Monday, 7 July 2008

الفنانة الراقصة



هل تعتبر الرقص الشرقي فنا؟
على فكرة السؤال دة مش استنكاري كما يبدو للوهلة الأولى...هو سؤال استفهامي في المقام الأول
انا فعلا اتساءل....ممكن حد يكون بيعتبر الرقص الشرقي فنا؟
انا عن نفسي بألاقي صعوبة شديدة في تصنيف الفعل دة (اللي هو الهز والرقص) على انه فن
مش ممكن يكون فتاة او سيدة عارية تماما تقريبا بتتمايل وتهتز قدامك يتقال عليها فنانة
انا اعرف ان مصطلح فنان او فنانة بيقال لكل من ابدع او ابتكر اي نوع من الفنون اللي هي اصلا غذاء للروح
لو طبقنا معنى كلمة فن على الرقص الشرقي هتلاقي انها مش ماشية خالص مع هذا العبث
فهز الوسط والارداف ليس ابداعا على الاطلاق و مشاهدة جسد عاري يتمايل امامك لا اعتقد انه ممكن يكون غذاءا للروح...هو بالتأكيد غذاء للشهوة...انما للروح...صعب جدا
لما الرقص الشرقي يبقى فن....طيب الأوبرا مثلا-وبالمناسبة انا لست من عشاقها-تبقى ايه؟
وبعدين نفسي اعرف من زمان ليه الراقصة لازم ترقص شبه عارية؟ ايه الحكمة في كدة؟
هو الرقص هيبقى فن لو كان من غير هدوم ومش هيبقى كذلك لو كانت الراقصة لابسة هدومها؟
حقيقة....انا بأستفز (بضم الألف وفتح الفاء) ممن يعتبر الرقص الشرقي فنا والراقصة الشرقية فنانة...دة سب علني للفنانين والمبدعين
يعني معقول يبقى بيكاسو فنان ونجيب الريحاني فنان وتبقى دينا هي كمان فنانة زيهم
بمنطق الأخوة محبي الرقص الشرقي....ليوناردو دافينشي زي فيفي عبده كلاهما فنانا ومبدعا في مجاله
بقى دة كلام ناس عاقلين؟
عموما...الرقص الشرقي مطلوب برضة بس في فرح...في قعدة مزاج...في قعدة بنات مع بعضهم بيروشوا....انما فكرة ان يتم تصنيفه كفن وان يتم تصنيف نجماته كفنانات ومبدعات.....حرام بجد
مع كامل اعتذاري لنجمات الرقص الشرقي في مصر واللي اكيد مش من زائري مدونتي

35 comments:

  1. شيكابالا7 July 2008 at 01:38

    رغم انة مش محتاج لسؤال بس فن طبعا الرقص الشرقى ابو الفنونكمااااااااااااااااان و عشان كدة الشعب المصرى كلة فنانين انما اية البوست المشخلع دة يا دكتور؟ واية اخبار غض البصر؟تمنياتى بالتوفيق

    ReplyDelete
  2. السلام عليكم

    معلش
    ما هو البلد اللي يبقي عز فيها عضو مجلس شعب و دكتور الاطفال وزير تعليم سابق ... يعني متشغلش بالك اوي لما يتقاعل علي الراقصات فنانات ...

    هي دي مصر فعلا
    كل المفاهيم فيهما مغلوطة و مفروضة للي صوته اعلي
    خالص التحية

    ReplyDelete
  3. هوه فن طبعاً يعني فيه تحكم غريب في العضلات علي رأي عادل إمام في فيلم واحدة بواحدة ( الفنكوش)

    هوه أكيد زمان كانو بيلبسو كدة فقط للإغراء ايام الدولة القديمة اللي معرفش القص راجع لعهد انهي دولة
    المهم

    يمكن الرقاصات عايزين يقلدوهم لوا واتفر

    انما اعتقد ان الرقص ممممممم لو هيا لابسة محتشم يعني
    مش أي حد يعرف يرقص
    يعني مش أي هز والسلام

    بص
    هوه الرقص بتاع فرقة رضا وا لحاجات دية
    و البالية ( طبعاً البالية مختلف تماما)
    بس معظم الحاجات دية معتمدة علي ليونة العضلات

    ماشي الرقص واخد مجال ان الراقصة تلبس مش محترم
    زي ما الست بتاعت البالية بتلبس كلون و فستان قصير عشان يبان حركاتها المختلفة

    الفرق بين البالية ( وا كيد حضرتك معتبرة فن) و الرقص الشرقي
    ان البالية موسيقي كلاسيك لبيتهوفن او موتسارت
    و الرقص الشرقي اغنية ل احمد عدوية او حسن لااسمر

    اكيد موسيقي موتسارت افضل بس دول برضو بيرفهو عن النفس

    الاسلوب اللي الرقص الشرقي متخذو في الفترة الحالية او زمان فاشل و مثير للشهوات و بشع

    بس انا عند رايي مش أي حد يعرف يرقص
    ومش اي حد يعرف يرقص بالية


    أنا لا اعتبره فناً ولا اعتبره اي حاجة
    بس هوه واخد منحدر مش لطيف

    اني وايز

    دمت سالماً

    سلامٌ عليك

    ReplyDelete
  4. ارجو ألا يعتبر كلامي اني معتبرة الرقصات فنانات ( من اللي بيعملوة)

    بس الرقص ذات نفسه فن
    مش كل فن حلال يعني يتعمل علناً

    بس كما قلت مش أي حد يرقص
    ومادام دية حاجة بيبدع فيها ناس وناس لأ
    ممكن نقول انه فن

    ممكن تعتبرة مهارة
    او رياضة
    زي الكاراتية و الحاجات دية

    يلا عامتاً خير

    دمت سالم

    سلامٌ عليك

    ReplyDelete
  5. اهو كله رياضة
    تعرف انه بيخسس
    وممكن يتخن كمان

    بس رياضة مايصة شوية
    فيه رجالة رايها ان الرقص البلدي عامل ذي ماتكون بترقص قرد بس قرد لامؤاخذة مش متربي حبتين

    ReplyDelete
  6. وايه الفن في كده؟!!

    ده اللي يجنن كمان ان في راقصين رقص شرقي
    طبعاً دي جريمة كبيرة

    وان كنت اعتبرهم ليسوا برجال أساساً

    تحياتي
    أسامة

    ReplyDelete
  7. اكيد مش فن واكيد انه مش بيغذى حاجة خالص بالعكس ده نقص آدمية
    وان كان سبب البوست من الاول المؤتمر اللى اتعمل للرقص الشرقى هنا فى مصر باشراف من دينا فتقدر تقول كده ان المصريين من فرحتهم بامتحانات الثانوى ومسمايير رغيف العيش واسعار الحديد قاموا يرقصوا الشاطر يميز ان كان رقص ولا ايقاع حركى

    ReplyDelete
  8. اكيد الرقص الشرقي مش فن
    واعلامنا الواهم هو اللي بيحاول يصور للعام انه هو كمان عنده رقص
    فكرة الرقص نفسها
    فن راقي في جد ذاته
    لكن هز الوسط بهدف الاغراء مش فن
    هتفهم وجهة نظري لو دخلت قريت اخر تحديث عندي
    انا قصدي يعني ان الرقص ... فن
    لكن الرقص الشرقي ... مش فن علي الاطلاق
    مش لانه شرقي
    لأ
    لانه بيعتمد علي الاغراء مش التعبير
    تحياتي

    ReplyDelete
  9. امال تعمل ايه بئه لو عرفت انهم افتتحوا مدرسه لتعليم الرقص الشرقي

    لوللللللي

    يعني الواحد مننا يودي بنته تتعلملها شغلانه تكسب منها لقمه عيش وتاكل من عرق احمممم جبينها

    وترجع البنت من المدرسه امها تسالها
    " الهوم ورك " ايه يا حبيبتي

    وطول الليل امها بئه تذاكرلها ويدحوا سوا

    وهتبقى بلد ايه تمااااااااااااام

    ReplyDelete
  10. انا مش شايفه الصراحة فن خالص على الاطلاق بتاتا

    فن يعني ممكن اي حد يمارسه عادي اختى ممكن تمارسه عادي ما هو فن

    لكن انا مش متخيل واحد يرضي بكدا ويعتبره حاجة عادية
    ليييييييييييييييه إن شاء الله

    قال فن قال

    فن من بقك يا دوك
    تشي

    ReplyDelete
  11. ياااااااااااااااحمد

    انت لسه عايش بقه كدا متسالش عليا

    تاني مرة ازعل منك

    للك واحشه جامده والله

    وجامد البوست قصدي مشخلع اوي

    سلاموووووووووز
    وزة

    ReplyDelete
  12. هههههههههههههه
    احنا بلد جميله لازم تعتبر الرقص الشرقي فن مش دينا عملت دكتوراه
    يعني اللقب الادبي اتلزق على فن الرقص
    والله ان جيت للحق الواحد بكرة مش عارف حيقابل أيه ولا يشوف إيه

    ReplyDelete
  13. طبعا طبعا طبعا
    الرقص فن... و فن خليع كماااان

    ReplyDelete
  14. أدعوك الى تأبين الدكتور المسيري
    فقيد مصر والأمة
    يوم الخميس القادم ان شاء الله
    بنقابة الصحفيين المصريين
    الساعة السابعة مساءا

    ReplyDelete
  15. شيكابالا:
    غض البصر......؟؟؟
    دة كان زماااااااااااااااان
    دلوقتي من اللي بنشوفه في الشارع الواحد لو عايز ومصمم يغض بصره يبقى هيمشي مغمض وهيحتاج حد يسحبه
    ربنا يستر
    تحياااتي

    ReplyDelete
  16. شمس الدين:
    معاك حق والله
    مش بعيد ييجي الوقت اللي نلاقي فيه الراقصة بقت وزيرة
    تحيااااتي

    ReplyDelete
  17. تعالى نتكلم بشكل موضوعى ومن غير عصبية
    اولا انا لست من هواة مشاهدة الرقص الشرقى، وطبعا ما أراضاش على اختى ولا بنتى ولا امى ولا اى واحدة تربطنى بيها صلة دم او صداقة ومعرفة انها تكون كدة
    بس كل اللى فات مش مبرر انى اقول على الرقص انه مش فن ، او انه عالم خالى من الأبتكار او الأبداع
    انت سوقت فى البوست مثالين للراقصات هما دينا وفيفى عبدة ،دول لما تحب تقارنهم بحد فى مجال فنى تانى اختار الأقل والأردئ لأن دول مجرد مثيرات للغرائز ، لكن - ومع احترامى التام لرأيك - سامية جمال وتحية كاريوكا ونجوى فؤاد فنانات ، مش زي دافنشي ولا موتسارت لكنهم فنانات ومبدعات وياما أسعدوا الناس وقدموا جديد
    الحكاية مش هز وسط والسلام
    دا فن حرام شرعا ....بس فن

    ReplyDelete
  18. انا عن نفسى بصراحة مش بعتبره فن خالص
    و مش عارفة ايه مصدره و ايه الى دخله فى الفنون اصلا

    ممكن يوكن رقص زى الباليه او فرقة رضا فن لكن رقص الراقصات الشرقيات ده لا، ده حتى دليل على استعباد المرىة و أظهارها فى صورة سلعة

    ReplyDelete
  19. نعكشة:
    بصرف النظر عن العري ودي نقطة مهمة جدااااا
    هز الوسط برضة غريب جدا انه يكون فن
    اه طبعا الباليه فن...وعمره ما هيكون مصدر للاغراء
    انما الرقص الشرقي معتمد اعتماد كلي وجزئي على هز الوسط والصدر والارداف
    الف شكر على تعليقك القيم
    تحيااااتي

    ReplyDelete
  20. المفقوعة مرارتها:
    المصيبة ان في الرقص الشرقي لازم القرد يبقى لابس اما محزق واما من غير هدوم
    اعتقد ان التشبيه بالقرد فيه اهانة للقرود
    حراااام عليكي
    تحياتي واحتراماتي

    ReplyDelete
  21. مصري:
    اه شفت منهم ع النت
    ومش عارف ليه متبنيين منهج المياصة والشخلعة
    انا اللي هيجنني بجد ليه اي حد بيرقص شرقي تلاقيه بيتمايص ومش مضبوووط
    رجالة وستات
    حاجة محيرة فعلا
    تحياااتي

    ReplyDelete
  22. عزيزى الاخ الدكتور احمد

    بص يا احمد

    انت بتكلم عن انهى رقص فى الاول؟

    رقص تحية كاريوكا وزينات علوى وسامية جمال؟؟

    ولا رقص دينا ولوسى والبقية الباقية؟
    لو بتكلم عن الاولانين فهو ايوة كان فن
    ومكنش اى حد يعرف يرقص زيهم

    خلى بالك بقى احنا دلوقتى مش بنتكلم فى صح وغلط وعيب وحرام وحلال


    احنا بنتكلم من حيث التعريفات الموجودة دلوقتى

    يعنى كاننا اتنين غيرنا مش عارفين ان الموضوع من اوله لاخره غلط وحرام
    فهمتنى؟

    يعنى كاننا بنتكلم بدون ايماننا

    ماشى

    الراقصات اللى فى الاول دول
    لو انت او اى بنت اتفرجت على وصلة رقص ليهم

    عمرها ما هتحس انها مشمئزة من الايحاءات اللى مش ولا بد
    والاغرءات والكلام ده

    لما كانوا بيرقصوا
    كانوا بيعتبروا الموضوع زيه زى الباليه

    حاجة محدش يعرفها غيرهم

    مافيش غير الست المصرية اللى تعرف ترقص الرقصى البلدى بتاعنا

    فا ده بالنسبلهم كان فن واتقان كيفية السيطرة على العضلات بطريقة معينة عشان تبان كرقص شرقى كان الموسيقى اتلحنت عليه .

    ده الشق الاول

    الشق التانى بالنسبة للمجموعة التانية من الراقصات
    فعذرا دول الفن برئ منهم
    ما تفعله دينا ولوسى وغيرهم ليس رقصا
    انما هو تعبيرات واسفة فى اللفظ جنسية

    ماما كانت دايما تقولى لما نبقى بالصدفة شفنا مقطع لرقص الناس دول

    تقولى ايه القرف ده

    ازاى دول فاكرين نفسهم زى سامية جمال ورقصها

    انا جايز مكنش قادرة اوصلك الفكرة

    لكن زمان كان الرقص الشرقى ده فن

    ولغاية انهاردة الاجانب هيتجننوا ويعرفوا يرقصوا زى المصريين

    لكن اللى بيحصل دلوقتى ده اسمه قلة ادب


    اعذرنى للاطالة

    بس موضوعك فكرته كويسة وعجبنى

    ومتنساش

    كمسلمين
    كل ده كلام فاضى ولا فن ولا نيلة
    سواء هو ولا البالية اللى بيفرض على الراقصين ملابس شبه مدهونة عليهم
    او حتى رقص فرقة رضا


    دمت فى حفظ الله
    سلام

    ReplyDelete
  23. كلام وخلاص:
    لا..هو بيغذي..بس بيغذي الشهوة ويؤجج الكبت و الاحتقان الجنسي لدى الشباب المصري
    بس برضة اصحاب المهرجان دول يشكروا بصراحة
    بيرفهوا عن الشعب التعبان
    تحياااتي

    ReplyDelete
  24. zika:
    اكيد طبعا بعض انواع الرقص فنون...زي رقص الباليه والرقص الايقاعي المحترم
    انما رقص هز الوسط والبدل اياها مش ممكن يكون فن بأي حال من الاحوال
    تحياااااتي

    ReplyDelete
  25. كلبوشستان:
    ماهي دي الموضة
    الواد ع النادي علشان يطلع ابراهيم سعيد والبنت ع الكباريه علشان تطلع دينا
    الاولاد بقوا ثروى دلوقتي يا سيدي الفاضل لابد من استثمارها
    تحياااااتي

    ReplyDelete
  26. على فكرة فنان فى المعجم يعنى حمار وحشى وعلى ذلك كل الرقاصات فنانات لكن المبدع اسمه فى اللغة العربية مفن يبقى خلاص اتحددت وما تزعلش لما حد يقول فلانة فنانة لانها فعلا فنانة وللا ايييييييييييييييييييييييييه؟؟؟؟

    ReplyDelete
  27. che the hermit:
    اي نعم هي الفنون جنووون...بس حتى الجنون حرام نشتمه ونسمي دة فن
    تحياااتي

    ReplyDelete
  28. انين الحزن:
    ماهو انتي يا وزة بتظهري يوم وتختفي شهر
    بقينا عارفين لك خلاص...ماعدناش بنقلق عليكي
    الف مبروك يا ستي
    واوعدك اكتر من البوستات المشخلعة دي بمناسبة الافراح
    تحيااااتي

    ReplyDelete
  29. واحدة مفروسة:
    ماهي دي ميزة انك تعيشي في بلد زي مصر
    كل حاجة متوقعة وكل شيء جايز
    بلد بتديكي مناعة ضد المفاجأت
    ربنا يكفيكي شر المفاجأت
    تحياااتي

    ReplyDelete
  30. فرنسا والرايق:
    هو فعلا فن اثارة الغرائز
    تحياااتي

    ReplyDelete
  31. alzaher:
    الله يرحمه ويحسن اليه ويغفر له

    ReplyDelete
  32. محمد عبد القوي:
    انت بتقول يا محمد ان سامية جمال وكاريوكا وغيرهن ممكن يقال عليهن فنانات وانهن يختلفن عن دينا ولوسي...الخ
    انا في رأيي انك بتقول كدة لأن الناس دي قديمة...ابيض واسود يعني....ماكانش لسه الفجر وصل للدرجة دي..ماكانش الانحطاط الخلقي بقى شائع بالشكل دة
    بس اعتقد انهن ايامهن كانوا برضة بيمثلوا الفساد والفجر
    تحياااتي

    ReplyDelete
  33. عاليا حليم:
    طيب ليه التيار اللي بيتبنى اطلاق اسم الفنانات على الراقصات دول بيزيد ويعلى؟
    على الرغم من احتقارهم من قبل معظم ابناء الشعب دة؟
    غريبة جداااا
    تحياااااااااااااااتي

    ReplyDelete
  34. aya:
    بصي يا اية....انا لا افرق بين تحية كاريوكا وبين دينا..بين فيفي عبده..وبين زينات علوي
    كلهن راقصااات...بس الفرق ان في منهم القديم ومنهم الجديد
    في منهن اللي كانت بترقص ب 3 تعريفة وفي اللي بترقص ب 300 الف جنيه
    انا سعيد جدا بتعليقك واتمنى ان تشرفيني دائمااا
    تحياتي

    ReplyDelete
  35. enjy:
    منكم نستفيد يا انجي
    شاطرة والله
    تحيااااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails