Thursday, 8 May 2008

اوعى تقول احلف بسماها وبترابها

البريد الالكتروني بيورد عليه رسايل اشكال والوان من ناس نعرفهم واغلبها من ناس مانعرفهاش اساسا
وصلني ميل من صديق مقيم في السعودية
الميل كان بعنوان
(Common Mistakes)
اخطاء شائعة
من وجهة نظر مبتكر الميل دة ان دي

حاجات المفروض انها على لساننا بأستمرار بس للأسف هو شايف انها مش بس حاجات غلط...دي كمان حرااااااااام
اتارينا بنرتكب اخطاء دينية جسيمة وسط كلامنا...بتندرج تحت بند الحرام من غير ما نعرف
والراجل عايز يكسب فينا ثواب
وبالتالي شاف ان من واجبه ان ينبهني اني بأرتكب افعال محرمة وعلي ان اقلع عنها فورا
النوع دة من الرسائل الاليكترونية منتشر بشدة...بعضها مفيد جدا ومقنع تماما...والاغلب غريب عجيب لا يتناسب ويتناسق مع اي عقل واي منطق
والبوست دة عينة من غرائب وعجائب احتوتها رسالة واحدة من عشرات الرسائل من نفس النوع ترد لصناديق البريد الالكتروني يوميا
ونخش في المفيد

اول مرة في حياتي اعرف ان حكم الشعب للشعب يتناقض مع الاسلام (دة من وجهة نظر صاحبنا طبعا) وحسب رأيه
صاحبنا بيرى ان حكم الشعب للشعب جملة دينيا خاطئة على اساس ان الله هو الحكم
وهل هناك اي تعارض بين ان يحكم الشعب الشعب وبين ان الله هو الحاكم؟
غريبة جداااا
طب مش ممكن يكون حكم الشعب للشعب بشرع الله عز وجل
وهل حكم الشعب للشعب هو حكم الجاهلية؟؟؟
انا اعرف ان حكم الجاهلية هو حكم الغاب والقوة...ولا اعتقد ان حكم الشعب للشعب تندرج تحت حكم الجاهلية
مستغرب جدااااا بجد والله
ايه العلاقة بين (حكم الشعب للشعب) وبين عدم الحكم بشرع الله
اللي فاهم يفهمني علشان انا مش فاهم

يا سلاااااااااااااااااام
نجاح سلام دي الى جهنم وبئس المصير
بتقول نعيش لمصر ونمووووت لمصر؟
الزنديقة....الفاجرة!!!!!!!!!!!!!!!!
وهل الجهاد في سبيل الوطن ليس تقربا الى الله عز وجل
وهل هناك تعارض بين ان احيا من اجل مصر ورفعتها وازدهارها او اموت فداءها وفداء ترابها وبين كون صلاتي ونسكي لله عز وجل
طيب ماهو شيء بديهي جدا ان يكون حبي لوطني وحياتي من اجله او موتي فداءا لله عبادة وتقربا لله عز وجل
اوليست الشهادة في سبيل الوطن شهادة في سبيل الله عز وجل؟
ثم ان من سيقبض روحي فداءا للوطن او من سيعينني على تنميته...اليس الله عز وجل
غريبة جدا بجد
لو حد فاهم الفكرة يوضحها لي.....هتجنن يا اخواننا


حااااااااضر
من هنا ورايح هاقول
اعداءنا المسيحيين....ولاد عمنا المسيحيين
محدش يقول اخواننا المسيحيين تاني
وبعدين بنفس المنطق ما ينفعش حد يقول اخواننا العرب كمان...على اساس ان مش كل العرب مؤمنين...في عرب مسلمين وليسوا في مصاف المؤمنين..وفي كمان عرب ملحدين...يبقى بالتالي لا يجوز اطلاق كلمة اخوة الا على المؤمنين
اموت واعرف
ايه التعارض بين مقولة اخواننا المسيحيين وبين انما المؤمنون اخوة
لن افتي او ازعم شيئا دينيا لست على علم به ولكنه سبحانه وتعالى لم يقل انما المؤمنون هم الأخوة..قال تعالى انما المؤمنون اخوة
وبالتالي لم يكن هناك تخصيص..او حصر الأخوة في المؤمنين فقط
دة تفسير لغوي ونحوي فقط وليس تفسيرا دينيا
حد برضة فاهم؟


لاااااااااااااااااااااااااااااااااااااااااااااااااااااااااااااااااااااااااااااااااااااااااا تعليق
دة على اساس ان عبد الحليم حافظ كان واقف بيحلف يمين....ولا واقف في محكمة
دي اغنيــــــــــــــــــــــــــــــــــــــــة.....والله العظيم اغنية
الراجل لا كان بيحلف ولا بيقسم....دي مجرد اغنية
وياليتها اغنية عاطفية.....دي كمان اغنية وطنية....واحد بيغني لبلده
ربنا يرحمه ويرحمنا معاه
رحمتك ياااارب

دة بقى فعلا اللي بيسموه حديث في غير موضعه على الاطلااااااااق
الاية الكريمة لها اسباب نزول ليس من بينها قضية المساواة بين الرجل والمرأة على الاطلااااق
وقوله تعالى ليس الذكر كالانثى ليس معناه ان الذكر افضل عند الله من الانثى
طبعا ليس الذكر كالأنثى فلكل نوع تكليفات وواجبات معينة وطبيعة جسمانية تختلف عن النوع الاخر وبالتالي لا تعارض بين المساواة في الحقوق والاحترام وبين اختلاف طبيعة الذكر عن الانثى
مش كدة ولا ايه؟
وكفاية كدة
الميل كان في حاجات كتير من النوع دة.......بس لحد كدة ومرارتي
الانسان عبارة عن ايه غير مرارة وشوية حاجات فوق بعضها
ايه الهدف من النوع دة من الرسائل؟
هل مصمم الرسائل دي هدفه نبيل فعلا؟ يعني هل هو مؤمن تماما انه يقوم بعمل يتقرب به الى الله ورسوله؟
ربنا يستر على الاسلام بجد
اذا كان دة تفكير المسلمين في القرن الحادي والعشرين...يبقى سترك يارب

54 comments:

  1. الاصوليه
    والاخذ بظاهر النصوص وليس بروحها
    ليس حب الوطن متعارضا مع حب الله
    موضوع الحاكميه موضوع معقد جدا وفيه ناس كتير أفنوا عمرهم كله فيه بس أصلا الاستدلال موجود في غير موضوعه
    كان الرسول ص يستشير أصحابه العظام في أمور الدنيا وفي أمور الحكم
    وكان ص أول من أقر بالديموقراطيه التي يحلوا لأخواننا وصفها بالشوري والفرق هو المصطلح فقط ولا فرق في المضمون كما يعتقدون
    وكما أعرف أن الديموقراطيه هي حكم الشعب لنفسه
    أول القصيده عدم فهم عميق للاسلام وأستدلال لا يدل علي المستدل عليه

    ليس هناك تعارض مابين حب الوطن وحب الله فالحب درجات والواجبات متعدده فهناك واجب لربك وهناك اخر لوطنك ولا يتعارض هذا مع ذاك
    قال رسول الله -ص-أن الشهداء أربعه
    ومنهم ‏مِنْ قُتِلَ دُونَ أرضه فَهُوَ شهيد

    أنا في التالته معترض عليك الأيه الشريفه فيه تخصيص بحروف التعرفي في كلمة (المؤمنون)ومن المعروف أن التعريف للتخصيص
    قناعتي الشخصيه
    قال تعالي (وَلَتَجِدَنَّ أَقْرَبَهُم مَّوَدَّةً لِّلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَاناً وَأَنَّهُمْ لاَ يَسْتَكْبِرُونَ)وقال تعالي
    (قُلْ يَا أَهْلَ الكِتَابِ تَعَالَوْا إِلَى كَلِمَةٍ سَوَاءٍ بَيْنَنَا وَبَيْنَكُمْ أَلاَّ نَعْبُدَ إِلاَّ اللَّهَ وَلاَ نُشْرِكَ بِهِ شَيْئاً وَلاَ يَتَّخِذَ بَعْضُنَا بَعْضاً أَرْبَاباً مِّن دُونِ اللَّهِ فَإِن تَوَلَّوْا فَقُولُوا اشْهَدُوا بِأَنَّا مُسْلِمُونَ)ودي وجهة نظري

    مفيش تعليق علي الاتنين التانين غير أن الاولي لا تقع تحت طائلة الحديث والثانيه لم يعطي أي نظام أنساني للنساء الحقوق التي أعطاهم الاسلام

    موضوع رائع

    خالص تحياتي

    ReplyDelete
  2. يا عم دول شوية ناس فاضية عايزين يدخلونا في مهاطرات بيزانطية علشان يشغلونا عن القرف اللي احنا فيه

    ReplyDelete
  3. فعلا يا احمد
    احنا ساعات بنقول حاجات كتيرة و نيتنا طيبة بس هى بتبقى حرام
    ومفيهاش حاجة اما نعرف الصح
    اه فى ناس بتحبكها شوية بس فعلا فى الدين كل كلمه بينطق بيها لسانك بتتحاسب عليها
    مثلا كلمه و النبى
    بيقولا متقولوش و النبى
    قول بالله عليك
    و دة بردة اكيد صح
    دة رايى
    اما حب الوطن طبعا جهاد فى سبيل الله
    بس اهم حاجاة الكلام و انت بتنطق بيه
    و انت مش عارف مش بتتحاسب انما ادم عرفت
    يبقى لازم تحاسب على الكلام الى بيطلع منك

    تحايتى و مودتى

    ReplyDelete
  4. يابني إنت مش فاهم
    الميل ده الهدف منه إنه يختبر إيمانك
    يعني لما مرارتك تتفقع
    و يجيلك شلل رباعي منه
    لازم تقول
    الحمد لله الذى عافانا مما إبتلى به غيرنا

    ReplyDelete
  5. اااااااااااااااحمد


    وانت عامل ايه دلوقت

    واخبار مراراتك ايه مش كويسين


    مش انا قلتلك قبل كدا دي ناس دماغها فاضيه
    هاقعد اقول كدا كل شويه اقطع نفسي
    يعني

    مش كفايه اسمك عليا

    سلامووووووووووز

    وزة

    ReplyDelete
  6. ابوحميد

    كلامك مضبوط

    بس اهم حاجه النيه

    شاكر جدا مرورك على مدونتى

    تحياتى

    اخيك احمد سكر

    ReplyDelete
  7. هو في فعلا حاجات احنا بنقولها وطلعت غلط

    بس في بردو حاجات بيتقال انها غلط ونكتشف ان اللي قال انها غلط هو اللي فاهم غلط

    زي مساواة الرجل والمرأه

    لن الاسلام هو اللي كرم المرأه واداها حقوقها كلها أصلا وحافظ عليها

    ReplyDelete
  8. alshared:
    الف شكر لك على توضيح وجهة نظرك ورأيك القيم
    بس فعلا انا محتار من النوع دة من الرسائل
    هناك امور اهم بكتير يمكن مناقشتها اكثر من كوننا نطلق على الاقباط اخوة ام لا
    تحياتي

    ReplyDelete
  9. tamer sala7:
    بس فراغهم فراغ سخيف بجد
    لو عايزين ينشغلوا بحاجة ممكن ينشغلوا فيما هو مفيد
    تحياتي واحتراماتي

    ReplyDelete
  10. شئ منطي وشئ غير منطقي

    http://fekrety.blogspot.com/
    زر مدونتي استاذي الفاضل

    ReplyDelete
  11. انا معاك انة فى ناس معقدة شوى

    بس بالنسبة للحلفان

    لايصح الحلفان الا بالله

    السما والارض وحيتك عندى والكلام اللى زية دة مش صح وحرام بجد


    تحياتى

    ReplyDelete
  12. rania:
    تمام,مااختلفناش ان في حاجات بنقولها وبتكون حرام
    بس هل حاجة من اللي في البوست دة بينطبق عليه الكلام دة؟
    يعني الغناء للوطن او الاخوة المسيحيين او ما ذلك
    اعتقد ان دة تحبيك جامد جدا يا رانيا
    تحياتي واحتراماتي

    ReplyDelete
  13. tarek:
    معاك حق والله
    دي ناس متسلطين علينا
    يا ترى مين وراهم؟
    تحياتي

    ReplyDelete
  14. انين الحزن:
    ابعزق نفسي يعني يا وزة
    يعني حتة المرارة اللي فاضلة لي...مستكترينها عليا
    ينفع الكلام دة يعني؟
    مين اللي وراهم يا وزة؟
    انتي منوفية يعني وواصلة اكيد عارفة
    تحياتي واحتراماتي

    ReplyDelete
  15. البوست هايل يا ريس وفعلا الرسايل دي معظمها مستفز جداً
    ....

    لكن في موضوع تاني انا داخل هنا بسببه .. وهو اني كنت بعمل تحقيق عن سرقة المدونات وتحديداً الجرايد اللي بتاخد بعض المواضيع اللي في المدونات وتنشرها عندها
    ولقيت على مدونتك سابقه في الموضوع ده .. فإذا ما كانش عندك مانع استشهد بمدونتك في التحقيق مع العلم اني مش هاذكر اسم الجريدة علشان بس ما تحصلش مشاكل .. فاهمني طبعا
    يا ريت لو كان عندك مانع تقول لي ولو موافق .. يا ريت لو عاوز تضيف حاجه كمان تقولهالي ..
    إيميلي على المدونة
    يا ريت ترد عليا اول ما تقرا التعليق

    سلام يا كبير

    ReplyDelete
  16. بس انا طبعا معاك فى كتير انما احلف بسماها وبترابها لا لان من حلف بغير الله فو كاذب كمان بس انما كفقهه مش هفتى فى حاجه مش عارفاها بصراحه

    ReplyDelete
  17. أكيد الحلف بغير الله غير جائز
    والأدهى أنت نتغني بذلك
    أنا مش مع دفاعك عن أغنية عبد الحليم حافظ
    ولكن مع عدم استخدام الآيات القرآنية في غير محلها
    كأن يكتب مثلا بائع عصائر على المحل
    وسقاهم ربهم شرابا طهورا
    أو واحد يكتب على سيارته
    وزيناها للناظرين
    المعنى القرآني هنا مجاش ابدا علشان عصير القصب ولا علشان واحد فرحان بسيارته
    ودي تعتبر من صور استخدام القرأن الكريم وآياته في غير موضعها تماما

    خالص تحياتي

    ReplyDelete
  18. سكر:
    بالضبط يا احمد هو دة اللي انا قصدته من البوست دة
    النية هي الاهم
    مش معقول كل واحد هنتهمه بعدم الايمان
    وبعدين لا شكر على واجب...مدونتك جميلة وتستحق
    تحياتي

    ReplyDelete
  19. esraa:
    موضوع المساواة دة موضوع كبير فعلا ومحتاج بوست كبير لوحده
    انما فعلا في ناس بتقول حاجات غلط ومش فاهمة انها غلط
    تحياتي

    ReplyDelete
  20. المبدع الناقد:
    وجهة نظر برضة
    بس انا شايف ان البوست كله غير منطقي
    انما هي وجهات نظر
    عموما
    الف شكر على دعوتي لمدونتك الجميلة
    تحياتي

    ReplyDelete
  21. أوعي توعل مني في موضوع التاج..أنا بس مأجله حبتين أما مةوضةغ هذا فردي بأن اللي بيعملوا كده عالم فاضية و رايقه كمان
    تحياتي و كلنا أخوة غصبا عن عين أي حد
    :)
    تحياتي

    ReplyDelete
  22. شيكابالا11 May 2008 at 01:02

    البوست اكتر من رائع وكلام ف الجون والعرض جيد جدا وبجد ليك حق تستغرب لان دة مشالدين الاسلامى الحمد للةديننا دين يسر ربنا سبحانة وتعالى يسرها لعبادة والعباد بيخنقوا على بعض لو فضلنا كدة هنحصل بنى اسرائيل علطول وربنا يستر على الاسلام والمسلمين وعموما صاحبك دة اقطع علاقتك بية افضل

    ReplyDelete
  23. أوعي توعل مني في موضوع التاج..أنا بس مأجله حبتين... أما موضوعك هذا فردي بأن اللي بيعملوا كده عالم فاضية و رايقه كمان
    تحياتي و كلنا أخوة غصبا عن عين أي حد
    :)
    تحياتي

    ReplyDelete
  24. شيكابالا11 May 2008 at 01:09

    سورى والنبى متنساش تسال صاحبك عن الموقف الفقهى لاغنية احلف بالليالى وعيونك يا غالى

    ReplyDelete
  25. هههههههههههههههههههههههههه لا حول ولا قوة الا بالله ايه الحقد الطبقى ده الميل معمول للمصريين بس هههههههههههههههه

    ربنا يهدى بجد انا بطلت ابعت ميلات م كتر الغباء الى بشوفه بصراحه

    ReplyDelete
  26. لا يا احمد
    انا مسلمتش بكل حاجة فى الميل الى جالك
    انا بتكلم على الفكرة فى حد ذاتها
    ان فعلا فى كلمات احنا بنقولها بتكون غلط فى الدين
    و بناخد ذنوب و احنا مش عارفين
    بس

    ReplyDelete
  27. تحياتي

    لا بد من الفصل بين الاشياء...و لا تأخذ
    كل الاشياء و الاقوال في كفة واحدة.

    الاخوة تعني ان الجميع لادم و ادم من تراب...الم يقل سيد المرسلين صلي الله
    عليه و سلم فيما معناه : كلكم لادم و
    ادم من تراب...او كما قال صلي الله عليه و سلم...

    نعيش لمصر و نموت لمصر...هي كناية علي
    الحب الشديد للوطن...و اعتقد ان كل منا مطالب بأن يعمل لصالح وطنه...كما
    كان الرسول الكريم يعمل بيده الشريفة
    و كذلك الاولون...و خرجوا للدفاع عن
    انفسهم و المدينة المنورة...
    لكننا يجب ان تكون نيتنا اننا نعمل و نموت من اجل الوطن اتباعا و تأسيا برسولنا الكريم....
    الحديث الشريف فيما معناه: من مات دون
    ماله فهو شهيد.., ومن مات دون عرضه
    فهو شهيد...او كما قال صلي الله عليه و سلم.

    التفكير قبل التكفير مطلوب...و لا يتم تحريم شيء الا من قبل هلماء الامة...ممثلة
    في المفتي...و المجامع الفقهية.
    تحياتي و تقديري

    ReplyDelete
  28. يا لهوي

    حتى أحلف بسماها و بترابها هيكفرونا بسببها
    :))))

    و الله فعلا ناس فاضية

    بس عموما

    الله أعلم

    ReplyDelete
  29. tamer nabil:
    متفق معاك تمام الاتفاق انه لا يصح الحلف الا بالله
    دي حقيقة
    انما انا اتحدث عن الموقف دة بعينه
    يعني احلف بسماها وبترابها تعبير مجازي تماما..دي اغنية..هزل يعني ولا الراجل حلف ولا حاجة
    تحياتي

    ReplyDelete
  30. darsh:
    نورت المدونة يا باشا
    وبالنسبة للموضوع طبعا انا رديت عليك بالميل ويارب يكون وصلك
    وتشرف المدونة في اي وقت
    تحياتي

    ReplyDelete
  31. appy:
    دة من حلف بغير الله فقد كفر
    انما انا بتكلم ان دي مجرد اغنية وتعبير مجازي
    مش مقصود به القسم في حد ذاته...انما تعبير عن حب الوطن ليس الا
    هو الغرض من البوست ليس فقهي او ديني انما توضيح مدى الامور التافهة اللي بقينا بنشغل نفسنا بيها
    تحياااتي

    ReplyDelete
  32. عزيزي
    تحياتي لك
    و ضيف كمان علي كل دول ان اللي يطلع في مسلسل او فيلم و يتجوز واحده ده برضه حيقولولك حرام
    حاجات كتيره بيحرموها علي مزاجهم
    يعني قاعدين قدام التليفزيون ليل نهار و بيعرفوا كم المعلومات ديه و يحرموها و برضه يقولولك الفرجه علي التليفزيون حرام
    بجد الله يكون في عون الناس من نفسهم
    تحياتي ليك

    ReplyDelete
  33. فى ناس لو مشينا وراهم هتحرم علينا عشتنا وربنا يستر

    ReplyDelete
  34. السلام عليكم
    جميل البوست ومفيد ومهم وبينمس شيء مهم اننا مانكونش قطيع اغنام ونتبع اي حد وخلاص ولا برضو نتبع كلامك بالمثل ونقول وراك آمين ولكن لازم ندرس اي حاجة بنقرأها

    المشكلة في اللي بعته انهم واخدين الامور ديه بظاهر النص حكم الشعب للشعب لا يتعارض في ان الشعب يحكم نفسه بشرع الله وهو كناية عن الشوري والانتخاب وده هو الشرع فلا اري فيها شيء غير انهم قشوريين وسطحيين في تفكيرهم ودينا دين جوهر ونيات
    قيس علي ده كل اللي عرضته وانت كنت محق في نقدك واننا لازم نشغل مخنا ومانبقاش اتباع

    تقبل تحياتي ومروري

    ReplyDelete
  35. معلش انا هاخرج شوية عن موضوع البوست
    لانى اصدقائك قالوا آراء غاية فى الاهمية
    ولا كلام بعد كلامهم

    لكن شدنى العنوان جدا
    وفورا كان تعليقى عليه فى بالى

    اوعى تقول احلف بسماها وبترابها

    ماهو ده اللى فاضل دلوقت منها
    سماها وترابها ،، وافتكر مش هايقدروا يخصخصوهم
    او يفرضوا عليهم ضرايب
    يبقى مش باقى لنا غيرهم


    تحياتى

    ReplyDelete
  36. ياسر حسين:
    انت اثرت نقطة مهمة جدا يا فنان
    الايات القرانية في غير محلها
    منتشرة فعلا بجد
    وسقاهم ربهم شرابا طهورا
    وكان ابوهما صالحا
    وغير ذلك
    عموما
    انت دائما اراءك قيمة
    تحياتي

    ReplyDelete
  37. michel:
    يا باشا دي مدونتك وانت ادرى تحط اي موضوع في اي وقت يناسبك
    والموضوع بعيد عن الزعل تماما
    طبعا كلنا اخوات....سيبك انت ناس فاضية
    تحياتي

    ReplyDelete
  38. شيكابالا:
    اولا الف شكر يا فندم على المجاملة الرائعة دي
    مجاملة بطبعك انتي
    بالنسبة لصاحبي..مظلوم والله الراجل بيجيله الميل زيي بالضبط اصل الايميلات دي منتشرة جامد
    انا بكره كدة مووووت
    بالنسبة لأحلف بالليالي وعيونك يا غالي..دي فيها اقامة الحد على طول
    تحياتي واحتراماتي

    ReplyDelete
  39. هوندا:
    والله ملاحظة قيمة
    فعلا الميل بيناقش جمل وتصرفات مصرية بس
    عالم فاضية فاضية بجد
    تحياتي واحتراماتي

    ReplyDelete
  40. انا مش هتكلم بجد مش هتكلم انا قلت اجى عند احمد سمير اشوف حاج تطلعنى من المود العجيب الغريب اللى انا فيه الافى حاجات اغرب
    طيب سلاااااااااااااااام

    ReplyDelete
  41. rania:
    اكيد طبعا احنا مش معصومين من الخطأ يا رانيا
    وطوال ما احنا بنتكلم لازم نغلط
    الاهم الا يكون الغلط دة عن عمد
    تحياتي واحتراماتي

    ReplyDelete
  42. الربان:
    ويبقى لارائك يا سيدي الفاضل قيمتها ورونقها واثراءها
    تحياتي واحتراماتي

    ReplyDelete
  43. sosa el-mafroosa:
    تقريبا هتفرس زيك قريب يا سوسة
    دي ناس تقصر العمر بجد
    هيبطلونا نغني اغاني وطنية تاني
    تحياتي واحتراماتي

    ReplyDelete
  44. هدف اللى عامل الايميل ده واضح يا احمد وضوح الشمس
    ازاى مخدتش بالك
    هو هدفه فقع المرارة
    ويعينى على الناس اللى شايلة المرارة
    شوف انت بقى ايه اللى ممكن يتفقع عند الناس دى
    اصل مش المرارة بس اللى قابلة للفقع وحياتك فيه حاجات تانية كتيير
    بس انت دعبس كدة وهتلاقى
    تحياتى ليك
    اختك خيخة

    ReplyDelete
  45. حكم الشعب للشعب بما انزل الله تبقى الجملة صح .. لكن لو قلنا حكم الشعب للشعب كده وبس الجملة تبقى غلط وصاحبنا معاه حق .. لأن الشعب مش مالك الأرض عشان يحكم بما يراه ..

    الحلف بغير الله حرام .. سواء كان حليم واقف بيقسم في محكمة أو بيغني .. هو عشان بغني اقول اللي انا عايزه .. على كده ممكن أغني للات والعزى واعبد الشمس مثلا وفي الآخر اقول دي مجرد اغنية يا جماعة .. طبعا مش صح ابدا .. ومش الأغنية اللي حتقيد الحكم الشرعي .. الحكم الشرعي هو اللي حيصحح الأغنية

    بالنسبة للمساواة فبغض النظر عن سبب ومعنى الآية .. فالمساواة لفظ قديم ومحدش من الناس العاقلة بيطالب بيه دلوقتي .. والعاقلين بقوا يطالبوا دلوقتي بالتكامل .. موضة المساواة بطلت حتى بره والدليل .. كتاب الرجال من المريخ والنساء من الزهرة

    على فكرة انت قلبت الناس على حاجات ممكن على الأقل بنسبة واحد في المية تكون صح .. وخليتهم يفتكروا اللي بينصح بيكفر ..
    :)

    أنا عن نفسي لما رجعت وسألت على الكلام ده لقيت معظمه معقول وصحيح .. يمكن غريب علينا .. بس دا مش لأنه غلط .. لأ .. لأننا ما اتعلمناش دين .. ما خدناهوش واحنا صغيرين .. عشان كان بره المجموع .. وكان الدين عبارة عن بر الوالدين وصلة الرحم وحب الوطن وبس

    يعني اقصد إن الناس ما تعرفش عقيدتها ولو سألت أي حد من المعترضين عن أركان الإيمان ؟؟ يا ترى حيعرف ولا يرجع للكتب قبل ما يقول .. فإزاي واحد مش عارف أركان إيمانه .. حيعلق على حاجة في الدين ويقبلها أو يرفضها

    وعموما اقول حاجة إن إحنا نشكر أي حد بيحاول ينصحنا أحسن من إننا نهاجمه لرفضنا نصيحته ونحاول تجنب مواطن الشبهات أحسن .. خصوصا لما يكون ليه حد من المعقوليزم .. وزي ما ربنا سبحانه وتعالى قال .. فإن تنازعتم في شيء فردوه إلى الله والرسول إن كنتم تؤمنون بالله واليوم الآخر ذلك خير وأحسن تأويلا

    تحياتي

    ReplyDelete
  46. اجندة حمرا:
    في ساعات فعلا حاجات بتكون حرام صراحة وبنص صريح سواء من القرأن والسنة ودي مانقدرش نتكلم فيها طبعا
    انما معظم ما ورد في الميل دي عبارة عن تأويلات وتفسيرات لايات كريمة واحاديث شريفة في غير موضعها
    تحياتي

    ReplyDelete
  47. رئيسة حزب الاحلام:
    فتشي عن الوهابيين والسلفيين
    تحياتي واحتراماتي

    ReplyDelete
  48. miss sosa:
    طبعا هدف الميل دة هو اعمال العقل وعدم الانقياد
    ودة اللي خلاني احط تعليق تحت كل صورة من الصور وفي نفس الوقت افتح التعليقات على الموضوع
    فرأيي انا كمان يحتمل الخطأ والدليل ان في تعليقات كتيرة ايدت ما جاء في الميل دة وغلطتني
    الف شكر لمرورك الكريم بمدونتي
    تحياتي

    ReplyDelete
  49. كاميليا:
    على فكرة
    ماتضمنيش ان يفضل سماها وترابها بدون خصخصة
    اكيد في مشروع ليهم في الكواليس
    دة احنا نفسنا احتمال كبير نتخصص
    تحياتي واحتراماتي

    ReplyDelete
  50. bosbos:
    جت لك يا عبد المعين تعينني.....لقيتك يا عبد المعين عايز تتعان
    تحياتي ليكي يا بس بس

    ReplyDelete
  51. بنت خيخة واي كلام:
    ويعني لازم تفسري
    مانا عارف طبعا ان مش المرارة بس هي اللي قابلة للفقع في الزمن دة
    مشيها مرارة بقى
    تحياتي واحتراماتي

    ReplyDelete
  52. ma_3alina:
    اولا الف شكر على تعليقك القيم
    ثانيا خلينا نتفق ان الاختلاف في الرأي لا يفسد للود قضية
    ثالثا:
    النصح مهم جدا برضة ومطلوب ولكن التزمت هو ما ليس مطلوبا
    واليس ما هو اهم من هذه الموضوعات دينيا حتى يتم مناقشتها
    عموما انا تناولت نقد للميل دة من باب عقلي واجتماعي ربما اكون مصيب ربما اكون مخطىء
    تحياتي

    ReplyDelete
  53. انا كمان شفت الميل ده و اتغظت منه جدا
    مش معقول نحمل الدين ضيق عقولنا و أفقنا و نتكلم بإسم الدين و احنا ماعندناش العلم الكافي لذلك
    ربنا يرحمنا من الزمان اللى هيوكل فيه الأمر لغير أهله و أظنه بدأ
    تحياتي

    ReplyDelete
  54. صاحب المدونة اقل ما يقال عنه (زبالة) وجاهل والمواضيع المطروحة هي قمة في الجهل وياللاسف ما اّلت اليه امور المصريين وانحدارهم الى الدرك الاسفل

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails