Thursday, 11 September 2008

يعمل ايه؟


مش عارف يعمل ايه؟
طول عمره نفسه يعرف هو صح ولا غلط؟
يسافر يشتغل برة زي كل الناس ما بتسعى لكده؟
ولا يقعد هنا في بلده هو مش حمل غربة وقرف؟
طب لو سافر.....
هيستحمل الوحدة والذكريات وغدر الاصدقاء في الغربة؟
طيب لو ما ستحملش كدة.......هيرجع؟
طيب لما يرجع.....هيستحمل الظروف الصعبة والتزاحم على اكل العيش هنا؟
دة كل يوم الدنيا بتضيق اكتر من اليوم اللي قبله..والناس لو طالت تاكل بعضها هتعمل كدة
طيب لو سافر واستحمل وعصر على نفسه ليمونة
هيفضل طول عمره هناك؟
معقولة دي؟
هيتحول من بني ادم لماكينة طبع فلوس؟
لمضخة بتضخ فلوس لمصر وهو بيتعذب هناك؟
دة غير طبعا ان اخلاقه وطباعه هتتطبع بطباع الخلايجة اللي هو اساسا بيكرههم كراهية التحريم
طيب يعمل ايه؟
ينتحر؟
بس دة حرام.....
يصبر؟
يصبر على ايه؟اذا كان هو نفسه مش عارف يعمل ايه؟

هي الدنيا بقت ضيقة كدة ليه؟

هو بكرة بقى ضلمة كدة ليه؟

هو النهاردة بقى صعب قوي كدة ليه؟

هو امبارح بقى ذكرى حلوة مش هتتكرر تاني كدة ليه؟

يعمل ايه؟

36 comments:

  1. مش معقول
    اخييييييييييرا اول كومنت
    كل سنة و انت طيب يا احمد رمضان كريم

    و الله انا محتارة زيك كدة بالضبط ، بس بميل اكتر لانى اخرج برة بعد ما اتخرج لان الوضع هنا بقى مستحيل فعلا
    و بعدين هو لازم يعنى تتحول لماكينة فلوس و تتطبع بطباع الخليجيين؟ مش شرط خالص على فكرة انت ممكن توفق بين عملك و حياتك
    وياسيدى ما بلاد العالم المحترمة كتير حبك يعنى الخليج
    ممكن تجرب النمور الاسيوية بجد مش بهزر

    ربنا يوفقنا كلنا للخير

    ReplyDelete
  2. فيه أيه يا أحمد أيه نبرة الحزن واليأس اللى أنا حاساهم فى كلامك دول
    لا لا مش ده أحمد اللى أعرفه
    أنت فيك حاجة مش مظبوطة
    اولا بقالك فترة مختفى
    ثانيا راجع بنبرة حزن ويأس غريبة
    فيه ايه خير

    وبعدين انا عن نفسى ما بقتش عارفة افضل هنا ولا أتغرب بيتهيألى ما بقتش فارقة ما أحنا بقينا غرباء هنا كمان

    ReplyDelete
  3. والله كثير مننا مش عارفين هما صح ولا غلط .
    و مش عارفين هما ماشيين فى طريق حلمهم ولا لأ ..
    لأ كثير مننا معدش عندهم أحلام علشان يمشولها طريق ..
    عامة يا احمد قوله يسافر ويتغرب .. ويتحمل غدر الأصدقاء هناك فترة .. لأنه وقتها هيشتاق لبلده أوى وهيكون على استعداد يتحمل منها اى ضربات .. فيرجع يقعد شويه ويتعب ويمل منها تانى بعدها يسافر وهكذا ..
    أهو تغير على الاقل .. بدل ما يفضل يشحن فى نفسه بدون اى تغير ..
    وقوله كفايه تفكير وتخطيط .. أبدأ بالتنفيذ لأى حاجه .. المهم أنك تبدأ فى التحرك لأى اتجاه .
    لأننا مش هنعيش طول عمرنا تعبانين وبنفكر وبس .. اكيد هيكون فى حل إن شاء الله .

    بوست رووووووعه بجد يا احمد ..
    تحيتى لك

    ReplyDelete
  4. لأ مايسافرش

    دي بلده هو مش بلد حد تاني

    يصبر وان شاء الله هيوصل للي هو عايزه

    ReplyDelete
  5. عزيزى
    لاتسافر ولاتنتحر ، الامر اقل من ذلك ، ببساطة نحن نحتاج الى تغير جذرى فى كل شئ ، مثلا . هل يخرج اليابانى من بلاده للعمل فى اى بلد أخر ، نعم يخرج ، لكن ليعمل كخبير لا كخادم او تابع لكفيل كانه عبد ولا احد يحميه وان عاد بملاليم يفقدها فى مشروع وهمى مدعوم ، او حلم سفيه ، واسمع هذه الحكاية الحقيقية ، اعرف رجلا عمل فى ليبيا بضع سنين وكان حلمه ان يفتح اجزخانة لابنه فى مصر ، ويزوجه ويقضى معه بقية العمر ، الغريب انه حقق غالبية الحلم ، لكن اعادوه لقريته ليموت وحيدا ، اتعرف لماذا ، لانه بيوسخ التواليت
    يسعدنى ان تزور مدونتى وابداء الراى

    ReplyDelete
  6. يبقى انتا اكيد اكيد فى مصر


    تحيا مصر ام الدنيا

    تحياتى
    البنوته الشقيه

    ReplyDelete
  7. يسافر ولو عجبه الحل يخليه مسافر ولو معجبهوش يرجع بلده..
    مشكلتنا أننا نسينا إن ربنا سبحانه وتعالى خلق لنا كوكب بحاله نعيش فيه ونعمره ونسعى للرزق فيه
    ده حتى في القرآن في آيه فيما معناها
    عندما يشكو الناس من الاضطهاد في دينهم إلى الله وأنهم كانوا مستضعفون في الأرض
    فيرد سبحانه وتعالى .. كانت أرضي واسعة
    الكلمة الشائعة واللي بنقولها بالشعبي
    أرض الله واسعة
    إحنا اللي بنضيقها على نفسنا تحت شعارات واهية
    دي بلدي ومش هاسيبها
    انا مش عايز ابقى ماكينة فلوس
    انا مش عايز ارجع في تابوت
    ونغني
    أنا عايش ومش عايش ولا قادر على بعدك
    واحنا في بلدنا عايشين ومش عايشين ولا قادرين على بعدها
    اللي تجيله الفرصة للسفر وتحسين وضع ه المادي وهو سنه صغير أفضل كتير من ناس أنا شفتهم بنفسي عدوا الخمسين وبيدوروا ع السفر عشان يقدروا يعيشوا عيشة البني آدمين
    وطبعا انا ضد اللي يسافر ويشتغل شغل مهين
    أو يكون خريج جامعة ويسافر يشتغل فرد أمن ولا يقف في محل موبايلات أو عامل بناء
    أنا شخصيا كنت رافض فكرة السفر لسنوات بالرغم من فرص كتير تم عرضها على
    ولكن لما حسيت إن في السفر فائدة سافرت
    وفي النهاية أحب أقول لك
    الشعارات والعنترية وادعاء الوطنية مش بيوكلوا عيش ولا بيدفعوا فواتيرك ولا هيعيشوك عيشة آدمية وأنت مفلس
    :)
    خالص تحياتي

    ReplyDelete
  8. الحكاية يا أحمد إننا يوم القيامة هنسأل عن حاجتين من بين الحاجات اللى هانتسأل عنها الحاجتين دول هما ليه ماقاومناش الحاكم الظالم والحاجة التانية لو كنا مستضعفين فى الأرض هنتسأل ألم تكن أرض الله واسعة فتهاجروا فيها.
    وفق إنت الموضوعين على بعض بقى وحاول تلاقى حل

    وإن شاء الله ربنا يهديك للخير

    ReplyDelete
  9. يفوض أمره الى الله ويستغفره ويساله العون والمدد

    ربنا يفتح عليه بعدها من وسع ويبدل حياته كلها نعيم باذن الله



    تحياتي

    ReplyDelete
  10. انا شايفه انه يسافر
    يمكن يلاقى نفسه فى وطن مش وطنه
    وارض تانية تحس بيه
    ما تنساش قوله تعالى
    " و خلقناكم شعوبا و قبائل لتعارفوا"
    تحياتى

    ReplyDelete
  11. اية رأيك تشرفنا بالتواجد معنا يوم السبت؟ 13/9 هنتقابل فى مستشفى ابو الريش الساعه 3 عصرا للتبرع للاطفال
    ؟؟؟
    وباقى التفاصيل عندى بالمدونة

    ReplyDelete
  12. لو هو محتاج يكون نفسه

    يسافر نة سنتين و يرجخ بلده و خلاص
    و فيه مصريين فى كل حته يعنى هيهونوا عليه

    ReplyDelete
  13. جيدااء:
    جيداء..ازيك؟
    انتي فين من زمان
    كل سنة وانتي طيبة ويارب كل رمضان وانتي بخير وصحة وسعادة
    على الرغم ان البوست دة مش عني..لاني سافرت فعلا برة قبل كدة ورجعت تاني الا ان السفر والعمل بالخارج مفيد برضة بشرط ضرورة توافر القدرة على التحمل في الغربة
    وهي نعمة غير متوفرة لجميع البشر
    سواء كان الخليج او غيره فالغربة واحدة وان كانت غربة الخليج ابشع لوجود الخليجيين
    الا ان يبقى القدرة على التغرب هي الفيصل في المسألة
    تحياااتي

    ReplyDelete
  14. bosbos:
    ازيك يا بس بس؟
    كل سنة وانتي طيبة
    انا تمام الحمد لله...البوست دة ولله الحمد مش عني في الوقت الحالي...البوست دة كان عندي في ارشيف المدونة من شهر 10 السنة اللي فاتت وكنت ناسيه فعلا وبعدين لاقيته فنزلته
    انما الحمد لله دي مش حالتي في الوقت الراهن
    الف شكر على اهتمامك ويارب تكوني كويسة واحسن دلوقتي
    رمضان كريم
    كل سنة وانتي طيبة

    ReplyDelete
  15. يا عم أحمد ..ألواحد خلاص حيطلع من جلده..كل حاجة تزهق وكل ابواب الأمل مقفلة ..بجد الواحد حاسس أنه عجز بدري يا رجل
    يلا خلينا في الماتش بكره
    :)
    سلام

    ReplyDelete
  16. شوف انا مش عارفة اقوللك ايه

    بس بهديك التدوينة دي فيها اغلب اللي عايزة اقوله لان الكلام بقي مكرر و رخم

    http://bikya.blogspot.com/2008/09/blog-post_10.html

    ReplyDelete
  17. مهو لو قعد هنا كلها سنه ومش هيلاقى العيش الحاف .. يعنى ايه حد يلاقى فرصه فى الحياه بره ويرفضهايا احمد ..المولى عز وجل قال..فسيحوا فى الارض..
    يعنى امرنا بالبحث ورا الرزق فى اى مكان على الارض..بعدين اه الخلايجه فيهم ناس وحشه بس زىاى مكان فيهم برضه ناس حلوه بعدين اهم عربمش يهود خيبر مثلا..

    ReplyDelete
  18. ضي القمر:
    انا شخصيا مريت بالتجربة دي..سافرت السعودية سنتين...شفت فيهم العجب العجاب من تصرفات المصريين واخلاق السعوديين..وفعلا اللي انتي قلتيه تحقق بالضبط كنت مشتاق لمصر لدرجة لا تتخيليها...كل اللي كنت باشوفه سابيات تحول الى مميزات في البلد دي بشكل رهيب
    بس الغريب اني لما رجعت تاني وقعدت فترة طويلة في مصر رجعت ابحث عن السلبيات مرة تانية
    الف شكر ليكي على الكومنت الجميل دة
    تحيااااااااتي

    ReplyDelete
  19. esraa:
    الصبر نعمة يا اسراء لا يمتلكها الكثيرون منا
    تحيااااااتي

    ReplyDelete
  20. Beram Al-Masry:
    المشكلة على فكرة فينا احنا كمصريين
    احنا اللي بنعمل في نفسنا كدة
    احنا اللي بنرخص نفسنا في بلاد لا تساوي شيئا
    احنا اللي بنعمل قرود ونسانيس واراجوزات ليهم علشان يرضوا عنا
    احنا السبب مش حد ناتي
    تحياتي واحتراماتي

    ReplyDelete
  21. البنت الشقية:
    والله العيب ما في مصر
    العيب فينا احنا....االلي بنبوظ بلدنا ونروح نشتغل خدامين في بلاد الاغراب
    تحياتي واحتراماتي

    ReplyDelete
  22. نفسي أفهم أيه افحت ده !!

    ReplyDelete
  23. كل سنة و أنت طيب البوست جميل أتمني ما يكونش ده ه أنت و تكون بتفكر تسافر

    فيه أعلان أفطار جماعي عندي علي هامش مدونتي يا ريت تعرف التفاصيل تنورنا في اليوم ده أنت و كل أصذقاءك

    ReplyDelete
  24. في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    http://www.ouregypt.us/culture/main.html

    ReplyDelete
  25. ياسر حسين:
    طبعا يا فنان كلامك كالعادة كلام جميل وكلام معقول وماقدرش اقول حاجة عنه
    انما يا فنان تقول ايه في اهالي البلاد دي من عنطزة وتكبر وافتراء على خلق الله
    اكيد مش كلهم طبعا انما نسبة كبيرة جدا منهم ولا نستطيع ان ننكر ذلك
    وبالتالي الموضوع مش بالسهولة دي...ياريت كانت مشكلة السفر هي الغربة والبعد عن الوطن فقط...انما المشكلة الاساسية هي الاستعباد والذل والفساد
    تحياتي

    ReplyDelete
  26. قلب مصري:
    اعتقد ان الحل الوحيد هو الانتحار
    لان لا دي هتتحقق ولا دي
    وبالتالي الموت هو الحل
    اما انتظار قضاء الله وبالتالي الجنة باذن الله باعتبار الفقراء يدخلون الجنة واما الانتحار وبالتالي الى جهنم وبئس المصير والعياذ بالله
    تحياتي واحتراماتي

    ReplyDelete
  27. صاحب المضيفة:
    امين يارب العالمين
    بس كام واحد بيمتلك الشحنة الايمانية الهائلة دي؟
    ربنا معانا
    تحياااتي واحتراماااتي

    ReplyDelete
  28. desert cat:
    بس يارب اهل البلاد دي يكون عندهم نفس الفكر ويتقبلوا وجوده بينهم بدل ما يحاربوه في رزقه
    تحيااااتي

    ReplyDelete
  29. نهر الحب:
    انا الحمد لله تواجدت بقلبي نظرا لوجودي خارج القاهرة
    بس بجد ربنا يوفقكم ويتقبل صيامكم وصالح اعمالكم
    بالتوفيق
    تحياتي واحتراماتي

    ReplyDelete
  30. adam al mahdy:
    ياريت الموضوع بالسهولة دي
    ماكانش حد غلب
    تحياااتي

    ReplyDelete
  31. micheal:
    ايه يا عم مايكل؟
    انت بتختفي تختفي وتقول عدوا لي
    انت فين يا عم؟
    اهو حتى الماتش ما بلش ريقنا وطلعت نتيجة ماسخة
    تحياتي واحتراماتي

    ReplyDelete
  32. شمس الدين:
    اهداء مقبول يا فندم
    من يد مانعدمهاش
    تحياتي واحتراماتي

    ReplyDelete
  33. عايزة اتطلق:
    والله العظيم يا محاسن...في منهم ناس اليهود بالنسبة لهم ملائكة
    ربنا يكفيكي شرهم
    تحياتي واحتراماتي

    ReplyDelete
  34. شيماء الجمال:
    افحت دي يا فندم موقع عن المدونات بيبحث في المدونات المختلفة ويفحت ويطلع المواضيع من تحت الارض
    بمعنى انك لما تنزلي موضوع بتضغطي على خانة اضف و بعدين كل واحد بييجي بعد كدة بيعجبه الموضوع بيفحت ومعناه انه عجبه الموضوع
    باختصار مخل
    تحياتي

    ReplyDelete
  35. عاليا حليم:
    لا....الحمد لله مش انا خالص
    دة كانت مجرد خاطرة بتعبر عن عدد كبير من الشباب
    تحياتي يا فندم

    ReplyDelete
  36. anonymous:
    شكرا للتنويه
    موضوع جميل
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails