Tuesday, 8 April 2008

وفروا ندواتكم....فتشوا عن الفساد


ااااااااااااه
الندوات بدأت والتحليلات اشتغلت
ومفكري الحزب الوطني احتلوا اماكنهم في الصفوف الاولى لبرامج التوك شو
محطة فيها السيد مصطفى الفقي ومحطة ثانية فيها السيدة يمن الحماقي (مالهاش علاقة بمحمد حماقي على فكرة) وقناة تالتة مستحوذ عليها الاخ الوطني عبد الله كمال
رغم ان المسألة ابسط من كدة بكتــــــــــــــــيــــــــــــــــــــــــــــــر
اصلها مش كيميا على فكرة
ناس طهقانة وزهقانة وقرفانة وفقرانة...عرفوا ان في اضراب.....خرجوا في مظاهرة سلمية...كام 100 بني ادم ماشيين في الشارع سيلنت
بس لأن العلاقة بين منظر المظاهرات حتى لو سلمية وبين جحافل الأمن المركزي وضباطهم ولواءاتهم زي بالضبط العلاقة بين اللون الأحمر والثور في مصارعة الثيران الأسبانية
فالسادة اللواءات اصدروا اوامرهم لجنودهم بالضرب بالخرزانة فورا مع كام قنبلة مسيلة للدموع
وهنا القشة اللي قصمت ظهر البعير...كل الزهق والفقر والافلاس والكبت اللي عند الناس دي تحول لغضب رهيـــــــــــــــــــــــــــــــــــــب
غضب مكبووت من زمااااان جدا....ان الاوان ان يخرج....خرزانات الامن المركزي وقنابلهم أخرجت المارد من قمقمه
سواء بقى كان المتظاهرين هم اللي خربوا....او اندس بينهم من ركب الموجة لكي يسرق وينهب..الا ان الاسباب معروفة والنتيجة واحدة
عنف امني اعتادت الدولة عليه دائما وابدا لتفريق المظاهرات واخماد الحركات الاحتجاجية...بس نسوا او تناسوا ان لكل شيء نهاية او على رأي ام كلثوم للصبر حدود
وكانت النتيجة تدمير وتخريب وعنف متبادل
بس
هي دي الحكاية
بدلا من ان يظهر المفكرون الوطنيون (نسبة الى الحزب الوطني طبعا وليس الى الوطنية) لطمأنة الباشوات الكبار ان كله تمام وان الأمن مستتب وان يلمحوا الى الأخوان المسلمين انهم هم المحرضون, عليهم ان ينقلوا للباشوات الكبار بينهم وبين بعض ان الفقر هو المحرض...ان الفساد هو السبب..وان الديكتاتورية تورث العنف....وان العنف الأمني هيواجهه عنف أهلي.....وان احتكار الثروة والسلطة في البلد دي مالوش الا نتيجة واحدة كانت احداث المحلة صورة مصغرة جدا منها
العالم كله يعلم جيدا ان احداث المحلة سببها الفساد.....الفســــــــــــــــــــــــــــــــــــــــــــــــــــاد....الفســـــــــــــــــــــــــــــاد وليس الا الفساد
وتحت كلمة الفساد يندرج جميع انواع الفساد
فساد سياسي....فساد اقتصادي...فساد امني...فساد اعلامي.......الخ
مش محتاجة ندوات ولا مؤتمرات
محتاجة فقط ادراك ان الدنيا بتتغير....وان اذا كان المصريين زمان كانت بتجمعهم طبلة وتفرقهم عصاية,فمصريي القرن ال 21 مش كذلك
*-*-*-*-*-*-*
sms:


To: Mona Al Shazly:
حلقة العاشرة مساءا يوم الأحد كانت صدمة لعشاق برنامجك.....تقريبا الحلقة طلعت بالشكل دة بتعليمات امنية...بس من امتى منى الشاذلي بتاخد تعليمات من الأمن؟
عموما لكل جواد كبوة
To: Amro Adeeb:
من حوالي اسبوع...انتقدت برنامجك وقلت عليه انه اصبح برنامج موضة وطبيخ....حلقة الأحد اثبتت ان الرجال بيظهروا وقت الشدائد...
برنامجك هو الوحيد تقريبا اللي غطى احداث المحلة رغم التعليمات الأمنية
الف شكر لأحترامك لنا

40 comments:

  1. اعتقد انت جبت المفيد واللى كل الكلامنجية ومحترفى لوى اعناق الحقيقة بيلفوا ويدوروا علشان يداروة

    ReplyDelete
  2. بجد هو الفساد
    كلمه فى الصميم بجد
    بس هقول ايه هيفضول كدة فكرين ان العنف هيوقفنا بس الى الامام على طول ان شاء الله
    بالنسبة للراسائل
    بجد
    فعلا برنامج العاشرة مساءا
    كان صدمة

    تحياتى

    ReplyDelete
  3. أهي الاشكال اللى بتنط لنا عبر الشاشة والفضائيات دي هي السبب في رفع ضغط الشعب واستفزاز البشر
    دول على حد القول الشعبي
    مطبلاتيه .. بيطبلوا للنظام والسلام
    ومبيقولوش كلمة حق ..فرحانين بس أنهم طالعين في التلفزيون
    الرسائل اللي في آخر البوست في الجوووول
    وعلى فكرة في حلقات كتير للعاشرة كانت واقعة مش الحلقة دي بس

    خالص تحياتي

    ReplyDelete
  4. اذا افترضنا كما يقول الكثيرون ان تصعيد الوضع فى المحله بفعل بلطجيه مش اهل المحله ولا الثوار ولا الكلام الكبير ده
    ده مش دليل ان مصرى القرن 21 مختلف عن اى فيرجن مصرى اخر
    وان كان اهل المحله هم الى مصعدين الوضع فاظن ان مصرى ال21 فرجن اسوء والله اعلم

    ReplyDelete
  5. كلامك مظبوط
    مشكلتنا الرئيسية مش في الفقر و لا الزيادة السكانية مشكلتنا الرئيسية في الفسااااااااااد اللى بجد مالى البلد اوي

    كلامك لمنى الشاذلى و عمرو أديب مظبوط أوي و أعتقد كتير حسوا بكده مش انت و أنا بس
    اللى يغيظك بقى الجزيرة ....مش عارفة ليه غاويين يجيبولنا لواءات الشرطة اللى بيحرقوا دمنا
    تحياتي

    ReplyDelete
  6. شىء متعب

    ولكن ليس جديد

    لانة مكرر على مر السنين

    بس اتمنى فى يوم حال البلد يتغير وتبقى احسن


    تحياتى

    ReplyDelete
  7. معاك فى كل كلامك
    وخصوصا فى موضوع برنامج عمرو أديب الحلقة فعلا كانت كويسة جدا ونقلت الواقع كله

    تحياتى لك

    ReplyDelete
  8. ناس لابسة متقيفة و جايّلهم النوبه
    تقول و ما بيفهموا لو قلت ميت نوبه
    لا بيسمعوا صرخنا ولا شافوا يوم جوعنا
    حتى الحقايق كمان شايفينها مقلوبة
    و عجبي
    KING TOOOT

    ReplyDelete
  9. من الاخر انت قلت كل حاجه

    ReplyDelete
  10. بوست جميل

    ربنا يوفقك


    وفعلا حلقه منى الشاذلى كانت زباله

    بس اظن ان هى عوضتها فى حلقه يوم الاتنين

    :)

    ReplyDelete
  11. بوست جميل

    ربنا يوفقك


    وفعلا حلقه منى الشاذلى كانت زباله

    بس اظن ان هى عوضتها فى حلقه يوم الاتنين

    :)

    ReplyDelete
  12. rana:
    هي عادتهم ولا هيشتروها؟
    تحياتي

    ReplyDelete
  13. rania:
    العنف لا يولد الا العنف
    بس الظاهر ان الجنرالات مايعرفوش القاعدة دي
    العاشرة مساءا يومها كانت حلقة الصدمة والترويع...للمشاهدين طبعا
    تحياتي واحتراماتي

    ReplyDelete
  14. ياسر حسين:
    بالنسبة للمطبلاتية بتوع الحزن الوثني
    ساعات بيكونوا مطبلاتية وساعات بيكونوا مزيكاتية بس بيعزفوا نشاز وساعات بيكونوا حاجة تالتة
    اما للبرامج الجماهيرية...فتقريبا وثيقة الفقي اشتغلت وعملت عمايلها
    تحياتي

    ReplyDelete
  15. محمد عبد الغفار:
    فكرة برضة
    انا هبيع التليفزيون
    تحياتي واحتراماتي

    ReplyDelete
  16. بطوط حبوب:
    وهل المفروض ان الفرجين المحترم هو اللي ينضرب بالخرزانة ويقول كمان؟
    ولا المصري المؤدب هو اللي ينضرب بقنابل الغاز ويرد عليها بتقبيل الايادي؟
    اسمح لي
    انا مختلف معاك تماما
    تحياتي

    ReplyDelete
  17. متفق معاك في كل النقاط تقريبا و لكن عمرو أديب تميز فقط في التغطيه الخاصه بفريق القاهره اليوم و لكن علي المستوي الشخصي كنت حاسه معاهم معاهم عليهم عليهم
    :)
    نقطه أخري ملهاش علاقه بالمحله
    أنا شفت يا باشا فيلم لحظات أنوثه و ليس عندي أي ملاحظات ضد علا غانم و لكن ملاحظتي الوحيده أنه فيلم ضعيف جدا جدا فنيا أما علا فهي الويحده اللي كانت تقريبا عارفه تمثل فيه و أنا شايف أنها عنده ا طاقات كبيره جدا لم تستغلها كلها بعد
    تحياتي

    ReplyDelete
  18. الحلم العربي:
    تغطية الجزيرة كانت سيئة جدا جدا
    انما بجد اللي كانت متألقة بجد هي
    bbc arabic
    تحية ليهم بجد
    تحياتي

    ReplyDelete
  19. tamer nabil:
    تفتكر اليوم دة قريب ولا بعيد يا صاحب الافكار الحرة؟
    تحياتي واحتراماتي

    ReplyDelete
  20. والله اللى فكارين نفسهم مثقفى الحزب الوطنى الى بيصدعونا دول على شاشات القنوات المصرية العقيمة نفسى يريحوا نفسهم فى البيت لان كلامهم لا يدل على اى ثقافة
    دول بيبقوا ولامؤاخذة عاملين زى اللمبى لما وقف يقول خطبة ادام بتوع حقوق الانسان

    تحياتى
    شيماء

    ReplyDelete
  21. bosbos:
    حلقة عمرو اديب كانت اكتر من رائعة وحلقة منى الشاذلي كانت صدمة فعلا
    تحياتي

    ReplyDelete
  22. kingtoot:
    لا تتعجب.....انها ارادة الله
    تحياتي

    ReplyDelete
  23. محمد مفيد:
    الله يخليك شكرا
    بس لسة دة مش كل حاجة
    تحياتي واحتراماتي

    ReplyDelete
  24. حسام يحيي:
    اعتقد يا حسام ان في برامج من النوعية دي
    الدقيقة بتفرق وممكن تخسرك جمهورك...مابالك بقى يوم كامل ممكن يعمل ايه؟
    تحياتي

    ReplyDelete
  25. سؤال دائماٌ أسئله لنفسي عند مشاهدة منظري الحكومة وهو هل يصدقون ما يقولون ..؟ وهل يصدقون أنهم يستطيعون إقناع الشعب بكذبهم ...؟
    أعتقد أن الأغلبية من شعب مصر فاقت من زماااان وإن غداٌ لناظره قريب
    خالص الود والتحية

    ReplyDelete
  26. عايز اعرف احساس الراس الكبيره ايه وصورة بتتقطع من الشوارع فكرنى بيوم سقوط بغداد
    بس العراقيين عملوا كدة بواعز من الامريكان
    لكن المصرين عملوا كدة بواعز من الزهق والقرف منه

    ReplyDelete
  27. micheal:
    بص يا مايكل
    هو عمرو اديب بقاله فترة مش هو...وفي حاجة غلط
    بس اعتقد ان حلقة الاحد هي حاجة من ريحة عمرو اديب القديم
    بالنسبة لعلا غانم..فالعري هو اسلوبها والستايل بتاعها سواء في لحظات انوثة او غيرها
    تحياتي

    ReplyDelete
  28. fenresier:
    انتوا بتطلعوا لنا منين؟

    ReplyDelete
  29. شقاوة شعب:
    طب دة الليمبي كان دمه خفيف وبيضحكنا
    دول بقى دمهم تقيل وبيبكونا
    تحياتي

    ReplyDelete
  30. هو احنا لييييييييييه راغين كتير؟؟!!!!!!!
    هو ليه احنا بقينا مفتقدين الافعال؟؟؟؟

    ReplyDelete
  31. ازاى تقدر تكلم المفسدين عن معالجة الفساد
    امال هما هايعيشوا منين
    الناس تعبت ولكم ان تتوقعوا اى حاجه من ناس تعبانه
    المصرى اللى كان طول عمرى بيمشي جنب الحيط عشان اولاده يعيشوا هو نفسه اللى هايقود المظاهرات لنفس السبب
    حاسبوا
    الأيام الجايه هاتحمل من العنف ملا قبل لكم به

    ReplyDelete
  32. افندينا:
    تصدق بالله
    كنت بسأل نفسي نفس السؤال من كام يوم
    هم الناس دول مصدقين اللي بيقولوه..ولا بيشتغلونا؟
    تحياتي

    ReplyDelete
  33. المستنصر بالله:
    الراس الكبيرة مابتتعرضش عليه الصور اللي زي دي علشان ما يزعلش
    اعتقد انه ماشافش الصور دي اصلا
    تحياتي

    ReplyDelete
  34. merooo:
    احنا من زمان يا ميرو واحنا رد فعل
    مش جديدة علينا
    تقريبا من يوليو 1952
    واحنا تحولنا لرد فعل
    تحياتي

    ReplyDelete
  35. وينكي:
    مش عارف اقول لك يسمع من بقك ربنا....ولا فال الله ولا فالك؟
    الاولى علشان الناس بدأت تصحى وتفوق
    والتانية علشان البلد كدة هتتخرب
    ربنا يستر
    تحياتي

    ReplyDelete
  36. يل ريس وفر كلامك انت لأن الناس دي مستفيدة من الفساد اللي وجود
    تحياتي

    ReplyDelete
  37. كريم عاطف:
    يعني خلاص يا عم كريم.....مفيش فايدة؟

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails