Wednesday, 11 June 2008

الة الزمن



عارفين الة الزمن؟
الة الزمن دي اختراع قديم ظهر في افلام الخيال العلمي القديمة بيفترض انك بتركب الة الزمن دي وترجع بيها للوراء او تطلع بيها قدام
في ناس تحب تركب الة الزمن وتطلع بيها نحو المستقبل علشان يعرفوا ايه اللي هيحصل مستقبلا
وفي ناس هتفضل انها ترجع بالة الزمن دي للماضي علشان تمنع حاجات حصلت فعلا
في 2008 والة الزمن جاهزة للعمل والمطلوب انك تضغط على زرار واحد من اتنين
زرار الماضي وزرار المستقبل
هتضغط على اي زرار وتتوكل على الله؟
زرار المستقبل علشان تشوف اخرتها ايه وايه اللي هيحصل بعد 20 او 30 سنة من النهاردة؟
ولا زرار الماضي علشان تمنع كوارث حصلت وتتمنى انها ماكنتش حصلت؟
انا هأجاوب عن نفسي وهطرح السؤال دة لكم للاجابة في التعليقات
انا مش هضغط بالتأكيد على زر المستقبل...مش عايز اطلع 20 او 30 سنة لقدام...هشوف ايه يعني؟
اخاف ماعرفش ارجع تاني لسنة 2008 ونعيمها...واقول زماااااااان في 2008 كان في اكل ومية وفسح وناس ووطن
خاصة ان المؤشرات بتقول ان بعد 20 او 30 سنة هتختفي ملامح البلد وسط الزحام....مفيش وطن..... في تلوث وزحام وبطالة وفساد وناس بتقطع في بعضها
انا عن نفسي هأرجع للخلف...هأرجع بالضبط 20 سنة لحد ما يبقى عندي 9 سنين...وطبعا مش هفتح كتاب مانا بقى عرفت اللي فيها وعرفت اني لما ذاكرت ايه اللي حصل لي
وهأتعلم لعب الكورة...والوقت اللي ضيعته في المذاكرة والكلام الفارغ دة هستفيد بيه في لعب الكرة اللي هتأكلني الشهد
او هأتعلم التمثيل....مانا بقى هبقى عرفت مصيري لما اصابتني الخيبة وطلعت صيدلي ايه اللي حصل لي...يبقى لازم افلح واجتهد وابقى فنان قدير ويا حبذا لو كوميدي
وهأبطل قراءة...هو انا اللي موديني في داهية غير دماغي؟!!!هافضي دماغي ع الاخر هخليها بالوووونة مليانة هيليوم علشان تبقى خفيفة وفاضية
انا عملت حاجات غلط كتير قوي يا جماعة سنة 1988 ونفسي الزمن يرجع بي تاني علشان اكفر عنها
انا ذاكرت.....واكتشفت في سنة 2008 اني جاتني نيلة.....ياريتني كنت فلحت
وكنت عيل خانقة وبقرا مجلات وكتب......واكتشفت بعد كدة ب 20 سنة ان الكلام دة مش بيجيب همه يا ريتني كنت استفدت ولعبت كرة في الوقت اللي ضيعته في القراءة
وكنت ولد مؤدب وبسمع الكلام.....واكتشفت في 2008 ان دة بيسموه عيل مش روش وخنيق وعبقرينو وعايش الوهم والبنات مش بتحب النوع دة من الاولاد
لا...انا مش هاركب الة الزمن دي تاني
لا المستقبل مشرق....ولا الماضي يفرح
انما السؤال:
هتتعامل (ى) مع الة الزمن ازاي؟
هتطلع لقدام ولا هترجع ورا؟
مع العلم ان الفترة الزمنية لعمل الة الزمن 20 سنة بس....هترجع 20 سنة لورا وتشوف انت عملت ايه وماكنش لازم تعمله او هتكرر اللي انت عملته تاني؟
ولا هتطلع بيها 20 سنة لقدام وتشوف ممكن يحصل لك ايه بعد 20 سنة؟

43 comments:

  1. والله يا احمد معاك حق
    الواحد لما يسمع توقعات الأرقام والتقديرات لكل مناحي الحياة في المستقبل
    الواحد بيجيلو حالة احباط وخوف شديد من اللي جاي
    وبقول ربنا يرحمنا برحمته

    فانا زيك هفضل اني ارجع للماضي واحاول اصلح حاجات كتير غلط عملتها ههههه

    ReplyDelete
  2. ياما نفسى ومنى عينى كده
    انها تبقى بجد
    دانا مش كنت هارجع بس عشرين سنه دانا كنت هارجع قرون لورا
    كان زمان فى حاجات كتيير حلوة

    بس بما انها عشرين سنه بس
    يبقى مش مشكله
    هارجع وامرى لله
    مش هغير دراستى بس اكييييييييد هغير اسلوبى مع الناس
    هصحصح كده
    واحاول اكسب الفرص الى ضيعتها

    ولو انى كنت اتمنى اعيش زمن تانى خالص

    بس حلم جميل بجد

    سلامى يا احمد
    :))

    ReplyDelete
  3. هوقفها تماماً لا قدام ولا ورا

    ReplyDelete
  4. هألم كل فلوسي في شنطة وارجع 20 سنة لورا وأشتري بيهم دهب وأرجع بيه 2008
    وأبيعه .. أكيد ساعتها هأبقى غني
    :))))
    إن جيت للحق
    أجمل ما في الحياة أنك تعيشها زي ما هي
    ولو علمتم الغيب لأخترتم الواقع
    الحاجة اللي كانت في الماضي وبنفتقدها بشدة هذه الأيام
    الاخلاقيات وحب الناس لبعض وحب الخير لبعض
    هي دي الحاجة الوحيدة اللي ممكن ترجعني للماضي عشان أحسها
    مع شنطة الذهب طبعا
    :))))))))))

    خالص تحياتي

    ReplyDelete
  5. أنا هابقي عايزة أطلع في الزمن لقدام
    أيوة كان هيبقي نفسي أرجع أصلح وأغير مليون حاجة بس أنا حابة أكتر المستقبل
    بصراحة كدة احنا بنقول زمان كانت الأيام جميلة والحياة أسلس
    بس احنا بعد ما عشنا التكنولوجيا دلوقتي صعب نتخلي عنها
    صعب نعرف ان فيه حاجة اسمها موبايل هتكون موجودة بعد عشرين سنة ومانلاقيهوش .. مثلا
    صعب أنك ترجع تتعامل مع الدنيا زمان بعد ما مارست الحياة أسهل دلوقتي
    الأخلاق والحب والمعاني الجميلة
    ‏?‏
    دي موجودة في كل عصر زيها زي نقائضها بالضبط
    من أول قابيل وهابيل فيه خير وشر
    بس احنا دايما بنشوف البعيد أجمل
    علشان كدة انا عايزة اجرب الجديد
    هاخده باكدج كدة حلو ووحش معنديش مشكلة
    بس بشرط واحد
    اني اطلع في الزمن من غير ما سني يكبر
    افضل زي ما أنا أو
    يصغر أوكيه مافيش مانع
    :D
    علي فكرة أنا عاشقة للفكرة دي من زمان
    قريت كتاب انجليزي لحد مش فاكراه عنها وبعدين قريته مترجم
    واتفرجت علي معظم الأفلام اللي ناقشتها
    وباحب أوي سلسلة
    back to the future
    ل سبيلبرج العظيم

    تحياتي

    ReplyDelete
  6. أنا هارجع آلة الزمن للوراء
    وهحاول أطلع لعيب كوره بدل كلية العلوم اللي روحي طلعت فيها
    وفي الآخر طلعت بشتغل مدير لمصنع عاوز أولع أصلا في الموجودين فيه من كبيرهم لصغيرهم
    مش بذمتك لو كان الواحد بطل مزاكره وراح شاط شوطتين كان لم فلوس تمام وكان زمانه مشهور
    وكمان كان ممكن الواحد بعد ما يعتزل يطلع في برامج يحلل المباريات
    يعني السبوبه موجوده إلى الأبد
    ايه رأيك في الاقتراح ده؟

    ReplyDelete
  7. لأ يا احمد
    موش هرجع لورا عشان أناعشت الماضى خلاص
    هنعيده تانى ليه
    مدام موش مسموحلى أصلحه و مينفعشى أصلاً أصلحه لأنى هغير مستقبلى لحاجة جايز متعجبنيش
    و موش هروح المستقبل عشان معرفشى هيعجبنى و لا لأ ...
    أنا هفضل فى مكانى يا عم
    لا هروح و لا هآجى
    أنا جبانة قوى على فكرة و موش من هواة المغامرة خالص
    بس الفكرة حلوة قوى
    الله ينور

    ReplyDelete
  8. انا مش عايز اشوف الستقبل لااحسن يجى ليا صدمة

    ولاعايز ارجع للماضى عشان اللى راح راح وعلى راى عمرو دباب مابلاش نتكلم فى الماضى

    خلينا ماشين خطوة خطوة ونشوف اخرتها فين

    تحياتى

    ReplyDelete
  9. دايما باسال نفسي هو احان ممكن نركب الة الزمن دي في وم

    ويارتى هاتشتغل ازاي

    ولو ركبناها هانروح اي عصر ووقت


    أسئلة كتيرة بتدور جوانا عن كده


    معذرة والله على التاج اللي مررته لي

    انا فخور بي جدا لكن اعذرني جدا على عدم ردي لظروف طارئة علي جات ورا بعضها


    مرة أخرى أكرر اعتذاري الشديد ومردودة باذن الله تعالى في مرة تانية يا جميل

    ReplyDelete
  10. هي فكرة جميلة وان كانت مستحيلة

    الرجوع الى الماضي 20 سنة اعتقد انه

    هيكون مؤلم بالنسبة لي لاني ساعتها هكون

    طفلة مفترية ومش داريانة باللي هيحصل في مستقبلها

    عشرين سنة للمستقبل لا اعتقد انها ستكون افضل حالا

    تحياتي

    ReplyDelete
  11. فكرة البوست جميله جدا
    الة الزمن و ان كانت فكرة نظريه الا انها شيقه جدا
    يكفي انها تنفي عن الانسان ملله من حاضره لفتره من الوقت
    بالنسبه لافكارك عن نفسك و اهتمامك بالقراءه مبكرا و احساسك بخطاك فانا و زملاء اخرين لي محبين للقراءه للاسف نشعر بنفس الشعور بخلاف ان البنات لا يحبون القراء
    و تلك مشكله اخري سببت لي احباطات في فترة المراهقه
    و اعتقد للاسف ان اي قاريء يعاني مما تعاني و اعاني منه
    موضوع جميل تحياتي

    ReplyDelete
  12. شيكاااااااااااااااااابالااااااااااااااا12 June 2008 at 00:25

    اولا انا معجبة جدا بفكرة البوست حلوة حكاية الة الزمن دى بس انا الحمد للة لا عاوزة ارجع لورا ولا اطلع لقدام انا عاوزة اعيش واقع بصراحة الماضى بالنسبة ليا ذكريات جميلة ليها مكانها ف حياتى والمستقبل بيد اللة وحدةمش عاوزة اسبق الاحداث بس يا ترى لية كنت عاوز تبقى لاعب كرة تحديدا اية كنت هتقطع على حازم امام؟ صعبة دىولا كان زمانك جيبتلنا كاس العالم ماشى يا عم زيدان

    ReplyDelete
  13. الام وامال:
    بس مين اللي يرجع الماضي؟
    هو اللي راح ممكن يرجع تاني؟

    ReplyDelete
  14. shaymaa:
    بس للأسف بيبقى حلم
    تحيااتي

    ReplyDelete
  15. محمد عبد الغفار:
    يا سلااااام يا عم الواقعي
    تحياتي

    ReplyDelete
  16. بص والله يا احمد انا اختار ارجع للماضى بس يدوب هبقى لسه سنه يعنى معرفتش اى حاجه اصلا و لا هبقى استفدت اى حاجه من اللى عرفته عن مستقبلى بس انا نفسى ارجع لما يبقى عندى 6 سنين ايام بيتنا القديم ايام كل حاجه حلوه وافضل كده ما ظنيش انى عايزه اكبر لأنى كل ما اكبر كل ما ايامى بتبقى اوحش
    و بعدين انا اخاف اروح المستقبل لأنه على رأيك احتمال معدش يبقى فى مصر اساسا
    سلامى ليك

    ReplyDelete
  17. لو إطلعتم علي الغيب لأخترتم الواقع، فأنا حأختار أرجع بالزمن 20 سنه .... مش حاغير حاجه أنا مبسوط كده الحمد لله، ومبسوط من إلي وصلتله بنفسي، ولما حارجع حامشي نفس الخطوات تاني بإذن الله

    الحاجه الوحيده إلي حغيرها هي علاقتي بربنا، مش حاعمل المعاصي إلي عملتها وربنا يغفرلي، وحقرب أوي من ربنا، لأن فترات طويله من حياتي كنت بعيد عنه وغافل وساهي.... ربنا يغفرلي ويغفرلك ويغفر للبشر أجمعين

    ReplyDelete
  18. عارف ياأحمد

    ساعات ابقي نفسي اجيب اله الزمن دي و ارجع بيها لزمان و اشوف كانوا عايشين ازاي بس برجع و اقول ان اللي نعرفه احسن من اللي مانعرفوش و ساعات اقول يعني هو احنا عارفين المستقبل ماهو برضه مانعرفوش

    دايما المجهول غامض و مثير بالنسبه لينا بس هل ياتري حلو؟ده السؤال

    موضوعك شيق يااحمد بحييك عليه

    ReplyDelete
  19. موضوع حلو قوى يا أحمد
    بص يا سيدى أنا لا هرحع ورا ولا هطلع لقدام هفضل زى ما أنا لأن الواحد لو ماغلطش مش هيتعلم الصح ممكن كان الواحد هيحاول ما يعملش غلطات كتيرة بس برضة الواحد كان لازم يغلط علشان يتعلم


    تحياتى

    ReplyDelete
  20. بجد سؤال محير جدا

    ترجع ورا تحاول تصلح من اخطاءك

    ولا تتقدم لقدام تشوف حالك بقى ايه

    بس فعلا اللى بتمناه

    ترجع قررررون

    واكون فى عصر رسول الله صلى الله عليه وسلم

    واملى نظرى بوجهه الكريم

    بوست جميل ومميز ياابو حميد

    وشكرا على تشريفك الدائم لمدونتى

    واسف على تقصيرى معاك

    اخيك

    احمد سكر

    ReplyDelete
  21. السلام عليكم

    سواء ماضى او مستقبل او حاضر

    الدنيا كلها تعب ..ولا تسوى فى النهايه جناح بعوضة !

    مش حاسه هيفرق ..الجنة اريح من كل دول

    ربنا يرزقها لنا جميعاً..

    ReplyDelete
  22. السلام عليكم

    هو بصراحة السؤال صعب عاوز ترجع ولا تتقدم بآلة الزمن

    لان فعلا الحاضر مش عاوزين نعرفه هومعروف جاهز
    الماضي مش عارفة ياترى هو المفروض نغير برضه اللى حصل فيه ولا ايه المفروض يكون

    انا افضل ان اللى كان يبقي هو زى ماهو
    على الرغم ان فيه حاجات مش راضية عنها ومش عاوزاها بس هي كانت وهتبقي

    تحياتى
    الموضوع جميل
    وآله الزمن مش موجودة واحنا بنتمنى انهاتكون موجودة

    ReplyDelete
  23. تصدق فعلآ فكره حلوه

    بس انا لو رجعت 20 سنه هاكون لسه ماتلدتش فممكن ارجع 19 بس و اتعلم حاجه تنفعني لاني كنت عبيطه و بعمل زيك بقرا كتب و ادب و دت كورسات و حاجات وحشه كده

    ممكن ابقي اتعلم الرقص اهو الواحد يضمن مستقبله

    تحياتي

    ReplyDelete
  24. ياسر حسين:
    اموت انا في العقليات الاقتصادية الجبارة
    وياريت بالمرة 3 براميل بترول
    تحياااتي

    ReplyDelete
  25. بثينة:
    المشكلة ان احنا نطلع بالزمن لقدام نلاقي ان الايام دي اللي احنا عايشين فيها هي الجنة ونعيمها
    تحياتي واحتراماتي

    ReplyDelete
  26. لورانس العرب:
    انا بقى رأيي ان المطرب او الممثل يكون افضل
    لا بتتطلب لا مجهود عضلي ولا عصبي ولا اي حاجة
    وبعدين لو لاعب كرة مش هتستمتع قوي بحياتك انما لو مطرب.....ياسلااااااااااااااام
    وعلى فكرة
    شرط الصوت الحلو مابقاش مطلوب قوي اليومين دول
    تحياااتي

    ReplyDelete
  27. فاتيما:
    فعلا والله
    هي دي الفكرة الاصوب
    نعيش الواقع
    تحياااااتي

    ReplyDelete
  28. tamer nabil:
    اخرتها فل ان شاء الله
    تحياتي

    ReplyDelete
  29. صاحب المضيفة:
    ولا يهمك يا باشا
    لك كل التقدير والاحترام
    تحياااااتي

    ReplyDelete
  30. unique:
    ماهو انتي لو رجعتي 20 سنة طفلة هتبقي عارفة اللي هيحصل ليكي مستقبلا وبالتالي هتتلافي الاخطاء اللي انتي شايفة انك وقعتي فيها
    عموما خليكي في الواقع اسلم برضة
    تحياااتي

    ReplyDelete
  31. بص يا سيدي
    بما اننا زمايل

    اقولك انا
    لو ينفع تزود المده كمان 6 سنين ونص

    كنت مش هنزل من بطن امي
    ما انا عرفت اللي فيها

    اما لو منفعش نغير المده يبقى الآتي:

    20 سنه ادام يعني اللي جاي هيبقى اوحش من اللي راح
    ده اللي راح كان فيه اجمل سنوات العمر لما كنا لسه بنحلم وبنلعب ومش شايلين هم بكره ولا بنحسبها بورقه وقلم
    ولا نسهر ليالي ولا نعاني

    انما بعد 20 سنه هتاخدنا حب المغامره والاستكشاف وده هيدينا طعم جديد هياخدنا من الاحساس ولو لبعض الوقت لو طلع المستقبل اسوأ بكتير

    اما الماض دقناه وعرفناه وشلينا الهم وياه

    وفرصه برضه نعرف شيء جديد ونشوف رغيف العيش هيبقى بكام

    ههههههههه
    ليس كل ما يتمناه المرء يدركه
    يمكن بكره احلى ويمكن نندم لو جا بكره ونقول فين ايام 2008

    رغيت كتيييييير
    سلام

    ReplyDelete
  32. ذو النون المصري:
    بس اهم حاجة ان الاحباطات دي ماتكونش مستمرة لحد دلوقتي
    تحياتي واحتراماتي

    ReplyDelete
  33. شيكابالا:
    بالنسبة لحازم
    الله يرحمه ويحسن اليه
    الفاتحة بقى على روحه
    تحياتي

    ReplyDelete
  34. نور:
    طيب يا نور...خليكي في الواقع بقى وامرك لله
    تحياتي

    ReplyDelete
  35. وجهة نظري:
    والله احلى كلام اتقال في الموضوع دة
    ربنا يغفر لنا جميعا
    تحيااااتي

    ReplyDelete
  36. اجندة حمرا:
    فعلا...ساعات بيبقى الحاضر هو الحل
    تحيااااتي

    ReplyDelete
  37. bosbos:
    طب اتحركي كام سنة لقدام كدة يا بس بس علشان تقولي لنا ايه اللي هيحصل وارجعي لنا بسرعة تاني
    تحياااتبي

    ReplyDelete
  38. احمد سكر:
    مدونتك من المدونات الرائعة التي تستحق كل تقدير واحترام
    تحياتي

    ReplyDelete
  39. ربما لم تسمع عني يوما:
    ربنا يوعدنا بها جميعا ان شاء الله
    تحياتي

    ReplyDelete
  40. عاشقة الوطن:
    همتك معانا تخترعي لنا واحدة ونهج بيها كلنا من هنا...ومن عارف يمكن نرجع بيها هنا تاني لو الوضع لم يعجبنا
    تحياتي واحتراماتي

    ReplyDelete
  41. emy:
    اهو انتي كدة عقلتي وعرفتي انك غلطتي في حق نفسك
    تحياتي واحتراماتي

    ReplyDelete
  42. زمردة:
    بس رغي جميل ومفيد
    نورتيني يا زميلتي
    تحياتي واحتراماتي

    ReplyDelete
  43. افضل ارجع عشرين سنه للماضى
    هيكون عندى سنتين ونص
    مكنتش هغير كتير على فكره
    بس كان لازم اعقل كلام ماما وبابا ليا والحاجات اللى كانوا بيعلموهالى بطريقه جميله ومحببه بس انا كنت عيله بقى ومأخدتش فى بالى وكبرت
    ولو كنت اعرف اللى هيحصلى فى 2006 كنت هغيرة لانها اكتر سنه تعبت فيها جدا
    ويارب سامحنى
    وسامحنا كلنا

    ولو اطلعتم على الغيب لاخترتم الواقع
    الحمد لله رب العالمين على كل حال

    تحياتى لموضوعك المبدع

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails