكون فعلا في غلو اسعار بعض الكتب
    بس ممكن نعذره في حاجة...ان الكتاب في الزمان دة سلعة مكلفة وفي نفس الوقت غير رائجة
    شوفي كام شاب او فتاة من اصدقائك بيقرأ
    وبالتالي لابد انه يعوض فرق التكلفة بزيادة اسعار الكتاب
    بالنسبة لموقف الحكيم من عبد الناصر..لا يختلف عن موقف كثير من الكتاب والمفكرين
    فالكل كان في انتظار البطل المنتظر كما في عودة الوعي ولكن البطل المنتظر خذلهم وحول البلاد الى معتقل كبير فكانت عودة الوعي
    انا اسف اني اختلف معاكي ولكن الاختلاف في الرأي لا يفسد للود قضية
    تحياتي واحتراماتي

    ReplyDelete
  24. mostafa rayan:
    انا كمان مش غاوي مسرحيات قوي
    بس اشتريت مسرحية محمد رسول الله قلت اجرب قراءة المسرحيات
    بس لسة ما قريتهاش
    بالنسبة للادباء الجدد انا انصحك بقراءة رواية
    فيرتيجو
    للكاتب احمد مراد
    هي صحيح رواية مش قصة قصيرة بس بجد وعلى ضمانتي مش هتندم
    ممكن كمان تقرأ رواية
    يوتوبيا
    للدكتور احمد خالد توفيق
    الف شكر على تعليقك القيم
    تحياتي واحتراماتي

    ReplyDelete
  25. mahasen saber:
    والله الناس اللي غاوية قراءة موجودين بس بتلاقي الحياة واخداهم والدنيا لاهياهم
    ياااااااااااه
    مكتبة الاهرام بتاعت شارع الجلاء..هي لسة فاتحة؟؟؟
    تحياتي واحتراماتي

    ReplyDelete
  26. camera girl:
    فعلا..هم كاتبين الاسم في الكتاب بطريقة غلط
    انا اسمي احمد سمير المسلمي...مش المسلماني
    شرف كبير طبعا ان يبقى اسمي على اسم الكاتب احمد المسلماني بس الحقيقة ان دة مش اسمي
    طبعا الف الف شكر ليكي على تشريفك لمدونتي ويارب تكون المدونة حازت رضاكي
    وما تبقاش اول واخر زيارة
    اتمناك صديقة عزيزة للمدونة دائمااا
    تحياتي واحتراماتي

    ReplyDelete
  27. shams el kharif:
    فعلا فاتني كتير...انا قريت لنجيب محفوظ كتير بس ما شدنيش زي توفيق الحكيم
    فعلا الدنيا دي حظووووووووظ
    تحياتي واحتراماتي

    ReplyDelete
  28. monzer:
    دة كدة انا هأحول المدونة عندي لمنتدى ادبي
    ان شاء الله هحاول كل ماتشدني رواية اكتب عنها
    بالنسبة للتعليق
    بالعكس بقى اسهل بكتييييير
    انت لو عندك جوجل اكونت بتختاره من اللست لو عايز تكتب اي اسم تاني بتختار من اللست
    وهكذا
    الف شكر ليك يا منذر على اهتمامك
    تحياتي واحتراماتي

    ReplyDelete
  29. dalia:
    فعلا انا اشتريت مسرحية له اسمها
    محمد رسول الله
    لسة ماقريتهاش بس قلت اجرب
    وان شاء الله تشدني برضة
    الف الف شكر
    تحياتي واحتراماتي

    ReplyDelete
  30. قلب مصري:
    الحمد لله اني اكتشفت روعة كتابات وابداعات الناس دي
    ويارب ماكنش اكتشفتها متأخر
    الف مبروك ع المدونة الجديدة..واعتبرني قارىء دائم ان شاء الله
    تحياتي واحتراماتي

    ReplyDelete
  31. كراكيب عادل:
    والله مش اعلان ولا حاجة
    تصدق ان وانا بأكتب البوست دة خفت ناس يفتكروا ان دة اعلان بجد.....هههه
    طبعا انا عارف ان اكيد الاسعار في الكويت ناااار يا حبيبي نار وبالتالي ياريت تاخد كتبك من هنا بقى في نهاية الاجازات
    تحياتي واحتراماتي

    ReplyDelete
  32. mahasen saber:
    يا محاسن هانم دة شرف كبير لينا
    ربنا يخليكي للشراقوة في كل مكان و زمان
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails