Monday, 2 June 2008

بورتومارينا...بتحب الصيف؟



اكيد ماحدش ماشافش اعلانات جولف بورتومارينا الجديدة بتاعة
انا بحب الصيف
واللي مش فاكرها هافكره بيها سريعا
الاعلان عن اسرة من ملاك احدى الشقق بجولف بورتومارينا وكل واحد من افراد الأسرة بيقول هو بيحب الصيف ليـــــــــــــــــــــــــــــــه؟
رب الاسرة بيحب الصيف علشان بيلاقي حد يلعب معاه جولف
حقه.....حد عنده اعتراض؟
ربة الاسرة بتحب الصيف علشان بتحب تقعد في البلكونة قدام الخضرة الواسعة وكمان علشان البيت بيتوضب لوحده ولما بتسافر بيتأجر لوحده
ناس مش بتاعة بهدلة صحيح
البنت الصغيرة بتحب الصيف علشان بتلاقي حد ترقص معاه في اشارة لأكبر نافورة راقصة في الساحل الشمالي
اما الولد الصغير فبيحب الصيف علشان المية في اشارة لأكبر ملاهي مائية في الساحل الشمالي
كل دة مفيش فيه مشكلة على الاطلاق....ناس بيحبوا الصيف وهم احرار
بس فكرة الاعلان اوحت لي بفكرة عن رأي اسرة تانية خالص اقصى احلامهم مش انهم يروحوا بورتو مارينا...لا دة مجرد يتفرجوا على اعلان بورتومارينا في التليفزيون
الأسرة التانية دي بقى للأسف بتكره الصيف ولهم اسبابهم المنطقية برضة زي اسرة بورتومارينا
رب الأسرة بيكره الصيف علشان الميزانية...المصيف حمل رهيب على ميزانيته التعبانة اصلا ثم انه كماليات فارغة وتقليد اعمى
اما المدام فبتكره الصيف علشان بيحتاج غيارات كتير والهدوم بتتوسخ بسرعة وبالتالي بتحتاج تتغسل كتير وبالتالي مسحوق كتير وبالتالي كهرباء كتير وبالتالي مصاريف اكتر
اما بقى الاولاد فلهم مبرراتهم انهم يكرهوا الصيف
من فراغ قاتل علشان بابا مش مشترك لهم اساسا في اي نادي وبالتالي لا يمارسوا اي نوع من الترفيه والرياضة وبيفضلوا محبوسين في البيت
لناموس رهيب علشان المجاري غالبا بتكون طافحة في الشارع
لحر قاتل ما بتنفعش معاه المروحة التعبانة اللي متعلقة في السقف...وطبعا مجرد ذكر لفظ (تكييف) كفيل ان بابا يرنهم علقة محترمة علشان نفوسهم المريضة لا تسول لهم انهم يفكروا التفكير المنحرف دة تاني
الغريب والعجيب ان الاسرتين مصريتين...بس الفرق الكبير ان رب الاسرة الاولى بيلعب جولف والتانية بيلعب في مناخيره...وان ربة الاسرة الاولى بتقعد قدام الخضرة والتانية بتقعد قدام بركة مجاري طافحة في الشارع...وان الاطفال في الاسرة الاولى بيلاقوا حد يرقص معاهم والاطفال في الاسرة التانية مابيلاقوش حد يصوت معاهم
الكوميديا السوداء بقى بتتجلى لما تراقب تعبيرات وشوش افراد الاسرة التانية التعبانة لما بيتفرجوا على الاسرة البورتومارينية في التليفزيون
هتموووت من الضحك...بس للأسف عينك هتدمع في اخر الاعلان

46 comments:

  1. فعلا هم يبكى وهم يضحك
    وطول ما أحنا عايشين هتفضل الفروق دى بين الناس موجودة
    بس بنتمنى يبطلوا الحاجات اللى بتستفز الناس دى


    تحياتى

    ReplyDelete
  2. السلام عليكم ورحمة الله وبركاته

    والله انا باعتبر الناس اللي بتعمل اعلانات زي بتاع برتو مارينا دي ناس مستفزه وماعندهاش دم ومش بتراعي حال البلد والناس اللي طالع عنيها عشان بس يوفروا لعيالهم العيش الحاف

    منهم لله

    سلام

    ReplyDelete
  3. الحمد لله انا مش فاضى اتفرج على اعلانات انا يدوب بلحق بالعافيه انام عند الحلاق

    ReplyDelete
  4. وهو دة وبس
    مش بتشوف اعلان
    u got a friend home
    يعني مستحملين عدم منطقية وعدم توافق اعلانات السلع الاستهلاكية مع حال الناس وبنقول معلش اهو الناس تمتع عنيها بشوارع وبيوت نظيفة
    لكن اعلانات القصور والشاليهات والمجوهرات دي هيستحملها الناس ازاي
    انا اعصابي باظت
    :(

    ReplyDelete
  5. اه يا مفروووسة يااااااااااانى

    ReplyDelete
  6. وليه عيني تدمع آخر الاعلان
    كفايه تدمع في آخر البوست ده
    حسبنا الله ونعم الوكيل
    :(

    خالص تحياتي

    ReplyDelete
  7. و الله عندك حق يا احمد أنا فكرة الأعلانات لغاية التمانينات كدا كانت لطيفة و حاجاتها فى متناول الناس العادية و المتوسطة
    دلوقتى الأعلانات فيها إستفزازا رهيب خصوصاً الأكل و الفيلل و الحاجات دى اللى تحسسك إن الشعب موش عارف يودى فلوسه فين ؟؟
    طب زمان كانوا بيستهدفوا الناس اللى راجعة من الخليج
    دلوقتى بيستهدفوا مين ؟؟
    مين معاه الملايين دى كلها ؟؟؟
    سبحان من له الدوام
    و تحياتى على البوستات المتميزة
    و سلامى لخطيبتك

    ReplyDelete
  8. ااااااااااااخ
    حاجه تصدع الدماغ والله يا عمنا
    هم عايشين في بلد ودول عايشين في بلد
    واحنا عايشين في بلد تالته

    ReplyDelete
  9. التباين الإجتماعي الكبير دا من سمات المجتمعات الرأسماليه، الفقراء يتطحنوا لصالح الأغنياء.... بس برضه في المجتمعات الرأسماليه علشان يداروا كسوفهم بيحاولوا يرموا للفقراء شوية حاجات ومعونات وضمانات إجتماعيه علشان متبقاش الدنيا ضلمه أوي كده

    في المجتمعات الإسلاميه الصوره المفروض تكون مختلفه: "والله لا يؤمن والله لايؤمن والله لا يؤمن من بات شبعان وجاره جائع"

    في مصر خلاص، أفكار الرأسماليه والمشروعات والإنفتاح والعولمه والحكومه الإلكترونيه كلت دماغهم ونسيوا حق الفقير ونسيوا الإسلام ونسيوا التكافل الإجتماعي ونسيوا مشاعر الشعب كله ..... ورقصنا علي السلم، ولا منا بقينا رأسماليين ولا إسلاميين

    العزاء للفقراء والدعاء للمستفزين ربنا يهديهم

    ReplyDelete
  10. هههههههههههههههههههههههه
    واله مش عارفه اضحك ولا اعيط
    بجد انت عرضت موضوع مهم قوى
    بأسلوب اكتر من رائع
    بوست هايل احييك
    اتمنى تنورنى

    ReplyDelete
  11. مين بورت دة ههههه

    اوعى تقول فى مصر

    تحياتى

    ReplyDelete
  12. يا جبااااااااار

    معلش اصل الكوميديا السوده نقحت عليا اوى

    هههههههههههههههه
    مش قادرة عماله افتكر الاعلان
    بجد حاجه تفرس
    صحيح هم يضحك وهم يبكى

    سلامى بقى عشان الحق اخدلى غطس
    لهو انا مقلتلكش انا بحب الصيف ليه
    ههههههههه
    سلامى
    :))

    ReplyDelete
  13. حقيقة أنا لم أشاهد الإعلان لأني مثل محمد عبد الغفار

    بس شاهدت تدوينتك التصويرية ودمعت عيني

    ReplyDelete
  14. bosbos:
    مش ممكن يبطلوا الحاجات دي
    لأن طول ما المشاريع دي بتكتر يبقى معنى كدة ان في قوة شرائية موجهة لها المشاريع دي
    تحياتي

    ReplyDelete
  15. خمسة فضفضة:
    هنعمل ايه بس؟
    ماهو دة زمن الناس دي
    بدل ما يعملوا اسكان متوسط للشباب بيعملوا منتجعات سياحية للأثرياء
    تحياتي

    ReplyDelete
  16. محمد عبد الغفار:
    عموما دة من حسن حظك علشان الضغط والسكر والحاجات دي
    تحياتي

    ReplyDelete
  17. بثينة:
    دي غلطتك
    بدل ما اعصابك تبوظ ممكن ترفهي عن نفسك وتضربي خاتم الماظ محترم
    تحياتي

    ReplyDelete
  18. انسانة:
    سلامتك من الفرس يا ياسمين
    انتي بتحبي الصيف ليه بقى؟

    ReplyDelete
  19. انا بقى لما بشوف الاعلان بقارن بين رب الاسرة بتاع بورتو مارينا وبين رب اسرة اللى بيصلى الفجر وينزل يقف فى طابور العيش .. وبين ربة المنزل فى بورتو مارينا والسيدة اللى ماتت تحت الاقدام فى طابور عيش ... للاسف يا احمد هى دى مصر بقت طبقة عاليه اوى وطبقة مش لاقيه تاكل المتوسطة انقرضت الله يرحمها الفاتحه على روحها بقى

    ReplyDelete
  20. والله مش عارف اقولك ايه يعني الناس مش لاقية تاكل عيش تقوم الاعلانات تقولهم كلوا جاتوه وكمان روحوا صيفوا في بورتوا مارينا

    ReplyDelete
  21. ياسر حسين:
    هو احنا بس اللي بنحس ولا ايه يا فنان؟
    ليه كبارات بلدنا معندهمش العواطف الجياشة دي؟
    هي الفلوس بتموت القلب ولا ايه؟
    تحياتي

    ReplyDelete
  22. فاتيما:
    هو انا الحقيقة مش عارف هم بيستهدفوا مين بس اللي اعرفه ان اكيد في عملاء للسلع دي والا ما كانش اتعلن عنها اساسا
    يبقى اكيد عليها اقبال
    بس مين بقى اللي بيشتروا؟
    الله اعلم
    تحياتي واحتراماتي

    ReplyDelete
  23. zika:
    مش احنا عايشين؟
    طب الحمد لله
    تحياتي

    ReplyDelete
  24. بس يا عم احمد سمعت انا
    ان اللي بيلاقي دلع وميدلعش يبقى غلطان

    مهو صاحب الاسرة الفقيره هو اللي غلطان
    هو اللي مش ذاكر كويس
    وهو اللي مش بيدور على شغل كويس وينمي نفسه
    وهو اللي راضي بحاله وبيتحرك مكانه

    مش كده ولا ايه


    ربنا عالظالم يا شيخ

    ReplyDelete
  25. الاعلانات دى تخليك تحس ان مصر كلها عندها القدرة تروح هناك

    يلا خدنا من بعض الناس على كدة

    انا مدون جديد

    وعايز تشجيع

    تحياتى

    ReplyDelete
  26. انا بتغاظ لما بشوف الأعلانات دى زى ما بيكونوا فعلا قاصدين يحسروا الغلابة على حالهم

    ReplyDelete
  27. ههههههه...حلوة أوي حكاية اللي بيلعب جولف واللي يلعب في مناخيره
    :)
    هي دي مصر يا عبلة
    اه ...قصدي يا سمير
    :)
    تحياتي

    ReplyDelete
  28. ناس كتير معاهم فلوس
    ومش فارق معاهم أي حاجه
    ولا يعرفوا فيه ايه بيجرى في البلد
    ساكنين في فلل بالصحراء عشان يبعدوا عن الناس اللي زينا ومش يبقى لهم أي احتكاك بهم
    عايشين في وادي تاني
    وعلى فكره
    اللي بيشتري في مارينا هو اللي بيشتري في بورتو مارينا هو اللي بيشتري في مدينتي
    الناس هي هي
    مفيش اختلاف بينهم
    لأن هم اللي معاهم الفلوس ( ملايين الملايين)
    والاعلانات دي نازله لهم هم بس
    ومفيش في دماغهم أي مشاكل
    ولاقدر الله لو حصل حرب مثلا هايحصل زي ما حصل في 67
    كله هايسافر على بره
    ويسيبوا البلد للناس التانيين ويقولوا لهم اتصرفوا

    ReplyDelete
  29. ربنا يسامحك

    ده انا ماصدقت اني فكيت

    ReplyDelete
  30. لا تعليق

    بس اقول الحمد الله على نعمه التى لا تحصى ولا تعد

    انا مش من الاسر البورتومارينية
    ولا انا من الاسرة البورتومجارية

    الحمدلله

    عارف يا ابو حميد
    انا اهلى زرعوا جوايا حاجة مهمة جدا
    كانوا دايما يقولولى
    بصى للى اقل منك ماديا هتلاقى نفسك اغنى الناس
    وبصى للى اعلى منك علما واخلاقا وحاولى تكونى زيهم

    علشان كدة لما نفسى الامارة بالسوء
    تخلينى احقد على الاسر البورتومارينية
    تقوم نفسى اللوامة تخلينى ابص على الاسر البورتومجارية
    اقوم احمد ربنا
    على نعمه الكتيييييييييييييير اوى

    تحياتى ليك
    اختك خيخة

    ReplyDelete
  31. وجهة نظري:
    اعتقد ان الفكرة اننا بنتجه للرأسمالية بشراهة وبشراسة غير مدروسة
    مما يؤدي لكل المظاهر العجيبة دي
    تحياتي

    ReplyDelete
  32. ينت مصرية:
    اضحكي وعيطي زي ماانتي عايزة
    لن يغير ذلك من الامر شيئا
    انتي بقى بتحبي الصيف ليه؟
    تحياااتي

    ReplyDelete
  33. tamer nabil:
    ومين قال انه في مصر؟
    هو في مارينا
    تحياتي

    ReplyDelete
  34. shaymaa:
    حاسبي يا شيماء تغطسي وما تعرقيش تقبي تاني
    تحياااتي

    ReplyDelete
  35. عصفور المدينة:
    احسن حاجة يا باشمهندس انك ما شفتش الاعلان
    برضة اللي شاف غير اللي سمع
    تحياااتي

    ReplyDelete
  36. desert cat:
    برغم كل شيء الطبقة المتوسطة لسه موجودة وهي الاغلبية بس في طريقها انها تنطحن من فوق ومن تحت
    ربنا يستر
    تحياااتي

    ReplyDelete
  37. كريم عاطف:
    اعتقد ان بقى في طبقة عريضة من ابناء الشعب دة بيعتبروا التصييف رفاهية اساسا
    تحياااتي

    ReplyDelete
  38. دكتور حر:
    امين يارب العالمين
    تحياتي

    ReplyDelete
  39. شمس:
    مدن جديد وان شاء الله مدون قدير كمان
    تحياتي واحتراماتي

    ReplyDelete
  40. عاليا حليم:
    قاصدين بقى ولا مش قاصدين
    هو دة الواقع
    تحياتي

    ReplyDelete
  41. micheal:
    بس على فكرة
    لو اكتشفوا ان اللعب في المناخير خطر ع الامن
    هيقطعوها له
    تحياتي

    ReplyDelete
  42. لورنس العرب:
    بس من الواضح ان عددهم كتير وفلوسهم كتير
    على فكرة انا مش ضد النوع دة من المشروعات على الاطلاق...اللي معاه فلوس ربنا يزيده
    انما الفكرة هي اهمال المشروعات القومية ومساكن الفقراء لصالح المشروعات الطبفية المحدودة اللي زي دي
    يعني لابد من تطبيق مبدأ اللي يعوزه البيت يحرم على الجامع
    تحياتي

    ReplyDelete
  43. esraa:
    معلش
    ارجعي اتكلكعي تاني
    تحياااتي

    ReplyDelete
  44. بنت خيخة واي كلام:
    ربنا يزيد الاسر البورتومارينية
    وربنا ينتع الاسر البورتو مجارية بالسلامة
    كلهم اولاااادي
    تحياتي واحتراماتي

    ReplyDelete
  45. لغتى هويتى.. الى كل عربى يتحدث بحرف الضاد، الى كل مسلم غيور على لغته وهويته الاسلامية ،الى كل من يريد العز والفخر لأمته وهويته الى من يبتغون النصرة ان شاء الله، الى من يسعون الى الصلاح والاصلاح ...ندعوكم جميعا اخوانى وأخواتى الافاضل الى المشاركة معنا فى هذه الحملة والتى شعارها (لغتى هويتى )وندعوا فيها الى أحياء اللغة العربية فى كل كتابتنا بجميع المدونات والمواقع والمنتديات وموقع الفيس بوك هذا الاسبوع بأسلوب سهل بسيط لا ندعوا الى أستخدام غريب الالفاظ أوالالفاظ الفخمه ولكن ندعواللبعد عن الالفاظ البذيئة والعامية المتدنيه ، لنثبت لانفسنا اننا أمة مسلمة عربية ، نثبت لانفسنا اننا نحب لغتنا ونعتز بها اكثر من اى لغة اخرى، هذا هو هدفنا.... يدك بيدنا ننشر الامر بكل المواقع والمنتديات والمدونات والايميلات- لله عز وجل فقط نفعلها ، لحفظ ماء وجوهنا أما أنفسنا نفعلها ، ليذكر فى التاريخ اننا ما زلنا عرب نفعلها ،لتأتى يوم القيامة امام الله وتقول يارب عملت على نشر لغة كتابك وإحياءها لا اندثارها ...هذه الحملة هى حملتك انت ليست ملك لاحد انت المسؤل عنها امام الله فأنظر ماذا ستفعل!!!!!!!!!! لمزيد من التفاصيل بمدونة (ادم ويحيى) www.sunlightatnight.blogspot.com التصميمات الخاصة بالحملة موجوده بالمدونة فلنرى الله من انفسنا خيرا ونتوكل على الله ونبدأ الان بسم الله ــــــــــــــــــــ

    ReplyDelete
  46. والله عندك حق
    انا رحت بوتو مارينا طبعا الاعلان بيبالغ اوى لان لسه بورتو مارينا لم تستكمل البناء حتى الان
    لكن بصراحة اللى مبنى منها حاجة هايلة جدا وجميلة جدا وممتعة جداجدا جدا
    انا صحيح لا تبع الاسرة الاولى ولا تبع الاسرة التانية
    انا تبع الاسرة اللى فى النص يعنى متوسطى الدخل اللى رقصوا عالسلم لا اللى فوق شافوهم ولا اللى تحت سمعوهم
    وكل صيف وانت طيب
    على فكرة انا كنت كاتبة بوست عن مارينا بعد ما جيت منها ياريت تروح تشوف الصور
    بصراحة فعلا مارينا دى لازم تكوت لعلية القوم مش لامثالنا من العامة والغوغاء والقلة المندسة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails