Saturday, 16 August 2008

اصلها بقت بلد كفتة فعلا


مذيع نصف مشهور اسمه (شريف مدكور) بيقدم برنامج عن الطبيخ على قناة النيل للأسرة والطفل
الأخ شريف مابيطبخش..كل علاقته بالبرنامج انه بيقعد يسلي الشيف وهو بيشتغل ويرد على تليفونات المشاهدات ويرغي معاهم في اي كلام بعد طبعا انت امووور قوي يا شريف..انت دمك خفيف موووت يا شريف....انت هاااايل يا شريف وهكذا
وطبعا الأمر لا يخلو من ادخال مكالمة على الهوا لمشاهدة بتنتقد شريف مع مراعاة الا تزيد نسبة هذه النوعية من المكالمات عن واحد من الف في المية من مكالمات الحلقة وان تكون مكالمة النقد دي في اول الحلقة حتى يتسنى الرد عليها ب 100 مكالمة من بتوع انت تحفة يا شريف انت تجنن انت محصلتش
ولا يهمك يا شريف....كل دة حقد يا شريف...الخ
اهو دة كله كوم والموقف اللي هاحكيه كووم تاني
كون الاستاذ شريف مذيع امووور وقاعد بيسلي الشيف وبيهزر مع المشاهدات..لا يعطي له الحق انه يفتي فيما لا يعنيه ولا يفقه فيه ويوزع نصائحه الغالية على المشاهدات والمشاهدين
مشاهدة كريمة اتصلت بالاستاذ شريف وبعد كلمات المديح والاطراء المعتادة طبعا..اشتكت له ومش عارف ليه من ان صيادلة التأمين الصحي بيعاملوها وحش وبيصرفوا لها ادوية بديلة غير اللي مكتوبة لها ولما بتشتكي بيقولوا لها هو دة اللي عندنا
السؤال هنا..ايه علاقة برنامج عن الطبيخ بالتأمين الصحي؟
السؤال التاني...ايه علاقة مستر شريف بصيادلة التأمين الصحي؟
السؤال التالت بقى والأهم....يا ترى شريف رد عليها بأيه؟
استعدوا للصدمــــــــــــــــــــــــــــــــــــــــــــــــــــــــــــــــــــــــة
قال لها......روحي اعملي فيهم محضر في القسم
اه والله.....افتى للسيدة انها لازم تجرجر صيادلة التأمين الصحي في القسم....هو كدة..هو دة النظام
ما هو لو عنده الحد الادنى من المعلومات كان عرف ان صيدلي التأمين الصحي واقف على رجله طول النهار في حرارة خانقة وظروف غير ادمية ومتحمل سخافات ورزالات مرضى من نوعية الست دي مقابل 400 او 500 جنيه على اقصى تقدير
مش واحد بيقوم من النوم علشان ينزل يهزر مع الطباخ في استوديو مكيف ويسمع عبارات المدح والاطراء من السيدات والانسات ويا حرام بياخد كام الف في الشهر
مش كدة وبس..دة سيادته بدل ما يفتي بجرجرة الصيدلي المسكين دة لقسم الشرطة ممكن يكلف نفسه ويسأل هم بيطلعوا ادوية بديلة ليه اصلا؟
بيطلعوا ادوية بديلة يا شريف بك لأنهم ملتزمين بأدوية معينة في كراسة التأمين هي اللي متوفرة عندهم في الصيدلية وغير كدة مش موجود عندهم وبالتالي هم مش بيطلعوا ادوية بديلة كيف يعني وغلاسة على خلق الله

صيدليات التأمين الصحي تختلف كليا وجزئيا عن صيدليات القطاع الخاص في انها لا يتوافر فيها جميع الاصناف..انما ما يتم توريده الى وزارة الصحة من خلال مناقصات

اما بقى سبب ان السيدة دي بتتوهم انهم مضطهدينها وبيعاملوها وحش....فممكن تسأل وزارة الصحة عن الظروف الغير صحية بل والغير ادمية اللي الصيادلة دول بيعملوا فيها

انما لا لا لا ......جرجريهم يا سيدتي على القسم.....روحي اعملي لهم محضر.....الدكتور شريف قال كدة
ماهو اللي ما يعرفش يقول عدس
فعلا........بما ان الموقف دة حصل في برنامج للطبخ
يبقى لا يصح الا ان نقول
انها بلد كفتة فعلا

ملحوظة:
صحيح انا صيدلي..بس ما باشتغلش في التأمين الصحي......ولا لي علاقة به.....وعمري ما اشتغلت في اي جهة حكومية من قبل....انما انا فعلا الموقف اثارني مهنيا وانسانيا في المقام الاول

لذا لزم التنويه

52 comments:

  1. بص يا سمير كلامك نوع ما فيه تجني فكره البرنامج لذيذه من وجهه نظري وبرنامج ناجح والي حد كبير بيصلح سلوكيات مثلا للاطفال
    حلو انه برنامج طبيخ بس مش طبيخ بس مفيش مانع يتطرق لمواضيع تانيه

    ReplyDelete
  2. ثانيا اعتقد انه كان بيرد علي اهمال موظف او سياسه غلط في المعامله مع الناس

    ReplyDelete
  3. أضم صوتي لصوت يا أحمد وكل ماذكرته عن التأمين الصحي وصيادلته صحيح يعلمه كل مواطن عاش عمق هذا الوطن

    ReplyDelete
  4. معلش اصل فى بلدنا ديه كل الناس بتحب تفتى فى اللى ملهاش فيه

    بوست حلو ماشاء الله

    ReplyDelete
  5. ههههههههههههههههه
    احنايا سمير اللي ادينا الناس دي اكبر من حقها:)

    ReplyDelete
  6. ههههههههههههههه انت شفت الراجل ده

    مش عايز ياخد منى حسنات بس انت فهمت شعورى تجاهه

    وبعدين يا سيدى انت لسه عارفه انها بلد كفته؟؟

    يا دكتره البلد كفته من زمان وكله بيهرس فى كله

    ReplyDelete
  7. بلد كفته يا سمير واللحمه غاليه ازاى ؟ بعدين انا حاسه بحرقة دمك وانتا بتكتب البوست ده بس انتا اتحيزت للصيدلى شكلكوا ولاد دفعه واحده هو اه ماشى كل الىى انتا بتتكلم عليه مضبوط ولما اهله يبقوا صرفوا عليه دم قلبهم عشان فى الاخر يقبض بكتيره 400 او 500 جنيه ده لو خادهم والمكان غير مؤهل للعمل ماشى كل ده صح وصحيين كمان عشان خاطرك بس هو لو كان اتكلم مع الست او رد عليها بطريقه ارحم من ده اليى عندى بيتهيئلى مكانتش اتصلت من اساسه بالبرنامج ده...يعنى برضه برغم كل الضغوطلازم نراعى ان اليى قدامنا مضغوط زينا ده يكفى انها مريضه ولا ايه على فكره انا معرفهاش ولا ليا حد الحمد لله احتك بالتامين الصحى كلامى خالص لوجه الله تعالى ..خلاص خلصنا من البوست نقول بقه كل رمضان وانتا بالف خير ..وفى رعاية الله وامنه..

    ReplyDelete
  8. السلام عليكم
    الف مليون مبــــروك على الزواج معلـش بقى متاخرة طبعا حضرتك عارف ظروف المواصلات واحنا اخر الدنيا طبعا
    :)
    الف الف الف مـــــــبروك

    ReplyDelete
  9. من تدخل في ما لا يعنيه
    سمع ما لا يرضيه
    :)
    أديلو كمان يا دكتره
    لعله يفهم حدوده

    خالص تحياتي

    ReplyDelete
  10. انا مبشفش اى غرابة فى الرد بتاعه لانها هى برضة بتاخد رأى مذيع فى برنامج طبيخ تسأله عن الصيادلة!!

    يعنى الموضوع كله سيرياليزم

    ReplyDelete
  11. هو الملاحظ دلوقتى فى كل برنامج كمية المعجبين بمقدمى البرامج الى اصبحوا اكثر شهرة من الفانيين وده مش وحش
    بس اللى اان مستغربه له هى الست اتصلت ليه فى البرنامج ده
    تفتكر كانت مستنية منه يوصف لها اكله تغنيها عن كل الادوية مش تحتاج للتامين فى حاجه
    الهدف من الرغى اللى فوق ده كله ايه واسفه انى طولت عليك
    ان الست دى مش اختارت المكان المناسب علشان يجى لها الرد المناسب
    تحياتى

    ReplyDelete
  12. اللي ايده في الميه مش زي اللي ايده في البصل برده
    ههههههههههههههههههههههههه

    ReplyDelete
  13. صلي علي النبي بس يا دكتور
    الست بتشتكي لأنها مخنوقة وبتقولك برنامج ومتذاع والناس هتشوفه ويمكن يأثر
    وبالنسبة لأن السيد شريف بيهزر وكدة فدة شغلته اللي بياكل منها عيش هو في الأول والأخر موظف بيشتغل ويقبض اخر الشهر بردة
    اما ظروف الأطباء طبعا ظروف غلط لكن اسمحلي هو المفرزض يأدي شغله كما ينبغي طالماوافق على المرتب في الأول
    واقل ما فيها يقولها مافيش غير البديل تأخديه ولا لاء
    اما حكاية الجرحرة على القسم فدي طبيعة الشعب المصري في اي شيئ يقولك اعمله محضر اسهل شيء عنده
    تحياتي واحترامي ليك

    ReplyDelete
  14. لا مزيد من الكلام

    هي بلد كفتة يا دكتور

    وروق دمك يا باشا وسيبك من كل الحورات دي

    وربنا يصبرنا على اللي بنشوفه في بلاد العجائب

    ReplyDelete
  15. coca:
    انا مش باتكلم عن فكرة البرنامج
    اي برنامج حتى لو كان تافه وجب احترامه فهو يقدم رسالة حتى لو كانت ترفيهية
    انما انا انتقد مذيع البرنامج لانه يتدخل فيما لا يعنيه ويضع نفسه مفتيا في قضايا لا يعلم عنها شيئا
    وينتقد مهن لا يفقه فيها شيء ولا يدري عن ظروفها واوضاعها اي شيء
    هو دة اللي انا بانتقده وليس البرنامج في حد ذاته
    اما بخصوص السياسة الغلط فهي للاسف سياسة وزارة باكملها الا وهي وزارة الصحة المسئولة عن التأمين الصحي
    واعتقد انه لو كانت عنده الشجاعة الادبية بدل ما يقولها اعملي في الصيدلي محضر في القسم كان ممكن يقول لها ارفعي قضية على وزير الصحة
    تحياااتي

    ReplyDelete
  16. عصفور المدينة:
    بس يبدو يا باشنهندس ان ابناء القطامية هايتس والقاهرة الجديدة ومدارس الانجلوامريكان لا يعلموا شيء عن ذلك
    او يمكن لا يعيشون معنا في هذا البلد
    تحياااتي

    ReplyDelete
  17. This comment has been removed by the author.

    ReplyDelete
  18. عاشقة الاقصى:
    يبدو فعلا ان دي مأساة البلد دي
    الف شكر ليكي
    تحياتي

    ReplyDelete
  19. شيماء الجمال:
    لا
    اعتقد يا شيماء ان احنا اللي صغرنا من نفسنا لحد ما الناس دي بقت عمالقة
    تحيااااتي

    ReplyDelete
  20. بطوط حبوب:
    شعورك تجاهه واضح يا دكتور
    بس انا فعلا لا احبه ولا ارهه انما انا اتعجب من الحديث في كل شيء لمجرد الافتاء
    تحياتي

    ReplyDelete
  21. ما شاء الله عليه
    ايه النصاحه دى
    قال يعنى مهتهم قوى بحقوق الانسان المصرى فتروح تبلغ

    هايل
    كل واحد بقى من حقه يفتى فى البلد

    ReplyDelete
  22. عايزة اتطلق:
    لا انكر فعلا اننا متحيز للصيدلي..لاني عارف ظروف العمل في التأمين الصحي او اي مكان حكومي من معاناة غير طبيعية
    وبالتالي لما تلاقي هذا الشاب المرفه يسفه من شباب مطحون زي دول فعلا بيصعبوا عليكي
    تحياتي

    ReplyDelete
  23. اماني:
    الله يبارك فيكي يا اماني
    حمدا لله على السلامة
    تحياتي

    ReplyDelete
  24. ياسر حسين:
    بس مين يقرا ومين يفهم يا فنان؟
    تحياتي واحتراماتي

    ReplyDelete
  25. انتا معاك حق يا سمير وانا ما انكرتش فى التعليق ان الدكتور مطحون بس النقطه اليى بتكلم فيها لما نبقى مظغوطينماشى ندوس على نفسنا لو الى قدامنا مريض وكبير فى السن انما الشباب كله بمعاناته على دماغى من فوق انتا ناسى انى انا منهم ولا ايه يا ابناء جيلى ...فى رعايةالله وامنه..

    ReplyDelete
  26. والله حرم بجد انا بيصعب عليا الصيدلى وبتوع التامين بس عارف يا احمد بجد فيه ناس فعلا تلاقيهم رخمه
    وبعدين سيبك تلاقى الست دى مدلعه شويه
    الا قولى انت غيران من شريف ههههههههه
    والله ما اعرفه ولا شوفته بس بهزر علشان حسه انك فعلا مضايق

    ReplyDelete
  27. الله ينور عليك بجد

    انا من زمان وانا نفسى اكتب عن البرنامج ده

    لان بجد شريف ده مستفز لاقصى درجة بحركاته واستظرافه و بالمكالمات اللى بتجيله

    وهو فعلا معظم ردوده هبلة وهو شخص سطحى جدا

    واللى مايعرفش فعلا يقول عدس

    تدوينة تستحق الاهتمام

    شكرا







    عيش حلاوى

    ReplyDelete
  28. blackcairorose:
    فعلا....كله في السحلبيس
    سمك....لبن....تمر هندي
    تحياااتي

    ReplyDelete
  29. desert cat:
    اعتقد ان الست اتصلت من باب الفراغ والاعجاب بشخصية مقدم البرنامج
    وممكن تكون افتكرته سوبرمان بقى وقادر على حل جميع المشاكل حتى الطبية منها
    تحياااتي

    ReplyDelete
  30. koukawy:
    القافية تحكم برضة
    ههههههههه

    ReplyDelete
  31. مش عارفة فعلا أقول أيه بس كل حاجة بقت كده

    -----------------------------------------

    على جمب بقى أنا من يوم ما التدوينة دى نزلت وأنا عايزة أعلق ومش عارفة أنت عملت التعليقات كده لية هو لازم أسجل دخول علشان أعرف اعلق جيت هنا كذا مرة وكنت هعمل عملية أهاربية فى المدونة بسببك
    ههههههههههههههههههههههههههههه

    ReplyDelete
  32. اصل الغلابة مبيجوش الا على الغلابة اللي زيهم
    الصيدلي بتاع التامين باخذ 500 جنية و بيعامل الناس الغلابة بغلاسة رغم انه هو يقدر يفهمهم بهدوء ان الدوا ده مش موجود و ان الدوا ده زيه بالظبط
    المشكلة مش في مدكور و لا غيره المشكلة ان حال الغلابة في مصر يبكي

    اوروفوار

    ReplyDelete
  33. السلام عليكم
    بالنسبة للبرنامج انا مش شايفة انه محتاج من الاساس اى نقد بسبب
    ان نوعية الناس اللى بتتفرج عليه ايه ناس فاضية وبيتفرجوا اساسا عشان يتفرجوا على سى شريف ويرغوا معاه
    واحنا شعب يموت فى برامج اللى على الهواء اللى كله رغى وكلام فاضى
    واغلبية اللى بيتصلوا بالبرنامج دا امهات كل واحدة بتطلب من شريف انه يكلم ابنها ويقوله ليه يا حبيبى مش بتشرب اللبن كدا هيطلعلك العفريت.
    فمن الاساس يعنى البرنامج معمول لغرض ترفيهى تسطيحى عادى جدا هو جات عليه0
    وبالنسبة لرد شريف على الست فدا حاجة طبيعية فى الشعب المصرى الفتوى بدون علم او يمكن دا اللى سائد فى دماغنا ان اى حد مش بيعمل شغله نروح نشتكيه فى القسم ع طول.
    وبالنسبة لدفاعك عن الصيادلة
    فانا شايفة ان فى فعلا صيادلة ودكاترة فى التامين الصحى بتعامل الناس معاملة كأنهم ناس بيئة او درن معاملة مش فيها اى احترام لكون الشخص دا مريض ويحتاج معاملة كويسة
    اضعف الايمان فى موضوع زى دا يقول للست بالراحة كدا يا ستى احنا بنديكى المتوفر عندنا يعنى مش بنديكى ادوية مركونة عندنا فى المخازن كدا وخلاص لاننا مش بياعين.
    سلاموز

    ReplyDelete
  34. يا رااجل
    دول عالم فاضية وبتقول اى كلام

    ReplyDelete
  35. تحياتي

    لن اعلق علي المكالمات الهاتفية الاطرائية...لان الجميع يعلم مصدرها...

    بما انه برنامج للطبخ...فهذا يعني ان كل شيء اصبح
    طبيخ...الصيدلة مع المطبخ...الاعشاب مع التوابل و المسكنات مع الزيوت...

    ببساطة شديدة...لا يوجد من يحاسب او يصحح...التليفزيون المصري بيخسر بالملايين يوميا...
    نعم هذه حقيقة....و يكفي ان تعلم ان الكثيرين ممن
    يعملون في مثل هذه البرامج تم تعيينهم بالواسطة و المحسوبية...الا القلة القليلة التي فرضت نفسها بعلمها و ثقافتها...و تميزها اللافت للنظر...

    تحياتي اخي الكريم ...و تقديري.

    ReplyDelete
  36. محمد عبد الغفاار:
    بمووووت في تعليقاتك بجد والله
    دمااااااااااغ عالية جدا
    تحياتي

    ReplyDelete
  37. mostafa rayan:
    انا ماليش اعتراض يا مصطفى على البرنامج وصاحبه على الاطلاق
    انما كل اعتراضي هو الافتاء في اي شيء وكل شيء بدون اي سبب
    افتكاسات يعني
    نورتني
    تحياتي

    ReplyDelete
  38. جمعاوي:
    بس حرام والله كدة
    دة كتر الكفتة يعمل انتفاخ وعسر هضم
    ربنا يستر ع البلد اللي بتأوينا دي والله
    تحياتي

    ReplyDelete
  39. rania:
    ازيك يا رانيا عاملة ايه؟
    عادي بقى ما انا كمان نويت اتكلم في الطبيخ والهندسة كمان
    كفتة بقى
    تحياااتي

    ReplyDelete
  40. rania:
    ازيك يا رانيا عاملة ايه؟
    عادي بقى ما انا كمان نويت اتكلم في الطبيخ والهندسة كمان
    كفتة بقى
    تحياااتي

    ReplyDelete
  41. عايزة اتطلق:
    الظاهر كدة ان الاجيال الجديدة طالعة بلا اخلاق..او يمكن الناس بقى خلقها ضيق من اللي بتمر بيه في حياتها
    تحياتي

    ReplyDelete
  42. بصراحه انا اعصابى بتعب اما اشوف امى واختى وقاعدين بيتفرجو عليه بضايييييييييييييق لانه مستفز جدا
    وبعدين مش اول مرة يدخل فى حوار جانبى
    90 % من المكالمات كده يعنى مرة سمعت واحد بتساله على اتيليه باين تشترى منه طقم زفاف هههههههههههههههههههه

    ReplyDelete
  43. appy:
    والله العظيم انا ما عندي اعتراض على الراجل نفسه ولا على برنامجه على الاطلاق
    ربنا يبارك له
    بس بعيد عن الفزلكة والحوار فيما لا يعنيه
    تحياتي واحتراماتي

    ReplyDelete
  44. abu shahin:
    الف شكر لك يا بو شاهين
    نورتني واتمناك صديقا دائما لمدونتي المتواضعة
    تحياتي واحتراماتي

    ReplyDelete
  45. bosbos:
    انا برضة كنت مستغرب بس بس ليه مطنشة المدونة عندي كدة؟
    بصي يا ستي
    هتلاقي تحت التعليق اللي انتي بتكتبيه خانة مكتوب فيها
    comment as:
    وجوة الخانة دي اختيارات كتير بتختاري منها على حسب انتي ليكي حساب في جوجل او لايف جورنال او وورد برس او تكتبي اسمك بس...وهكذا
    وبتختاري على هذا الاساس
    وبعدين انا باشرح لك ليه؟
    طالما علقتي تبقى اكيد عرفتي
    تحياتي واحتراماتي

    ReplyDelete
  46. طهقانة:
    تقريبا انتي جبتي المفيد
    الغلابة مش بيهونوا الا على بعض
    تحياتي

    ReplyDelete
  47. DO NOT PRESS F1:
    بالنسبة للبرنامج انا اختلف معاكي
    برامج الطبخ مش برامج تافهة على الاطلاق ولها جمهورها من ربات البيوت وهواة الطبخ
    انما المشكلة في البرنامج دة هو رغبة مقدم البرنامج في ادعاء المعرفة والاحاطة بكل المواضيع في كل المجالات
    انا معاكي طبعا ان في صيادلة قليلة الذوق بس لو جربتي يوم واحد تتعاملي مع النوع دة من الجمهور في الجو دة والظروف دي اعتقد انك هتفقدي اعصابك تماما
    تحياتي

    ReplyDelete
  48. بطل مصر الخارق:
    منور يا بطل
    سيبك انت ....انت رجعت من الاوليمبياد امتى؟

    ReplyDelete
  49. الربان:
    الف شكر لك على تعليقك القيم
    بالنسبة للتليفزيون المصري فحاله حال اي حاجة في البلد دي
    تسيب اهمال فوضى......
    بس ربنا وحده يعلم اخر دة كله ايه؟
    تحياتي واحتراماتي

    ReplyDelete
  50. هوندا:
    وللناس فيما يعشقون مذاااااهب
    وبعدين ماهو اكيد الفرجة ع البرنامج القيم دة بتنعكس ايجابيا على ترابيزة السفرة بتاعتكم
    تحياتي واحتراماتي

    ReplyDelete
  51. اهو اى عك فعلا وخلاص...

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails