Sunday, 3 August 2008

حسن و مرقص


فيلم (حسن و مرقص) فيلم جميل
جمع بين حاجات كتير مطلوبة في الفيلم السينمائي...من القضية الجادة للكوميديا الراقية...للواقعية النسبية...للميزانية العالية للفيلم
كل دة انتج فيلم حلو.....انتاج ضخم فعلا....فيلم اعجب به كل من شاهده
للمرة الاولى يتخلى عادل امام عن عادته الأزلية والتي استمرت معه لمدة تزيد عن 30 سنة منذ بداية بطولاته المطلقة سواء السينمائية او المسرحية الا وهي الاستعانة بأحدى الجميلات واستخدام الجنس او على الاقل الافيهات الجنسية داخل العمل السينمائي
الفيلم دة يخلو تماما من اي اسفاف او عري...ودي بصراحة حاجة غريبة جدا وغير معتادة في سينما عادل امام
اول مرة...الاقي فيلم لعادل امام يخلو من قبلة واحدة...مفاجأة فعلا..
هل اصبح عادل امام مؤمنا بالسينما النظيفة؟؟؟؟؟؟؟؟؟؟؟؟
طبعا الفيلم يناقش بشكل جريء العلاقة بين المسلمين والاقباط في مصر عن طريق محاربة بطلي الفيلم عادل امام وعمر الشريف اللي بيمثلوا المنهج المعتدل اسلاميا ومسيحيا للتيارات الدينية المتطرفة الاسلامية و المسيحية على حد سواء
طبعا الفيلم لا يخلو من المبالغة الكوميدية لحالة الاحتقان بين المسلمين والاقباط..ولكن طبعا المبالغة هي التي تصنع الكوميديا..فلا كوميديا بدون مبالغة كما انه لا كاريكاتير بدون مبالغة والا اصبح فوتوغرافيا
اداء عمر الشريف اعجبني ولكنه لم يبهرني...مش دة عمر الشريف..يمكن لأنه بيمثل دور شيخ مسلم وهو مالم نعتاده من دونجوان السينما المصرية السابق
واعتقد ان تدين عمر الشريف في الواقع لم يساعده على اتقان الدور
تحس ان مستر عمر الشريف العالمي..مش راكب على دور الشيخ محمود المسلم المنتمي للطبقة المتوسطة والذي يمثل التيار الاسلامي المعتدل
مش عارف هل دة كان شعوري انا بس ولا شعور عام لمن شاهد الفيلم
من اهم عيوب الفيلم من وجهة نظري هو الحرص على التوازن في كل شيء بين المسلمين والاقباط في الفيلم.......فلو ظهر شيخ متطرف لابد ان يقابله قس متطرف....ولو هاجم احدهم الدين المسيحي لابد ان يكون المشهد التالي لأحد الاقباط ينتقد المسلمين....ولو تلقى عادل امام ضربة لابد ان يتلقى عمر الشريف ضربة
ولو ظهر قس يحرض الاقباط على الاسلام والمسلمين ويدعوهم للعنف لابد ان يكون المشهد التالي مباشرة لشيخ متشدد يحذر المسلمين من عذاب جهنم اذا تعاملوا مع الاقباط او صادقوهم او هنأوهم بأعيادهم
تحس ان المؤلف يمسك بميزان حساس خوفا من ان ينتقده احد الجانبين وهو ما يؤدي بالتأكيد الى عدم المصداقية
فبكل تأكيد لابد ان نعترف ان التطرف الاسلامي اقوى تأثيرا واثرا ونفوذا من التطرف المسيحي ودة بالتأكيد راجع للفرق العددي بين المسلمين والاقباط في مصر
وبالتالي لا يصح على الاطلاق ان يساوي الفيلم بين قوة وتأثير الجماعات المتشددة الاسلامية بقوة ونفوذ وتأثير الجماعات المتشددة المسيحية...وهو للأسف ما حدث في الفيلم ولكن ذلك من اجل التوازن المنشود ليس الا
الفيلم في مجمله جميل وقوي من حيث القصة او الكوميديا او الانتاج وهو خطوة هائلة في طريق النجومية لعدد من الوجوه الصاعدة زي محمد امام و شيري
وهو طبعا زيادة لرصيد عادل امام الجماهيري و الفني ونقلة جديدة لنوعية ادواره
من الاخر كدة و خلاصة الكلام
الفيلم دة حلو قوي.....شوفوه

34 comments:

  1. كيف حالك يا عريس أخبار الجواز إيه
    :)

    تفريقك بين تشدد جماعات إسلامية وأخرى مسيحية واعتبارك ان التشدد الإسلامي اكثر نفوذا وتأثيرا بحكم العدد مش في محله .. فاسمح لي اختلف معك

    عشان نعرف مين اكثر تأثير نشوف المصدر وقوته عند الجماهير

    بالنسبة للمسلمين فالجماعات المتشددة لدرجة تجريم وتحريم التعامل مع المسيحين تماما وبلا هدف - استثني منها من يدعو لمقاطعة فرد معين من المسيحين أو أفراد بسبب مواقف له ذد الإسلام - فهذه الجماعات المبالغة في التغليظ إن وجدت هذه الجماعات هي مصدر التأثير ودي مش بتلقى قبول عند الغالبية من المسلمين إلا في حالة الاحتقان واستقواء المسيحين بالغرب خصوصا بعد دخول امريكا العراق .. لكن الأصل ان الجماعات دي تأثيرها محدود في المسلمين لأنها ليست مصدر رسمي أو منظم او موجه

    العكس بالنسبة للمسيحين .. لأن الخطاب الديني بيخرج من مكان واحد بس مفيش غيره .. هيئة وحيدة منظمة .. واللي بيكلموا الجماهير ليهم منصب فيه .. بتكلم عن الكنيسة طبعا .. عشان كده كل اللي بيحرضوا شعب الكنيسة يسبقهم منصب قس .. الصورة الرسمية والدينية للمحرض هنا بتكون اقوى تأثير في الغالبية من المسيحين

    عشان كده اظن إن التطرف المسيحي خصوصا اذا اقترن باستقواء بالغرب تأثيره أكبر في تأجيج مشاعر الاحتقان بين المسلمين والمسيحين

    ReplyDelete
  2. انت داخل تكلمنا عن حسن ومرقص
    كلمنا عن مذكرات الزوج الحديث
    مبروك يا ابو حميد

    ReplyDelete
  3. أولا
    اعتذر بشدة عن عدم مباركتي لك بمناسبة الزواج
    فقد كنت في مصر في تلك الفترة ولم أدخل المدونات
    ولو كنت أعلم بهذا الخبر لحضرت بنفسي لفرحك وباركت لك
    ثانيا
    بالنسبة للفيلم أنا لم اشاهده بعد
    ولكن أنا مع رأيك
    بالنسبة لعمر الشريف
    تصديق أنه شخص مسلم ومتدين
    به صعوبة كبيرة
    ربما احتاج ذلك لبذل الكثير من الجهد بالنسبة له في الآداء
    خاصة أنه عاش أكثر من نصف عمره وسط الاجانب
    أما عادل إمام
    فشيء جميل أنه يعمل فيلم بلا قبلات
    وبلا مشاهد قد تخدش الحياء

    خالص تحياتي

    ReplyDelete
  4. شيكابالا4 August 2008 at 11:58

    بصراحة الفيلم عجبنى جدا وانا كنت متحمسة لية جدا حتى قبل ما اشوفة ولانى تربطنى علاقات قوية مع اخواننا الاقباط فكنت سعيدة جدا بفكرة الفيلم وبجد سينما عادل امام جددت نفسها بالشباب اتمنى مشاهدة طيبة للى ما شافش الفيلم

    ReplyDelete
  5. لاااااااااااا

    مرقص ايه وحسن ايه وجود نيوز ايه

    احنا عايزين ملخص عن الفرح

    تورتتين مثلا

    صورتين مثلا

    اى حاجه كده م ريحة الفرح

    انت راجع م اجازة ثانوية عامه

    داخل ع طول وبلا اشاره

    لاحلى اجازه انت كنت فيها

    يارب تكونوا كويسين

    وسلامى للمدام

    للاسف مدخلتش الفيلم انا

    معرفش ليه مبقتش م انصار عادل امام ف السينما

    وبستناه لما يبقى ف متناول الايدى بالمجان

    بس كويس خدنا فكره ع الفيلم اهو وبرده بالمجان

    ReplyDelete
  6. .فلو ظهر شيخ متطرف لابد ان يقابله قس متطرف....ولو هاجم احدهم الدين المسيحي لابد ان يكون المشهد التالي لأحد الاقباط ينتقد المسلمين....ولو تلقى عادل امام ضربة لابد ان يتلقى عمر الشريف ضربة

    ومين قال ان ده مبيحصلش ركز والله فى كل حاجه حواليك هتلاقيها كده وانا دايما بقول علاقة المسلمين بالمسيحين نار تحت الرماد بتستنى اى شعله وتبهدل الدنيا



    مبروك الفرح ولو انها متأخرة

    ReplyDelete
  7. رغم اختلافي معك في نقطةعدم نجاح عمر الشريف في اداء دوره
    الا اني استمتعت بقراءة نقدك للفيلم

    اوروفوار

    ReplyDelete
  8. أنا مشفتوش لكن سمعت عنه كويس
    كويس أن عادل أمام أحترم شخصية رجل الدين الي قدمها لو كان عمل زي بقيت أفلامه حشر الجنس بدون أي مبرر أو توظيف منطقي زي عادته كانت حتبقي خل بصراحة
    بس أنا الي مضايقني أنه حط أسمه قبل أسم عمر الشريف
    مش فاهمة علي أي أساس

    ReplyDelete
  9. يا نهار آبيض
    وشي منك في الأرض يا عريس
    لسة عارفة صدفة دلوقتي من التعليقات

    ع العموم
    أل مبروك
    و
    لولولولولولوييييييي

    ReplyDelete
  10. الكاتب معذور ياأحمد فهو يناقش موضوع في منتهي الحساسية وخاف ان حد يتهمه بالانحياز لجانب ضد جانب وعنده حق
    العقول المريضة ذاد عددها اليومين دول
    بس فيلم حلو

    ReplyDelete
  11. السلام عليكم
    اولا دا اول بلوج اشوفه بيتكلم عن الفيلم دا
    وكان نفسى بصراحة احضره هو و كام فيلم تانى
    بس ربناا يخلى لينا عيلة السبكى افلامها محتكرة السينماا اللى فى بلدنا
    المهم

    اولا
    مفاجاة اولا انى اسمع ان فى فيلم لعادل امام من غير قبلة واحدة
    دى بجد مفاجاة.

    ثانيا
    مختلفة معاك فى حتة ميزان التطرف بين المسلمين والمسحيين
    انت بتقول ان التطرف عند المسلمين اعلى نظرا لانهم اكثر عددا
    طب ليه مش نقول العكس على اساس ان المسحيين اقل عددا فلازم يكونوا اكثر تطرفا وتمسكا بدينهم
    ويمكن دا مش ظاهر على المستوى الاعلامى لان اى حد بيخاف يتكلم فى النقطة الحساسة دى

    ثالثا
    عجبنى تحليلك بس كان نفسى تتوسع فى تناول الفيلم اكثر من هذا

    سلاموز.

    ReplyDelete
  12. أختلف معك في مسمى (السينما النظيفة) فلا أؤمن بوجود سينما نظيفة وأخرى غير نظيفة ...

    أتفق معك في أن الفيلم أكثر من رائع والأداء عالي من كل الكاست ...

    واضح انه كان فيه فرح قريب ، ألف مبروك ...


    والسـ ختام ــلام

    ReplyDelete
  13. انا مشفتش الفيلم الصراحة

    بس انا بتفق معاك جدا

    انى عمر الشريف الدنجوان

    مش لايق عليه انه يكون شيخ

    خالص

    ReplyDelete
  14. ma_3alina:
    الحمد لله....تمام
    الف الف شكر
    انا معاك ان هناك جماعات مسيحية متشددة ولكن تأثيرها هنا في مصر غير ملحوظ او غير قوي بالشكل الذي يجعلهم قوة ضغط في المجتمع
    ربما يكون في دول اخرى التشدد المسيحي اكثر تأثيرا ولكن في مصر اشك في ذلك تماما
    تحياتي

    ReplyDelete
  15. لم اشاهد الفيلم لكن قرات كتابات نقديه كثيره عنه و منها الكثير مما يعتبره مليء بالعيوب سواء في القصه او الاخراج او التمثيل
    لكن هحاول اشوفه
    تحياتي

    ReplyDelete
  16. لم اشاهد الفيلم لكن قرات كتابات نقديه كثيره عنه و منها الكثير مما يعتبره مليء بالعيوب سواء في القصه او الاخراج او التمثيل
    لكن هحاول اشوفه
    تحياتي

    ReplyDelete
  17. محمد مفيد:
    اصل مذكرات الزوج الحديث دي يا عم محمد مش محتاجة مدونة دي محتاجة مجلد
    هنزل مجلد بمذكرات ومغامرات زوج
    تحياتي

    ReplyDelete
  18. ياسر حسين:
    مباركتك ليا يا فنان دة شرف كبير ليا
    الله يبارك فيك
    بالنسبة لعمر الشريف
    فعلا كان محتاج مجهود جبار لاقناعك بانه مسلم متدين وان كنت اعتقد انه لم يبذل الجهد الكافي
    بالنسبة لعادل امام والسينما النظيفة هي مفاجأة فعلا بكل المقاييس
    يارب تستمر
    تحياتي

    ReplyDelete
  19. شيكابالا:
    فعلا الفيلم جميل
    وكلنا بتجمعنا علاقات طيبة بالاقباط باعتبارنا كلنا مواطنين مصريين بنعيش تحت علم البلد دي
    تحياتي

    ReplyDelete
  20. د/اجدع بنوتة:
    الف شكر يا دكتورة على المباركة واحنا الحمد لله كويسين وبخير
    اما التورتتين فملحوقة ان شاء الله
    قريبا
    بس بالنسبة للفيلم نصيحة ادخليه..عادل امام فعلا بيقدم فيه دور مختلف بعيدا عن ادواره النمطية اياها
    تحياتي

    ReplyDelete
  21. appy:
    الله يبارك فيكي
    وهي مش متأخرة ولا حاجة نحن على استعداد تام لتلقي التهاني في اي وقت
    بالنسبة للمعادلة اعتقد انها مش موجودة بالشكل الفج دة اللي في الفيلم
    تحياتي

    ReplyDelete
  22. طهقانة:
    انا لم اقل انه لم ينجح
    وانما قلت انه لم يقنعني تماما
    هناك فرق
    تحياتي

    ReplyDelete
  23. عاليا حليم:
    نفسي حد يبلغ عادل امام ان السينما بدون جنس افضل بكتييير
    وانه ان الاوان ان يحترم جمهوره وان يحترم تاريخه قبل اي حد تاني
    بالنسبة لموضوع الاسماء انا سمعت ان دة كان بناء على طلب من عمر الشريف والله اعلم
    ثانيا:
    انتي بقى اللي بتيجي المدونة قليل وبالتالي ماعرفتيش بالفرح
    بس عموما الله يبارك فيكي
    تحياتي

    ReplyDelete
  24. مجلة علي صوتك:
    بس احنا مش في معادلة كيميائية موزونة
    احنا في سينما ولابد ان تكون معبرة عن الواقع
    وهو دة الواقع؟
    تحياتي

    ReplyDelete
  25. do not press f1:
    ربنا يخللي السبكية اللي مهيفين السينما المصرية كلها
    نقطة عادل امام دي نقطة فعلا ايجابية و تحسب له ويارب يستمر على هذا المنوال في الافلام القادمة
    كان نفس ي اكتب بتوسع اكتر من كدة عن الفيلم بس خايف من التطويل والملل
    تحياتي

    ReplyDelete
  26. mohamed hesham:
    لا....اسمح لي ان اختلف معاك في موضوع السينما النظيفة
    انا عندي موضوع في المدونة عن السينما النظيفة ياريت تكتب لي رأيك فيه
    تحياتي

    ReplyDelete
  27. مدحت محمد:
    انا ادعوك لمشاهدة الفيلم
    الفيلم حلو بصراحة
    تحياتي

    ReplyDelete
  28. ذو النون المصري:
    ادعوك فعلا لمشاهدة الفيلم
    تحياتي

    ReplyDelete
  29. سينما ايه وافلام ايه
    ومشاكل ايه الى بتتكلم عليها ديه

    ايه يابنى انت
    فين الفرح والصور والزغاريط والبوفيه والذى منه

    بقى اول بوست بعد الجواز يكون حسن ومرقص
    واداء مين وسينما نظيفه ايه

    لااااااااااا
    انت عايز تكروتنا ولا ايه

    بجد اكتبلنا مذكرات مدون متزوج جديد
    :))))))))))))))

    هبقى اشوف الفيلم حاضر

    ReplyDelete
  30. الف مبروك على الجواز :)
    نا لسة مدخلتش الفيلم بس شكله كده حلو .

    ReplyDelete
  31. shaymaa:
    الله يبارك فيكي يا شيماء
    انتي الصور والاكل لسة ما وصلوكيش لحد دلوقتي
    دة انا بعتهم ليكي وانا في الفرح
    عموما هافكر جديا في موضوع المذكرات دة
    تحياتي

    ReplyDelete
  32. شيماء الجمال:
    الله يبارك فيكي يا شيماء
    نورتيني والله
    تحياتي

    ReplyDelete
  33. هي المقابله اللي انت بتتكلم عنها ممكن تكون نوع من انواع المبالغه برضه لأظهار ان زي ما فيه هنا حاو فيه هنا حلو و فيه هنا و حش و في زيه هناك وحش

    ReplyDelete
  34. koukawy:
    بس السينما هي مراة للواقع والا تبقى كاريكاتير او كوميديا فجة لو اعتمدت عل المبالغات
    تحيااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails