Wednesday, 19 March 2008

صنعوه واحنا قاعدين....دفنوه واحنا قاعدين

فاكرين الدكتور عادل عبد العال؟
الدكتور عادل عبد العال دة كان راجل بيطلع على قنوات تليفزيونية كتيرة وخاصة قناة المحور ويتكلم على الطب الشعبي والعلاج بالاعشاب وكان له حاجة لكل حاجة
بدءا من حب الشباب وانتهاءا بالعقم
معندوش مشكلة....كل داء وله العشب او مجموعة الاعشاب بتاعته
الراجل دة كان وصل انه اصبح في وقت من الاوقات موضة
مفيش قناة الا ولها برنامج بيقدمه او بيشارك فيه الدكتور عادل عبد العال
مفيش كتاب بيتباع في السوق الا كتاب الدكتور عادل عبد العال
مفيش حديث بين اتنين عن اي مشكلة مرضية الا وتيجي فيه سيرة الدكتور عادل عبد العال...ورأي الدكتور عادل عبد العال...ونصيحة الدكتور عادل عبد العال
وطبعا لأن الدكتور عادل عبد العال اصبح ستار في بلد لا يصح فيه ان يكون هناك اي ستار الا ال ستار
star
فظهر تيار مضاد للدكتور عادل عبد العال وطبعا بيتزعم التيار دة كبار الاطباء اللي سوقهم وقف وسبوبتهم اتقطعت
واصبح ترمس وحلبة وشيح عادل عبد العال خطر على ادوية فايزر و جلاكسو ونوفارتس
وبدأت اتهامات لعادل عبد العال انه لا دكتور ولا حاجة وانه خريج تربية رياضية وانه نصاب ومدعي.......الخ
وفجأة
مفيش عادل عبد العال....وزي ما اصبح عادل عبد العال هو حديث المدينة في يوم وليلة اصبح في يوم تاني وليلة تانية ممنوع ظهوره ووجوده وكلامه لحد ما يتلاشى تدريجيا من قنوات التليفزيون والصحف وبالتالي من عقول الناس وذاكرتهم
ولا عزاء للمشاهدين
طب بالله عليك او عليكي
شعورك كان ايه مع اول سطر من البوست دة وانا بتساءل
فاكرين الدكتور عادل عبد العال؟
هل افتكرته بسهولة؟ هل ماافتكرتوش على طول؟
ولو افتكرته بسهولة....ما سألتش نفسك الراجل دة راح فين؟
احنا كنا وصلنا في وقت انك ممكن تفتح الحنفية تلاقي الدكتور عادل عبد العال دة نازل منها من كتر انتشاره
اللي عايز اوصل له....ان احنا مجرد لعبة في ايد الفضائيات بتلعب بينا زي ما هي عايزة
شوية بتلهينا بعادل عبد العال وشوية بهالة سرحان وشوية بعصام الحضري
وكله ماشي بشعار
يومينهم وهييجي غيرهم
ايام ما كان الدكتور عادل عبد العال حديث المدينة صدعونا بيه...ويوم ما جاءت التعليمات انه يختفي وكفاية عليه كدة يبقى يختفي ونصنع حد تاني واي قضية تانية
وليذهب المشاهدون الى الجحيم
اللي ينطبق على عادل عبد العال بينطبق برضة على شخصيات تانية كتير وقضايا صدعونا بيها برضة وبعدين اتدفنت
فاكرين هالة سرحان؟
طب فاكرين العبارة؟
حوادث القطارات؟
طب فين الحبيب علي الجفري اللي كان موضة في عالم الدعاة؟
راح فين عصام الحضري اللي طلع في يوم من الايام على اربع فضائيات في 4 برامج ورة بعض؟
وغيرهم وغيرهم وان كانت الذاكرة لا تسعفني...ماهو انا كمان بأنسى
يا اخوانا
نحن ليس اكثر من مجموعة من البلهاء قاعدين قدام شاشة بنتفرج على ما يقرره غيرنا اننا لازم نتفرج عليه
بس خلاص

53 comments:

  1. ! أول تعليق

    تسلمممممم ايدك بجد

    والله يا اخى انت بتكتب حاجة زى ما تكون مطلعها من قلبى

    بيروحو فين الناس

    ولا احنا بقينا من السفة والعبط اللى بقينا نصنع شخصيات وهمية

    وليه الشيخ الشعراوى والشيخ كشك فاضلين راسخين لغاية دلوقت

    وليه الخطيب فاضل فى وجدانا لحد دلوقت

    فعلا لو فكرت هتلاقى شخصيات كتير طلعت فجاءة واختفت فجاءة

    وانت حطيت ايدك على التفسير الصحيح للظاهرة دى


    تسلم ايدك

    تحياتى

    أحمد الصباغ

    ReplyDelete
  2. مرتحتلوش ولا ثانية

    اما المسرحية اللى بتتنصب وتخلص ويتعمل غيها واحنا اعدين فحكايه كل يوم

    ReplyDelete
  3. السلام عليكم ورحمة الله وبركاته

    هي هياها حكاية كل يوم الصبح لما يحبو يلهو الناس عن حالهم يخترعولهم اي حكاية والسلام وتبدأ الفضائيات وبرامج التوك شو تتكلم وتستضيف ناس تتكلم وتكبر الحكايه لحد ما تبقي زي البالونه اللي منفوخه هوا وبشكة دبوس خلاص بح مافيش

    فاكر هند واحمد الفيشاوي

    سفاح المعادي

    البقرة اللي بتشفي من كل الامراض

    الشجرة المقدسه

    وغيرها من الحاجات اللي كل هدفها الالهاء لا اكثر ولا اقل

    في بوست عند بيلا بنفس المعني تقريبا

    سلام

    ReplyDelete
  4. هي القنوات دي اصلا بتعمل ايه غير انها تشتغل على نظام الهوجة
    وده النظام اللي بيجيبلهم فلوس بالهبل
    وادينا بنتفرج وخلاص

    بس الشهادة لله
    مش كل القنوات الفضائية كده
    في كام واحدة كده محترمين

    ReplyDelete
  5. هذا هو الإعلام الغير حر

    يا عزيزي
    او قل

    هذا هو الاعلام

    ReplyDelete
  6. ههههههههههه لا بجد حلوة صنعوه واحنا قاعدين
    ما هو لازم نقعد طيب نعمل ايه انت وراك حاجه ههههههههه
    فاكرين هالة سرحان؟

    راحت فى شجرة
    طب فاكرين العبارة؟

    الصندوق الدمايطه الوحشين معرفوش يطلعوه الاسود ده الدنيا كانت ضلمه

    حوادث القطارات؟

    ما هو التوربينى السبب

    د/عادل عبد العال
    فى بعثه لنادى المقاولين العرب
    هههههههههه شوفت جاوبت لك ازاى انا شاطرة صح
    ما هو لازم يا استاذنا يغيبونا بس ده دورنا احنا بقى اننا نفكر ونشغل مواتير مخنا اللى عفنت
    تسلم ايديك ودماغك على البوست

    ReplyDelete
  7. طبعا احنا اللى بنعمل شخصيات وبندفنها تانى
    لان غاب عننا القدوه الدكتور الماهر المهندس المبدع المعلم النموذج
    فبقينا ندور على اى حد يحسسنا ان لسه فيه ناس كويسه فى البلد فبنضطر نصنع شخصيات هلاميه ولما نكتشف ان اللى احنا عملناهم دول مش على المستوى المطلوب احنا برضه نحاول ندفنهم بادينا

    ReplyDelete
  8. أنا جبت كتابه أيام ماكان بـ 25 جنيه

    روحت عند أخويا فى مكتبته .. لقيت عنده كتاب معفن ومقرح كده .. مكتوب عليه السعر من بره ب 5 جنيه

    بجد الوصفات بالمسطرة .. يعنى منتهى قلة الأدب

    أنا فاهم انك بتسقط على ايه

    هو نوع من انواع التخدير

    انه يشغل بال الناس بحوارات فاضية وفراغة وخلاص

    ولما يستهلك عبد العال والحضرى وكاس وهالة سرحان

    هايلاقى حاجات تانية


    انت عارف فى جامعة عين شمس عاملين ايه
    عاملين حفلات لمنير وتامر حسنى ومصطفى قمر

    تخيل

    وسط الأحداث السودة دى

    احمد زكى بدر رئيس الجامعة عامل حفلة لتامر حسنى

    علشان العيال ولا يعملوا مظاهرة علشان فلسطين ولا علشان رغيف العيش

    بجد منتهى القرف

    ReplyDelete
  9. تصدق معاك حق
    ربنا يستر على مصطفى حسنى
    الراجل ده انا بحبه وبحب برامجه
    ربنا يستر ومحدش يدفنه بالحيا زى ماعملوا مع غيره كتيير
    تحياتى ليك

    ReplyDelete
  10. بوست رائع بجد
    وعندك حق فى كل كلمة قلتها ومش لاقية بجد تعليق أكتر من كلامك

    تحياتى لك

    ReplyDelete
  11. Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV de LCD, I hope you enjoy. The address is http://tv-lcd.blogspot.com. A hug.

    ReplyDelete
  12. مش عارف بس حاسس ان ده الطبيعى
    الاعلام اهتم بعصام الحضرى فى زروه المشكله وبعدين سكي لما بدأت تتحل
    وكذلك د عبد العال
    و هاله سرحان
    طبيعى جدا ان الاعلام يتكلم فى وقت الحدث ما يحصل ويسكت بعدها

    جايز انا الى مفهمتش تقصد ايه؟

    ReplyDelete
  13. ahmed al sabagh:
    الف شكر على تشريفك لمدونتي
    التفسير للظاهرة دي يمكن تلخيصه في كلمتين
    سياسة الالهاء
    تحياتي واحتراماتي

    ReplyDelete
  14. محمد عبد الغفار:
    هو الحقيقة اختلفت فيه الاراء ما بين مؤمن بيه جدا ومشكك وغير مقتنع بيه على الاطلاق
    بس بصرف النظر
    الراجل دة راح فين؟
    اختفى اختفاء مريب
    تحياتي

    ReplyDelete
  15. خمسة فضفضة:
    طب ليه مابيكملوش موضوع للاخر
    ليه كل حاجة بتاخد وقتها وتختفي
    ليه كل القصص دي بتفضل مفتوحة بلا نهاية واضحة؟
    الاستسهال
    او
    الاستهبال
    تحياتي واحتراماتي

    ReplyDelete
  16. والقائمة طويلة يا بوحميد
    والجميل بقى إن عندهم صنعة لكل ذوق وكل مزاج وكل وقت وله نواح مش عايز أقول أدان

    ReplyDelete
  17. نسيت جورج قرداحى ومسلسل الساعة 8 ياه وحاجات تانية كتير
    تعرف نفسى وسائل الاعلام يعرفوا دورهم كبير ازاى

    ReplyDelete
  18. الام وامال:
    القصة مش قصة هوجة
    في فعلا احداث واشخاص بتفرض نفسها ع السطح
    بس هم بيتعاملوا بمنطق موضة وانتهت من غير ما نعرف انتهت على ايه
    بيصدعونا وبعدين يسيبوهم من الموضوع دة
    تحياتي واحتراماتي

    ReplyDelete
  19. دكتور حر:
    هاقول
    هذا هو الاعلام العربي
    تحياتي

    ReplyDelete
  20. appy:
    طب لو كانوا قالوا لنا انه راح في بعثة للمقاولين ماكانش هيبقى فيه مشكلة
    ههههه
    المشكلة ان فعلا سابوا الناس دي ونسيوهم بعد ما قرفونا وصدعونا
    طب ع الاقل يتابعوا اخبارهم بعد كدة من بعيد لبعيد بدل التعتيم دة
    تحياتي واحتراماتي

    ReplyDelete
  21. عزيزي أحمد

    طبعا عادل عبد العال محدش يقدر ينساه لأن زي ماقلت في وقت من الأوقات كان الكل بيتكلم عنه و مفيش لا كتاب و لا حديث صحفي و لا برنامج بيخلو منه و فجأه كل ده اختفي و طلع نصاب و و و و لصالح مين كل ده؟كل شويه تطلع هوجه عشان تشغل الناس و للأسف بيشغلوهم و بعد كده الموجه تنتهي و تظهر موجه جديده

    زي ماقلت بنكون لعبه في ايد الفضائيات ووسائل الأعلام تشكلنا زي ماهي عايزه

    كتير بقعد افكر و اسأل روحي ياتري الجرايد المعارضه حتلاقي كل اسوبه موضوع ساخن تتكلم عنه و بلاقي ان فعلا يتلاقي مواضيع جديده و مثيره للجدل تتكلم عنها الأعلام حيفضل كده علي طول

    تمام زي موضوع مصنع مصر للألبان اللي طلعوا في الجرايد القوميه و قعدوا يقولوا انه فيه و فيه و بعد كده خرجت علينا جريده صوت الأمه و قالت انه طلعت عليه الأشاعات دي كلها تمهيدا لبيعه لأحدي رجال الأعمال اللي هو في نفس الوقت وزير في حكومه نظيف

    موضوعك مهم يااحمد و بحييك علي طريقه عرضك له

    ReplyDelete
  22. ماهو انت قوات ان احنا فعلا
    شويه بلهاء قاعدين نتفرج علي اللي
    رايح واللي جي
    واحنا ورانا ايه غير كده
    ومعتدش ان هايبقي في تغير

    ReplyDelete
  23. كلامك صح

    احنا فعلا لعبة فى ايد الفضائيات

    بيلعبوا بفكرنا ومشاعرنا وحتى بثقافتنا

    ساعات بحس انهم ما بيصدقوا يشغلونا بموضوع ولا حكاية ولا مصيبة حتى ..لمجرد انهم يبعدوا تفكيرنا ودماغنا عن موضوع اخر خفى وسرى

    !!

    حياتنا كلها ماشية فى دوامة ..اللى يعتبر حديث الساعة حاليا ..كمان يومين هايبقى ممسوح من الذاكرة


    ...


    وانا اعتقد اننا هانفضل دايما كدة

    عقلنا غائب عن الواقع وبيلعبوا بيه زى الكورة بالظبط



    تحياتى

    :)

    ReplyDelete
  24. أكيد أحنا مغيبين والأعلام ليه اثر كبير جدا علينا بس ليه؟

    ليه الاثر القوي ده معانا أحنا وبس؟
    ليه كلمه بتودينا وكلمه بتجيبنا زي ما بيقولوا؟

    أنا فعلا ما أفتكرتش الدكتور عادل بسهوله
    بس بعد ما أفتكرته فعلا حسيت أد ايه أنا منقاد ورا حاجات حد غيري اللي بيحددلي أني أهتم بيها

    بس عموما لازم نكون مغيبين علي طول
    مهتمين بأي حاجه مالهاش لازمه
    علشان الحاجه اللي المفروض نهتم بيها ممنوعه عننا

    تحياتي يا زعيم

    ReplyDelete
  25. rحدوتة مصرية:
    المصيبة ان مش احنا اللي بنصنعهم
    دة غيرنا هو اللي بيصنعهم لحسابات خاصة ولمصالح شخصية او لتصفية حسابات شخصية برضة
    وهو برضة اللي بيحطمهم لاسباب شخصية وخاصة برضة
    وكل دورنا ان احنا نتفرج بس
    تحياتي

    ReplyDelete
  26. monzer:
    ما انا باقوللك
    هم ماشيين بمبدأ
    يومينهم وهييجي غيرهم
    بالنسبة لحفلة عين شمس
    ماهو دة القدوة دلوقتي
    تامر حسني ومصطفى قمر
    عادي بقى
    تحياتي

    ReplyDelete
  27. بنت خيخة واي كلام:
    ماتقلقيش هياخد وقته وهيختفي برضة
    دة العادي
    دة سلو بلدنا زي ما بيقولوا
    وبعدين لو كبر عن الحجم اللي المفروض يكون فيه هيكون حط نهايته بايده
    تحياتي واحتراماتي

    ReplyDelete
  28. bosbos:
    الله يخليكي يا بس بس
    ولو اننا برضة مستنيين تعليقك
    ماتحرميناش من تعليقاتك القيمة
    تحياتي واحتراماتي

    ReplyDelete
  29. شيكابالا21 March 2008 at 02:52

    اولا اسمحلى احييك على البوست الجامد دة ودة طبعا مش غريب عليك لانى متعودة منك ع الابداع المستمر بس اسمحلى اقول اننا شعب طيب وسهل التاثير علية من جوة او من برة طب فاكر ريدج وكارولين ولا كلاممن دهب ولا يا سلام ع الست اوشين مصر كلها كانت بتعيط عشانها ارجوك متظلمش الفضائيات بس حاول تغير ثقافة شعب فطرى انضحك وبينضحك وهينضحك علية

    ReplyDelete
  30. tv-de-lcd:
    i will do
    thanks alot for ur nice words about my blog
    see u

    ReplyDelete
  31. بطوط حبوب:
    وياترى يا بطوط ايه اللي حصل خلى عادل عبد العال يختفي وهالة سرحان كأن لا وجود لها؟
    انا معنديش اعتراض على الاطلاق على الاهتمام باشخاص معينة او احداث معينة
    ولكن لما تبقى الاهتمام مكثف وبعدين صمت تام يبقى في حاجة مريبة
    يبقى الاهتمام كان لغرض الاثارة والتجاهل كان لغرض التعتيم
    تحياتي

    ReplyDelete
  32. عصفور المدينة:
    فعلا يا باشمهندس
    القائمة طويلة قوي والواحد من كترهم بينسى
    تحياتي

    ReplyDelete
  33. monaliza:
    اهو جورج قرداحي دة اكبر مثال على مقولة
    يومينهم وهييجي غيرهم
    تحياتي واحتراماتي

    ReplyDelete
  34. sada2t fi 25er gomlaa

    ma7na masreen ba2a

    ReplyDelete
  35. احنا فعلا لعبه فى ايد الاعلام
    اللى اصلا الحكومه بتتحكم فيه عشان تلهينا كل شويه بحاجه

    ReplyDelete
  36. شوفت انا بتفرج على الافلام و انت البرامج
    و شوية شوية كنت هتجيب كتب كمان
    :)
    بجد احنا احلى شعب يشتغلوه

    تحياتى

    ReplyDelete
  37. اجندا حمرا:
    الف الف شكر
    نورت المدونة
    تحياتي

    ReplyDelete
  38. may:
    طب هنفضل طول عمرنا بلهاء ولا ايه:
    مش هنعقل؟
    تحياتي واحتراماتي

    ReplyDelete
  39. انا افتكرته على طوول وطبعا كان لازم يتحارب لانه بيوقف سوق الادويه وطبعا الاعلام وسيله تغييب وسيطره على المجتمع ولسه كمان وثيقه الاعلام العربى

    تحياتى

    ReplyDelete
  40. بصراحة أنا مش فاهمة وجه اعتراضك على ايه

    والمواقف اللى أنت حكيتها .. احنا اللى سمحنا لهم بكدة

    وده شغل الاعلام الصح ان القناة الشاطرة هى اللى تسبق للنجم علشان بتستفيد منه فى جذب الاعلانات
    زىه زى عمرو خالد وهالة سرحان وشعبان عبد الرحيم
    أما الحبيسب على الجفرى وغيره كلهم لسه موجودين على القنوات بس انت الظاهر اللى مش بتابع كويس
    حتى هالة سرحان رجعت تانى بس على روتانا كليب

    ReplyDelete
  41. عندك حق الراجل ظهر فجأة وأختفى فجأة بس طبعا بعد ما لم له قرشين حلوين من الكتاب بتاعه اللي قطعا توليفة من الوصفات الشعبية القديمة وتذكرة داوود
    أنا من أنصار العلاج بالاعشاب والطب البديل
    :)
    حكاية الفضائيات بقى والاشتغالات بتاعتها ده تنافس طبيعي على الخبر والسبق الاعلامي وفيه ناس بتدفع فلوس عشان تظهر على الشاشة وتقول أي كلام .. المهم يكون له وجود إعلامي
    المشكلة بقى إن أختلط الحابل بالنابل مبقناش نعرف نفرق بين الصالح والطالح
    :)

    خالص تحياتي

    ReplyDelete
  42. طبعا كلامك صح اوي
    بالرغم من انى مش ضد عادل عبد العال لأنه لما طلع ما قالش للناس انه ضد الدكاترة لكن احنا اللى عملنا منه حجة كبيرة اوي و استغنينا بيه عن الطب و المشكلة مشكلة شعبنا الماهر في صنع من الحبة قبة

    نيجي بقى للإعلام اللى هو أداة طيعة جدا في ايد صناع القرار و اللى بيستخدموه بحنكة شديدة وبوعي تام بطبيعة الشعب الجميل

    اقولك على حد تانى نفسي بجد اعرف ايه اللى حصله" رضا هلال" نائب رئيس تحرير الأهرام اللى اختفى في ظروف غامضة و قعدت الاهرام عاملة عليه بروباجاندة جامدة جدا ، و فجأة توقف النشر في القضية و ما نعرفش الراجل راح فين لغاية دلوقتى

    حاجات كتير اوي
    و المشكلة هي مشكلة الشعب مش مشكلة اللى استخدموا الأداة
    لو احنا مش بنصدق و مش ببنساق وراء اي حملة ما كانوش عملوا كده معانا
    تحياتي لك
    و الموضوع كبير اوي

    ReplyDelete
  43. ceaneyes:
    مش عارف هل دة بسبب ان الاعلام مركزي ويخضع للدولة
    سواء اكان اعلام حكومي او حتى فضائيات خاصة وليها سقف
    ولا دة استسهال او استهبال اعلامي
    تحياتي واحتراماتي

    ReplyDelete
  44. alshared:
    واضح ان الاعلام متبع الاسلوب دة من زمان ومحقق نجاح
    تحياتي

    ReplyDelete
  45. شيكابالا:
    الف شكر طبعا ع الكلام الجامد دة
    ولكن طبعا انتي عارفة كويس تن شهادتك مجروحة ولا يعتد بيها
    انتي فعلا فكرتينا بحاجات قديمة جدا
    معقول انتي لسة فاكراها؟
    انتي كنتي بتتفرجي على اوشين؟
    تحياتي

    ReplyDelete
  46. r.o.u.r.o.u:
    ربنا يجازي اللي كان السبب
    او اللي
    كااااااااانوا السبب
    تحياتي واحتراماتي

    ReplyDelete
  47. بندقة:
    المصيبة ان الحكومة مش مكفيها سيطرتها الرهيبة على اعلامها الحكومي
    راحت مألفة حاجة اسمها وثيقة الاعلام للسيطرة على القنوات الخاصة
    وكأن المشرحة ناقصة قتلى
    تحياتي

    ReplyDelete
  48. rania:
    احنا شعب بيشتغل نفسه اساسا يا رانيا
    تحياتي

    ReplyDelete
  49. ضد الظلم:
    تقريب هو كان موضة وانتهت
    او لعب دوره ودوره خلص لحد كدة
    تحياتي

    ReplyDelete
  50. تائهة في ارض الاحلام:
    يا سيدتي الفاضلة
    انا مش عندي اي اعتراض على الاهتمام بأي حد
    انما لما يكون الاهتمام مجرد موضة ومبالغ فيه وبعدين يتحول الاهتمام الى عدم اهتمام على الطلاق بل لاهمال...تبقى حاجة تستحق التساؤل بشدة
    وبعدين هالة سرحان بجلاة قدرها اللي ماكنش فيه قناة تليفزيونية او جريدة الا بتتكلم عنها لما تترمي في روتانا كليب مش دي حاجة غريبة؟
    والحبيب الجفري اللي كان احدث صيحة وموضة في عالم الدعاة واللي ينتهي به الحال لتقديم حلقات قديمة من برامجه في وقت محدش بيتفرج ع التليفزيون
    مش تبقى حاجة غريبة؟
    تحياتي

    ReplyDelete
  51. ياسر حسين:
    طب دول بيدفعوا ودول بيقبضوا
    احنا مالناااااا؟
    تحياتي واحتراماتي

    ReplyDelete
  52. الحلم العربي:
    من كتر ما بقى منتشر بشدة
    في ناس فعلا كرهت عادل عبد العال غصب عنها
    حسوا ان في حاجة غلط
    حسوا انه مفروض عليهم
    رضا هلال دة بقى بالذات لغز كبير جدااااا
    بس مفتاح اللغز اكيد في ناس شايلاه وعارفاه كويس قوي
    تحياتي واحتراماتي

    ReplyDelete
  53. ماهو ده الهدف من الاعلام العربي..أنت أول مره تعرف
    :)
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails