Monday, 16 June 2008

حسدوني ومش باين في عينيهم

نحن نعيش في مجتمع الحسد فوبيا
ومصطلح فوبيا طبيا تعني الخوف المرضي
وانا بلاحظ ان الخوف من الحسد اصبح بيتحكم في حياتنا بشكل كبير..اكبر من الازم واكثر مما ينبغي
اعلم جيدا واقر تماما ان الحسد موجود وانه مذكور في القرأن الكريم
الا ان الحسد له شروط...علشان نقدر نقول عليه انه حسد او ان فلان او فلانة حسودة
دة على حد علمي وفهمي...ولا ازعم اني فقيه دينيا
الحسد هو تمني زوال النعمة من الغير
عارف كويس جدا انه يوجد في مجتمعنا ناس حسودة وحقودة وتتمنى زوال النعمة من الغير بل وزوال الغير نفسه الا ان السؤال هو:
هل عدد الناس دي كبير للدرجة دي ان يبقى الخوف من الحسد هو المحرك الأساسي لأفعالنا وتصرفاتنا؟
انا اعرف في حياتي اشخاص بيرجعوا كل الأحداث السلبية اللي بتحصل لهم الى الحسد
كثير مننا بيخلط ما بين الحسد والغبطة....وهو خلط رهيب والفرق بينهم كبير جدا...
فالغبطة هي تمني النعمة بدون زوالها من اصحابها...بمعنى تمني ان يبقى عندي عربية زي فلان...بس مش بالضرورة اكون بأتمنى ان فلان تتحرق عربيته
و الغبطة طبعا هي اللي موجودة ومنتشرة بكثرة ولا اعتقد ان في منها اي ضرر
اما الحسد فهو الكره والحقد بعينه
ودي بعض المظاهر الغير طبيعية توضح الرعب من الحسد اللي اصبح بيسيطر علينا حتى في اتفه الأمور:
السيارات الجديدة والحرص على تلطيخها بالدماء وتشويه منظرها اتقاءا للحسد...نادرا ما تلاقي حد شاري عربية جديدة من غير تلطيخها بالدماء اتقاءا للحسد على حد زعمه
اي واحد يتخانق مع خطيبته او زوجته...على طوووول يكون السبب الرئيسي في المشكلة هو الحسد ليس الا....وغالبا ان الزوجين ما بيكونش فيهم حاجة تتحسد على الاطلاق
المذاكرة.....ودي طبعا منتشرة بعنف بين الطلبة الأمواس وغالبا ما بيكون هذا الطالب الموس عنده فوبيا الحسد ويوهمك انه ضارب الدنيا صارمة على الرغم انه حافظ الكتاب برقم الصفحة
التفاؤل الشديد برقم 5 عمال على بطال ووضع رقم 5 في اي جملة مفيدة حتى لو مالهاش لازمة
بعض الناس لما تشتري حاجة تكره جدا حد يسألها بكااام؟؟
على اساس طبعا انه هيضطر يقول على سعرها وبالتالي هيتعرف انه معاه فلوس وبناءا عليه هيتحسد
اوعى تشوف طفل او طفلة حلوة وماتقولش بصوت عالي قدام والدتها "بسم الله ما شاء الله" لأنك لو ما قولتش ولا قدر الله الطفل او الطفلة اصيب بنزلة برد..فأنت المتهم الأول حتى لو حلفت ع المية تجمد انك مالكش دعوة
شوف كام خمسة وخميسة معلقة في السيارات والمحلات والصيدليات والكافيهات
خدي بالك من الخرزة الزرقاء اللي معلقة في رقبة اي بنت او سيدة او حتى شاب
اوعى تبدي اعجابك بأي حاجة ايا كان حتى لو على سبيل المجاملة وممكن ما تكونش الحاجة دي عجباك اصلا بس بتجامل.....اوعى تعمل نفسك عم المجامل لأن اي اصابة او تلفيات او حتى خدش لهذا الشيء هتكون انت مسئول عنه تماما وربما يتم وضعك في البلاك ليست بأعتبارك قرااار وعينك وحشة ودي مصيبة لو تعلم
وعلشان تبقى بييييس وفي السيف سايد
اكفي خيرك شرك...لا تعجب بحاجة ولا محتاجة..خليك بارد ومحايد
يتقال عليك قليل الذوق....احسن ما يتقال عليك حسوووود

42 comments:

  1. شيكابالا16 June 2008 at 20:15

    انا عاوزةمكافاة عشان اول تعليق ودة مبدئيا ثانيا الرسول علية الصلاة والسلام بيقول العين حق بمعنى اننا ممكن نحسد نفسنا من غير ما نشعر والخلط بين الغبطة والحسدممكن يحصل بدون قصد يعنى انت متكونش بتكرة اللى قدامك ولا بتحقد علية بس تحسدة من غير ما تشعر عشان كدة ضرورى لما نشوف اى حاجة نقول ما شاء اللة لا قوة الا باللة والانسان المؤمن ياخد احتياطاتة بذكر اللة واللة خير حافظا وهو ارحم الراحمين ويجعل كلامنا خفيييييييييييف على اللى بينورو من كتر الحسد

    ReplyDelete
  2. خايفه اتحسد اني تاني تعليق

    انت معاك حق الناس بقت مؤمنه بالحسد بشكل غير طبيعي و بقي يميل لتصديق الخزعبلات و الشعوذه اوي

    مش عارفا ايه السبب في ده

    تحياتي

    ReplyDelete
  3. عندك حق و الله

    واكتر حاجة انا حاساها موضوع الطلبة الامواس اللى عمرهم ما يخرجوا من محاضرة و يقولوا فاهمين
    ولا من امتحان ويقولوا حاللين حلو
    ولو سألتهم عن اخبار المذاكرة يحلفوا 100 يمين انهم بايتين فى الشارع ولا يعرفوا حاجة عن المنهج و فى الاخر تشوف التقديرات

    احنا و الله عندنا امراض اجتماعية تكفى امة بحالها

    ReplyDelete
  4. اصل لازم يكون فى حاجه جايبه لنا الفقر
    وبما ان احنا عملنا الى علينا كله
    يبقى اكيد اتحسدنا

    فهمت النظريه؟؟

    ReplyDelete
  5. عندك حق ياأحمد
    بخصوص موضوع العربيات خالي له تجربه مع الموضوع ده لما جابها دبح حاجه باين عشان الحسد المهم حوادثها مش عايزه احكيلك كانت اد ايه لحد ماقرف منها و باعها

    صدقني موروثات بنتناقلها زي الخرزه الزرقا و الدبح علي حاجه جديده و الخمسه و خميسه و لا حد عارف جت منين

    تحياتي ليك علي الموضوع الجامد

    ReplyDelete
  6. ربنا يسطرها ويبعد عننا الحسد وطبعا فى فرق بينة وبين الغبطة اللى اتكلمت عليها
    بوست مميز تحياتى
    --
    سيادتك مش بتيجى عندى من فترة لية مش عارف هو انا لازم كل صديق ليا ومنضاف عندى اروح اقولة ونبى تعالة
    باين عليا هولع فى المدونة وامشى هههه

    تحياتى

    ReplyDelete
  7. عارف هى دى الشماعة اللى بنعلق عليها فشلنا
    او على الاقل ده اللى انا بعمله ساعات كتير

    وبعدين فيه كمان الحسد المحمود
    انى اتمنى النعمة اللى انت فيها من غير زوالها من عندك

    ReplyDelete
  8. فعلا الناس بقت بتربط كل حاجة بالحسد بطريقة مش طبيعية
    وفى الفترة اللى فاتت من حياتى سمعت كلمه حسد مليون مرة ودة كله علشان تعبت شوية بعد خطوبتى وماكنتش فى المود بتاعى كأن الناس كانت مستنيانى أتخطب علشان أتحسد أو أنا أول ولا أخر واحدة تتخطب
    بجد معتقدات وحاجات تغيظ
    ايوة الحسد موجود فى القراءن بس مش معنى كده أن كل حاجة بتحصل هتبقى حسد

    ReplyDelete
  9. دخلت امبارح وكتبت تعليق طوييييييل
    انمما الصفحه معجبهاش
    عاااااااااا
    هههههههههه

    المهم
    اولا البوست ده فى الجووون
    فعلا ده بيحصل بكثرة واستهبال دلوقتى

    فيها ايه يعنى لو الناس دى فكرت
    فى الحديث الى بما معناه
    ان لو اجتمع الناس كلهم على اذيتك وربنا مش كاتبهالك عمرهم ماهيقدروا ياذوك
    والعكس لو اجتمع الناس كلهم على مساعدتك وربنا مش كاتبهالك عمرها مهتحصل
    يعنى من الاخر
    قدر الله وماشاء فعل
    وقل لن يصيبنا الا ما كتب الله لنا
    يعنى نتوكل على الله وهو حسبنا

    بس للاسف الناس مبتفكرش كده

    ربنا يهدى الجميع

    بس بوست جامد

    سلامى
    :))

    ReplyDelete
  10. ولله أنا أعرف شخصيات بتخاف من الحسد أكتر من خوفهم من جهنم
    لكن اللي تستغرب له انهم خائفين من الحسد وهما يعني - ما هم فيه أمر لا يدعو إلى الحسد على الإطلاق- ربنا يزيدهم نعمه وغنى ان شاء الله
    لكن بستغرب ونفسي أقول لأي واحد فيهم انت خايف من الحسد على ايه على الرغم من انك واخد على دماغك أصلا؟
    يعني المشكله انك تلائي واحد مضروب بالنار ومتخيل وعايش في الوهم أن الناس بتحسده
    ده اللي بيخليني اتنقط

    ReplyDelete
  11. هههههههههههه

    البوست ده باين وراه موقف محدد
    اعترف يا احمد وقول :))

    تحياتى يا جميل


    منذر - حين البأس

    ReplyDelete
  12. ايه ياعم الكلام الجامد بس تفتكر يعني سهل تبقي بارد وكدة وحتى لوبقيت هل الناس هترضي بردة الحياة لازملها المجاملة
    بس جامل وقول ماشاء الله
    بس طبعا انت بالتعامل بتكون عارف الشخصية اللي قدامك بتصدقك في الحوار دة ولا لاء
    تحياتي لك

    ReplyDelete
  13. الهوس والفوبيا طبعا ساعات بتبقي حاجة مبالغ فيها
    لكن كل حاجة تاخد حقها
    الحسد موجود .. لكن مش بالشكل الفظيع اللي الناس فاكراه ده

    تحياتي

    ReplyDelete
  14. الحسد موجود في حياتنا فعلا وده اتذكر في القرآن بس المشكلة اننا بنرمي اي حاجة على الحسد لأن ده بيريحنا وبيلغي تفكيرنا وبيخلينا نستسهل بدل ما نفكر ايه سبب اللي حصل لينا
    تحياتي

    ReplyDelete
  15. فعلا , اخشى ان سبب من اسباب البرود والتزام الصمت هو الخوف من الوقوع فى كمين الحسد .

    على اى حال يجب ان يكون الحسد اخر التبريرات المقنعه لوجود مشكلة ما , فالكثير يعلق " الانفلونزا " مثلا على شماعة الحسد , ويترك فيروس الانفلونزا بريئا بدون اى اتهام .

    nice post
    keep posting :)

    ReplyDelete
  16. هههههههههههههه
    والله انت تحفه
    فعلا الموضوع زاد عن حده اوي بطريقه غريبه ومستفزه
    لدرجة اني والله فعلا بقيت اعمل زي مانت بتقول عشان ماحدش يقول اني بحسده حتي لو هو مفهوش حاجه تتحسد اصلا
    :D:D
    تحياتي

    ReplyDelete
  17. تعرف يا احمد موضوع الحسد كمان مش مقتصر على طبقة دون طبقة تانية يعنى فى ناس متعلمين وبيقولوا مثقفين وبيخافوا جدا من الحسد
    يعنى هحكى لك موقف
    فى مرة كنت بشترى هدية من محل هدايا وكان فى طفل صغير مع مامته الولد شقى بس الشقاوة اللذيذه المهم كان فى بنت واقفه بتعلب معاه وبنت تانية التفتت على كلمة الولد قالها وراحت بتقول الولد ده زى العسل وبتهزر معاه
    ويعاديك على مامة الولد عملته اول ما سمعت الكلمه
    خمسه وخميسه
    الله اكبر
    قل اعوذ برب الفلق
    وقعدت تحوقل وتتعوذ لدرجة ان لفتت انتباه كل الناس والجميع بعد عن ابنها حتى البنت اللى كانت بتلعب معاه من البداية
    قصدى من كل الرغى ده انه مرض فعلا ربنا يخفف عن عباده

    ReplyDelete
  18. هههههههههههههههههههههههه

    اسلوب عرضك دمه خفيف جدا

    ثانيا كلامك مظبوط و موزون
    الناس فعلا عها هبل بالحسد

    بعيد عنك عالم ثالث بقي

    منور

    قل اعوذ برب الفلق

    ReplyDelete
  19. شيكابالا:
    كونك علقتي عندي دي جايزة في حد ذاتها
    بالنسبة بقى للحسد
    خلينا نتفق على ان الحسد موجود ومذكور في القران وان الفرق بين الحسد والغبطة واضحين تماما
    بس خلينا نتفق برضة ان الموضوع زاد عن حده جدا.....وان في ناس بتعلق تصرفاتها الغلط و اخطائها على شماعة الحسد وهو منها بريء تماما
    تحياتي

    ReplyDelete
  20. emy:
    السبب يا ايمي هو الاستسهال والاستهبال والرغبة في تعليق اي مشكلة او موقف يحصل للأنسان على شماعة الحسد وبما انه قدر يبقى ماينفعش نعمل له حاجة وبالتالي هي دعوة للتواكل والخمول
    تحياتي

    ReplyDelete
  21. جيداء:
    ازيك يا جيداء انتي فينك من زماااان
    انتي هتقولي لي على الامواس...عارفهم وحافظهم بس المصيبة انهم بيبقوا معروفين ومكشوفين وللأسف فاكرين نفسهم حويطين قوي ومحدش كاشفهم
    تحيااااتي

    ReplyDelete
  22. بطوط حبوب:
    بالضبط
    هي مش اكتر من شماعة بنعلق عليها فشلنا وتكاسلنا
    تحياااتي

    ReplyDelete
  23. اجندا حمرا:
    موروثات موروثات
    بس المصيبة ان ماحدش عاف هتفضل تتورث لأمتى
    الف الف شكر
    تحياتي واحتراماتي

    ReplyDelete
  24. tamer nabil:
    تامر بك صاحب الافكار الحرة
    معلش يا باشا والله انا متبهدل اخر بهدلة وعمال اعالج اسناني ومقصر مع الكل
    بس اعذرني وملحوقة ان شاء الله
    الف الف شكر
    تحياتي واحتراماتي

    ReplyDelete
  25. sometimes:
    امتى الشماعة دي هتتكسر بقى؟
    تحيااتي

    ReplyDelete
  26. دا أستمرار طبيعي لمسلسل الخرافات اللي إحنا عايشينه

    وشكرا علي النصيحة
    تحياتي

    ReplyDelete
  27. اكييييييد الحسد موجود وانا مقتنعة بكده بس مش معنى كده ان كل ما يحصل حاجة وحشة اقول ده حسد لاطبعا

    وربنا يبعد عنك وعننا الحسد

    تحياتي

    ReplyDelete
  28. bosbos:
    اللي بيتعب في حياته على طول بيتجه للحسد يا بس بس
    بصرف النظر هو تعب من ايه؟
    بدل ما كل واحد يحلل الاسباب اللي مضايقاه يقوم يرمي كل حاجة على الحسد
    لو شغلنا مخنا هنعرف ان الحسد دة شيء ثانوي موجود طبعا بس مش هو السبب في كل مشاكلنا
    تحيااااتي

    ReplyDelete
  29. shaymaa:
    طبعا الصفحة ا جابتش التعليق لأنك محسودة يا شيمااء
    الف شكر ليكي يا شيماء
    البوست جامد بتعليقاتكم والله
    تحياتي واحتراماتي

    ReplyDelete
  30. لورنس العرب:
    تصدق ان اكتر ناس بتخاف من الحسد لا يستحقوا الحسد على الاطلاق وممكن كمان يكونوا يستحقوا الرثاء
    بس تقول ايه بس...كل واحد فاكر نفسه ملك
    تحياتي و احتراماتي

    ReplyDelete
  31. منذر:
    لا والله يا منذر مش موقف محدد ولا حاجة
    كل اللي فيها ان الموضوع دة زايد عن حده بجد و لفت نظري فقلت اكتب عنه
    انت فين من زمان؟
    ما تغيبش علينا تاني يا عم
    تحياتي

    ReplyDelete
  32. mostafa rayan:
    مانت لازم ماتحطش نفسك في موضع شك يا عم مصطفى
    الناس الموسوسين من الحسد دول بيكونوا حالتهم صعبة جدا
    تحياااتي

    ReplyDelete
  33. kochie:
    بس فعلا اغلب الناس عندها هيستريا حسد
    تحياتي

    ReplyDelete
  34. انا حر:
    يعني ممكن نعتبره زي المخدرات اللي بننسى بيها مشاكلنا ونعلقها على امور قدرية بحتة
    تحيااتي

    ReplyDelete
  35. wael:
    الف شكر ليك
    منورني دائما
    تحيااتي

    ReplyDelete
  36. zika:
    اصل الموضوع دة اتكرر فعلا وبقى ظاهرة ملفتة
    كل الناس خايفين من بعض وكل الناس واخدة بالها من بعضها جدااا
    تحيااااتي

    ReplyDelete
  37. desert cat:
    شفتي بقى
    من قبل ما تحكي الحكاية دي وانا حذرت من التعامل مع الاطفال الصغيرين خوفا من ذعر اهاليهم من الحسد
    بعد نظر مني
    منتهى التواضع
    تحياااتي

    ReplyDelete
  38. mermaid:
    اولا وثانيا وعاشرا
    الف الف شكر
    اخجلتي تواضعي
    تحيااااتي

    ReplyDelete
  39. the alien:
    بس اهم حاجة انك تعمل بالنصيحة دي
    تحياااتي

    ReplyDelete
  40. ايامنا الحلوة:
    امين يارب العالمين
    كلام جميل..وكلام معقول ماقدرش اقول حاجة عنه
    تحيااااتي

    ReplyDelete
  41. تعرف
    في جانب في موضوع الحسد انت نسيته
    او يمكن عشان انت مش بتنتمي لجنسنا اللطيف الذي قيل عليه ظلما لطيف ،
    دلوقتي يا احمد
    في هذا الزمن يعني
    البنت اللي بتتخطب و بتعمل حفلة خطوبة مش بتعزم فيها اي بنت مش مخطوبة حتى لو كانت اقرب من اختها ، و لطالت ماتعزمش اختها اللي مش مخطوبة مش هتعزمها !!
    كل المعزومات لابسين دبل يمين او شمال ، لكن المعزومين مش ضروري
    دي بقى انا عيشتها و شوفتها كتير دة بقى اسمه ايه؟؟
    خوف مرضي من الحسد مثلا؟؟
    معقولة تعتقد هي ان كل البنات الباقيين دول اللي مش متجوزين او مخطوبين حاقدات حسودات؟؟
    الموضوع دة انتشر جدا على فكرة
    يعين انا فكرته في حدود معينة بس لقيت ان الحكاية وسعت جدا
    خالص تقديري لمدونتك الحلوة اللي فعلا بتخليني اتكلم

    ReplyDelete
  42. Thanks for it .. I hope the new Topic is always

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails