Sunday, 5 October 2008

قطط بريئة وسط غابة من الذئاب



في موضة اليومين دول طالعة جامد قوي الا وهي
اضطهاد الجنس اللطيف في مصر
افتح جورنال الاقي موضوع عن التحرش الجنسي المنتشر في مصر بشدة لدرجة ان 83% من بنات وسيدات مصر يشكون من التحرش الجنسي بهن
افتح تليفزيون الاقي سيدة مجتمع تشكو من اضطهاد المرأة في مصر وعدم حصولها على حقوقها المهنية والوظيفية على الرغم من كفاءتها ونبوغها
افتح الراديو الاقي موضوع عن انعدام الذوق او كما سماها المذيع "الجنتلة" من شباب مصر ورسائل قصيرة تنهمر كالمطر على البرنامج من بنات وانسات ومدامات يشكون مر الشكوى من انعدام الذوق واللياقة ويا حسرة على الجنتلة اللي على حد تعبير احدى المتصلات بالبرنامج:
الجنتلة.......الله يرحمها
قفلت الراديو وبصيت في المرايا تخيلت نفسي بعد كل الشكوى دي في صورة ذئب بشري....وحش ادمي....عمال ينقط من فمه دماء انثى مضطهدة متحرش بها مهيضة الجناح لا حول ولا قوة الا بالله
طبعا كما هو واضح...فالأمر ليس بهذه الصورة التي تحاول وسائل الاعلام تصوير المرأة المصرية بها..او التي تحاول بنت مصر موديل 2008 ان تصور نفسها
فأذا ناقشنا مثلا ظاهرة التحرش الجنسي...سنجد ان مصطلح التحرش الجنسي كما شملته الدراسة يشمل من المعاكسة اللفظية وحتى الاغتصاب الجنسي
بمعنى ان لو واحدة ماشية في الشارع وحد قال لها....(يا جميــــــــــــــــــــــــــــــــــــــــــــــــــل) مثلا..فانها تعتبر نفسها متحرش بها جنسيا زيها بالضبط زي من تعرضت لأغتصاب جنسي
وبالتالي ظهرت النسبة لمن تعرضن للتحرش الجنسي بهذه الضخامة
انما السؤال هنا
يا ترى المتحرشات مش فاكرين هم كانوا لابسين ايه لما تم التحرش بهن؟
يا ترى بنطلون جينز ضيق ولا جيبة قصيرة ولا بادي ناري؟
ليه بتحرموا على الشباب ان يستثاروا وبتحللوا لنفسكم الاثارة
اعلم طبعا ان عدد غير قليل من المتحرش بهن ملابسهن محترمة وغير مثيرة على الاطلاق..بس يا ترى اخبار النظرة ايه؟ اخبار طريقة المشي ايه؟
وهي الاثارة ملابس فقط؟؟؟؟؟؟؟
اما بقى من يشكون من اضطهاد المرأة مهنيا وعدم حصولها على فرصتها وظيفيا فهو عار تماما من الصحة على الاقل من خلال مجتمعي و احتكاكي بعدد كبير من المؤسسات الخاصة
فأنا عن نفسي مديرتي المباشرة سيدة ومديرتها سيدة واغلب الوظائف القيادية بمكتب الشركة تحتلها سيدات....وهو حال عدد كبير من الشركات والمؤسسات العاملة في مجال الدواء وصناعته
فأغلب قيادات الصيدلة سواء في وزارة الصحة او الشركة المصرية لتجارة الأدوية من السيدات
وبالتالي بالنسبة لي على الاقل فأن اي شكوى من اضطهاد حواء في العمل لا يمكن الرد عليه الا بكلمات لا اسمح بنشرها في مدونتي على اعتبار انها مدونة نظيفة
اما الاخوات بتوع الراديو اللي بيشتكوا يا حرام من انعدام الذوق او اللي بيسموها "الجنتلة"من الشباب المصري المتوحش...وانهن يا حرام بيعانين من قلة الذوق واللياقة سواء في المواصلات العامة او حتى الخاصة وبيشكون مر الشكوى من ان الشباب لا يحترم انوثتهن ويزاحمهن على المقاعد في وسائل المواصلات وعلى الطوابير المختلفة وان معدش في حاجة اسمها
في هذا الزمن الرديءLadies First
اقول لهن....نفسي اعرف انتم ليه ما بتفتكروش انكم بنات الا في المواقف دي بس...في مترو الانفاق...في طابور عيش....الخ
ليه ما بتفتكروش "الجنتلة" وانكن مكسورات الجناح عند التقدم لوظيفة...وبتطالبن بالمساواة وان البنت زي الولد
ليه البنت بتكون زي الولد بس في الجامعة لنا بتتخانقوا على تقدير وتعيين...وليه ساعتها مش حاسين انكن كائنات ضعيفة لا حول لها ولا قوة؟
ليه ساعة ما بتطلب معاكوا مساواة و قوة بيبقى البنت زي الولد...ماهيش كمالة عدد وان البنت اكثر جدية وكفاءة من الولد ولازم تاخد حقها تالت ومتلت؟

وليه ساعة ما تحتاجوا الحصول على مزايا الانثى بيختفي الكلام عن المساواة والعدالة والذي منه....وتبدأ اسطوانة (مفيش اخلاق يا بشر....فين النخوة بتاعة زماااان.....شباب بايظ......مفيش تقدير للأنوثة في البلد دي ولا ايه؟).....جننتونا بجد
في النهاية
انا لست ضد المرأة على الاطلاق....ولكني ضد التهويل والمبالغة وادعاء الاضطهاد بلا اي سبب واي مبرر...ضد تصوير مجتمعنا على انه مجموعة من القطط البريئة تحيا وسط جماعات من الذئاب البشرية المتوحشة
اذا كنا مجموعة من الذئاب.....فأنتن ايتها القطط الجميلة من تثرن غريزة الشر والتوحش في نفوسنا

52 comments:

  1. زمان اوى ماما كانت بتلبس ميكرو جيب بجد وبنطلونات وبادى لان الموضوه بتعيد نفسها
    وكان الموضوع ده قليل جدا ولو حد عمل كده بتبقى مصيبه
    طيب ما تروحوا بقى اتحرشوا بالرقصات هما اولى طالما كل حاجه بتثير يعنى
    بص يا احمد طبعا فيه بنات مستفزه وفيه بنات محترمه وبتلبس كويس وطريقه مشيها كويسه طيب دى بتتبهدل ليه
    انا واحد يوقف الطريق بالعرض علشان يقولى يا قمر انتى
    طيب ليه
    قمر ولا شمس هيستفيد ايه هيقبلها على اخته على فكره انا كنت فى عربيتى ولابسه تى شيرت علشن التهمه متلزقش فيه بس
    وابقى انا السبب فى بوظان موتور العربيه ولا قلبها على الطريق هههههههههههههههه
    عندى موضوع اسمه زمن الابيض واسود وزمن الالوان ابقى اقراه
    كل سنه وانت طيب
    وعلى فكره متابعك كتير فى كل مواضيعك

    ReplyDelete
  2. يا دكتور اصل نسبة ال 83 % دي داخل فيها التحرش بالنظر و الهسهسة و الصوصوة و التفكير حتى

    انما التحرش الجسدي ماحدش بيذكر نسبه الحقيقية الظاهر عايزين يعملوا فوكاس على التحرش و خلاص

    ليا عودة تاني ان شاء الله

    ReplyDelete
  3. مش قوى كدة.........انا معاك ان التهيويل مش صح بس بردو مش لازم نقول ان البنات هم سبب كل الكوارث ولازم نطلع فيهم عيب وخلاص اخبار المشية واخبار الضحكة طب واللى بتتعاكس وهى قاعدة ساكتة فى مواصلة من المواصلات اهى دى ولا ماشية ولا بتضحك ولا هدومها باينة فاضحة وللا لا ايه رايك فيها؟؟؟؟
    كمان الستات اه واخدين حقهم بس مش فى كل طبقات المجتمع الطبقة الفقيرة الست فيها بتاخد بالجزمة على دماغها دى ايه رايك فيها؟؟؟ وخد من دة كتير فمش لازم ابدا يبقوا الستات هم الوحشين على طول الخط والرجال ملايكة الطرفين فيهم المفترى وفيهم المفترى عليه فالتعصب النوعى دة مش مطلوب خالص

    ReplyDelete
  4. القطط والدئاب
    السلام عليكم
    أعتقد أن الموضوع أكبر بكثير
    فالشعب كل يتم إغتصابه والتحرش به من قبل وسائل الإعلام الهابطه فى بلدنا الحبيب
    فكم الأفلام والكليبات تجعل الشباب فى حاله هيجان عصبى
    حتى تأخر سن الزواج بسبب الحاله السيئه التى تمر بها بلدنا
    وأهم شئ غياب الوازع الدينى عند الشباب
    أدخل حضرتك دلوقتى مسجد وشوف عدد الشباب من عدد الشيوخ
    أين الشباب
    المعظم على النواصى والمقاهى ودور السينما والمسارح
    الموضوع مهم
    ويحتاج مننا إلى نظره أخرى
    يحتاج مننا إلى وقفة تحدى
    لنقول بحل المشكله من أساسها
    فنحن نحب بلدنا
    ويجب علينا أن نقوم بدور ولو بسيط

    ReplyDelete
  5. السلام عليكم ورحمة الله وبركاته

    يعني هو ممكن نقول إن التهويل مرفوض

    وأن في بعض الأحيان تكون المرأة هي السبب في تعرضها للتحرش
    ولكن لا ينبغي أن تكون تصرفات المرأة ( حتى وإن كانت خاطئة ) سببا أو مبررا لالتماس العذر للمتحرش بها .
    ــــــــــــــ
    محمد الكومي :
    أعتقد أن ما يمنعنا من تحديد نسبة التحرش الجسدي بعيدا عن التحرش بشكل عام هو عدة أسباب هي :
    1- أن هناك التباس عند الكثير في تحديد مفهوم التحرش الجسدي وهل هو الاغتصاب فقط أم أن هناك مراحل قبله تدخل تحت هذه التسمية .
    2- أننا نعلم جيدا أنه لو تم تحديد هذه النسبة فسوف يختفي شبح التهويل الذي يبني عليه الكثيرون كل نظرياتهم .
    ـــــــــــــــــ
    إنجي :
    الحديث عن تصرفات المرأة ليس مبررا لتصرفات الشباب .
    أيضا مع احترامي الشديد المرأة في المجتمعات الفقيرة ( التي أعرفها بشكل ما وأتعايش معها ) لا تهتم كثيرا لكل ما تتحدثون فيه من حقوق المرأة والمساواة وغير ذلك
    فالمرأة في هذه المجتمعات تقدس زوجها وتعتبر أنها ليس لها أي قيمة من غيره ولا تفكر أصلا في أن تصل إلى مكانته فضلا عن أن تتحداه .
    وأنا أثق تماما أن هذه المرأة لو تعرض لها أحدهم في الشارع بكلمة لا ترضيها فسوف يكون هذا من سوء حظه لأنها لن تتصرف إلا بشكل واحد : ( بالشبشب أبو صاعب وفين يوجعك يا قليل الأدب ) .
    ــــــــــــــ
    القعقاع
    ربما تكون المشكلة موجودة بالفعل
    ولكن المثال ال1ي طرحته في رأيي غير صحيح
    لا تقارن بين الشباب والشيوخ
    ولكن قارن بين الشباب الآن والشباب من خمس سنوات
    ودعني أنهك إلى نقطة مهمة جدا :
    أن تواجد الشباب في المسجد ليس شرطا للابتعاد عن المعاكسات
    فأنا بنفسي سمعت اثنين من الشباب يتكلمان أمام المسجد في الكلية بعد صلاة الظهر عن إحدى البنات التي مرت أمامهما .
    إذن المشكلة الحقيقية هي
    1- غياب الوازع الديني
    2- غياب الفهم عند الكثيرين
    ـــــــــــــــــــــــــــــ
    أخيرا
    أعتذر إن كنت قد تعديت على حق صاحب المدونة في الرد على التعليقات ولكنها كانت كلمات تؤرقني

    جزاكم الله خيرا
    كل عام وأنتم بخير
    تقبل الله منا ومنكم

    ReplyDelete
  6. اللي يجنن يااخي ليه الناس دي مابتكلمش مع المطربات اللي بتتطلع عريانة ولا مخرجين الفيديوكليب اللي بيطلعو البنات بتهزبمؤخرتها وصودرها كما فتيات الليل هو مش دة بردة تحرش بينا نحن الرجال واثارة لما هو مكنون ومش عايزيطلع بسبب الأحوال الأقتصادية المعاشة
    طلبعا في تهويل ومتعمد كمان ووراه ايد اجنبية عايزة تفرض قوانين ضد عادتنا وتقاليدنا
    موضوع جامد
    تحياتي لك ودمت بخير

    ReplyDelete
  7. أنا بس عايز اتطرق لنقطة ان ملابس الفتاة تعتبر دافع رئيسي للتحرش الجنسي وإسمحلي أختلف كليا معك

    بالطبع هذا إستنتاج غير حقيقي لأسباب التحرش ، هل كل فتاة متبرجة في ملابسها هو دافع للتحرش بها .. لا ياسيدي هذا للأسف نتاج لفقدان الوعي والتخلف والجهل وغياب الاخلاق .. في أجيالنا كانت توجد فتيات متبرجات بصورة أكثر من ذلك كثيرا ولم يكن ذلك يوما دافعا للتحرش بهن ... ثم لماذا يتم بصورة غير مباشرة إهانة الرجل بتصويره على أنه على إستعداد ليفقد اخلاقة لمجرد ان فتاة أثارته ... هل أنت إذا قابلت فتاة متبرجة على إستعاد للتحرش بها بسبب ملابسها ، إن هناك ثقافة وقيم واخلاق تدفعك لعدم القيام بذلك

    لذلك لاينبغي ان نسطح ونختصر ظاهرة التحرش في ملابس الفتاة ووالأفضل النظر إلى الأسباب الحقيقة
    وهذا موضوع كبير اعتقد أن بداياته تكمن في تعريف معنى التحرش

    ReplyDelete
  8. أحمد

    أنا معاك أنه فيه فئة من البنات لبسها وطريقة مشيها وكلامها ممكن يكون دافع للمعاكسة والتحرش

    ولكن ياريت تقولى البنات اللى محترمه فى لبسها ومشيها وطريقة كلامها وبرضة بتتعرض للتحرش يبقى المشكلة دلوقتى فى مين فى البنت برضة ؟؟؟

    وأيه رأيك فى الأطفال الصغيرين اللى بيتعرضوا للتحرش والأغتصاب دول برضة اللى شجعوا الشباب والرجالة انهم يغتصبوهم

    يبقى العيب فى مين حاليا اكيد فى الشباب والرجال
    والمسؤلية عليهم لانهم من غير اى حاجة مستعدين يتحرشوا بأى واحدة حتى لو كانت طفلة وطبعا مش كل الشباب ولا الرجال كده بس للأسف بقت فئة كبيرة جدا مستعدة تتحرش بأى حد وفى اى وقت وأى مكان

    يعنى مش ملابس الفتاه بس هيا السبب لان فيه بنات محترمة كتير بتتعرض لكده

    ReplyDelete
  9. المسألة فى موضوع التحرش ليست قائمة على زى البنات أو طريقة مشيهم وما شابه المسألة إننا نسينا الأمر الخاص بغض البصر ومش معنى إن واحدة تمشى عريانة إن ده معناه تصريح باغتصابها هى غلطت ومش معنى كده إنى أبرر غلطى على غلطها.
    وحكاية الاضطهاد والمساواة معاك فيها 100% وبجد هن ما يفتكروش إنهم ستات إلا فى المواقف اللى فيها مميزات للست والمساواة لما يكون المميزات فى المساواة (الكيل بمكيالين يعنى)

    ReplyDelete
  10. مختلف معاك كليا يا باشا
    ..أنا كنت كاتب بوست قريبا اسمه عشان خاطر ليلي
    ووضحت فيه إزاي لسه فيه حقوق ناقصة ليللي مع اعترافي برضه أن برعي وضعه منيل
    بالنسبة للتحرش فأنا متضامن إيبي هانم والأستاذ أحمد شقير
    تحياتي

    ReplyDelete
  11. إزاى بس يا أستاذ أحمد وأنت مدون ومفترض أنك مثقف وواعى أن تتكلم بكل هذه السخرية والعدوانية الفجة على المرأة التى هى أمك وأختك وزوجتك وابنتك. اسمح لى أن أقل لك أنك غير موضوعى فى طرح وجهة نظرك الغير منصفة بالمرة

    وإليك أوجه نقاط أو بالأحرى أسئلة علك تعيد
    التفكير من منظور أكثر إنصافاً

    1- لماذا كل هذا الكره للمرأة الناجحة فى
    عملها؟ أليس العمل واجب. ألا يقول الرسول - صلى الله عليع وسلم - إن الله يحب إذا عمل أحدكم عملاً أن يتقنه ؟ لقد اجتهدت النساء وأثبتن كفائتهن فى كل المجالات، فكن الأوائل فى الثانوية العامة، وفى مجال العمل يعملن جنباً إلى جنب مع الرجل. فلماذا كل هذا الحقد الأسود.
    إن الإحصائيات الأخيرة تثبت أن أسر لا حصر لها عائلها سيدة لموت الرجل أو لهجره المنزل أو لكسله (وهذا نراه جلياً فى الطبقة المعدمة فتعمل المرأة فى البيوت ويقبع الرجل فى المنزل يدخن الحشيش ويأخذ بالقسر ما تكسبه
    وحدث ولا حرج عن جرائم الأسرة المستحدثة من رجال يقتلن زوجاتهن لأنهن تأخرن فى عمل الغذاء إلى آخره من العنف والوحشية المنزلية

    2- أنت رجل ولا تعلم ماذا تعانى النساء فى عملهن من تحرش المديرين، فأنا أعرف الكثير والكثير من نلك الحكايات من صديقاتى ومعارفى، كانت كل مشكلاتهم أنهن لم يرضخن لرغبات المدير القذر فما كان منه إلا أن حرمهن من كل الإمتيازات المادية وتم نقلهن إلى أفرع بعيده ... إلخ

    3- قل لى يا سيدى بالله عليك فى الستينات والسبعينات عندما كانت المرأة تلبس الميكروجيب والحمالات والكت لماذا لم يكن ينظر لهم أحد ولم يتحرش بهم أحد. لقد تغير الزمن، ففقد الرجل رجولته حينما تخلى عن دوره فى حماية المرأة من أى أذى فى الشارع، معتقداً أن الرجوله هى أن تتحرش بالمرأة ممسكاً إياها مغتصباً جسدها بكل جرأة ووقاحة وفجر. مع العلم أننا ندعى أننا مجتمع متدين، لكنه للأسف دين صورى يهتم بالمظهر وليس الجوهر

    4- مقولتكم الشهيرة التى تتشدقوت بها ليلاً نهاراً وهى أن الفتيات يلبسن ملابس مكشوفة فبالتالى يعتبر الرجل معذوراً إذا تحرش بهن، بالله عليك أريد تفسيراً للتحرش الجماعى الذى حدث منذ عامين أيضاً فى عيد الفطر، وكان غالبية ضحاياه من المحجبات بل أن واحده منهن كانت منتقبه. إنها الغريزة سيدى الفاضل والتى لا تفرق بين أم وابنه، بين طفلة وامرأة، بين منتقبه وسافره

    أرجوكم كفاكم حرباً شعواء على النساء، فهن أحوج ما يكن لكم، كرجال يقفن بجانبهن، يحمينهن من كلمة خارجة أو لمسة طائشة أو إغتصاب من ليس له دين.

    المرأة هى نصفك الثانى نحتاج إليكم كما تحتاجون إلينا، ولا نكتمل إلا ببعضناالبعض، فلم التناحر ومناصبة العداء

    رجاء مزيداً من الفهم والمحبه

    ReplyDelete
  12. اولا انا ضد كلمة لبس المراة هو السبب يا سيدى اذا كنا سافرات غض انت بصرك وانت عارف كويس الدين بيقول اية؟ ثانيا مسالة الذوق دى نسبية تختلف من احد لاخرولازم نعترف ان الرجال قوامون على النساء بمعنى المسئولية ف البيت للراجل لانة الاقوى لكن ف مجال العمل دة بيعتمد على الكفاءة هنا الراجل زى الست وبدليل ان ربنا ساوى ف العقوبات بين الرجل والمراة السارق والسارقة وخلافة بمعنى جوة البيت جوزى راجل وانا ست لكن مجال العمل من حقى اتساوى بزميلىوهذا من صميم الدين الاسلامى اللى كرم المراة واعطاها مكانة عظيمة جدا ونهاية اوصى الرسول رفقا بالقوارير فرفقا بالقوارير يا دكتور

    ReplyDelete
  13. السلام عليكم
    انا معاك ان المشكله من الاتنين
    الشاب البيعاكس
    واكيد البنت ال فى اغلب الاوقات بتثيره بملابسها
    الملابس البقت حريه شخصيه
    والواحد نفسوا البتلبس لبس زى دا بتلبسوا ليه
    علشان تعجب الشباب طب مهم هيعكسوها

    ReplyDelete
  14. انا معاك يا احمد وانا كمان ضد التهويل ده حتى يضر بسمعتنا عند الرجاله...
    يعنى هنبقا ستات مهولتيه ومفتريه زى ما انتا شايفنا كده شوف بجد هو تناول الموضوع بحياديه وموضوعيه وعدم تهويله ممكن يحله ويخليه فركش خالص مع شوية ربط للشارع المصرى اثناء الاعياد والاحتفالات طالما دى اصبحت ظاهره قوميه...
    بس الزقازيق لسه محافظه على اخلاق الشراقوه يا سلام على ابن القريه ونعم الرجال...

    ReplyDelete
  15. اولا كل سنه وانت طيب
    تانيا انا هاتكلم ومن غير اى تحيزات
    بالنسبه لموضوع التحرش
    انت معاك حق ان الستات بيعتبروا ان مجرد كلمه ياجميل دى بتعتبر تحرش.. بس شوف اللى بيقولها بيقولها ازاى
    فيه بنات عاوزين ضرب الاقلام والجزم بسبب لبسهم
    وهما دول اللى بيثيروا الشباب
    بس الشباب لما ييجى يعاكس بيعاكس الملتزمات.. عارف ليه؟
    عشان هو متاكد انهم مش هايعرفوا ينطقوا او يعترضوا
    لأنهم اتربوا على ان البنت خطيئة فى الارض
    وان مهما حصل الكل هايشوفها مذنبه
    بالنسبة للنظرة بقى.. هما الرجاله هايبصوا على العينين ولا على الجسم؟؟؟
    انا واحده من البنات بالبس كويس وبامشي وعلى وشي تعبير مرعب وزى العسكري
    وبرضه باتعاكس
    وهاتقولى على المنتقبات اللى بيتعاكسوا ايه بقى؟؟
    انا معاك ان فيه بنات غلط.. بس التعميم غلط برضه
    ومش الستات هما الشيطاين والرجاله هما الملايكه
    وكمان ماينفعش ان الرجاله يبقوا رد فعل
    يعنى اسأل اى متحرش يقولك شوف لابسين ايه
    وهو انت بتعاقبهم يعنى؟
    ليه ماتعتبرش كل واحده من دول اختك
    المشكله الكبيره بجد ان ماحدش بيغلط نفسه
    الولاد بيقولوا شوفوا البنات
    والبنات بتقول مالناش ذنب
    والسبب هما الأهل
    --------------
    بالنسبة للاضطهاد الوظيفى انا ماقابلتهوش الا مره واحده
    واحده امريكيه جت مصر فى مؤتمر وكانت رئيسه مركز علمى
    كنت بادردش معاها وقالتلى انها لازم تشتغل اضعاف الراجل عشان تاخد تلتين مرتبه
    وصعب ان ست تطلع فى وجود راجل
    ولو كانت سمرا تبقى المصيبه اتكحلت
    ---------
    بالنسبه للجنتله بقى
    فدى حاجه واللى اتربى عليها كل واحد فى بيتهم
    احنا طلبنا مساواه واحنا مش قدها
    يعنى لما اكون فى المترو والاقى راجل جرى واخد مكان المفروض انى كنت هاقعد فيه باتضايق فى الاول وبعد كده اقول معلش اكيد هو اكبر منى وتعبان اكتر منى
    والطوابير مالهاش حجه
    طابور سيدات وطابور رجال ودى معمول بيها من زمان
    بس كفايه كده

    ReplyDelete
  16. لا اسمح لى اختلف كتير معاك يا احمد

    لو حد ساب مثلا عربيته مفتوحة، فهل هذا عذر بأى شكل لسرقتها او يقلل من جرم السارق او حتى يجعل السرقة جريمة مشتركة بنسب متفاوتة؟؟

    لو واحد طول لسانه على واحد تانى يبقى ده عذر للضرب او القتل؟؟

    التحرش جريمة ليه بتحاول تقلل من حجمها بالقاء جزء من اللوم على الضحية سلوكا او ملابس؟؟

    ولصالح من؟

    ولما المحجبات بتعاكسوا ويتم التحرش بيهم يبقى ايه الحل؟

    يبقى ده اكبر دليل على ان المسألة مش فى اللبس ولكنها بالدرجة الاولى والاخيرة فى دماغ الرجل اللى بيتحرش؟؟

    اذا كانت الدول الغربية اللى متقدمة عننا بمراحل فى حقوق الانسان ومع كل الحرية الجنسية عندهم ومع كل البساطة التى تؤخذ بها مواضيع الجنس لديهم اذا واحدة رااحت البيت مع واحد ووصلت للسرير وبدأت الموضوع ثم غيرت رأيها ـ وده حق من حقوقها ـ لكن الرجل استمر فيما يفعله بالغصب عنها، ده بيعتبر تحرش ونوع من الاغتصاب

    يبقى انت تقول ان اللى ماشية فى حالها ولابسة اللى عايزاه وده ابسط حقوقها وتلاقى واحد مادد ايده ولا مبحلق عينه بوقاحة تقوم تقول دى غلطتها جزئيا؟؟؟

    طيب البس العادى مثير

    والحجاب؟؟

    ناقص ايه؟

    اننا نسمع عن منقبات تم اغتصابهن علشان نقتنع ان المشكلة اساسا فى المخ

    اطمئن

    قريبا جدا لن تكون غريبة ان يتم التحرش بمنقبات ايضا ولنرى عندئذ ماذا ستكون المبررات التى سيعطيها البعض لتبرير التحرش عندئذ؟

    ومن جهة اخرى

    يعنى الرجالة مورهمش كلام غير عن انهم الاقوم والاكبر عقلا والاكثر دينا والانضج والاقوى والعقلانيين والموضوعيين اكثر

    يعنى كل الصفات الافضل بينسبوها لنفسهم لكن تيجى لحد الجنس ويبقى ساعتها يا عينى الراجل برياله وغلبان ومبيستحملش واول ما يلاقى واحده معرفش لابسه ايه ميقدرش يمسك نفسه ولا عينه ولا ايده؟؟؟

    ومعلش يا جماعة اصله استثار؟؟

    رجالة ايه دى لا مؤاخذه؟ ده ولا العيل ، امال راح فين العقل والايمان والموضوعية والمنطقية وكل اللى وجعتوا قلبنا بالكلام عنه من يوم ما اتولدنا؟؟؟

    معلش يا احمد انا محموقة بس الموضوع ده بجد بينرفزنى لاقصى درجة، والاسوأ فيه انه بيتاخد من ناس كتير كمبرر لمواصلة التحرش فى صوره واشكاله المختلفة

    ReplyDelete
  17. الحقيقه والله انا بجد مبسوط انى لقيت حد فى نفس تفكيرنى
    احنا لازم نكون اصدقاء فعلا انا شايف ان الرجاله هى المضطهده فى مصر بس يمكن
    ان الراجل مش بيحب الكلام كتير علشان كده مش عامل غاغه ويطالب بحقوقه زى الستات
    الله عليك
    بس انا عندى اعتراض على حاجه
    ايمن نور مش مانيلا مصر قد يكون المالكى بتاع مصر
    ولا ايه
    مستنيك فى مدونتى
    http://nisr-elsharq.blogspot.com/

    ReplyDelete
  18. الرجاء زيارة مدوناتنا
    القناص
    thesniper2000.blogspot.com
    شكرا

    ReplyDelete
  19. appyplanet:
    القصة مش قصة راقصات يا ابي
    القصة ان كتير جدا من اللي ماشيات في الشارع اليومين دول العن من الراقصات والله
    طب الراقصات اماكنهم معروفة واللي عايزهم بيروح لهم انما اللي في الشارع دول هم المصيبة
    الناس تعبانة يا ابي والبنات مش راحمين الشباب خالص
    تحياتي

    ReplyDelete
  20. محمد الكومي:
    فعلا والله بيتلككوا....لو بصيت بس بصة بيفتكروها تحرش
    والظاهر في استطلاعات الرأي ان البنات بتتباهى انها تعلم بعلامة صح على سؤال:
    هل سبق ان تم التحرش بك جنسيا؟
    لو عملت لأ...تبقى جرحت انوثتها..لازم طبعا تكتب نعم
    حاجة تغيظ والله
    تحياتي

    ReplyDelete
  21. enjy:
    ازيك يا انجي عاملة ايه؟
    طبعا البنات مش هم كل السبب انما هم عامل اساسي في العملية دي
    ماتنكريش يا انجي ان كمية الاستفزازات النسائية زادت قوي عن الحد
    ومش عارف والله ايه العلاقة بين الشياكة وبين العري ولمحزق
    الست بتاخد على دماغها في المجتمعات الفقيرة بسبب الجهل والفقر وطبعا دي عوامل اذا تواجدت في بيئة ما انعدمت الثقافة وضاعت الحقوق
    تحياتي وعود احمد

    ReplyDelete
  22. الفراغ ثم الفراغ

    وبعدين الضغط فراغ وضغط بيجيب احباط

    الشباب والشابات كمان عندهم فراغ وشبة يأس

    من الحال العام الي حواليهم

    ReplyDelete
  23. الموضوع مش اتهام للرجال من النساء يا عزيزي ، و لكنه اتهام للمجتمع من الحالة المتردية التي وصل إليها ، و لا تنكر أنك ترفض أن يقال لزوجتك أو أختك يا جميل أمامك ، فلماذا ترفضه إذا كانت محترمة المظهر ، و لماذا ترفضه إذا لم تكن ؟

    لا يمكن أن نبرر الخطأ بخطأ يا صديقي ، و إنما نرفض الخطأ جميعا ، و أؤيدك إذا بدأت حملة ضد ابتذال ملابس النساء - بغض النظر عن موضوع التحرش .

    تحياتي

    ReplyDelete
  24. السلام عليكم
    بصراحة مدونتك جميلة وبالذات البوست ده

    لانك بصراحة قلت كل اللي انا عايز اقوله بالعكس فيه حاجات تانية كتير كمان

    انت لخصت الموضوع

    والمشكلة انهم معظم المدونات بنات وبينشروا الفكر ده للاسف انهم مضطهدين وانهم مش واخدين حقوقهم وانهم يتم التحرش بيهم 000000 الخ الخ

    والله جننونا بعمايلهم ديه

    لك تحياتي

    مهندس \ محمود مرسي

    ReplyDelete
  25. المرة دي اسمحلى اختلف معاك تماما و اتفق مع تعليق أ/ أحمد شقير تماما
    انا بنت و الحمد لله محجبة و لبسي كله عبايات أو جيبات و بلوزات محترمة جدا و لا أضع مكياج و بمشي زي العسكري في الشارع و مع ذلك باتعرض لكل ده في الشارع المصري
    المشكلة ان المتحرش مابقاش بيفكر هو البنت محترمة و لا لأ هو بيكون عايز يرضي رغبته و خلاص
    و احب اقولك ان فيه منتقبات بتعاكسوا بأقذر الطرق

    أنا أعرف واحدة صاحبتى اتنقبت مخصوص علشان ماتتعكسش و لسة بتتعاكي بردو
    المسألة مسألة ثقافة ، للأسف ثقافتنا بقت بتلقى اللوم دائما على الضحية و تلاقيهم بيقولوا أكيد البنت اللى فيها و فيها و بينسوا ان الولد ده المفروض انه بشر له مخ و تفكير و يقدر يتحكم في نفسه لما يحب لأنه مش حيوان منساق وراء أي شئ يثير غرائزه و خلاص
    انا طبعا مش بدي الحق للبنت اللى بتلبس مش كويس لكن ده عمره ما كان مبرر للإيذاء ده
    أما عن مسألة الجنتلة و الذوق فأحب اقولك انه فعلا الجنتلة بقت منعدمة تماما في الرجالة المصريين إلا من رحم ربي طبعا
    تلاقى واحدة ست يا حرام ( و دي انا شفتها بنفسي ) طالعة الميكوباص و معاها ولد على كتفها و و لد ماسكاه في ايدها و فجأة ييجي راجل يزقها لدرجة انها وقعت على الأرض لأنه بيزاحمها في ركوب الميكروباص و على فكرة الموقف ده انا شفته كذا مرة

    الست لما بتطالب بان الراجل ما يتميزش عنها في الشغل فده حقها لأن مخ الراجل زي مخ الست ، لكن لما تطالب بان الشغل يقدر كونها ست و التزاماتها اكبر من الراجل فده حقها بردو لأنها في الأول ام و زوجة و دي أولوياتها
    نفس الحكاية بالنسبة للمواصلات ، الراجل جسديا اقوى من الست و يقدر يتحمل عنها ده غير ان الست لو وقفت في المواصلات هتتعرض لإيذاءات جسدية و تحرش و ما شابه أما الرجل فلن يتعرض لذلك
    يا رجال : ما تحاولوش انتوا تقارنوا نفسكو بالست لأن ده بيحطكوا في موقف وحش أوي ، و صدقونى مفيش ست بتحب تكون هي قائد الأمور لأن دي مش طبيعتها ، الست لو حست بالأمان بتسلم الراية كاملة للرجل ..... بس هي تحس بالامان
    تحياتي

    ReplyDelete
  26. القعقاع:
    فعلا الموضوع كبير كما طرحته في تعليقك القيم
    الافلام الهابطة والكليبات العارية بتسبب هيجان رهيب للشباب في الوقت اللي اصبح الزواج مهمة صعبة ان لم تكن مستحيلة لعدد كبير جدا من الشباب
    وبالتالي اصبح الشباب يعاني من شحن بدون تفريغ وهنا يكون الانفجار اللي هو التحرش
    تحياااااتي

    ReplyDelete
  27. مش هنكر الى بتقوله
    بس بردة مش نتهم المراه بس و نسيب الرجل
    عامه
    الدين هو الاساس للاتنين
    و موضوع المساوة انا ضد ان الست تتساوى مع الرجل فى كل شىء
    احنا ربنا خليقنا لنا طبيعه و الرجاله كمان ليهم طبيعه تانيه

    تحياتى
    لك تاج عندى

    ReplyDelete
  28. بص يا سيدى

    اولا

    حكاية التحرشات الجنسية بالمرأة والمعاكسة

    للاسف منتشرة فعلا وبغباء فى المجتمع المصرى من أسكندرية لأسوان

    والكلام فى القضية دى شائك

    ولا عذر للرجل

    فحتى لو كانت المراة غير محترمة فلا حجة للرجل فى التحرش بها
    يعنى انت مثلا ان عرضت مثلا بنت ليل نفسها عليك هتوافق
    دى بنت ليل متمرسة خد بالك

    انا شايف ان الرادع الاخلاقى كفيل بأن يوجهك

    ليه الرادع الاخلاقى ده ميكونش فى المعاكسات والتحرشات
    طبعا ده ميعنيش انى بوافق على اللبس المثير والحركات المثيرة وغيرة
    لكن علينا ان وجد تجنبه

    تحياتى

    ReplyDelete
  29. الرسول الكريم سيدنا محمد صلى الله عليه وسلم حظر في أحاديث عديدة فيما معناه إن عدم زواج الشباب وتيسيره هيتسبب في فتنة بالمجتمع
    وما يحدث من تحرش بجميع اشكاله نتيجه للكبت الجنسي لدى الشباب القادر جسمانيا على الزواج بينما لا يقدر على تكاليفه بالاضافه الي المثيرات الكثيرة التي تحيط به من كل جانب سواء كانت كليبات غنائية مثيرة بالفضائيات أو مواقع اباحية على الانترنت
    أما بقى الادهى والاضل سبيلا حال بعض المتزوجين وتعرضهم للاحباط بسبب اهمال زوجاتهم لهم مما يدفعهم لفعل هذه الافعال الغير مسئولة من اشكال التحرش سواء بنظرة محدقة أو كلمات اعجاب بصوت مرتفع
    القضية شائكة ولا يمكن حلها في آراء على مدونة
    الامر يستدعي بحوث اجتماعية محلية وليست مستوردة
    لمجتمعنا وزيادة للوعي الديني والاخلاقي
    اضف على ذلك أن هناك بعض النساء المستفزات اللاتي ينادون بحقوق المرأة وإن حقها يا عيني مهضوم علما بأن أكثر من نص موظفين الحكومة منهن
    خش اي مكتب في أي مصلحة حكومية وشوف عدد الستات اللي قاعدين ياكلوا ويقزقزوا لب
    وعدي في نفس الوقت على القهواي وشوف عدد الشباب الذكور اللي زي الورد اللي قاعدين يشيشوا ولا مستنيين الفرج
    :(
    بس على فكرة النسبة المذكورة للمتحرش بهن جنسيا
    نسبة تدعوا الجميع للقلق لأن معنى هذا أنه لا يخلو بيت في مصر به انثى لم يتم التحرش بها جنسيا
    وده طبعتا كلام كفتاجيه
    :)))))))))))
    آسف للاطالة
    خالص تحياتي

    ReplyDelete
  30. ابو اسامة:
    زمان قالوا في الامثال ان المال السايب بيعلم السرقة
    وهكذا برضة البنات العاريات او انصاف العاريات بيعتبرن عامل محفز جدا للتحرشات
    اي نعم مش كل اللي بيشوف بنت او سيدة بالمنظر دة بيتحرش بيها بس اي حد بيشاور عقله او عنده بس استعداد للتحرش بيلاقي بيئة خصبة جدا لكدة في وجود العري اللي منتشر بشدة الايام دي
    الف شكر على تعليقاتك القيمة ومشاركتك المتميزة ودة طبعا مش جور على حق صاحب المدونة ولا حاجة لأن المدونة ملك اصدقائها
    تحياتي واحتراماتي

    ReplyDelete
  31. mostafa rayan:
    لا طبعا يتحرشوا بينا ازااااااااااااي؟
    اومال مين اللي لازم يعيش دور الضحية المظلومة الغلبانة
    يا سيدي الفاضل
    بدل ما يحاسبوا الشباب الضائع المحروم دة يحاسبوا الاول اللي بيثيرهم وبيهيأ لهم الجو المناسب لاثارة غرائزهم ورغباتهم المكبوتة
    محدش خالص بيتكلم على كليبات العري والاثارة ولا عن دورها في الانحلال الاخلاقي اللي احنا بنشوفه دة
    الف شكر يا باشا على الكومنت الجامد دة
    تحياتي

    ReplyDelete
  32. ahmed shokeir:
    اولا: شرف ليا يا استاذ احمد تعليقك على الموضوع دة على الرغم من ابتعادك منذ فترة عن تعليقاتك على موضوعاتي المتواضعة
    ثانيا:
    هل تنكر يا استاذ احمد ان ملابس الفتاة عامل مثير جدا ودافع اساسي للتحرش بها؟
    مش كل واحد هيمر عليه واحدة عارية او متبرجة هيتحرش بيها انما لو واحد عنده 20% استعداد للتحرش اول ما يشوف المنظر دة هيتحول لنسبة 100%
    الزمن اتغير يا استاذ احمد وزمان كانت البطالة والفقر مش منتشر بالشكل دة
    انما احنا في زمن الحرمان والجوع...وقنوات الافلام والكليبات العارية بتغذي بشدة الحرمان والجوع دة وبالتالي ظهور المناظر دي في الشارع بتؤجج المشاعر المكبوتة
    اسمح لي اختلف معك بشدة
    العري والتبرج عامل اساسى اساسي في ظاهرة التحرش
    تحياتي واحتراماتي

    ReplyDelete
  33. bosbos:
    لا يا بس بس
    المشكلة مش في البنت المحترمة طبعا انما المشكلة الاساسية هي المتبرجات وحتى المحجبات حجاب اياه واكيد انتي بتشوفي الحجاب بقى عامل ازاي دلوقتي
    بالنسبة للتحرش بالاطفال وكدة فدة نوع من الشذوذ ومانقدرش نعممه
    لان دة بيدخل تحت بند الشذوذ الفكري والجنسي
    انما اسمحي لي اختلف معاكي تماما
    البنت لها العامل الاول والاساسي في موضوع التحرش دة
    تحياتي واحتراماتي

    ReplyDelete
  34. قلب مصري:
    لو في شاب عنده ميل للانحراف بنسبة 20 او 30 % بيشاور عقله يعني وشاف المناظر اياها نسبة الانحراف هتتعدى 90 او 100%
    العري والخلاعة في اللبس والمشي والكلام عامل محفز جدا للنعاكسات والتحرشات
    انا اعرف طبعا ان في منتقبات ومحجبات حجاب محترم وبيتعرضن للتحرشات واحيانا الاغتصاب انما دي القلة بالاضافة الى ان المتبرجات والعاريات ادوا غرضهم وهدفهم تماما بالاثارة وبالتالي انعكس دة على الكل حتى المحترمات
    تحياتي واحتراماتي

    ReplyDelete
  35. micheal:
    مايكل........ماذا دهاك يا رجل؟
    انت مش شايف الاستفزازات الرهيبة اللي في الشارع
    دة الللبس المحترم بقى هو الاستثناء يا مايكل
    يعني انت عايز ان البنات تلبس اللي على مزاجها والشباب يبقوا مؤدبين وولاد ناس ومحترمين وما يبصوش ومايعلقوش
    طب انا اقدر اعمل كدة وانت كمان ممكن تعمل كدة علشان الثقافة والاخلاق والدين وحتى خوفا على مركزك ووضعك الاجتماعي
    انما كام شاب في ال 80 مليون ممكن يعمل كدة؟
    هم برضة عليهن عامل وعامل مهم وحرام بجد نعفي البنات من السبب
    تحياااتي

    ReplyDelete
  36. roudi:
    وهل تنكري يا رودي كمية العري والاباحية المنتشرة بالشكل الفج هذه الايام؟
    هل انتي راضية عن ملابس بنات او معظم بنات اليوم بصرف النظر عن حجابهن او عدمه لانه في احيان كتير جدا بيكون الحجاب اكثر اثارة من عدمه؟
    هل انتي يا رودي راضية عن تصرفات واخلاقيان عدد ونسبة لا يستهان بها على الاطلاق من بنات اليوم؟
    اكاد اجزم انك لا ترضي عن هذه السلوكيات على الاطلاق
    الموضوع يا رودي مش قصة اولاد و بنات او قصة عدوان على المرأة
    القصة قصة رصد ظواهر وتحليل اسبابها
    انا لا اكره نجاح المرأة بالعكس هناك من السيدات الناجحات جدا وانجح واجدع من 100 راجل انما انا انتقد ظاهرة الشكوى الدائمة من اضطهاد المرأة في العمل بغير وجه حق
    اكيد طبعا في شخصيات ذكورية شاذة ورجال بلا اخلاق ولكن نسبة كبيرة منهم وجدت من شجعوهم على ذلك
    الف شكر على تعليقك القيم رغم اختلافنا الشديد في الرأي
    تحيااااتي

    ReplyDelete
  37. zikaaa:
    حاضر يا فندم........اوامرك
    البنات تلبس اللي هي عايزاه وتقلع اللي هي عايزاه واحنا معشر الرجال هنغض بصرنا او نعصب عينينا بشريط اسود واحنا ماشيين
    معقوووووول
    يعني خلاص طلعنا احنا اللي غلطانين؟
    ماشي يا سيدتي
    تحياتي واحتراماتي

    ReplyDelete
  38. abo 7anf:
    ماهو دة بقى اللي بيجنن وينرفز جدا
    انتي بتلبسي مثير علشان الشباب بيحب كدة
    وييجي واحد يتكلم ولا حتى يبص بصة تلاقي الاخلاق اترفعت وتلاقيها بتقول ايه القرف دة وتلاقي قناع خضرة الشريفة ظهر
    مش عارف والله دي شيزوفرانيا ولا بارانويا ولا ايه؟
    تحياتي واحتراماتي

    ReplyDelete
  39. mahasen saber:
    واضح يا محاسن انك مانزلتيش الشارع في الزقازيق بقالك كتير
    انتي مش شايفة البنات عامليين ازاي؟
    والمصيبة الاكبر في الجيل الجديد
    صبيان وبنات
    جيل طالع مش عامل حساب لأي حاجة او اخلاق او قيم في الحياة
    الشرقية باظت يا محاسن
    العوض على الله بقى
    تحياتي

    ReplyDelete
  40. وينكي:
    كويس قوي يا وينكي انك متفقة معايا ان لبس البنات وسلوكياتهم عامل كبير جدا في موضوع التحرش دة وازدياده في الفترة الاخيرة
    اما التحرش اللي بيطول الكل فدة راجع لاحباطات الشباب والبطالة وعدم القدرة على الزواج
    انا عن نفسي في مجتمع العمل بتاعي او المجال الطبي اللي انتمي اليه لا يوجد اي اضطهاد او تمييز ضد المرأة بالعكس دول واخدين حقهم تالت ومتلت
    بالنسبة بقى للجنتلة والطوابير ففعلا طالما طلبت معاكم مساواة يبقى مساواة في كل حاجة مش مجرد مساواة انتقائية
    تحياتي واحتراماتي

    ReplyDelete
  41. blackcairorose:
    اسمحيلي..اه لو انا اهملت وسبت عربيتي مفتوحة يبقى انا استحق السرقة
    طبعا يبقى اللص لص انما انا مشارك كمان في الخطأ ودة بالضبط وضع البنات الايام دي
    هن مشاركات تماما في المسئولية عن التحرش بهن بلبسهن وحركاتهن اياها
    خلينا نتفق ان ملابس البنات فيها درجة عالية جدا من الاستفزاز بشكل رهيب حتى المحجبات حجابهم غريب وعجيب جدا
    انا لا اضع المسئولية كلها على البنت ولكنها سبب وسبب مهم جدا من اسباب التحرش
    تحياتي واحتراماتي

    ReplyDelete
  42. نسر الشرق:
    انا سعيد جدا بمعرفتك وتشريفك لمدونتي المتواضعة وياريت تعتبرني صديق لمدونتك من دلوقتي
    بالنسبة لأيمن نور انا ان شاء الله ناوي قريبا جدا انزل بوست عنه وعن رأيي وانطباعاتي خاصة مع تكرار التعليق من الزوار الاعزاء على جملة مانديلا مصر
    تحياتي واحتراماتي

    ReplyDelete
  43. sniper:
    الف شكر على دعوتك الكريمة وان كنت اتمنى ان تشاركنا بالرأي في موضوع البوست
    بس عموما دعوة مقبولة
    تحياتي

    ReplyDelete
  44. كراكيب عادل:
    طالت غيبتك عن المدونة بس بجد عود احمد
    فعلا الفراغ لدى الجنسين هو اس كل البلاوي
    بجد اوجزت فأنجزت
    تحياتي واحتراماتي

    ReplyDelete
  45. احمد كمال:
    لو زوجتي او اختي عرضتني لموقف انه يتقال لها يا جميل امامي يبقى انا اللي استاهل اني خرجت معاها بالمنظر دة
    بس بجد والله هو مش موضوع البيضة ولا الفرخة يعني الست ولا الراجل
    القصة قصة اثارة واستجابة للاثارة دي
    ليست اكثر ولا اقل
    تحياتي واحتراماتي

    ReplyDelete
  46. مصري في الغربة:
    باشمهندس محمود
    نورتني والله وانا سعيد جدا بزيارتك وتشريفك لمدونتي المتواضعة
    فعلا هم منتشرين في المنتديات وبيروجوا لثقافة الاضطهاد
    بس والله هن السبب في حالة الاثارة اللي الشارع فيها
    تحياتي واحتراماتي

    ReplyDelete
  47. الحلم العربي:
    سلوكيات عدد كبير جدا من البنات بلبسهن وحركاتهن اياها بينعكس بشكل كبير على اغلبية البنات والسيدات
    الاحتقان زايد قوي في الشارع ومع ذلك في بنات وسيدات مش هاممهم الكلام دة خالص وشغلتهم الاساسية هي الاثارة
    بالنسبة لموضوع الجنتلة والذوق دي مالهاش علاقة برجل وست دي مسألة تربية بحتة واخلاق في الاول والاخر
    الف شكر على تعليقك القيم
    تحياتي

    ReplyDelete
  48. rania:
    عود احمد يا رانيا
    وياريت ماتقفليش مدونتك تاني...مفهوم؟؟؟
    التاج تم تنفيذه بالفعل يا فندم
    تحياتي

    ReplyDelete
  49. المحارب المتيم:
    وليه نلتمس العذر للبنات على لبسهن؟
    وهل كلنا على درجة واحدة من التدين او الاخلاق؟
    ممكن اكون انا وانت لا نتأثر بالممارسات النسائية المنتشرة اليومين دول
    بس هل كلنا سواسية؟
    طبعا لا
    يبقى لابد من زوال المؤثر
    تحياتي

    ReplyDelete
  50. ياسر حسين:
    المنظومة كاملة متكاملة فاسدة يا فنان
    شباب يائس ومفلس وبنات حاسة بأنوثتها و تتلذذ بفتنة الشباب
    ومجتمع مصمم على تأجيج المشاعر الجنسية لدى الجنسين
    بس انا بأشوف ان مفيش اكتر من الابحاث والدراسات في بلدنا وياريتها بتفيد
    بالنسبة للنسبة فهي مرتفعة لأن اي واحدة بتشوف حد بيبص لها في الشارع بتعتبر نفسها متحرش بها
    بترضي غرورها يا عيني
    تحياتي

    ReplyDelete
  51. يا عم أحمد اشمعني الولاد بيلبسوا اللي علي كيفهم وبينزلوا وقت ما يحبوا ويخرجوا مع اللي هم عاوزينوا ويسافروا وقت ما يجيلهم مزاج
    مش شايف أن البنات مبتقدرش تعمل كل ده؟؟
    :)
    كده فيه مساواة من وجهة نظرك؟
    ع العموم الإختلاف في الرأي لا يفسد للود قضية
    تحياتي

    ReplyDelete
  52. مع اختلافى الكامل مع الكلام اللى فى البوست ده ، انا عايزة اقول حاجة...

    على فكرة ، التحرش الجنسى بيعيبر عن اختلال نفسى معين ، و بغض النظر عن ان البنات بيلبسو او مابيابسوش ، البنى ادم اللى يستمتع بانه يلمس واحدة فى الشارع غصب عنها يبقى بنى ادم مريض

    و اللى يقدر يحكم على الحجم الحقيقى للمشكلة دى هى البنات ، لان معظم الحالات البنت بتتكسف فيها و تسكت ، فبالتالى -مع احترامى لحضرتك- مايقدرش راجل زى حضرتك- انه يعرف الحجم الحقيقى لحاجة زى دى

    واكيد لما نتكلم عن حاجة زى دى مش بنقول ان الرجالة كلهم ذئاب ، ولا ايه؟؟

    و فى النهاية انا شايفة لما نتكلم عن مشكلة زى دى و نطالب بوضع تشريعات تحمى البنات فدى مش مشكلة لحد الا للمتحرشين نفسهم ، و بيتهيالى ان اللى بيسرق _حتى لو سرق عربية مفتوحة _القانون بعاقبه بالسجن ، مش كدة برضو؟

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails