Tuesday, 25 March 2008

بهائي...هندوسي...سيخي

الناس اللي معترضة على كتابة كلمة (بهائي) في البطاقة الشخصية للبهائيين امرهم عجيب جدا
دلوقتي احنا قدام واقعة محددة....ناس سموا نفسهم (بهائيين) وعايزين يكتبوا كدة في خانة الديانة ببطاقاتهم الشخصية...احنا زعلانين ليه؟
طيب هم سموا نفسهم بهائيين...وكان ممكن يسموا نفسهم وائليين او تامريين او خليليين...اي حاجة والسلام.....احنا واخدين الموضوع على اعصابنا ليه؟
ناس قررت تكفر....كفرت....خلاص..هم اللي هيتحملوا وزرهم عند ربهم
ممكن حد يقول ان الموافقة على كتابة بهائي هو اعتراف بالدين دة....واعتراف بوجود حاجة اسمها البهائية
يا سلاااااااااااااااااااااااااام
مين اللي قال الكلام دة
هو انت لما تقول ان فلان بوذي او علان هندوسي او ترتان دة سيخي...هل معنى كدة ان انت مقتنع ان البوذية ديانة....او الهندوسية دي ديانة او ان السيخي دة راجل مؤمن؟
دة اقرار واقع....في ناس بتقول احنا بوذيين وناس تانية بتقول احنا هندوس....وانت بتتعامل معاهم على هذا الاساس
انت لا تملك محاسبتهم عقائديا وبالتالي لا تستطيع توجيههم
ليه بقى لا نتعامل مع البهائيين دول بنفس المنطق؟
انت بهائي؟ ماشي يا عم البهائي
بس انت عارف كويس قوي انه كافر...و مؤمن بعقيدة غير سماوية
نفس فكرة اللي ماشي يقول على نفسه
انا اهبل....انا اهبل...انا اهبل
اكيد اول ما تشوفه هتقول له
ازيك يا اهبل؟ عامل ايه يا اهبل؟
بناءا على كلامه
ليه بقى لا نتعامل مع البهائي بنفس منطق التعامل مع الاهبل؟
عايزين نصيحتي:
ريحوهم....اكتبوا زي ما هم عايزين بهائي
ودة لن يغير من امرهم شيئا.....عمرهم ما هينتشروا ولا هيزيدوا عن عددهم الحالي
عاملوهم زي البوذيين او الهندوس او عبدة النار
ما يفرقوش كتير عنهم

66 comments:

  1. اختلف معاك
    فى موضوع
    نكتب وخلاص
    واسااسا
    المشكلة اتحلت بتتساب الخانة فاضية
    وده افضل حاجة
    تحياتى ليك

    ReplyDelete
  2. الموضوع ليس بهذه البساطه ، ومفيش حاجه اسمها وخلاص

    ReplyDelete
  3. نفس الاختلاف

    قضية الديانة قضية قومية في أي مجتمع مدني

    انت بتتكلم في مواد دستورية

    مش لعب

    ده رأيي فقط


    تحياتي

    ReplyDelete
  4. هى فكره انهم يمشوا رايهم بس
    انما لو فى العادى ممكن نوافق

    ReplyDelete
  5. متفقة معك في هذا الراي

    والحقيقة ان الناس تعمل ضجة من لاشيئ

    عندما قلت رايي في ان الافضل ان يتم كتابة بهائي في خانة الديانة استغربني الناس جدا

    ولكن صراحة انا شايفة ان افضل يكتب في خانة الدين بهائي
    والملحد يكتب ملحد
    او لاديني كما يريد

    حتى لاتختلط الامور ولو ان مجتمعاتنا غير ناضجة وسيتم التمييز بين الناس بناء على مايكتب في هذه الخانة

    تحياتي

    ReplyDelete
  6. شيكابالا25 March 2008 at 00:57

    انت فعلا عندك حق ومالو؟ يكتبوا اللى عاوزين يكتبوة هيفرق ف اية؟ مش هو دة اللى يهز كيان الاسلام دى ناس تنصلت من ديانتها سواء اسلام او مسيحية مش احنا اللى هنحاسبهم ولكن الخوف بعد كدة اننا ندخل ف حوارات حقوق سياسية وممارسة شعائر دينية ونسبة ف مجلس الشعب مما يروج لهزة المعتقدات الغريبة مقولتليش هو انت ناوى ولا اية؟

    ReplyDelete
  7. امممممممممم

    لا بصراحه أنا مش مقتنعه ومش معاك فى كدة

    وعمالة بفتكرلك قصه اصحاب السبت بالظبط بس مش قادرة اوى
    بس هقولك على قد ما انا فاكرة ومعلش بالبلدى كدة

    الناس اللى كانو موجودين ايام اصحاب السبت واللى كانو مؤمنين ومش بيصطادو أنقسمو لفريقين منهم كانو بينصحو الناس اللى كانو بيصطادو ومنهم كانو بيقولولهم انتو ليه بتنصحوهم ما هما كدة كدة مهلكين والفئة الأخيرة دول من الأثمين بالرغم من انهم مكنوش من اصحاب السبت

    يمكن ميكونش ليها علاقة اوى لكن لو أحنا سبنالهم الحرية حنبقى مسؤلين عن جزء من الأثم ودة من وجهه نظرى

    تحياتى وتسلم ايديك كمان على البوستين اللى فاتو

    ReplyDelete
  8. و لاننا ساكتين و الاغلبيه صامته
    أسفه لم أقرأ موضوعك لكن أمامي مهمة نشر مدونه في غاية الاهميه أنشرها بين المدونين ان استطعت
    ادعوكم لزيارة هذه المدونه
    http://www.ta7arosh.blogspot.com/

    ReplyDelete
  9. زمان لما كنا بنكتب استمارة الاعدادية او الثانوية العامة كان النموذج اللي بيجي لنا مكتوب 3 اختيارات للديانة : مسلم - مسيحي - ديانات أخرى
    أنا شايف إن بدل ما يتكتب ملحد أو بهائي أو أي ملة تانية غير سماوية
    يتكتب ديانات أخرى وخلاص

    خالص تحياتي

    ReplyDelete
  10. بصراحة موافقك .. والكلام منطقي

    وإن كنت اظن القضية مش الموضوع ده في حد ذاته .. والموضوع مثار عشان يحصل دوشة وخلاف وقيل وقال .. عشان بعد كده يتقدم لنا الحل المثال واللي حيكون ساعتها : حنشيل يا جماعة خانة الديانة خالص ونريحكم عشان ما تتخانقوش مع بعض

    ReplyDelete
  11. هوا الموضوع بسيط بينا وبين بعض كدة، هوا بهائي ماشي هوا حر، هوا هندوسي ماشي، هوا كافر ماشي، كلنا حنروح في الأخر وحننسي وكل واحد بيشيل ذنبة

    إنما علي مستوي الدولة والمستوي الرسمي إحنا مبنعترفش بأي ديانة غير الديانات السماوية التلاتة. إذا كان تطبيق القانون المدني في الجواز والطلاق عامل مشكلة مع الكنيسة وبننحسس علي الموضوع علشان ميزعلوش، طب لما كل واحد حيطلع بدين شكل حنعمل اية؟ دا مثال واحد بس وفي أمثلة كتيرة قانونية

    وبعدين خلي بالك إن الموضوع حيبتدي "بس حطوا كلمة بهائيين في البطاقة ومش عايزين اكتر من كدة" وحيتطور "عايزين ننظم اماكن عبادة رسمية لينا بقي، ما إحنا رسمي أهو" وحيزيد "وجوب الأعتراف بالبهائية والهندوسية والكفار رسميا" وبعد شوية حلاقي جاري الصبح قبل ميفتح باب العربية بيصليلو ركعتين شكر وتحية للبقرة الي رابطها عند باب العمارة

    ويمكن الموضوع يوسع ونلاقي الرقم القومي اتطور من 01 راجل، 02 انثي، وحنضيف 03 مثلي، 04 مثلية وكل من هب ودب عايز حقوقة وتغيير صفتة في البطاقة، يبقي كمان حنشيل خانة الجنس ونكتب "اللة اعلم بدخائل عبادة" .... ماهي الدنيا بقت ميغة

    ReplyDelete
  12. انا بختلف معاك فى الرأى يا احمد

    مش لمجرد اننا نخلص من الزن بتاعهم ..يبقى نعملهم اللى هما عاوزينه

    لا طبعا ..احنا صح (كمسلمين) بنعترف بالديانات السماوية الأخرى ..كالمسيحية واليهودية ..بس ده مش معناه اننا بنعترف بأى كلام او قرار اتخذوه مجموعة من الناس على انهم يكونوا جماعة -فى رأيهم-دينيه!!

    ...



    وبعدين مين قال اصلا اننا ماعندناش مشكلة فى الملل التانية ..زى الهندوسية والبوذية والكلام ده ..اكيد فى مشاكل فى كدة ..واكيد مافيش شخص مسلم (مش هاقول مؤمن ..بس مسلم ) ممكن انه يقبل بيهم

    !!


    ومش علشان يبقى شكلنا امام اى دولة عظمى ديمقراطية حلو ..يبقى ده معناه اننا نعمل للبهائيين اللى هما عايزينه ونعترف بيهم بإننا نكتبلهم بهائى فى البطاقة !!

    دول قلة منحرفة عن المجتمع اللى احنا عايشين فيه ..سواء بقى فى مصر ولا غيرها من الدول ..وزى ما انت قلت ..هما فعلا مش هايزيدوا ان شاء الله ..بس ده مش معناه ان اللى بيعملوه ده وبيطالبوا بيه ..يبقى حق خاص بيهم ولازم ياخدوه


    لا طبعا


    ...


    وعموما الاختلاف فى الرأى لا يفسد للود قضية



    تحياتى


    :)

    ReplyDelete
  13. الناس للأسف ما بتقراش فى السيرة النبوية و لا عايزة تعرف الرسول كان بيتعامل مع الكفار ازاى امتى كان يقاطعهم و امتى كان يحاربهم و امتى يقدم النصيحة

    كل واحد شايف نفسه هو الصح

    و العموم انا اتمنى ان البهائيين ما يكتروش عن كده
    بس يا عزيزى طول ما المسلمين دماغهم فيها طوبة حيكتروا

    ReplyDelete
  14. أذا كنت من عشاق الغائب الحاضر تقبل دعوتى لحضور حفل ( ليلة عبد الحليم حافظ ) حفل موسيقى على انغام العود يوم الأحد 30 مارس س 8 مساءا بساقية الصاوى سعر التذكرة 20 ج

    ReplyDelete
  15. انا معاك

    دى علاقتهم بربنا

    هو هيحاسبهم عليها

    بهائى بوذى وغيره

    مع نفسهم

    وفعلا اتحلت وهتبقى ___ شرطه

    ReplyDelete
  16. .
    حضرتك بتقول : ناس سموا نفسهم (بهائيين) وعايزين يكتبوا كدة في خانة الديانة ببطاقاتهم الشخصية...احنا زعلانين ليه؟

    معني كده بقي كل يوم نصحي نلاقي كام واحد لمموا بعضهم كده وقرروا يعملوا ( ديانة جديدة ) ويكتبوها في البطاقة وساعتها هنقلهم ماشي دا حقكم ومحدش يقدر يزعل من كده

    لو فيه بلد كل اللي عايز حاجة تتعمله من باب تكبير الدماغ ما يبقاش بلد ..
    .

    ReplyDelete
  17. مدحت محمد:
    يا مدحت
    الفكرة هي فكرة ان الكتابة مش معناها على الاطلاق انك معترف بالديانة دي
    يعني لما تقول ان فلان هندوسي...هل دة معناه انك معترف بالهندوسية؟
    انما دة مجرد اقرار واقع
    نورتني
    تحياتي

    ReplyDelete
  18. محمد عبد الغفار:
    بعناد الدولة بنديهم حجم واهمية اكثر بكتير مما يستحقوها
    تحياتي

    ReplyDelete
  19. صاحب المضيفة:
    وهل كنا هنسمع عن البهائيين دول لولا ازمة عدم كتابة بهائي في البطاقة الشخصية؟
    تحياتي واحتراماتي

    ReplyDelete
  20. بطوط حبوب:
    يعني هي مسألة عند ليس الا؟
    معقول في في الدنيا دولة تدار بالشكل دة؟
    تحياتي واحتراماتي

    ReplyDelete
  21. bella:
    على فكرة الرأي دة من وجهة نظري هو الاصوب على الاطلاق
    ايهما افضل:
    شخص مكتوب في بطاقته انه مسلم بينما هو ملحد ولا شخص هو نفسه ملحد وفينفس الوقت مكتوب في بطاقته انه ملحد؟
    تحياتي واحتراماتي

    ReplyDelete
  22. شيكابالا:
    يا سلااااااااااااااام
    بموت انا في اتفاقنا في الراي
    اي نعم الاختلاف في الراي لا يفسد للود قضية الا ان في حالتنا بيفقد كتير
    عموما لو هغير...اكيد هاقوللك
    تحياتي

    ReplyDelete
  23. انا الراحه معنديش مشكله انهم يكتبوا ديانتهم ف البطاقه ايه المشكله يعنى ده مش معناه اننا بنعترف ديانته بس عشان لما حد يمسك بطاقته يعر دياته ايه مش احسن من ان الخانه تتساب فاضيه ونقول ان ده شخص مشبوه فيه او منبقاش عرفين ده هويته ايه او مش احسن من انه يكتب انه مسلم ولا مسيحى وهو ف الاصل بهائى

    ReplyDelete
  24. طبعا مينفعشى نهائى
    مصر دوله اسلاميه
    وتعترف بثلاثه ديانات فقط
    الاسلاميه والمسيحيه واليهوديه
    والان لايوجد الا ديانتان
    الاسلاميه والمسيحيه
    ومعنى الاعتراف بالبهائيه
    الاعتراف بعبده النار والماجوس وعبده البقر والشيطان

    ReplyDelete
  25. على فكرة انت بتتكلم فى موضوع حساس جدا
    حكاية الديانة دى الكلام فيها بيثير المشاكل
    لكن انا بقى مع حذف خانة الديانة تماما
    مفيش بلد فى العالم المتقدم بتكتب الديانة فى البطاقة المدنية
    بـــــاى

    ReplyDelete
  26. المشكلة للأسف لم يتم حلها حتى الآن حتى مع وجود الحكم القضائي. قام مؤخرا محاميان متضامنان مع وزارة الداخلية بالدعوة الرئيسية بتقديم استشكال وطعن. الاستشكال يوقف تنفيذ الحكم الى النظر في الطعن. بنفس معدل التقاضي في القضية الاولى اعتقد امامنا سنة للحكم النهائي

    اما بالنسبة لفكرة كتابة الديانة في البطاقة فهناك ثلاث نقاط هامة:

    اولا تدوين بهائي في البطاقة لا يعني اعتراف بالدين البهائي بل هو تدوين لواقع كما اشار صاحب المدونة. والمشكلة الاساسية انه لا يوجد سوى ثلاث خيارات للدين في الاوراق الرسمية. لذلك كي استخرج بطاقة يجب ان اكتب كذبا انني مسلم او مسيحي وهذا هو ما لا نقبله واعتقد لا يقبله المسلمون او المسيحيون ان ينضم اليهم على الورق من هو ليس منهم ويكون له حقوقهم

    ثانيا. لا يوجد ما يسمى باعتراف بالديانات. هل حصل الاسلام باعتراف بصحته من رجال الدين المسيحي؟ لا يستمد أي دين شرعيته ابدا من رجال دين آخر سابق. لذلك نحن لا نسعى لهذا الاعتراف لأننا به او بدونه بهائيون وموجودن بالفعل. لن يغير الاعتراف او عدم الاعتراف من الواقع

    ثالثا فلنتخيل ان هناك ما يسمى بالاعتراف. من قال ان الاسلام لا يعترف سوى بثلاث ديانات؟ أين هذا الكلام في القرآن؟ لقد اختص الله اهل الكتاب في القرآن بهذا الوصف لأنهم اتباع الديانات المتوفر لها كتب بين ايدينا لكن لم ينفي اي حقوق لغيرهم ولم يذكر ان الاديان ثلاثة فقط. بل بالعكس اقر النص القرآني ان هناك رسلا لديانات اخرى ارسلهم الله "منهم من قصصنا عليك ومنهم من لم نقصص". من فضلكم من يريد ان يقول ان الاسلام يعترف بثلاث ديانات فقط فليثبت ذلك من قرآن او حديث او سيرة النبي نفسه الذي تعايش مع المجوس في مكة

    ReplyDelete
  27. احمد

    ازيك واخباراتك ايه

    علي فكره انا كنت داخل اسيبلك التعليق واقولك مش فاهمه لاني بجد مكنتش فاهمه تقدر تقول كدا اول مره اسمع عن الموضوع

    بس سئلت وكدا وقريت كمان التعليقات والحمد لله فهمت

    دي عالم فاضيه خليهم يظنوا لحد ما يزهقوا
    هما مش لقيين حاجه يعملوها

    المهم انت عامل ايه دلوقت
    سلامووووووووووز

    ReplyDelete
  28. سهر الليالي:
    الفكرة ان برفض الدولة كتابة بهائي في خانة الديانة
    بيكتسبوا شهرة واهمية وتعاطف مع منظمات غربية كتير
    وبعدين كتابة بهائي ليس لها علاقة باعتراف بدينهم وانما هو بيان حالة وتوضيح
    الف الف شكر ومنورة دايما
    تحياتي

    ReplyDelete
  29. miss dot:
    طيب وليه ما تنشريش مدونتك وفي نفس الوقت تعلقي ع الموضوع؟
    مفيش تعارض ع الاطلاق
    بالتوفيق ان شاء الله
    تحياتي واحتراماتي

    ReplyDelete
  30. ياسر حسين:
    طيب ليه مانكتبش الديانة او الالحاد علشان اللي بيتعامل مع الشخص دة يكون فاهم كويس قوي هو بيتعامل مع مين
    تحياتي يا فنان

    ReplyDelete
  31. ma_3alina:
    انا بشوف ان حذف خانة الديانة دي هتكون كارثة كبيرة جدا وهتفتح مجالات رهيبة للنصب والاحتيال خصوصا في قضايا الاحوال الشخصية كالزواج والطلاق والميراث.....الخ
    تحياتي واحتراماتي

    ReplyDelete
  32. وجهة نظري:
    على فكرة
    الكلام دة موجود فعلا في دول كتير من دول العالم
    المسلم موجود والمسيحي وايهودي والملحد والهندوسي...الخ
    معظم دول اوروبا بالشكل دة
    ومش ميغة ولا حاجة
    تحياتي

    ReplyDelete
  33. هوه لسه فيه كلام عن الناس دول
    الكلام عنهم بيحسسهم انهم لهم اهميه
    !!!!!!!!!!11

    ReplyDelete
  34. هل قام كل من يتهم البهائيون بالكفر ووو... بمعرفة ماهى معتقداتهم قبل القاء الاتهامات وبس؟
    الا يشبه هذا ما يقوم به البعض من الاساءة للاسلام ورسوله (ص) فهم مثلكم تماما غير مقتنعين بان الاسلام دين سماوى على الاطلاق!
    ملاحظة: البهائية هى الديانة الوحيدة فى العالم التى تؤمن ان الاسلام دين سماوي وان سيدنا محمد رسول من عند الله

    موضوع كتابة بهائي فى خانة الديانة لاادرى ماهى المشكلة فى ذلك
    هل تحبون ان يكون هناك منافقون يظهرون غير ما يبطنون ؟
    وهل معنى من يكتب مسلم فى الديانة انه مسلم وملتزم بجميع الشرائع الاسلامية؟
    بالطبع لا فهذه الامور التى تختص بالايمان والعقيدة هى علاقة بين الفرد وربه فقط ولا يستطيع ان يعرفها الآخرون

    ReplyDelete
  35. يا ريس الناس دي بترمي لحاجة أبعد من كده، دي ناس عاوزة بعد كده تعدل الدستور عشان يعترف بالبهائية، وعوازة تطالب بحقوق قانونية يعني مثلا في التعليم مش بعيد نلاقي حصة الدين فيها ديانة بهائية وامتحانات ومناهج وممكن كمان يرفضوا الآيات القرآنية اللي موجودة في نصوص اللغة العربية وما خفي كان اعظم، المسألة مش مسألة خانة ديانة هتتكتب ولا هتتساب فاضية

    ReplyDelete
  36. oceaneyes:
    طبعا الاختلاف في الرأي لا يفسد للود قضية
    وانا احترم رأيك تماما رغم اختلافي معه
    بس عايز اقول لك ان فيما يخص العلاقة بين الفرد و ربه لا ينبغي التدخل الانساني فيها
    كل انسان هيحاسب يوم القيامة وبالتالي لابد من التعامل مع الاخر
    تحياتي واحتراماتي

    ReplyDelete
  37. عاليا حليم:
    الناس فاكرة ان الهائيين وجودهم هينتقص من الاسلام
    دي حاجة مالهاش دعوة بالاسلام خالص
    بس تقولي ايه في الادمغة بقى
    الف شكر على دعوتك الكريمة وان كنت اعتقد ان ظروف العمل لن تسمح لي بالتواجد
    ملحوقة ان شاء الله
    تحياتي

    ReplyDelete
  38. د/اجدع بنوتة:
    في ناس واخدة الموضوع دة على اعصابها بشكل غريب ومبالغ فيه
    هم لا يملكوا محاسبة الناس
    تحياتي واحتراماتي

    ReplyDelete
  39. قليل من التفكير:
    ايهما افضل من وجهة نظرك:
    واحد بهائي بس مكتوب في بطاقته الشخصية انه مسلم وجاء يتقدم لخطوبة واحدة مسلمة وهي مش عارفة حقيقته؟
    ولا واحد بهائي ومكتوب في بطاقته انه بهائي وحقيقته معروفة للجميع واللي عايز يتعامل معاه يتعامل واللي عايز يتجنبه يتجنبه
    ساعتها البلد هتبقى بلد
    تحياتي

    ReplyDelete
  40. يعني تفتكر لو كتب في البطاقة ملحد
    ده بالفعل هيفرق في التعامل معاه
    بمعني انك كل ما هتيجي تتعامل مع واحد هتشوف بطاقته؟
    ده على فرض إن كل اللي كاتبين في البطاقة مسلمين
    بيتعاملوا بالفعل معاملة الاسلام
    إلا من رحم ربي

    خالص تحياتي

    ReplyDelete
  41. nefertiti:
    كلام جميل وكلام معقول ماقدرش اقول حاجة عنه
    تحياتي

    ReplyDelete
  42. فرنسا هانم:
    وهو يعني مفيش في الدنيا ملحدين ومجوس وعبدة بقر؟
    موجودين وكتير
    انما وجودهم دة واقع ولابد من الاعتراف انهم موجودين
    هناك فرق بين الاعتراف بوجودهم وبين الاعتراف بمعتقداتهم
    تحياتي واحتراماتي

    ReplyDelete
  43. نهى منير:
    طب هنعمل ايه في مشاكل وقضايا الاحوال الشخصية من زواج وطلاق وميراث بدون خانة الديانة؟
    تحياتي واحتراماتي

    ReplyDelete
  44. معاك حق
    لكن اسمح لي انطلق من منطلق آخر
    الدولة يجب ان تكون دولة قانون/ والافراد امامها سواسية/ لا يعنيها كفر احد او ايمان احد.. مسلم مسيحي يهودي .. كونفوشتي
    المهم ان يلتزم بالقانون ولا يتجاوزه...
    وليس لي بعد ذلك ان الزمه بشيء
    ...
    الحاصل هو شموليه من الدولة وضيق افق من الشعب المقهور في الاساس الذي يحاول ان يجد متنفساً يصرخ فيه...
    فيتعصب ضد اي شيء
    وكأننا اغير على الاسلام من الله
    جلا علا وهو القائل في كتابه العزيز

    (وقل الحق من ربكم فمن شاء فليؤمن ومن شاء فليكفر انا اعتدنا للظالمين نارا احاط بهم سرادقها وان يستغيثوا يغاثوا بماء كالمهل يشوي الوجوه بئس الشراب وساءت مرتفقا
    (
    صدق الله العظيم

    ReplyDelete
  45. عزيزى احمد سمير

    الله كل بوست بحترمك اكتر يا اخى

    بغض النظر عن مضمون الكلام

    لأ.. انا متفق معاك بس انا بحترمك وبحب اسلوبك لانك بتناقش موضوعات قوية جدا بفكر متحرر .. مش لأنى متفق معاك

    انا شبة متفق معاك فى موضوع البهائيين

    وان كنت مش عارف الطريقة المثلى لتطبيق الفكرة

    حذف خانة الديانة

    او الاعتراف بالاديان الجديدة فيها

    تحياتى لك

    احمد

    ReplyDelete
  46. egyptianbahai:
    يا سيدي الفاضل
    حكاية الاستشكال في الاحكام القضائية دي عادة مصرية اصيلة على كل البشر
    لا تفرق بين مسلم او مسيحي او اي فرد اخر
    دة العادي بتاعهم
    انا ضد ان يكون الشخص بهائي ويتم كتابة مسلم او مسيحي في بطاقته الشخصية
    فهو كذب وخداع للناس والمجتمع
    انا متفق معك تماما في النقطة دي
    بالنسبة لاعتراف الاديان ببعضها فهي قضية كبرى وانا غير ملم بابعادها وبالتالي لن اتجادل فيها
    ولكن ينبغي التفريق تماما بين علاقة الاسلام والمسيحية واليهودية ببعضها البعض وبين بقية الاديان الغير سماوية
    بالنسبة للاسلام فهو يعترف بالديانات السماوية فقط بالاضافة الى انه يأمرنا بالتعايش مع كل الناس سواء اكانوا مؤمنين او كافرين
    ولكنه يحض على الدعوة للاسلام بالحسنى
    وجادلهم بالتي هي احسن
    الانسان يتعايش مع الغير ولكنه لا يقر افعالهم اذا كانت مخالفة لشريعته
    الموضوع فعلا كبير ويحتاج مناقشات اكبر
    تحياتي

    ReplyDelete
  47. انين الحزن:
    ازيك يا وزة
    انا اخباراتي كويسة الحمد لله...انتي اخباراتك ايه؟ واحباطاتك عاملة ايه؟
    كويس انك سألتي واتطقستي وعرفتي شوية معلومات عن الموضوع
    سيبك انتي
    على رأيك دي عالم فاضية فعلا
    تحياتي واحتراماتي

    ReplyDelete
  48. انا انسان:
    ماهي لازم المواضيع دي تتحل يا انسان
    التجاهل والتناسي والاهمال لم يحل مشكلة من قبل
    تحياتي واحتراماتي

    ReplyDelete
  49. اسرة بهائية:
    يا سادة
    في البداية تحية لكم على رقي الحوار...هكذا ينبغي ان يكون الحوار البناء
    طبعا الفارق كبير بين الاساءة للرسول الكريم صلى الله عليه وسلم و بين الاساءة للبهائية او البهائيين
    فالاسلام دين سماوي وهو خاتم الاديان السماوية ويدين به مليارات البشر وانا شخصيا لم اسمع عن البهائية او البهائيين الا من سنتين او اكثر او اقل قليلا
    ربما يكون ذلك قصورا مني ولكن اعتقد ان مثلي كثيرين
    وهناك اوجه كثيرة جدا لا تجعل الاسلام موضع مقارنة بينه و البهائية او بينه وغيرها
    اجنا متفقين في احقية كل فرد في ان يكتب معتقده في بطاقته الشخصية
    فالبطاقة الشخصية ليست محل لتقييم ايمان شخص ما او معتقداته
    ولكنها اقرار لحالة وواقع
    تحياتي

    ReplyDelete
  50. كريم عاطف:
    لا مش شرط يا كريم اقرار وجود طائفة او دين معين هو اعتراف كامل من الدولة بالديانة دي او التعاطف معاهم
    اوروبا فيها مسلمين كتير ومع ذلك دول اوروبا لا تقر الاسلام كدين رسمي لدولهم
    وبالتالي لا اعتقد انهم هيطالبوا بحاجة زي كدة خاصة ان عددهم قليل جدا
    تحياتي واحتراماتي

    ReplyDelete
  51. تصنيفهم لأنفسهم ...هم طبعا احرار فيه
    ولكن موافقتنا واخضاع قوانينا لهم ..يعنى اعترافنا بدين غير سماوى
    وده مش من حقهم فى بلد اسلامية..يهاجروا لو عاوزين يطالبوا بالحق ده
    اختلف معك
    واحييك على ايجابية مدونتك الجميلة

    تحياتى

    ReplyDelete
  52. ياسر حسين:
    هتفرق في المعاملات الرسمية يا فنان
    يعني في الزواج والطلاق وقضايا النسب والميراث
    تحياتي واحتراماتي

    ReplyDelete
  53. osama:
    المشكلة يا اسامة اننا محتاجين ليبرالية
    في وقت الليبرالية بتتفهم بشكل خاطىء وفي ناس لاغراض خاصة بيهم طبعا بيربطوا ما بين الليبرالية والالحاد ودة مش صحيح على الاطلاق
    نورتني
    تحياتي واحتراماتي

    ReplyDelete
  54. أسف إتأخرت في ردي علي ردك :) بس كنت مشغول

    كل دول العالم ودول أوروبا مختلفين عن الدول الأسلامية، هناك الدولة ملهاش ديانة، الأفراد هما الي ليهم... فالمسلمين في أوروبا مش معترف إنهم مسلمين، هما مواطنين بس، مالكش حق تاني، عايز تعمل جامع، ماشي حنفكر ونعرض الأمر ونبقي نقولك... وبطلوع الروح، مش كل واحد عايز يعمل جامع يلم تبرعات ويبتدي يبني... وفي نفس الوقت يا مسلم إنت دينك يسمحلك تتجوز أربعة، طب جرب كدة وحنقيم عليك الحد في ميدان عام، لية لأن قانونا إلي مستمد من الشريعة المسيحية ميسمحش بكدة، أسفين ...، عايز تدبح أضحية عيد تدبحها بشروطنا إحنا، بشروطك تبقي فضيحة وإلي مايشتري يتفرج.... مسموحلك بس بحرية عبادة ربك في بيتك براحتك..... تشريعات الجواز والطلاق والميراث وحاجات تانية كتير بيتطبق عليها القانون المدني بتاعهم إلي من ديانتهم، حتي لو بتعارض الديانات الأخري. وفي نفس الوقت معظم الدول دي بتسمح بجواز الشواذ، وحرية التحول الجنسي.... قصة تانية خالص

    في مصر إحنا بنحسس علي قضيةالأديان علشان منزعلش مواطنينا المسيحين، علشان دينا مختلف في أحكامة، فالدولة بتسمح ببعض الأختلافات في المواريث والزواج والطلاق، مبتطبقش عليهم القانون بكل صرامة زي ما هيا عايزه، لأننا بنعتبر إن كلنا لينا حق في بلد واحد

    الأستاذ البهائي كان كاتب تعليق عن هل حصل المسلمين علي إعتراف من المسيحيين؟؟ لأ محصلش علي إعتراف، بس السؤال، هوا الدين الأسلامي طلب إعتراف؟؟ طب ما هوا الدين الأسلامي مش معترف بيه رسميا في دول كتير، مطلبناش إعتراف.... بالظبط زيكم، إنتم موجودين فعلان بس ماتطلبوش إعتراف، بسيطه

    قال اللة تعالي "ما كان محمد أبا أحد من رجالكم ولكن رسول الله وخاتم النبيين" .. يعني كدة باب المناقشة عن دين بعد الإسلام إتقفل من البداية، والكتب السماوية إلي ذكرت في القرآن ثلاثة بس لأن مفيش غيرهم فعلا في القرآن، والرسل عددهم مش معروف فعلا يمكن معديين المائة ألف بعضهم ذكر في القرآن وأغلبهم ماذكرش، بس مفيش حد بعد الرسول والنبي محمد علية الصلاة والسلام بنص الأية

    أنا مقدرش أفتي وأجيب أيات وأحلل الأديان، ومقدرش اقول البهائيين غلط والا صح والا حيدخلوا الجنة والا النار دا شغل ناس متخصصة وفي الأخر حكم ربنا وكل واحد حر يختار دينة وكل واحد حر يعترف بالدين إلي هوا عايزة، إنما كل إلي أقدر اعملة إني أقول رأيي في موضوع الأعتراف يالبهائيين كديانة في البطاقة بصفتي مواطن في بلدي، وهوا إني أرفض... دا رأيي، وممكن نعمل إستفتاء في مصر، إستفتاء ديموقراطي علشان محدش يقولي إسلام ومسلمين، ونشوف رأي الشعب، ما المسيحيين كمان ليهم رأي في الموضوع دا، ما حد يقول رأي المسيحيين علشان نعرفه، والا هما المسلمين بس المتخلفين وبيكفروا كل حاجة؟؟ إذا كان المسيحيين مإعترفوش بالإسلام يبقوا حيعترفوا بالبهائية

    أسف إني برد رد طويل في مدونتك بس أنا باحول أتناقش في الموضوع

    ReplyDelete
  55. الاستاذ أحمد سمير
    احييك على اسلوبك. اسمح لي ان اعيد صياغة سؤالي. ما هي معايير الديانات السماوية لكي نقرر ان دينا ما اتى من السماء والآخر من صنع البشر؟ من قال ان الأديان السماوية ثلاثة فقط؟ هذه صلاحيات ليست في يد احد. الايمان بأن دين ما اتى من الله مسألة تعرض لها كل الأديان التي اتت من السماء عند ظهورها ولم يكن هناك لجنة ما تقرر ان هذا الدين فعلا من الله أم لا

    وجهة نظري:
    تقول ان المسلم في دول لا تقر الاسلام ديانة رسمية لا يستطيع ممارسة كل شعائر دينه بسبب اختلاف القوانين. وانا معك ان هذا صحيح وغير عادل. لكن البهائيون لم يطالبوا بممارسة شعائر او بتعديل القوانين لتناسب التشريعات البهائية. بل ان احترام القوانين هو احد تعاليم الدين البهائي. البهائيون يطالبون فقط بعدم اجبارهم على انكار دينهم في الاوراق الرسمية. اعتقد ان هذا امر يتحقق لمواطني اي دولة في العالم بشكل بديهي. ولو هناك دولة تطلب من المسلم انكار دينه بأي شكل انت لن تقبل ذلك وستجدني الى جانبك اساند حقك.

    ولكن اجدك معترضا على عدم السماح للمسلمين بممارسة دينهم في بلاد تعتقد انها لو اعترفت بالاسلام كدين سيؤدي الى هدم معتقداتها من الاساس. في حين انك تمارس نفس الخطأ في بلدك مع البهائيين. لماذا تنتقد الفعل اذا صدر من غيرك ولا تنتقده اذا صدر منك؟

    ReplyDelete
  56. الأستاذ بهائي مصري، مش عارف لية متمسك بكلمة إنهم تلاتة بس، هما علشان متزعلش 60، بس كلهم قبل الإسلام، لأننا في دينا وقرآنا معندناش حاجة بعد الإسلام، عادي طبعا، كل واحد مؤمن بدينة ومتمسك بية، حقيقي مفيش مشكلة

    إسمحلي سيدي أوضح بعض الحقائق عن رأيي:

    أنا مقولتش إن تطبيق كل دولة للقوانين الخاصة بيها إلي جت بعد تجارب عقود كبيرة دا ظلم أو غير عادل خالص، بالعكس دا قمة العدل... مينفعش أنا مسلم في دولة مسيحية مش معترف بيا أصلا كمسلم وأطالب يكون ليا قانون خاص، يمكن لو أغلبية مسلمة في دولة مسيحية يبتدي التفكير، بس دا مش وارد

    الدول الأوروبية ملهاش دعوة بديانة الشخص، مش مكتوبة في أي ورقة، فحتي الملحد هوا حر، المهم ماشي علي القانون، القانون بتاعهم.... دا بقي مينفعش في بلدنا، مقدرش أمحي الهوية المسيحية، ببساطة مش مسموح في دينا بكدة، ومقدرش أفرض ديني علي مسيحي لأن عندة قوانين خاصة، مثلا مش مسموح لمسيحي يتجوز أربعة، مشوفتهاش قبل كدة مع إن المسلم ممكن لو يقدر يتجوز لغاية اربعة، دا مثل. وخانة الديانة في البطاقة معمولة مش علشان إثبات إيمان الأشخاص، إنما معمولة علشان تطبيق القوانين بحكم دينهم، فلو عايز تكتب في البطاقة بهائي، حنطبق علي حضرتك أني قانون؟؟ حتي الشرطة (--) دي تبع اني قانون؟ أبو شرطة؟

    شخصيا ميفرقش معايا إنكار أي دولة او أي شخص لديني، مش علشان انا أحسن دين في الدنيا (مقدرش أقول في دين أحسن من التاني أبدا)، بس علشان انا إقتنعت بية ومبسوط، الباقي بقي بيني وبين ربنا

    وواللة العظيم ما معترض علي عدم ممارسة المسلمين لشعائرهم خارج مصر، بالعكس مرحب جدا، أنا بمارس عبادتي براحتي، مش محتاج أمشي في الشارع أسلم علي الناس "سا الخير .. مسلم، وحضرتك؟؟" لو بكرة قررت أكفر ولا حد حيعرف، براحتي

    مليش دعوة زي ما قلت بصحة البهائية، يا رب كل الأديان تكون صح وكل الناس تدخل الجنة، نفسي كدة بجد، ومعنديش عداء لأي معتقد حتي لو مفيش معتقد من اساسة، كل الناس حلوين

    البهائيين بيطالبوا بس بالأعتراف بدينهم في الأوراق الرسمي؟ طب وبعد الأعتراف مش برضة حتبقي في حقوق مكتسبة وخطوة بعدها الأعتراف باماكن عامة لعبادة البهائيين؟؟ وبعدها مش مطالبة قانونية لتطبيق شريعة البهائيين عليهم؟؟ أمال حيتطبق عليهم أني شريعة لو هما بهائيين؟؟ في أني دولة في العالم حتلاقي كدة بالذمة؟

    وبعدين حسب علماءالمسلمين مبنعترفش بالبهائية كدين، يبقي عايز الدولة تعترف بديانة بهائي؟ يا تكتب مسلم يا تكتب مسيحي يا تكتب يهودي يا تسيبوا البلد خالص وشوف أني دولة في العالم حتكتبلكم بهائي في خانة الديانة

    أسف، مليش دعوة أنت بتؤمن بإية، إنت حر، بس متجبرنيش في بلدي أكتبلك إلي إنت عايزة وأعترف بدين أنا مش معترف بية، ولكن أضمنلك حرية العقيدة والعبادة براحتك في بيتك... يا راجل دا في ناس معروفين إنهم بهائية ومحدش كلمهم، عايز حرية إية أكتر من كدة؟؟

    ReplyDelete
  57. ahmed al sabagh:
    الف شكر ليك يا بو حميد ع الكلام الجامد دة
    شهادة اعتز بيها والله
    واهلا بيك في اي وقت
    تحياتي واحتراماتي

    ReplyDelete
  58. jana:
    اسمحيلي اختلف معاكي في الراي
    زي ما قلت في كتير من الردود كتابة كلمة بهائي او غيرها في البطاقة الشخصية ليست اعتراف باي دين بقدر ما هو اقرار واقع موجود فعلا
    عندنا جماعة من الناس ايا كان عددهم قالوا عن فسهم احنا لا مسلمين ولا مسيحيين احنا بهائيين وبالتالي لابد من كتابة كدة في بطاقتهم منعا للبس
    تحياتي

    ReplyDelete
  59. وجهة نظري
    اولا الاعتذار عن الاطالة دة مش في محله لانك نورتني ورايك اكثر من قيم ويشرفني انك ترد ع الردود كلها مش ردي عليك بس
    ثانيا
    واضح فعلا ان قضية البهائية دي قضية معقدة بس مش جدا
    هتبقى معقدة جدا لو عددهم زاد واصبح قوة ضغط
    ثالثا
    دول اوروبا دول علمانية اشترت دماغها من زمان من المواضيع دي
    قالت ان كل واحد حر في عقيدته سواء كان يؤمن او يكفر طالما دة لا يتعارض مع قوانين الدولة او حرية العقيدة لغيره من افراد الشعب
    تحياتي واحتراماتي

    ReplyDelete
  60. ونريحهم ليه؟
    هما كمان بقى ليهم راى واعتبار وكرامة على كده ولا ايه

    ReplyDelete
  61. egyptianbahai:
    حقيقة
    الرد على النقط اللي انت اثرتها حول الاديان السماوية يستحسن ان يرد عليك فيها احد العلماء فهو اكيد اجدر مني على الرد
    واكيد حصل مناظرات ومناقشات في موضوع البهائية والاسلام واكيد انت على علم بها
    تحياتي

    ReplyDelete
  62. monaliza:
    لو هنبص للموضوع دة دينيا يا مونايزا يبقى انتي معاكي حق تماما
    انما لو بصينا من ناحية المواطنة وحقوق الانسان والحاجات دي يبقى الناس دي ليها حق
    شوفي انتي بقى هتبصي للموضوع من اي زاوية وعلى اساسها هيكون رأيك
    تحياتي واحتراماتي

    ReplyDelete
  63. لا اسملي اختلف معاك
    انا ضد التميز الديني و الناس دول مدام هم مصرين لهم كامل الحقوق في التعايش
    بغض النظر عن دينهم او معتقدهم
    و انا مع الغاء خانة الديانة

    ReplyDelete
  64. سيحاسبنا الله عز وجل إذا لم ندلي لهم النصيحة ولم نجبرهم على العدول عن الردة.هذا رأيي وخاصة أن هؤلاء البشر يعيشون بيننا .ويجب محاصرة هذاالفكرالشاذ حتى لا يصبح ظاهرة تسبب المشاكل لأجيالنا في المستقبل.فإذا كنا مسلمين حقا ونطبق الشريعة الإسلامية لكان مصير هؤلاء الكفرة المرتدين قطع الرؤوس وهذا هو الحل .

    ReplyDelete
  65. بطلوا جهل وتخلف
    البهائية ثانى دين فى العالم منتشر جغرافيا وسابع دين من حيث العدد!!
    كما إنه معترف به فى كل دول العالم والأمم المتحدة ما عدا بعض الدول العربية..
    يعنى مش مجرد شوية ناس لمين بعض وعايزين يطلعوا بطايق..
    اللى مش مصدق يدخل على ويكيبيديا ويشوف بنفسة!!
    وللعلم هم يشهدون بلأن لا إله إلا الله وأن محمد رسول الله..
    ولم أجد أى موقع لهم يسئ للإسلام بأى صورة أو أخرى بل بالعكس فى موقع المكتبة البهائية العالمية لديهم ألواح فى مدح رسولنا الكريم تحت إسم:!!
    "مختارات من النصوص البهائية في بيان مقام محمد رسول الله"

    http://reference.bahai.org/ar/t/

    أليسوا أفضل من أصحاب الديانات السماوية الأخرى المعادية للإسلام؟؟!!

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails