Sunday, 10 August 2008

ما النا الا الدبابة



بعدما استبشرنا خيرا بالتجربة الديمقراطية الموريتانية واعتبرناها الأمل اللي هنعيش عليه ونحاول نقلده في مجتمعاتنا المنكوبة بحكم العسكر
واعتبرنا ان الموريتانيين فتحوا لنا جميعا كعرب وافارقة الباب نحو ديمقراطية سليمة زي كل خلق الله...فيها الحكم للشعب وللمدنيين والجيش للعسكر
اتاري كل الكلام دة كان وهم وسرعان ما عادت ريما لعادتها الأزلية القديمة......وكأن الشعوب المتخلفة امثالنا حرام عليهم الديمقراطية....الديمقراطية لم تخلق للي زينا...الديمقراطية دي معمولة للناس المحترمة بس....للناس اللي عندهم الجيش وظيفته حماية حدود البلاد وليس الأستيلاء على حكم البلاد و اذلال العباد
سرعان ما عادت موريتانيا للحظيرة العربية وقعدت جنب اخواتها تحت الحكم العسكري..تحت حكم الجنرالات...بلا ديمقراطية بلا وجع دماغ
هو في احلى من ان الواحد يصحى يوم الصبح يركب دبابة ويحتل قصر الرئاسة ويعتقل رئيس الجمهورية المنتخب ويقعد مكانه وينصب نفسه حاكما للبلاد؟
ويبقى مصيره واحد من اتنين:
يا اما الحكم حتى الموت....ثم التوريث والتوريث والتوريث
يا اما واحد يصحى الصبح قبل منه يلبس بدلته العسكرية ويركب دبابته ويعتقله لتبدأ رحلة حكم عسكري جديد
الشعوب العربية شعوب لا تستحق الديمقراطية...لا تستحق الحياة الكريمة...الحياة المحترمة الادمية....شعوب لا تستحق الا حكم العسكر والجنرالات....حكم الأحذية والنعال ....حكم بالروح بالدم....حكم سأظل احكم طالما في الجسد قلب ينبض
هنيئا للموريتانيين عودتهم لحضن اخواتهم...هنيئا للجنرالات العرب فشل التجربة الديمقراطية الموريتانية فطبقا لوجهة نظرهم لا يصح الا الصحيح والصحيح بالنسبة لهذه الشعوب المتخلفة الهمجية هي الحديد والنار لا الديمقراطية وحقوق الانسان...هنيئا لكتاب السلطة والموالسين نجاح رهانهم بأعتبار ان حكم العسكر يكسب...وطول مانت في جزمة الحاكم وفي خدمة مصالحه انت في امان
ولا عزاء لبتوع الديمقراطية وحقوق الانسان وحكم الشعوب والدستور والقانون و الكلام الفارغ دة.....الحكم ليس لشعب لم ينضج بعد...انما الحكم لمن امتلك الدبابة وقدر يسوقها ويحتل بيها القصر الجمهوري
اما بقى الاخوة اللي بيراهنوا على المجتمع الدولي وجمعيات حقوق الانسان ودعاة الديمقراطية
مش هاقولهم غير حاجة واحدة بس
مصر.........مصر.............مصر عضوة بمجلس حقوق الانسان التابع للأمم المتحدة
بذمتكم
في مسخرة اكتر من كدة؟

23 comments:

  1. بذمتكم في مسخرة اكتر من كدة؟

    الصراحه ... مفيش


    الشعوب العربية شعوب لا تستحق الديمقراطية...لا تستحق الحياة الكريمة...الحياة المحترمة الادمية....شعوب لا تستحق الا حكم العسكر والجنرالات....حكم الأحذية والنعال ....حكم بالروح بالدم


    كلامك جامد اوى احمد
    يعنى يوجع كده

    والله منا عارفه اعلق اقول ايه غير انى اتوجعت بكلامك ومش لاقيه حل

    ReplyDelete
  2. سلام عليكم استاذ سمير
    انا طبعا بضم صوتي لصوتك في رفض اللي حصل في موريتانيا واللي بيحصل طبعا في كل البلاد العربيه المنحوسه بحكامها المغاوير
    لكن العجيب في موريتانيا وده اللي حايجنني انشاء الله ان الوزاره كانت رافضه الرئيس والظاهر ان البرلمان كمان كان رافضه يبقى كان اولى يسقط من البرلمان خليه ياعم رئيس وحش وماينفعش
    لكن ان يتم اللجوء للعسكر بهذه الطريقه حاجه مستفزه
    المهم انا اختلف معك في العنوان
    لاني ارى اننا نحتاج الفهم فهم الطريق ومعرفة الوسائل والعزم الذي نزكيه في النفوس لا بالتسبيط ولكن برفع الهمم مش بالدبابه
    سعيد بزيارتي الاولى لمدونتكم المنيفه
    واتمنى ان نتواصل
    الشاعر بن هلال

    ReplyDelete
  3. سلام عليكم استاذ سمير
    انا طبعا بضم صوتي لصوتك في رفض اللي حصل في موريتانيا واللي بيحصل طبعا في كل البلاد العربيه المنحوسه بحكامها المغاوير
    لكن العجيب في موريتانيا وده اللي حايجنني انشاء الله ان الوزاره كانت رافضه الرئيس والظاهر ان البرلمان كمان كان رافضه يبقى كان اولى يسقط من البرلمان خليه ياعم رئيس وحش وماينفعش
    لكن ان يتم اللجوء للعسكر بهذه الطريقه حاجه مستفزه
    المهم انا اختلف معك في العنوان
    لاني ارى اننا نحتاج الفهم فهم الطريق ومعرفة الوسائل والعزم الذي نزكيه في النفوس لا بالتسبيط ولكن برفع الهمم مش بالدبابه

    سعيد بزيارتي الاولى لمدونتكم المنيفه
    واتمنى ان نتواصل
    الشاعر بن هلال

    ReplyDelete
  4. الشعوب العربيه لا تستحق الا الدعاء (عليها) مدونتك جميله قوى يا شرقاوى وليها لون اتمنى ميكنش احمر ..انا بتبسط لما الاقى مدون اومدونه من الزقازيق حاجه بتفرحنى ..ده عنوان مدونتى شرفنى بالزياره http://ayzaatalawa.blogspot.com/ انا ومدونتى من الشرقيه برضه عشان كده بتبسط لما الاقى مدونين شراقوه بحس ان احنا جيران..فى رعاية الله وامنه ..سلام.

    ReplyDelete
  5. بيقولوا ان اللى بيصحى بدرى فى ليبيا يبقى الريس ، إظاهر انه مش فى ليبيا بس

    احنا منستحقش عشان مبنعملش للى نستحقه

    ReplyDelete
  6. يا اما الحكم حتى الموت....ثم التوريث والتوريث والتوريث
    يا اما واحد يصحى الصبح قبل منه يلبس بدلته العسكرية ويركب دبابته ويعتقله لتبدأ رحلة حكم عسكري جديد
    --------
    hhhhhhhhhhhhhhh
    الله يمسيك بالخير كنت راجل طيب

    اوروفوار

    ReplyDelete
  7. بالظبط زي ما قال محمد عبد الغفار

    احنا لا نستحق الديموقراطية لاننا لم نعمل لنحصل عليها ولم نتحرك نحوها

    دوما ننتظر ان يأتي ملاك من السماء يعطينا كل شيء كمنحة من السماء وهو كذلك فى الديمقراطية ننتظرها عطية ولا نجري لنحصل عليها لانها هدف وغاية تستحق القتال لأجلها

    لما نعرف قدر الحاجة ونحترمها يبقي ممكن نفكر نحصل عليها
    وحتى نعرف ونحترم لننعم بحكم العسكر

    تحياتي
    تشي

    ReplyDelete
  8. shaymaa:
    انا نفسي اتوجعت من كلامي يا شيماء
    وبعد ما كتبت البوست اكتشفت انه جامد فعلا
    بس للاسف هو دة الواقع
    تحياتي

    ReplyDelete
  9. الشاعر بن هلال:
    اعتقد ان طرق الفهم لهذه الشعوب قد استنفذت تماما
    وكما قال سعد زغلول
    مفيش فايدة
    تحياتي

    ReplyDelete
  10. عايزة اتطلق:
    اولا انا كمان بافرح لما بلاقي بلدياتي
    الظاهر ان الدم بيحن زي ما بيقولوا
    عموما شرفتي ونورتي واتمنى الا تكون اول واخر زيارة
    يسعدني بشدة ان تكةني صديقة لمدونتي المتواضعة كما اتعشم ان تقبليني صديقا
    تحياتي

    ReplyDelete
  11. اولا يا احمد انت استاذى وفوق راسى من فوق
    وبدون حلفان انت اكتر الناس بحب اجى مدونتهم لانى عارف انى هلاقى حاجة جامدة والكلام ده مفيهوش اى مجاملة والله

    تصور والله يا اخى انهاردة كنت عمال افكر فى الكلام ده

    وقعدت اسأل ايه اخرة اللى احنا فيه ده

    المسخرة اللى اكتر من كدة

    ان الحزب الحاكم بيصدق اننا فى عصر ديمقراطية

    وانه عمل انجازات

    وان خريطة مصر اتغيرت

    ولما تدور على الحقيقة مش المظاهر

    تلاقى ان الزراعة باظت

    وان الاقتصاد باظ

    وان الصحة باظت

    و

    هو لسه فى حاجة تانى

    لنا الله

    احمد

    ReplyDelete
  12. فضيحة الفضايح
    مش بس حذف كومنتات
    لا
    دا جهل بالدليل كمان
    اة والله
    بالدليل - المادى
    اتفضلوا هنا
    http://scandal--blogger.blogspot.com
    تقبلوا اسما تحياتى

    ReplyDelete
  13. هو محدش يقدر ينكر انها مسخره

    بس أنا لسه شايفه ان المل موجود يااحمد

    اكيد هيكون رئيسنا مدني من غير مايكون بن الرئيس العسكري

    أعتقد ان الناس بدأت تفوق وهو ده المهم

    ReplyDelete
  14. شكرا على ذوقك وانا اليى يشرفنى انك تبقى اخ وصديق عزيز ومدونتك بدون مجامله يسعدنى ويفيدنى انى ازورها طبعا جزاك الله كل خير وكل رمضان وانتا بالف خير ..وعايزين بوست جديد ..فى رعاية الله وامنه..

    ReplyDelete
  15. محمد عبد الغفار:
    لو اللي بيحصل في ليبيا دة ممكن يحصل في مصر
    انا مش هنام خااااالص
    تحياااتي

    ReplyDelete
  16. طهقانة:
    ماتنسيش العيش والحلاوة
    وصيتك المدام بتاعتي والعيال
    تحياتي

    ReplyDelete
  17. che the hermit:
    وهو المطلوب اننا نجاهد لكي نحصل على حق بديهي؟
    يعني الديمقراطية دي حق اساسي من حقوق الانسان في اي زمان وكل مكان
    معقول نناضل من اجلها؟
    طيب اشمعنى بقية دول العالم المتحضرة لم ترق فيها الدماء انهارا لنيل حقها الطبيعي في الديمقراطية؟
    تحياااتي

    ReplyDelete
  18. ahmed al sabagh:
    الف شكر يابو حميد على الكلام الجميل دة
    انا طبعا بأكون حريص على الاستفادة بارائك القيمة ودة اللي خلاني نفسي تشارك في كل الموضوعات
    ممكن نختصر كل الكلام دة ونقول ان مصر بقت خرااااابة
    تحياتي واحتراماتي

    ReplyDelete
  19. عصفور المدينة:
    وكأن الكعكة في ايد اليتيم عجبة يا باشمهندس
    وهو حرام على الشعوب الغلبانة دي انها تتذوق الديمقراطية وحلاوتها؟
    الله يرحمنا
    تحيااااتي

    ReplyDelete
  20. كاشف الاوهام:
    انا طبعا مش فاهم حاجة
    بس هحاول افهم الموضوع
    بالمناسبة
    كان يسعدني اكتر المشاركة بالتعليق
    تحياااتي

    ReplyDelete
  21. esraa:
    امل؟؟؟؟؟؟؟؟؟؟
    بحب فيكي تفاؤلك يا اسراء
    ربنا يديمها عليكي نعمة
    تحياااتي

    ReplyDelete
  22. عايزة اتطلق:
    ربنا يديم المعروف
    البوست الجديد نزل فعلا
    تحياااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails