Sunday, 30 March 2008

شوية هلوسة


هو رسام الكاريكاتير الدنماركي صاحب الرسوم المسيئة للرسول محمد صلى الله عليه وسلم عايش هنا في مصر؟
طب هو الراجل طلع بيعرف عربي؟
طيب الراجل الرسام دة من مشاهدي الفضائية المصرية؟
يبقى ليه العربيات ماشية في الشوارع عليها ملصق مكتوب عليه
الا رسول الله
طيب ليه كنت بتفرج على ماتش كورة مابين فريقي الاتحاد السكندري وفريق تاني ولقيت في المدرجات يافطة عليها
الا رسولي
هو حد هنا في مصر رسم رسوم كاريكاتورية بتسخر من الرسول الكريم عليه الصلاة والسلام
احنا ليه بنخاطب نفسنا.....اليفط والملصقات دي موجهة لمين؟
ما انا وانت وهو وهي متفقين على كل الكلام دة من غير يفط ولا ملصقات
يا جماعة
احنا ليه بنكلم نفسنا....ليه مش بنخاطب العالم الخارجي
نفس منطق تعاملنا مع امريكا واسرائيل نقعد نغني و نرد على بعضنا
يارب تب علينا بقى
------------------------------------------------------------
غريبة جدا اني ابقى مسئول جامد جدا وبالحجم دة والناس اللي المفروض اني مسئول عنهم بتقطع بعضها وبتموت بعض في طوابير العيش ومش لاقية تاكل
وابقى قاعد انا والمدام في المقصورة بنتفرج على ماتش كورةةةةةةةةةةةةةة
اللي يعيش ياما يشوف
وكم ذا بمصر من مضحكات ولكنه ضحك كالبكاء
-----------------------------------------------------------------
هي علا غانم دي عايزة ايه بالضبط؟
هتفضل حرانة كدة على طول؟
نفسي الاقيها مرة غلطانة وطالعة في دور محترم
ربنا يشفيها
------------------------------------------------------------------
القاهرة اليوم بقى برنامج مسالم جدا
ومثالي جدا (من وجهة النظر الحكومية) طبعا
القاهرة اليوم اللي كانت حواراته وخبطاته الصحفية بتقلب الدنيا اصبح مهتم بالموضة ومسابقات الطبيخ
بركاتك يا وثيقة الفقي
--------------------------------------------------------------------
سمعت ناس بتقول لازم ناخد حقنا وناخد بتارنا من الامريكان اللي قتلوا المواطن المصري في قناة السويس المصرية
ضحكت طبعا
امريكاااااااااااااا......مرة واحدة
طيب مش لما ناخد بتار المصريين اللي بيتسحلوا على ايد الخلايجة برة وجوة
-------------------------------------------------------------------------
خبر قريته ان 60% من المصريين مايعرفوش شكل ورقة ال 200 جنيه
تخيلوا
يعني من كل 100 بني ادم ماشي في الشارع في 60 منهم عمرهم ما مسكوا ورقة ال 200 جنيه في ايديهم
يعني على كدة لو الواحد ضاعت منه ورقة ب 200 جنيه في اي مكان نسبة انه يرجع يلاقيها مكانها حوالي 60 % على اساس ان 60% من الاشخاص المتواجدين في المكان دة مش هيعرفوا ان دي فلوس اساسا وبالتالي محدش هيمد ايده وياخدها
حاجة لطيفة جدااااااااا
---------------------------------------------------------------------------
القمة العربية انطلقت النهاردة
حد متابع؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
-----------------------------------------------------------------------------
اللي فوق دة كله هلوسة مالهاش اي علاقة ببعضها
تفاعلات جوة دماغ العبد لله من ضمن تفاعلات اكتر بكتير لسة في الدماغ
كل شهر ان شاء الرحمن هحاول اهلوس شوية
يمكن اريح دماغي شوية

44 comments:

  1. أحلى هلوسة لأحلى دماغ

    ربنا يزيدك من نعيمه يا كبير


    سلام كبير

    ReplyDelete
  2. هلوسة مية مية

    جميلة وجامدة جدا

    أستمر وهلوس براحتك

    تحياتى

    ReplyDelete
  3. أنت عايز تقنع الناس إن الكلام الموزون ده هلوسة؟
    :)
    خالص تحياتي

    ReplyDelete
  4. إنت حتهلوس تاني كمان شهر، يادي المصيبة .... حنطر نستحمل صدمة كل شهر بقي نعمل إية :)

    بالنسبه لهلوسة الرسوم مخدتش بالك إنها تحمل شعار "سبوبة للجميع"؟ الرسام وصلتلوا سبوبتة، والملصقات دي مش ببلاش، سيل من الملصقات في الدول العربية سبوبه برضة، واليفط في المتشات ماهي بفلوس، والفضائيات تعمل برامج ساخنة لمناقشة موضوع حبنا للرسول علية الصلاة والسلام تتخللها إهلانات راقصة وبنات كتاكيت، سبوبة حلوة، دا غير إبعت إس إم إس علي الرقم الفلاني لتشارك في دعم حملة مش عارف إية ..... أهو رزق الهبل علي المجانين ... مش عارف لية شاكك إن مسلمين تجار شاطرين هما إلي وازين الرسام دا

    ولهلوسة إتنين، مجاتش علي المسئول الي بيحضر ماتش، ما دبح الناس محتاج مجهود ولازم يريح أعصابة برضة، امل تقول إية علي المسئول إلي شايف المشكلة مباشرة ومشارك فيها وبعدين يطلع في اي برنامج يكذب عيني عينك، تسالة عن الأزمة تلاقية يقولك "أزمة، أزمة مين"، زي "حمرا، حمرا مين" كدة ... وبعدين تلاقية لسة قاعد مكانة عادي خالص

    أما بقي عن علا غانم، فدي حكايتها حكاية... ممثلة قديرة.. أي نعم .. يعني هيا جت علي دي، ما الفن مليان قدرات غريبة، ممثلين ومخرجين ومغنيين ... يابني مسمعتش عن حرية التعبير... عبر بقي مستخدما كل إمكانياتك

    القاهرة اليوم دا بيضحكني أوي، عيلة أديب دي مناش فاهملها، تبع الحكومة والا تبع نفسها، الأخ الكبير بيموت في الريس، والصغير بيموت في جمال، وتلاقي إشي طبيخ وإشي تفسير أحلام وإشي أزياء.... خلطبيتة بتعبر عن إسم البرنامج "القاهرة اليوم" خلطبيتة

    وعن التار، صح كلامك، مصر دلوقتي فقدت ريادتها، إذا كنا ملناش كلمة علي الخلايجة، عايز الأمريكان يخافوا... منهم للة إلي كانوا السبب

    متابع القمة العربية وبسأف معاهم جامد ومبسوط أوي أوي .... هوا في قمة عربية؟؟؟

    والنبي يا شيخ ما تزهاء من تعليقاتي الطويلة، مش عارف لية حاسس إنك حتعملي بلوك :)

    ReplyDelete
  5. كلنا بنهلوس الظاهر دةمرض معدي


    بس هلوستك في الصميم

    ReplyDelete
  6. يااااااااااحمد

    احبطاتك عامله ايه

    بقلك صحيح عجبتني اوي علا غانم وهيا حرانه انا ديما بقول الكلمه دي

    والـ 200 جنيه انا شفتها مع بابا كان قابض مكافاءه
    وفرحت اوي بيها... عبط تقول ايه

    بس هلوس كل يوم حلو بجد الهلوسه دي
    بس متسكتش علي نفسك كل ما تحس بحاجه تعالي وقولهلنا
    سلامووووووووووز ياااااااااحمد
    وزة

    ReplyDelete
  7. حلوة المتفرقات اللي تحرق الدم ديه

    وأكتر حاجة تغيظ بتاعة المسئولين اللي بقوا يظهروا في الملاعب والأستادات أكتر ما بيظهروا في أماكن مسؤليتهم.

    وبخصوص الحكاية بتاعة ال 200 جنيه

    عايز أجرب الحوار اللي أنت قولت عليه ... بس علي مسئوليتك
    قلت ايه

    تحياتي
    .

    ReplyDelete
  8. دي أصلا من مميزات المصريين

    فاكر فضيحة الصفر بتاعة كاس العالم
    المسؤلين قعدوا يلفوا مصر ويعملوا حملات كلها جوه مصر ومحدش فكر أن الكلام اللي هما بيعملوه ده مالوش لزمه

    بدل ما العرب يبينوا للناس اللي بره المفهوم الحقيقي للدين والقيمه الخالده للرسول -ص- لا دول ماشيين يتكلموا مع بعضهم
    بيزايدوا علي بعض

    والناس اللي بجد محتاجين مجهود علشان يقدروا يفهموا ايه هوه الاسلام وقد ايه الاسلام ده عظيم مالناش دعوه بيهم

    ثقافة مجتمع

    وبعدين انتا عايز الحكومه ماتستغلش اي فرصه للظهور
    دي حتي مش هاتكون حكومة مبارك
    والشعب ماهو مطحون ومحروق في جهنم الغلاء والاستبداد والقمع

    أنا بحب عمرو أديب وبحب أسلوبه جدا واللي بيحصل دلوقتي بيحصل مع برامج كتير وناس أكتر
    ابراهيم عيسي 6 شهور سجن

    أنا دمي غلي جدا لما سمعت عن اللي حصل

    ولكن الانسان في مصر مالوش قيمه وهو في بلده ازاي عايز تاخد بثأر شي ليس له قيمه
    لا يصح

    المصريين أصلا مش بيشوفوا الفلوس فعايزهم ازاي يعرفوا شكل ورقه بالمبلغ ده

    يعني مرتب الشاب حديث التخرج 150 جنيه يبقي هايعرف شكل الورقه دي ازاي؟

    للأسف مش متابع العربيه كان نفسي أضحك شويه بس مافيش نصيب

    طولت عليك قوي بس كل اللي انتا كاتبه يستحق التعليق
    وليست هناك هلوسه تستحق التعليق

    خالص تحياتي

    ReplyDelete
  9. صباحو هلوسه
    :)
    بالنسبه لعلا غانم فاخر حاجه شفتها ليها هي لحظات أنوثه..ايه فيه حاجه جديده حصلت لعد كده؟
    بالنسبه للقمه فأنا لا أعترف الا بقمه الاهلي و الزمالك
    :)
    بالنسبه للسفينه الامريكيه فمش أول ولا اخر مره كالعاده
    أما القاهره اليوم فبدأ فعلا يكون مسالم حبتين بس لسه برضه له أظافر
    :)
    تحياتي

    ReplyDelete
  10. صاحب المضيفة:
    الف الف شكر
    ربنا يزيدك انت كمان من نعيم الله
    تحياتي واحتراماتي

    ReplyDelete
  11. سهر اليالي:
    انا خايف اسمع نصيحتك واهلوس براحتي الاقي نفسي مشرف في السرايا الصفرا
    تحياتي واحتراماتي

    ReplyDelete
  12. ياسر حسين:
    ايه دة؟
    هو الكلام دة طلع موزون؟
    دة على كدو كل موضوعاتي اللي فاتت كانت هلوسة بقى
    تحياتي يا فنان

    ReplyDelete
  13. محمد عبد الغفار:
    لا بقى
    انا هاخد بارامول
    ماليش دعوة
    تحياتي واحتراماتي

    ReplyDelete
  14. شيكابالا31 March 2008 at 00:41

    ههههههههههههههههههههههه هو انت بدات تهلوس؟ طب بعد كدة هيحصلك اية؟ يا ريت تطمنى انا حاسة ان فيةسبب خفى ورا الللى بيحصلك طب انت عارف انى بحب كل هلاوسك وبحترمها جدا بسليا تحفظ من حقنا نعبر عن راينا بلغتنا واللى يقدر مننا يخاطب الرسام دة بلغتة يقدر الفكرة ان ليس منا من لا يغار على دينة ؟ ولا اية وبالنسبة للاخت الفاضلة علا اشمعنى دى جت عليها ما الدنيا كلها حرانةظ؟ ولا هيا مش ع المزاج؟ ما علينا بالنسبة الاخ اللى كان ف الماتش هو ومراتة هو مش من حقة زية زيك؟كلنا مصريين ومن حقنا نشجع مصر وبالنسبة للشهيد المصرى ربنا يصبر اهلة واخيرا الف سلامة عليك والنبى زعلت عشانك قوىىىىىىىىىىىىىىىىىى

    ReplyDelete
  15. شيكابالا31 March 2008 at 00:44

    سورى نسيت حاجة القاهرة اليوم هو انت كنت مصدق التمثيلية دى ؟للالاا انت ازكى من كدة بكتييييييييييير

    ReplyDelete
  16. هلوس هلوس ولا يهمك

    بس في حاجة صغيرة في اول هلوساية انت هلوستها
    فكرة ان احنا بنغني ونرد على نفسنا
    اه فعلا هي حاجة قد تكون سلبية شوية
    بس انا بصيتلها من ناحية تانية

    احيانا كتير بيكون في ناس عايشين بيننا بس مش واخدين بالهم من بلاوي كتير بتحصل فينا وحوالينا

    وغالبا بيعرفو ويفهمو اول لما يلاقو ناس غيرهم مهتمة وبتتكلم

    ياريت تكون وجهة نظري وصلت

    ReplyDelete
  17. هلوساتك حلو

    و متفق معاها خاصه بتاع علا غانم دى

    ايه ياعم متسبها حرانه هههههههههه


    المهم
    الهلوسه الاول
    م معاك فيها

    احنا بنرفع الشعار فى مصر على شان المسلمين اللى نايمين فى الخط

    نفوقهم

    ما لو الرسام ده كان عرف اننا مسلمين بجد مكنش عمل كده

    على شان كده بنرفع الشعار هنا

    ReplyDelete
  18. وجهة نظري:
    معلش بقى مضطر تستحملوا هلوستي دي كل شهر ان شاء الله
    اول مرة اخد بالي فعلا ان الملصقات دي سبوبة
    يا خبــــــــــــــر
    يعني حتى الاهانة بيستفيدوا منها
    بالنسبة لعلا غانم دي ما بتنوعش
    عري عري حتى الموت
    بالنسبة لعمرو اديب هو لا بيمووت في جمال ولا حاجة
    بس المصالح والبيزنس ماسكهم من رقبتهم
    بالنسبة للقمة العربية هي طبعا قمة الكوميديا
    تعليقاتك بتسعدني جدا مفيش لا بلوك ولا حاجة
    تحياتي واحتراماتي

    ReplyDelete
  19. الساحرة:
    الهلوسة كاس وداير ع الجميع
    تحياتي واحتراماتي

    ReplyDelete
  20. انين الحزن:
    ازيك يا وزة
    علا عانم حرانة صيف وشتا واعتقد ان الهدوم بتعمل لها حساسية..مش ممكن اكيد مريضة والله
    يعني افهم من موضوع ال 200 جنيه دة ان انتي من ال 40 % المحظوظين اللي شافوا ورقة ال 200 جنيه قبل كدة؟
    يا محظوووظة
    عموما اطمئني كل فترة كدة ههلوس وانتم هتروحوا مني فين يعني؟
    تحياتي واحتراماتي

    ReplyDelete
  21. متشكر لمرورك عندى عشان عرفتنى طريق مدونتك
    هلوستك تقريبا نفس هلاوس باقى الناس الا حاجات بسيطه
    الا المسئول اللى قاعد ينكد علينا كل شويه ويجى الماتشات ولا على باله يأخى ولا كأنه مشرد ملايين
    سلامى وتحياتى

    ReplyDelete
  22. السلام عليكم
    الهلاوس قدر الشعب المصري واعتقد العربي كله بس كل واحد بيطلع هلوسته بطريقته اما عن هه الهلاوس
    فأول هلوسه تصدق اني فعلا اول مره آخد بالي فلا احنا بنكلم مين بس انا اعتقد انه لاننا متاكدين انه ماحدش هيرد وبالتالي مش خايفين فبنتكلم فرصه للكلام وخلاص بدون عواقب
    اما عن المطش فانا سمعت ان مراته كانت جايه غصب عنها حيث شوهدت بتقرا المجله شكلها ماشربتش من نيلها طبعا ماهي اكيد بتشرب معدنيه
    اما علا فياسيدي كله عند العرب تقليد للاجانب ومش مهم ايه وليه
    اما ورقة ال200 جنيه فاكره اني شفتها اول ماطلعت كانت في مرتب بابا فنده علينا وقالنا تعالوا شوفوا الورقه الجديده تقريبا كان عامل حساب اليوم اللي تنساها فيه بس قولي هتنساها فين:)
    وكل هلوسه وانت طيب

    ReplyDelete
  23. ولا يهمك يا احمد

    هلوس براحتك خااااااااالص مالص يعنى

    هى الهلوسة يعنى بفلوس ؟!!

    بس تصدق ..دى هلوسة فى محلها فعلا


    تحياتى


    ومستنية البوست الجاى


    :)

    ReplyDelete
  24. قليل من التفكير:
    انا موافق تجرب الحوار دة بس في حتة زي شبرا او باب الشعرية
    انما عايز تجرب في المهندسين وتقول على مسئوليتي؟؟؟
    لا يا عم شكرا
    تحياتي

    ReplyDelete
  25. alshared:
    تقريبا دي ثقافة الاستسهال
    بدل ما نكلم الغرب احنا نكلم نفسنا اسهل
    اما المسئول اياه..اناموافق انه يبقى مسئول بس اخره يبقى مسئول عن اسرة
    بالنسبة للمصري بتاع قناة السويس...اهو حصل اخواته
    تحياتي

    ReplyDelete
  26. micheal:
    مساء الهلوسة فعلا
    يعني سيادتك بتشوف ان لحظات انوثة دة عادي جدا...وبتتساءل ببراءة الاطفال حصل حاجة؟
    يا سلااااااااااااام
    وبعدين حتى قمة الاهلي والزمالك انضربت.....بقى اسمها قمة الاهلي بس
    القاهرة اليوم قبل كدة كان له مخالب دلوقتي يدوب اظافر بس
    تحياتي واحتراماتي

    ReplyDelete
  27. هلوسه بديعه تدور في ذهن الجميع ولكن صعب نعبر عنها مثلما عبرت هكذا يا احمد

    ReplyDelete
  28. ايه ده ياابو سمير

    هو ف ورقه ب 200 جنيه

    انا الصراحه ممسكتش اكتر م ال 100 الخضرا

    بتهيالى كانت موف والله اعلم

    وبعدين خلى الشعب يعيش

    ما هو ده اللى ناقص العيش م ناحيه وعلا تلبس م ناحيه تانيه

    الشعب يفطس كده

    الئمه .. مولعه

    وشكلها كده

    فاضلهم ئمتين واستك

    ويفضوا جامعة الدول دى خالص

    ReplyDelete
  29. سمير

    بالنسبة للمسئول اللى كان بيتفرج على الماتش
    تصدق الناس كان نفسها مصر تتغلب على بس يروح متنكد عليه زى ما هوا منكد علينا

    يا ابنى الناس ديه مش حاسة بالشعب نهائى ولا تعرف يعنى ايه كلمة شعب اصلا

    ReplyDelete
  30. شيكابالا:
    هو طبعا فيه سبب رئيسي للهلوسة دي
    اقوله ولا بلاش؟
    بلاش احسن
    بالنسبة للاخ بتاع الماتش
    لا مش من حقه يتفرج ع الماتش زيي طبعا
    ببساطة لاني ما تصديتش للعمل العام وباطمع في اعلى منصب في مصر فمن حقي اعيش حياتي انما لو عندي مسئوليات زي اللي عنده وبشيل هموم الناس ماعتقدش ان هيبقى عندي وقت او نفس اتفرج على ماتش ودي
    تحياتي يا فندم

    ReplyDelete
  31. الام وامال:
    وجهة النظر وصلت طبعا
    ومع احترامي لسيادتك الكلام دة مطلوب بس اهميته بتضاءل بشدة قدام توصيل صوتنا للعالم الخارجي
    تحياتي واحتراماتي

    ReplyDelete
  32. محمد مارو:
    مانا خايف يا عم محمد ان الحر لو زاد شوية يحصل ما لا يحمد عقباه
    وبعدين لما في الشتا هي كدة اومال ع البلاج بتبقى عاملة ازاي؟
    اما بخصوص الرسام
    ايهما اكثر اهمية التحدث للخارج ام اننا نكلم نفسنا؟
    مطلوب ان احنا نتكلم مع بعض داخليا ولكن اقل اهمية بكتير
    تحياتي واحتراماتي

    ReplyDelete
  33. اعجبني جدا رؤيتك للملصقات

    و ذكرني بحلقات الوعظ التي يلقيها المتدينون على بعضهم البعض

    ReplyDelete
  34. بحبك يا مصر:
    اديك عرفت الطريق للمدونة وطريقها مش هيتغير ان شاء الله
    ياريت تشرفني بالزيارة دائما
    تحياتي واحتراماتي

    ReplyDelete
  35. جنة:
    بالنسبة لليدي علا فياريتها تقللد الاجانب في تمثيلهم كمان مش في عريهم بس
    اما ال 200 جنيه فيارب تكون هي الورقة الرسمية المعتمدة عندك
    تحياتي واحتراماتي

    ReplyDelete
  36. oceaneyes:
    الهلوسة حق مشروع لكل مواطن يكفله الدستور والقانون
    الف شكر ليكي
    تحياتي واحتراماتي

    ReplyDelete
  37. محمد مفيد:
    اكيد صعب...لأنك مؤكد هتعبر عنها افضل بكتيييييير مما عبرت انا
    تحياتي واحتراماتي

    ReplyDelete
  38. احلى هلوسة بجد و الله
    موضعال200 جنيه متحرجناش بقى انا عننفسى مسكتهم مفككين يعنى لو شفتها فى شارع هقول مش دى شوكلاته:)

    تحياتى لك يا حلى دماغ
    ايه الصور الجديدة دى

    ReplyDelete
  39. د/اجدع بنوتة:
    اطلعي من دووووول
    كل دة علشان تخزي العين؟
    طب دة انا سامع ان الورقة ال 200 جنيه دي بتنطبع عندكم في البيت اساسا
    تحياتي

    ReplyDelete
  40. مصر هي امي:
    لا الناس دي عارفين الشعب بس من خلال الحكمة التاريخية اللي بتقول:
    الشعب لابد له من حكومة تحكمه...والحكومة لابد لها من شعب تشكمه
    تحياتي

    ReplyDelete
  41. منة الله:
    احنا اجدع شعب في الدنيا بنكلم بعضنا على الرغم اننا كلنا متفقين
    تحياتي

    ReplyDelete
  42. rania:
    اطلعي من دول يا رانيا
    دة انتي ورقة ال 100 جنيه مابترضيش تمسكيها وبتقولي عليها بيئة وبتزحم الشنطة وكدة
    انما سيبك من الكلام دة
    انتي صاحية للساعة 5 صباحا ليه؟
    نااااااااااااااااامي
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails