Thursday, 29 May 2008

انسف....تخلص من محافظك القديم



الوجه مطموس المعالم اقصى يمين الصورة هو وجه السيد محافظ الدقهلية السابق
واللوحة دي لوحة نفاق عادية جدا موجود زيها في جميع انحاء مصر من اسكندرية لأسوان
بس الراجل اللي عامل اللوحة دي ماعملش حسابه ولا وضع في اعتباره ان التغيير سنة الحياة
ولم يخطر بباله ان المحافظ ممكن يتغير في يوم من الأيام (اصله كان طول قوي في منصبه).......بس سبحان من يغير ولا يتغير
المهم ان الراجل وقع في حيص بيص لما حركة المحافظين الأخيرة طلعت والمحافظ اتقلش
طب يشيل اليافطة خالص؟؟؟
طبعا لا....لسة في صورة في اليافطة عايزينها...لسة ماتغيرش
وعلشان الراجل ما يبقاش موقفه وحش مع المحافظ الجديد....وعلى طريقة الفراعنة الأزلية وهي ازالة اثار القدماء
قرر طمس معالم وجه المحافظ القديم وكأن شيئا لم يكن في انتظار صورة عظيمة للسيد الوزير المحافظ الجديد
السؤال هنا
المحافظ القديم هل كان يتخيل وهو شايف صورته ان دة هيكون مصيرها بعدما يترك موقعه؟
السؤال الأهم:
هل كان يتخيل انه هيترك موقعه اساسا؟
السؤال الأكثر اهمية:
في صورة تانية في اللوحة.....ياترى هيكون ايه مصيرها بعدما يترك موقعه بأرادة الهية طبعا؟
السؤال الأخير:
فين صور عبد الناصر والسادات اللي كانت الشوارع مليانا بيهم في عهديهما؟
وليه اللي بعدهم لم يتعظ ومنع مثل هذا النوع من النفاق الرخيص؟
بس في النهاية ومع وضع صور المحافظين في شوارع محافظاتهم وكأنها املاكهم الخاصة لا يسعني الا ان اقول
اذا كان رب البيت بالدف ضارب فشيمة اهل البيت الرقص

50 comments:

  1. Ahmed

    This is the

    Post of the day
    :)

    ReplyDelete
  2. قرر رئيس مجلس ادارة الجريدة مشكورا أن يتبنى كل ما يكتبه المدونون
    وان يفرد مساحة لا بأس بها لبوستات البلوجرز
    كما وافق على نشر البوستات المرشحة بتوقيع كتابها وصورهم
    وذلك ايمانا منه بقوة التدوين وبأنها صوت المصريين
    ***
    على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
    ان يرسل البوست المرشح مذيل بتوقيعه وعنوان المدونة والإسم الحركى ان اراد
    مرفق بصورة شخصية له
    على الإيميل التالى

    amyasser@hotmail.com

    أو ترك اللينك الخاص بالبوست والمعلومات الخاصة بالمدون فى تعليق على العنوان التالى

    www.amyasser.blogspot.com

    تحت عنوان خاص لجريدة الأسرة العربية
    الجريدة تصدر الإثنين من كل أسبوع

    ReplyDelete
  3. عارف يا أحمد أنا شفت أعجب من دي
    اسم الراجل اللي عامل الإعلان نفسه اتمسح واتكتب مكانه اسم الحزب

    ReplyDelete
  4. :)))
    طبعا يا عم أحمد
    ده يوم الاضراب البلد كلها كانت صوره بتحمل عنوان شباب بتحب مصر
    وخلص الاضراب ولحد دلوقتي محدش عارف جت منين ولا مين علقها

    ReplyDelete
  5. تمام

    ما هو لامؤاخذة عبيط

    اللى عاملها

    ويمكن كان ساعتها محتاج قرشين

    د/هيما

    ReplyDelete
  6. السلام عليكم ورحمه الله وبركاته
    جزاكم الله خيرا اخى
    معك حق سبحان مغير الاحوال
    وكما تقول الحكمه
    لو دامت لغيرك ماوصلت اليك
    نسال الله ان نكون ممن يقتلعون كل لوحات النفاق ان شاء الله

    ReplyDelete
  7. عزيزي أحمد

    صدقت فيما قلت.
    لقد نسي هؤلاء يوم البعث والسؤال.

    وأيضاً أعلنوا غبائهم الشديد.
    وإن كان كل ما يفعلونه نفاق معلوم الهوية.

    دمت بكل ود

    أسامة

    ReplyDelete
  8. ده العادى يا احمد
    ناس عايشه فى الشوارع وبتنام تحت كبارى
    وناس بتنافق لمصالح شخصية
    ويروح محافظ تتشوه صورته ويتحط مكانها صوره المحافظ الجديد ويروح رئيس يتعمل فيه نفس الموضوع
    رئيس ايه الى يروح ده انا متفائله اوى
    ده شكلنا احنا واحفادنا اللى هنروح وهو لسه
    تحياتى

    ReplyDelete
  9. مش بس نفاق واضح زي عين الشمس لأ دة كمان مقترن باستخسار
    طيب كان يغير اليافطة
    فيه ناس بيسترزقوا من اليفط و شغلهم موسمي
    ننافق ونسترزق
    :D

    ReplyDelete
  10. حانعيش ونموت فراعنه هههه

    ReplyDelete
  11. شيكابالا30 May 2008 at 00:42

    سياسة الحزب الوطنى تنص على وشك وشك قفاك قفاك ودة حال الدنيا عاش الملك مات الملك والسلام ختام بس بجد بوست جامد يا بوحميد بس انا خايفة عليك تقضى الصيف السنة دى ف احضان الطبيعة بطرة لم الدور ياحمادة عاوزين نفرح بيك ولا انت مش عاوز؟

    ReplyDelete
  12. ahmed shokeir:
    thank you very much

    ReplyDelete
  13. اسوور:
    شكرا جزيلا للجريدة
    تحياتي

    ReplyDelete
  14. عصفور المدينة:
    اهم حاجة ان المصلحة تقضى
    اسمه او اسم الحزب ماتفرقش معاه
    اهم حاجة مصلحته الشخصية
    تحياتي

    ReplyDelete
  15. وما أنت بمسمع من في القبور
    ---
    هي دي فتنة الدنيا
    ربنا يحفظنا
    ويصلح احوالنا
    ---

    على فكرة انا ببعت التعليق ده وانت كمان بترد على التعليقات
    :D

    ReplyDelete
  16. يا سيدي الفاضل احنا هنا في مصر من عباد الصور
    تجد كل واحد شايل صورة واحد وعمال يهلل بيها
    وبمجرد تركه منصبه طبعا يبقى راح هو كمان
    ويبدأ اللي كان شايل صورته في رفع صورة الراجل الجديد
    وشوف مصلحتك يا سيد

    ReplyDelete
  17. كان ملوك الفراعنة بيحطوا طبقة من الجير فوق الخرطوشة اللي مكتوب فيها الملك اللي قبلهم ... و ينقشوا عليها اسمائهم فتنسب اليهم اعمالا لم يقوموا بها ... و كان كل ملك يعرف انه اللي بعده هيعمل فيه كده

    ReplyDelete
  18. لو كل واحد اتعظ

    وعرف إنها مش دايمه له

    كل الأمور هتبقى تمام

    والله المستعان

    تحياااااااتي

    ReplyDelete
  19. هم مايعرفوش
    ان المنافقين ... في الدرك الاسفل من النار
    عايزين نبقي نعلق يفط نقولهم تحت اليفط بتاعتهم نقولهم
    اللي بيكدب بيخش النار
    :D

    ReplyDelete
  20. محمد مفيد:
    لا..من ناحية اللي علقها...ماتشغلش بالك اصلهم كتيــــــــــــــــــر
    تحياتي

    ReplyDelete
  21. dr-hema:
    لا....هو مش عبيط...هو حويط
    من الاخر....منافق
    تحياتي

    ReplyDelete
  22. د/ابويحيي و ادم:
    بس مين يقرا ومين يسمع؟
    تحياتي

    ReplyDelete
  23. مصري:
    كل اللي يهم الناس دي هي لمصلحة الشخصية فقط ولتذهب البلد كلها للجحيم
    بس العيب في اللي ادوهم الفرصة لكدة
    تحياتي

    ReplyDelete
  24. عادى ياعم

    احنا مع من غلب

    مات الملك عاش الملك

    ReplyDelete
  25. شفت فيلم أرض النفاق
    للفنان فؤاد المهندس
    الله يرحمه
    الفيلم ده أكثر فيلم واقعي ممكن تتفرج عليه في مصر
    :)

    خالص تحياتي

    ReplyDelete
  26. هي دي مصر وحتي لو اراده ربنا اتحققت انهارده بكره هتلاقي كل الصور بتاعه سيادته اتباعت خرده

    ReplyDelete
  27. شر البلية ما يضحك

    ReplyDelete
  28. desert cat:
    هيروح والله زي ما غيره راح
    بس كله بارادة ربنا وكله باوانه
    بس السؤال فعلا
    الصور الرهيبة اللي في كل حتة دي..هتروح فين ساعتها؟
    تحياتي

    ReplyDelete
  29. بثينة:
    شكلك كدة يا بثينة فاتحة محل يفط ولا ايه؟
    عموما اكيد هيعمل يفطة جديدة للمحافظ الجديد بس هو منتظر توافر صور له وممكن كمان مستني ما يقدم شوية
    تحياتي

    ReplyDelete
  30. وجهة نظري:
    المصيبة السودة ان احنا اخدنا من الفراعنة ابشع ما كان فيهم
    تحياااتي

    ReplyDelete
  31. شيكابالا:
    والله حسب الظروف
    اهه كله قفص
    بس واحد قفص حديد والتاني قفص ذهب
    هيـــــــــــــــــــــــــه
    دنيا
    كلنا لها
    تحياتي واحتراماتي

    ReplyDelete
  32. مهو لازم ينافق عشان يعرف يعيش

    هيعيش فى بلدنا ازاى
    مهو شايف وعارف ان لا الى بيشتغل صح ولا الشريف واخدين حقهم فى البلد دى
    قالك مامشى مع الموضه وكله بحسابه

    بجد حاجه تقرف

    سلامى

    ReplyDelete
  33. هههههههههههههههههههه

    والله ضحكتني يا أحمد

    صحيح نفاق في نفاق

    لا لما الصورة التانية تتغير امثال الراجل صاحب الفرن هيتعدموا بالمصقلة

    تحياتي ليك ومبروك عليك بوست اوف ز داي

    ReplyDelete
  34. الام وامال:
    لا نملك الا الدعاء
    تحياتي واحتراماتي

    ReplyDelete
  35. لورنس العرب:
    العيب مش في اللي رافعين الصور...العيب في اللي في الصور ومبسوطين بكدة
    تحياتي

    ReplyDelete
  36. karakib:
    وياريتنا بنقلدهم في حاجة كويسة
    دة احنا بنقلدهم في اسوأ حاجة فيهم
    تحياااتي

    ReplyDelete
  37. هى دى سياسة مصر للاسف
    عاش الملك مات المملك

    ReplyDelete
  38. لا حول ولا قوة الا بالله
    هو امتي ربنا حيتوب علينا من الأشكال الزبالة دي
    شوية ممتاز القط وشية البيه المحافظ وقبل كده إبراهيم نافع
    ده حاجة تشل يا جدع
    ملحوظة...يا باشا أنا مش مقاطع مدونتك هالص بس زي ما أنا وضحت في البوست قبل الاخير في مدونتي مشعول جدا وبالذات أن الوقت ده فيه أخبار كتير عن سوق الانحراف..قصدي الاحتراف في مصر+فيه بطولة واخده معظم وقتي علي النت إسمها يورو2008 بس بجد مدونتك من ضمن مدونات كتيييير وحشاني جدا ومفتقدها
    و بإذن الله الأسبوه الجاي حيكون عندي بعض الوقت للتصفج
    تحياتي

    ReplyDelete
  39. هيييييييييه
    محدش هيخلل
    :)

    تحياتى

    ReplyDelete
  40. salwa:
    بس الاهم انهم يتعظوا
    تحياتي

    ReplyDelete
  41. zika:
    زي اللي بيسرق بيروح مارينا كدة
    تحياتي

    ReplyDelete
  42. مالك الحزين:
    اصل الملك الاولاني طول قوي
    تحيااااتي

    ReplyDelete
  43. ياسر حسين:
    الفيلم دة كان سابق عصره
    تحياااتي

    ReplyDelete
  44. اميرة الصعيد:
    طب لو هو عارف كدة
    ليه مش بيعمل بالمثل اللي بيقول
    بيدي لا بيد عمرو
    تحياتي

    ReplyDelete
  45. blackcairorose:
    اوجزتي فأنجزتي
    تحياااتي

    ReplyDelete
  46. shaymaa:
    العيب مش عليهم....العيب على اللي فرحانين بالنفاق
    تحياتي

    ReplyDelete
  47. mermaid:
    الله يبارك فيكي
    حمدا لله على السلامة

    ReplyDelete
  48. رئيس جمهورية نفسي:
    بس للاسف الشديد
    دي سياسة مصر من ايام الفراعنة
    تحياتي

    ReplyDelete
  49. micheal:
    بالتوفيق يا باشا
    ان شاء الله ايطاليا هي بطل اوروبا
    تحيااتي

    ReplyDelete
  50. rania:
    تفتكري محدش هيخلل يا رانيا؟
    انا اعرف حد خلل قبل كدة
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails