Wednesday, 16 April 2008

عن طائفة المديرين......اتحدث


انا ومديري
يختلف الاشخاص....وتختلف الأزمنة...وتختلف الأمكنة
وتبقى علاقة الشخص بمديره علاقة خاصة جدا
علاقة الموظف بمديره تختلف تماما بأختلاف مكان عمله اذا كان في الحكومة او في القطاع الخاص
في الحكومة....يرفع الموظف والمدير شعار اللائحة والقانون وبيني وبينك الورق والنظام....بينما في القطاع الخاص..غالبا مديرك على حق دائما
حتى لو كان هذا المدير محدود الكفاءة والموهبة...فكلامه دائما مصدق....
من 2001 حتى تاريخه...عملت مع اكثر من مدير في مصر وخارجها....وشفت العجب العجاب
من المديرين اللي شخصيته مهزوزة...وضعيف وجبان وغير قادر على اتخاذ القرار الا بالرجوع لمديره هو شخصيا
ومنهم الكفء والمؤهل لمنصب اعلى مما هو فيه الا ان علاقته بمديره هو شخصيا علاقة متوترة...وبالمناسبة في قاعدة مصرية عامة في مجال العمل
اذا كنت كفء ومؤهل وطموح....فحذار من مديرك...فأنت تشكل خطرا رهيبا على مستقبله
من المديرين اللي اشتغلت معاهم من هو مؤذي بالفطرة.....ودائم البحث عن كبش فداء لفشله...وطبعا مبرراته دائما جاهزة
منهم برضة دائم الانتقاد لتصرفات مرؤسيه..حتى لو كنت مليء بالمميزات فكل هذه المميزات تتحول بقدرة قادر الى عيوب ونقائص تستحق النقد واللوم والتأنيب
من المديرين من يتعامل معاك بمنطق المصلحة فقط....طول ماانت تحت رئاسته فأنت موضع اهتمام ورعاية اما لو انتقلت لموقع أخر تحت رئاسة بني ادم اخر...فلقد انتهت علاقته بك تماماا
خالتي وخالتك واتفرقت الخالات
وطبعا هناك قواعد عامة لابد ان تحفظها عن ظهر قلب...علشان تعرف تشتغل وتتعامل
  • مديرك يعرف اكتر منك.
  • مديرك يعمل للمصلحة العامة ولمصلحة العمل....اما انت فمشكوك فيك دائما
  • رأي مديرك فيك...قانوووووووووون حتى لو عملت عجين الفلاحة علشان تثبت عكس ذلك.
  • اجازات مديرك علشان يرتاح ويعرف يواصل رحلة ابداعاته....بينما اجازاتك انت دلع و تمارض.
  • مديرك ممكن يمرض....دة بشر.....انما انت طبعا لا يمكن تمرض...انت سوبرمان...واي محاولة منك انك تمرض هتواجه بكل حزم من الكوميسيون الطبي.
  • مديرك ناصح وذكي..علشان كدة بقى مدير...انما انت محدود الذكاء والموهبة علشان كدة هتفضل طول عمرك زي ما انت.
  • اي معلومة انت بتقولها لمديرك..هي بالنسبة له معلومة قديمة...بس هو طلبها منك علشان يختبرك مش اكتر.
  • مديرك محصن ضد السهو والخطأ...انما اي سهو منك سيواجه بكل قوة وحزم وشدة.
  • تأخر مديرك عن مواعيد العمل الرسمية عادي جدا...وراه شغل برة المكتب بيخلصه...انما تأخرك عن موعد المكتب دة لأن سيادتك نايم في بيتكم.

وفي النهاية

اهداء لكل مدير....علشان يعرف ان احنا عارفين هو وصل لمنصبه دة ازاي

43 comments:

  1. هو احنا جابنا ورا الا كل مدير

    بس الغريب بقى ان الى تحت اما بيطلع فوق بيعيد نفس السيناريو

    ReplyDelete
  2. ههههههه
    الذ شىء كلامك الاخير عن المدراء

    هما بشر واحنا سوبر مان

    تحياتى لرأيك الجرىء

    ومقالك الرائع

    احمد سكر

    ReplyDelete
  3. انا إشتغلت 25 سنة في مكان واحد، قطاع خاص، بس من ساعة ما إشتغلت وأنا عمري 21 سنة بعد ماإتخرجت من الكلية، عدي عليا مديرين كتير مختلفين في شخصياتهم، اول مدير عام لمدة ست شهور كان عندوا سادية شيزوفرينية، وكنت لسة ولا اعرف حاجة في الدنيا إتلبيت مة لما عميت، ومنت بشوف رجالة بشنبات بيتبهدلوا فاحمد ربنا وأخد ركن، بس برضوا مديرتي المباشرة كانت عاملة حماية لموظفينها فمكنش بيطولهم أوي

    المهم المديرة دي إتنقلت لفرع تاني في المؤسسة (مدير عام) وإختاريتني معاها من ضمن إلي إختارتهم. الست دي مذهلة بصحيح، مثال للمدير إلي كل الناس نفسها يكون، وكل المؤسسات نفسها مديرينها يبقو كدة. مديرة كفاءه عالية، طيبة غير طبيعية، أدب نادر، قوة شخصية، أم وأخت لكل واحد... اللة يرحمها بجد، لغاية دلوقتي بعد 15 سنة من وفاتها وهيا في سن 40 سنة لسة ليا علاقة جامدة مع كل أسرتها، حتي ولادها وجوزها وأبوها وأمها. الأتنين المديرين إلي جم بعدها كانوا تلاميذها في مرحلة من المراحل وكلهم أضافوا كتير أوي لشخصيتي، ممكن اقول إنهم هما السبب في تشكبل شخصيتي بالإضافي لتربيتي في بيتي

    لما جة دوري أبقي أكبر مدير في دايرتي، مكانش غريب إن تلقائي أبقي إمتداد لأخلاقهم وطريقة معاملتهم

    أهم نقطة لازم المدير يعلمها للي تحتة: الإعتماد علي النفس في إيجاد حل للمشكلة.. مش أروح للمدير أسألة عن الحل، أروح للمدير أناقشة في الحل إلي أنا وصلتلة، وأقارنة بالحل إلي عندة

    النقطة التانية حرية إدارة مكان الموظف، كل واحد حر يمشي الحتة بتاعتة في حدود القوانين، ووظيفة المدير هيا مراقبة تنفيذ العمل، وإعطاء الدعم الكافي والإرشادات للموظف.... فالموظف مدير نفسة، مدير الكرسي إلي هوا قاعد علية، في حدود مسئولياتة، لما يكبر يبقي مدير كرسية والكرسيين إلي تحتة، وهكذا

    عارف لما كنت ببقي عيان، وأتصل أقول مش حاجي، مديرتي كانت بتقولي (بعد السلامات)، يعني عدم وجودك النهارده حيوقف حاجة؟ لو قلت لأ، متأكد؟ إنت لو مكاني حتوافق علي أجازة الموظف إلي زيك؟؟؟ عارف، ساعات كنت بتكسف أوي وأقول يمكن لو خدت الأجازة دي تحصل مشكلة، اهو شوية برد ممكن أروح يعني مش حموت. لما تحس إنك مسئولن تحب شغلك أوي، ونفسك المكان دا يبقي احسن مكان، لأنك مشارك في إدارتة ومسئوليتة مع مديرينك

    أما بقي الأمثلة إلي إنت قلتها، دي تجيب ورا، وتخرب مؤسسات، وشخصيات المديرين دي عاملة زي الراجل إلي بتديلة مراتة بالشبشب الصبح وييجي يطلعوا علي الموظفين

    يا رب ماكونش طولت عليك ولا أكون خرجت برة الموضوع

    تحياتي

    ReplyDelete
  4. متعاملتش مع مدرين لحد دلوقتى
    انما بتعامل مع المعيدين
    والقواعد دى هتنفع موووووووووووووت

    بس الكارتير جامد جدا
    تحياتى

    ReplyDelete
  5. وراء كل مدير طاغيه

    ههههههههههه

    بوست جميل

    تحياتى

    ReplyDelete
  6. الله يسامحكم كلكم علينا؟؟؟؟؟؟؟؟

    ReplyDelete
  7. بوست حلو وجديد
    انت ضفت ليا معلومات زياده عن اللى عندى عن العلاقه بين المدير ومرؤسه
    تحياتى

    ReplyDelete
  8. This comment has been removed by the author.

    ReplyDelete
  9. الحمدلله والشكر لله
    بالرغم من عملي لمدة 11 عام في مصر إلى أنا خرجت من مصر وعملت بالخارجمنذ أربعة سنوات إلى وقتنا هذا مازلت مدير نفسي
    هتسالني ازاي.. أقول لك : فهمك لايدلوجية المكان الذي تعمل فيه وواجباتك وحقوقك وتميزك في شغلك وعدم ترك أي فرصة لزميلك قبل مديرك لتصيد أي خطأ لك هو الذي يجعلك مدير نفسك غصب عن أنف الجميع
    :)

    ReplyDelete
  10. حلو قوي الكاريكاتير الاخير


    ربنا يرحمنا ويجي اليوم اللي نعرف نشتغل فيه بضمير فعلا


    دعواتك

    ReplyDelete
  11. تعرف المعيدين تقريبا بيعاملونا بنفس الطريقه

    عموما كل واحد شايف أن تفكيره وبس هو الصحيح علشان كده تلاقي تسلط من المديرين علي الموظفين اللي تحتهم

    في الشغل في الصيف كان المدير بتاعي بيخليني أعمل كل حاجه
    دلوقتي أنا بقيت المدير وبحاول أني ماعملش مع الناس اللي شغاله معايا نفس اللي كان بيعملوا معايا
    بس أحيان كتير جدا مش بيشتغلوا بزمه الا لما تدخل فيهم جامد جدا

    الكريكاتير رائع وعلي فكره مصر كلها كده

    خالص تحياتي

    ReplyDelete
  12. اكيد حقه يعمل كدة مش مدير
    ياخد اجازات
    يعمل الى هو عايزة يا احمد


    ملحوظة انا مديره فى السنتر بتاعى
    دلوقت فعلشان كدة تلاحظ ان وخدانى الجلاله قوى
    :)
    تحياتى

    ReplyDelete
  13. محمد عبد الغفار:
    اهو كلهم مديرين
    من.......وانت ناززززززززل
    ربنا يجعل كلامنا خفيف عليهم
    تحياتي

    ReplyDelete
  14. سكر:
    الف شكر يا بو حميد
    انا اللي اشكرك على كلامك السكر يا سكر
    تحياتي واحتراماتي

    ReplyDelete
  15. وجهة نظري:
    اعتقد ان السادية من المؤهلات والامكانات المكلوبة لكي تكون مديرا ناجحا
    ودة من وجهة نظر عدد كبير من اصحاب الاعمال
    عارف مين هو المدير المحترم بجد؟
    اللي بيشتغل بأيده...اللي بيعرف يعمل اللي مرؤسيه بيعملوه...اللي مش بيصدر الموظف الصغير للمواقف اللي هو مكسوف يعملها او خايف يعملها
    فعلا دة بيكتسب احترام مرؤسيه
    تحياتي واحتراماتي

    ReplyDelete
  16. بطوط حبوب:
    لا بقى
    المعيدين دول حاجة تانية خااااااالص
    مش عارف ليه اغلب المعيدين بيتناسوا انهم كانوا قاعدين في المدرج من كام شهر فات
    عموما دي في الاغلب بيبقى لها علاقة بمركبات النقص والتربية
    تحياتي واحتراماتي

    ReplyDelete
  17. حسام يحيي:
    دة اذا ما كانش هو الطاغية شخصيا
    تحياتي

    ReplyDelete
  18. عصفور المدينه:
    ايه دة؟
    انت من طائفة المديرين يا باشمهندس؟
    ماكانش العشم
    بس اكيد انت غير
    تحياتي واحتراماتي

    ReplyDelete
  19. مشكور جدا ع النصايح دى

    علشان مايبقى ليا مدير واشتغل

    ابقى اعرف امسمره كويس

    ReplyDelete
  20. This comment has been removed by the author.

    ReplyDelete
  21. ههههههههه

    جامدة جدا

    وبالذات الكاريكاتير اللى فى الاخر

    بس تصدق الملاحظات دى صح اوى

    تحياتى لك يا احمد

    وانا قريت عنك فى الدستور العدد الاسبوعى

    احمدالصباغ

    ReplyDelete
  22. بحبك يا مصر:
    على الرغم انها معلومات سلبية الا ان للأسف الشديد
    هو دة الواقع
    تحياتي

    ReplyDelete
  23. ياسر حسين:
    كلام مية مية
    بس مش شايف انه نظري جدا يا فنان
    اكيد الانسان هيغلط طالما هو يعمل
    تحياتي

    ReplyDelete
  24. صاحب المضيفة:
    حتى لو اشتغلنا كلنا بضمير وهمة مالهاش حل
    هتلاقي برضة اللي متسلط عليك علشان يعكننك ويسد نفسك
    والمصيبة انه مديرك للأسف
    تحياتي

    ReplyDelete
  25. alshared:
    طبعا مصر كلها كدة
    وهي اي شركة كبيرة عبارة عن ايه الا دولة مصغرة
    تحياتي واحتراماتي

    ReplyDelete
  26. عملت باحد الاماكن التي تتبني رسالة معينة من اجل الاطفال
    نربي الطفل على الاخاء المحبة المشاركة والتعبير عن الراي الايمان
    مع تبنينا نحن اصحاب الرسالة مبدأ العمل المجاني ( كنا ناخذ اجورا ولكننا نعمل دون ان ننظر لها او ان تكون هي دافع العمل وهكذا ايضا بالنسبة للمركز الاجتماعي )
    قررت ان اترك هذا العمل لاوسع دائرة الرسالة وعملت في مكان آخر ظاهرة نفس الافكار
    ولكني الان وبعد ان عملت مع عينات الرئاسات والسلطات التي ذكرتها
    قد تغيرت اتجاهاتي
    فاليوم اقول
    ساترك هذا العمل لاحصل على عمل اخر
    احقق منه
    اما الرسالة
    اما اموال
    اما مركز اجتماعي
    او كلهم معا
    ولم اعد اهتم بتحقيق الاهداف
    منهم لله البعدا
    اشكرك
    سمراء

    ReplyDelete
  27. rania:
    ايوة يا عم
    ربنا يسهل لعبيده
    اخيرا اتنقلتي الى طائفة السادة يا رانيا وسبتينا مع العبيد....ماشي
    تحياتي

    ReplyDelete
  28. اجدع بنوتة:
    اعتقد ان النصايح دي هتسد نفسك عن الشغل من اساسه
    تحياتي

    ReplyDelete
  29. ahmed al sabagh:
    يا بو حميد
    قهر المديرين وحركاتهم الربع كم دي لغة عالمية موجودة في كل مكان
    ربنا يهديهم
    تحياتي

    ReplyDelete
  30. انت حطيت صور جديدة ليك
    ؟
    حلوة الصورة بتاعتك وانت قاعد بتتمرجح على البطوطة
    بتفكرنى بصورة
    عندى وانا بتزحلق على الزحليقة
    المهم

    نيجى بقى لموضوع البوست
    اممممممممممممم
    انا ماكملتش قرياته علشان كنت بتفرج على الصور
    استنى هاروح اكمل قراية وارجع تانى
    وهاتفرج على الصور تانى
    اصل انا بحب الصور اوى
    سلام
    اختك خيخة

    ReplyDelete
  31. ايه ده انا مديرة تنفيذيه بس والله مش كده خالص حرام بقى مش كله والنبى والنبى انا بقالى 9 سنين بشتغل لما فطست حرام عليك
    عاااااااااا انا ماشيه

    ReplyDelete
  32. الكاركاتير حلو قوى و معبر جدا
    وواضح ان عندك خبرة كبيرة فى موضوع المديرين ده وكويس انك قلتلنا علشان برضه الواحد يكون على نور
    تحياتى

    ReplyDelete
  33. فن تملق الرؤساء لا يتقنه الا كبار الموظفين


    حليتزم


    اوروفوار

    ReplyDelete
  34. سمراء:
    على فكرة يا سمراء
    المدير بيكون له عامل كبير جدا في حب الناس للعمل او كرههم له او اقتناعهم او عدم اقتناعهم بما يعملوه
    تحياتي

    ReplyDelete
  35. بنت خيخة واي كلام":
    اولا الف شكر يا فندم ع الكومنت....قالباني انتي من زمان ومطنشة مدونتي المتواضعة
    ثانيا:
    كرهتيني في صوري وبفكر احذف الصور واقفل المدونة وانتحر
    ثالثا:
    سيادتك كالعادة اتفرجتي ع الصور وقلبتي بدون تعليق
    ماااااااااشي

    ReplyDelete
  36. appy:
    يافندم اكيد حضرتك مش من اياهم المذكورين اعلاه في هذا البوست
    لكل قاعدة شواذ برضة
    تحياتي واحتراماتي

    ReplyDelete
  37. gannah:
    خبرة!!!!!!واي خبرة
    دة انا مدوبهم سبعة في عين العدو
    تحياتي

    ReplyDelete
  38. طهقانة:
    دة كان زمااااااااااااااان
    دلوقتي بيتقنه جميع الموظفين صغيرهم قبل كبيرهم
    تحياتي واحتراماتي

    ReplyDelete
  39. ياااااااادى السيرة المنيلة
    أقولك اييييييه بس

    تخيل طيب لو عندك 3 مديرين فى وقت واحد
    اة والله
    ها بقى قولى هتعمل ايه

    ها ؟؟ أصوت ولا تصوت أنت؟؟
    :)
    ولا أقولك أنا هجيب صواتة بالكهربا

    وبحييك على الكاريكاتير الجامد بفكر أطبعه بالألون وأحطة فوق مكتبى على طول
    ههههههههه

    ReplyDelete
  40. شيكابالا22 April 2008 at 02:29

    اولا بوست جامد ممممممممووت وكاريكاتير تحفة. بسمش كل المديرين يا بوحميد وانت عارف فية مديرين طيبينوولاد حلال وبيعملو لمرؤسينهم شاى كمان لية الظلم دة؟ سيبونا ف حالنا

    ReplyDelete
  41. سهر اللليالي:
    ثلاثة مديرين؟
    يا لهوي
    كان الله في عونك بجد
    وبعدين الكاريكاتير دة لازم يطبع ويتعلق في كل مكان علشان نكسر عينهم
    تحياتي

    ReplyDelete
  42. شيكابالا:
    يا فندم لكل قاعدة شواذ
    وفي مديرين مية مية طبعا
    وعلى عيني وراسي من فوق
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails