Monday, 21 April 2008

اشرف...على حق ام على باطل؟


كان الله في عون اشرف زكي نقيب الممثلين
الراجل منقسم بين كونه فنان يؤمن ان الفن لا وطن له وبين كونه نقيب للفنانين
كونه نقيب للفنانين فهو زي اي نقيب لأي مهنيين زيه زي نقيب الأطباء ونقيب الصيادلة ونقيب المهندسين فهو مطالب بالحفاظ على المهنة وحماية ابناء المهنة دي من الدخلاء ومن اي ممارسات او عوامل خارجية تضر مهنتهم (دة طبعا على فرض ان نقيب الأطباء او الصيادلة بيعملوا كدة.....)ما علينا
الدكتور اشرف زكي من موقعه كنقيب رأى ان هناك غزو عربي عامة وسوري خاصة على الدراما المصرية وان الغزو والزحف السوري دة سيؤثر على فرص عمل الممثلين المصريين بأعتبار ان دي سبوبة ولقمة عيش المصريين اولى بها من غيرهم
وهنا انقسم الناس الى قسمين:
القسم الأول بيشوف ان دة فن...مش سبوبة وبالتالي الموهبة لابد ان تفرض نفسها سواء اكانت مصرية او سورية او هندية...الموهبة موهبة لا تعترف بالجنسية
هناك سوريون موهوبون جدا وهناك مصريون موهوبون جدا والموهبة هنا هي الفيصل وبالتالي الباسبور لن يتحكم في الممثل
وبعدين ما كل الممثلين المؤسسين للسينما المصرية ومجدها القديم من اصول غير مصرية بدءا من الريحاني وفريد الاطرش واسمهان وعبد السلام النابلسي وليلى مراد...وليس انتهاءا بالجيل الحالي ممثلا في هند صبري و نور...الخ
وبعدين هو في دراما عربية الا في مصر؟
يعني الناس دي لو مش مثلت في مصر هتمثل فين؟
وكوننا قد منعناهم من التمثيل في مصر فبالتالي خسرنا ممثلا موهبا وكأننا قد عاقبنا انفسنا بالأضافة لعقابنا للممثل كونه غير مصري
دة كان الرأي الأول
اما الرأي المعارض فبيشوف ان اشرف زكي مسئول عن مهنيين...لقمة عيشهم في التمثيل...وكل بلد اولى بأولادها...وبعدين ايه كمية الوجوه الجديدة اللي مش مصرية اللي اقتحمت شاشاتنا مرة واحدة دي؟ وطبعا كلنا نعرف ان معظمهم لهم مؤهلات تانية خالص غير الموهبة
مش اولادنا وبناتنا اعضاء معهد السينما ومعهد التمثيل اولى بالأدوار دي من العرب؟
وبعدين اصلها مش كيميا يعني
دة تمثيل....ومصر فيها 80 مليون
معقول ال 80 مليون مفيش فيهم واحد ينفع يعمل دور معين وبالتالي استوردنا ممثلين من سوريا او لبنان؟
طب دة المصري ممثل بالفطرة
كل رأي من الرأيين له وجاهته
طب الرجل يعمل ايه؟ يقفل الشباك ولا يفتحه؟
يتعامل كفنان مرهف الحس...شعاره الموهبة تفرض نفسها؟
ولا يتعامل كنقيب مهني مهمته المنتخب من اجلها هي الحفاظ على ابناء مهنته؟
انا شخصيا لست مع او ضد
كل رأي له جانب مضيء واخر مظلم
انت بقى
مع او ضد؟



45 comments:

  1. انا جيييييييييت
    هاتفرج على الصور تانى
    هههههههههههههههههههه
    وش واحد مطلع لسانه
    هاروح اقرا واجة اعلق لو ماجيتش النهاردة هاجى بكرة
    متقلقش
    هاجى ان شاء الله
    تحياتى ليك يا ابو حميد
    اختك خيخة

    ReplyDelete
  2. انا مع الصراحه

    ومع جدااااااااا

    الراجل عنده حق

    دول بيفيرسوااا علينااا

    وبعد ده كله

    يشتموا ف اعلامنا

    ReplyDelete
  3. اممممممممم
    هو الموضوع محير شوية ولونى معاه فى اللى هو عمله لانو من ناحية بيدافع عن حقوق اهل بلدة واللى ممكن يروح بسبب تفضيل المنتجين للناس اللى ليهم مؤهلات غير التمثيل اللى انت قلت عليها

    بس كان نفسى كمان يحط حدود للمصريين كمان اللى بيطلعو تفاهه كدة فى الأفلام وبيقدمو حاجات يا لهوى .. ايه الهبل دة

    يعنى عشان ترجع السينما سينما محترمه زى زمان مع ان برضو فى سينما كويسة اوى اليومين دول بس اختلط دة بدة

    يلا ربنا يسهلهم حالهم

    ReplyDelete
  4. مش عارف ليه حاسس انه راجل فاضى

    ReplyDelete
  5. على فكرة الموضوع ده عامل مشكلة كبيرة بين محبى مايا نصرى :D

    ReplyDelete
  6. انا مع ده اولا
    ولست ضد القرار
    اللى بسببه اتهاجم فعلا اشرف ذكى هجوم عنيف من الصحفيين بطريقة غريبة
    عشان اصدر قرار
    بقى يقولو هو مين اشرف ذكى
    ورصيده ايه فى التمثيل وكلام غريب
    اشرف على حق

    ReplyDelete
  7. هيا فكرتة جميلة بس تطبيقها مستحيل. أنا شوفتة في حلقة 90 دقيقة بيتكلم عن الموضوع، وكان غرضة الأساسي يمنع كل واحدة عايز تتجوز علي نفسها تيجي مصر وتعلق منتج يقوم يعملها فيلم، وقال إن الممثل الفنان الموهوب بيعمل عمل أو إتنين بالكتير في السنة تلقائيا حتي لو إتعرض علية أكتر من عمل، فعلي كدة أفلام السلق إلي بتتصور في إسبوع دي حتبقي محصورة، فعلي كدة أصلا الفنانين العرب الموهوبين مش حيشتركوا في أكتر من عمل والمصريين إلي عايزين يسلقوا أهي بلدهم يسلقوا فيها براحتهم

    محدش يقدر يبقي مع أو ضد القرار إلا لو كان من الوسط الفني وعارف إية بالظبط إلي بيحصل هناك، أنا شخصيا علاقتي بالفن إني بتفرج علي أفلام في التليفزيون

    بس القرار حيبقي سلبي لأن المنتج والمخرج حياخد الفنانين إلي هوا عايزهم ويسافر يصور في حتة تانية ويستخدم ستوديوهات تانية وبرضوا الفيلم حيتعرض في مصر، فالتنفيذ مش حيجيب نتيجة أوي والستويوهات حتخسر موارد كانت بتجيلها وحتروح لبلد تانية

    تحياتي ليك

    ReplyDelete
  8. (وجهة نظرى) .. كلامك عجبنى جدااااا

    ReplyDelete
  9. الانسان المسئول والموجود فى موقع المسئولية يكون طريقتة واسلوبة فى التعبير تختلف

    عن من هو بعيد عن المنصب وليس مسئول


    ربنا يفرجها

    تحياتى

    ReplyDelete
  10. بصراحة انا معاه جدا وشايفة انه راجل محترم
    قراراته منطقية وكفاية ووقوفه جنب الفنانين فى مرضهم
    حتى يس اسماعيل يس اللى مات من غير ما حد يحس بيه
    هوه الوحيد اللى كان جنبه
    بس عموما الاختلاف على شخصه يعنى انه ناجح

    تحياتى

    ReplyDelete
  11. انا ضد اي قرار يخل بالعروبه وبالاندماج الثقافي بين العرب
    الممثلات المصريات بيرفوض يادوا ادوار معينه .. العرب بيعملوها
    العرب اكتر التزاما من غيرهم بتعليمات المخرج
    الممثلين العرب اسعارهم اقل من الممثلين المصريين
    الممثلين العرب بيدوروا علي نجاح الفيلم مش نجاحهم الشخصي
    الممثلين العرب فيهم احسن من الممثلين الامصرين
    زي مثلا هند صبري ونور
    اكيد احسن من مني زكي وناس زيها كتير
    ثم ان اكيد شعبيتهم ونجاحهم عمره ما هيغطي علي نجومية ونجاح الممثلين المصريين
    يعني مثلا جمال سليمان ممثل رائع ليه اخسره مع انه عمره ما هياثر علي نجومة خالد زكي
    ليه اخسر ناس موهوبه في فن احنا عمرنا ما هنقل فيه قدام البلاد العربيه لاننا ببساطه الدوله العربيه الوحيده
    اللي السينما فيها صناعه مش مجرد فن سابع
    انهي دولة عربية بتنزل 30 فيلم في السنه ده غير اللي مش بيتعرضوا وغير التسجيليه والروائيه القصيره
    اكيد قرار خاطئ
    ومالوش مبرر لان هم عايزين يحافظوا علي ولادهم اللي مش بيعرفوا يمثلوا وخلاص
    ناس كتير في مصر مش قادره تاخد حقها في انها تمثل
    هل ده سببه الممثلين العرب
    ولا الكوسه والتوريث اللي في الفن
    هل ده سببه هند صبري وجمال سليمان ونور ولا احمد فلوكس وعمر حسن يوسف وهيثم احمد زكي ودنيا سمير غانم وكريم محمود عبد العزيز وباقية الناس اللي لاقة النجاح من غير ما تتعب
    انهي بيضر السينما المصريه ان يمثل في افلامها ممثلين كويسين
    ولا بيمثل في افلامها ممثلين متعينين ??

    ReplyDelete
  12. هي الفكرة مش مع أو ضد

    الفكرة هنا في نوعية الفن من أساسه

    يعني الوحد شايف انه لو الفنا المصري بيقدم حاجه تحترم عقله قبل ما تحترم المشاهد العادي

    كانت النسبة في المشاهة والاقبال عليه أكبر بكتير من الوضع الحالي

    لكن لما تيجي للفن السوري

    ان بصراحة باعشق الفن السوري ودايما باحس انه له هدف أيا كان صحته من عدمها

    لكن يكفي ان لهم هدف

    على العكس هنا

    معظم أعمالنا مافيش فيها هدف خالص وحتى مستوى الأداء في تراجع مستمر

    يمكن يكون ده رايي لكن انا شايف ان ده واقع لازم نعيشه

    تحياتي

    ReplyDelete
  13. شيكابالا22 April 2008 at 02:21

    اولااشرف زكى كنقيب للممثلين يستحق التحية لانة يدافع لهم عن حقوقهم بس لاسف هومش نقيب الحدادين يعنى الحداد المصرى افضل من اللبنانى دة فن يعنى الافضل هو الاكثر موهبة الموهبة لا وطن لها ولادين حرام نجض مواهبنا العربية بقرار مجحف زى دة وبعدين العرب دول اخواتنا مش اعداءنا مين يتخيل السينما من غير نور وهند صبرى؟ بزمتك مش حرام؟

    ReplyDelete
  14. أنا مع أشرف زكي
    في الحد من ظهور الفنانين العرب في أكثر من عمل بنفس السنة
    وترك الفرصة لفناني مصر للتواجد وأكل العيش
    خاصة إن الفنانين العرب الموجودين ع الساحة حاليا لا أجد فيهم الموهبة الفذه التي إذا ما حرمتنا من طلتها سيصاب الجمهور بسبب غيابها بالاكتئاب
    فنجاح جمال سليمان مثلا جاء بسبب انبهار المشاهد بأن هناك ممثل سوري يتقن اللهجة الصعيدية بهذا الشكل
    ونجاح هند صبري جاء نتيجة الضجة التي صاحبت ظهورها في اول فيلم لها وهو مذكرات مراهقة
    أنا لا أنفي امتلاكهم الموهبة ولكني منحاز لأبن بلدي .. لأن الاولوية في شغل الوظائف في الدول العربية على سبيل المثال لإبن البلد وليس للوافد
    اذن
    المعاملة بالمثل
    :)
    خالص تحياتي

    ReplyDelete
  15. انا مع قرارة لاننا فلا لازم نحد شوية من الهجوم ده وفى نفس الوقت بتمنى نلاقى حاجة كويسة نشوفها
    ممكن يكون فيه تعاون بينا بينهم بس مش بالطريقة دى

    ReplyDelete
  16. انا مع الراى التانى
    اللى هو ان مصر اولى بفنانينها
    بس خلاص

    ReplyDelete
  17. الابداع لا حدود له ولا يصح أن تعطله حدود

    حدود رسمت لتفرق بين الشعوب
    فكيف بنا ونحن نرسخ مفهوم الفصل
    ونتبني موقف الغرب
    الذي رسم هذه الحدود

    ضد القرار جدا جدا
    لانه يرسخ أنفصاليه نحن في غني عنها
    نحتاج أن نتحد لا أن نتفرق
    والفن كان بشكل ما يؤدي هذا الدور
    والان
    هذا القرار يفعل ما يريده الغرب
    ربما بأكثر ما كان يحلم به

    خالص تحياتي

    ReplyDelete
  18. أنا ضد هذا الرجل تماما لان الفنان لازم يفرض نفس بموهبته اللي ملهاش دعوه بجنسيته..مش بذمتك حرام نتحرم من رؤيه هند صبري و نور في أكثر من عمل فني
    تحياتي

    ReplyDelete
  19. بنت خيخة واي كلام:
    ما انا قلت لك
    انتي كرهتيني في الصور....هقطعها وانتحر
    الف شكر....تنوري في اي وقت
    تحياتي واحتراماتي

    ReplyDelete
  20. اجدع بنوتة:
    وجهة نظر برضة
    بس عايز اقوللك ان في ناس من عندنا برضة بيشتموهم وبيهينوهم وبالتالي بيردوا
    ولا حلال لينا حرام عليهم يعني؟
    تحياتي

    ReplyDelete
  21. سهر الليالي:
    الاسفاف موجود موجود سواء اللي عملوه مصريين او سوريين
    دة في شوية افلام في السينما اليومين دول عجيييييييييبة جدا
    مش عارف مثلوها ازاي ومش متخيل ايه هو منطق الناس اللي بيدخلوا يتفرجوا
    تخيلي يبقى في فيلم اسمه
    بنات وموتسيكلات؟
    يا لهوي
    هي بقت كدة؟
    تحياااتي

    ReplyDelete
  22. بطوط حبوب:
    على اساس انه عامل قاضي يعني؟
    جايز برضة
    تحياتي

    ReplyDelete
  23. amr fekry:
    سمعت يا عمرو انك واخد توكيل مايا نصري في مصر؟
    عموما هو توكيل جامد جداااا....يا بختك
    تحيااتي

    ReplyDelete
  24. مدحت محمد
    لا يشترط في النقيب ان يكون نجما
    الراجل استاذ في معهد الفنون المسرحية ورجل اكاديمي
    تحياتي واحتراماتي

    ReplyDelete
  25. ههه الراجل ده عجيب جدا
    زي مانتا قولت يعني مصر مفيهاش حد يمثل دور معين
    طب مين اللي بيجيب الممثلين اللي مش مصرين
    منتجين مصرين!
    وبعدين غزو ايه وكلام ايه كل الممثلين العرب ماعدوش خمستاشر واحد..
    ووحيد حامد بهدلو برضو ومعظم النقاد
    ..
    سؤال لنقيب الممثلين
    يا أستــاذ أشرف
    هل تعلم أن أرض النقابه هذة التي تجلس عليها ... منحة من أمــير عربي ؟
    هل تعلم ؟
    ..
    تحياتي

    ReplyDelete
  26. وجهة نظري:
    دايما كدة ممتعني بافكارك الجميلة وتعليقاتك المتميزة
    الف شكر
    تحياتي واحتراماتي

    ReplyDelete
  27. amr fekry:
    اخلع انا منها يعني
    ماشي يا سيدي
    هههههه
    تحياتي

    ReplyDelete
  28. tamer nabil:
    فعلا الراجل بيتحمل مسئولية نقابة وناس بتشتغل وبتاكل عيش وبالتالي بتكون له حسابات مختلفة تماما
    من الاخر كدة
    اللي ايده في المية مش زي اللي ايده في النار
    تحياتي واحتراماتي

    ReplyDelete
  29. voice of love:
    هو فعلا رجل محترم واكاديمي
    وفعلا انا حاسس ان شعبيته كبيرة فعلا في اوساط الفنانين
    تحياتي واحتراماتي

    ReplyDelete
  30. zika:
    طبعا واضح ان وجهة نظرك نظرة ابداعية بحتة
    وهي سليمة تماما الابداع لا يعترف باللغة او الجنسية او الديانة
    وفعلا لمعترضون على القرار دة منطقهم زيك تماما
    انما اشرف زكي بيتكلم من منطق دفاعه عن ناس هو بيدافع عن مصالحهم...اكل العيش والسبوبة بقى وكدة
    وبيني وبينك برضة المنتجين بيستهبلوا...بيجيبوا شوية بنات لاغراض تانية خالص انت عارفها اكيد
    انما النجوم الكبار زي اللي انت ذكرتهم دول لهم وضع تاني
    تحياتي واحتراماتي

    ReplyDelete
  31. عنده حق يا اخويا بلاش فرسه بقى
    والله عندنا ناس محترمه وكويسه جدا
    وانا معاه فى قرارة يا سلام اشمعنا احنا بنعاملهم كويس وهما معلش بيطنطوا علينا

    ReplyDelete
  32. انا مع القرار
    بجد شجاعه نحترمها من اشرف زكى

    عنده حق يعنى الناس عندنا متشتغلش
    الموضوع بس محتاج تقنين

    بس سلامى

    ReplyDelete
  33. صاحب المضيفة:
    انا كمان اعشق الفن السوري بس في الاعمال التاريخية فقط لا غير
    مسلسلاتهم فعلا بتكون غاية في الروعة
    انما الاعمال الدرامية الاخرى...لا يمكن
    ما بفهمش حاجة بحس انهم بيتكلموا لغة تانية
    تحياتي

    ReplyDelete
  34. شيكابلا:
    يعني سيادتك من رأيك ان الفن لا وطن له
    وجهة نظر برضة
    بس مش شايفة ان 80 مليون معقول مفيش حد فيهم ينفع يمثل دور معين وبالتالي لابد من الاستعانة بالخبرة الاجنبية؟
    دة المصري بينزل من بطن امه بيمثل اساسا
    تحياتي واحتراماتي

    ReplyDelete
  35. ياسر حسين:
    وجهة نظرك وضحة تمام الوضوح يا فنان
    وانا مقدر كونك تعمل في الخليج مدى المعاملة الخاصة التي يلقاها ابن البلد
    بس هنا في مصر للأسف في جميع المجالات وليس الفن فقط الاولوية للأجنبي
    تحياتي واحتراماتي

    ReplyDelete
  36. bosbos:
    انتي منحازة لبني وطنك يا بس بس
    وهي وجهة نظر برضة وتحترم
    تحياتي

    ReplyDelete
  37. الموضوع ان مصر ديما بتحب انها تدى الفرص للعرب او للناس الى بره
    الموضوع مش موضوع ان المصريين مش ملتزيمن
    بالعكس ادى الفرصة للناس بجد فى بلدك
    هتلاقيهم ممتازين

    تحياتى

    ReplyDelete
  38. بنت خيخة واي كلام:
    فعلا ماكدبش اللي قالها حكمة
    خير الكلام ما قل ودل
    اوجزتي فأنجزتي
    تحياتي

    ReplyDelete
  39. alshared:
    وجهة نظرك واضحة
    انت عروبي وترى ان الفواصل بين الشعوب والدول العربية غير جائزة اساسا وبالتالي من باب اولى الا يتم تطبيقها في الفن
    تحياتي واحتراماتي

    ReplyDelete
  40. micheal:
    عموما انا اطمنك يا برنس ان نور وهند صبري مستثنيتين من القرار
    هو احنا لنا الا نور وهند؟
    كل سنة وانت طيب يا مايكل
    تحياتي واحتراماتي

    ReplyDelete
  41. ibn naser:
    لا...بس برضة العرب اكتر من 15 واحد
    انت ممكن تكون قصدك على النجوم او النجمات انما عن الادوار الثانوية والكومبارس حدث ولا حرج
    وبعدين مش علشان الارض منحة من امير عربي يبقوا يستعبدونا يعني يا عم ابن ناصر
    ولا ايه؟
    تحياتي واحتراماتي

    ReplyDelete
  42. appy:
    واي تنطيط دة بيركبونا برة وجوا
    ربنا يسامحهم ويجازي اللي كان السبب
    تحياتي واحتراماتي

    ReplyDelete
  43. shayma:
    ممكن تقولي كمان محتاجين منع المجاملات والاستثناءات
    تحياتي

    ReplyDelete
  44. rania:
    في مثلين للكلام بتاعك يا رانيا
    اولهم
    زمار الحي لا يطرب
    وثانيهم
    لا كرامة لنبي في وطنه
    تحياتي واحتراماتي

    ReplyDelete
  45. بص يابو حميد

    عشان تفهم الموضوع احسن من كده يبقى حط في دماغك كام حاجه مهمة

    اول حاجه .. مين اللي بيدخلو معهد السينما ومعهد فنون مسرحيه؟؟؟

    مع العلم ان معهد سينما فيه حوالي سبع اقسام وكل قسم بياخد عشر طلبه بس
    منهم اتنين في كل قسم خريجين كليات او حاصلين على مؤهل عالي
    حلو كده؟
    التمانيه بقى بتوع كل قسم في معهد سينما داخلين كوسه
    التمانيه
    يعني المعهد بيبقى فيه بالكتير قوي اتنين تلاته اربعه بالكتير قوي .. هم الموهوبين فعليا
    والباقي ولاد ممثلين او مخرجين او منتجين .. وصدقني الفن مش بيمشي في الجينات خصوصا ان فنانين زمان طلعو في ظروف غريبه وماكناش على دراية بالتكنولوجيا الحديثه ولا اتفتحنا اعلاميا بالشكل اللي احنا عليه دلوقتي
    ونفس الحكايه في معهد الفنون المسرحيه

    يعني باختصار شديد .. اللي بيتحكم في دخول الناس دي لمجالاتهم ليست الموهبه وانما الكوسه والعلاقات

    تعمل ايه بقى الكوسه لما تبص تلاقي في ممثلين موهوبين بجد ابتدو يظهرو في الحياه
    تروح تجري على الكبير بتاعهم وتقولو والله اطلع بالقرار الفلاني عشان ولادنا زهقو من الادوار الصغيره واللي مش باينه وعايزنهم يتشافو وياخدو بطولات

    الغريب المريب بقى في الحوار ده
    ان اشرف زكي نسي الموهوبين المصريين من الليله خالص
    وكأن المفروض اللي يمثلو او يعملو اعمال سينيمائيه لازم يكونو خريجين أكاديمين .. مش ممثلين موهوبين ومجتهدين

    صدقني في مواهب كتير جدا افضل مليون مره من ولاد الممثلين والمخرجين اللي ملو الدراما المصريه .. المواهب دي لو خدت فرصتها بجد
    يبقى ولا هنقول تعالي ياسوريا ولا لبنان ولا اي بطيخ
    وهنعمل فن نضيف
    فن بحق وحقيقي




    سلاموووووووووووز

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails