Monday, 23 June 2008

احلى حاجة في مصر


المصري اليوم في عدد 14 فبراير الماضي عدد (عيد الحب)...طرحت سؤال هو السهل الممتنع فعلا
"ايه احلى حاجة في مصر"
السؤال دة يبان لأول مرة سؤال ساذج جدا...ممكن يكون سهل جدا...او صعب جدا لبعض الناس
السؤال دة لو سألتوا ل 100 مصري ماشي في الشارع ممكن حوالي 75 منهم يجاوبك..انت شايف اصلا حاجة حلوة من حواليك؟
مفيش اي حاجة حلوة في البلد دي...البلد دي ظالمة ومفترية وفاسدة وقاسية وفقيرة...البلد دي كوسة وظلم وقاتلة للمواهب والابداع...البلد دي متسلطة وقمعية ومقبرة لأي بني ادم شريف
الكلام دة مش كل الصورة....الكلام دة جزء من الصورة
انا عن نفسي لو كنت سئلت السؤال دة من حوالي 5 او 6 سنين كنت هجاوب نفس الاجابات اللي فيها نسبة كبيرة من الصحة
في منتصف سنة 2003 سافرت السعودية اشتغل هناك في احدى شركات الادوية...طبعا اسباب السفر معروفة وهي تأمين المستقبل والرغبة في تكوين ثروة في اقل وقت ممكن بالأضافة لجاذبية السفر والاعتماد على النفس
ومانكرش ان السفرية دي كانت نقطة فاصلة في حياتي كلها طالت او قصرت لأنها وضحت لي اشياء كتير قوي كانت غايبة عني وحددت شكل حياتي المستقبلية اذا كان في العمر بقية
قبل يوليو 2003 كنت بني ادم مختلف تماما يكره البلد دي بشكل رهيب....عصبي المزاج....يثور لأتفه الاسباب....ماكنتش بشوف في البلد دي اي ميزة على الاطلاق...كل حاجة حلوة ممكن جدا الاستغناء عنها....الفلوس تصنع المعجزات
بعد التاريخ دة اكتشفت اني كنت اكبر مخطىء او مغفل فعلا....حسيت بقيمة البلد دي...حسيت قد ايه مصر فيها حاجات حلوة كتير قوي في ايدينا وبنعيشها واحنا مش حاسين بيها ومش هنحس بيها الا لو جربنا اننا نفقدها
مصر فيها سلبيات رهيبة....مشاكل لا حصر لها...احباطات...فوضى...عشوائية...زحمة...تخبط...سرقة
كل دة موجود....بس موجود كمان متع ا ربنا انعم بيها علينا
مصر فيها العيلة اللي بتجتمع كلها يوم الجمعة ع الغداء وسط تجمع الاولاد والاحفاد
مصر فيها الاصدقاء او ماتبقى من الاصدقاء بعد ما تفرقت السبل بالجميع
مصر فيها الفسحة الحلوة والغدوة او العشوة الجميلة مع اللي بنحبهم
مصر فيها الجدعان والناس الخدومة الطيبة اللي مابيقبلوش انهم يشوفوا حد واقع في ضيقة من غير ما يساعدوه
مصر فيها الافراح بجد والاحزان بجد...مصر فيها صدق في المشاعر سواء فرح او حزن
مصر فيها الجرايد المستقلة والاصوات الحرة اللي لسة بتحارب الفساد وبتقول لا
مصر لسه فيها الاهلي والزمالك وجمهورهم اللي بيعاير بعض بكل خفة دم
مصر فيها اوضة نومك الخاصة...مملكتك...المكان الوحيد اللي بتلاقي فيها نفسك
مصر فيها كل الذكريات الجميلة وكمان التعيسة...فيها كل احلامك المستقبلية وفيها برضة رعبك من اللي جاي
مصر فيها حاجات جميلة قوي....ممكن تكون بتشوفها دلوقتي حاجات بلا قيمة...حاجات مالهاش لازمة..حاجات لا تسمن ولا تغني من جوع
بس والله...الحاجات دي لا تقدر بتمن...مشاعر وانت في الغربة تتمنى تعيشها ولو ليلة واحدة بس
وانا في الغربة كنت مستعد اسافر مصر خميس وجمعة بس وارجع السبت الصبح..ورغم تكلفة حاجة زي كدة الا ان دة كمان ممنوووووووع
انت في سجون بلاد الخليج لست اكثر من عبد..لا تملك من امرك اي شيء
مصر لسة جميلة
مصر فيها حاجات كتير قوي حلوة...من كتر الحاجات الحلوة هتحتار تختار ايه هي
احلى حاجة في مصر؟

53 comments:

  1. بالظبط كده، مصر والمصريين متعرفش قيمتهم من غير ما تبعد عنهم. حتفتقد كل شبر في مصر، وحتفتقد المصريين، وحتفتقد الزحمه والغلاسه وعدم النظام .... وحتفتقد كل الدفىء والحنان

    بجد بجد ... مصر دي أم الدنيا مش هزار

    ReplyDelete
  2. تصدق بإية أنا نفسي أسافر برة وأعيش أمة شوية .. بس علشان أحس بإحساسك دة
    وأشوف حاجة تانية غير الغمقان اللي هنا
    السواد اللي بيخلي الناس مش طايقة بعضها لا في شغل ولا مواصلات ولا عيشة
    جمهور الرياضة المتعصب اللي مش بيشجع منتخب بلده يا مؤمن علشان يربي نفر واحد لعيب
    تعرف.. في الفين وتلاتة كانت لسة فيه شوية حاجات كويسة
    صحيح خمس سنين مش حاجة في عمر الشعوب لكن احب اقوللك انهم عندنا استفحل فيهم الغمقان أوي
    أكيد السفر هو الحل لأنه بضدها تتميز الأشياء
    أكيد كمان لو لاحظت انك اتكلمت عن معنويات
    بينما انا اتكلمت عن أسلوب حياة

    ReplyDelete
  3. معلش لو كان تعليقي حاد
    انا قريته واتخضيت
    ويمكن لو أنا في مكانك كنت حسيت بشئ-صغير-من دة
    الحنين دة شعور جميل
    وزرع التفاؤل حاجة كويسة
    بس اللي يقدر علي كدة
    أنا ماشية
    مش عارفة اتفائل بصراحة

    ReplyDelete
  4. بوست هايل كالعادة يا ابو حميد
    استمر يا دكتور
    واحشني على فكرة انا غبت شوية علشان امتحانات الماستر بس رجعت تاني

    ReplyDelete
  5. كل مكان في الدنيا في الحلو والوحش



    لكن الفرق هنا في كمية الحلو أو كمية الوحش

    واحنا هنا في مصر اصبح الشر والوحش بقى أكتر بكتير

    هو ده الفرق بس

    موضوع حلو وتحياتي

    ReplyDelete
  6. انا بحب كل حاجة فى مصر السلبيات دى من شعب مصر احنا الى صنعناها ،حكومة مصر
    مش مصر البلد الغلبانه الى ولادها بيدوسو فيها

    انابحب الشعب المصصرى جدا ببساطته ،تلقائيته
    كل حاجة
    بفتخر انى مصرية طول عمرى ،بفتخر انها اتذكرت فى القران ،بفتخر اننا شعب مميز فعلا
    الاعداء بيتبسطو لما شعب يكرهه بلده عشان يبقا لقمه سهله لاستغلاله

    ReplyDelete
  7. وانت هتقولي برضه؟؟

    ده انا غبت عن الاسماعلية لمدة شهر مكنتش قادر استحمل الغربة

    مع اني كنت فالعريش D:

    مهما بيحصل فيكي هنحبك يا مصر وهنحررها ان شاء الله

    ReplyDelete
  8. من غير الأهل والمعارف
    إحنا صفيحة زبالة العالم

    تحياتي

    ReplyDelete
  9. كل بلد فيها الحلو و الوحش ياأحمد
    مش عيب لما الواحد يفكر يسافر عشان يأمن مستقبله لو ماقدرش يحقق ده في بلده

    في دول الخليج الشغل شغل يعني علي اد مابيدوا مرتبات عاليه علي اد ماعايزين انتاج
    هنا في مصر ناس كتيره اتعودت علي التنبله عايزين فلوس و مش عايزين يشتغلوا بيها

    ReplyDelete
  10. انت في سجون بلاد الخليج لست اكثر من عبد..لا تملك من امرك اي شيء
    أعترض على هذه الجملة السابقة بشدة
    فأنا أعيش في الكويت منذ أربعة سنوات ولم اشعر أبدا بمثل هذا الشعور
    ولم يعاملني أحد كعبد
    بل بالعكس التعامل قائم على الاحترام المتبادل
    ولكن مصر بدون ماديات سجن مفتوح
    بس أكمنك مريت بمرحلة الغربة وانهيتها ونهلت منها ربما تنظر للامور الآن بشكل مختلف وقد تكون هذه نظرتي لمصر عند انتهاء فترة غربتي ورجوعي إلى أحضانها حتى
    أصبر نفسي على تحمل ما فيها من سلبيات
    أتمنى من الله أن تقل وتنحصر
    لأنه لا جنة على الأرض

    خالص تحياتي

    ReplyDelete
  11. زي ما انت قلت يا احمد
    بجد اخلي حاجه انها هي مصر

    ReplyDelete
  12. شيكابالا24 June 2008 at 13:11

    انهامصر عزة وانتماء كل قلب بها شهيد هواها فعلاادخلوها بسلام امنين مصر معشوقة المصريين والعرب والاجانب مصر الدفء واللمة والصحبة انا عن نفسى عمى ما بعدت عنها ومتخيلش نفسى خارجها ابدا بس واضح يا احمد انك كائن اجتماعى مووووووت بتحب الناسواللمة ودى حاجة جميلة جدا

    ReplyDelete
  13. شفت متى تغيرت نظرتك


    لما ارتحت جزئيا ( ماديا يعني )

    أو على الأقل لما تحررت من فكرة ان وجودك في مصر هو اللي مقيدك .. هو اللي جايبلك النكد ..


    انا بقى عكسك . بديت في الخليج . ونزلت مصر على الجامعة .. رافضا لها كلا وجزءا ... انتظر الصيف علشان ارجع تاني هناك ..

    بس كل يوم كان يمر كنت اقارن فيه بين حياتين .. اكتشف ان الحياة هنا حية وهناك معلبة ... واني احب هذا المكان ..

    يمكن في يوم افكر اسافر ايضا .. بس هسافر وانا أومن بأن مصر كلها حاجات حلوة .. غابت تحت ركام مليون حاجة

    يوما ما سيغسلها المطر

    ReplyDelete
  14. مفيش سعاده مطلقه
    اما تعيش فى مصر شحات ومقموع ووسط اهلك وناسك
    واما تعيش بره مصر غنى ومعاك فلوس ومن غير اهلك واناسك

    ReplyDelete
  15. أوافقك في كل ما ذكرت.

    مع بعض "تفتيح مواضيع".

    سيادتك شعرت بما ذكرت لما صرت في حالة مادية ميسورة.

    أذكر الرجل الذي يبكي لأنه ضـُرب من ظابط أمام أولاده،وقدم الشكاوي حتي النائب العام.

    ثم
    لا شئ

    فقدم طلب حق اللجوء السياسي إسرائيل!!

    أعشق مـــــــــــصر
    ولكني أكره الحكومة وبشدة

    تحياتي
    أسامة

    ReplyDelete
  16. مصر فيها عمال المحلة
    مصر فيها موظفي الضرائب العقارية
    مصر فيها أهالي دمياط والبرلس وسراندو
    مصر فيها ناس كما تصفهم أنت
    "أغلبية صامتة"

    ReplyDelete
  17. مصر فيها الكثير جدا مما يسر النفس و يسوء ايضا
    لكن اصرارنا علي رؤية السيء هو من باب الحب الكبير للوطن و معرفتنا بحجمه الطبيعي باعتباره اول حضارات التاريخ
    و امنيتنا بانه يعلو كما كان
    و هو حالة من الرفض للوضع الراهن
    لكن احيانا الرفض بيكون ناتج عن ياس من الاصلاح
    لكن زي ماقلت مصر فيها الكثير جدا
    و كفاية ان فيها عساكر دفعتك و اصحابك و اهلك
    نص مصري قديم

    ReplyDelete
  18. وجهة نظري:
    بس ما بيعرفش كدة بجد غير اللي يبعد عنها
    تحياتي واحتراماتي

    ReplyDelete
  19. بثينة:
    لا يا بثينة
    اكيد اكيد في حاجات كتير جدا بتدعو للتفاؤل
    طبعا الفساد والفوضى والاحباط كتيــــــــــــــــــــــــــر جدا
    بس برضة بصي حواليكي هتلاقي في حاجات كتير كويسة
    وعلى رأي منير
    قلب الحياة مليااان حاجات وبتفرح
    تحيااااتي

    ReplyDelete
  20. موجة:
    العود احمد ويارب عقبال الدكتوراة
    الف الف شكر
    تحياتي

    ReplyDelete
  21. لما أسافر باه أبقى أشوف أي حاجة

    تحياتى يا جميل

    ReplyDelete
  22. صاحب المضيفة:
    اشادتك بالموضوع شرف كبير ليا
    الف الف شكر
    تحياتي

    ReplyDelete
  23. هوندا:
    المشكلة يا هوندا هو الخلط بين مصر وبين حكومة مصر
    الحكومات بتروح وبتيجي انما البلد هي اللي بتبقى للأبد
    بس الشعب فعلا محتاج يحسن من سلوكياته
    تحياااتي

    ReplyDelete
  24. vague:
    طبعا....هو الواحد مننا ليه ايه غير بيته
    تحيااااتي

    ReplyDelete
  25. the alien:
    ماهو لو كل واحد استثنى من وجهة نظره الاهل والمعارف....مش هنبقى صفيحة زبالة العالم
    هههههه
    تحياااتي

    ReplyDelete
  26. اجندا حمرا:
    مش عيب خالص طبعا
    والدليل ان انا نفسي سافرت وان ممكن استمر لولا ان ظروفي كانت معاكسة
    انا انتقد ممارسات الخليجيين وليس المصريين
    تحياااتي

    ReplyDelete
  27. كلامك صح يا سمير.. مصر جميلة قوي قوي.. وكفاية جداً الحاجات اللي انت كتبتها دي في ناس هاتقول لك يا ابني ماهو عشان انت سافرت فشايف ان الحاجات دي مهمة وحلوة
    عارف أحلى حاجة في مصر إيه؟
    البني آدمين الطيبين الجدعان بالقوي قوي

    نورت مدونتي
    :)

    صباحك ورد

    ReplyDelete
  28. بصراحه انا شايفه ان من المنطق ان الواحد لما يتسال علي احلي حاجه يتتكلم علي حاجه حلوه مش وحشه حتي لو هيقول عن حاجه كويسه نسبيا

    مع ان مصر فيها حاجات كتيييييييير اووي حلوه

    ReplyDelete
  29. و الله يا فندم
    انا قريت البوست دة اكتر من مرة
    و مش عارفة ارد عليك المفروض ارد يعني اقول ايه بقى
    لكن اغلب ااحاجت اللي انت اتكلمت فيها دي في مصر ، محتاجة الواحد يبقى معاه فلوس ،
    يعني اقصد انت لو معندكش اوضة خاصة بيك، ساكن في عشوائيات ، يادوبك اوضة ليكم كلكم انت و باباك و مامتك و اخواتك ، و مش معاك فلوس تتفسح الفسحة الحلوة ، و مافيش مية نضيفة بتشربها ، مفيش تأمين صحي كويس تتعالج بيه ، بتشتغل اي حاجة نقاش مثلا أرزقي على باب الله او حتى نجار باليومية تفتكر هتشوف الحلاوة دي في صمر ؟؟
    الحلاوة دي بتعتمد على الظروف ..!
    فاكر فيلم جاءنا البيان التالي ؟؟
    لما كان في ليلة راس سنة و هنيدي رايح يشوف احوال الناس ؟؟
    فاكر الراجل اليل قاعد في المجاري؟؟
    الناس دي موجودة يا احمد.. بس احنا مش شايفينهم
    انا مش بحبطك .. انا كمان عندي حاجات حلوة في مصر باحبها و احلى حاجة باحبها في مصر بورسعيد و صحابي اللي فيها اللي طول عمرهم جدعان جدعان بجد

    ReplyDelete
  30. ياسر حسين:
    فناني العزيز
    الحمد لله انك مبسوط في عملك في الخليج..ربنا يديمها عليك نعمة
    انما لا تنكر ان اغلب المصريين في بلاد الخليج بيعانوا من سوء معاملة اهل هذه البلاد لهم وعنصريتهم الواضحة فأنت الاستثناء وليس القاعدة
    ربنا يوفقك
    تحياااتي

    ReplyDelete
  31. تعرف انت بجد اتكلمت عن حاجات حلوه قوى عمرنا مهنلاقيها بره مصر
    انا دايما كانت امنيه حياتى انى اسافر بس بقالى كام سنه حاسه قوى كل الكلام ده مع انى عمرى ماسافرت بره مصر
    مهما الواحد اتخنق هيفضل برده جوانا حنين للماضى وتطلع للمستقبل

    تحياتى لك

    ReplyDelete
  32. كده صح
    افتكرتك مش هتقول اللي انت قلته ده

    انت صح،، مصر على اللي عاملاه فينا فيها حاجات حلوة

    مصر مجننانا وممخولانا وهتطير وطيرت اساسا ابراج من دماغنا بس حلوة
    فيها حاجة حلوة صدقوني

    ربنا يصبرنا ويصحي اهلها ويفوقوا كده

    مها ميهوووو

    ReplyDelete
  33. احلى حاجة فى مصر انها بلدى

    ReplyDelete
  34. محمد مفيد:
    بس ممكن تكون احلى من كدة
    ربنا يسامح اللي هم السبب
    تحياااتي

    ReplyDelete
  35. شيكابالا:
    هو انا اعرف اعيش من غير لمة
    و هو الانسان ايه غير لمة وشوية حاجات تانية فوق بعضها
    نورتيني
    تحياتي

    ReplyDelete
  36. محمد العدوي:
    احسن حاجة واجمل حاجة في الدنيا بجد هي انك تؤمن ببلدك و قيمة بلدك سواء كنت جوة او برة
    تحيااااتي

    ReplyDelete
  37. بطوط حبوب:
    مش قوي كدة؟؟
    ممكن تكون عايش في مصر ومبسوط برضة
    تحياااتي واحتراماااتي

    ReplyDelete
  38. مفهوم الوطن هو حل اى صراع جوانا ناحية حبنا لمصر الى انت قولته هو الناس اهلك اصحابك وبعدين المكان الى مرتبط بيهم بس عن نفسى وبفهمى المتواضع شايفة ان الموضوع اكبر يعنى الوطن هو المكان الى احس فيه بآدميتى فى الاكل والشرب والمواصلات والامن والتعليم والكرامة والحدود الادمية بينى وبين الى حواليا والى بتضيع دايما فى الاتوبيس والسيكشن و الى بتخلينى احس انى جزء صغير فى كتلة كبيرة من لحم وعضم
    جميلة والله نظرتك لناسك ولوطنك ونفسى بجد نحس بالنعم دى بس الدنيا للاسف مش وردى كده

    ReplyDelete
  39. عزيزى احمد

    انا معاك فى كل اللى بتقوله و مصدقه و حاسس بيه

    و ده كله حاسس بيه و حاسس ان البلد فيها خير رغم انى فقدت حوالى سبعة او تمانية من اعز اصدقائى كلهم سافروا بره مصر خلال السنة اللى فاتت بس و رغم شعورى بالوحدة احيانا الا انى بحاول ابحث عن صداقات جديدة

    و فى نفس الوقت معظم اللى سافروا من اصدقائى مافيش فيهم حد مبسوط
    و ده ممكن يكون بيأيد تجربتك ووجهة نظرك اللى بتفق معاك فيها بشكل كبير

    لكن عايز الفت انتباهك لحاجة يمكن اللى زيى و اللى زيك مش واخدين بالنا منها

    و هى ان مش كل الناس اللى فى مصر حاسيين او شايفين ان الحاجات الحلوة اللى فى البلد لسبب بسيط انهم فعلا ماشفوش اى حاجة حلوة من البلد

    البلد فيها ناس كتير تحت خط الفقر

    البلد فيها ناس كتير اتعرضوا للظلم

    البلد فيها ناس كتير ضاعت حقوقها و شافوا الذل

    البلد فيها ناس كتير اتنكل بيهم و اهدرت انسانيتهم و كرامتهم

    البلد فيها ناس كتير مواهبهم اتدفنت

    و عيره و من ده كتير

    و دول مش نسبة قليلة

    و ساعات كتير بسأل نفسى

    هل النظرة المتفائلة اللى موجودة عند واحد زيى او واحد زيك ..هل النظرة دى موجودة عند اغلب الناس و لا المتفائلين فى مصر اصبحوا اقلية

    هل لو البلد داست علينا و العياذ بالله هيكون ايه شعورنا ساعتها

    اتمنى انى ماوصلش للنقطة دى

    تحياتى
    هش

    ReplyDelete
  40. مصري:
    مصر شيء وحكومة الحزب الوطني شيء اخر تماما
    الاتنين منفصلين
    كلنا نعشق مصر
    تحيااااتي

    ReplyDelete
  41. alzaher:
    ماهي المصيبة انها صامتة
    ربنا ينفخ في صورتنا جميعا
    تحياااتي

    ReplyDelete
  42. ذو النون المصري:
    اعتقد ان نقدنا لاحوال بلدنا نابع من حبنا لها واننا ننشد لها الكمال في كل شيء
    ربنا يحميها
    تحياااتي

    ReplyDelete
  43. monzer:
    يارب لما تسافر ماترجعش تقول كنتي فين يا لا..لما قلت ال اه
    تحياااااتي

    ReplyDelete
  44. مروة جمعة:
    شيء طبيعي يا مروة ان احنا نحس بقيمة الاشياء لما نفتقدها علشان نعرف قد ايه هي قيمة وجميلة
    الف شكر ليكي ويارب الاقي تعليقاتك الجميلة منوراني دائما
    تحياااتي

    ReplyDelete
  45. رؤية:
    وهل اللمة والعيلة والصحبة والاهل والناس حاجة وحشة؟؟؟
    مش عارف؟؟؟؟
    تحيااااتي

    ReplyDelete
  46. شيماء علي:
    على فكرة يا شيماء الناس دي لها دنيتها الحلوة برضة...دنيتها الممتعة
    الناس دي لها ترفيهها الخاص بيها وبالتالي هم كمان بيحبوا البلد دي والغربة بتكون برضة صعبة عليهم قوي قوي رغم حاجتهم الشديد لها
    بيفتقدوا برضة الاهل والصحبة واللمة
    نورتيني

    ReplyDelete
  47. رحيل:
    كل واحد في الدنيا هتفضل برضه بلده هي الاساس
    ايا كانت البلد دي ايه وظروفها عاملة ازاي
    الوطن وطن برضة
    تحياااتي

    ReplyDelete
  48. احسن تستاهل:
    تفتكري يا مها هنفضل ندعي كدة كام سنة؟
    وياترى اولادنا برضة هيدعوا ان اهلها يفوقوا برضة؟؟؟
    تحياااتي

    ReplyDelete
  49. موناليزا:
    فعلااااااااااا
    خير الكلام ما قل ودل
    تحيااتي

    ReplyDelete
  50. كلام وخلاص:
    اكيد طبعا الدنيا مش وردية برضة
    بس بالمنطق دة يبقى المواطن الاوغندي مثلا بيكره بلده اوغندا باعتبارها لا توفر له الحد الادنى من الحياة الكريمة
    انا رأيي ان الوطن وطن..ايا كانت ظروفه
    تحياااتي

    ReplyDelete
  51. هشام:
    منورني والله
    على فكرة يا هش..الناس اللي تحت خط الفقر دول بيحبوا بلدهم برضة
    حب الوطن مالوش دعوة بظروفه الاقتصادية...الوطن وطن
    تحيااااتي

    ReplyDelete
  52. اسمع يا استاذ احمد انت كتبت بوست جميل جدا
    دخل دماغى ونغاشيشى بجد مصر فيها حاجات وحشه كتير من محسوبيه وفساد وظلم وحاجات زى كده بس ده من اشخاص مسيرهم يمشوا ويجو ناس محترمه تحكم بلدنا بالعدل والمساواه مصر مش حسنى مبارك ولا احمد عز ولا صفوت الشريف مصر احنا مصر هى الناس الغلابه الناس الطيبه
    تسلم لوحة مفاتيحك يا شيخ

    ReplyDelete
  53. بحبك يا مصر:
    الف شكر يا فندم ع الكلام الجامد دة جدااا
    طبعا مصر فيها فساد للركب
    بس برضة بتبقى في النهاية هي مصر
    تحياااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails