Tuesday, 6 May 2008

تاج نفساوي



بعد طول غياب .....تعود التاجات بقوة
ومش اي تاج...ولا من اي حد

دة تاج نفساوي عميق...دة اللي بيسموه (سبر اغوار النفس البشرية).....ايه الكلام دة؟...ما علينا

.ومن رانيا ولما نقول رانيا يبقى الفيلينج والاحاسيس كلها
وبما ان رانيا قررت تصوب التاج دة ناحيتي....يبقى لازم اتحلى بصفات الفرسان وارفض الأنسحاب من المعركة...واسيبها تسبر اغوار نفسي براحتها
والى المعركة..........................

...هجووووووووووووووووووووووووووووووووووووم
-----------------------------------------------------------------
اتكلم عن نفسك في 10 نقاط


الأولة
احمد سمير.....29 سنة الا 3 شهور......صيدلي.....بحب الصيدلة..على الرغم ان مصر مافيهاش صيدلة اساسا..بس اهو قدرنا
وبحب مدونتي الأغلبية الصامتة.....
وبحب اهلي وناسي وبلدي واصحابي
خاطب ولا اعول....وبأحب خطيبتي...اي خدمة
************************************

الثانية:
ليبرالي حتى الثمالة.....بيؤمن بحق اي فرد وكل فرد في ان يعتنق ما يشاء من الأفكار.....وان يطرح ما يشاء وما يريد من الأراء....وان يعبر عن نفسه بما يتراءى له
بشرط
الا يسيء للأديان السماوية والا تتعدى حريته حدودها لتصطدم وتتعارض مع حقوق وحريات الأخرين

**************************************

الثالثة:
اهلاوي حتى المووووووووووت
الأهلي ثم الأهلي ثم الأهلي
ممكن تسمي حبي للنادي الأهلي تطرف....سميه هبل....سميه زي ما تسميه بس هو حقيقة واقعة
انا اعشق النادي الأهلي
مش هبالغ لو قلت ان انتصارات النادي الأهلي او لا قدر الله انكساراته النادرة ولله الحمد هي اللي بتحدد لي مزاجي العام ومووودي بشكل عام
العجيب بقى...ان خطيبتي زملكاووووووية.....يا للهول
لا تتعجب انها ارادة الله

***********************************************

الرابعة:
خايف من بكرة
مرعوووووووب
الدنيا ضلمة ومش باين لها ملامح
وحاسس ان هييجي الوقت اللي نترحم فيه على ايامنا دي
ونسميها الزمن الجميل

***********************************************

الخامسة:
بحب البلد دي قوي...قوي
واكتشفت اني ما ينفعش اعيش غير فيها
جربت اعمل زي غيري واساير الموضة واجري ع الخليج اغرف و اعبي
سنتين مفيش غيرهم....ولقيت نفسي في اوضتي تاني
الظاهر اني فقري
************************************************

السادسة:
بيقولوا عليا عصبي......ممكن اكون فعلا كدة
بس اعترف اني اتحسنت كتير جدا عن الأول
يعني في امل
ما بعضش.....انتم خفتم كدة ليه؟

************************************************

السابعة:
بأكره الحزب الوطني....ونادي الزمالك....وتامر امين....واحمد شوبير.....وفتحي سرور...وكل ضابط شرطة بينسى انه في يوم من الأيام كان طالب ثانوي او شاب من غير دبورة وكان له نفس احلام الناس اللي كل مهمته بعد ما علق الدبورة انه يجهض احلامها
**************************************************

الثامنة:
احترم منى الشاذلي و عمرو اديب ومجدي الجلاد وخيري رمضان واي حد في موقع مسئولية عارف كويس قوي ان الكرسي مش دائم ومؤمن تماما بالحكمة القائلة
لو دامت لغيرك....لما وصلت اليك
****************************************************

التاسعة:
مدمن انترنت.....وحاسس ان لو لا قدر الله الكومبيوتر عطل ممكن اقعد اخبط دماغي في الحيط واهرش واقول
ابوس ايديكوا...نت...نت..مش قااااااااااااااااااااااااااااااااااااادر حد يدخلني اونلاين!!!!!!

***************************************************

العاشرة:
لا ادخن.....ولا احترم المرأة المدخنة على الاطلاق..اما مشاعري تجاه الرجل المدخن فهي حيادية لا ايجابية ولا سلبية
ومحدش يقول لي اشمعنى؟
علشان انا كنت عامل بوست ع الموضوع دة قبل كدة..وقتل بحثا

***********************************************
خلاااااااااااااااااااااااااااااااااااااااااااااااااااااااص
تمت المهمة الأولى بنجاح
اختار خمسة واهدي لهم التاج

الروح...........بس بس
انين الحزن.......وزة
مايكل
جيداء
كارتونيا......ياسر حسين
لازم تبلغهم
حاضر يا فندم.....جاري التنفيذ

29 comments:

  1. اجابات جميلة ولكن مباشرة قوي


    حسيت انك مستعجل وانت بتكتبها

    على العموم


    ربنا يكرمك على البينا الجميل ده وياهنا خطيبتك بيك ياعم


    تحياتي

    ReplyDelete
  2. احب قوي الاجابات المباشرة

    ولكن انت بتحب الاهلي ليه؟؟
    عشان بيكسب وخلاص

    طيب شوف الطرق اللي بتستخدمها ادارته ومبوظة الدوري

    بعدين مشكلة ادمان النت ده... حاول تبطله عشان اما تتجوز

    ReplyDelete
  3. الأجابات متينة قوى
    و دمك خفيف قوى
    و متفقة معاك فى أغلب الأراء قوى قوى قوى
    و تحياتى لسعادتك قوى ....

    ReplyDelete
  4. تاج جعلنا نقرب منك أكثر
    تحياتي يا صديقي

    ReplyDelete
  5. تاج صعب جدا
    واجاباتك تلقائية .. لكن بزيادة شوية
    :)
    تم عمل اللازم
    ونشرت التاج بتاعي عندي
    أبقى تعالى اقراه

    خالص تحياتي

    ReplyDelete
  6. احمد

    انت طلعت اهلااااوي

    ياقلبك وقدرت تقولها

    انا زملاكاويه تخيل

    اجابتك جامده في الجوووون يعني عشرة علي عشرة

    سلاموووووووووز
    اه انا ممكن اقول انك مبلغتنيش غلاسه بقه
    وزة

    ReplyDelete
  7. شيكابالا6 May 2008 at 20:48

    طبعا اللى ما يعرفك يجهلك يا جميل لكن بالرغم من انى عارفة معظم الاجابات مسبقا لكن اهنيك على التلقائية والصراحة وخفة الدم وبالذات الخفة واحب اطمنك واقولك ان فى حاجات كتير انت بتحبها دلوقتى ممكن تكرهها بعدين مش قصدى تكرة خطيبتك لا سمح اللة لكن ممكن تكرة الاهلى تبعد عن النت ربنا معاك وارجوك لا تجاهر بكرة الزمالك مرة اخرى ولا احترام منى الشاذلى عشان بغير ويا سعدها يا هناها بجد اللى ف بالى كفاية عليك كدة سلللللللللام

    ReplyDelete
  8. شيكابالا6 May 2008 at 21:24

    طبعا اجابات مباشرة وقوية وطالعة من القلب وتعرف اللى قدامك بيك اكتر بس الطبيعة احلى بكتير على فكرة فى حاجات بتحبها دلوقتى يمكن تكرهها بعدين انا قصدى النت و الاهلى طبعا كمان بلاش حكاية احترام منى الشاذلى عشان بغير اصلى انا كمان بموت فيها وبحترمها جدا بلاش حكاية المجاهرة بكرة الزمالك عيب يا بوحميد

    ReplyDelete
  9. كلامك تمام ياصاحبى


    وربنا يوفقك ويكرمك


    تحياتى

    ReplyDelete
  10. مشكرين على التاج وانا جاوبتة
    وبيقولوا عصبى الظاهر كلنا كده

    وعجبتنى جدا بحب خطيبتى ربنا يهنيكم يارب ويسعدكم واوعوا تنسوا تعزمونى فى الفرح ولا انتوا هتمشوا بمبدأ من لاقى احبابة نسى اصحابة

    تحياتى لك

    ReplyDelete
  11. صاحب المضيفة:
    لا ابدا والله مش مستعجل ولا حاجة
    بس هي سمة العصر ومنعا للمط والتطويل
    المختصر المفيد يعني
    والف شكر لك يا باشا

    ReplyDelete
  12. vague:
    الاهلي
    هو في زي الاهلي؟
    دة هو البسمة الوحيدة وسط العيشة اللي احنا عايشينها دي
    تحياتي

    ReplyDelete
  13. فاتيما:
    الف شكر يا فاتيما قوي قوي قوي
    دة من ذوقك
    وتحياتي ليكي بالقوي

    ReplyDelete
  14. محمد مفيد:
    دة شرف كبير ليا يا باشا
    تحياتي واحتراماتي

    ReplyDelete
  15. جميل اوى يا احمد

    تعرف انا حاسس انك بتتكلم عليا

    ههههههههه

    اه والله

    مشتركين فى حاجات كتير اوى

    تحياتى لك

    احمد

    ReplyDelete
  16. انت بتتفق معايا فى حاجات كتير
    بس
    مش بعرف احلل شخصيات من خلال اجابات اوى
    بس العصبية دليل طيبة
    وحب النادى الاهلى وكره الزمالك دليل
    على انك راجل كويس ههههههه
    تحياتى

    ReplyDelete
  17. ياسر حسين:
    اهم حاجة هي التلقائية...هو الواحد عبارة عن ايه غير تلقائية وشوية حاجات فوق بعض
    الف شكر على الاستجابة الجميلة يا فناننا الجميل
    تحياتي واحتراماتي

    ReplyDelete
  18. انين الحزن:
    يعني منوفية وزملكاووووية يا وزة؟
    لا يا وزة...لاااااااا دة كتير بجد
    ربنا معاكي يا بنتي
    تحياتي

    ReplyDelete
  19. السلام عليكم ورحمة الله وبركاته

    ايه الاجابات الجامده دي يا دكتور

    احسن حاجه عجباني انك اهلاوي مووووووووت زي بالظبط

    ReplyDelete
  20. شيكابالا:
    شهادتك مجروحة وبالتالي سأمتنع عن التعليق
    تحياتي واحتراماتي

    ReplyDelete
  21. tamer nabil:
    الف شكر لك يا صاحب الافكار الحرة
    تحياتي واحتراماتي

    ReplyDelete
  22. bosbos:
    احنا برضة بتوع من لقي احبابه نسي اصحابه يا بس بس؟
    ما بلاش انتي
    وعموما اعتبري نفسك صاحبة الفرح مش مجرد معزومة يا فندم
    تحياتي

    ReplyDelete
  23. ahmed al sabagh:
    دة شرف كبير ليا يابو حميد
    منورني دايما
    تحياتي

    ReplyDelete
  24. مدحت محمد:
    العصبية فعلا بتكون في الحق
    والواحد ما بيتعصيش الا على الناس اللي بيحبهم
    اما الزملكاوية فلهم الله
    تحياتي

    ReplyDelete
  25. خمسة فضفضة:
    بيب بيب اهلي
    بيب بيب اهلي
    تحياتي واحتراماتي

    ReplyDelete
  26. ياالهول
    عدت منى

    مش مشكله ملحوقة
    اجابتك كلها حلوة و مباشرة فعلا و اهلاوية :)
    تحياتى

    ReplyDelete
  27. اتكلم عن نفسى فى 10 نقاط؟
    ياااااااه
    صعب جداااااا ،مش سهل على الواحد انه يتكلم عن نفسه كدة

    بس على العموم انا لما ارجع باذن الله هيكون التاج ده اول حاجة اعملها

    ReplyDelete
  28. rania:
    الله يخليكي يا رانيا الف شكر
    عموما الاجابات الجامدة دي بتطلع مني وانا لابس النضارة
    تحياتي

    ReplyDelete
  29. جيداء:
    منتظر اجاباتك ومنتظر عودتك قبلها
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails