Sunday, 9 March 2008

لوغاريتمات مرورية مصرية


راكب عربيتي لا بيا ولا عليا...ورايح شغلي وكافي خيري شري...بسمع اعلانات نجوم اف ام اللي اصبحت اعلانات يتخللها شوية اغاني على خفيف
اليوم هو السبت...ولما نقول السبت..يبقى نقول اول الأسبوع....يبقى نقول اكتئاب...يبقى نقول على طول خنقة...يبقى نقول يا فتاح يا عليم يا رزاق يا كريم...اكفنا شر المستخبي ياااااااااا رب
يطلع لي من تحت الأرض عسكري مرور...وشه مألوف..اغلب الظن انه كان بيشتغل مزارع قبل ما يلتحق بالمرور او ربما لسة بيشتغل مزارع لحد دلوقتي بالأضافة لكونه عسكري مرور
شاور لي اني اقف بالعربية....انا وقفت...وانا هخاف من ايه؟ انا ورقي كله سليم...انا راجل مية مية...عارف كويس قوي ان الانسان اصله ورقة وبالتالي علشان تعيش في البلد دي محترم....يبقى لازم تكون مضبط ورقك وكله عشرة على عشرة
المهم..الراجل بريفيته اللذيذة قال لي: الرخص يا باااااشاااا
طلعت له الرخص...عادي
قال لي: بص يا باشا....انت النمر الأودمانية (الأمامية يعني) بتاعتك حالتها بالبلا (مذرية) يعني...وانا مضطر اعمل لك مخالفة لوح امامية
يا نهااااار اسود
دة اختراع جديد دة بقى ولا ايه....يعني خلاص
عربياتك يا مصر كاملة المعاني قوي ومفيش غير لوحي الأمامية اللي عاملة مشاكل ومبوظة المرور
مفيش حد لوحاته سودا ولا حد طامس رقم من ارقام اللوحة ولا حد فيكي يا مصر مركب نسر وحاجب رقمين من ارقام اللوحة ولا حد كاتب ارقام العربية بخط مايتقريش بالميكروسكوب حتى؟
كله بقى تمام ومفيش غير لوح عربيتي اللي بايظة؟
مسكت اعصابي على قد ما اقدر...وقلت له:
تصدق بالله....انا مستلم اللوحات دي من المرور بشكلها دة....يعني انتم مسلمنها لي كدة...طب اعمل ايه؟
قال لي: ماليش دعوة يا استاذ والله ياريت حضرتك تركن على جنب الأول
طبعا ركنت على جنب....ماهي رخصي معاه
نزلت له وقلت له فين الضابط؟قاللي هناك اهه
بيني وبينكم مارضيتش اروح للضابط..قلت ماهو يمكن الليلة دي تخلص مع الراجل دة ويبقى يادار مادخلك شر...ويا بخت من نفع واستنفع برضة
لقيتني بحط ايدي في جيبي علشان اطلع المحفظة واخلص الليلة دي ببريزة كبيرة ولا حاجة
بس مش عارف ليه قلبي ما طاوعنيش....حسيت اني هزعل من نفسي قوي لو عملت كدة
قلت له: يا عم انا مستلمها كدة...انا ذنبي ايه انها حالتها بالبلاء ولا ملكة جمال؟
تخيلوا يرد عليا يقول لي ايه؟
يا باشا ماهما مسلمينها لك كدة علشان احنا بقى نحرر لك مخالفات عليها...ماهم لو سلمها لك سليمة مش هنعرف نعمل مخالفة انما كدة هنعمل لك مخالفة لانها مش سليمة
يا سلاااااااااااااااااااااااااااااااااااااام....دي ساعتها تبقى مش شرطة..دة يبقى ليها اسم تاني خاااااااااالص
المهم انا حاطط ايدي في المحفظة والشيطان بيقول لي خلص بقى وادفع وافدي رخصك...وقلبي بيقول لي لا يا بوحميد...مش انت اللي تعمل كدة...والراجل حاطط ايده على دفتر المخالفات وعايز يحرر المخالفة
اعتقد ان الحل واحد من اتنين:
يا اما 10 جنيه تطلع وتستقر امنة مطمئنة جوة دفتر المخالفات وبالتالي الرخص بتاعتي تستقر نائمة هادئة في محفظتي
يا اما نمشيها رسمي بقى ونروح للضابط اللي طبعا لا هاخد معاه لا حق ولا باطل والرخص هتستقر في ادارة المرور حتى اشعار اخر والى اجل غير مسمى
اللي حصل بقى لا كدة ولا كدة
اللي حصل ان العسكري راح مديني الرخص وقال لي اتفضل رخصك يا باشا...انت طلعت جدع وانا هستجدع معاك
اه والله....دة اللي حصل
طب ليه؟ وعلشان ايه؟ وانا ماستجدعتش ولا نيلة؟طب وقفني ليه اصلا؟طب رجع لي الرخص ليه اساسا...طب الراجل الضابط دة واقف قرطاس جوافة كدة ولا ايه؟
طب هو دة كان اختبار امانة للمواطن ولا ايه؟
بيشوفني هطلع رشوة ولا لا؟ وبما اني ماطلعتش رشوة يبقى انا نجحت في الامتحان؟
من لديه تفسير يتصل على
0900
نتعلم من كدة ايه يا اولاااااااااد:
اولا: ان مهما تكون اوراقك سليمة ومضبط امورك...الداخلية قادرة على تلبيسك مصيبة من حيث لا تدري
ثانيا: وانت بتستلم اي لوح معدنية خاصة بعربيتك اعرف ان دة كمين محطوط لك...والاسلم ليك انك اوعى تروح المرور من غير واسطة...هتتبهدل اخر بهدلة
ثالثا ودة الاهم: حذاري من يوم السبت...لو عرفت تاخد السبت من كل اسبوع اجازة تبقى الحاجة دعيالك
ومبروك الرخص وعودتها سالمة غانمة
ملحووووظة:
طبعا الصورة اللي في الموضوع دة مالهاش علاقة خاااالص بالعسكري اللذيذ بطل القصة
طبعا بطل القصة اشيك بكتييير وملابسه مهندمة جداااااااااا دة غير انه ماكانش حاطط مسدس اصلا لأننا بلد الأمن والأمان
عماااااااااااااااااااااااااااااااااااااااااااااااااااااااااااااااااار يا مــــــــــــــــــــــــــــــــصــــــــــــــــــــــــــــــــــــــر




51 comments:

  1. انا مش بعلق عندك
    علشان كل ما اجى هنا
    اقعد اتفرج على الصور وانسى انا كنت بقرا ايه
    بس كدة
    ومعنديش تعليق على البوست
    غير التعليق اللى بقى مستهلك عندى على اى حد يتكلم عن مصر
    مشربتش من نيلها
    طب جربت تغنيلها
    ولا ليك رخصة عند الشرطة ومستنى مخالفة عليها

    تحياتى ليك
    سلام
    اختك خيخة

    ReplyDelete
  2. حلو الموقف ده ونكته

    بس هو بجد قالك كده علي بلاطة ماهو احنا لو ادينهالك سليمة نحررلك رخص ازاي ؟؟ ولا انت فهمتها من كلامه

    أصل لو قال كده بالمفتشر زي ما بيقولوا يبقي عبط وتخلف وكويس أنك ساعتها مسكت نفسك ..

    بس الحمد لله الليلة عديت علي خير وأهم حاجة أن البريزة رجعت الي قواعدها سلام وأمان
    ..

    سلام
    .

    ReplyDelete
  3. ده صدق أو لا تصدق
    علي مواقف و طرائف
    ربنا معانا و يعيينا في البلد دي
    تحياتي

    ReplyDelete
  4. دي حاجة معروفة إن لوحات أرقام السيارة لو مطموسة تبقي مخالفة، فمش معني انهم مكسلين يدوا مخالفات تبقي صح.

    الحاجة التانية ان طبعا رد العسكري أهبل، ما كلهم يدوبك بيفكوا الخط عايزة يرد يقلك اية؟؟ :)

    تصرفة الأخير يحتمل معاني كتيرة، منة يأسوا من البلد اللي بيعاني منها فقالك خليها تولع، أو انك صعبت علية وقالك هوا حيلاقيها منين والا منين، أو انوا فعلا استجدعك لما مطلعطش رشوة، ماهوا في مواطنين كتير أوي متقبلش الرشوة

    تحضرني قصة من عدة سنوات، رحت أعمل جواز سفر، لقيت واحد محترم خد الورق مني باحترام وختموا بسرعة وبقي اني أعدي علية بعد الضهر علشان أستلم الجواز، المهم استلمت وكل حاجة تمام، صعب عليا الراجل المحترم اللي شايف شغلة بنضافة وأنا عارف مرتبة ممكن يبقي كام، قمت مطلع 20 جنية وحطيتهم بين الورق قدامة.... لقيتة اتنفض وعملي فضيحة كأني اديتة رشوة علشان حاجة غلط، مع اني استلمت الجواز خلاص، وقالي انت فاكرني اية؟؟ شيل فلوسك دي أنا مش محتاج، أنا موظف واللة الغني. دة بيورينا ان في ناس كتير أخلاقها كويسة بس مختفين قدام طوفان الفساد. علي فكرة العسكري اللي علي باب القسم جري ورايا وقالي يا عم سيبك منة دا حنبلي، لو مش عاوز ياخدهم اديهملي أنا :)

    ReplyDelete
  5. خليك كدة .. كل مرة تحكى واقعد اغلطك

    طبعا غلطان وستين غلطان كمان .. ايه اللى ينزلك يوم السبت؟؟
    وايه اللى يخليك تركب عربية من اساسه اومال هما اخترعوا التكاتك ليه بس؟؟؟

    وايه اللى يعيشك فى مصر من اصله؟؟ اومال باقى الدول محطوطة ع الخريطة للزينة مثلا؟؟ .. ماهى محطوطة عشان نهرب من مصر نروح عليهم

    مواطنين آخر زمن صحيح

    واقعد بالعافية .. فى مصر
    :D

    ReplyDelete
  6. شيكابالا9 March 2008 at 13:48

    برافو اولا انك مطلعتش البريزة الكبيرة لان الراشى والمرتشى كلاهما ف النار بس الواد استزوق معاك لانة متعود الناس الشيك بيبقو عايشين الدور وغلسين واتمين فانبسط منك لان راجل طيب ومتواضع مش كدة برضة ولا اية؟ وارجع واقولك بيع العربية دى اللى تعباك مرة حدكسر عليك والتانية واحد قفل عليك وختمت بالمرور كفاية حرام

    ReplyDelete
  7. ههههههههههههههههههه
    حرام عليك بجد هموت من الضحك على كلامك ده
    وبرضة أنا مع شيكابالا وبقول لك بيع العربية وريح نفسك منها
    ههههههههههههههههههههه
    مش معقول بجد ده
    بس أيه الموضوع النكته ده والله ضحكنى موووت

    تحياتى

    ReplyDelete
  8. بص يا سيدي ... هلا هلا عالجد .. والجد يالا يالا عليه
    :P
    المهم ان اللي انت حكيته ده قصة حياتي وخصوصا ان انا بتعلم السواقه يعني
    لقاء العمالقه
    بيني وبينهم
    اما عن الرخص .. فطبعا انا كنت متوقع انك هتطلع العشره جنيه المحترمه
    وتحطها في ايده وتقوله طب " نشرب شاي مع بعض " ودي حاجه كده زي " خالتي بتسلم عليكي" كلمة سر..سين يعني بين الراشي والمرتشي
    :D
    بس برافو عليك طلعت جدع
    والله كبرت في نظري اوي
    تحيا مصر يا عم

    ReplyDelete
  9. طيب عاوزةاقولك على حاجة
    امبارح بالذات شفت عربيتين ماشيين في الشارع من غير لوحات معدنية أصلا ...و الله
    المهم
    بلدنا أمن و أمان و كله تمام ...و بطل كلام المظاهرات ده يا مواطن
    دول قلة قليلة مندسة و سط الشعب

    هههههههههه

    مبروك رجوع الرخصة سالمة مطمئنة لجيب سيادتك

    تحياتي

    ReplyDelete
  10. بنت خيخة واي كلام:
    طب اعمل ايه بس في الصور؟
    اقطع نقسي.....ابعزق نفسي
    اما بقى بخصوص مشربتش من نيلها
    من كتر الاغنية دي مابقت مستهلكة فقدت معناها وبقت فعلا نكتة
    تحياتي

    ReplyDelete
  11. قليل من التفكير:
    ماهو لو ماكنش قاللي كدة صراحة وعلى بلاطة كان الموقف فقد قيمته
    المصيبة انه قاللي كدة فعلا
    بس طبعا مسكت نفسي لان الراجل دة غلبان بيمثل الحلقة الاضعف في منظومة الشرطة المصرية
    تحياتي واحتراماتي

    ReplyDelete
  12. micheal:
    ماهي مصر ام الدنيا يا عم مايكل
    وقديما قالوا الهند ام العجائب بس دة كان زماااااااان
    مصر اخدت اللقب خلاااااااص
    تحياتي

    ReplyDelete
  13. مش ملاحظ انهم باو مستقصدينك شوية

    مرة نصاب

    ومرة عسكرى مرور يوقفك

    انت ايه الحكاية بالظبط :)) اعترف فى المدونة بدل ما تعترف فى برنامج خلف الأسوار ولا دموع الندم :))

    مش عارف نفسى أصدق انه اختبار للمواطن ان كان هايدفع رشوة ولا لا .. والله لو بيعملوا كده البلد كلها تتحبس

    ما عدا انت يا باشا

    ReplyDelete
  14. هههههههههه

    يا ابنى ما عندش تنزل من بيتك يوم السبت وخلاص ..

    وبعدين خد بالك الحكومه شكلها سابت مصر كلها ومستنى ليك على غلطه .. مرة صور فى خلف الأسوار .. ومرة شرطه المخالفات ..

    أبعد الأيام دى خالص عن العبارات والقطارات والطيران اوى تروح عنده ..

    واتقى شرهم وابعد عنهم أحسنلك :)

    سمير

    أولا مدونه قمه فى الروعه بجد .. نظام .. مواضيع .. طرق عرض .. كلها بجد جميله لأول مرة بدخلها النهاردة ..

    واسمحلى هاضيف رابطها لدى مدونتى ..

    فى انتظار قضيتك القادمه ..:)

    ههههه

    ReplyDelete
  15. فعلا عمار يا مصر
    انا من رأيي انك تبيع العربية علشان تعدي كل يوم على نفس عسكري المرور وتطلع له لسانك وتقوله مش هتعرف تعملي مخالفة
    تحياتي

    ReplyDelete
  16. وجهة نظري:
    يا فندم مانا عارف والله
    وانا موتي وسمي حكاية اللوحات المطموسة دي
    انما انا لوحي مش مطموسة..انا لوحي مبهدلة ومعووجة والمصيبة انها منهم...هم استلموها من اللي قبلي كدة وسلموها لي كدة
    انا بقى ذنبي ايه؟
    ياريت يكون العسكري استجدعني علشان مادتلوش رشوة وان كنت اشك في ذلك
    اهو العسكري اللي على باب القسم دة بيثبت ان المصري هيفضل مصري النيل رواه والخير جوااااه
    تحياتي

    ReplyDelete
  17. انسانة:
    اللي نزلني يوم السبت يا ياسمين هانم هي لقمة العيش
    مانا لو بايدي انا اخد اجازة من السبت للسبت انما وريني المم وانا امشي وراه
    اما بقى بالنسبة لمصر
    فمصر فعلا عاملة زي الادمان...تلعنيها كل يوم بس للاسف ماتقدريش تستغني عنها
    مشربتيش من نيلها ولا ايه؟
    تحياتي

    ReplyDelete
  18. ماشاء الله مدونه جميله

    اتابعها باستمرار ان شاء الله

    والحمد لله انك نجحت فى الامتحان

    ReplyDelete
  19. شيكابالا:
    مانتي عارفة يا فندم ان انا التواضع والتواضع انا
    هو اكيد مش استزوقني ولا حاجة دة اكيد وقع في حبي..مانتي عارفة اني باخد القلب على طول
    وابيع العربية ليه؟
    انا وراهم والزمن طويل لحد ما المرور يتضبط في البلد دي
    تحياااااتي

    ReplyDelete
  20. bos bos:
    هنعمل ايه يا بس بس ما احنا في مصر
    وانتي طبعا عارفة
    ان كم ذا بمصر من مضحكات ولكنه ضحك كالبكاء
    تحياتي واحتراماتي

    ReplyDelete
  21. اجمل حاجه انك ما فبلتش اللمساومه ولا قبلت تتنازل

    يجد احيكى من كل قلبى

    ReplyDelete
  22. 3ala ra2y elsha3er : Konna 7anro7 f dahya laken rabenaaaaaaaa sattar :)

    Begad ya Ahmad ,,heya 7araka gari2a mennak bardo, ana law makanak kont 7adfa3 we 7'alas, mesh 7'of bas le2enny asb7at abbarrar elrashwa 3ala ennaha ...mosa3da...ana 3arfa enn el3askry dah 3'alban we fa2ir we mesh la2y yakol we yemken elzabet bey2sem ma3ah el7asila elly betetla3 a7'er kol youm....bas yemken mesh zanboh...tab we howa ye3ml eh ...howa 3aref enn elly saye2 car ma3ah flos...we 10 geneh belnesba lena mesh mabla3'..laken yemken tekfih youmin yeshteri biha akl...

    Wallahy 7aga tel7'bat...we rabena elhamdulelah Satar :)

    Ebgaaaaaaa e2ra do3a2 elrokob kol youm.

    Salam ya Ahmad.
    Sahrana

    ReplyDelete
  23. 3ala ra2y elsha3er : Konna 7anro7 f dahya laken rabenaaaaaaaa sattar :)

    Begad ya Ahmad ,,heya 7araka gari2a mennak bardo, ana law makanak kont 7adfa3 we 7'alas, mesh 7'of bas le2enny asb7at abbarrar elrashwa 3ala ennaha ...mosa3da...ana 3arfa enn el3askry dah 3'alban we fa2ir we mesh la2y yakol we yemken elzabet bey2sem ma3ah el7asila elly betetla3 a7'er kol youm, maho elzabet dah kaman 3'alban lamma yekon bey7'od loh 1000 LE f elshar yeb2a akid 3'alban...bas yemken bardo mesh zanboh...tab we howa ye3ml eh? ...el3askry 3aref enn elly saye2 car ma3ah flos...we 10 geneh belnesba lena mesh mabla3'..laken yemken tekfih youmin yeshteri biha akl...

    Wallahy 7aga tel7'bat... rabena Satar :)

    Ebgaaaaaaa e2ra do3a2 elrokob kol youm.

    Salam ya Ahmad.
    Sahrana

    ReplyDelete
  24. انت لسه معرفتش الحقيقة العارية غير دلوقت

    عوما صل خير
    و يا سيدى متزعلش خيرها فى غيرها

    :)
    بس يا ابو حميد
    هو صحيح الانسان كان فى الاصل ورقة
    طيب دلوقت انا مش مهزة ورق و لا مظبطة ورق
    يبقى ايه نظامى فى البلد دى دلوقت؟
    :((

    ReplyDelete
  25. zika:
    انا كنت عايز اقوله
    ماتيجي نشرب شاي بالياسمين
    بس ربنا ستر
    تحياتي

    ReplyDelete
  26. الحلم العربي:
    يا خبر ابيض
    انتي لسة امبارح بس واخدة بالك؟
    لو ركزتي مع موضوع العربيات واللوح بتاعتها هتكتشفي مهزلة كبيرة جداااا
    بس من الواضح ان الكل شاري دماغه
    الحمد لله عودة الرخص وان كانت عودة مش مضمونة على الاطلااااق
    تحياتي

    ReplyDelete
  27. أنت
    يا سارق ياء النداء من حروفي
    لماذا أنت مرتبك ؟
    نعم أعنيك أنت
    ادعوك للإنضمام للفكرة
    فانت وحدك .. ذلك الذي لم يأت
    هذا طريق لم يكن يعرفه احد
    و لا يعرف احد
    طريق لم تعرفه اقدام المارة
    و لم تدنسه من قبل عجلات سيارة فارهة وقودها من عرقك و دمي
    تعالي معنا و املأ الدنيا بالضجيج
    نظرة على اسرار اون لاين لن تضيرك
    و مشاركتك تأكد انها مصدر سعادة لنا
    http://asraronline.com/vb/

    ReplyDelete
  28. يا سيدى ربنا ستر المرة دى و عدت على خير
    بس الحقيقة إن المواطن دلوقتى بيخرج من باب البيت و هو بيدعى إنو يرجعه تانى بسلام
    اى مشوار تروحه
    أى خطوة تخطيها عبارة عن قنبلة موقوتة
    فى أى لحظة أى حد مممكن يحصله أى حاجة فى أى وقت ...
    فيما عدا قلة قليلة كلنا طبعا هارشينهم
    و على رأى خيخة حبيبتى سمعونا سلام
    مشربتش من نيلها...
    تحياتى و حرص بقى و انت ماشى محدش ضامن حاجة

    ReplyDelete
  29. احمد باشا
    احلي حاجه ان الــ 10ج استقرت في الحفظه هاتها ليا اجيب كارت شحن

    بمناسبه يوم البست بقه انا اجااااااااااازة ياباشا
    ورسيمي كمان

    سلاموووووووووز علشان الحسد بقه
    وزة

    ReplyDelete
  30. monzer:
    والله انا كنت ناوي ادفع عادي يعني
    مانت عارف انه سلو بلدنا
    انما القدر بقى هو اللي انقذني
    واضح فعلا انهم مستقصدني
    تحياتي واحتراماتي

    ReplyDelete
  31. ضي القمر:
    انا ناوي الفترة اللي جاية دي ان شاء الله امشي جوة الحيط مش جنب الحيط
    بس عايز اقوللك حاجة
    في مصر بلدنا...اللي عايز يتلكك لك على غلطة هيعملها حتى لو انت نايم في سريرك في بيتك
    على فكرة
    الف شكر ليكي على كلامك الجميل دة عن مدونتي المتواضعة
    دة شرف ليا لما تحطي لينك لمدونتي عندك
    الف الف شكر
    تحياتي

    ReplyDelete
  32. انا حر:
    هيعملي مخالفة تطليع لسان
    وهيخليها فعل فاضح في الطريق العام
    انت باين عليك مش عارفهم
    اسألني انا
    تحياتي

    ReplyDelete
  33. حسام يحيي:
    الف شكر على كلامك الجميل
    تنور باستمرار
    تحيااااتي

    ReplyDelete
  34. semsem:
    مش هأدعي البطولة واقوللك لا للرشوة لا للأبتزاز والكلام الكبير دة
    بكل امانة
    لو كان طلب صراحة كنت هادفع
    تحياتي

    ReplyDelete
  35. من غير ما اتصل على 0900 و لا حاجة الامور دى بقت عادى جدا

    و الحمد لله انا معنديش عربية :))

    ReplyDelete
  36. تلاقى ده هزار بايخ يعنى معقول من غيرحاجة كده يمشيك؟
    خد بالك بقى بعد كده واتاكد من وجود الطفاية واوعى تدوس على الخط الابيض

    ReplyDelete
  37. الله ينور يا عم احمد

    اولا سعيد بمرورك ويا ريت تنورنا دايما

    ثانيا
    القصه دي في كل مكان
    بس الصراحه
    الواحد مش كان متخيل انها تخلص النهايه دي اطلاقا
    انت ربنا كرمك قوي


    ربنا يحل عقدة مصر
    ويفكها علينا

    مدونة جميله

    ReplyDelete
  38. sahrana:
    انا والله كنت هدفع بس خوفت يعمل لي فيها عم الشريف وحياة الجوهري وكدة
    واعتقد انه لو كان استنى دقيقة بس كانت ال 10 جنيه هتستقر في جيبه
    لو في دعاء ضد رجال المرور ولجانهم وراداراتهم انا اقوله 10 مرات يوميا
    الف شكر ليكي يا سهرانة
    تحياتي

    ReplyDelete
  39. rania:
    لو ورقك مش متضبط
    نصيحة غالية
    كني اليومين دول واختفي تماما لحد ورقك ما يبقى سليم
    سلومة الاقرع مايعرفش صاحبه
    تحياتي يا رانيا

    ReplyDelete
  40. امين سر:
    وعد بالزيارة والحضور ان شاء الله
    تحياتي

    ReplyDelete
  41. fatima:
    على رأي المثل بتاعي انا بقى
    اللي خايف يروح
    وانا قررت اروح بيتنا واقيم فيه حرصا على سلامتي انا وعربيتي وحقنا للدماء
    نورتيني
    تحياتي

    ReplyDelete
  42. انين الحزن:
    يا ساتر عليكي يا وزة
    طالعة واكلة نازلة واكلة
    وبعدين كارت شحن ايه اللي ب 10 جنيه
    وانتي ينفع معاكي الفئات الضعيفة دي؟
    دة انتي تخلصيهم في مكالمة واحدة
    شكلك كدة رغاية مووووت
    وبعدين فرحانة قوي بالسبت بتاعك دة
    زي ماتكوني جبتي الديب من ديله
    طب مانا عندي الخميس اجازة
    سلام يا وزة
    مع تحياتي
    احمد احمد احمد احمد احمد

    ReplyDelete
  43. عاليا حليم:
    ياااااااااااااااااا بختك
    شارية دماغك انتي
    تحياااتي

    ReplyDelete
  44. monaliza:
    وحتى لو الطفاية موجودة والخط الابيض متضبط
    هيطلعوا اي حاجة والسلام
    بصي...طالما قرروا يسحبوا رخصتك...هيسحبوا رخصتك
    تحياااتي

    ReplyDelete
  45. http://pencil-eraser.blogspot.com/2008/03/2.html

    ReplyDelete
  46. السلام عليكمورحمةالله وبركاته

    هههههههههههههههه
    من ساعة ما قريت البوست وانا مش قادره امسك نفسي من الضحك
    ههههههههههههههههههههه
    مش عارفه والله اقولك ايه ؟؟
    ايه رايك نقدم طلب يلغو يوم السبت

    :-)

    ReplyDelete
  47. دكتور حر:
    ربنا قادر على كل شيء
    نورتني وياريت ما تكونش اخر مرة تشرفني فيها
    تحياتي

    ReplyDelete
  48. queen eraser:
    انتظريني صديق دائم للمدونة ان شاء الله
    تحياتي

    ReplyDelete
  49. خمسة فضفضة:
    ماهو اللي ايده في المية مش زي اللي ايده في النار
    ربنا يسعدك
    تحياتي

    ReplyDelete
  50. أحييك على هذا الموضوع وعلى مدونتك عامة ، ليتك تتكرم علىّ بزيارة مدونتى وإخبارى بكيفية إضافتك للموسيقى المصاحبة هذه ؟

    ReplyDelete
  51. ايهاب رضوان:
    نورتني....ويشرفني زيارتي لك في مدونتك
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails