Saturday, 24 May 2008

عفوا....معالي الوزيرة حامل



اسبانيا في خطـــــــــــــــــــــــــــــــــــــــــــــــر
الظاهر كدة ان الأسبان باعوا بلدهم ومش فارق معاهم امن اسبانيا القومي واستقرارها
تخيلوا.....تخيلوا ان في اسبانيا وزارة الدفاع بتتولاها واحدة ست
وزير الدفاع الأسباني......سيـــــــــــــــــــــــــــــــــــدة
مش مصدق....مش متصور....مش متخيل
الناس الأسبان دول مش خايفين على بلدهم ولا ايه؟
ازاي وزير الدفاع اللي المفروض والمعقول والمطلوب انه يكون جنرال جامد جداااا يرتدي بدلة عسكرية كاملة مرصعة بالأوسمة والنياشين وخاض اربع او خمس حروب يكون واحدة ست؟
معقول كدة؟
دة معنى كدة بما ان وزير الدفاع مش جنرال يبقى اكيد المحافظين ورؤساء الأحياء ورؤساء الأندية ونواب البرلمان هم كمان مش جنرالات سابقين؟
ازاي الأسبان عارفين يعيشوا؟ ازاي اسبانيا ممكن تتقدم كدة؟
ازاي مابيستفيدوش بخبرات رجال الجيش والشرطة في كل موقع وكل مكان؟
هم ما يعرفوش ان العسكرية يعني الوطنية..يعني العمل..يعني النظام
طيب يستفيدوا من خبراتنا.....اذا كانوا هم مش خايفين على بلدهم احنا خايفين عليها....ييجوا يشوفوا ازاي العسكريين السابقين بيحتلوا كل المواقع المدنية في مصر..وازاي كل المواقع دي ماشية زي الساعة
وزير الدفاع.............سيدة؟
دة احنا عندنا رئيس هيئة النظافة لواء سابق يا جدعاااااااان
لا لا لا .....في حاجة غلط......اسبانيا في خطر يا بشر
على فكرة
وزيرة الدفاع الأسبانية 38 سنة حاااااااااااااااااااااااااااااااااااااااااااااامل
ولا تعليق
فروق حضارات بقى.....بس طبعا الفرق لصالحـــــــــــــــــــــــــــــــنا
قال وزير الدفاع واحدة ست قااال.....مسخرة وقلة ادب وقلة وطنية.....ناس ما بتحبش بلدها ولا عارفة مصلحتها
وبعدين 38 سنة؟ كمااااااان؟
يعني مش كفاية مصيبة انها واحدة ست ومصيبة تانية انها حااااامل لا...والمصيبة التالتة انها 38 سنة كمان؟
مايعرفوش ان الدهن في العتاقي ولا ايه؟
مايعرفوش ان في افريقيا والدول العربية المتقدمة زينا كدة الوزير لما يبقى في الخمسينات بيسموه الوزير الشاب؟
انا مش متضايق الا علشان قادة الجيش عندنا في دولنا العربية المحافظة على تقاليدها العسكرية الصارمة لو اضطروا يعملوا اجتماع مع نظراءهم الأسبان هيبقى ايه الوضع؟
لا لا لا....مش قادر اتخيل.......دي جريمة بشعة في حق اسبانيا
يااااااااه....الواحد مش عارف لو ماكانش مصري كان هيعيش ازاااااااااااااااااااااااااااي؟!!!!!!!

51 comments:

  1. ههههههه

    ضحكتني والله

    في اوروبا والدول المتقدمة ليس شرطا ان تكون طبيب لتعمل وزير صحة
    وليس شرطا ان تكون خريج شرطة لتكون وزير داخلية
    ولاعسكريا لتكون وزير دفاع

    دولة المؤسسات الحقيقية تفعل ذلك لان من يقوم بالعمل مؤسسة كاملة وليس شخص الوزير نفسه
    فليس مهما ان يكون ست او راجل
    حامل ولا بيتوحم حتى

    لامؤاخذة يعني

    عندك فرنسا وزيرة الدفاع عندهم كانت برضه واحدة ست

    دي بلاد متقدمة ولاتتمحك في حكاية الست سبب تخلفنا وشغلهم هو اللى رجعنا لورا

    يعني عاجبك اي مكان بيحتله رجال الشرطة والجيش حتى بعد مايطلعوا معاش بدل انت ماتلاقي شغل بتلاقيهم محتلين كل الاعمال ومكان ماتحب تروح ولو مش عاجبك البحر مليان مية

    هو ده الفرق بين البلاد المتقدمة زي بلادهم

    وبين البلاد اللى عاملة نفسها بلاد زي عندنا

    ههههههههههه

    ReplyDelete
  2. الناس دي معندهاش كلاكيع ولا عقد

    عندنا الست لو بتشتغل قطاع خاص وحملت

    بيبقي صاحب الشغل عاوز يموتها


    بلد بتاعت رجاله صحيح

    ReplyDelete
  3. انا شايف ان سيادة الوزيرة جمعت كل المستحسلات
    سيدة ... 35 سنة ... مش عسكرية ... حامل ...وفي نفس الوقت وزيرة
    ده لو في مصر وبالمواصفات ده مش هيرضوا يمسكوها ناظرة مدرسة أعدادي
    لا انا برضه خايف علي اسبانيا

    ReplyDelete
  4. نسيت اقول لكم
    أغلب الوزراء في حكومة اسبانيا ستات
    أه يا بلد مفهاش راجل

    ReplyDelete
  5. مش تستغرب

    أنا عايزة أقولك ان كل دول اوروبا دلوقت معظم شاغلى المناصب العليا فيها سيدات .. والحقيقة انا مش عارفه ايه الحكمة فى كده .. واكبر مثال على الدول دى هولندا وألمانيا.

    مع ان الموضوع ده بيسبب احيانا ازمات سياسية بسبب تصريحات بعض الوزيرات المتهورة .

    أتمنى ان فى مصر مش يعملوا كده
    علشان احنا بنحب التقليد الاعمى

    سمعت ان فيه سيدة مأذون دلوقت
    وسيدة قاضية

    انا مش ضد ان المرأة تاخد مناصب عليا
    ولكن ضد عدم توافق تكوين المرأة مع العمل الذى تقوم به لانه فى النهاية سوف يشكل عبء نفسى وجسدى عليها

    ارجو ان تتقبل مرورى

    تحياتى

    ReplyDelete
  6. السلام عليكم

    اول زيارةواول تعليق
    انا بس عاوزة افهم ايه المشكلة دلوقتى المشكلة عشان سنها يعنى انتعاوزهم زى ماانت بتقول يجيبوا واحد حاجة وخمسين ولا اقولك يكون احسن عنده 80 سنة افضل
    بالنسبة انها ست فمعاك حق انها متنفعش فى منصب زى ده بس هما أدرى بظروف بلادهم بقي
    لكن انك تقولى مشكلة السن ياراجل ده هما كده طلعوا بيفهموا انهم جايبين حد سنه لسه صغير يعنى لسه شباب وحيوية
    لكن تقولى انهم يجيبوا حد من اللى بلغوا أرذل العمر لالالالا كفاية كده

    احنا نفسنا نجدد دم مصر ونخلي كل المناصب شبابية


    تحياتى

    ReplyDelete
  7. مسخرة و قلة ادب و قلة وطنية ازاى بس ؟ اذا كان على قد معلوماتى المتواضعة و لو خطأ صلحالى ان الرسول سبقهم بتنزيله المرآة الحرب و معروف ان اول شهيدة فى الاسلام هى سمية يعنى كانت ست اهيه

    انا معترضة بس على نقظة انها حامل ممكن يمسك واحد او واحدة بدالها حاليا لحد هى ما ربنا ينتعها بالسلامة
    :)))

    ReplyDelete
  8. bella:
    طبعا انا موافقك تماما
    ولعلك تدركي ان الموضوع سخرية
    المصيبة ان في ناس في تعليقاتهم افتكروني باتكلم جد
    معقول يا جماعة؟
    تحياتي

    ReplyDelete
  9. الساحرة:
    على يدي والله
    الشركة اللي انا باشتغل فيها بيعتبروا البنات في اجازة الوضع عمالة زايدة ولو طالوا يفصلوها في الفترة دي هيحصل
    مجتمعات متخلفة بجد
    تحياتي

    ReplyDelete
  10. احمد عبد الفتاح:
    مش كدة؟
    لا والمصيبة الاكبر انها حلوة للأسف
    اسبانية بقى
    تحياتي ونورتني

    ReplyDelete
  11. ولله انا شايف ان المشكله ممكن تيجي علينا
    بكره الستات يطلعوا ويقولوا لك عاوزين واحده ست تمسك وزارة الدفاع
    ويستشهدوا بأسبانيا
    يا ترى ساعتها هنعمل ايه؟؟

    ReplyDelete
  12. اية ياعم البرنس

    فية اية

    واية يعنى

    واية يعنى كمان مرة

    انت مالك متخرف ومتاخر اوى كدة

    شكلك ماعاصرتش مرحلة بلدنا بتتقدم بينالما عدلوها

    وبقت بتتقدم بينا وبنسائنا

    بييس

    وابقى ركز شوية

    ابقى تعالى عندى ف المدونة عوزاااك ف مشوار كدة

    سلااااااام

    ReplyDelete
  13. المفروض نعمل اتفاقية لتبادل الخبرات ويصدروا لنا شوية جنرالات من عينة الست الوزيرة بس متكونش حامل
    إحنا بقى نبعت لهم كام لواء سابق من عندنا
    بس المصيبة ليفتكروهم حامل من الكروش
    اللي طلعت لهم بعد طلوعهم ع المعاش
    وبعد ظهور رجل حامل في برنامج أوبرا وينفري كل شيء اصبح جائز
    :)))))))
    نتكلم جد بقى
    الموضوع ببساطة إن الوزير عندهم مش شغال بدماغه ولا بيخترع قوانين تحت مسمى التطوير ويلغى كلام الوزير اللي قبله
    الوزير وحتى رئيس الدولة عندهم بينفذ سياسة الدولة المخطط لها لسنوات سواء كان رجل أو ست
    ففي الحالة دي نوع الوزير ميفرقش كتير
    ولا أيه
    :)

    خالص تحياتي

    ReplyDelete
  14. وزيرة دفاع .. 38 سنة
    وإحنا لسه بنفكر الست تشتغل ولا تقعد ف البيت

    تحياتي

    ReplyDelete
  15. كنت هتعيش مبسوط و زي الفل
    التقاليد العسكريه و ان كانت داله علي النظام فاعتقد ان ده في الجيش بس
    لكن في الواقع المدني الدنيا بتفرض نفسها و الفساد بيفرض نفسه و الفوضي بتفرض نفسها علي التقاليد العسكريه اللي هيه اصلا مبتقدرش تقاوم كل ده
    لكن انا شايف ان تعيين عسكريين في كل مكان غلط كبير
    لازم المحافظين يكونوا بالانتخاب مش بالتعيين و ياريت عمد القري
    كمان
    تحياتي

    ReplyDelete
  16. يا للهول و يا لسخرية القدر

    ازي ده يحصل هما الاسبان اتجننوا ولا ايه احنا نبعت كام لوا علي كام خبير عسكري من عندنا ينظمولهم البلد بدل ماهي سايبه كده

    عمار يا مصر قال ست قال هو د الي ناقص

    بوست جميل جدآ و سخريه من الواقع جميله

    تحياتي

    ReplyDelete
  17. كاميليا:
    اعتقد ان في اوروبا الكفاءة فقط هي التي تحكم مدى قدرة شخص ما على تولي منصب ما
    اعتقد انهم لا ينظروا لجنس الشخص دة على الاطلاق
    طبعا لا انكر ان رأيك دة كان مفاجأة بالنسبة لي
    بس رأيك ويجب احترامه
    تحياتي

    ReplyDelete
  18. عاشقة الوطن:
    اولا الف شكر على مرورك والف شكر على اول تعليق ويارب الا يكون الاخير
    ثانيا
    توضيح بسيط يا عاشقة الوطن
    هذا الموضوع سااااااخر
    دة مش رأيي دة سخرية...انا اسخر بشكل جاد
    لذا لزم التنويه
    تحياتي

    ReplyDelete
  19. عاليا حليم:
    الموضوع ساخر يا عاليا
    ساااااااااااااااخر
    يعني انا بأتهكم بأسلوب جاد
    ورأيي طبعا مع اسبانيا واسخر من اوضاعنا
    بس...دي كل الحكاية
    تحياتي واحتراماتي

    ReplyDelete
  20. لورنس العرب:
    ماتيجي نجربهم؟
    والله ممكن احوالنا تتعدل على ايدهم
    تحياتي

    ReplyDelete
  21. ليك تاج عندى روح استلمه بسرعه

    ReplyDelete
  22. هههههههههههههههههههههه

    الناس دى اللى شايفاه صح بتعمله

    والغلط بتديله الطارشة

    وميهمهاش حد

    د/هيما

    ReplyDelete
  23. ايه يا احمد مالك زعلان كدا
    بتحصل فى احسن البلاد يادكتور
    ماهو قدامك اسبانيا اهيه خير مثال
    مش مهم مين صاحب المنصب
    المهم انه يكون مؤهل وكفئ للمنصب

    ReplyDelete
  24. دعاء مواجهات:
    والله يا دعاء...المهم انها تتقدم سواء برجالها بنساءها بأطفالها
    المهم تتقدم وخلاص
    تحياتي

    ReplyDelete
  25. ياسر حسين:
    اعتقد ان احنا لو صدرنا لهم جنرالات من عندنا...اسبانيا هتنافس الصومال في ظرف سنتين
    احنا في بلاء والله
    تحياتي

    ReplyDelete
  26. the alien:
    واحنا بنجوز البنات في 14 او 16 سنة
    تحياتي

    ReplyDelete
  27. اخى الحبيب
    والله الاسلام اكرم المراءة
    وهم يهينوها
    المراءة فى الاسلام جوهرة تصان
    من قال لامرأءة حامل تعمل وزيرة دفاع
    ياعم دى مش ديمقراطية
    دة عبط
    لما المراءة تعمل وزيرة دفاع الرجل يشتغل اية داية
    لاحول ولاقوة الا بالله
    تقبل تحياتى
    وادعوك لزيارة مدونتى المتواضعة
    ودمت بود

    ReplyDelete
  28. بجد لا تعليييييييييييييق

    ههههههههههههه

    لو مكنتش مصريه كنت هعمل ايه؟؟؟

    كان زمانى وزيره فى اسبانيا

    هههههههههههههه

    سلامى
    :))

    ReplyDelete
  29. مش برة عادى

    اية المشكلة

    مفيش مشكلة

    تحياتى

    ReplyDelete
  30. ههههههههههههههههههه

    حلوة منك والله العظيم

    وبعدين بالاش وزير ولا حتى محافظ

    ياعم الشركات نفسها

    لازم يكون رئيس مجلس ادارتها عسكرى

    احنا كمان 100 او 120 سنه

    ممكن يكون عندنا محافظة سيدة

    فى عهد الرئيس

    شادى جمال مباك ؟؟؟؟؟؟؟؟

    ReplyDelete
  31. ذو النون المصري:
    انا بقر رأيي ان انتشار العسكريين المتقاعدين بهذا الشكل وتوغلهم في جميع مرافق الدولة شيء عجيب جدا ولا يحدث في اي مكان في العالم الا في مصر وكام دولة كدة شبهنا
    يعني انا اعتقد ان الوضع دة هو الاستثناء
    تحياتي

    ReplyDelete
  32. emy:
    بس للأسف هي سخرية مريرة يا ايمي
    تحياتي

    ReplyDelete
  33. bosbos:
    علم وينفذ يا فندم
    تحياتي

    ReplyDelete
  34. dr-hema:
    وهو دة اللي رافعهم سابع سما وخاسف بينا سابع ارض
    تحياتي

    ReplyDelete
  35. desert cat:
    احنا كمان عندنا لازم يكون مؤهل للمنصب
    بس مؤهلاتهم غير مؤهلاتنا خااااااالص
    تحياتي

    ReplyDelete
  36. :D :D :D
    لأ والاهم ان الوزيره حلوه
    احنا عندنا الوزرا كلهم شكلهم غريب
    استغفر الله العظيم بس بجد
    الا ما شوفت وزير شكله ابن ناس
    فعلا والله الواحد مش عارف لو ما كانش مصري كان هيعمل ايه ؟

    ReplyDelete
  37. احب اضيفلك كمان

    ان اليابان هى كمان كده


    اليابان كان وزير الدفاع سيده زى القمر كماااااااااااااان

    ReplyDelete
  38. طارق الغنام:
    رأيك وواجب علي احترامه حتى لو اختلفت معاه
    يشرفني زيارة مدونتك
    تحياتي

    ReplyDelete
  39. shaymaa:
    فكرة برضة
    هاجري يا شيماء
    انا لو منك اهاجر علشان ابقى وزير
    المخاطرة تستاهل على فكرة
    تحياتي

    ReplyDelete
  40. tamer nabil:
    هو دة الكلام المفيد
    تحياتي

    ReplyDelete
  41. احمد مصطفى:
    حتى في عهد الرئيس القائد شادي جمال مبارك هتلاقي برضة الجنرالات في كل حتة
    مفيش حاجة هتختلف
    دة ميراث تتوارثه الاجيال
    تحياتي واحتراماتي

    ReplyDelete
  42. zika:
    لا..هي من ناحية حلوة...هي حلوة الصراحة
    اعتقد ان الشباب الاسباني بيتطوع في الجيش عن اقتناع كامل
    تحياتي

    ReplyDelete
  43. محمد مارو:
    جتنا نيلة في حظنا الهباااب
    تحياتي

    ReplyDelete
  44. مش شرط ياعم
    عادى

    ربنا ينتع زوير دفاعهم بالسلامة

    واكيد لما وزير الدفاع ياخد اجازة وضع

    هيجيبو حد مكانه

    دول مبيغلبوش ياعمنا

    ReplyDelete
  45. مايعرفوش ان في افريقيا والدول العربية المتقدمة زينا كدة الوزير لما يبقى في الخمسينات بيسموه الوزير الشاب؟


    هههههههههههههههههههههههههههههههههههههه

    ReplyDelete
  46. حلو خالص
    يعنى فى أمل لما أوصل 38 سنة
    تكون مصر اتغيرت
    وابقى وزيرة
    :))))))))
    بـــــــــــــاى

    ReplyDelete
  47. مدحت محمد:
    مش كتخيل بجد ان وزير الدفاع بتولد
    جرعة الديمقراطية دي عالية علينا قوي يا جماعة ولا تراعي خصوصياتنا
    والنبي حد يفهمني هي ايه خصوصياتنا دي؟
    تحياتي واحتراماتي

    ReplyDelete
  48. amr fekry:
    ماهو دة يا عم عمرو ما يطلق عليه...شر البلية ما يضحك
    تحياتي واحتراماتي

    ReplyDelete
  49. نهى منير:
    دى على اساس انك هتتولدي بعد 200 سنة من دلوقتي
    تحياتي واحتراماتي

    ReplyDelete
  50. أعجبنى هذا البوست جدا والمدونة عامة .. تقبل تحياتى وأرق الأمنيات ويسعدنى تشريفك " دخل الشتا "

    ReplyDelete
  51. والله هم يبكى وهم يفطس من الضحك بلوج يجنن بجد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails