Saturday, 17 May 2008

كشف الهيئة


اللي قرأ رواية عمارة يعقوبيان للكاتب الرائع علاء الاسواني اكيد يعرف مين هو
طه الشاذلي
وللتذكرة للي قراها وللتوضيح للي ماقرأهاش
طه الشاذلي هو ابن البواب واللي كان حلم حياته هو الالتحاق باكاديمية الشرطة....انما طبعا اصطدم بواقعه الاجتماعي وبالتالي رسب في كشف الهيئة والتحق بكلية الحقوق وتصاعدت الاحداث الى ان انضم للجماعات المسلحة وكانت نهايته انه قتل في اخر الفيلم
انما الموضوع دة مش عن طه الشاذلي ولا عمارة يعقوبيان انما عن
كشف الهيئة
وكشف الهيئة دة هو مسمار جحا اللي بيتخذ حجة او ذريعة لرفض دخول شخص ما الى كلية من الكليات العسكرية او النيابة او القضاء او السلك الدبلوماسي

اماكن ووظائف الصفوة في البلد دي

وانا اقصد اني اقول في البلد دي...لأن في اي بلد تانية مفيش شغلانة للصفوة وشغلانة لأولاد البطة السودة على اساس ان الكل بيخدم بلده...الكناس بيخدم بلده زي رئيس الجمهورية بالضبط

جمعتني مناقشة بين اتنين من اصدقائي احدهما مؤيد وبشدة لكشف الهيئة والاخر معارض له تماما وبيعتبره تعنت وظلم

صديقي المؤيد له بيرى ان كشف الهيئة دة بيمنع بلاوي وان لولاه لحدث ما لا يحمد عقباه
وان ازاي قطاعات مهمة زي الجيش والشرطة والقضاء يلتحق بيها ابناء البوابين والفلاحين والفقراء اللي اغلبهم بيكون مليان عقد نقص ومركبات نفسية معقدة جدا
وان القطاعات الحساسة دي لازم اللي يلتحق بيها تكون عينه مليانة وابن ناس علشان يتعامل مع الناس بلا اي مركبات او عقد نقص وبرضة علشان ما يستفيدش من وظيفته
صاحبي دة برضة بيشوف ان الفترة اللي شهدت تراخي في تطبيق كشف الهيئة وما صاحبه من التوسع في القبول بالكليات العسكرية شهدت دخول ضباط انقلاب يوليو للجيش المصري وما ادى اليه من حدوث انقلاب يوليو العسكري
والغريب والعجيب ان نفس الضباط دول بعد ما تمكنوا من حكم مصر سدوا الباب على ابناء الفقراء من دخول الكليات العسكرية وطبقوا كشف الهيئة بس بطريقتهم الخاصة طبعا
يعني طلعوا على السلم ولما وصلوا كسروا السلم علشان ماحدش يعرف يطلع تاني
صاحبي دة بيشوف ان الواطي واطي.....وبيبرهن على صحة رأيه بالمثل الشعبي الشهير
ديل الكلب ما ينعدل ولو علقوا فيه قالب
اما صديقي المعارض لكشف الهيئة فبيشوف انه انانية وبشاعة وانه ضد الانسانية وحقوق الانسان وقبل كدة وكدة انه ضد الاديان اللي بتحض على المساواة وعدم التفرقة بين الناس على اساس الحسب والنسب
وان مش بالضرورة ان اي حد بسيط ومن اصل متواضع انه يبقى واطي....وان كل عظماء مصر على مدار تاريخها من البسطاء وابناء فلاحين ولا يملكون الحسب والنسب
وان المعيار الحقيقي لالتحاق اي شخص بأي وظيفة في الدنيا هي كفاءته ومدى قابليته لأداء الوظيفة دي وليس بمدى اسم عائلته ووظيفة والده او توصية عمه او خاله
****************************
الجدل مستمر.....انا عن نفسي مقتنع بجزء من كلام صاحبي الاولاني عن ان كشف الهيئة مهم وانه بيحوش بلاوي وفي نفس الوقت مقتنع تماما بمبدأ تكافؤ الفرص وان كل بني ادم من حقه يحصل على فرصته طبقا لمهاراته وكفاءته فقط لا غير
كشف الهيئة......مفتري ام مفترى عليه؟

47 comments:

  1. المفترى عليه هنا هو النظام
    أى مكان محترم فى الدنيا بيحط نظام و قواعد و أصول يجب أن تتبع و شروط لازم تتوافر فى الشخص المتقدم ..أي كان أصله و فصله المهم إنه كفؤ للمهمة أو المنصب و بيجتاز الاختبارات بنجاح ..
    يعنى هوه كل واحد شبعان و متعلم تعليم عالى يبقى أبن ناس و محترم ؟
    ما هو ممكن يطلع واطى برضو و لو جاتله الفرصة يدوس على رقاب الناس هيعملها ...
    العبرة با لنظااااام
    الكلمة دى اللى ملهاش عيش فى البلد دى
    و تحياتى يا احمد

    ReplyDelete
  2. من قال أن الأخلاق حكر على الغني و"اللي عينه مليانة" ؟

    ومن قال أن كل فقير لديه عقدة نقص ؟

    ومن قال أن كل الأغنياء ملائكة ؟

    ومن قال أننا يجب أن نكتفي بالاحتكام إلى ضمائر الناس ؟

    المفروض أن نعيش في دولة قوانين .. تتاح الفرصة لكل الناس سواسية أغنياء وفقراء ..

    ويحاكم كل مسئ فيها .. غنيا كان أو فقيرا ..

    ---

    رأي صديقك الثاني ممتاز

    وصديقك الأول في كلامه - عن حسن نية - بعض العنصرية

    دمت بخير

    :)

    ReplyDelete
  3. طبعا كشف الهيئه افترى لأن كل شخص ليه الحق يتقدم ويتقبل طالما هوا كفؤ لكده
    اما رفضه لأن اهله فلاحين او كده دا اسمه عبط وظلم وتعصب و بعدين مين قال ان الناس اللى فوق او اللى دكاتره وقضاه اولادهم هيبقوا محترمين او ناس كويسه و بعدين هما اللى فى الشرطه دلوقتى كويسين اوى يعنى
    و صديقك الأولانى- انا شايفه انه كده عنصرى - اللى بيقول ان الفقرا عندهم عقدة نقص ملهاش علاقه بالفقر دى النقص دا بيبقى تبع دماغ ونفسية البنى آدم غنى او فقير
    و زى ما فاتيما قالت هوا بيبقى نظام بس للأسف احنا من غير نظام
    سلام

    ReplyDelete
  4. المفروض إن المقياس الوحيد يكون الكفاءة
    وكل مهنة بيكون ليها مواصفات
    وممكن يكون كشف الهيئة وسيلة سليمة لإختيار الكفاءات
    لكن اللي بيحصل عندنا لاهو كشف هيئة ولا نيلة

    تحياتي

    ReplyDelete
  5. اتفق معك علي اهميه كشف الهيئه ولكن هل يتم مراعاه كل الجوانب والتزام مبدأ الحياديه ؟
    هذا السؤال
    موضوع مميز يا احمد

    ReplyDelete
  6. السلام عليكم

    والله انا شايفه انو طالما مفيش قانون ربانى او حتى فى قوانين الدوله حكر ع الطبقه المرتاحه فيبقا المساوه الحل طبعا لان المهم الى يدى وبعدين اى مكان عمل ليه قوانين وشروطه ولو الى بيشتغل ممشاش عليها ممكن يتفصل بسهوله كما ان اى فرد بيتطبع ع المكان الى شغال فيه
    والرؤساء الى ماسكين مصر ولاد مين؟؟؟؟
    فلاحين وبسطاء بردو المهم الدماااااااااااغ
    وقولى ياسيدى اخدنا ايه م الناس الهاى فاى الى فاهمين زوق وكتاكيت مجوعنا اهو ده حتى الفقير هيحس بالفقرا الى زينا

    ReplyDelete
  7. عزيزى احمد

    موضوع كشف الهيئة هو زيه زى اى نظام يطبق لقبول اى شخص فى مؤسسة سواء كانت شركة او حتى نادى فاصحاب هذه المؤسسة يتفقوا فيما بينهم على شروط القبول لاى شخص ينضم اليهم و يتم تطبيق الشروط غالبا الا فى حالات استثنائية معلنة لاسباب منطقية او خفية لاسباب المحسوبية

    و بالتالى فان النظام فى حد ذاته مافيش اعتراض من وجوده ..ده لازم يبقى موجود و الا العملية هتبقى مهلبية

    امال ايه المشكلة؟

    المشكلة الاولى
    فى الشروط المجحفة التى يتم تطبيقها لقبول الاشخاص فى هذه الاماكن الحيوية و يتم تطبيق فيها اقسى انواع الطبقية و التحيز و الحكم الاجمالى على
    الاشخاص بسبب مهن اسرهم و اقاربهم او حتى اصولهم الاسرية و هذا يكرس العقد النفسية التى يدعوا انهم يضعوا هذه القواعد لتلافيها

    المشكلة الثانية
    و هذا هو حقا ما يثير السخرية انه رغم تطبيق هذه الشروط المجحفة و تنقية الناس التى تعمل بهذه الجهات على الفرازة كما يقولون الا ان هذا لا يمنع ان الفساد يستشرى فى هذه الهيئات مثله مثل اى مكان اخر فى المجتمع لا يطبق هذه القواعد و بالتالى هذا يثبت ان هذه الشروط عديمة الفائدة و لا نستفيد منها الا تكريس الحقد المتبادل بين طبقات المجتمع المختلفة

    و الحل؟

    الحل فى رايى هو تخفيف هذه الشروط المجحفة الى اقسى حد و الاكتفاء بكون المتقدم شخصيا كفء و يداه نظيفتان و صفيحة سوابقه بيضاء و لا نعاقبه باصوله او ناخذه بذنب اقاربه و فى نفس الوقت تكون هناك جهة محايدة تراقب اداء كل اعضاء الاشخاص المنتمين لهذه الجهات الحساسة بصفة منتظمة و دورية لضمان استمرار استقامتهم لان للاسف هناك الكثير من يدخل هذه المؤسسات السيادية و هو زى الفل و لكن تفسده القوة و السلطان

    معلش طولت عليك بس الموضوع فعلا يستحق

    خالص تحياتى على الموضوع الممتاز

    تحياتى
    هش

    ReplyDelete
  8. شيكابالا17 May 2008 at 23:57

    خلينا نمسك العصاية من النص ونقول كشف الهيئة مهم بس ليس للتفرقة بين ولاد الذوات وغيرهم لا للحكم على التركيبة النفسية للاشخاص دة ينفع ولا لا؟الحكم ع الكل الغنى والفقيرمعلش احنا برضة بنشوف الواد الصايع اللى بيشرب مخدرات اللى بيبقىبين يوم وليلة وكيل نيابة وظابط كمان هو دة العدل؟احنا كدة هنتسبب ف وجود مليون طة الشاذلى مع العلم انى برضة ضد ابن البواب اللى هيطلع عقدة علينا يبقى نحتفظ بكشف الهيئة مع وجود خبراء نفسسين للتقييم ونبعد عن الكوسة والواسطة اصل البرنس علاء مخلاش ولا مكان لولاد الجناينى يرضيك كدة دة حتى انجى زعلانة موت

    ReplyDelete
  9. والله كشف الهئية المفروض يكون وسط بين الاتنين

    يعني لا مقفول خالص ولا مفتوح خالص


    ويكون معياره هو الكافءة المهنية والأخلاقية على السواء

    ساعتها


    هاتكون ادلنيا نظبطة وزي الفل


    سلاماتي

    ReplyDelete
  10. على فكرة انا كنت هقول انا متفقه مع جزء من كلام صاحبك الاولانى وقولت هلاقى هجوم محصلش
    لكن الحمد لله قريت رأيك فى الاخر ولاقيت اننا التقينا فى نقطة واحده
    تحياتى

    ReplyDelete
  11. اى مكان بيكون فى قواعد ونظم وقوانين يمشى عليها

    لافرق بين انسان واخر الا بالعمل

    اما لو تم تحديد شىء معين عن الاخرين دة يبقى عنصرية

    تحياتى

    ReplyDelete
  12. المفروض يكون فيه كشف والكل يتساوى الغنى والفقير واللى عنده اسم عيلة واللى ماعندوش ويبقى فيه اختبارات وهيا اللى تحدد مين يدخل ومين لا
    ولكن مش علشان واحد غنى وابن فلان يبقى هو اللى يدخل ده مش عدل

    تحياتى

    ReplyDelete
  13. يعني كشف الهيئه وولاد الناس رحم المواطنين في أقسام الشرطه من سفالة الظباط؟؟ وبعدين هما مش بيختاروا ولاد الناس اوي، دول بيختاروا ولاد الواسطه، ومين قال إن مافيهومش عقد؟

    في الكليات العسكريه في جميع أنحاء العالم إلي بتخرج الظباط في كشف هيئه قوي جدا، بس مافيهوش حكاية ولاد الناس دي، لأن كل الناس ولاد ناس مش ولاد قطط، إنما معايير الشرف والنزاهه.

    أنا شخصيا مقتنع بفكرة صاحبك التاني

    ReplyDelete
  14. تحياتي

    في رايي ان الفرصة لابد ان تتاح للجميع
    ابن البواب...ابن الباشا...ابن البطة العرجه...
    لكن لابد ان يكون هناك معيار دقيق و عملي...مثل اختبار نفسي مثلا..للتمييز
    بين المتأهلين.

    يوجد المنحرفون في كل مواقع العمل و لا فرق بين ابن الباشا او ابن البواب
    طالما الاستعداد موجود...

    تحياتي و تقديري

    ReplyDelete
  15. الحيادية فى كل شىء
    مهم كاجراءات و انى بشوف الاصلح
    انما الاصلح ابن غنى او فقير المفروض ان دة ميخصنيش الى يخصنى ان الى بيدخلوا المكان دة يبقوا مؤهلين

    تحياتى

    ReplyDelete
  16. يجب عدم الخلط بين موضوع المحسوبية وموضوع ان فلان ابن ناس اثرياء
    أو من اسرة عريقة
    فدخول الواسطة في كشف الهيئة والرشاوي أحيانا في بعض الاماكن
    أدى إلى ظهور الموظف المرتشي اللي عايز يعوض الفلوس اللي دفعها رشوة ليتوظف
    وأدت إلى ظهور الضابط الفاسد الذي يخرج كل كبته وحرمانه على الناس الغلابة بدل ما يتعاطف معاهم لأنه كان يوما ما منهم
    لكن ان يكون الاصل والفصل من قواعد كشف الهيئة
    فأنا لست معترض بالمرة على هذا الأمر
    لأن لا يجوز أن يكون المتقدم إلى وظيفة ببنك مثلا أن يكون أحد افراد اسرته ممسوك في قضية تمس الشرف
    وعلى فكرة ليست قاعدة مطلقة أن كل الفقراء يعانون من عقد نقص
    فهناك منهم من يحسبهم الجهلاء أعغنياء من التعفف على حد تعبير الوصف القرآني

    خالص تحياتي

    ReplyDelete
  17. عايز أقول نقطة

    فى فرق كبير بين كشف الهيئة

    والاختيار لمجرد الوسامة

    وبما انى متخصص فى علم النفس

    هنتهز الفرصة واوضح

    أن مفيش أى علاقة بين الشكل وبين الذكاء او الغباء

    لكن كشف الهيئة ضرورى عشان نضع الشخص المناسب فى المكان المناسب

    الشخص فقط لكم ملناش دعوة

    بمهنة ابوه زى حكاية طه

    تحياتى

    وشكرا على قبولك صدقتى

    أحمد

    ReplyDelete
  18. والله يا احمد انا شايفه انه لابد من تكافؤ الفرص
    واترك كفاءة الشخص هى اللى تحكم مش مستواه الاجتماعى
    تحياتى

    ReplyDelete
  19. فاتيما:
    طبعا مش كل واحد شبعان ومتعلم تعليم عالي بيكون ابن ناس ومحترم ولكن نسبة انه يكون واطي بتكون اقل
    طبعا في شباب كتير من طبقات عالية فاسدين ومفسدين ولكن برضة الطبقات المتدنية بيكون نسبة الفساد فيها كبير
    انا معاكي طبعا اننا بنعاني من حالة لا نظام شاملة
    تحياتي

    ReplyDelete
  20. خبيب:
    طبعا مفيش حقيقة مطلقة
    يعني مش كل غني محترم ومش كل فقير فاسد
    انما اللي يتلسع من الشوربة بينفخ في الزبادي
    وزي ما جربنا ضباط يوليو عقدونا من ذوي الاصول البسيطة
    دي طبعا وجهة نظر صديقي الاول...هي مش عنصرية بقدر ما هي تجربة
    تحياتي

    ReplyDelete
  21. نور:
    طبعا صديقي الاول لا يعمم رأيه عن كل ابناء الفقراء ولكنه بيرى ان ناس زي ضباط يوليو ومعظمهم من اصول متواضعة عملوا عمايل في البلد
    تحياتي

    ReplyDelete
  22. the alian:
    طبعا رأيك دة هو اللي المفروض يكون
    بس للأسف مش هو الواقع
    تحياتي

    ReplyDelete
  23. محمد مفيد:
    وهل في اي مكان في مصر يتم مراعاة الحيادية؟
    الحيادية والعدالة في مصر يا صديقي كائن خرافي
    تحياتي

    ReplyDelete
  24. انا شايف ان موضوع كشف الهيئة مهم بس لو يتطبق صح يعني ميبقاش واحد جربوع ابن جرابيع ومعاه فلوس ويدخل شرطة لمجرد ان ابوه الجربوع معاه شوية فلوس

    ReplyDelete
  25. انا ماك ان كشف الهيئه مهم جدا لان فعلا ممكن يكون فى شخصيات ناقصه فعلا ممكن تعمل بلاوى
    بس فى نفس الوقت فى ناس كتير محترمه وتستاهل

    انا بيتهيالى انه ممكن يعملو مجموعه اختبارات نفسيه ويضموها لكشف الهيئه والى يجتازها بنجاح يستحق الفرصه اى كان وضعه الاجتماعى

    والاختبارات دى من شانها انها تبين اذا كان الشخص ده معقد .. عنده مركبات نقص .. لاسع ولا حاجه بحيث نلحق نفسنا
    انما تعنت والسلام يبقى حرام
    مهو دلوقتى فى برضه ولاد ناس بنسمع ليه بقى عن البلاوى الى بتحصل دى


    حلو البوست ده
    سلامى
    :))

    ReplyDelete
  26. انا مع كشف الهيئة بس ضد اللي بيكشفوا علي الهيئة لانهم ماشين بمزاجهم
    واللي بيحركهم الواسطة والمحسوبية

    ReplyDelete
  27. انا شايف ان كشف الهيئه ده حاجه غريبه جدااا جدااا وتقدير الاشخاص بكشف الهيئه هو قمه المهزله الانسان يقيم بمهاراته فقط وكفائته للشغلانه المطلوبه ليس اكثر ولا اقل اما عن صحبك ويليو والكلام ده مش هرد عليه لاننا مش هنوصل لحل
    بس لازم نفكر فيها وفى نفسيه المتقدم يرفض لقله مهاراته فقط وليس لانه دون المستوى الاجتماعى او دون الشكل المطلوب
    تقبل تحياتى وموضوع مميز وعيزك بعد كده تكتب موضوع عن التعليقات والنتيجه الى وصلتلها

    ReplyDelete
  28. هوندا:
    ماهي المصيبة ان اللي رؤساء مصر ولاد فلاحين بسطاء
    ودي كانت النتيجة
    هههههه
    تحياتي واحتراماتي

    ReplyDelete
  29. hisham:
    انا رأيي ان المشكلة الاساسية ان كشف الهيئة انحرف عن الاهداف التي اخترع من اجلها
    بمعنى انه معمول علشان يشوفوا هل الشخص دة كفء للوظيفة دي او المهمة دي ولا لا
    انما اللي حصل فعليا انه بقى وسيلة علشان يعرفوا منك واسطتك مين او يكون ذريعة لرفض شخص ما لأنه غير لائق اجتماعيا
    وبيبقى السبب
    رسب في كشف الهيئة
    تحياتي واحتراماتي

    ReplyDelete
  30. شيكابالا:
    انا بشوف ان كشف الهيئة هو حق يراد به باطل
    بمعنى انه حق علشان يشوفوا شخص ما يصلح لوظيفة ما ولا لا
    انما الباطل انه بقى الهدف منه انهم يزيحوا بعض الاشخاص اللي مش على المزاج
    يعني بيشوفوا لو الشخص دة له حد في الحزب الوطني يبقى طبعا ينفع للوظيفة ولو لاقدر الله له حد في الاخوان المسلمين يبقى طبعا
    غير لائق اجتماعيا
    تحياتي واحتراماتي

    ReplyDelete
  31. صاحب المضيفة:
    ماهو طبعا دة المفروض انه يحصل
    انما ياريته يكون بيحصل
    ياريت كشف الهيئة بيكون بالكفاءة
    تحياتي

    ReplyDelete
  32. desert cat:
    حتى لو كنتي متفقة مع رأي صاحبي الاولاني كليا
    انتي حرة في رأيك وما ينفعش حد يلومك عليه
    تحياتي واحتراماتي

    ReplyDelete
  33. tamer nabil:
    وهل ليس للأصل دور يا تامر؟
    يعني في ناس بتشوف الانسان مش كفاءة بس...الانسان برضة اصل وزي زمان ما قالوا
    العرق دساس
    تحياتي واحتراماتي

    ReplyDelete
  34. bosbos:
    وهو حد قال لك يا بس بس ان مصر فيها عدل؟؟؟؟؟؟؟
    تحياتي واحتراماتي

    ReplyDelete
  35. شوف صديقي كشف الهيئه مهمه بس الأهم انهم مايسيئوش استخدامه و الأهم طبعا مبدأ تكافؤ الفرص
    لكن للاسف في بلدنا كشف الهيئه بقه بيستغل اسوأ استغلال علي اساس انهم يطلعوا منه المحاسيب و المهمين
    تحياتي ليك

    ReplyDelete
  36. وجهة نظري:
    ماهي وجهة نظر اللي بيختاروا ان اولاد الواسطة دول هم اولاد الناس
    وبسشوفوا ان من ليس واسطة بالتأكيد طبقا لوجهة نظرهم طبعا مش ابن ناس
    هو طبعا كشف الهيئة مش كدة بس للأسف هم عملوه كدة
    تحياتي

    ReplyDelete
  37. الربان:
    وجهة نظرك سليمة تماما ومثالية طبعا
    انما هل هو دة كشف الهيئة هنا في مصر؟
    المصيبة ان اللي حضرتك اتكلمت عنه دة هو كشف الهيئة اللي في الكتب
    ياريت يكون الحقيقي كدة كمان
    تحياتي

    ReplyDelete
  38. RANIA:
    انا متفق معاكي تماما
    بس مش شايفة ان الاصل العائلي مهم برضة؟
    تحياتي واحتراماتي

    ReplyDelete
  39. ياسر حسين:
    يعني انت رأيك يا فنان اننا نمسك العصاية من المنتصف
    بمعنى اننا نطبق كشف الهيئة تبعا للحيادية والنزاهة والكفاءة الشخصية للمتقدم مع عدم اغفال اهمية البحث الاجتماعي والعائلي
    تحياتي

    ReplyDelete
  40. احمد مصطفى:
    بس يابو حميد فيه مثل قديم بيقول العرق دساس
    وفيه مثل تاني بلدي برضة بيقول العرق يمد لسابع جد
    وطبقا لرأيك ان كشف الهيئة لابد ان يتجرد من الاصول العائلية وان يحاسب الشخص على كفاءته ومهاراته فقط
    وجهة نظر وجب احترامها
    تحياتي

    ReplyDelete
  41. desrt cat:
    يعني انتي رأيك ان المستوى الاجتماعي المفروض مايكونش له دخل؟
    وجهة نظر برضة
    تحياتي

    ReplyDelete
  42. tamer.sala7:
    للأسف الشديد دة بيحصل
    تحياتي

    ReplyDelete
  43. shayma:
    فعلا انا شايف ان كشف الهيئة مهم جدا وضروري
    ولكن طبعا المقصود كشف الهيئة مش كشف الواسطة اللي بيطبق حاليا
    تحياتي واحتراماتي

    ReplyDelete
  44. حماتي ملااااك:
    انا معاكي فعلا ان اللي بيحصل دلوقتي هو كشف الواسطة وليس كشف الهيئة
    تحياتي

    ReplyDelete
  45. ضد الظلم:
    الف شكر ليك على مشاركتك القيمة
    بالنسبة لاغلب الاراء اتفقت على اهمية كشف الهيئة ولكن مش بالشكل اللي بيحصل دلوقتي وانما كشف الهيئة لبيان قدرات الشخص ومدى اهليته للوظيفة المطلوبة ام لا
    تحياتي واحتراماتي

    ReplyDelete
  46. اجندا حمرا:
    للأسف هو كشف الواسطة وليس كشف الهيئة
    تحياتي

    ReplyDelete
  47. للحياة قواعد واصول واي كان شكل العملية التنظمية فهي في النهاية تابعة لقانون يحترم لانة قائم علي ان تعطي لكل ذي حق حقة
    ولكن ان كانت قائمة علي الانظام والرشوة والفساد والمحسوبية فهي هنا لاقيمة فيها تتبع لانة لاقانون لانظام فهي في النهاية لادولة
    ادعوك لزيارة مدونتي واتمني التواصل الدائم بيننا

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails