Thursday, 17 July 2008

اخر ايام العزوبية


اكتب هذا البوست وانا اتنسم اخر نسائم العزوبية
العزوبية جميلة قوي يا جماعة
نعمة ربنا ما يحرمكم منها
فعلا الواحد ما بيعرفش قيمة الاشياء الا بعد ما تروح منه
انا طبعا بأخمن...انا لسة لم اتزوج حتى الان
ومين عااااارف؟
مش يمكن يكون الجواز امتع واكثر استقرارا؟
مش ممكن يكون الجواز نهاية لعصر الفوضى والمرمطة؟
ممكن جدا....ووارد بقوة
انما بما ان الانسان عدو ما يجهل.....فبالتالي العزوبية حتى الان هي نعمة بيتخلى عنها الانسان بارادته الحرة
العزوبية لها برضة مميزاتها ....الصعلكة...والصياعة..والروشنة...والحرية في اتخاذ القرار والاستبياع..ومفيش حاجة بتهمك...لا حكومة تهمك ولا سجن يلمك
انما بعد الجواز بما له من مميزات كتيــــــــــــــــــــــــــــــــــــــــــر جدا الا انك فقدت استقلاليتك وثوريتك واصبحت تحسب الف الف حساب لأي قرار تتخذه....ما انت مش عايش لوحدك يا معلم
يعني بعد الجواز هتلاقي حكومة تهمك...وهتلاقي سجن يلمك
يعني ممكن الجواز يكون عدو الحرية.....يارب اخلف ظني
ومن خبرات السابقين....اقدر اقول لكم ان ماحدش ريحني وقال لي ع الخلاصة اللي انا عايزها
ناس تقول لك....اوعى تعملها يا ابني...ما تبقاش مجنون زيي..ودول الاغلبية بس اغلبية مش صامتة
وناس تانية تقول لك الجواااز؟؟؟؟يا سلام ع الجواز....هو فيه زي الجوااااز؟
دة نعمـــــــــــــــــــة.....نعمة واللي يكرهها يارب يعمى....ودول قلة بصراحة
بس موجودين....ويارب اجعلني من الطائفة التانية
خاصة اني متفاءل...ومستبشر خيرا.....ويا خوفي لأغني بعد كام شهر اغنية
كلهم بيقولوا كدة في الأول....وانا قاعد بأتذكر كلمات الخطوبة ورومانسيتها
وبعد هذه المقدمة الغير مبشرة على الاطلاق......يسعدني ان اعلن هذا الخبر
فرحي ان شاء الله يوم الاربعاء الجااي 23 يوليو
يعني باقي من الزمن كام ساعة بس
استأذنكم في اجازة زواج ...واعود بعدها لممارسة نشاطي التدويني
ربما اكون اكثر نشاطا تدوينيا....ربما اكون اقل نشاطا بعد العودة
كل دة في علم الغيب....بس اهم حاجة اني حبيت انكم تشاركوني فرحتي
دعواتكم بقى...والى اللقاء

68 comments:

  1. مبروووووووووووووووووك بس دى تعتبر ثورة ضد العزوبية بما انك عامل فرحك فى اليوم دة يبقى هتتحول زى مصر ما اتحولت فى اليوم دة..........ايه التخريف دة؟ مالكش دعوة باللغة اللى انا باقولها دى خليك انت احسن

    ReplyDelete
  2. ماشاء الله
    اول زيارة ليه اجى الاقي خبر جميل كدا

    ربنا يتمم لكم علي خير

    بارك الله لكما وبارك عليكما وجمع بينكما في خير :)

    ReplyDelete
  3. يا احمد إعقل
    و راجع نفسك
    العمر يا بنى مش بعزقة
    إتعظ مما سبقوك
    يعنى مفيش فايدة
    طب خلاص بقى
    ألف مبروك يا أستاذ و ربنا يجعل حظك احسن من كل اللى سألتهم و حذروك
    و تكون أسعد من اللى شكروا فى الجواز و شجعوك
    طبعاً مفيش داعى تسألنى عن رأيى عشان هقول كنام مس نطيف خاااااانص
    بس كل تجربة لها خصوصيتها متخفشى و لا تقلق
    و ربنا يسعد أيامك كلها
    بس نصيحتى يا احمد خليك حنون و هيترد لك بمشاعر مضاعفة و الست مش عاوزة من جوزها اكتر من الحنان المغلف بإحترام و ساعتها تديله عينيها لو طلب
    ربنا يسعدكم
    و ألف ألف مبروووووك

    ReplyDelete
  4. مبروووووووووووووووك

    واحب اسمع اغنيه

    جوزناه وخلصنا منه وعقبال الى الاصغر منه لو سمحت

    ReplyDelete
  5. أحم أحم

    كنت فاكرة انى هلاقى التليفون بيرن وهلاقى احمد او خطيبة احمد بيعزمونى واكون اول المدعويين بس الظاهر ان الغايب مالوش نايب

    وللعلم انا فى اليوم ده معزومة فى فرح عندكم ولو عزمتونى هاجى لكم طبعا واضرب عصفورين بحجر مرة واحدة واحضر الفرحين

    بس شكلى اتنسيت

    على العموم مليييييييييييييييييييون مبروك وربنا يتمم لكم بخير يارب وتكون حياه سعيدة بأذن الله

    خالص تحياتى ليك ولخطيبتك الجميلة

    ReplyDelete
  6. مبروووووووووك يا دكتور

    ReplyDelete
  7. الف الف الف الف مبروك يا دكتور
    ربنا يتمم بخير
    بس حتوحشا معشر العزاب
    ههههههههههه
    ربنا يسعدكما و يرزقكما الذرة الصالحة
    بس بص
    اهم حاجة الجواز ما ياخدكش من التدوين
    توعدني يا دكتور ؟

    خالص تحياتي
    مجرد موجة
    أحمــــد

    ReplyDelete
  8. السلام عليك ورحمة الله وبركاته

    الف الف مبروك وربنا يتمملك بخير

    ويارب تكون من الطائفه التانيه
    :))))))

    سلام

    ReplyDelete
  9. ألف مبروك
    ربنا يتمم لك بخير
    ان شاء الله تكون سعيد وسيبك من أي كلام
    ابحث عن السعادة هتلاقيها

    ReplyDelete
  10. مبروك يا احمد
    بجد سعيد بمعرفتك
    ومفيش احلي من الزواج وعلي مسئوليتي

    ReplyDelete
  11. أ/ أحمد

    ألف مليون مبروك
    وان شاء الله زواج سعيد جدا

    دمت بكل سعادة

    أسامة

    ReplyDelete
  12. الف الف الف مبروك يا زميل المهنة

    مش عارفة ايه حكاية شهر 7 دا لحد دلوقتي فيه 5 اعرفهم هيتجوزوا و العدد بيزيد !!!

    حمي الزواج في يوليو :)

    الف مبروك انتم السابقون

    :)

    ReplyDelete
  13. ألف مبروك يا أحمد
    بس حلو أوي تاريخ 23 يوليو :)
    ألف مليون مبروك

    ReplyDelete
  14. بارك الله لكما وبارك عليكما وجمع بينكما في خير

    اتم الله لك على خير وصب عليكما الخير صبا

    الف الف الف مبارك

    :)

    ReplyDelete
  15. مبرررررررررررررررررررررررررررررووووووووووووووك بس مبروك عليا انا مش ليك انت وربنا يقدرنى اقدر اسعدك ويجعلنى زوجة صالحة ليك وكفاية عليا الدلع اللى دلعتهولى ف الخطوبة دة يكفينى بقية عمرى وبجد بجد اللى ربنا يكرمها بانسان زيك لازم تحطة ف عينيها طول العمر وعامة 23 يوليو دة يوم تاريخى ف حياة مصر كلها وربنا يقويك يا زعيم ربنا يخليك ليا

    ReplyDelete
  16. معلش متأخرة بس برضو
    مبرووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك

    الف مليون مبروك
    و يارب يخلف ظنك في الجواز
    و يكون سعادة ليك يا رب ما تنتهي

    بارك الله لكما
    و بارك عليكما
    و جمع بينكما في خير

    ربنا يجعل ايامك كلها خير و هناء

    و مستنين عيل صغير نلعب بيه بقة :D

    ههههههههههههه

    دمت سالم

    سلامٌ عليك

    ReplyDelete
  17. الف مبروووووووووك
    بارك الله لكما و بارك عليكما و جمع بينكما في خير
    و ان شاء الله ربنا يجعل حياتكو الزوجية أسعد بكتيييير من حياة العزوبية اللى بتتكلم عنها
    و ربنا يتمم بخير ان شاء الله
    تحياتي

    ReplyDelete
  18. ألف ألف ألف مبروك ياأحمد و ربنا يسعدكم سوا و زواج مبارك انشاء الله

    ReplyDelete
  19. النهارده فرحه يا جدعااااااااان
    لولولولولولييييييييي
    الف مبروك يا معلم
    ان شاء الله جوازه تفوت ولا حد يموت
    مستنيينك من قلب الاحداث تحكيلنا عن يوميات عريس لاول مره
    :)

    ReplyDelete
  20. الف مبرووووووووك

    فرح سعيد ياررررررب

    ربنا يباركلكم ويباركلك فيها ويباركلها فيك

    ويرزقكم باحلى صبيان واحلى بنات

    وتبقى حياتكم كلها سعاده وعباده يارب

    ياترى بتعملوا ايه دلوقت

    الساعه 7 اكيد مستنيها ف الكوافير بقى

    تمنياتى ليكم باحلى زفاف يارب

    ReplyDelete
  21. مبرووووك يا باشا وربنا معاك
    تحياتي

    ReplyDelete
  22. الف مبروك ربنا يسعدكم

    ReplyDelete
  23. الف مبروك يا دكتور احمد
    انتم السابقون ونحن ان شاء الله بكم لاحقون
    :D

    ReplyDelete
  24. ده يوم الثورة يا جميل


    عقبال جوزانا يارب احنا كمان قريب بقى


    تحياتي وألف مبروك ياجميل

    ReplyDelete
  25. Happy Anniversary :)
    So how is your married life... Like you expected??? I don't think it's that bad :)

    ReplyDelete
  26. الف الف مبروك يا ابو سمره
    هتتجوز يوم الثورة...ابسط ياعم يعني اجازة كل عيد جواز,,يعني خروج ة واحتفال وهدية ومش عارف ايه
    اهو دا عيبة وحدش بيحسبها صح

    الف الف مبروك ..ربنا يباركلك ان شاء الله
    انت اللي جبته لنفسك
    كده زادوا واحد

    محمد سمير

    ReplyDelete
  27. يا نهار ابيض دة انا فاتنى كتير قوى
    تقريبا جايه فى الاربعين
    :)
    الف مليون مبروك يا احمد

    ReplyDelete
  28. لولولولولولولولولىىىىىىىىىىىىىى

    الف الف الف مبروك يا احمد وعقبال متجبولنا كده نونو صغنون وتعمله مدونه جمب مدونه بابا كده بالظبط
    :)))))))))

    بجد يا احمد فرحتنا او وربنا يتمملك بخير انشاءالله
    والف مبروك ولولولولولولووللىىىىىىىى
    :))))))))))

    ReplyDelete
  29. ياترى الجواز حلو ولا ايه

    ارجع بقى ياسمير وقولنا

    انت بقالك اسبوع مأجز

    هههههههههههههه

    يارب دايما ف سعاده

    وتحياتنا للمدام

    ReplyDelete
  30. يااااااااه
    ده انا جيت متأخر قوى
    الف مبروك يا احمد و عقبال البكارى ان شاء الله

    هى العزوبية حلوة اه و كل حاجة
    بس خلاص بقى الله يرحم ايامها :D

    ReplyDelete
  31. enjy:
    الله يبارك فيكي يا انجي
    هو فعلا ثورة بس يارب ما يكونش مصيرها زي مصير انقلاب يوليو اللي بدل ما يصلح مصر افسدها
    تحياتي

    ReplyDelete
  32. two in one:
    دة ان دل على شيء انما يدل ان وشك حلو
    اللهم امين
    تحياتي

    ReplyDelete
  33. فاتيما:
    خلاااااص
    لا مناص
    وسبق السيف العزل
    ان شاء الله يكون حظي افضل
    وان كان برضة يوسف ابنك دة مكافأة الهية وان دل على شيء انما يدل ان كل تجربة حتى لو كانت سلبية بيبقى فيها نقطة مضيئة
    ربنا يبارك لك فيها
    تحياتي

    ReplyDelete
  34. بطوط حبوب:
    عقبالك يا ريس
    تحياتي

    ReplyDelete
  35. bos bos:
    مكالمتك ليا اثلجت صدري جدا
    وزيارتك بجد كانت ايه من ايات الاخوة والصداقة الحقيقية
    عقبالك يارب
    تحياتي واحتراماتي

    ReplyDelete
  36. عصفور المدينة:
    الله يبارك فيك يا باشمهندس
    ومش هاقول عقبالك علشان المدام ماتحطنيش بلاك ليست
    تحياتي

    ReplyDelete
  37. موجة:
    ومعشر العزاب هيوحشوني برضة والله يابو حميد
    بس ان شاء الله الجواز عمره ما هياخدني من التدوين بدليل اني بارد عليك دلوقتي
    وانتظر مواضيعي القادمة ان شاء الله
    تحياتي واحتراماتي

    ReplyDelete
  38. خمسة فضفضة:
    الله يخليكي يا دكتورة
    الف الف شكر ليكي
    ويارب اكون من الطائفة التانية ان شاء الله
    تحياتي

    ReplyDelete
  39. بثينة:
    الف الف شكر ليكي يا بثينة
    وان شاء الله ربنا يديم السعادة
    تحياتي

    ReplyDelete
  40. محمد مفيد:
    الله يخليك يا بو حميد
    انا الاسعد بمعرفتك طبعا
    شخصية محترمة وجديرة بالاحترام
    تحياتي واحتراماتي

    ReplyDelete
  41. مصري:
    الله يبارك فيك يا اسامة
    الف الف شكر
    تحياااتي

    ReplyDelete
  42. شمس الدين:
    هي فعلا حمى
    بس اكيد حمى لذيذة
    فعلا الصيف دة نسبة المتزوجين في ازدياد مستمر
    ربنا يزيد ويبارك
    تحياتي

    ReplyDelete
  43. rehab mustafa:
    انا عجبني التاريخ دة قوي
    اكيد كل سنة ان شاء الله عيد زواجي هيكون اجازة رسمي
    تحياااتي

    ReplyDelete
  44. ma_3alina:
    الله يبارك فيك
    اللهم امين
    تحيااااتي

    ReplyDelete
  45. محمد عبد الغفار:
    خلااااااااااص
    ماعدش ينفع
    بس بيني وبينك
    جنزن لذيذ
    تحياتي

    ReplyDelete
  46. حبيبتي:
    لا تعليق
    علشان انا بتكسف

    ReplyDelete
  47. نعكشة:
    الف الف شكر
    وبعدين لا متأخرة ولا حاجة
    لنتظروا مدون صغنون كدة ان شاء الله
    تحياااااتي

    ReplyDelete
  48. الحلم العربي:
    الف الف شكر
    اللهم امين يارب العالمين
    تحيااااتي

    ReplyDelete
  49. اجندا حمرا:
    الله يبارك فيك
    الف الف شكر
    تحياااتي

    ReplyDelete
  50. وينكي:
    شكلك كدة هتنتظري كتير
    لان يوميات عريس دي محتاجة مجلدات مش مجرد تدوينة
    تحياااتي

    ReplyDelete
  51. د/اجدع بنوتة:
    فعلاااااااااااااااااا
    في هذا التوقيت كان طالع عيني قدام الكوافير في انتظارها
    بس الحمد لله
    ما وقفتش كتير
    الف شكر على التهنئة
    تحياااتي

    ReplyDelete
  52. micheal:
    عقبالك يا مايكل
    ولو ام ربنا معاك بتحسسني بامتحانات الثانوية العامة
    بس ماشي
    ربنا يستر
    تحياااتي

    ReplyDelete
  53. طهقانة:
    الف الف شكر ليكي
    تحياتي

    ReplyDelete
  54. الام وامال:
    كاس وداير ع الجميــــــــــــــــع
    ايــــــــه دنيااااااااااا
    تحياتتي

    ReplyDelete
  55. alzaher:
    الله يبارك فيك
    الف شكر

    ReplyDelete
  56. صاحب المضيفة:
    ان شاء الله تحصلونا قريبا ان شاء الله
    هي فعلا ثورة على العزوبية
    تحيااااتي

    ReplyDelete
  57. mina micheal:
    thank u for ur greeting
    marriage till now is a strange life
    i changed my life completly
    this new life is like any new lives
    many possitives some negatives
    but everything can be adapted
    thanks alot

    ReplyDelete
  58. غمض عينيك:
    المصية يا محمد انك تسألني تكره ايه في حياتك؟
    اقول لك
    انقلاب 23 يوليو دة
    بس تقول ايه
    النصيب بقى
    بس فعلا اهم حاجة ان عيد جوازي هو اجازة سنوية تعطل فيها المصالح والهيئات
    تحياتي

    ReplyDelete
  59. rania:
    كدة يا رانيا؟
    تيجي تباركي في الاخر كدة؟
    دة انا كنت مستنيكي في الحنة؟
    يالله معلش
    نردها لك في الافراح ان شاء الله
    تحياتي

    ReplyDelete
  60. shaymaa:
    الله يبارك فيكي يا شيماء
    على فكرة
    الزغرودة وصلت وانا اللي كنت عمال اسأل مين اللي بتزغرد دي اتاريها انتي
    تحياااتي

    ReplyDelete
  61. د/اجدع بنوتة:
    انا رجعت اهه
    زبعدين انتي مش ملاحظة ان النت نور بوجودي ولا ايه؟
    بالنسبة لموضوع حلو ولا وحش
    فمش هاقول علشان الحسد....انتي عارفة الحاجات دي بتتنظر
    تحياتي واحتراماتي

    ReplyDelete
  62. جيداء:
    ياااااااااااااااااااااااااااااااااااه
    يا جيداء
    انتي كنتي فين؟
    دة عيد جوازي قرب
    عموما الف الف شكر ع التهنئة وعقبالك ان شاء الله
    تحياتي

    ReplyDelete
  63. لولولولولولييييييي
    مبروك يا دكترة
    بس انا برضه بشجع العزوبيه ياعم حد يدخل القفص برجليه
    ربنا يديم عليك السعادة يارب ويبارك لك في زوجتك وتكون قرة عين لك

    ReplyDelete
  64. لماضة:
    الله يبارك فيكي يا دكتورة....عقبالك كدة ان شاء الله
    العزوبية جميلة جدا بصراحة...بس اكيد الجواز احلى...ربنا يوفقك ان شاء الله
    تحيااااتي

    ReplyDelete
  65. الف مبروك متأخره شويه
    بس العيب مش في الجواز خااااااااااااالص
    الجواز دي نعمه بس البشر هما اللي بيبوظوها و بيتمردوا و ما بيحمدوش ربنا
    فالنعمه بتزول من وشهم و بتتحول حياتهم جحيم فيرجعوا يقولوا الجواز ده اختراع فاشل و شئ مش كويس

    ReplyDelete
  66. koukawy:
    الجواز دة نصيب زيه زي اي حاجة في الحياة
    معرضة للنجاح ومعرضة للفشل
    بتخضع لاحتمالات التوفيق وعدم التوفيق
    وما البشر الا اسباب وعوامل لهذا التوفيق او عدمه
    الله يبارك فيكي
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails