Sunday, 29 June 2008

جيل حافظ مش فاهم


من الاخر كدة وعلى بلاطة
انا مش متعاطف مع العيال بتوع الثانوية العامة
لا ومش كدة وبس...دة انا متأكد ان الحملة الصحفية دي وراها اهداف شخصية لا تخفى على احد وان كانت خافية احب اكشفها
الاستاذ مجدي الجلاد رئيس تحرير المصري اليوم متبنية الحملة القومية للتعاطف مع طلاب الثانوية الغلابة ابنه طالب في الثانوية العامة
ودة سبب الاحساس ان المصري اليوم من بداية الامتحانات وهي الصدر الحنين للطلبة المقهورين.........ما علينا
انا مش مصدق ولا اعترف بحاجة اسمها امتحان صعب....مش من المنهج
مفيش حاجة اسمها امتحان صعب...صعب يعني ايه؟
انا اعرف واصدق حاجة اسمها امتحان طويل ويحتاج زمن اطول للأجابة انما امتحان صعب...دة صعب
ودة مش علشان انا عبقري لا سمح الله ولا حاجة..انا ياما مرت عليا امتحانات توهمت برضة انها صعبة زيي زي الطلبة دول
كل ما هنالك ان طلبة الثانوية العامة موديل 2008 بيشربوا العلم بالمعلقة..والمدرسين الخصوصيين بتوعهم بيتفننوا في تلخيص المناهج لأقل قدر ممكن من الورق وتبسيط المنهج في اسئلة واجاباتها علشان العيال ترتاح وما ترهقش نفسها في المذاكرة وقرفها ويوفروا مجهودهم للعب الكرة والبلاي ستيشين
المدرسين عملوا اللي عليهم ولخصوا على قد ما يقدروا.....والعيال عملت اللي عليها وعصروا على نفسهم ليمونة وذاكروا الملخصات الغلسة دي
انما واضع الامتحان قليل الذوق قرر انه يضع امتحان فيه شوية تفكير..حقه ولا مش حقه؟
بس للأسف المذكرات والملخصات لا تعترف بالتفكير والدروس الخصوصية موديل 2008 شعارها احفظ...صم....انت لسة هتتعب نفسك وتفكر؟
وهنا كان الصدام بين طلبة ذاكروا بأسلوب معين من الحفظ والصم والتلقين وعدم اعمال العقل وبين واضع امتحان قرر يختبر قدرة الطلبة على فهم المعلومة وليس حفظها
مش ذنب واضع الامتحان انه قرر يختبر قدرة الطالب على الفهم لأن دة واجبه بس المصالح الخاصة قررت ان تجعل منه رجلا لا يصلح لوضع الامتحان بل لابد ان يوضع بمستشفى الامراض العقلية!!!!!!!!!
مأساة الاجيال الجديدة من طلبة الثانوية العامة انها اجيال حافظة مش فاهمة...وبالتالي اي امتحان لابد ان يكون صعبا عليهم
الامتحان الوحيد اللي هيقولوا عليه انه سهل هو
اكتب ما تعرفه وما تحفظه من المنهج الدراسي
انا لا اقسو على الطلبة بس دة رأيي....الطلبة اتعودوا على الدلع وعلى الامتحان الجاهز وعلى الاسئلة المباشرة ودي موضة بطلت من العالم كله والطريقة دي لا تصنع حضارة بل تهدم بلد بأكملها
انما التعاطف المبالغ فيه دة من قبل وسائل الاعلام سواء دة كان لأسباب خاصة او لا..هو تعاطف مدمر للأجيال دي وبدلا ما نقعد نلعن الامتحان واللي وضع الامتحان..لازم نلعن اللي وضع المنهج دة والاسلوب دة في التعليم..لازم نلعن اللي اشاع الفوضى والاستسهال في النظام التعليمي المصري...لازم ننسف نظامنا التعليمي الفاشل دة ونبدأ على نظافة نتعلم صح زي كل مخاليق ربنا اللي بيعيشوا في بلاد محترمة تحترم العلم والتعليم

55 comments:

  1. انا قريت بوستات كتير عند اكتر من مدون

    وصراحه انتو بتتكلموة بمنطق اللي ايدة في الميه

    انا عندي بنتي في ثانويه عامه

    ومش مدلعه بالعكس

    وبنذاكر من كتاب المدرسه

    مش الملازم وكانت السنه اللي فاتت علمي وبتذاكر 12 ساعه في اليوم

    كان مدرس الكيمياء بيخليها تشرح

    المسائل لزملائها

    لان طريقتها زي ما كان دايما بيكتبلها عبقريه

    والنتيجه ايه علشان بتستخدم دماغها

    وتحل بطريقتها بعد ما تفهم

    ادوها درجه النجاح
    علشان اجابتاها غير مطابقه لنموذج التصحيح

    مش هما اللي جيل حافظ اسلوب التعليم في مصر هو اللي بيعمل فيهم دة

    وبعدين لما واضع الاسئله يجيب سؤال في الاحصاء من رابعه كليه الهندسه اجابته تاخد نص الوقت

    يبقي دة اسمه ايه

    احنا مش عاوزينهم جيل حافظ بس

    لما يفهموة ويجوبوة

    باسلوبهم وتتحسب الاجابه غلظ

    يبقي الحل ايه

    مشكلتي مع بنتي انها مبتعرفش تحفظ

    وجميع مدرسيها يقولون عنها عبقريه

    وفي الاخر تحول ادبي ويجيلها احباط طول السنه علشان بتفهم مش بتحفظ يبقي الحل ايه

    بلاش تظلموة الطلبه

    التعليم عندنا بيدمر اي موهبه


    اسفه طولت عليك

    بس بجد في طلبه مظلومه كتير

    ReplyDelete
  2. أحمد السلام عليكم
    أنا فعلا معك في موضوع الملخصات والحفظ ولكن أعتقد أن الذي وضع الاختبارات وخلفه من خلفه يخطط لشيء ما علمه من علمه وخفي على من خفي عليهم
    شيء أشبه ما يكون بحرائق القطارات حتى يقول القائل أرجوكم خصخصوا السكك الحديدية وريحونا

    إذا كان هؤلاء الناصحون يريدون أن يختبروا قدرات الطلبة على الحفظ فلماذا عنصر المفاجأة هل الاختبار المقصود منه الاختبار أم التعنت

    هل المقصود من لجان المرور أن ينضبط الناس لقواعد المرور أم جني أكبر عدد من المخالفات
    هل المقصود من مخالفة الحزام أن يربط الناس الأحزمة ويحافظوا على حياتهم أو تسجيل أكبر عدد من المخالفات وجني الأرباح

    دائما أضرب مثالا طريفا لذلك:

    أمر الله عز وجل رسوله أن يخير نساءه بين زينة الحياة الدنيا وبين الدار الآخرة
    فخير عائشة أول من خير فاختارت الرسول صلى الله عليه وسلم ثم طلبت منه ألا يخبر أحدا من النساء بما اختارته تريد أن يكون الاختبار حقيقيا لهن فرفض النبي صلى الله عليه وسلم وقال إن الله لم يبعثني معنتا ولا متعنتا ولكن بعثني

    معلما وميسرا

    ReplyDelete
  3. يا احمد التعليم بقى وحش فعلا فى مصر
    بيدوا حاجات و بيحطوا حاجات تانية خالص
    فى ناس بتذاكر كويس و فى غيرهم مش مهتمين
    بس انا بردة موافقاك فى نقطة ان مفيش حاجاة اسمها الامتحان صعب
    بس فى السهل الممتنع و فى فعلا اسئله تتطلب وقت اكتر
    ربنا معاهم كلهم

    تحياتى

    ReplyDelete
  4. و الله كلام موزون و عاقل عمالين يسهلولهم كل حاجة لحد ما يمكن العيال متخيلة انهم ممكن يمتحنوا في السرير و لو راحوا يمتحنوا في اللجنة يبقوا مضطهدين

    ReplyDelete
  5. شيكابالا30 June 2008 at 03:34

    كل وقت ولية ادان زى ما بيقولوعلى ايامنا كانت الجرايد بتكتب وتتفنن ف ان الامتحان فوق المستوى ويحتاجلطالب صاحب قدرة خاصة على الاجابة والطلبة منهارين واهاليهم مذهولين كنت بضحك لما اقرا الكلام دة وانا عارفة ان الامتحان كان سهل بل تافة مش بالنسبة ليالوحدى ولكن زملا كتير جدا معايا وكنا نقول دة كلام جرايد اهو كلام الجرايددة كبر وبقى فرصة للرغى وتقديم الفقرات ف الفضائياتواللى يلاقى دلع وميدلعش شوف انت بقى ولاعزاء للمتفوقين

    ReplyDelete
  6. موافق جدا مع إضافة إن دا مش حال اللي ف ثانوية عامة بس .. دا حال كل الطلبة ف مصر

    تحياتي

    ReplyDelete
  7. عارف يا ابو حميد المشكله الاكبر في ايه
    في عقلية الطلبه نفسهم

    من فتره كده قبل امتحانات الثانويه العامه .. رحت انا وكام واحد من صحابي كافيه .. لقينا تسعين في الميه من اللي هناك طلبة ثانويه عامه وكاتين من الدروس او مابين درسين

    مش عارف هتفهم وجهة نظري ولا لأ
    احنا كنا اخر جيل محترم
    وصدقني كنا اخر جيل بجد

    ربنا يستر على الاجيال الجايه
    هيروحو بيهم فيييييييييين



    سلامووووووووووز

    ReplyDelete
  8. موضوع رائع ووجهة نظر جيدة

    لكن
    اسمح لي أختلف معك في بعض النقاط

    من وضع الامتحان يدري دراية كاملة ان الطلبة يحفظون.
    فلماذا مثلا يأتي بإمتحان عادي جداً ويضع سؤال أو اثنين للطلبة اللي بيقهموا...مثلاً يعني

    أنا درست التفاضل والتكامل في كليتي
    وفي سؤال ما عرفتش أحله في الامتحان
    والباقي اتحل بطرق خدتها في الكلية

    أينعم أنا مش عبقري
    بس المادة دي بالذات كنت جايب فيها قرب الامتياز

    دي غير اني اساسا تخصص فيزياء
    والامتحان بتاع الثانوية تعجيزي جداً

    آسف للأطالة
    وأرجو ألا تضايق من إختلافي معك
    دمت بكل ود

    أسامة

    ReplyDelete
  9. بص يا احمد هيا دايرة مغلقه وبتلف عالفاضى
    الكل غلطان
    يعنى بدايه من التعليم الخربان شكلا وموضوعا نهايه بالطلبه الى مش عايزة تتعب نفسها
    بس الحق مش عليهم
    دى زى ماقلت دايرة مغلقه
    اذا كان كل حاجه حواليهم زفت ومش صح اشمعنى هم يعنى

    بجد الله يكون فى عونهم

    ReplyDelete
  10. انا برضه يا احمد مش حخرج عن اطار الناس اللي علقوا عندك قبليا

    فعلا الطلبة دول صعبانين عليا مش لأن الامتحان جه صعب .. لا .. لانهم اتحطوا في منظومة فاشلة اسمها التعليم في مصر ..
    صعبانين عليا زي ما الطلبة اللي الامتحانات بتجيلهم سهلة جدا وهايفة صعبانين عليا
    الاتنين مظلومين
    واحد اتخرج مش فاهم حاجة ومالوش مكان في سوق العمل الا لو علم نفسه بنفسه من جديد
    وواحد مش حينفع يتخرج إلا لما يتعلم

    اكيد يا احمد فاكر شكل امتحانات الثانوية العامة بتاعتنا .. اللي كان الطالب ممكن يدخل الامتحان الواحد اربع مرات .. والامتحانات بتيجي سهلة جدا عشان كل الطلبة ينجحوا فيبقى النظام التعليمي ناجح

    الطلبة صعبانين عليا عشان وزارة التعليم كل يوم تنزل نظام جديد .. مرة يسهلوا ع الطلبة ومرة يصعبوا عليهم .. اكن الطلبة دول واهاليهم فيران تجارب .. وفي النهاية انا لو طالب ثانوية .. عايز نظام تعليم مستقر .. مش الاقي الامتحانات سهلة طول عمرها ومن المنهج .. وفجأة في السنة بتاعتي الاقي امتحان من بره المنهج وقال كده يبقى اسمه تطوير التعليم

    لو عايزين يعملوا كده يعملوه بس على مراحل .. مش اقطع عرق وسيح دمه

    ReplyDelete
  11. جيل حافظ مش فاهم ومش واخد حقه

    في مستوى تعليم لائق

    الطالب اللي طول السنة من درس لدرس

    لا عنده وقت يذاكر ولا يفهم

    يعني لو كان فيه مدارس محترمة ومدرسين عندهم

    شوية ضمير وتعليم اساسي بيحقق على الاقل 50 في المية

    من اهدافه .. ازاي منتظرين ان الطالب

    يتحول في سنة او اتنين لنابغة بيحفظ كويس ويفهم

    كويس وهو طول عشر سنين بيتعلم ازاي يكون غبي

    هي فعلا منظومة فاشلة من اولها لاخرها

    تحياتي

    ReplyDelete
  12. لازم نلعن اللي وضع المنهج دة والاسلوب دة في التعليم..لازم نلعن اللي اشاع الفوضى والاستسهال في النظام التعليمي المصري...لازم ننسف نظامنا التعليمي الفاشل دة ونبدأ على نظافة نتعلم صح زي كل مخاليق ربنا اللي بيعيشوا في بلاد محترمة تحترم العلم والتعليم


    الجزء الاخير ده انت عداك العيب وازح

    لكن بالنسبه للجزء الاولاني
    معلش يني
    مش ذنب الطلبه انهم بيتعلموا غلط وبيمتحنوا بطريقه غير اللي اتعلموا بيها
    ده ذنب النظام التعليمي ومن حق الطلبه انهم يمتحنوا بطريقه معينه طالما هي دي اللي اتعلموا بيها
    وبعدين
    انا كنت طالب دحيح بمعني الكلمه وكنت بذاكر كتير اوي
    ( ايام الثانويه الله لا يرجعها)
    والمواد اللي عايزه حفظ كنت بفهمها الاول زي مانت عايز الطلبه تعمل
    وبااااارضك كنت حافظ
    يعني فاهم وحافظ في نفس الوقت
    لكن الامتحانات كانت صعبه بمعني انها فيها فذلكه
    فقط في الامتحانات العملي
    يعني الرياضيات الاحصا وهكذا
    وانا معاك ان مفيش حاجه اسمها امتحان صعب بس ده في المواد النظري
    لكن المواد العملي فيها وفيها ونص كمان
    الله يكحمه مطرح ما غار اللي كان حاطط امتحان الاحصا بتاع السنه اللي كنت فيها
    والله كنت فاهم المنهج كله ومذاكر عملت كل حاجه قالولي اعملها عشان ابقي طالب متفوق
    وفي الاخر ماحققتش اللي كنت عايز اعمله
    ولو كنت سمعت كلام ابويا ودخلت مدرسه امريكاني وطلعت مش فاهم في البصله
    كنت ممكن احقق المعادله الصعبه
    اني ماذاكرش وفي نفس الوقت انجح
    معلش اصل الذكريات المؤلمه دي محتاجه اللي يفتحها
    واسف علي الرغي ده كله
    واسف علي الكبت ده كله
    :D:D

    ReplyDelete
  13. يامعلم الكلام بتاعك صح ميه في الميه المفروض مافيش حاجة اسمها امتحان صعب
    بس ارجع واقولك المشكلة مش من الطلبة ...المشكلة من نظام التعليم كله
    ما انت عارف ياحمد هو انا هقولك...نظام متخلف بكل ما تحمله الكلمة من معنى...بالذمة الطلبة هتفهم ايه؟؟؟ اذا كان اسلوب التعليم والمادة التعليمية محطوطة ومكبوسة بطريقة ماينفعش تذاكرها الا كده
    ياراجل انت لوخرجت برا حدود الكتاب واعملت بحث مثلا من مرجع ولا انترنت...المدرس هيقولك انك غلطان ماهو ياتبقى انت غلطان يا يبقى هو حمار
    ياعم العيب مش في الطلبة صدقني
    وانا طبعا مش هتكلم على فوبيا الثانوية العامة دا دي كفاية لوحدها

    يلا ربنا معاهم ومعانا

    تحياتي
    محمد سمير

    ReplyDelete
  14. لأ طبعا لازم تتعاطف معاهم عشان العيب في نظام التعليم من الأساس، يعني واضع الامتحان مش من حقه يختبر قدرات الطلاب وهما بقالهم 13 سنة بيتعلموا بأسلوب الحفظ والصم، يعني المسألة مش مسألة دروس ولا غيره لأن المناهج أصلا لو بتخاطب عقل الطلاب ماكانتش الدروس دي هيبقى ليها أي لازمة

    ReplyDelete
  15. السلام عليكم

    ايه اخبارك

    بص يسيدى انت بتقول ان اللى حط الامتحان عاوز يختبر قدرة الطلبه على الفهم وليس الحفظ ومش ذنبه بقي ان الطلبه دول بيركزوا على الحفظ والاستسهال
    طيب ليه بقي اللى بيحطوا الامتحان مبيبصوش للطلبة من الاول ياترى المدرسة قادرة انها تشرح وتوصل المعلومات للطلبة من غير ما يلجأوا الطلبه دةول للدروس اللى بتعتمد على الحفظ والتلخيص
    ليه اللى بيحطوا الامتحان مقدروش ان التعليم اصلا بايظ بايظ
    وانهم على قد ما بيدوا الطلبة مع انهم مش بيدوهم اى حاجة حتى الشرح مبيشرحوش حاجة فى المدارس يجبولهم على قد ما الطلبه بتاخد
    حراك يعنى يحاسبوا المجنى عليهم
    وليه مش بيحاسبوا الجناه
    اللى هما السبب فى الخراب وفى احباط نبتة مصر اللى بنحاول نسقيهاعشان تبقي احسن

    زى مااتن قلت فى نهاية الموضوع
    يايرت نهد نظام التعليم ده لانه اصلا مفيش منه اى فايدة نهائي ونبني نظام تعليم جديد من اول وجديد

    بس معتقدتش يعنى ان الهجوم بالكلام بس هيعمل حاجة لازم نبدأ نتحرك ونشوف احنا ممكن نصلح ازاى

    تحياتى

    ReplyDelete
  16. ياعم الحاج حرام عليك
    العيال بتنتحر
    انا كنت سايبك كويس
    ارجع الاقيك قالب عالطلبة كده

    ReplyDelete
  17. الساحرة:
    بداية يا مدام...تمنياتي بالنجاح والتفوق لبنت حضرتك
    يجوز فعلا نكون بنتكلم بأعصاب هادئة على اساس عدم وجود اي مصلحة من كون الامتحان سهل او صعب
    كل اللي اقدر اقوله لحضرتك
    كان الله في العون
    تحيااااتي واحتراماتي

    ReplyDelete
  18. عصفور المدينة
    ازيك يا باشمهندس
    يارب تكون بخير
    بص يا باشمهندس...انا استبعد تماما الفكر التأمري في موضوع الثانوية العامة دة
    اصل الناس اللي بيحطوا الامتحانات دي مصريين برضة مش يهود وبالتالي اعتقد ان صعب قوي حد يكون بالشر دة
    اعتقد ان المقارنة بالمرور والاعيب الشرطة مقارنة غير جائزة..مهما كان برضة دول ناس غلابة اللي بيحطوا الامتحانات دي
    هي صدفة ليس الا
    دة رأيي والله اعلم
    تحياتي

    ReplyDelete
  19. rania:
    في اي مكان محترم في العالم يا رانيا الامتحان بيقيس درجة الاستيعاب ودرجة تطبيق المواد اللي درسوها في الحياة
    الا في مصر
    الامتحان بيقيس درجة الحفظ والصم
    تحياااتي

    ReplyDelete
  20. محمد الكومي:
    القصة بتتلخص يا كومي في عيال مش عايزة تفهم ومدرسين حطوا امتحانات بتعتمد على الفهم والاستيعاب وهنا كان الصدام
    تحياااتي

    ReplyDelete
  21. رائع وجامد كعادتك يا احمد

    ومعذرة لانشغالى الايام السابقة

    بس وحشتنى كتير

    احمد

    ReplyDelete
  22. كل سنة وانت طيب
    والف الف مبروك
    وربنا يسعد ايامك

    موضوع الثانوية العامة ده بقي مشكلة
    تخيل انا اعرف واحدة جايبة تلاتة وتسعين ماحصلتش صيدلة
    المجاميع بقت خرافية ولازم تنزل لأرض الواقع بقي
    مااحناش عباقرة للدرجة دي

    ReplyDelete
  23. انا اول مرة اجى هنا......... انا مش ثانوية عامة على فكرة ولا اعرف حد فيها............... بس رايى مختلف عن رايك لان لما مدرس الرياضة يقول للطلبة سيبوا لى الامتحان احاول فيه يبقى اكيد الامتحان مش بس صعب وبعدين كون ان مجدى الجلاد بنته ثانوية عامة فيعمل كدة دة بصراحة فى رايى خيال علمى ولو احنا معودين ولادنا على طريقة التعليم دى وفى النهاية نجيب الامتحان دة يبقى الكلام دة اشبه بانى افضل اعلم ابنى طول حياته فى مدارس اجنبية واتكلم معاه فى البيت انجليزى وبعدين فجاة اديله بيت شعر للمتنبى يعربه يبقى لو ماعرفش يعربه مين الغلطااااااااااااااااااان؟؟؟؟؟؟

    ReplyDelete
  24. و الله انا كنت بفهم و مش بحفظ
    وجبت بالفهم من سنتين 95 فى المية علمى علوم
    وبرضه ما لحقتش اى حاجة و دخلت جامعة خاصة بالفلوس بعد ما طلعت عينى

    العيب مش فى الطلبة لانهم مغلوبين على امرهم
    العيب فى النظام اللى عودهم و خوفهم زى البعبع انكم لو ما حفظتوش زى البغبغانات مش هتفلحوا

    ReplyDelete
  25. شيكابالا:
    مع ان مفيش حاجات كتير اتغيرت من زمان لحد دلوقتي
    نفس الحزب ونفس الشخص ونفس الحاشية
    يا ترى ايه اللي اتغير؟
    تحيااااتي

    ReplyDelete
  26. the alien:
    ويا ترى دي مشكلة جيل ولا مشكلة نظام تعليم ولا مشكلة واضعي الامتحان ولا.......
    مين السبب يعني؟
    تقريبا كل هؤلاء
    تحيااااتي

    ReplyDelete
  27. sooooo:
    المشكلة ان مناظر الطلبة والطالبات بتوع ثانوي بقى غريب جدا
    تحس انهم عايزين يعيشوا اكبر من سنهم مش عارف ليه؟
    واضح انها مأساة اجيال طالعة جديد
    المصيبة لما الاجيال دي تحكم مصر في يوم من الايام
    قل على مصر يا رحمن يا رحيم
    تحيااااتي

    ReplyDelete
  28. مصري:
    عزيزي اسمح لي ان اختلف انا كمان معاك بدوري:
    مش معنى ان الطلبة بيحفظوا ودة غلط ان واضع الامتحان يجاريهم ويحط لهم امتحان على نفس الاسلوب في المذاكرة والاهتكون مشاركة منه في الخطأ
    انما لابد للأمتحان ان يختبر قدرات الطالب الذهنية وليس ذاكرته في الحفظ
    مش كدة ولا ايه؟
    الاختلاف في الرأي لا يفسد للود قضية
    تحيااااتي

    ReplyDelete
  29. shaymaa:
    ربنا يفتح عليكي يا شيماء
    يعني كله كدة هو السبب
    طب دة كدة العلاج هيكون صعب جدا وهيكون شعاااره
    انســـــــــــــــــــــــــــف
    تحياتي

    ReplyDelete
  30. أتفق معك تماماً

    ولكن هل تؤدي مناهجنا المصون إلي تنمية القدرات الذهنية للطلبة؟

    تحياتي
    أسامة

    ReplyDelete
  31. كلامك مضبوط يا عم أحمد

    لكن المشكله انك ا تستطيع افتراض حسن النيه ي ما تنويه الحكومه والجامعات الخاصة والحكوميه تجاه هؤلاء

    وربنا يستر

    ReplyDelete
  32. بس يا احمد انا نص متعاطفه معاهم بجد بس مش لدرجه انهم ينتحروا والله صعب قوى الموضوع ده غير كده الحكومه بقت زفت والمدرسين زفتين وبقى التعليم نيله
    اى خدمه يا عم ابسط انا سودت الدنيا اهو هههههههههه

    ReplyDelete
  33. ياابو حميد

    ولادى ف مدارس خاصه

    وكل حاجه بالحفظ

    مفيش فهم خالص

    متلمهموشى

    العيب ف التعليم

    تحياتى
    احمد

    ReplyDelete
  34. كلامك منطقي جدا..ملعون أبو الحفظ اللي حيخلينا بهايم العالم
    يا راجلب ده الناس كلها بتضحك علينا
    الثانيوة العامة عندنا 95 % يعنبر فاشل ومش لاقي كلية..ليه هو إحنا بلد العباقرة..طب اديني امارة واحدة
    :)
    يا رب السنو الجايو يكون 90% من خارج الزفت المقرر كمان وألاقي ناس بتعيط أكتر لان ساعتها ححس أن فيه أمل
    تحياتي

    ReplyDelete
  35. ma_3alina:
    خلينا نتفق ان الجنازة حارة والميت كلب
    والضجة دي كلها مالهاش لازمة اساسا
    لا الامتحانات السهلة هتنفع ولا الصعبة كمان
    المنظومة فاشلة من اولها
    تحيااااتي

    ReplyDelete
  36. unique:
    يعني بدل ما نصلح المنظومة الفاشلة دي ونجيب للعيال امتحانات تصلح من ادمغتهم
    المطلوب من واضعي الامتحانات يحطوا امتحانات سهلة كماان
    هي المشرحة ناقصة قتلى؟
    تحياااتي

    ReplyDelete
  37. zika:
    طبعا لا تتأسف لأن دة مش رغي ولا حاجة
    كلامك قيم جدا واسعدني بشدة
    من الواضح ان المنظومة كاملة متكاملة لازم تتنسف زيها زي حاجات كتير قوي في البلد دي لو كنا نريد الخير لهذا الشعب البائس
    تحياااتي

    ReplyDelete
  38. غمض عنيك:
    ابو سمير...ازيك
    انت بقيت بتعلق عندي كل 3 سنين مرة ولا ايه يا معلم؟
    انت فينك من زمااان؟
    المهم
    طب والحل ايه؟
    يعني المنظومة فاشلة وبايظة وكمان زعلانين من وجود امتحانات محترمة تقيس الذكاء والقدرة على الفهم؟
    يعني موت وكمان خراب ديار؟
    تحياااتي

    ReplyDelete
  39. كريم عاطف:
    انا باشوف برضة ان الطلبة مش عايزة تفهم ولا تستوعب
    كل اللي يهمهم المذكرات والبراشيم وكان لازم حاجة تفوقهم
    تحياااتي

    ReplyDelete
  40. المشكلة فى نظام التعليم كله اللى لازم يتنسف ويطلع نظام جديد

    تحياتى

    ReplyDelete
  41. عاشقة الوطن:
    طرق الاصلاح معروفة بس للاسف مفيش الرغبة ولا الارادة لتحقيقها
    احنا في بلد التعليم بيحتل مرتبة متأخرة جدا في الترتيب من حيث الاهمية
    ولذلك انا اتوقع مولد ستي الثانوية دي كل سنة
    تحيااتي

    ReplyDelete
  42. che_wildwing:
    علشان مصلحتهم والله اللي هي مصلحتنا برضة في الاول وفي الاخر
    تحياااتي

    ReplyDelete
  43. ahmed el sabagh:
    انت فين يا عم احمد؟
    يعني ينفع كدة؟
    انت نسيتنا ولا ايه يا عم؟
    عموما تنور طبعا....مدونتك يا ريس
    تحياااتي

    ReplyDelete
  44. المفقوعة مرارتها:
    الله يبارك فيكي....كلك ذوق والله
    طبعا 93% الايام دي ما تدخلش صيدلة..دي يا دوب تدخل السجن
    تحياااتي

    ReplyDelete
  45. enjy:
    طبعا شرفتيني ونورتيني
    اول مرة واتمنى الا تكون الاخيرة طبعا
    انا افهم ان ممكن يكون الامتحان طويل انما اكيد اكيد المسائل دي لها حل بس اكيد برضة عايزة وقت وهنا بيكون الخلط بين الصعوبة من ناحية وطول الامتحان من ناحية اخرى
    عموما المنظومة كلها فاسدة من تعليم متخيل لا يساير العصر لاساتذة جشعين كل همهم الفلوس لجيل مدلل مش عايز يتعلم
    عموما
    نورتيني

    ReplyDelete
  46. جيداء:
    عارفة يا جيداء
    انا مش بتضايق لما الطلبة بتوع حاجة وتسعين في المية يدخلوا صيدلة خاصة لان دول متفوقين اصلا وخانهم الحظ
    انما الاخوة بتوع التمانينات والسبعينات فدول بيصيبوني بنكد ما بعده نكد
    عموما....بالتوفيق ان شاء الله
    تحياتي

    ReplyDelete
  47. مصري:
    وهل يا عزيزي في زمن الانترنت يمكن الاعتماد على المنهج الدراسي فقط؟
    سيبك انت..اللي عايز ينبغ ويتفوق هيعمل كدة
    انما احنا يا اسامة في زمن التيك اواي
    تحياااتي

    ReplyDelete
  48. دكتور حر:
    والله يا دكتور انا بطبعي غير ميال للنظريات التامرية
    بكل صراحة لا استسيغها
    ما بابلعهاش
    اصل اكيد اللي وضعوا الامتحان مش عصابة يعني
    دول بني ادمين ومصريين برضة واعتقد انهم من متوسطي الدخل
    تحياااتي

    ReplyDelete
  49. بيكيا للبيع:
    اصلها ناقصة سواااد
    عموما
    ماشي ماهو السواد بقى جزء من حياتنا
    تحياااتي

    ReplyDelete
  50. احمد سكر:
    واضح فعلا ان السوس نخر في التعليم وطرحه ارضا
    عموما لك الله يا مصر
    تحياتي واحتراماتي يا سكر

    ReplyDelete
  51. micheal:
    انت نسيت ان احنا عباقرة العالم يا مايكل؟
    وان الطفل المصري اذكى طفل في العالم..وماتقليش اشمعنى؟
    هم قالوالنا كدة
    عموما هي 95% دة مجموع ياراجل
    دة الواحد لو مابيفتحش كتاب الايام دي يجيب 98% ويبقى بليد
    تحياااتي

    ReplyDelete
  52. bosbos:
    انسف تخلص من نظامك القديم
    نظامك التعليمي طبعا...علشان محدش يفهمنا غلط ونروح انا وانتي في ابو نكلة يا بس بس
    تحياتي

    ReplyDelete
  53. فتحي سرور وكمال الشاذلي يجريان فحوصات ز بية في باريس؛لقد رأيت بأم عيني مالم يصدقه عقلي بسهوله ،الشيخين المراهقين مع بائعتين هوى مغاربيتين في مطعم بيتزا بينو الأشهر في جادة الشانزليزية في ساعة متأخرة؛حيث تخف حركة السياح الأوربيين،وتنشط حركة الخليجيين والغانيات الناطقات بلغة الضاد!!وتتبعتهما حتى باب فندق الماريوت ومعهما الغزالتين السمراوتين!!ويعوض عليكي يامصر في إسلامك وفي من يتولوا أمر شعبك المستعبد!!س ا

    ReplyDelete
  54. فتحي سرور وكمال الشاذلي يجريان فحوصات ز بية في باريس؛لقد رأيت بأم عيني مالم يصدقه عقلي بسهوله ،الشيخين المراهقين مع بائعتين هوى مغاربيتين في مطعم بيتزا بينو الأشهر في جادة الشانزليزية في ساعة متأخرة؛حيث تخف حركة السياح الأوربيين،وتنشط حركة الخليجيين والغانيات الناطقات بلغة الضاد!!وتتبعتهما حتى باب فندق الماريوت ومعهما الغزالتين السمراوتين!!ويعوض عليكي يامصر في إسلامك وفي من يتولوا أمر شعبك المستعبد!!س ا

    ReplyDelete
  55. 一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

    情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

    A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

    情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

    情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails