Thursday, 16 October 2008

تاج......والتاج دين

تاج وصلني مرتين من اختين عزيزتين
بس بس : مدونة الروح
رانيا:feelings مدونة 
وبالتالي اصبح التاج امر واجب النفاذ
نبدأ بقى التاج على بركة الله
---------------------------------------
بدأت تدوين من أمتى ودخلت عالم التدوين ده أزاى ؟
بدأت تدوين بالضبط يوم 30 ديسمبر 2006 وكان اول يوم في عيد الأضحى بالمناسبة...ودخلته بعد ما سمعت عن حاجة اسمها مدونات وهي عبارة عن صفحات شخصية اي حد بيكتب فيها اي حاجة هو عايوها سواء اكانت شخصية او انطباعاته واراءه في قضايا عامة
أيه كان أنطباعك فى البداية ؟
مش اكتر من راحة وسعادة لتفريغ افكار وخواطر من الدماغ لشاشة الكومبيوتر عبر الكيبوورد وبالتالي بتحس ان دماغك فضيت وفضيت مكان جواها لأفكار وخواطر تانية وهكذا
مين أكتر واحد بتهتم بتعليقه على بوستك الجديد ؟
كل تعليق على اي موضوع بحطه فوق دماغي....يكفي ان الشخص دة عبرني وكلف خاطره وضحى بوقته علشان يقرأ الموضوع بتاعي ومش مجرد انه يقرأه دة كمان يعلق عليه
بجد بأقدر دي جدااا
أيه أهم حاجة أتعلمتها من عالم التدوين ؟
ان في افكار عجيبة جدا في الحياة....وان اللي يعيش ياما يشوف...وان زي مافي مدونات وهي اغلبية بتحتوي على افكار قيمة وثمينة وخواطر رائعة
في كمان مدونات شاذة جدا ضد الأديان وضد الاخلاق العامة وضد الطبيعة والفطرة
بس التدوين وتصفح المدونات علمني اني لا اندهش ولا اتعجب
انها ارادة الله
أيه أكتر حاجة كرهتها ؟
التعالي من بعض المدونين في التعامل مع التعليقات ومع زوار مدوناتهم
بتلاقي في مدونين كتير ولا داعي لذكر اسمهم بيفرحوا قوي بكم التعليقات اللي بتنهال على مدوناتهم ولا يهتموا بالرد على التعليقات دي
مش كدة وبس دول حتى لا يهتموا برد الزيارة للي علقوا عندهم
وكأنهم اعلى واكبر من انهم يعلقوا عند اي حد
او يمكن وقتهم الثمين بيمنعهم من كدة
حاسس أن التدوين له تأثير ؟
انا بأشوف ان لسة التدوين لم يقدم التأثير المطلوب في المجتمع
لسة برضة مجتمع التدوين محدود وقاصر على افراده الا قلة من المدونات المعروفة بالاسم واللي انتقلت بالتالي من خانة التدوين لخانة المكتبات وتم طرح موضوعاتها في كتب
انما لو سألت مثلا 10 شباب بشكل عشوائي تعرف ايه عن المدونات؟
اعتقد ان 6 منهم ممكن يكونوا مايعرفوش يعني ايه تدوين من الاساس......
انا بأشوف ان لسة المدونات لم تؤثر في الناس ولا المجتمع
******************************************
اهدي التاج دة لكل الاهل والاقارب والخلان واللي مشرفنا
واللي يحبنا ما يضربش نااااار

40 comments:

  1. ربنا يبارك فيك

    و30 ديسمبر ده يوم مقتل صدام حسين

    وساعات الواحد بيقرا من الموبايل مش بيعرف يعلق يا عمو فالأعذار مطلوبة

    ReplyDelete
  2. جميل يا احمد
    وانت فعلا شخصية محترمة ومدونتك من المدونات اللي بهتم بقراءة الجديد فيها باستمرار على اد ما اقدر
    وف أغلب الأحيان مش بقدر اعلق بس بتعجبني افكارك وليك مواضيع كنت بتتكلم فيها عن حاجات بتور ف دماغي بالفعل وبنفس طريقة اعتراضك عليها
    أكيد الواحد بيفرح لما يلاقي حد مهتم بنفس همومه

    عندي اعتراض صغير
    مش شرط يكون عدم الرد على التعليقات او عدم رد الزيارة انه كبر او تعالي يا دكتور
    لازم نلتمس الأعذار
    وياريت متاخدهاش بالمعنى ده عند كل الناس
    أصله هيتكبر ليه؟
    وعلى مين؟
    وهيستفيد ايه؟

    -----
    بيتهيألي التاج ده قديم اوي
    :D

    ReplyDelete
  3. تاج قيم واجابات متوازنة مقنعة كالعادة يا دكتور بس اختلف معاك ف نقطة واحدة وهى تاثير المدونات انا رايى انها مؤثرة يعنى انا مثلا معنديش مدونة بس بتابع مدونات كتير وبتاثر بكتابات المدونين واعتبرها نوع جديد من الصحافة

    ReplyDelete
  4. انتا بقالك قرن على البلوج بس بفايده مدونتك هادفه وقيمه جدا ...
    اما رايك فى المدونات فصحيح وفعلا حاجه غريبه المفروض انا بعلق وبقول وجهة نظرى عشان حد يناقشنى فيها بس بلاقى تجاهل بس بطنش لانى بحب المدونات دى...
    انا بقه بجمع التعليقات واردعليهم مره واحده عشلتن انشغلت ما بين الشغل وكوكا وحضانته
    بس كلامك سليم هو انتا تقولحاجه وحشه......

    ReplyDelete
  5. اجابات نموذجية جدا وانت كدة نجحت جامد يعنى

    ReplyDelete
  6. حلو قوى التاج دا يا استاذ سمير
    ادينى جيت ورديت الزياره اهه ههههههههههههههههه
    عشان متزعلش بس

    بس صدقنى مش كل اللى مابيردش على التعليقات اللى عنده بيبقى متعالى بالعكس والله انا ساعات ببقى متضايقه قوى انى مبقدرش ارد عالتعليقات لان مش فاضيه فى حاجه معطلانى مثلا
    الدنيا تلاهى
    بس والله بقدر الامكان بحاول ارد

    ReplyDelete
  7. نقطة اللى يعيش ياما يشوف فعلا حسيتها قوى من كذا يوم بخصوص المدنات الشاذة

    انا استغربت جدا انه يبقى فيه حاجات زى كده عل ارض مصر و عملنا الهوجة دية كلها على الدنمارك
    طبعا الاتنين غلط
    بس احنا اللى سمحنا بكده بضعفنا

    ReplyDelete
  8. ياسلام يا سلام واللى اتنقل للشارع المصرى وللناس يا سى احمد ومستشفى ابو الريش وبؤجه الخير والتبرع بالدم كل ده معرفش الناس بايه هما المدونين وهما ملهومش تاثير امممممممم
    طيب ماشى يا دكتور
    بس على فكره ناس كتير حتى مش مدونين عارفين
    موضوع التعليقات
    بص يا احمد فعلا فيه ناس بتشتغل انا منهم اولا انا بيسعدنى تعليق الناس عندى ومناقشتهم ليه وبقدر الامكان برد بس انا فيه طبع منيل مبردش غير فى الموضوعات اللى بتخلينى ارد لان فيه حاجات تانيه مش اهتمامى يعنى ممكن تلاقينى معلقه عندك فى بوست واتنين لا
    نفس القصه الناس بتعملها ععندى وده عادى لان مش كل حاجه اهتمامك
    غير كده انا والله بعلق عند ناس مش بيعلقوا عندى خالص ومش زعلانه ومش مهم بس انا عارفه انهم بيقروا مدونتى ومتابعينها وده كفايه عليا
    فالتمس العذر يا حج احمد للناس هههههههههههههههههههه

    ReplyDelete
  9. إجاباتك على التاج أحسست أنها صادقة جدا وفى رأى أنها موضوعية بحق
    وللغريب إن نفس التاج ده لسة مجاوب عليه من عشر ايام كده.

    تقبل تحياتى

    ReplyDelete
  10. علي فكرة ليك وحشة

    ومدونتك واسلوبك ليه مذاق خاص

    وتاجاتك بتعرفني عليك أكتر
    لانى ماحصليش الشرف انى اعرف اكتر من تعليقات متبادلة

    ReplyDelete
  11. اخى الحبيب
    بارك الله فيك
    اجاباتك اكثر من رائعه
    يارب يحقق كل امالك واحلامك
    مدونه سعيد اننى تعرفت عليها
    لانها بحق رائعه
    تقبل تحياتى
    ودمت بود

    ReplyDelete
  12. أخي العزيز
    أولا بشكرك على زيارتك لمدونتي المتواضعه
    ووالله من البوست اللي فات وانا علقت كذا مره والتعليق ما بينزلش بس يارب ينزل المره دي المهم بجد اجاباتك جميله جداوعندك حق في موضوع التعليقات بجد حاجه بتحرق الدم وتحس فعلا بالتعالي بتاع الناس دول
    في حاجه كان نفسي اوضحهالك بالنسبه لتعليقك عندي والله انا ما بشوف الفيديوهات دي تفاهه مثلاً ولا حاجه يعني وبالعكس انا لما بحب اسافر مكان بسافر والمشكله بقى ان في ساعات ما بينفعش اسافر وبيبقى الشغل خانقني تخيل بيبقى عندي في اليوم 15تحقيق ما بين مثلا فتنه طائفيه وخناقات دكاتره كبار مديرين مستشفيات واختلاسات اطباء وصيادله للعهد ومشاكل سكه حديد وشكاوي الناس الغلابه اللي حقهم ضايع عند الحكومه واللي ما بستريحش الا لما ارجع لهم حقوقهم بفضل ربنا وقضايا كتير غير كده بعد مثلا يوم زي كده ولاحظ ان ما فيش اماكن في المحافظه اللي في الصعيد اللي انا عايشه فيها اشم نفسي فيها اظن مش كتير عليا ارفه عن نفسي حتي ولو بفيديو لمكان نفسي اروحه بجد بسرح وبفصل عند عالمي الواقعي وباتخيل اني هناك انا حبيت بس اوضحلك علشان ما تفتكرنيش تافهه ولا مجنونه ولا حاجه
    معلش طولت عليك
    تحياتي ليك

    ReplyDelete
  13. لأ يااحمد أنا اعتقد ان اللي هيعرفو التدوين اكتر من كده

    هم ممكن بس مايكنوش يعرفو يعني ايه ولا ايه لزومه

    اعتقد انه كاسم انتشر بعد الاحداث الاخيره

    لكن ده مايمنعش انه لسه في ساحه معينه وموصلش للناس كلها

    ReplyDelete
  14. اجاباتك جميله وصرييييحه

    تحياتي

    ReplyDelete
  15. لأ..الرمة دي تقريبا كل وجةات نظرنا واحدة بس برضه انا عاوز أتناقر معاك فرديت عليك في البوست الماضي
    :)
    تحياتي

    ReplyDelete
  16. شكرا على الاستجابة
    بس ياريت تلتمش الاعذار للناس اللى مش بترد وانا اكيد واحدة منهم ويمكن بقيت مقصرة جدا معاك ومع ناس كتيرة جدا بسبب حاجات كتيرة ومن ضمنهم شغلى فياريت تلتمس العذر

    تحياتى

    ReplyDelete
  17. عجبني ردك عن أكتر حاجة كرهتها وهو
    التعالي من بعض المدونين في التعامل مع التعليقات ومع زوار مدوناتهم
    أنا أعرف كذا واحد عايش في الدور كده ولا حتى بيكلف نفسه أنه يعتذر لمتابعي مدونته لأنشغاله مثلا أو يبرر سبب عدم رده
    أو يرد على البعض وابعض التاني لأ
    كما لو كان الناس دي كلامهم ميتردش عليه

    خالص تحياتي

    ReplyDelete
  18. اعتقد يا احمد ان مفيش حد بيقدم على خطوة من غير ما يعرفها ايه
    يعنى مش تلاقى مدون مش عارف يعنى ايه التدوين
    والا كان زمانه قالعد فى المنتديات
    يعنى انت مثلا دخلت كلية الصيدلية وانت مش عارف هتدرس ايه او ههتخرج تشتغل ايه ؟؟
    هو اى حاجه فى الحياة هكذا بس الفرق فى التدوين ان كل واحد بيعبر عن افكاره وانتمائه للى بيحبه
    يعنى مش مجبر يدرس مادة معينة او يكتب فى حاجه او مش عايزها
    تحياتى

    ReplyDelete
  19. خارج النص بقى
    انا عايزة اقرى الموضوع بتاع ان تكون انا زقازيقيا اللى منشور فى الدستور اللى انت منزله على جنب ده
    اصل انا زقازيقية ووحياتك عاملة اقامة فى شارع مدرسة اللغات يعنى فى القومية هههههههههه
    عايزة بقى لنك الموضوع اقراه يمكن الاقى مكان جديد

    ReplyDelete
  20. عصفور المدينة:
    فعلا 30 ديسمبر هو يوم مقتل صدام حسين
    واعتقد ان البوست الاول او التاني كان على الموضوع دة
    يعني تقدر تقول اني افتتحت المدونة بمصيبة
    بالنسبة للردود يا باشا حضرتك من المتابعين والحمد لله وانا مقدر الظروف طبعا
    انما انا اقصد اخواننا المعتادين على تجاهل التعليقات بشكل شبه دائم
    تحياتي واحتراماتي

    ReplyDelete
  21. الام وامال:
    محمود باشا
    تعليقك اسعدني جدا بجد....الف شكر لك على كلامك الكبير دة...انا مش قد الكلام دة
    بالنسبة لمتجاهلي التعليقات فدول ناس اعتادت على كدة...اقصد ان دة اسلوبهم في التعامل مع المدونين
    مش مجرد ان واحد ماعلقش في موضوع او موضوعين
    انا باتكلم عن اشخاص دة سلوكهم واسلوبهم واكيد يا باشا انت مش واحد منهم
    بالنسبة للتاج هو فعلا قديم بس على ما وصل لي بقى
    تحياتي

    ReplyDelete
  22. zikaaaa:
    الف شكر ليكي يا فندم على كلامك دة
    بس برضة لسة المدونات لم تصل لرجل الشارع
    لسة لم تؤثر في الحواري والازقة والقرى
    دة حتى اللي عندهم نت في البيت حتى لو بالوصلة...شوفي كام واحد فيهم بيدخل ع المدونات؟
    اسمحيلي اختلف معاكي
    تحياتي واحتراماتي

    ReplyDelete
  23. mahasen saber:
    لو انتي عندك عداد للزوار في مدونتك يا محاسن هتكتشفي ان عدد الزوار بيكون اكبر بكتيييييييييير من عدد التعليقات ودي حاجة عجيبة جدا
    طيب لما انت دخلت ع المدونة و تعبت نفسك و قريت طيب اكيد الموضوع عجبك او لا
    اكيد اتفقت معايا او اختلفت
    الا انه لاااااااااااا تعليق
    حاجة عجيبة جدااا
    الف شكر لكي على متابعتك وتعليقاتك القيمة
    تحياتي

    ReplyDelete
  24. enjy:
    ربنا يطمنك يا انجي
    يعني نجحت خلااااص؟
    الحمد لله

    ReplyDelete
  25. احمد اجاباتك عقلانيه جدااا ..
    وادينى غشيت منك شويه أجابات .. لأنى متورطه فى التاج ده ولسه هحله ..هههه

    وعجبنى جداا رأيك فى ان بعض المدونين بيكبروا على المدونين الجدد أو حتى القدامى ..

    وانا بصراحه صادفتهم كثيير .. وقررت ما عند ادخل عنهم

    لأن الرد البسيط أو حتى تبادل الزيارة ده معناه أنك حاولت تعرف مين الشخص اللى رد عندك .. جربت تدخل ملفه وتقرى عنه وتفهم شخصيته الذى اختاره فى ظل عالم التدوين .

    وده من رأيى فى حد ذاته احترام وتقدير للشخص .. حتى لو كان الرد بعد كده بكلمه شكرا فقط ..

    احمد

    رائع انت بصراحه حين تمسك قلمك .. أقصد حين تضع اصابعك على الكيبورد :)

    ReplyDelete
  26. بنت مصرية:
    مش مطلوب من كل مدون انه يرد على كل الموضوعات اللي في دونات كل اللي بيردوا او بيعلقوا على موضوعاته
    انما يكفي زيارة كل فترة والمشاركة في بعض الموضوعات من حين لاخر
    انما انا اللي اقصدهم ممكن ما يزوروش اي مدونات خالص بل كمان ما بيردوش على التعليقات في مدوناتهم
    حاجة عجيبة جدا
    نورتيني والف شكر

    ReplyDelete
  27. ahmed al khashab:
    فعلا في مدونات عجيبة جداااا
    شواذ جنسيا او شاذات وملحدين ولا دينيين....الخ
    بس فعلا نقول ايه غير
    لله في خلقه شئون
    تحياتي واحتراماتي

    ReplyDelete
  28. APPY:
    لا طبعا هم لهم تأثير
    وكل اللي انتم عملتوه دة من تبرع للدم وزيارات لمستشفى السرطان كل دة مجهود عظيم جزاكم الله عنه كل خير
    انما انا اتكلم عن التأثير العميق اللي يحس به الناس اللي ماشية في الشارع
    نفسي الناس العادية اللي مالهاش علاقة بالانترنت تبقى عارفة ان في ناس اسمهم مدونين وان في حاجة اسمها مدونات
    التعليقات انا طبعا متفهم ولكن المقصود بهم في البوست هم متجاهلي التعليقات تماما او متجاهلي زيارة المدونات الاخرى والمشاركة في موضوعاتها
    انما انا طبعا مقدر لأني انا شخصيا لا اعلق على كل الموضوعات في كل المدونات
    تحياتي واحتراماتي

    ReplyDelete
  29. قلب مصري:
    اولا الف شكر ع الكلام الجامد جدا دة
    ثانيا
    التاج منتشر ع النت بشدة وفي ناس مجاوباه من كام شهر
    كل واحد بيجاوبه على حسب ما بيوصل له
    تحياتي واحتراماتي

    ReplyDelete
  30. MONZER:
    ازيك يا منذر؟
    انت مختفي كدة ليه؟
    انت والله اللي لك وحشة
    والف شكر لك على كلامك اللي ما استحقوش دة
    ياريت ماتغيبش كتير واشوف تعليقاتك باستمرار
    تحياتي واحتراماتي

    ReplyDelete
  31. TAREK AL GHANAM:
    انا الأسعد
    ويارب ماتكونش الزيارة الاخيرة
    اتمنى دائما رؤية تعليقاتك
    تحياتي واحتراماتي

    ReplyDelete
  32. نيجار:
    بالعكس تماما
    انا كانت عاجباني الفكرة باعتبارها فكرة مبتكرة وجميلة
    انما انا كنت بأعلق عن ناس ممكن يشوفوها فكرة غريبة
    انما انا عن نفسي معجب بالفكرة جدا
    كان الله في عونك
    وبعدين طالما الفكرة دي بتخليكي سعيدة ومبسوطة يبقى ماحدش له عندك حاجة
    انتي بجد نورتيني
    ويارب ماتكونش الزيارة الاولى والاخيرة
    تحياتي واحتراماتي

    ReplyDelete
  33. ESRAA:
    ماهو التدوين مش مجرد اسم بس يا اسراء
    المطلوب ان الناس اعرف ايه هو التدوين؟ وايه الهدف منه؟
    والمفروض الناس تحس ان المدونين دول ناس هدفهم البلد دي وان خيرها هو اساس التدوين
    ولازم الناس تعرف انشطة التدوين وهكذا
    انتي بقى شايفة ان دة حاصل دلوقتي؟
    اشك
    تحياتي

    ReplyDelete
  34. كياراا:
    الف شكر
    تحياتي واحتراماتي

    ReplyDelete
  35. MICHEAL:
    هتفضل كدة على طول يا مايكل
    مشاكس
    معاكس
    مناكف
    تحيااااااتي

    ReplyDelete
  36. bosbos:
    لا يا بس بس
    في فرق بين الانشغال عن المتابعة وبين التجاهل التام
    ممكن جدا ننشغل عن متابعة المدونات ولكن فور زوال اسباب الانشغال بنرجع تاني
    انما في ناس سلوكها هو التجاهل التاااااااام
    وانتي بالتأكيد مش واحدة منهم
    تحياتي واحتراماتي

    ReplyDelete
  37. ياسر حسين:
    فعلا يا فنان
    والغريب والعجيب ان النوعية دي بتزداد غرور بمرور الوقت بلا اي مبرر
    على الرغم ان المدونات دي وسيلة تعبيرية في الول والاخر مش توكيل تجاري
    منورني دائما
    تحياتي واحتراماتي

    ReplyDelete
  38. desert cat:
    اكيد طبعا المدونين عارفين يعني ايه تدوين
    انما اللي مش عارفين او الصورة مش واصلة لهم واضحة هم الناس العاديين اللي مالهمش علاقة بالكومبيوتر او الانترنت
    بالنسبة لموضوع الدستور هو للاسف مفيش لينك خاص بالموضوع لان دة كان منشور في احد الاعداد الاسبوعية للدستور
    انما بما انك زقازيقية يبقى احنا في الهم سوا واكيد هتبقى عارفة ان الموضوع كان تريقة على شارع القومية اللي بنحج فيه ليل نهار وان فسحة اي شاب او فتاة شرقاوية زقازيقية هو اللف في القومية او الوقوف على احدى نواصيها
    وياريتها تستاهل
    بس خلاص
    بس بما اننا طلعنا بلديات يبقى ليكي مني كل احترامات وتقديرات
    تحياااااتي

    ReplyDelete
  39. ضي القمر:
    الف شكر ليكي على التعليق والكلام الجامد دة
    اتمنى الا تكون اخر زيارة
    وارجو ان تقبليني صديقا لمدونتك الجميلة
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails