Thursday, 21 August 2008

دمائك مسلمة ام مسيحية؟



في احدث دراسة طبية مصرية ثبت علميا الاعجاز الطبي الاتي
لقد ثبت علميا ان دم المواطن المصري المسلم يختلف في تركيبته تماما عن دم المواطن المصري المسيحي
حيث وجد داخل دماء المواطن المصري المسيحي كرات دم حمراء وبيضاء وصفائح دموية وصلباااان (جمع صليب)..وهوما يميز الدم المصري المسيحي عن الدم المصري المسلم
والغريب والعجيب انه عند تحليل دم احد المصريين المسلمين وجدت بعض الخلايا على شكل اهلة (جمع هلال) وهو ما اثار دهشة العلماء بشدة نظرا لتفرد المصريين بهذه الخواص البيولوجية الغريبة
وبناءا على هذه الدراسة الفريدة فلقد اوصى العلماء بمنع التبرع بالدم بين المسلمين والاقباط حرصا على سلامة المتبرع والمتبرع له طبيا
كما اوصى علماء الدين الاسلامي بعدم جواز تبرع القبطي بدمه للمسلم لأن ذلك قد يدخل ضمن الردة..اما علماء الدين المسيحي فلقد اوصوا بعدم جواز تبرع المسلم بدمه للقبطي لأن ذلك قد يخرجه عن الملة
كما انه بناءا على تلك الدراسة المدهشة فلقد اتخذت نقابة الاطباء المصريين قرارا تاريخيا بحظر نقل الاعضاء بين المسلمين والاقباط
لأنه ثبت ان كلية المواطن المصري المسلم تختلف في شكلها تماما عن كلية المواطن المصري القبطي
فلقد ثبت ان كلية المسلم على شكل هلال (طبعا مسلم بقى)....اما كلية المواطن المصري المسيحي فطبعا ثبت علميا بما لا يدع مجالا للشك انها على شكل صليب (مسيحي متدين بقى).....وطبعا حرصا على صحة الجميع وعلى تدينهم في نفس الوقت وعدم تدنيس اصحاب الديانة الواحدة بدماء من ديانة اخرى
فلقد اتخذت نقابة الاطباء المصريين هذا القرار التاريخي الهام للحفاظ على جميع المصريين الاقباط والمسلمين على حد سواء
وان نقابة الاطباء لتأسف بشدة لهذا القرار الذي يبدو للوهلة الاولى انه يدعو للتفرقة بين ابناء الوطن الواحد على اساس الدين الا ان الهدف الحقيقي لهذا القرار التاريخي هو راحة كل المصريين و الحفاظ على صحتهم بغض النظر عن دياناتهم
*****************************************
طبعا لا في دراسة طبية ولا يحزنون..انما البوست دة الغرض منه التعجب والسخرية من قرار نقابة الاطباء او ما اشيع عن حظر نقل الاعضاء بين المسلمين والاقباط
فطبقا لموقع مصراوي
فان منظمة حقوقية قررت مقاضاة نقيب الاطباء بسبب قرار حظر نقل الاعضاء بين المسلمين والاقباط
انا شخصيا متشكك في صحة قرار الحظر دة..لأنه بالتأكيد وبكل المنطق الموجود في الدنيا هو قرار بلا اي منطق او عقل....انا اتفهم قرار حظر نقل الاعضاء بين المصري وجنسية اخرى لمنع الاتجار في الاعضاء البشرية استغلالا لفقر الشعب المصري
انما حظر النقل بين المصريين انفسهم لاختلاف الديانة فلا يوجد ادنى مبرر او منطق لهذا القرار العجيب
وهنا كانت الافتكاسة موضوع البوست..لأن الدراسة السيريالية التخيلية العجيبة دي ممكن تكون هي المبرر الوحيد لهذا القرار الحلمنتيشي الرهيب دة
ملحوظة:
طبقا لموقع العربية نت
نقابة اطباء مصر تتراجع عن قرار حظر نقل الاعضاء بين المسلمين والمسيحيين
انما هو السؤال:
هو القرار دة..........كان سببه ايه من الاساس.........هتجنن بجد والله

49 comments:

  1. ياه ده انا كنت بدأت اتأثر بالنزعة الخرافية اللي بدأت بيها البوست .. وكمان الكلى بقى فيها اشكال .. اللي يعيش ياما يشوف

    بوست هايل ... تحياتي

    ReplyDelete
  2. انا قلت قبل كده احنا خلاص خدنا القب من الهند احنا بقينا بلاد العجائب هو فيه ايه مش ده روح وده روح ده لما بيتعور بيقول اى وده برضه بيقول اى والاتنيين بيتنفسوا من مناخيرهم وبيمشوا على رجلين مش على اربع ...هقول دعوة ماما اللهم ارخى عليا الصبر والايمان يا رب ...

    ReplyDelete
  3. كان سببه أي تضييع لوقت و عقول الناس في أي شكليات و حاجات فرعية علشان ما نركزش في البلاوي و المصايب اللى بتحصل في البلد
    تحياتي

    ReplyDelete
  4. القرار ده سببه التخريف مش أكتر

    ReplyDelete
  5. السلام عليكم ورحمة الله وبركاته

    الناس دي فاضيه ومش لاقيالها شغلانه

    مش كفايه الجو اصلا مكهرب كمان جايين يزودوا النار حطب بالقرار الغبي ده

    طيب حد فيهم يقولنا استنادهم كان علي ايه في الفتوي اللوزعيه دي

    حسبنا الله ونعم الوكيل

    ReplyDelete
  6. هههههههه لا حول ولا قوة الا بالله

    يعنى مثلا لو واحد مسيحى بقا مسلم ايه نظامه؟؟
    مينفعلوش غير دم واحد نفس نظامه

    ReplyDelete
  7. امممممممممم انا اساسا ماسمعتش غير عن تكذيب القرار وتجريم القرار لكن القرار ذات نفسه انا ماسمعتش بيه......تفتكر اصلا كان فى قرار زى دة؟؟؟
    ممكن اسال سؤال برة الموضوع؟؟؟؟ اول مرة اخد بالى من الصور الموجودة على جنب دى ولفتت نظرى صورة ايمن نور هو مين قال انه مانديللا يعنى؟؟؟؟؟؟؟؟؟؟؟؟

    ReplyDelete
  8. يااساتذة من يراجع كلام د.حمدى السيد يجدة مبطن بالسخرية عنما قال:لم نيلغ بعد المستوى الحضارى الذى يسمح...الخ وحمدى السيديكافح و يحاول تمرير تشريع يسمح بنقل الاعضاء منذ قرابة عشرين عام ويواجة بتخرصات واعتراضات السلفيين بعموم- وما اكثرهم .فقد يكون الاقتراح المنسوب الية محاولة للالتفاف على على هذة الاعتراضات من اجل هدف اهم وهو السماح بنقل الاعضاء.وحمدى السيد يستطيع الدفاع عن نفسة وانا لااعرفة الا من متابعة مواقفة الشجاعة فى مجلس الشعب اوكنقيب يدافع عن المهنة واعضائها

    ReplyDelete
  9. تعليق خارج الموضوع
    ممكن مراجعة الرد علي تعليقك هنا؟
    اكتب وانشر مجانا

    ReplyDelete
  10. القرارات كثيير .. والأفتكاسات أكثر واكثر وأكثر ..

    وغالبيه القرارات بنلاقيها لأستفزاز الشعب علشان ينسوا حاجات تانيه أكبر واخطر ..

    وانا معاك انه قرار غريب جداا ..

    لكن خلاص حسوا بغلطتهم ورجعوا فى كلامهم ..

    شكرا على البوست الروعه يا اخى

    ReplyDelete
  11. بجد حاجه تحزن لما يطلعوا بقرار يحرم نقل الأعضاء بين المسلمين و المسيحين و يكون القرار من نقيب الأطباء
    و انا بقرأ التقرير في الأول افتكرته حقيقه و صدقني ممكن يطلع عالم يقول نفس الكلام ماعدتش مستبعده حاجه في البلد دي

    تحياتي ليك و حمدلله علي سلامتك و الف مبروك علي الزواج

    ReplyDelete
  12. sob7an ALLAH!!!
    shoof este3dad elmasreyyeen lel7'orafat 3amel ezay? enta kateb tettarya2 wthazzar wkol elreggala sadda2et fel2awel wlola ennak katabt en mafeesh 7aga men keda kan zaman kol el posts bet2ayyed wtoshagge3 !!!!!!!
    3refto leh e7na madda 7'esba lel eshte3'alat wma7addesh bey7akkem 3a2lo!!!
    sorry for posting in English letters cuz i don't have Arabic keyboard..... sorry again,,

    ReplyDelete
  13. ههههههههههههههههههههه

    والله ضحكتنى

    مش عارفة بجد أحنا هنوصل لحد فيييييييييييييييين

    ReplyDelete
  14. هنقول ايه يا احمد؟
    هما عايزنها تولع اكتر
    عايزين يبقى مصر بتخرب نفسها بنفسها
    من اامتى كان فيه فرق بين مسلم ومسيحى
    من امتى كنا بنويقف بعض فى الشارع ونسال لو مسلم هصبح عليك ولو مسيحى مش عايز اعرفك
    من امتى

    ما كلنا كويسين مع بعض وعايشين من زمااااااااااااان اوى مع بعض

    ربنا يهدى الناس كلها

    ReplyDelete
  15. وهما وافقوا على نقل الاعضاء من اساسه امتى؟

    ReplyDelete
  16. ربنا يلطف بينا ويرحمنا من الأشكال الوسخة المتخلفة دي اللي عمالة بتكتر يا ابو حميد
    تحياتي

    ReplyDelete
  17. unique:
    مش بعيد نكتشف كدة فعلا في يوم من الايام
    بس ساعتها هاكون اول من تنبات باشكال الكلى المصرية
    تحيااااتي

    ReplyDelete
  18. عايزة اتطلق:
    الهند بقت بلد الانجازات والمنجزات والمعجزات...انما احنا بقينا بلد الفقر والتخلف والمرض
    ربنا يلطف بعباده
    تحياااتي

    ReplyDelete
  19. هما يمنعوا .. يصرحوا

    مع نفسهم بقى

    محدش بقى فاهم حاجه

    اما بالمناسبه بقى

    فاول مره اخد بالى م مقالات الدستور المنشوره ع الجنب دى

    انت طلعت زقازيقاوى

    واحنا منعرفش

    لا لا بجد مينفش

    احنا ولاد شعب شرقاوى واحد

    ومكناش نعرف

    تحياتى وكل رمضان وانت بخير

    ReplyDelete
  20. الحلم العربي:
    وجهة نظر برضة
    ويعملوهااا طبعا ماهم جبابرة
    تحياااتي

    ReplyDelete
  21. قلب مصري:
    ماهو التخريف هو شعار المرحلة دلوقتي
    تحيااااتي

    ReplyDelete
  22. خمسة فضفضة:
    استندوا طبعا على الفراغ الفكري والهاء الناس في قضايا جدلية وطائفية فارغة وبلا اي معنى
    تحياااااتي

    ReplyDelete
  23. هوندا:
    لو واحد مسيحي اسلم او العكس يبقى لازم يغيروا له دمه طبعا
    معقول..يبقى مسلم ودمه لسة مسيحي؟؟؟
    دة كلام برضة؟؟
    تحياااتي

    ReplyDelete
  24. enjy:
    هو طبعا القرار من طرافته وعدم معقوليته يصعب تصديقه يا انجي
    بس انا اعتقد انه بما انه تم التراجع عن القرار يبقى اكيد كان في قرار
    بالنسبة للشق التاني من التعليق الخاص بالدكتور ايمن نور....فده موضوع كبير هيحتاج بوست لوحده قريبا ان شاء الله
    تحيااتي واحتراماتي

    ReplyDelete
  25. anonymous:
    ايه العلاقة بين جهود حمدي السيد في تمرير قانون نقل الاعضاء وبين هذا التوجه الغريب
    ايه العلاقة بين دة وبين هذا القرار الفكاهي جدا بحظر نقل الاعضاء بين المسلمين والاقباااط؟
    تحيااااتي

    ReplyDelete
  26. riddler:
    تم مراجعة الرد على التعليق
    شكرا جزيلا
    كنت اتمنى التعليق برضة على الموضوع دة
    تحياااتي

    ReplyDelete
  27. ضي القمر
    الحمد لله انهم تراجعوا عن القرار العجيب دة
    انما السؤال هو
    كان ليه القرار دة اصلا من لاول؟؟؟
    تحياااتي

    ReplyDelete
  28. شكرا لمرورك على مدونتى

    اما عن تنويهك كونك احد المدونين المنشور لهم بمصر فى قطعة جاتوه ..فأهلا وسهلا بك ياعزيزى ..وبصراحة انتم حاجة تشرف بجد ..وكان يسعدنى لقائك
    ويبدوا انى سأتابع اعمالك لان اسلوبك فى العرض من الطرق المحببة الى نفسى .. بس كان نفسى اسمع تعليقك على البوست بحيادية
    تحياتى والسلام

    ReplyDelete
  29. اجندا حمرا:
    في مصر بلد العجايب....كل شيء ممكن وجايز
    الله يبارك فيك والف شكر
    تحياااتي

    ReplyDelete
  30. ahamad:
    انا كنت ناوي اكتب البوست عبارة عن الجزء الاول بس كنوع من السخرية
    الا اني تخوفت بصراحة ان بعض الناس تصدق حاجة زي كدة وبالتالي اكون انا مصدر اشاعة طبية طائفية زي دي
    الناس صدقت على فكرة لانهم اكتشفوا ان في الزمن دة كل شيء ممكن وكل شيء جايز
    وطالما طلع قرار عجيب زي دة مش بعيد ابدا يكون السبب فيه دراسة غريبة زي كدة
    بالنسبة للكتابة بحروف لاتينية...مفيش اي داعي للاسف على الاطلاق
    بالعكس انا اشكرك بشدة على تعليقك ومش مهم تكتب بحروف عربية او لاتينية انما الاهم انك تكتب وبس
    تحيااااتي واحتراماتي

    ReplyDelete
  31. آه طبعا ممنوع نقل الأعضاء احنا هنهرج ولا ايه
    أعضاء المسلمين مختلفة تماما عن الأقباط
    على أساس ان الجسم البشري بيختلف من دين لدين
    ده كله من الفراغ قاعد في مكتبه مش لاقي حاجة يعملها يروح قايل أي حاجة ومطلع أي قرار والناس تسخن وتتخانق حاجة زي الفل والله
    ربنا يشفيهم

    ReplyDelete
  32. اه الهند من اكبر صانعى ومصدرى السوفتووير فى العالم واحنا من اكبر الناس اليى بتبوضه..والهند عملت بولييود مدينه للسينما وعرفت تجيب منها فلوس واحنا عملنا مدينة الانتاج الاعلامى وعرفنا نسرقها...كل رمضان وانتا فى مصر طيب وبخير يا احمد..

    ReplyDelete
  33. BOSBOS:
    ولسة يا بس بس يا ما هانشوووف
    تحيااااااتي

    ReplyDelete
  34. AYA:
    احلى جملة اتقالت هي الجملة الاخيرة دي يا اية
    ربنا يهدي الجميع
    نورتيني
    تحياتي واحتراماتي

    ReplyDelete
  35. موناليزا:
    هم لسه بيضبطوا القانون المقترح
    يعني دة كان المفروض يكون بند من بنود القانون الجديد
    تحيااااتي

    ReplyDelete
  36. وتندهش وتتن ليه ؟ وتسأل ليه من اساسه ؟ ماهي كل حاجة في بلدك ماشية بعد ما يعملوا " دراسة كوسة "
    شكرا

    ReplyDelete
  37. michel:
    امين يااااارب
    تحياتي يا مايكل باشا

    ReplyDelete
  38. ويجري في كلا الدمين
    أكل ملوث
    وهواء أسود
    وهم يومي
    وخوف من المستقبل
    ونكت تسخر من كل شيء
    :)

    ReplyDelete
  39. يمنع برضه نقل اعضاء او استخدام دم صاحب القرار خوفا من انتقال الحمق واحدث دراسة برضه اكدت ان الحمق مالوش علاج بجد جهل متوغل ربنا يعيننا
    كل سنة وانت طيب ورمضان كريم
    سلام

    ReplyDelete
  40. كل رمضان وانتا وزوجتك طيبيين يا شرقاوى ووريها بئه كرم الشراقوه فى رمضان واوعى تفتح معاها سيرةالاسعار وغلوها هيا ملهاش ذنب ومش عايزينك تسد نفسها ربنا يسعدكوا ويباركلكوا فى حياتكوا ويجعلكوا لبعض ازواج فى الدنيا والاخره ان شاء الله ..دعوه من اخت بظهر الغيب تقبل ان شاء الله.

    ReplyDelete
  41. د/اجدع بنوتة:
    يا خبرررررر ابييييييض
    دة انا شرقاوي ابا عن جد
    دة انا من الاعضاء المؤسسين للشرقية
    وبعدين انا مش بس شرقاوي دة احنا كمان زملاء في نفس المجال الطبي
    تحياااااتي واحترراااماتي

    ReplyDelete
  42. وميض ابتسامة:
    بالنسبة لمروري على مدونتك الجميلة فدة شرف ليا انا
    اهلا وسهلا بك في اي وقت بالمدونة المتواضعة دي
    والف شكر على الاطراء والكلام الجميل دة
    تحيااااتي

    ReplyDelete
  43. somaia:
    المشكلة بقى هو ان ممكن تطلع نقطة خلاف في غاية الاهمية حول ايهم اطهر دما
    ربنا يشفيهم غعلا
    ادعي لمصر في رمضان ربنا ياخد بايدها
    تحياااتي

    ReplyDelete
  44. عايزة اتطلق:
    لو لم اكن مصريا لوددت ان اكون هنديااااا
    تحياتي واحتراماتي

    ReplyDelete
  45. abo zaid:
    بلد دراسات بصحييييح
    تحياتي

    ReplyDelete
  46. alzaher:
    طب يعني لازم تقلب عليا المواجع في ايام مفترجة زي دي؟
    بس تصدق معاك حق فعلااااااا
    تحياتي واحتراماتي

    ReplyDelete
  47. كلام وخلاص:
    وانت بالصحة والسلامة
    نورتني فعلا
    تحيااتي

    ReplyDelete
  48. عايزة اتطلق:
    دعوة جميلة زي دي في ايام مفترجة زي دي تستاهلي عليها الشكر والدعاء فعلا
    ربنا يوفقك وينولك اللي في بالك
    تحياتي واحتراماتي

    ReplyDelete
  49. اخى لاتتجنن ولا حاجة ، وادعى للنقابة بالخروج من الوحلة السودة ، لانها فى حيص بيص من الاشكالية الجديدة ، حكاية من اسلم من الاقباك ومن تنصر من المسلمين ، وانها لاتنام الليل انتظارا للتوجيهات من الكمونجرس والكنيست ، وارسال الاجهزة المساعدة مع الورق الاخضر ،لطبخ قرار جديد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails