Friday, 29 August 2008

طبقوه على الكل....ربنا يكرمكم




لو المطلوب اني اشتري مثلث واحد....هشتري 10 مثلثات
ولو مطلوب اني اشتري شنطة اسعافات اولية ب 40 جنيه....هشتري واحدة ب 400 جنيه
بس والنبي....والنبي يا اخوانا يا قادة المرور في البلد دي
طبقوا القانون على الكل.....على الكل بلا استثناء
نفسي ما يبقاش انا شايل مثلث المرور في عربيتي بس سيادة المستشار غير ملتزم بالموضوع دة لأنه مستشار
ونفسي حضرة الضابط يكون هو كمان حاطط شنطة الاسعافات الاولية في عربية سيادته مش معفي منها لأنه ضابط وفوق القانون
هي دي الضمانة الاساسية لأنضباط الشارع في البلد دي
لو الكل ايقن ان القانون بيطبق على الكل بدون اي اعتبار لعائلة فلان او وظيفة علان...الكل هيلتزم...الكل هينفذ القانون بكل روح طيبة وبرضا كامل
انما لو استمرت العادة المصرية الازلية بتاعت فلان فوق القانون وعلان انت مش عارف انت بتكلم مين؟ وترتان اللي لاطع النسر او الميزان على اللوحة المعدنية
يبقى قل على القانون دة يا رحمن يا رحيم
مش كدة وبس
اعتقد ان القانون دة لو لم يطبق على الجميع بلا استثناء هيكون سبب رئيسي جدا في زيادة حالة الغليان والاحتقان بين الناس اللي الله اعلم هتنفجر امتى؟
بس اللي اكيد ان ربنا بيسبب الاسباب وربما يكون التطبيق الخاطىء لقانون المرور الجديد دة سبب رئيسي لأنفجار الشارع المصري
وفي الحالة دي اعتقد ان فلان بك وعلان باشا هيندموا اشد الندم يوم لن ينفع الندم

ملحوظة:

بعد ما يقرب من شهر من تطبيق قانون المرور الجديد:

لسه العربيات بتقف صف تاني

لسة العربيات النقل بتاخد يسار الطريق وليس يمينه

لسه المحلات والعمارات بيحطوا متاريس واحجار وقصاري زرع لمنع الوقوف امام منشأتهم

لسة السير عكس الاتجاه عادة مصرية اصيلة خاصة في الاقاليم والطرق الصحراوية

لسة السادة الضباط ووكلاء النيابة والقضاة لا يقفوا في اي كمين ولا تطبق عليهم اي قوانين
لسة سائقي الميكروباصات بيبلطجوا في الشارع وبيحملوا في وسط الطريق

الغريب بقى

ان حصيلة المخالفات المرورية في ازدياد مستمر.............

هو قانون المرور الجديد دة بيطبق على مين في البلد دي؟

42 comments:

  1. هههههههه والله ياافندم هى دى مصر يعنى شئ مش جديد ماشين بمبدا خالف تعرف يعنى لو عاملوا الفين قانون جديد للمرور بردو مش هتنفذ والمثل بيقول اذا كان رب البيت بالدف طارب

    ReplyDelete
  2. حلوة سنة الامل اللى لسه عندك دى بجد .. برافو عليك

    بقى انت متصور ان ممكن قانون المرور يطبق على الظباط
    يا استاذى الفاضل انا صحابى اللى لسه ف كلية الشرطة والحربية لما الرخص بتنسحب من حد من زمايلنا التانين بيروحوا يجيبوها

    تقولى يطبق على سيادة اللوا


    تدوينة جميلة برده

    ReplyDelete
  3. ههههههههههههه
    والله عندك حق وياسلام بقى لو يطبقوا القانون ده على كل الناس

    بس ده مستحيل لاننا ببساطه شديده
    فى مصر و كنت نسيت
    بس احلم وهما ينفذوا
    بس الى هما عايزينه وبس

    تحياتى
    البنوته الشقيه

    ReplyDelete
  4. هههههههههههههههه هأأأو

    ReplyDelete
  5. يا عم أحمد فكك واتفرج على الكليب ده وسلملى على روح أم القانون
    http://www.youtube.com/watch?v=vcsNxnJaqpo
    او روح على الجروب ده
    http://www.facebook.com/group.php?gid=24759196858
    محمد مشهور

    ReplyDelete
  6. والله يا احمد موضوعك علميا صح ..

    لكن حسسنى أنك نسيت قوانينا واللى بيحصل بيها دايما ..
    هو من امتى قانون أطبق على شخص واصل ؟؟
    من امتى اصلا قانون أطبق صح ؟؟
    القانون ده كان المفروض انه يفيد الكل بجد ..
    لكن محدش استفاد منه غير المتكلمين بيه وبس ..
    الرشاوى زادت .. الأهانات زادت .. وفى الآخر هو ده قانون المرور ..
    بجد مهاذل كثير بتحصل بأسم القانون الجديد .
    لكن العيب مش فى القوانين .. العيب فى الأنفس اللى بتطبق القوانين ..

    أجمل تحيه لك .
    موضوعك مهم جداا بحد
    كل عام وانت بخير

    ReplyDelete
  7. القانون الجديد يتم تطبيقه فقط على من لا سند لهم مثل كل قانون فى مصر.
    ولا عجب فى أن هذا القانون ستحول بعد فترة وجيزة إلى مجرد شكل لا أكثر مثله مثل مئات القوانين المصرية

    ReplyDelete
  8. الكل !!! كل عيش يا عم الحاجج

    ReplyDelete
  9. اتكلمت على سؤالك بخصوص قاونو نقل الاعضاء في آخر تدوينة

    ReplyDelete
  10. تناولك دايما لاى موضوع بيختلف عن كل الناس

    كل سنة وانت طيب يا احمد باشا

    سعدت جدا بلقائك

    ورمضان كريم

    احمد

    ReplyDelete
  11. عادى
    بيطبق على المقدور عليهم

    لا جديد

    ReplyDelete
  12. http://www.mokhtl.blogspot.com/

    ReplyDelete
  13. كل رمضان وحضرتك بخير
    اللهم بلغنا ليلة القدر واجعلنا من عتقاء هذا الشهر

    ReplyDelete
  14. كل عام انتم بخير
    تقبل الله منا و منكم طيب القول و صالح العمل

    ReplyDelete
  15. القانون ده بتطبق على
    اصحاب السيارات ال 128 والفيات بشكل عام
    يعني الطبقة المتوسطة اللي مالهاش ظهر

    تحياتي

    ReplyDelete
  16. بخصوص سؤالك ياأحمد
    قانون المرور الجديد بيتطبق علي اللي مايقدروش يفتحوا بقهم الغلابه يعني

    كل سنه و انت طيب و رمضان كريم

    ReplyDelete
  17. أسأل الله الذي لن تطيب الدنيا إلا بذكره
    ولن تطيب الآخرة إلا بعفوه
    ولن تطيب الجنة إلا برؤيته
    أن يديم ثباتك ويقوي إيمانك وصحتك
    ويرفع قدرك ويشرح صدرك
    ويسهل خطاك لدروب الجنة
    وأن يجعلك من عتقائه من النار
    ومبروك عليك شهر رمضان

    ReplyDelete
  18. اولا وثانيا وثالثا وكل الارقام اليى فىالدنيا كل رمضان وانتا واسرتك الصغيره ويا رب تبقى كبيره ان شاء الله بكل ود وحب وخير وامان ....
    انما بقه قولى هنا يا احمديا سمير منامتا فى بلدنا فيه قانون بيتطبق على الجميع انت نسيت ان فيه ناس فوق القانون وناس تحته ...بعدين احنا ولا قوانيين العالم بتنفع فينا احنا قانون الدنيا بس هو اليى بيمشينا...
    كل رمضان وانتا بالف خير وسعاده يا شرقاوى...اختك محاسن..

    ReplyDelete
  19. الصيام وعمايله البوست فيه غلطات املائيه اعذرنى بس انا والله بعرف ااقرا واكتب..

    ReplyDelete
  20. ياهههه على مخى مش البوست التعليق التعليق بتاعى افصل الحروف شرقاوى انا رايحه افطر..ااقرا التعليق لومفهمتش حاجه استشفها..

    ReplyDelete
  21. انسانة عادية في عالم مش عادي:
    طيب والحال هيفضل كدة كتير؟
    يعني دة اوبشن بينزل مع المصريين من بطون امهاتهم ولا ايه؟
    تحياتي ونورتيني

    ReplyDelete
  22. abu shahin:
    بس تصدق ان العيب مش عليهم
    العيب على الشعب اللي بياخد على قفاه ويقول كماااااااااااان
    نورتني والله....الف شكر
    تحياتي

    ReplyDelete
  23. في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
    ارجو من كل من يقراء هذا ان يزور ( مقالات ثقافة الهزيمة) فى هذا الرابط:

    http://www.ouregypt.us/culture/main.html

    ReplyDelete
  24. البنوتة الشقية:
    اهي احلاااااااااااااام
    للأسف الحق في الزمن دة بيبقى مجرد احلام
    تحياااتي

    ReplyDelete
  25. anonymous:
    فعلاااااااااا
    خير الكلام ما قل ودل
    تحياااااتي

    ReplyDelete
  26. محمد مشهور:
    ماشي يا عم المناضل
    هافتكرك بالعيش والحلاوة..وهتكون الرشيدي الميزان ما تقلقش
    تحياااتي

    ReplyDelete
  27. محمد مفيد:
    يعني هنعيش ونموت في البلد دي من غير احوالها ما تتصلح؟؟؟
    ربنا يطمنك يا محمد
    تحياااتي

    ReplyDelete
  28. ضي القمر:
    هو فعلا دة الكلام المفيد
    العيب في الانفس اللي بتطبق القانون
    تحياتي واحتراماتي

    ReplyDelete
  29. قلب مصري:
    يا ريته يتحول لشكل لا يطبق
    انا عندي ان قانون زي دة يتركن على الرف افضل بكتيييييير من ان يطبق على الغلابة فقط دون الباشوات
    تحياااتي

    ReplyDelete
  30. محمد عبد الغفار:
    ما هي المشكلة يا عم محمد انه لو لم يتم تطبيقه على الكل...محدش هياكل عيش...بالعكس
    دة الكل هيتخرب بيته
    تحياتي

    ReplyDelete
  31. الصارم الحاسم....يوما هل اكونه:
    كان نفسي تدلي رأيك في موضوع البوست
    حقيقي استفيد باراءك
    تحيااااتي

    ReplyDelete
  32. ahmed al-sabaagh:
    الكلام دة كبير عليا قوي يا احمد باشا
    الف شكر ليك على رأيك
    وكل رمضان وانت بألف خير وسعادة
    تحياااتي

    ReplyDelete
  33. blackcairorose:
    يبقى مش قانون
    دة كدة يبقى جباية وافترا على خلق ربنا
    تحياااااتي

    ReplyDelete
  34. محمد مشهور:
    علم وينفذ يا معلم
    مبرووووووووك
    بالتوفيق

    ReplyDelete
  35. قلب مصري:
    امـــــــــــــــــــيـــــــــــــــــــن
    يارب العالمين

    ReplyDelete
  36. ذو النون المصري
    تقبل ان شاء الله منا ومنكم

    ReplyDelete
  37. ياسر حسين:
    لا والله
    هو بيتطبق كمان على اصحاب الاوبل والتويوتا والمرسيدس
    طالما لا يحملوا النسر او الميزان
    طالما انت لا تنتمي الى السادة حملة النسر او السادة اصحاب الهيئات المحظوظة يبقى هيتطبق عليك ايا كنت
    تحيااااتي

    ReplyDelete
  38. اجندا حمرا:
    للأسف الشديد كلامك صح
    كل رمضان وانت بخير وصحة وسعادة
    تحياااااتي

    ReplyDelete
  39. نهر الحب:
    امين يارب العالمين
    كل رمضان وانت بخير وسعادة
    تحياتي و احتراماتي

    ReplyDelete
  40. عايزة اتطلق:
    كل رمضان وانتي بخير وصحة وسعادة
    طبعا القوانين معمولة علشان الناس اللي تحت مش الناس اللي فوق خاااااالص
    وبعدين على فكرة احنا قوانين الدنيا مش هي الي بتمشينا
    احنا اللي بتمشينا هي قوانين الغابة ونظرا لأن الغابة بلا قوانين فبالتالي احنا كمان بلا قوانين
    البوست طبعا زي ما قلتي فيه غلطات بس دة راجع لأنك لا تستخدمي مفتاح ال على لوحة المفاتيح للفصل بين الكلمات
    بس طبعا الكلام مفهوم
    الف شكر ليكي وكل سنة وانتي طيبة
    تحياتي space

    ReplyDelete
  41. هااااااااااااااااااااااااااااااي
    معرفش والله بيطبق على مين ..
    عارف ؟؟انا مخالفاتي وانا بجدد الرخصة طلعت 20 جنيه..والعشرين جنيه دول جوزي هو السبب فيهم عشان لما استلف العربية ركن في الممنوع يوم..الي بيلتزم بيلتزم لنفسه :)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails