Thursday, 13 March 2008

ابو بلاش....كتر منه

لو افترضنا ان كل لاعبي الاهلي اصبحوا بين يوم وليلة ابو تريكة, او ان كل لاعبي الزمالك تحولوا فجأة الى حازم امام في مهاراته وابداعاته
هل دة هيصب في مصلحة الفريق؟
عدد كبير ممكن يقول يا ريــــــــــــــــــــــــــــــــــــــت... دة احنا نفسنا في 100 ابو تريكة او 200 حازم امام
انما الحقيقة العلمية بتقول ان دة هيؤدي الى انهيار الفريق فورا وان فريق كل لاعبيه من عينة ابو تريكة هيكون مصيره هزائم ساحقة طبعا
لأن فريق كرة القدم مش مطلوب ان يكون فيه 11 مهاجم او 11 مهاري انما اي فريق كرة في العالم بيحتوي على 11 لاعب متنوعين منهم حارس المرمى والمدافع والمهاجم منهم الاعب السريع والاعب البطيء منهم الجناح ومنهم صانع الالعاب.
مأساة مصر ان ال 80 مليون بني ادم عايزين يكونوا ابو تريكة...قصدي الشعب كله بيتعلم علشان يكونوا اطباء وصيادلة ومهندسين
المأساة دي اسمها
مجانية التعليم
اللي كل الناس بيتغنوا بيها بأعتبارها انجاز ما بعده انجاز لانقلاب 1952 على الرغم انها وبال وكارثة على البلد دي والسبب الرئيسي لجيوش العاطلين اللي بتزداد سنويا بارقام فلكية
انقلاب 1952 حول التعليم الى حق مكتسب للجميع اوتوماتيكيا....بدون اي مجهود او مشقة..العيال بتطلع من ابتدائي لاعدادي ومن اعدادي لثانوي ومن ثانوي للجامعة ببلااااااااش....مجانـــــــــــــــــــا
وطبعا شعار المصريين منذ الأزل..ابو بلاش كتر منه
وكانت النتيجة ان كله بيتعلم مجانا اللي يستحق واللي ما يستحقش وجامعات بتتملي وبتفضى بلا اي قيمة لخريجيها واكنهم ماتعلموش من اساسه
طب انت عايز ايه....عايز الشعب يفضل جاهل..مايتعلمش؟!!!
لا طبعا
انما يجرى ايه لو كان التعليم الابتدائي والاعدادي مجـــــــــــــــانا....ويمشي برضة بالشعار القومي المصري ابو بلاش كتر منه
ومن الاعدادية ييجي بقى مفترق الطرق...
المتفوق واللي يستحق يحصل على المجانية ويكمل تعليمه الثانوي...واللي مالوش في التعليم وما اكثرهم يتجه الى التعليم الفني اوتوماتيكيا...ويخرج حرفيين البلد في امس الحاجة ليهم فعلا
اما القادر ماديا ولا يستحق المجانية يدفع تكاليف تعليمه ويكون مكلف فعلا...والفلوس اللي بيدفعها امثال هؤلاء تستخدم لتطوير التعليم المتدهور واللي وصل لحالة مأساوية
لو اتحققت الفكرة دي
اولا: هيتخرج اجيال من الفنيين اللي هيفيدوا البلد على حق من نجارين وسباكين وعمال ودول شغلهم مضمون لانهم هيكونوا اتعلموا كويس وعلى اسسس سليمة وهيبقوا مطلوبين برة وجوة
ثانيا: قللنا الاعداد الرهيبة اللي بتتخرج في التعليم اوتوماتيكيا وهي غير راغبة فيه وبتاخد اماكن هي لا تستحقها وبيكون مصيرها القهوة او الاحباط او الانحراف
ثالثا: وفرنا اموال كتيرة هيدفعها القادرين لتطوير كل انواع التعليم سواء العادي او الفني
رابعا: رجعنا للكليات المنهارة هيبتها بتقليل الاعداد الرهيبة اللي بتدخلها سنويا لدرجة انها اصبحت كليات للأسف الشديد بلا اي قيمة زي الحقوق والتجارة والاداب.....الخ
خامسا: المجتمع هيصبح مجتمع متوازن فيه اطباء وصيادلة ومهندسين وعمال وفلاحين.....الخ
هيبقى اللي عايز يتعلم ويدخل الكلية اللي هو عاوزها قدامه حل من اتنين:
يا اما يتفوق وينبغ ويستحق المجانية
يا اما يدفع
مالهاش حل تالت
التعليم مش كالماء والهواء
كفاية بقى....البلد مش ناقصة...كفاية شعارات
ارحمونا بقى
ابو بلاش مش هنكتر منه
لأن مش هتفضل حاجة ببلاش اصلا

45 comments:

  1. وتضمن منين انه هيكون فى نزاهه فى اختيار الطلاب للمجانيه
    برضه
    الكوسه هتشتغل
    واحسن حاجه اننا منزرعهاش اصلا
    ممكن تقولى لا ده على حسب المجموع
    اقولك
    الكوسه
    متعرفش على حسب
    تعرف بس
    على حزب وداد جلبى يابوى

    ReplyDelete
  2. اعتقد ان ده النظام الامريكي في التعليم

    هههههههههه مش هقولك عميل وخاين ومتبع الثقافة الغربيه

    لان يا ريت نتبعهم في الحاجات دي


    عموما انا متفق معاك موافقك ميلون في الميه

    تحياتي

    ReplyDelete
  3. الله الله
    تنفع وزير يا احمد

    ReplyDelete
  4. عارف ايه اكتر حاجة ..او بمعنى اصح الحاجة الوحيدة اللى رخيصة وببلاش فى البلد دى ؟؟؟؟


    الإنسان وكرامته


    !!!


    ابقى سلملى على المجانية بقى

    :D

    ReplyDelete
  5. .
    فكرتك كويسة .. أن اللي عايز يكمل تعليمه عند مرحلة معينة يكون اللي يستاهل يكمل
    .
    المصيبة بقي أن فكرة زي ديه تتعمل مع تحوير بسيط أن الغير قادر حتي ولو كان متفوقا وسينبغ أذا اتيحت له الفرصة يتقلش من الحكاية وميقدرش يكمل تعليمه
    .

    ReplyDelete
  6. أختلف معك ، هذا ليس حلا ، ففى الوضع المأساوى الذى تعيشه مصر تصبح مجانية التعليم من أبسط الحقوق للجميع ، وهناك حلول كثيرة لحل مشكلة تكالب معظم المتعلمين على مجالات بعينها ، لكن هذه الحلول طويلة الأمد وتتطلب تغييرا شاملا فى سياسات كثيرة ، دعنى أسألك : هل تعتقد أساسا أن المسئولين عن التعليم فى مصر لديهم أية نية لإصلاحه ؟المصير من سيء إلى أسوأ بطريقة مقززة وشبه مفتعلة ، بل هى مفتعلة ولو كنت تعمل فى الحقل التعليمى مثلى لعرفت أن هناك مئات المشاكل التعليمية لا تحتاج خبراء لحلها ، بل هى أشياء بديهية ومع ذلك تجد محاولات الإصلاح العقيمة تزيدها فشلا .. فلا تلقى اللوم على أحد من الناس يا صديقى فالمسألة سياسة عام . تحياتى .

    ReplyDelete
  7. من الاعدادية ييجي بقى مفترق الطرق...
    المتفوق واللي يستحق يحصل على المجانية ويكمل تعليمه الثانوي...واللي مالوش في التعليم وما اكثرهم يتجه الى التعليم الفني اوتوماتيكيا...ويخرج حرفيين البلد في امس الحاجة ليهم فعلا
    اما القادر ماديا ولا يستحق المجانية يدفع تكاليف تعليمه ويكون مكلف فعلا...والفلوس اللي بيدفعها امثال هؤلاء تستخدم لتطوير التعليم المتدهور واللي وصل لحالة مأساوية
    ........

    هى الفكرة حلوة

    بس تضمن منين ان غول الواسطة مش هايدخل فى الموضوع؟؟؟
    تضمن منين ضمير العاملين بالتدريس
    جميعا من اول الوزارة حتى المدرس؟؟؟؟

    لو ده حصل
    هنرجع للطبقية بتاعة آيام الاقطاع

    فاكر؟
    في فيلم رد قلبى
    لما الجناينى راح يطلب واسطة من النبيل
    او مش عارفة مين
    علشان ابنه يدخل الكلية الحربية؟؟

    فى ظل الفساد المتفشى
    مثل هذه الافكار ستستخدم اسوأ استخدام
    وستعود البلد للخلف اكتر ماهى بالفعل
    فى الخلف

    هات مسؤلين ضميرهم لسة حى
    لو تقدر

    تحياتى

    ReplyDelete
  8. كنت شيكابالا14 March 2008 at 22:58

    فكرة حلوة واللة نعمق بيها الواسطة والمحسوبية وكمان لو اتطبقت صح تعمق الطبقية مش عارفة واللة وبعدين احييك ع البداية المهاريةتريكة وحازم وايام العز اللى متتعوضش عيب التعليم ف مصر سياساتة الخاطئة فعلا

    ReplyDelete
  9. المشكلة مش في التعليم بس
    النظام الموجود في مصر اصبح نظام فاسد ولأنه متشابك يعني كل حاجة داخله في بعضها التعليم في الامن في الكورة في كل حاجة يبقى مش هينفع نصلح حاجة والحاجة التانية زي الزفت
    البلد كلها لازم تتطور وقبل ما نطور التعليم نعرف بس ازاي نوصل رغيف العيش لناس
    تحياتي

    ReplyDelete
  10. دا اللي بيحصل في كل أوروبا، بتلاقي مديرين مصالح وشركات وحتي وزراء معاهم الثانوية العامة بس، ومحدش بيعايرهم، اللي عايز يكمل يكمل بمجهودة، ومش عارف لية شايف دا اللي حيحصل في مصر بس مش علشان ، كل اللي متعلمين مجاني وداخلين الجامعة مجاني خلاص مبقاش ليهم مكان في سوق العمل، اللي معاة يدفع من الأول ودخل جامعة بفلوس هيلاقي شغل بمرتب كويس

    مش معني كدة ان العنلية في طريقها للأصلاح، دي كدة مشوهه جدا لأن أولاد الأغنياء بقي بس من حقهم يشتغلوا والباقي قاعد في بيتهم. في خطوات لازم تضاف للكلام دا علشان التعليم يتحسن وسوق العمل يتحسن، زي مش لازم الموظف يكون خريج جامعة لأنة أساسا الجامعة مبتضيفش أي حاجة زيادة (ما عدا طبعا الطب والهندسة وبعض العلوم)، ولازم يكون في بعض الأماكن المجانية في الجامعات اللي بفلوس للمتفوقين، بس الأهم اننا لازم نطور التعليم الجانبي، الكورسات والدبلومات لأن هيا دي أساس العمل، والكلام دا ممكن يكون بقانون

    دا نفس الكلام اللي انت قلتوا، بس أنا حبيت أعلق وأتفذلك :)

    ReplyDelete
  11. القصة مش في موضوع مجانية التعليم من عدمة .. لأن في الحقيقية ما يتم إنفاقه على التعليم في مصر يعد لا شيء فعلا مقارنة بالدول الأخري .. ومش عايز أخرج بعيد عن الموضوع وأقول مقارنة بمجالات الإنفاق الداخلي الأخرى اللي مالهاش لازمة للمواطنين

    المشكلة هي التخطيط .. نحن نفتقد للمعلومات اللي تقولنا هو سوق العمل محتاج إيه بالظبط ونعلم الناس إيه

    ReplyDelete
  12. يا راجل ياريت على الاقل الاحترام يزيد فى الدنيا

    ReplyDelete
  13. احمد باشا
    ازيك ياعم عامل ايه كدا وكدا

    انا مع راي فرنسا

    نبطل نزرع كوسه

    سلاموووووووووووووز
    وزة

    ReplyDelete
  14. الام وامال:
    ايدينا وايديكم على كتف اي حد نفسه احوال البلد دي تنصلح
    تحياتي

    ReplyDelete
  15. فرنسا هانم:
    عارفة كان انزه حاجة في مصر زمااااان ايه؟
    مكتب التنسيق
    دة طبعا قبل اختراع الجامعات الخاصة اللي في كل حتة عمالة تجيب اجوان
    عموما المجموع مفيهوش كوسة
    بس يطبقوا حكاية المجانية دي لمن يستحق فقط
    تحياتي

    ReplyDelete
  16. mohanad:
    والله يا مهند النظام دة يطلع امريكي يطلع سنغافوري يطلع هندي حتى
    المهم انه هو النظام العادل والمناسب لظروفنا
    طبعا مفيش عدالة مطلقة بس الاقرب للكمال
    تحياتي واحتراماتي

    ReplyDelete
  17. محمد مفيد:
    اخجلتم تواضعنا
    اتعرضت عليا الوزارة كتير بس انا اللي بارفض
    تحياتي

    ReplyDelete
  18. oceaneyes:
    ماهو اصلاح اوضاع التعليم هي السبيل الوحيد لرفع قيمة وسعر البني ادم المصري
    احنا عندنا ثروة بشرية رهيبة غير مستغلة على الاطلاق
    ربنا يصلح الحال
    تحياتي

    ReplyDelete
  19. قليل من التفكير:
    هتكون قانون
    بمعنى ان اي حد ايا كان قادر ماديا او غير قادر
    طالما وصل لمجموع معين لازم يحصل على المجانية
    حاجة اوتوماتيكية
    قانون يعني
    تحياتي واحتراماتي

    ReplyDelete
  20. مين فيه ايه ؟

    اه وطبعا بالنظام ده هتشتغل الواسطة والمحسوبية وهنرجع لنفس الحكاية واللى ما يستحقش هو اللى يكمل تعليمه واللى يستحق ما يكملش

    وبغض النظر عن اى حاجة افرض ناس فقيرة وابنهم متفوق يبقى ليه نحكم علية بالفشل وانه يااما يدفع فلوس علشان يكمل او لو مش معاه يبقى خلاص ما يلزموش

    يبقى كده احنا هنرجع تانى للطبقية اللى بنحاربها

    وبالكلام ده هترجع تانى

    انا يمكن مع مجانية التعليم بس مش معنى كده ان كل الناس لازم تدخل ثانوى وكلية ولازم تدخل طب وصيدلة وبس

    اللى مستواه ضعيف يريح نفسه ويكمل فى حاجة على قد مستواه

    واللى شايف انه عايز طب عايز صيدلة
    عايز حقوق عايز اداب يدخل
    وساعتها ممكن نحاول نقضى على مفهوم كليات قمة ومش قمة

    يعنى هو الدكتور يعتبر قمة والمدرس قاع علشان خريج اداب او تربية

    مش دى برضة طبقية

    وساعتها كل حاجة هتتظبط لان اعداد الخريجين هتكون مناسبة لاحتياجات سوق العمل

    لكن بالشكل بتاعك ده يبقى هنزود المشكلة مش هنقللها لان اللى معاه فلوس وواسطة وما اكترهم هما دول اللى هيكملوا فى اماكن ما يستحقوش انهم يدخلوها

    واللى مش معاه ويستحق نحكم عليه بالفشل لية يعنى

    منطق غريب حضرتك

    اسمحلى مش موافقة عليه خالص

    تحياتى لك

    ReplyDelete
  21. يا ريت
    تفتكر هينفع؟
    سعتها بس هتنازل عن النضارة و هضطر اشترى واحدة
    :)
    يلا ورينا همتك

    ReplyDelete
  22. السلام عليكم ورحمة الله وبركاته

    ياريت يعملوا كده فعلا
    كنا استريحنا من الناس اللي بتتخرج باعداد مهوله سنويا وهما لا يفقهوا شئ في اللي درسوه والمصيبه انهم المفروض منهم اللي تخصصاتهم بتخليهم ممكن يتحكموا في ارواح الناس زي الدكاتره والصيادله
    والله باشوف عاهات ماتعرفش الاسبرين من الباراسيتامول وبيفتحوا صيدليات

    ربنا يعفينا


    تحياتي

    ReplyDelete
  23. ايهاب رضوان:
    يعني معقول المسؤلين في مصر مبسوطين من احوال التعليم؟
    دي تبقى مصيبة
    هي طبعا مصيبة....بس تبقى مصيبة اكتر
    تحياتي واحتراماتي

    ReplyDelete
  24. كاميليا:
    اصل الموضوع يا كاميليا لو اتعمل صح يبقى مافيهوش واسطة ولا يحزنون
    امتحانات عادية وكونترولات سرية والنتائج هي اللي هتتحكم في موضوع المجانية دي
    بس قبل كل دة
    تبقى الرغبة في الاصلاح هي الفيصل
    تحياتي

    ReplyDelete
  25. كنت شيكابالا:
    اولا الف سلامة يا فندم من معركة الجمعة اللي فاتت
    وقدر ولطف اتنين صفر ارحم بكتيييييير من ستة واحد
    عموما لا دي اول مرة شيكابالا يتغلب ولا هتبقى اخر مرة على الاطلاق
    وياريت المرة اللي جاية ان شاء الله تعلقي باسم
    اصبحت ابوتريكة
    عموما واضح ان الهزيمة المريرة ماخلتكيش تقري البوست كويس
    اقريه كويس وعلقي تاني
    تحياتي

    ReplyDelete
  26. انا حر:
    ماهو تطوير التعليم هو اساس اي حاجة ايجابية في البلد دي
    بس المقصود طبعا تطوير التعليم بجد مش تطوير التعليم بتاع ماما سوزان
    تحياتي

    ReplyDelete
  27. وجهة نظري:
    فكرتيني بموضوع
    احب اضيف انها كانت رقاصة وبترقص
    عموما
    فزلكة جميلة
    تحياتي

    ReplyDelete
  28. يا مراكبي:
    هي عقدة الباطو من الاساس
    او عقدة كليات القمة
    محدش متخيل ابنه الا لابس بالطو ابيض....محدش شايف ابنه محاسب ناجح او محامي شهير
    كله متقبل انه يكون طبيب حتى لو فاشل
    تحياتي

    ReplyDelete
  29. صوت من مصر:
    هيزيد ان شاء الله
    ماتقلقش
    تحياتي

    ReplyDelete
  30. انين الحزن:
    هنبطل نزرع كوسة
    هيزرعوا
    قرع
    واهو كله كوسة
    تحياتي

    ReplyDelete
  31. تصدق
    البوست ده
    مكيفنى اوى
    بجد بقالى كتير ماقريتش حاجة مظبوطة كدة
    بجد انت مرتب الافكار صح جدا

    تسلم ايدك يا احمد
    وبقولك ايه
    بما ان دماغك حلوة كدة وبتعرف تظبط الامور
    ماتيجى يوم السبت الجاى فى ساقية الصاوى
    علشان بجد عايزة اتكلم عن موضوع البوست بتاعى
    وشكلك كدة هتعرف تخطط ازاى نبتدى صح
    حاسة انى هستفيد منك كويس
    حاول تيجى لو مش وراك شغل
    سلام
    اختك خيخة

    ReplyDelete
  32. معلش عايزة اقولك ان البوست بتاعك ده
    عامل زى كوباية شاى مظبوطة اوى
    او فنجان قهوة معمول بروقان ومتظبط
    بجد مش عارفة اقولك البوست ده عملى حالة نشوة غريبة
    بجد برافوا عليك

    ReplyDelete
  33. بما أن القاعدة العريضة من الشعب المصري أما من الطبقة الوسطى أو من الفقراء، ففكرة إلغاء المجانية موجهة لهم في الأساس، وهذا يعني حرمان من يستحق إن لم يكن من العباقرة، في مقابل السماح لشخص آخر حتى لو كان غبيا أو غير قادر على الإفادة من التعليم الجامعي لمجرد أنه يملك المال

    تعليم المتفوقين أو المتميزين فقط لن يحل المشكلة في ظل تأخر مصر اقتصاديا وعلميا فنحن في حاجة أيضا لغير المتميزين

    إلغاء المجانية يؤدي إلى اقتصار بعض الوظائف على الأثرياء كالهندسة والطب مثلا، هؤلاء الأثرياء سيكونون أغلبية المتعلمين طبعا إلا إذا كنت سوف تقوم بتحديد نسبتهم في الطلاب، وتحديد النسب هذا سيكون على أي أساس؟ ماذا لو كانت أعداد المتقدمين أكثر من المطلوب ؟ هل سيكون هناك امتحانا لهم؟ وهل سيختلف امتحان القادرين عن امتحان غير القادرين؟

    هناك إخلال واضح بمبدأ تساوي الفرص فلا يجب أن يكون معيار الاحتكام هو القدرة المالية، لأن هذا سيؤدي لوجود طبقية في التعليم (يعني إحنا ناقصين)

    بدلا من ذلك يكون الحل في وجهة نظري هو: أولا تغيير وجهة نظر الناس نحو التعليم الفني فلأسباب عديدة ينظر إليه على أنه تعليم (للفاشلين)
    ثانيا: تغيير أسلوب التعليم الأساسي وتطيره بلا من أن يعتمد على الحفظ والتلقين، وعندها سيكون الحاصلين على المجمع الأعلى هم المتفوقون بالفعل

    تحياتي

    ReplyDelete
  34. على فكرة أنا يوما ما قلت نفس رأيك ده عن مجانية التعليم
    وكان التعليق اللي اتقال على كلامي
    التالي:
    يا عم أنت عشان ربنا كرمك وعديت مع اللي عدوا وخلصت دراستك ...المجانية
    واتخرجت من الجامعة واشتغلت هتقعد تتكلم الكلام ده؟
    ده الكلام اللي اتقال لي
    ومردتش عشان ميتقالش عليا رأسمالي و برجوازي ومصطلحات المثقفين المكعبرة دي
    ولكني أتفق معك في إن كثرة خريجي الجامعات وهم مع الأسف أغلبهم أنصاف متعلمين هو ما قلل من قيمة خريج الجامعة عن زماااان
    وزمان دي أقصد بيها ما قبل 1952

    خالص تحياتي

    ReplyDelete
  35. bosbos:
    واسطة ايه بس يا بس بس؟
    دة بالمجموع
    لو مكتب التنسيق بتاع الحكومة حاليا فيه واسطة هيبقى اللي جاي فيه واسطة برضه
    علشان انتي متوقعة اني اهاجم مجانية التعليم وخلاص...انتي بتقولي كدة
    انما انا في الحقيقة بهاجم تعامل الناس مع مجانية التعليم دي
    تحياتي واحتراماتي

    ReplyDelete
  36. rania:
    اسكتــــــــــــــــــــــــي
    مش انا قررت اقلع نضاراتي كلها
    معنتش هلبس نضارات شمس يا رانيا
    وانتي السبب
    تحياتي

    ReplyDelete
  37. الله ينور عليك
    مفيش غير كده ممكن يتقال يا أبو حميد
    تحياتي

    ReplyDelete
  38. خمسة فضفضة:
    انتي هتقوليلي يا دكتورة؟
    ما احنا في الهم سوا
    دة الصيدليات دي بيزينس كبير جدا
    وواضح كدة ان الصيدلة دي مولد وصاحبه غايب
    اسكتي يا شيخة....دة انا كاتم في قلبي وساكت
    تحياتي

    ReplyDelete
  39. ينت خيخة واي كلام:
    يا نوران هانم الف شكر ع الكلام الجامد دة
    انا اتنفخت جامد وهفرقع من الغرور
    بالنسبة للساقية
    تصدقي بالله انا نفسي
    نفسي اروح ساقية الصاوي واقابل الناس المثقفة دي واتعامل
    بس منهم لله اتنين منعني من الموضوع دة:
    اولا الوقت خاصة اني مش من القاهرة انا من الشرقية
    ثانيا القطاع الخاص اللي ما بيرحمش وبيستنزفك حتى وانتي نايمة
    عارفة لو الموضوع دة يوم الخميس كنت والله جيت
    ياريت لو في فرصة تانية وتكون يوم خميس تبلغيني
    تحياتي واحتراماتي

    ReplyDelete
  40. كريم عاطف:
    يا كريم بيه
    الفكرة دى الهدف منها توظيف الكوادر البشرية لمجالات الحياة المختلفة
    حتى لا نتحول لشعب من لابسي البالطو الابيض
    انما هي لا موجهة ضد الطبقتين الوسطى والدنيا ولا حاجة
    المتفوق منهم هياخد حقه بعرقه وتعبه ومجهوده
    انما من لا يستحق منهم او من غيرهم يتم توظيفه بما يتناسب مع قدراته
    تحياتي واحتراماتي

    ReplyDelete
  41. ياسر حسين:
    الواحد يا فنان لو خاف وعمل اعتبار لاراء الناس مش هيفكر او يكتب اي حاجة
    هيتحول الى بني ادم صامت
    تحياتي

    ReplyDelete
  42. micheal:
    الف شكر يا مايكل
    تعيش وترفع معنوياتي يا باشا
    تحياتي واحتراماتي

    ReplyDelete
  43. هييييييييييييييه واحد صاحي زيي
    والله أنا بقالي كتير اقول الغوامجانية التعليم
    خلوا بس للتعليم الالزامي يعني لحد 3اعدادي والباقي لازم يدفع و الفلوس بتروح لمشروعات يشتغل فيها الشباب اللي ناوي يتعلم فيشتغل ويصرف على تعليمه
    حد سمع
    والطلاب المتفوقيق نعمل لهم منحه
    لا حياة لمن تنادي

    ReplyDelete
  44. فكرتتك جميلة بس صعبة التطبيق
    انا عن نفسى جربت سنة فى جامعة عين شمس و جالى انهيار عصبى

    دلوقتى انا فى جامعة خاصة نضيفة و مرتاحة جدا
    دخلت جامعة خاصة رغم ان احنا ماديا عاديين جداااا

    بس طبعا حسيت بفرق كبير جدا

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails