Thursday, 25 September 2008

رأي واحد زهقان من تليفزيون رمضان

اوشك الموسم الدرامي الرمضاني على الانتهاء بحلوه ومره
بالتأكيد كمية الدراما الرمضانية هذا العام سواء كوميدية او تراجيدية كانت كبيرة جدا..تصيب اي متابع بالتخمة وعسر الهضم
اتحدى اي مشاهد ان يكون قد تابع جميع الاعمال الدرامية الرمضانية....مهما تفرغ لهذه المهمة الصعبة..فكمية القنوات الفضائية زاد بشكل رهيب عن العام الماضي لدرجة "التورم" او التضخم
كمية المسلسلات الدرامية ازدادت بشكل هيستيري...كمية برامج الفكاهة اصبحت مبالغ فيها جدا....ناهيك عن البرامج الحوارية وكم الاعلانات التليفزيونية الفظيعة
البوست دة للذكرى...تقييم متواضع من مشاهد لمواد اعلامية وتليفزيونية تم عرضها في رمضان....رأي قد يحتمل الصواب او الخطأ..قد يحتمل التأييد او الخلاف معه..لكنه يبقى مجرد رأي
*****************************
اولا: الاعلانات
طبعا نجم الاعلانات السنة دي بيتنافس عليه "فودافون" و"كريم عبد العزيز" بحملة اعلاناته المميزة عن كوكاكولا
فودافون عملت كمية اعلانات السنة دي رهيبة...حملة اعلانية ضخمة فعلا ومبذول فيها مجهود كبير ويمكن تقسيمها لحملتين اعلانيتين
الحملة الاولى وابطالها نجوم الفريق الكروي بالنادي الاهلي وهي اعلانات قصيرة جدا قد لا تتجاوز مدة الاعلان الواحد 10-20 ثانية ولكنها معبرة عن رمضان بجملة او جملتين
الحملة الثانية و هي حملة "نتكلم بالليل" اللي اعتقد انها حققت نجاحات جماهيرية كبيرة جدا ولاقت استحسانا من الجماهير لخفة ظلها و عدم معقوليتها ومن هنا بتكمن طرافتها الشديدة
الغريب والعجيب ان الحملة الاعلانية "نتكلم بالليل" ووجهت بانتقادات من بعض الاشخاص باعتبارها تعبر عن سلبية المصريين وانا اعتقد ان دة فيه تحميل للاعلان اكثر مما يحتمل
اما حملة "كوكاكولا" بطولة "كريم عبد العزيز" فلفتت الانظار بشدة وجذبت انتباه المشاهدين لخفة دم كريم عبد العزيز طبعا...ولأول مرة تنجح الحملة الاعلانية لكوكاكولا في مواجهة الحملة الاعلانية لغريمتها اللدود "بيبسي" بقيادة احمد حلمي
على الرغم ان "احمد حلمي" يتفوق كوميديا بخطوات واسعة على"كريم عبد العزيز" الا ان اعلانات كوكاكولا كانت اقوى بكثير من اعلانات بيبسي
ربما ان تكلفة الانتاج كانت اكبر...ربما ان سيناريو الاعلان كان افضل..الا ان هذا هو ما حدث فعلا
بس انا عن نفسي وبعيدا عن حرب الاعلانات..بتبقى بيبسي بالنسبة لي هي الافضل طبعا
اما بقية طوفان الاعلانات...فسيختفي بمرور الوقت بدون اي بصمة او اثر على المشاهد
من الحملات الاعلانية المميزة برضة حملة "اتصالات" (مرن بقك)..طريفة برضة وجديدة خاصة تمرينات البق العجيبة اللي في الاعلان
فكرة جديدة وغير متوقعة
انما طبعا لا يمكن ان ننسى غتاتة ورخامة بعض الاعلانات....اللي كادت ان تفسد صيامنا زي اعلان بطاطس "فوكس" للممثل "احمد التهامي" بما تحتويه من بلاهة في الفكرة والتمثيل والممثلين





********************************
ثانيا: المسلسلات
طبعا تميز رمضان السنة دي بكمية كبيرة من المسلسلات بشكل غير مسبوق...لدرجة انك لو بتتابع اكثر من مسلسل ممكن جدا يحصل تداخل بين المسلسلات واحداثها مع وجود نفس الممثل في اكثر من مسلسل
واضح ان تيمة المسلسلات الرمضانية السنة دي هي (العشوائيات)....وكأنهم افتكروا فجأة ان في مصر ناس "عشوائيين"....بس الغريب ان الممثلات اللي المفروض انهن عشوائيات..مش عارفين يكونوا عشوائياااات خالص...ملامحهم مش جايبة ملامح عشوائية خااااااااالص
تخيل بقى لما تبقى داليا البحيري عشوائية ولا غادة عادل بتاعت شاي ولا هند صبري خادمة......اومال انعام سالوسة تطلع في دور ايــــــــــــــــــــــــــــــــــــه؟؟؟؟؟؟؟؟
من ضمن المسلسلات اللي تابعتها عن قرب او حتى تابعتها عن بعد.."طشاش" يعني قائمة ببعض المسلسلات:
الدالي: صراااااااااااااااااااااااااااااااااااااااااااع صراع..المسلسل عبارة عن حرب بين نور الشريف والمافيا...وانا بتفرج على مسلسل الدالي بأحس ان الدنيا صغيرة قوي..الحياة لا يوجد بها الا صراع الدالي مع المافيا
طبعا نور الشريف اداءه اكثر من رائع وكذلك معظم ابطال العمل بس الصراع ممكن يصيب المشاهد بالملل خاصة المبالغة في الصراع دة اللي محدش شايف له نهاية
في اشاعة عن جزء ثالث من المسلسل.............ياريت بلاااااااااااااااااااااااااااااااااااااااااااااااااااااااااااااااااااااااش
شرف فتح الباب: مش عارف اقيم المسلسل دة......تحس كدة بوجود حاجز نفسي يمنعك انك تحب المسلسل دة....هالة فاخر لما بتخرج من عباءة الكوميديا بتكون فعلا مبدعة جداا...يحيي الفخراني كان اكثر ابداعا في "حمادة عزو" السنة اللي فاتت..او يمكن من كتر نجاح "يتربى في عزو" السنة اللي فاتت في حالة فتور تجاه شخصية "شرف فتح الباب"...او يمكن القصة كئيبة....او يمكن القصة مكررة..او لأنك من السهل توقع الاحداث....في حاااااجة غلط
هيمة: مش هاقول غير كلمة واحدة
....بلال فضل
كلمة السر في نجاح المسلسل دة
ايه السيناريو دة؟ قوي جدا....سيناريو تحس ان اللي كاتبه مش عايش في برج عاجي...مصطلحات فعلا بتاعت الناس اللي تحت....كلمات بتاعتنا..مننا...احنا فعلا بنقول كدة
هو دة بلال فضل
احمد رزق.....كان ممكن الدور دة ما يبقاش بتاعه...ممكن نتقبل اي ممثل تاني...الدور اضاف له لكنه هو لم يضيف للدور كثيرا
عبلة كامل.....واضح انك استقريتي خلاص في دور السيدة الشعبية...من خالتي فرنسا وحتى ام هيمة..ربنا يرجعك بالسلامة
قلب ميت: انا عن نفسي بأرشحه احسن مسلسل رمضاني....شريف منير اكثر من رائع....مولود من بطن امه بيمثل..هو ماعدش ليه في مواهب بالشكل دة الايام دي...غادة عادل..ممكن يتقال عليها...(شغااال)..على الرغم انها مش عارفة تتخلى تماما عن ارستقراطية ملامحها..بس ماشي
قصة جميلة...شيقة..سيناريو قوي....اخراج جامد جدا
مسلسل حلـــــــــــــــــو
اما بقى عن بقية المسلسلات وما اكثرها فهي يا اما متابعة حلقة اه و 10 لا يا اما عن بعد تماما يا اما ماعرفش عنها اي حاجة على الاطلاق
ملحوظة
فكرت في اول رمضان اني اتابع مسلسل خالد صالح وهند صبري (بعد الفراق)...بس اول ما شفت خالد صالح طالع في دور طالب جامعي...اتصدمت صدمة شديدة جدا كان من نتيجتها الامتناع تماما عن متابعة المسلسل دة لسببين:
السبب الاول هو ان الكتاب بيبان من عنوانه وبالتالي الكتاب بانت لبته من الحلقة الاولى
السبب التاني اني اتعودت عدم احترام من لا يحترمني...وبما انهم لم يحترموني -كمشاهد طبعا- باعتبار خالد صالح ينفع يكون طالب جامعي يبقى بالتالي وجب عدم احترام عملهم



**********************************
ثالثا: برامج الست كوم
كعادة الشعب المصري في جميع المجالات
استغلاااااااال النجاح
ونظرا لنجاح "راجل وست ستات" ومن قبله"تامر وشوقية" فلقد قرر المنتجون اغراق القنوات الفضائية بمسلسلات الست كوم
واللي اغلبها ان لم يكن كلها طلعت ماسخة وبلا اي طعم او لون او رائحة وهيكون مكانها الطبيعي هو النسيان التااااام
دة حتى اللي اثبتت نجاح قبل كدة زي راجل وست ستات او تامر وشوقية اظهرت فشلا غير عادي السنة دي و دة برضة بسبب نفس العلة الازلية اياها
استغلال النجاح
بيستغلوا نجاح الجزء الاول في انتاج الثاني...وبيستغلوا نجاح الثاني في انتاج الجزء الثالث وهكذا وغالبا كل جزء بيكون اضعف كثيرا من اللي قبله
لدرجة ان الممثلين التراجيديين واللي عمرهم ما مثلوا كوميديا قرروا يدخلوا سبوبة الكوميديا من خلال الست كوم....لما بسمة تبقى كوميديانة ولا خالد النبوي يكون نجم الكوميديا الاول يبقى دة نسميه ايه غير انه سبوبة
بجد بقى ارحمووووووووووووووووووووونا
ومع كامل احترامي وحبي لمسلسل "راجل وست ستات" وكمان "تامر و شوقية" الا انه كفاية قوي كدة عليهم.....راجل وست ستات عملوا 5 اجزاء
وتامر و شوقية في الجزء الثالث ومع انسحاب "هيثم دبور" من بطولة الحلقات فقد المسلسل الكثير من شعبيته وقوته


****************************
رابعا: الافلام
لا افلاااااااااااااااااااااااااام في رمضان
سبحان الله....الواحد مالوش اي طقطان يتفرج على اي فيلم في رمضان
بجد والله كان الله في عون صناع السينما لما رمضان يبتدي يقرب من شهور الصيف يوليو و اغسطس.....دة كدة ممكن جدا نتوقع افلاس صناعة السينما في ال 10 سنوات القادمة بسبب تعارض شهر رمضان مع الموسم السينمائي الصيفي
بس هو برضة فرصة كويسة لعمل صيانة سنوية لدور العرض السينمائي
******************************
خامسا: القنوات الفضائية
تنافس رهييييب بين القنوات الفضائية والارضية في رمضان مع التورم في عدد المحطات الفضائية سواء كانت عامة او متخصصة
كل المحطات الفضائية ازدحمت بالبرامج والمسلسلات والحصريات
بس انا شايف ان رمضان السنة دي هو رمضان قناة (الحياة) او قناتي الحياة لانهم قناتين واحدة عامة والثانية مسلسلات
فعلا قناة الحياة في رمضان قناة متميزة جدا....افضل المسلسلات....افضل البرامج سواء الترفيهية او الدينية
الجميل فعلا ان القناة دي قناة مصرية...ودة صراحة بيرضي غروري كمصري بعد سنوات طويلة من التفوق الواضح لل (ام بي سي) و (ايه ار تي) السعوديتين
كمان رمضان السنة دي برزت فيه بشدة قنوات مصرية زي (بانوراما دراما) و زي (او تي في)..معلش بقى نوع من التحيز للاعلام المصري الغير حكومي طبعا بس فعلا هي قنوات تستحق لانها بذلت مجهود كبير



******************************
سادسا: الممثلين
نور الشريف: عملااااااااااااااااااااااااااااااااااااااااااااااااااااق....بس وحشتنا يا استاذ نور في اعمال جديدة..سنتين دالي مرشحة لانهم يبقوا 3 سنين كتير....اشتقنا لأبداعات جديدة
يحيى الفخراني: واضح ان لعنة حمادة عزو هتستمر معاك لسنة كمان....شخصية (شرف فتح الباب)..ما اقدرتش تنسينا شخصية (حمادة عزو)..تراي اجين لااااتر
خالد صالح: ركز في السينما شويــــــــــــــــــــــة..حاول تأخد اجازة من التليفزيون....معلش يا عبقري محدش بياخد من الدنيا كل حاجة..انت استاذ تمثيل بس واضح ان هواك مش جاي مع الشاشة الصغيرة
احمد رزق: انت ممثل جامد كوميدي وتراجيدي....و"هيمة" مسلسل جامد نصا واخراجا....وكاست التمثيل معاك جامدين جداا...بس برضة في حاجة غلط....شكل الدور ماكانش لك من الاول يا بو حميد
شريف منير: انت فيــــــــــــــــــــــــــــــــــــــــن يا راجل من زماااااان؟
والنبي ما تبقى تغيب عنا قوي كدة
بعد اللي شفناه في "قلب ميت" هننتظر ابداعاتك سنويا
بس وحياتك يا شيخ ما تدخلش الغيبوبة تاااااااااااااااااااااااااااااااااااني
مجدي كامل: ابدعت بجد والله..ربنا يوفقك....بس حظك السيء انك جسدت الشخصية دي بالذات..كان الله في عونك من محبي قبل كارهي الشخصية دي
احمد صفوت: شخصية "خالد الدالي" اثبتت انك ممثل مبدع....وشخصية "المشير عامر" اثبتت انك ممثل واعد....مستنيين بقى الشخصية اللي هتثبت لنا انك ممثل هاااااايل و قدير


********************************
سابعا: الممثلات
عبلة كامل: اخرجي بقى من عباءة "خالتي فرنسا" و "رزقة" عفاريت السيالة..اكيد عندك اكتر من كدة بكتيـــــــــــــــــر
غادة عادل: مع كامل احترامي لمجهودك الكبير المبذول في "قلب ميت" الا ان ملامحك لم تقنع الكثيرين انك "بسمة" بتاعت الشاي...معلش بقى قدرك كدة....دي ضريبة الجمال
هند صبري: ماقدرتش اتابعك بعد صدمة الحلقة الاولى لما شفتك انتي و"خالد صالح" مراهقين في الجامعة....هحاول مرة تانية بعد رمضان ان شاء الله
سوسن بدر: نضوج فني كبير جدا.........الدهن فعلا في العتاقي
هالة فاخر: مبروك عليكي خروجك من عباءة الكوميديا الهزلية.....اهلا بيكي في التراجيديا والدراما الهادفة
دورك في فيلمي "هي فوضى" و "حين ميسرة" اثبتوا انك فعلا كنتي مظلومة وظهرتي كفنانة متأخرة جدا....و دورك في "شرف فتح الباب" اثبت ان شاهين كان عنده حق
الهام شاهين: "قصة الامس" مسلسل محترم وهادف......ياريت تكوني استوعبتي بقى دروس الماضي والأدوار اياها .....بس اعتقد ان الادوار اياها ماعدش لها مكان بحكم الزمن
يسرا: لم اتابع مسلسلك السنة دي بعد ما عرفت قصته بوجه عام وعرفت ان "يسرا" سفيرة الامم المتحدة اصبحت هي اللي بتتحكم في اختيارات "يسرا" الممثلة
السنة اللي فاتت مسلسل عن قضية الأغتصاب والسنة دي مسلسل عن اطفال الشوارع
بعد كدة هنتظر عرض مسلسلاتك على قتاة الأسرة والطفل
في النهاية:
دة كان رأيي انا وليس فرضا ان يكون رأي الكل او حتى الأغلبية فلولا اختلاف الأذواق لبارت السلع
كل رمضان وانتم بخير وسعادة وصحة..........
ومين عارف......يمكن رمضان الجاي يرجع لنا الناس اللي غابت عن رمضان دة و اثرت فينا كلنا طبعا
الواحد حاسس ان رمضان السنة دي ناقصه حاجة في غاية الأهمية
انا طبعا بأتكلم عن
بكــــــــــــــــــــــــــــــــــــــــــــــــــــار

54 comments:

  1. أحمد بجد تحليلك رائع جدا لكل حاجة أتعرضت فى رمضان
    هو فعلا الواحد لو حب يتابع كل حاجة هتجيلة تخمة
    فعلا حراااااااااااام كم المسلسلات والبرامج اللى بيتعرض مرة واحدة وعلى كذا قناه

    بس نعمل أيه هو ده الواقع

    تحياتى

    ReplyDelete
  2. انا متفرجتش على التليفزيون والمسلسلات عشان ااقدر اتكلم فى الموضوع ده
    يعنى مش تابعت
    بس الشئ المستفز واليى كل مدا بيزيد طغيانه وجبروته هو الاعلانات ودوشتها وازعاجها..
    وبس
    قولتلك عيد سعيد
    افتكر اه من البوست اليى فات وكمان مره ومرات اخرى عيد سعيد يا زقازيقى ..

    ReplyDelete
  3. اولا السلام عليكم ورحمة الله وبركاته
    بجد تحليل رائع جدا بس للاسف انا اخدت عهد من سنين انى مش اسع اى حاجة فى رمضان اوى غيره بجد التليفزيون يجيب لاى انسان شلل
    المسلسلات والافلام وكل حاجة غير واقعية بالمرو تسبب حالات اكتئاب بصراحة

    ReplyDelete
  4. :)
    رغم تميزه.. فين مسلسل اسمهان وسط تحليلك

    ReplyDelete
  5. انا تابعت بعد الفراق

    علي فكره هو فعلا حلو

    هم كانو كده في الأول بس لأن المفروض ان الوقت هيجري وهم هيكبروا

    يعني مش مقضينها في ثاوي
    (:

    ReplyDelete
  6. تقيمك ممتاز وينم عن تفرغ تام للتليفزيون ربنا يعينك وخاصة فى موضوع المسلسلات انما انا بتفق معاك فى هيهة وقلب ميت لانى هما الاتنين فقط اللى بتابعهم بشكل مستمر
    انما السيت كوم والبرامج لا طبعا والاعلانات اللى بتتخلل المسلسلات بس وحبيت فعلا اعلانات فودافون ونجوم النادى الاهلى دة لكونى من عملاء الشركة وعاشق للنادى الاهلى

    ReplyDelete
  7. اتفق معاك فيما يخص مسلسل خالد صالح
    نفس الشعور راودني وعلقت نفس تعليقك عليه في مدونة خالد الصاوي
    بالنسبة لمسلسل هيما في حلقة خروج ابوه لى المعاش
    حقيقي أنا شعرت بقمة الملل من السيناريو والحوار
    يا راااجل حلقة بحالها عبارة عن حوار بين حسن حسني والموظف اللي بيبلغه خروجه المبكر على المعاش
    بصراحة المسلسل ده ممطوط والحلقة دي هي اللي فضحته
    ضيف على ذلك شخصية رجل الاعمال ايهاب فهمي اللي المفروض انه هو اللي مسبب القلق للوراق يكاد يكون ضيف شرف .. المسلسل ده مع احترامي لاعجابك ببلال فضل الا انه فيه حاجة مش مضبوطة في الايقاع الدرامي
    كلامك عن عبلة كامل وغادة عادل اتفق معاك فيه
    شريف منير نجم من يومه وبيفكرني بجون ترافولتا شكلا وموضوعا من حيث عودته بعد غياب فترة
    الاعلانات كانت زيادة عن اللزوم وسخيفة للغاية وسبب سخافتها انها كانت بتتخلل المسلسلات بكثرة مما دعاني الى عدم متابعة اي مسلسل الا بالصدفة
    أكثر برنامج عجبني كان برنامج المقالب حيلهم بينهم
    اعلانات كريم عبد العزيز معجبتنيش خصوصا انه لابس بلوفر كت على التي شيرت في عز الحر
    ومن الآخر بيستظرف
    غير كده أنا بأحب البيبسي ومش بأستطعم الكوكاكولا
    معاك في بواخة موضة السيت كوم أو سبوبة الكوميديا
    دي عادة مصرية قديمة
    الموبايلات مثلا بتكسب كله يفتح محل موبايلات .. إلخ
    ويكفي هذا الرغي
    :))))

    خالص تحياتي

    ReplyDelete
  8. يا راجل بجد عرفت تتفرج علي كل ده .. يا قلبك انا متفرجتش علي أي مسلسلات الا بالصدفه كده

    و كنت بتفرج علي البرامج

    اصلي مش من هواة التليفزيون أصلا

    تحياتي

    ياسمين

    ReplyDelete
  9. رغم انى فى رمضان مش بركز أوى مع المسلسلات لأنى شايفة ان الشهر ده أوكازيون حسنات وحرام نضيعه فى التليفزيون الا مع متابعتى للقليل
    لكن هيجرى لى حاجة لو ما اتكلمتش على الاعلان المتخلف بتاع فشخرة منظر وجوزها محسن منظر
    اعلان أقل ما يقال عنه انه تافه وسطحى ومتخلف
    لدرجة انى بتمنى ان شرايط التليفزيون كلها تولع بجاز علشان الاعلان ده يتحرق
    وكل سنة وانت طيب يا زميل
    الشراقوة أحسن ناس

    ReplyDelete
  10. بئا يا راجل تحلل كل ده وتنسى ظاظا وجرجير هههههههه

    هو طبعا مع احترامي الكامل لرؤاك ووجهات نظرك إلا انه فعلا شهر رمضان فرصة مش بتتكرر إلا مرة واحدة ف السنة .. صعب الواحد يضيعها ويتابع كل وجع القلب اللي بيصدعونا بيه ده ولا ربعه حتى

    الحمد لله مكانش عندي وقت أتابع ولا مسلسل .. بس كنت بشوف ع الفطار الإعلان بتاع بطاطس فوكس ده كان بيخنقني جداااا وفعلا زي منتا وصفت (بلاهة) وحاجة تخليك عايز تقوم ترجع الي كلته مش تروح تشتري فوكس .. اسفوكس عليهم يا راجل هههههه

    تحيتي ليك يا دكتور وكل سنة وانت طيب
    :)

    ReplyDelete
  11. نسيت اقولك كمان ان كافيه تشينو ده مش عارف ازاي يحسبوه ضمن الكوميديا .. ده كانو بيضحكوا على نفسهم

    ReplyDelete
  12. كل سنه وانت طيب رمضان خلص بح

    وكل سنه وانت طيب العيد جه


    تحياتى
    البنوته الشقيه

    ReplyDelete
  13. بصراحه

    انا مش اتفرجت علي التليفزيون نوهائي بجد عرفتني كل حاجه حصلت فيه

    ميرسي جدا

    كل سنه وانت طيب :)

    ReplyDelete
  14. بص انا هعلق عالاعلانات بس عشان كل اللي انت علقت عليه بالنسبة لي كلام حمضان و يكفي اللي انت علقت عليه

    الاعلانات

    زمان ك رمضان ده موسم ابداعي للاعلاانات

    كان في

    اعلان المطبخ بتاع عمرو حلمي ابو 15 الف جنيه بس

    و اعلان زال بتاع كلميني عن الدعك

    و اعلان بنك مصر بتاع الابداع و البناء اللي طلت حرب بيكلم البنك فيه بيعرفه ان هو اللي بادعه و هو اللي بانيه بس ماينفعش اكتب هو قال ايه بالزبط و كمان الاعلان ده نزل 3 مرات بس و اترفع من التليفزيون بعدها نهائي

    و اعلانات حسن عابدين و شويبس

    و اعلان مدرسة الاورمان بتاع كلنا اخدنا فيها اللي اشرف عبد الباقي اخده في فيلم خالي من الكوليسترول في الاعلان التريقة اللي عمله في اخر الفيلم بتاع مصاعد الهاوية و مدينة اوهام

    واعلان سياخك طولها كام بتاع احمد عز

    انا شخصيا التليفيزيون في رمضان بالنسبة لي مافيهوش احسن من الاعلانات

    اعلان كوكاكولا دي مش اول مرة كوكا تتفوق علىبيبسي دي تالت مرة من ساعة كاس الامم الافريقية اعلانات اللي مالهمش فيها و المتفائلين و المتشائمن لحد كاس امم اوروبا و اعلانات النشيد الوطني

    بصراحة التسويق الاعلاني لكوكاكولا اتطور يامة السنة دي مش بس رمضان ده لا ده على مدار السنة كلها

    قشطة

    سلاموووووووووووووووز

    بالمووووووووووووووووووووز

    ReplyDelete
  15. مش كلامك اللي حمضان انا قصدي المسلسلت بالذات و باقي الكلام الست كوم و الحبشتكانات البرامجالدينية من عندي كمان

    ReplyDelete
  16. يا باشا..أحييك من كل قلبي علي المقال الممتع المسلي ده اللي بجد مزهقتش منه رغم طوله نسبيا
    بشري..الدالي اتكتب 5 حلقات في الجزء الثالث وربما يكون هناك رابع كمان وكلامي ده مصدره أحد أبطال المسلسل شخصيا
    :)
    قبل ميت مسلسل جميل وإن كان عيبه الماطاردات البولييسة الساذجة جدا اللي افقدته جزء كبير من واقعيته
    يسرا كانت هايلة السنة اللي فاتت في قضية الإتصاب اما الينة دي...فربنا يسامحها بقي ويرحمنا وميطولش المسملسل ده عن 30
    خالد صالح طالب جامعي زي شريف منير والشفنقيري اللي لسه متخرجين وييدوروا علي شغل
    :)
    عااااااادي..المخرج عاوز كده يا مان
    :)
    مسلسل أسمهان حاول تشوفه بعد رمضان في الإعادات
    ناصر..بصراحة مخبتوش بعد أول خلقتين بس بفكر أسوفه بعد رمضان
    كل سنة وأنت طيب

    ReplyDelete
  17. استاذ سمير هو انت اتفرجت عالحاجات دى كلها
    سبحان الله بتلاقى وقت ازاى
    احنا تقريبا مفتحناش التلفزيون من اول رمضان الا على عمرو خالد وعم يتساءلون وخلصنا
    اصل رمضان تحس انه وقته ضيق قوى الصبح تجهيز فطار وقراءه قرءان وبالليل تراويح وانتخه مع القطايف والحلويات والكنافه والذى منه ههههههههههههههه
    بس بجد احييك عالتحليل الناقض
    بنت مصريه مين فين ليه

    ReplyDelete
  18. ياااااااااااااااه
    يا قلبك يا راجل
    اقسم بالله مفيش مسلسل واحد انا متابعه
    انا متابع الاعلانات بس
    اه و الله
    بس البوست جامد جدا
    و الله تحسد على طولت بالك

    الله ينور يا باشا

    تحياتى

    اسلام

    ReplyDelete
  19. يااااه انا مش تابعت كل الحاجات دى خالص يا احمد
    هى الاعلانات اللى بشوفها وقت الفطار
    اكتر اعلان بكرهه اتصالات مرن بؤك بحس انى قرفانه لما بشوفه او بفتكره
    فودافون دى حياتى بحبها
    حتى لو اعلانهم طلع فيه قرد زى بتاع موبينيل
    اما المسلسلات مش متابعه غير الدالى وفى ايد امينة
    والاتنين الحقيقة لاقيين عندى استحسان كبير جدا
    خصوصا وقبل عرض مسلسل فى ايد امينة كنت قريت القصة الحقيقة كاملة للصحفى عادل مبارز اللى قايمة بدوره دلوقتى يسرا

    ReplyDelete
  20. نسيت اقولك كل سنة وانت طيب
    عيد سعيد ياباشا

    ReplyDelete
  21. كل سنه وانتا طيب...
    وعيد سعيد عليك وعلى كل من تحب ياشرقاوى...
    ويا رب تبقا ايامك كلها زي اسمه كده
    اعياد يعنى...

    ReplyDelete
  22. ازيك يا احمد فينك ايه الغيبه الطويله دى ؟:)
    عرضك لكل مسلسلات رمضان و الاعلانات و كل حاجة تقريبا متفقه معاك فيها
    عدا خالد صالح هو صحيح مكنش لايق فى الدور العبيط بتاع خريج الجامعه بس و هو صحفى حاجاة تانيه خالص
    بردة مبدع
    تحياتى لك

    ReplyDelete
  23. اللهم زد هـــــــذا الوجه نورا
    واجعله دائـما مأجورا
    وبلغه العيد مسرورا
    امين يارب العالمين
    عيد سعيد

    ReplyDelete
  24. اللهم يا سامع النداء
    ومجيب الدعاء
    امنح قارئها راحة البال والخاطر
    ونجه من المخاطر
    وكن له ساتر
    وبلغة الفطر مجبور الخاطر

    عيد سعيد عليكم
    وكل سنة وانتوا طيبيين
    مستنى تهنائتكم بعيد ميلادى على المدونة

    اول ايام عيد الفطر

    ReplyDelete
  25. زملكاوية وخلاص1 October 2008 at 04:12

    كل سنة وانت بخير وسعادة وكل عام وانت اقرب الى اللة حقيقى المسلسلات السنة دى كان فيها دعوة صريحة لهجر التلفزيون والاعلانات تكسب وخاصة كريم ونتكلم بالليل جامد جدا واضيف اعلانات اتصالات بتاع الراجل وحماتة اصلة بيفكرنى بناس اعرفهم بالنسبة للمسلسلات عجبنى قوى قصة الامس بس اللى معجبنيش ترسيخ فكرة الخيانة والجواز التانى وكان مؤلفين الدراما بيقولو للستات دة امر واقع صدقت قوى شريف منير واتالمت معاة بس المسلسل كئيب بشكل غير عادى والمصريين مش ناقصين الدالى المسلسل المتتماسك الوحيد بس ساعات الدراما بتترهل منة شويتين لم يجذبنى شرف لانى من عشاق حمادة عزو لظروف خاصة ا على كل حال رمضان مضى وكل سنة وانت طيب المولد انفض والمراجيح قفلتتتتتتتت

    ReplyDelete
  26. bosbos:
    ازيك يا بس بس ؟
    كل عيد وانتي بخير وصحة وسعادة
    الواحد طالع من رمضان مش طايق يتفرج ع التليفزيون
    خلااااااااااااااااص
    عندي انتفاخ تليفزيوني
    كل سنة وانتي طيبة
    تحياتي

    ReplyDelete
  27. عايزة اتطلق:
    محاسن هانم
    كل سنة وانتي طيبة يا بلدياتي
    وان شاء الله العيد اللي جاي تكوني احسن واحسن كمان ان شاء الله وتكوني حققتي للي في بالك لو خير طبعا
    بالنسبة للتليفزيون هو لابد منه ولابد من متابعته سواء كان كتير او قليل
    تحسي كدة انه بقى قدر
    فعلا اكثر الوسائل الاعلامية تأثيرا على الجمهور
    بالنسبة للاعلانات............ربنا ينتقم منهم من اللي عملوه فينا
    تحياتي

    ReplyDelete
  28. انسانة عادية في عالم مش عادي:
    بالامانة هو التليفزيون السنة دي يجيب اكتئاب فعلا
    الغريب والعجيب ان المسلسلات السنة دي بتلعب على تيمة النكد والاكتئاب وكأن المشاهدين ناقصين
    مش عارفين ان الناس فيها اللي مكفيها
    عموما البعد عن الشاشة اسلم
    تحياتي

    ReplyDelete
  29. lasto-adri:
    للاسف الشديد لم اتابعه
    بس انا سامع عنه كلام كويس
    ان شاء الله هحاول اتابعه بعد رمضان
    انت عارف ان المسلسلات دي بتفضل تعاد لحد رمضان اللي جاي
    كل سنة وانت طيب
    تحياتي

    ReplyDelete
  30. esraa:
    مانا بعد ما اخدت صدمة مراهقة خالد صالح وهند صبري ما استحملتش يا اسراء
    ما فوقتش من الصدمة الا في نص رمضان تقريبا
    كان المسلسل فاتني خلاص
    عموما ان شاء الله هحاول اتغاضى عن الصدمة واتابعه بعد رمضان
    تحياتي

    ReplyDelete
  31. حقيقي انا ماعجبنيش غير قلب ميت
    اداء الممثلين كان جبد
    شريف منير هايل
    غاده عادل مش مقنعه بس زي القمر
    الاستاااذ جمال اسماعيل
    فوزيه
    يوسف فوزي
    محمد الشقتقيري
    وبصراحه كل ابطال المسلسل ادائهم هايل
    لكن بقية المسلسلات الحقيقه بحس انها مصري اوي او هندي بمعني اصح بالاضافه لاني مش بحب المسلسلات اصلا
    تحياتي علي بوستاتك الاخيره

    ReplyDelete
  32. رئيس جمهورية نفسي:
    والله هو مش تفرغ تام للتليفزيون بقدر ما هو تركيز شديد فيما اشاهده
    طبعا مفيش شك تن فودافون والنادي الاهلي افادوا بعض تبادليا تماما
    الاهلي استفاد بفلوس فودافون وفودافون استفادت من شعبية الاهلي الطاغية
    كل سنة وانت طيب يا باشا
    تحياتي

    ReplyDelete
  33. ياسر حسين:
    على فكرة
    بالنسبة لمسلسل خالد صالح في ناس كتير قفلت من المسلسل بسبب اول حلقة
    الناس اتصدمت من الشاب المراهق خالد صالح...بس اسمع انه مسلسل كويس بس بمبدأ ان الكتاب يبان من عنوانه لم اتابعه
    بالنسبة لهيما هو ممكن يكون وقع في افة التطويل الدرامي الرمضاني علشان يعدي ال 30 حلقة...بس مفيش شك ان بلال فضل كاتب سيناريو عبقري
    فعلا بيبسي حاجة وكوكاكولا حاجة تانية خالص
    الف شكر لك على تعليقك القيم
    تحياتي واحتراماتي

    ReplyDelete
  34. عاقلة على ارض الجنون:
    اصل بعد الافطار يا ياسمين الفرجة بتكون اجباري
    واقعد انقل بين القنوات لمتابعة من كل بستان زهرة
    بس سيبك انتي
    كان في شوية مسلسلات كويسة في رمضان السنة دي
    شكلها فاتتك
    ملحوقة بعد رمضان ان شاء الله
    تحياتي واحتراماتي

    ReplyDelete
  35. voice of love:
    هي يعني جت ع الاعلان دة؟
    ما التليفزيون مليان اعلانات عجيبة وسيت كوم غريبة ومسلسلات كئيبة
    احسن حاجة فعلا انك ماتابعتيش
    حاولي تتابعي بعد رمضان بقى بعد ما مولد المسلسلات دي تنفض
    تحياتي وكل سنة وانتي طيبة

    ReplyDelete
  36. ليك تاج عندى روح استلمه بسرعة

    تحياتى

    ReplyDelete
  37. كل سنة وانت طيب
    بص انا شايف انمسلسلات رمضان السنة دي معظمها فاشل جدا
    خصوصا مسلسلات الكبار
    يحي الفخراني الفكرة مكررة والمعالجة ليس فيها جديد وبالفعل يحي الفخراني الذي كنت تراه وحشا متألقا في حمادة عزو يبدو قزما منكمشا في شرف فتح الباب المسلسل عمل حاجز بينه وبين المشاهد من اللحظة الأولي
    اما قصة الأمس فهو مسلسل فاشل جدا بصراحة القصة معادة ومكررة ومافيشهاش جديد ومكتوبة بطريقة سطحية جدا واداء اللمثلين كان ضعيف جدا كمان سميرة احمد ويسرا مابيقدموش جديد
    وكفاية كدة لأني طولت عليك

    ReplyDelete
  38. الام وامال:
    كل سنة وانت طيب يا باشا
    فعلا مسلسلات رمضان مش كلها كان على مستوى الحدث الحقيقة
    بس برضة الامر ما يسلمش من كام مسلسل كويس
    ساعات بيكون الفرجة ع التليفزيون اجبارية زي ما بعد الافطار وما قبل السحور
    وعموما فعلا معاك حق والله ظاظا وجرجير دة كارتون دمه خفيف....بس احلى حاجة فيه تتر البداية بمووووت فيه بجد
    تحياتي

    ReplyDelete
  39. البنت الشقية:
    وانتي بصحة وسعادة ورضا وسلام
    وان شاء الله العيد اللي جاي تكوني اكثر شقاوة
    اوعي تبطلي شقاوة
    تحياتي واحتراماتي

    ReplyDelete
  40. كيارا:
    هو انا قلت حاجة؟!!!!!!
    دة يا دوب اللي عرفت اتابعه او حتى اتابع اجزاء منه....وما خفي كان اعظم
    دة انا عرفت ان كان بيتعرض حوالي 40 مسلسل في رمضان غير مئات الاعلانات وكام سيت كم
    عموما
    كل سنة وانتي طيبة
    تحياتي

    ReplyDelete
  41. محمد الكومي:
    ايه يا عم الاعلانات الاشتغالات اللي انت فاكرها دي
    اي نع هي اعلانات عجيبة وفيها ايحاءات غريبة جدا بس اكيد في برضة اعلانات دلوقتي حلوة
    هي اي نعم عددها قليل بس موجودة
    فعلا انت فكرتني بحملة كوكاكولا بتاعت كاس افريقيا المتفاءلين والمتشائمين كانت حقيقي حملة ما حصلتش
    بس الغريب والعجيب فعلا ان برضة بيبسي تكسب
    تعليقك اكتر من رائع
    الف الف شكر
    تحياتي وكل سنة وانت طيب

    ReplyDelete
  42. micheal:
    تصدق يا مايكل انك طمنتني فعلا...كنت قلقان ع الدالي بجد
    كدة الواحد يعرف ينام....ربنا يطمنك
    قلب ميت كان ماشي كويس على الرغم من جرعة النكد الرهيبة اللي جواه بس من ساعة ما تحول الى مسلسل بوليسي وهو عجيب جدااا
    يسرا...بطلت اتابعها من زمان من ساعة ما مسلسلاتها بقت ذات قضية
    بالنسبة لمسلسل اسمهان فعلا انا اسمع عنه كلام كويس جدا....هحاول اتابعه بعد رمضان ان شاء الله
    تحياتي

    ReplyDelete
  43. بنت مين فين ليه:
    عمرو خالد برنامجه السنة دي كان اكثر من رائع استمتعت به بجد والله
    اما عن الحاجات دي كلها فلم اتابعها كلها بالتفصيل وانما فكرة عن كل حاجة
    الف شكر لكي على تعليقك القيم و عيد سعيد
    تحياتي

    ReplyDelete
  44. مواطن مصري نايم:
    على فكرة
    الاعلانات في حد ذاتها دراما....وهي المسلسلات والبرامج اللي في البوست دي عبارة عن ايه غير اعلانات جواها مسلسلات
    كل رمضان وانت طيب
    عموما كل المواد الدرامية دي بتفضل تعاد من رمضان لرمضان اللي بعده
    تحياتي

    ReplyDelete
  45. desert cat:
    بالنسبة لاعلان اتصالات فعلا تحسي ان الناس انقسمت عليه
    في ناس عاجبها قوي الاعلان دة وناس تانية شايفة انه اعلان مقرف ودمه تقيل
    بس اعتقد في الحالتين فكرته حلوة
    بالنسبة ليسرا ماعنتش بحب مسلسلاتها م عارف ليه...يمكن علشان انا مش بحب يسرا اصلا
    الدالي حلوة بس الصراعات فرطت منهم قوي
    عموما كل سنة وانت طيبة
    تحياتي واحتراماتي

    ReplyDelete
  46. عايزة اتطلق:
    محاسن هانم
    كل سنة وانتي طيبة يا شرقاوية
    وعيد سعيد يا فندم
    تحياتي واحتراماتي

    ReplyDelete
  47. rania:
    ازيك يا رانيا
    عاملة ايه؟
    انتي ليه قفلتي مدونتك يا رانيا؟
    ينفع كدة يعني؟
    ياريت ترجعي لتدويناتك القوية
    بالنسبة لخالد صالح انا اصلا بعشقه وهنا كانت صدمة انه يطلع شاب مراهق
    بس في ناس كتير بتشكر في المسلسل دة فعلا...هحاول اتابعه ان شاء الله
    تحياتي

    ReplyDelete
  48. نهر الحب:
    امين يارب العالمين

    ReplyDelete
  49. المحرب المتيم:
    عيد فطر سعيد وعيد ميلاد سعيد
    ربنا يجعل ايامك كلها اعياد
    تحياتي واحتراماتي

    ReplyDelete
  50. زملكاوية وخلاص:
    شرف كبير للمسلسلات اللي سيادتك اتفرجتي عليها يا فندم
    عموما رمضان خلص وان شاء الله رمضان اللي جاي يكون احلى ةاحلى
    تحياتي واحتراماتي

    ReplyDelete
  51. zika:
    فعلا قلب ميت مسلسل رائع
    عودة تليفزيونية قوية لشريف منير
    غادة عادل مش لايق الدور عليها خالص...بس اهي حاولت
    بقية الممثلين عشرة على عشرة
    وان كان يعيب ع المسلسل جرعة النكد المكثفة و جرعة المطاردات الرهيبة
    تحياتي والف شكر

    ReplyDelete
  52. bosbos:
    علم وينفذ يا فندم
    البوست بعد القادم ان شاء الله هي التاجات
    تحياتي واحتراماتي

    ReplyDelete
  53. mostafa rayan:
    اولا مفيش تطويل ولا حاجة بالعكس الف شكر على تعليقك القيم
    ثانيا:
    فعلا الكبار لم يقدموا جديد خاصة الفخراني ويسرا
    كل رمضان وانت طيب
    تحياتي واحتراماتي

    ReplyDelete
  54. حلو قووووي

    باختصـار يعني

    على فكـرة أنا كنت كتبت موضوع عن عاالم الإعلانات ده عندي ف المدونة، وتقريبًا باتفق معاك في كثير مما جئت به ، خالص تحياتي

    أول مرور لي هنـا ، وشكله مش هيبقى الأخيـر :)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails