Wednesday, 17 September 2008

كيف تنظر الى دينك؟


المصريون متدينون  بطبيعتهم
شعب بيحب دينه سواء كانوا مسلمين او اقباط
حتى المصري اللي مش متدين تلاقيه محايد دينيا يعني لا يهاجم الدين... قد لا يلتزم بتعاليمه ولكنه لا يكرهه ....ممكن تلاقي مسلم مابيصليش بس هو معترف في قرارة نفسه ان دة تقصير من ناحيته وليس عدم اقتناع منه بأهمية الصلاة مثلا
واعتقد ان هناك اقباط غير منتظمين في الذهاب للكنيسة وغير منتظم بتعاليم الصوم ولكنه يبقى مسيحي ويبقى معتزا بمسيحيته
هل نحن كمصريين ظاهرة استثنائية؟يعني فيه ناس زينا ولا احنا اللي متفردين بتديننا كشعب؟
الدين بيمثل لك ايه في حياتك؟
انا عن نفسي الدين بيمثل لي القانون اللي امشي عليه في حياتي...الحكم اللي بنحتكم ليه في الامور الخلافية....اسلوب للحياة...الاوامر والنواهي اللي بتنظم لنا حياتنا
المرجع اللي بينظم لنا حياتنا وعلاقاتنا مع بعضنا وطبعا علافاتنا برب الكون سبحانه وتعالى
دة مفهومي عن الدين في حياتي...اعتقد ان في ناس كتير بتتفق معايا في المفهوم دة او في ان دة دور الدين في حياتها
اكتشفت ان في ناس بتحط الدين في امور مش مطلوب انه يكون فيها بشكل مباشر.....ناس بتوظف الدين وتفسر بيه اي حاجة واي حدث في الدنيا دي
في ناس بتؤمن ان القرءان الكريم ممكن يحتوي على نظريات فيزيقية ومعادلات كيميائية ويحتمل انه يتفسر من خلاله نظريات علمية وظواهر كونية
وانا في رأيي المتواضع جدا ان دة تحميل الدين ما لا يحتمل وتحميل للقرأن الكريم ماهو ليس مطلوبا ان يحتمله....والله اعلم
ناس تانية بتعزي اي حاجة سيئة تحصل لأحد اعداء الاسلام والمسلمين انه انتقام رباني وانه نصر من الله لعباده المسلمين...ومش بالضرورة ان ده يكون حقيقي فحكمة ربنا فوق كل خيالاتنا وافكارنا
يعني مثلا قالوا ان تسونامي هو انتقام رباني من البوذيين الاسيويين عبدة الاصنام..وبنفس منطقهم هل كان زلزال اكتوبر 1992 انتقام رباني برضة بس من المصريين؟
...ربنا سبحانه وتعالى له حكمه واياته وليس بالضرورة تفسيرها بنظرية مع او ضد
مش بالضرورة ان تكون كارثة الدويقة مثلا عقاب الهي للشعب المصري كما قيل من بعض العلماء.....ممكن تكون كدة فعلا فلله في خلقه شئون...وممكن جدا ان تكون مجرد ابتلاء من الله سبحانه وتعالى
وهل اذا اصاب شخصا ما مرض عضال فهل معنى ذلك غضب من الله على هذا الشخص؟
طبعا لا
المقصود هو ان تحميل الدين ما لا يحتمل او يطاق من معادلات كيميائية ونظريات فيزيقية و  تفسيرات انتقامية و  معاني غريبة جدا شيء عجيب جدا من وجهة نظري
فكما ذكرت فالدين من وجهة نظري المتواضعة هو ميثاق عمل....دستور اخلاقي....دليل حياة....شريعة نهتدي بها ونسير على تعاليمها...اما غير ذلك فلا اعتقد
والله تعالى اعلم
انما يبقى السؤال
كيف تنظر الى دينك
هل ككتاب سماوي معلم ومرشد للقيم والاخلاق والسماحة....اسلوب حياة ومنهج عمل؟
ام تنظر اليه
ككتاب سماوي يحتمل ان يحتوي على كل شيء....بمعنى انه لا غرابة في ان يحتوي على حقائق علمية او طبية او دنيوية؟
هو دة السؤال

33 comments:

  1. ربنا سبحانة وتعالى بيقول ف كتابة العزيز انة خلق الانس والجن للعبادة والدين هو وسيلة العبادةفهو منهاج لحياتنا ودستور بيعبر عن كل شىء انا عن نفسى احب المزج بين الرايين فالقران دستورنا ومعجزتة يدلل عليها بالاف البراهين ويالا نغتنم البقية الباقية من الشهر الكريم ليكون الدين دستور وسلاح تحمى بية نفسك وسط المغريات اللى صعب حد يقاومة الا اذا كان ايمانة قوى وكل سنة وانت طيب والدين بخير

    ReplyDelete
  2. ربنا نزل دينه وهو شامل لكل حاجه
    عشان مانرجعش نعترض بعد كده ونقول ان مفيش حد قالنا
    اعتقد ان الدين منهاج حياه كامل

    ReplyDelete
  3. قال رسول الله صلى الله عليه وسلم فيما معناه:
    انما بعثت لأتمم مكارم الأخلاق
    وقال الله تعالى في كتابه الكريم فيما معناه
    وما أرسلناك إلا رحمة للعالمين
    بمنتهى البساطة الكلام واضح جدا
    الرسول الكريم بعث ليتم مكارم الاخلاق ووجود الاخلاق الكريمة بين الناس يجعل فيما بينهم المودة والرحمة فبالتالي رسالة الدين بشكل عام الحث على مكارم الأخلاق ووجود منهج للحياة
    أما نظرتي أنا تحديدا فهي لا تختلف عما سردته واضيف أن الدين يجعل لك هدف تسعى غلى تحقيقه وهو العمل صالحا في الدنيا حتى تغنم بالجنة في الآخرة
    أما نظريات بعض العلماء حول ما يوجد في القرآن من معجزات فهو بلا شك يحتوى على أكثر مما نتخيل وعلى سبيل المثال لا الحصر الوصف القرآني لخلق الانسان في رحم أمه قبل أن يكتشف العلم السونار والآشعة التي تصور هذه المراحل
    والله أعلم

    خالص تحياتي

    ReplyDelete
  4. أحب أن أضيف قول سمعته منذ زمن ومع الأسف لا أتذكر إن كان حديث أو قول حسن
    وهو:
    من آراد أن يكلم الله فعليه بالصلاة
    ومن آراد أن يكلمه الله فعليه بقراءة القرآن

    وأعتذر للاطالة
    خالص تحياتي

    ReplyDelete
  5. احمد
    انا بنظر لدينى على انه طريق لازم امشى عليه .. ولا عملت شىء عكسه يبقى شىء غلط .. وغلط كبير .. فى بحاول اتحاشى الحرام ومن جوايا فعلا خوف كبير منه ..
    بشوفه راحه نفسيه لما اكون راضيه من جوايا عن تصرفاتى .. اللى المفروض أنى ارضى بيها ربى اولا واخيرا .

    واعتقد أن كثييير مننا كده مش انا بس يعنى .

    زى مثلا ظاهرة الزواج العرفى .. كبرت اوى كده لأن الشباب عايزين يعملوا حاجه غلط كان محاطه بأسم دينى اللى هو زواج .. لكن منهم اللى بيضحك على نفسه ..وبقنع نفسه انه شؤعى ودينى ومفيش حرمانيه عليه ..
    زى ... وزى .. وزى

    حاجات كثيير فى حياتنا بنراعى فيها دينا .. ولو البعض مراعاش فيها دينه .. بيسميها من جواه بحاجه تانيه المهم انه تكون مسمى قريب للدين ..

    احمد
    بوست رائع والله .
    وكنا محتاجين النفحه الإيمانيه دى فى الوقت ده بالذات
    شكرا لك ايها المبدع

    ReplyDelete
  6. أظن أن الإجابة موجودة في البوست ده على المضيفة


    يسرني زيارتك

    ReplyDelete
  7. انا اعتقد ان الدين هو كتاب سماوى يمكن ان يحتوى على كل شئ

    والله اعلم
    موضوع مميز


    تحياتى
    البنوته الشقيه

    ReplyDelete
  8. زى ماحضرتك قلت

    انا انظر لدينى كاقانون امشى عليه

    لان دينا فيه كل شىء

    وبعددين صدقنى الابتلاءات دى نعمه من ربنا

    مش غضب ابدا

    شكة الدبوس بتشيل زنوب من الانسان

    دمت بكل الود اخى الفاضل

    اخيك

    احمد سكر

    ReplyDelete
  9. انا متفق معاك ان فيه خرافات كتير جدا مازالت عالقة بالافكار منها الحكاية دى
    بل الاكثر من ده ان فيه ناس اعترضت على مبدأ علم الاعجاز العلمى على اساس ان الدين مش محتاج اننا نثبت صحته واعجازه بطريقة علمية

    بس طبيعى ان تعزية المصائب للدين يحصل من الطرف الضعيف - اللى هو احنا - وده دليل على اننا عندنا قابلية اننا نفضل ضعفاء لفترة كبيرة قادمة ما دمنا بنعول الامور بغير عقلانية .

    تحياتى

    ReplyDelete
  10. سيدي ياسيدي عالمواضيع

    لا بجد بجد موضوع في الجون وعاجبني صياغتك ليه قوي
    عاجبني اكتر انك أشرت لكلام بعض المشايخ اللي بيقولو ان اي مصيبة بتحصل دي عشان احنا نستاهل
    وكأن ربنا استغفر الله العلي العظيم .. خالقنا عشان يعذبنا بس

    وبالنوسبه لسؤال والدين بيمثل لي ايه
    الدين هو كل حاجه .. سلوكيات الفرد لو طلعت من منطق الدين وتنفيذ تعاليمه صح .. يبقى هنعيش في حاله حلوة قوي

    زي مثلا لما بنكون بنصلي في المسجد .. بتلاقي الناس هاديه ومرتاحه نفسيا وقلبها متطمن .. تخيل بقى لو اتعاملنا بالمنطق ده واحنا في اي مشوار في الاشارع .. مش هنسمع كلاكس واحد ولا شتيمه واحده ولا حد هيجري ولا هيجور على حق غيره

    اه لو فهمنا الدين صح
    ااااااااه بجد





    سلاموووووووووووز

    ReplyDelete
  11. دينى هو حياتى و مرشدى و طريقى كمان
    ما اقدرش اتخيل حياتى من غير دين اصلا
    المفروض انه يبقى مرجعيتى فى اى حاجة بعملها فى الدنيا
    هو ده تصورى عن الدين و الحمدلله على نعمة الاسلام

    ReplyDelete
  12. في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    http://www.ouregypt.us/culture/main.html

    ReplyDelete
  13. اجوجو:
    اولا وقبل اي شيء كل سنة وانتي طيبة وبصحة وسعادة
    طبعا القرأن في حد ذاته معجزة واعجاز
    انما هل تتوقعي من القرأن الكريم ان يحتوي على معجزات علمية فيزيقية او كيميائية؟
    هو دة السؤال اللي ما جاوبتينيش عليه
    تحيااااتي

    ReplyDelete
  14. esraa:
    طبعا الدين منهج حياة شامل يا اسراء
    انما السؤال عن الامور العلمية الطبية والكيميائية و الفيزيقية....هل تنتظري ان يحتويها القرأن الكريم؟
    هو دة السؤال
    تحياتي واحتراماتي

    ReplyDelete
  15. ياسر حسين:
    طبعا انا متفق معاك تماما
    انما السؤال عن المعجزات العلمية الكيميائية او الفيزيقية
    هل منتظر وانت تقرأ القرأن الكريم ان تستنتج اكتشافا علميا او اختراعا او معادلة؟
    ولماذا لا يحدث العكس
    بمعنى لماذا لا يتم اكتشاف النظرية الكيميائية من القرأن الكريم اولا.....؟
    لأن ما يحدث هو تفسير الظواهر الطبيعية عن طريق القرأن وليس اكتشافها
    انا شخصيا لست من مريدي زغلول النجار وارى ان القرأن الكريم كتاب سماوي روحاني وايضا منهاج حياة وليس كتاب كيمياء
    تحياتي واحتراماتي

    ReplyDelete
  16. السلام عليكم ورحمة اللة وبركاته
    موضوع ارجاع نظرية فيزيقية ولا كميائية للكتاب المقدس سو كان قران او انجيل او اى شى تانى ده موضوع انتهى بحث يا احمد اة القران فية بعض الاعجاز بس باى طريقة انى بيكون العلم مؤكد لبعض الايات القرانية زى (وبينهم برزخ لا يبغيان ) واكتر مكان ظهرت فية الموضوع دة التقاء النيل الابيض بالنيل الازرق فى السودان وكمان الاية اللى بتقول ( ومن اياتنا ان ناتى الارض ننقصها من اطرافها ) وظاهرة الاحتباس الحرارى وما نتج عنها من تناقص وتأكل الشواطي
    لكنة دة لا يعنى انى ابتدى احاول ارجع كل نظرية جديدة فى العلم لاية فى القران
    اما بخصوص الدين بيمثل لية اية فهو قانون ومنهج ومبادى ومثل انا بسير عليها فى حياتى من غيرها اضيع

    ReplyDelete
  17. الحمد لله ان شعبنا يتميز بكده
    بس عندى اعتراض على حتة

    المقارنة بين تسونامى و زلزال 1992
    غير عادلة

    اولا تسونامى
    ما زال يتكرر حتى الان
    و مش على بلد واحده او مكان واحد
    لا دا فعلا على مناطق كتير
    و الملفت فعلا
    ان اكتر عدد للضحايا كان فالبلاد اللتى تبعد عن الدين
    و كان واضح جدا كمان فى حكاية المسجد اللى اتأثر تأثر بسيط بتسونامى
    و ان اللى احتموا بداخله نجوا بأمر الله طبعا

    لو ما سمعتش عن المسجد ده
    انا كان عندى صور له
    و حوار مع احد الاشخاص اللى احتموا بداخلة
    مع العلم انه قريب جدا من الشواطئ


    بوست جميل بجد
    تحياتى ليك

    اسلام

    ReplyDelete
  18. هو الوازع الدينى وتمسكنا بالدين واحترامنا ليه
    هو ده من الاشياء العدله اليى بتميزنا يعنى اكاد اجزم انه من الصعوبه اننا نبقا زى تركيا دوله علمانيه
    لان تمسك الناسواعتزازها بدينها واضح جدا فى مصر ودى من حسنات البلد دى
    ..وهرجع تانىللتعليق على الميتفزيقيه يا ميتافيزيقى يا احمد..

    ReplyDelete
  19. ضي القمر:
    اولا بارك الله لك في دينك وكل رمضان وانتي اكثر طاعة لله عز وجل
    ثانيا
    انتي المبدعة لتعليقاتك المتميزة واهتمامك
    الف شكر بجد
    تحياتي واحتراماتي

    ReplyDelete
  20. صاحب المضيفة:
    طبعا المضيفة مضيفتنا جميعا
    الف الف شكر
    تحيااااااتي

    ReplyDelete
  21. البنت الشقية:
    فعلا
    الله اعلم
    فالمؤكد ان القرأن الكريم مازال يحتوي على معجزات واسرار لا يعلمها الا الله عز وجل
    تحياااااتي

    ReplyDelete
  22. انا ببص لديني على انه بيني و بين اللي مدايني بيه اللي هو ربنا بس

    و غير كدة ماببصش

    و حياتي بحاول على اد ماقدر ماعملش حاجة حرام فيها

    ReplyDelete
  23. لا طبعا يا احمد بنظر ليه على اساس انه كتاب شامل من تعاليم واداب اليى كتاب بيحتوى على حقائق علميه بيثبت صحتها العلم الحديث ودليل قوى للغرب على صدق النبوه والقرآن الكريم
    وعشان كده انا بأيد العلماء فى تفسير الاعجاز العلمى للقرآن الكريم
    اما ما يقال بخصوص الكوارث انها غضبمن المولى عز وجل فاعتقد ان لما شيخ يعلق ويقولكده
    فبيدعوا الناس للسلبيه والتواكل سلبيه اننا هنشيل الغلط من على كاهل المسئول عنه وتواكل ان هنبقى ماشيين كده بالبركه امسك سلك عريان لو ربنا راضى عنى مش هتكرب
    بالذمه ده كلام
    انا قلتلك هرجع وادينى رجعت كفايه كده ةولا ارجع اعلق تانى
    رمضان كريم وعيد سعيد ومبارك يا شرقاوى

    ReplyDelete
  24. احمد سكر:
    انا مؤمن تماما والحمد لله يا احمد ان كل ما يحدث في هذه الحياة انما هي حكمة الهية
    وليس بالضرورة ان يكون اي حادث مفجع زي الدويقة هو بلاء....انما قد يكون ابتلاء من الله عز وجل
    تحياتي

    ReplyDelete
  25. wael:
    انا متفق معاك تمام الاتفاق اننا بنستسهل تعليق كل شيء على الدين
    سواء كان الدين يحتمل ذلك او لا يحتمل
    وغالبا الناس بتعمل كدة من باب ترييح الدماغ
    تحياتي واحتراماتي

    ReplyDelete
  26. soooo:
    يا عم سوو انا مش قد الكلام الجامد دة
    دة انا كدة ممكن يحصل لي انبعاح في الذات وتكور في النفسية
    طبعا الاخوة اللي بيعلقوا كل مصيبة على شماعة البلاء من الله عز وجل نسوا او تناسوا ان في حاجة اسمها ابتلاء زي ما في حاجة اسمها بلاء
    الف شكر يا باشا على التعليق الجامد دة
    تحيااااتي واحتراماتي

    ReplyDelete
  27. جيداء:
    الحمد لله يا جيداء
    ربنا يديمها عليكي نعمة
    تحياااااتي

    ReplyDelete
  28. anonymous:
    على فكرة
    لو دخلت المدونات وعلقت على الموضوعات وبعدين حطيت الاعلان بتاعك اللي انت عايزه
    دة هيشجع ناس كتير قوي على تلبية دعوتك بدلا من استغلال المدونات كساحات اعلانية
    تحياتي

    ReplyDelete
  29. رئيس جمهورية نفسي:
    انا متفق معاك تمام الاتفاق فيما كتبته
    ولكني اتحدث عن بعض الاشخاص اللي بيبحثوا فعلا عن نظريات فيزيائية وكونية في القرأن الكريم
    وكأن القرأن الكريم لابد ان يحتوي على فيزياء وكيمياء واحياء
    تحياتي

    ReplyDelete
  30. مواطن مصري نايم:
    انا متفق معاك تماما
    في فرق كبير بين تسونامي 2004 وزلزال اكتوبر 1992 في مصر
    فعلا ليس بالضرورة ان تكون اي كارثة هي عقاب الهي انما من الجائز جدا ان يكون ابتلاء من الله عز وجل او لحكمة لا يعلمها الا سواه سبحانه
    تحياتي

    ReplyDelete
  31. عايزة اتطلق:
    يا محاسن هانم
    الناس مش عارفة تكون اسلامية على طول الخط او علمانية على طول الخط
    بيحبوا يكونوا دولة اسلامية وقت ما هم عايزين ويا سلام ع العلمانية لما بتيجي في مصلحتهم
    يا فندم
    دة موضوع كبير قوي و عايز بوست لوحده
    تحياتي واحتراماتي

    ReplyDelete
  32. محمد الكومي:
    وصف مبسط وجميل لمعنى الدين في حياتنا
    الف شكر
    تحياتي

    ReplyDelete
  33. عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم
    زر مدونتى وعلق قد تفيد او تستفيد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails