Monday, 3 March 2008

مصر التي في خاطري


احزاب على كل لون...دة ليبرالي ودة قومي ودة بقى اشتراكي ودة حزب عمالي اما دة بقى فحزب اسلامي ودة كمان حزب ديني بس حزب مسيحي
صحف جديدة بتصدر كل يوم دي ليها توجه رأسمالي ودي جريدة عمالية ويا سلاااااام على الجرايد الليبرالية وخد دي بقى جريدة جديدة اشتراكية
اما اللي هناك دي فدي بقى جريدة الاخوان المسلمين والتانية اللي جنبها دي جريدة اسمها الشباب المسيحي
الشهر اللي جاي انتخابات البرلمان....كل الاحزاب بتتنافس محدش عارف مين اللي هيكسب الانتخابات...احتمال محدش ياخد الاغلبية المطلقة وتتشكل حكومة ائتلافية......استطلاعات الرأي مش مرجحة فوز حزب بعينه والمناظرات التليفزيونية على اشدها
الأرض اللي هناك دي الفاضية دي كانت زمااان معتقل من المعتقلات اللي اتهدت وهيتبني مكانها مصنع كبيــــــــر قوي
هيستوعب الاف من الشباب العاطل
مفيش حاجة اسمها امن مركزي ولا امن دولة خالص استبدلناها بقوات مكافحة الشغب ودي عددها محدود جدا ولو لا قدر الله الامر تطلب قوات اكبر فقوات الجيش موجودة بتؤدي مهمتها وترجع لثكناتها فورا
اما امن الدولة فاستبدلناه بالامن السياسي ودة بيشتغل في نطاق المؤامرات الكبرى اللي بتستهدف امن مصر الوطن مش مصر الحكومة
انشاء المحطات الفضائية والاذاعية متاح لجميع الناس مفيش فيها خيار وفاقوس واي حد من حقه يقول او يعرض في قناته او اذاعته اي حاجة هو عايزها
لاني زي ما اديت الفرصة لليبرالي اديتها كمان للاخوان المسلمين والمسيحيين والقنوات الراسمالية والقنوات العمالية وقنوات الاهلي والزمالك وهلم جر
مصر معندهاش تفرقة بين مواطن والتاني على اساس الانتماء السياسي او الدين او اي حاجة
بس بشرط
اوعى تجرح في اللي بيختلف معاك
هنا خط احمر وميثاق شرف ممنوع اي حد يتخطاه
زي مااخدت حريتك...احترم كمان حريتي
*********************************************
دي كانت جزء بسيط جدا من مصر اللي نفسي فيها
مصر التي في خاطري
معقول في حد مش نفسه مصر تبقى كدة؟
احنا ازاي مش كدة
في اي منطق بيبرر ان دة مايبقاش موجود في بلده؟
احنا مانستحقش كدة؟
هل احنا مخلوقات اقل من شعوب تانية كتير عايشة في كل اللي انا كاتبه ؟
ليه مستكترين علينا اننا نكون اصحاب قرارنا
مصر مش بتاعت حد
مصر محدش اخد توكيلها
مصر ملكية عامة
مصر دي بتاعتنا كلنا

40 comments:

  1. هيييييييييييييييييييييييييييي
    أنا أول كومنت
    كلامك جميل و الله لكني متحفظ و معترض علي الحزب الاسلامي و الحزب المسيحي
    تحياتي

    ReplyDelete
  2. المحطات الفضائية والاذاعية متاح لجميع الناس مفيش فيها خيار وفاقوس واي حد من حقه يقول او يعرض في قناته او اذاعته اي حاجة هو عايزها

    -*-*-*-

    دي مصر اللي انت عايزها

    عايزها تقول مفيش فرق بين مسلم واي شخص تاني اي كانت عقيدته

    يعني كل واحد يفتح لنفسه قناه وينشر اللي في فكره سواء غلط او صح مش مهم بس دي الحريه

    بس الحريه اللي في الجريدة اللي نشرت صورتك

    اسفه انا اختلف معاك يا سيدي الفاضل
    دا اللي استنجته من كلماتك و موضوعك

    لازم الصح والاساس والحق مكيونشي في اختلاف ..

    الاختلاف في الراي لا يفسد للود قضيه

    فتقبل احترامي وتقديري

    ReplyDelete
  3. مصر التى في خاطرك = حرية
    لكن هل نحن شعوب تستطيع التعامل مع الحرية ؟
    مش عايزة اكون ضد الأمل ....لكن انظر لأقل قطاع حكومي و شوف الناس بتعامل مديريها ازاي علشان تعرف ان لسة فينا ناس بتحب ماتكونش حرة
    انظر لنفاق الشعب للحكومة اللى مجوعاه
    هتعرف ان لسةشوية علينا
    لكن أكيد بردو فيه أمل

    أحييك
    ويا ريت مصر التى في خاطرك تبقى في الواقع قريب

    ReplyDelete
  4. انا بقا متفق معاك تماما تماما تماما
    لكن قبل كل ده
    لازم نتعلم معنى الحرية والديموقراطية وازاي نحترمها وامتى نطبقهم

    بس خلاص
    محمد سمير

    ReplyDelete
  5. أنا كنت حبداء التعليق بطريقة تانية بس بصراحة استفزتني التعليقات هنا

    أه حرية المحطات الفضائية والأذاعية وأه مافيش فرق بين مسلم وأي دين أخر جوا الدولة الواحدة وكل واحد يفتح قناة ويقول اللي هوا عايزة داخل اطار الحرية لأن اولا اطار الحرية مش معناها نغلط في ناس تانية أو دين تاني أو معتقد تاني وكمان اطار الحرية دا سيف مسلط، اللي بيغلط بتنقطع رقبتة ويخرج من اللعبة فورا، فالجريده اللي نشرت صورتك حرة تنشر الي هيا عايزاه، لكن لما نشرت صورتك غلط في موضوع غلط فهيا تعدت حريتها ولازم تنقطع رقبتها، دا لو في قانون
    وثانيا مش معني ان حد بيقول فكر تاني بقي غلط او صح لأن دي أمور نسبية، صح عند ناس ممكن يكون غلط عند ناس تانية، وفي الأخر المستمع مش قاصر وبيختار الحوار اللي بيناسبة .... ومش معني الحرية اننا نتخلي عن دينا او عقيدتنا او تقاليدنا، لأ دا بالعكس داحنا نتمسك بيهم أكتر

    وبعدين احنا خايفين لية الناس تشتم في اللي احنا شايفينة صح؟؟ طب ما لو حد شتم ما نقف نشرشحلو ونورية ان اللي احنا شايفينوا صح.... الحجة قدام الحجة، فلو احنا صح هوا اللي حيخسر، ولو احنا غلط أهو سمعنا رأي تاني ممكن يفير حياتنا، هوا مش كل واحد أو شعب او دين عنده لسان، وطول كدا ماشاءااللة؟؟

    تعليقي بقي هوا .... محدش حيدينا فرصة نبقي بالصورة اللي أنت نفسك فيها، سواء من الداخل أو الخارج، لأن المسيطرين علي اللعبة مستفيدين من الحالة اللي احنا فيها دي بالظبط، فيبقي الحل اننا نحاول نغير الحالة دي بنفسنا مش بس نتمني، وممكن دا يحصل بكل بساطة لو عايزين، بس اللي بيحصل ان الناس بتجري ورا الغلط وبعدين يشتكوا حال البلد المهبب كأنهم متسببوش في الهباب دا

    ReplyDelete
  6. ياصباح الفل

    دي مصر الا في نفسك حلوة اوي

    هو حد يكره ماكلنا نفسنا تبقي مصر حلوه وزي الفل كمان

    .......

    احلي حاجه في مصر بقه انها بتسبنا نحلم بمزجنا


    .....

    احمد احمد احمد احمـــــــــــد
    هاه واخد بالك انت

    سلامووووووووووز ياقمر
    وزة

    ReplyDelete
  7. انت اكيد كنت بتحلم والحلم تحت بند الاحلام المستحيله
    بس عاوزة اقولك الاحلام بالناس تتحقق
    تحياتي

    ReplyDelete
  8. جميل حلم الحريه والديموقراطيه

    بس مع بعض التحفظات كله هيبقى تمام

    يارب يحققلنا احلامنا على خير

    سلامى
    :))

    ReplyDelete
  9. أول ما أبتديت أقرا أفتكرتك أن الموضوع سياسى وأنا مبحبش السياسه

    بعدين لاقيت الكلام شدنى ... فجأة لاقيت نفسى بروح هناك هناك فى حلم جميل اوى عيشت كل كلمة انت كتبتها وحسيت انو واقع
    حسيت انى حبيت السياسه اللى بتتكلم عليها
    حبيت مصر اللى بقت فى خاطرى أنا كمان
    حبيت الحالة كلها وللحظة نسيت الواقع اللى احنا عايشينو

    ياريتك ما كنت خلصت البوست

    بجد ربنا يحمى مصر ويجعلها مثل التى فى خاطرك وخاطرى دلوقت

    تحياتى وتسلم ايديك بجد
    ومدونتك حلوة اوى

    سهر الليالى

    ReplyDelete
  10. مايكل سبقني في الاعتراض على النقطة دي مفيش حزب مسلم وحزب مسيحي انما في مصر للمصريين
    كلام أكتر من رائع
    تحياتي

    ReplyDelete
  11. اتفقت احلامك كلها فى الحرية


    فعلا انا معاك

    احنا محتاجين حرية شبه مطلقة واكد على شبه مطلقة

    الفكر لما يتحرر هايخلق بالتأكيد ابداع

    لو بقيت حر فى شغلى هابدع فى الشغل ده

    لو مراتى ادتيها حريتها فى بيتها هاتبدع فى بيتها وهاتخليه جنه

    ولو ادينا المواطنيين الحرية
    هايبدعوا فى بلدهم وووطنهم

    واحنا أصلا حضاريين يعنى لو اخذنا حرية هانبقى مسئولين عنها وهانعرف قيمتها وهانصونها وهانحافظ عليها بس نبقى احرار

    يعنى لو فيه حرية وفى منظومة قيم اخلاقية هايلفظ أي شيئ سلبى ولن يبقى إلا الزبد

    اعطى الشعب الخيارات بعد ما تديهم تعليم وتربية وثقافة ووعى مناسبين وسيبهم يقرروا مصيرهم ويختاروا .. يبقوا علمانين يبقوا اسلاميين يبقوا زي ما يبقوا طلما الإسلامى مش هايقمع حرية الليبرالى أو العكس

    تحياتى يا ابو حميد على احلامك الجميلة ولعلنا فى يوم ما نعيش مخاضها

    ReplyDelete
  12. لا يا فندم فوق
    دول واخدينها توكيل ومحتكرينه كمان

    مصر التى فى خاطرك جميلة قوى وعادلة قوى
    ومصر الى على ارض الواقع ماهى الا الحكومة
    هىالكل فى الكل
    وربنا يريح مصر منها
    قول امين

    تحياتى
    شيماء

    ReplyDelete
  13. شيكابالا5 March 2008 at 15:20

    مع كامل احترامى لشخصكم الكريم ولكل من ابدى تعليقا على الموضوع اختلف معكم جميعا مصر التى فى خاطرك متنفعش الشعب دة لو مخافش مبيدعش للاسف ف مصر لما تحترم اللى قدامك قوى وتديلة كامل حقوقةوتعاملة برقى بيفتكرك اهبل ولا عزاء للديمقراطية وكمان لو كل واحد عمل قناة بمزاجة الاجيال الجاية تتظلم من الانفتاح اللى هيحصل واكيد من انفتاح اقتصادى لكن انفتاح على الاسفاف والعرى وخلافة ارفض كمان اى حزب على اساس طائفى دة تعميق للفتنةوعامة متشغلش بالك بمصر قوى ليها اللى بيحميها ويفكر فيها خليك انت ف حالك وشكرا

    ReplyDelete
  14. ممكن تسمحلي ارد علي كومنت استفزني
    الاستاذ شيكا بالا

    ارجو المعذرة فانا اعترض علي كلامك
    انت بتتكلم علي مصروكاننا في غابه
    اكيد فيها فساد وناس تفكيرها محدود
    بس كمان فيها الناس الطيبين اللي مالين البلد
    كن جميلا تري الوجود حميلاوكمان
    يعني ايه خليك في حالك لو كل واحدبقي في حاله يبقي الدنيا هتخرب
    ياريت تعيدالتفكير وتحاول تحب مصر شويه
    حد يكرة امه
    ان الله لا يغير ما بقوم حتي يغيروةما بانفسهم
    اسفه للردولكن الكلام صعب اوي

    ReplyDelete
  15. micheal:
    مبروك عليك اول كومنت يا برنس
    ويارب دايما
    الليبرالية يا مايكل قطعة واحدة
    take it or leave it
    ماينفعش ابقى ليبرالي بس ليا تحفظ على الاحزاب الدينية
    وبعدين انت ليه متوقع ان حزب ديني يعني تزمت وتحيز
    انت تعرف ان اوروبا وامريكا فيها احزاب دينية؟
    انا احترم وجهة نظرك بس اسمح لي بالاختلاف معاها
    تحياتي

    ReplyDelete
  16. قبلة الحياة:
    يبقى انتي ماقرتيش الموضوع للاخر
    انا قلت ان كل دة مرتبط بشرط واحد ومهم جدا وبدونه كل اللي انا كاتبه يبقى تدمير مش بناء
    الشرط هو الاحترام وعدم استخدام حريتك في ايذائي والا تبقى فوضى
    طبعا بالنسبة لموضوع صورتي هي مش حرية بقدر ما هي اسفاف وتعدي على حقوق الاخر ودة مرفوض تماما
    طبعا الاختلاف في الرأي مطلوب وانا احترم وجهة نظرك ولكن كان لابد من التوضيح
    تحياتي واحتراماتي

    ReplyDelete
  17. الحلم العربي:
    تغيير العقول وطرق التفكير والادمغة شيء صعب جدا ولكنه ليس مستحيل
    اوروبا في العصور الوسطى كانت غارقة في بحار من الجهل والتخلف
    شوف دلوقتي هي فين واحنا فين؟
    التغيير بيحتاج لوقت طويل واجيال كتير لاستيعابه
    الاهم هو البدء في التغيير والرغبة قبل كل شيء في التغيير
    تحياتي

    ReplyDelete
  18. غمض عينيك:
    اعتقد ان جيلنا ع الاقل مش هيشوف مصر اللي في خاطري دي
    يمكن يكون الكلام دة في القرن اللي جاي او اللي بعده
    ربنا يديك الصحة
    تحياتي

    ReplyDelete
  19. السلام عليكم
    اعتقد ان ده حلم و مش حيتحقق الا لما الناس تطالب بحقوقها
    و ساعتها يبقى نتكلم فى الليبرالى و الاسلامى و المسيحى لكن طول ما احنا كده يبقى مش حنشم ريحه الحريه وحتفضل الدوله دى قطاع خاص و كل سنه و انت طيب
    تحياتى ابو مفراح

    ReplyDelete
  20. وجهة نظر:
    انا متفق معاك تماما
    واعتقد اني رديت على التعليقات اللي قبلك بنفس مضمون تعليقك عليهم
    بالنسبة للي ماسكين مقاليد الامور وتقاليد اللعبة ماعتقدش ان مصر اللي في خاطري هي اللي في خاطرهم ع الاطلاق
    وبالتالي يبقى موضوع البوست مجرد حلم ممكن يتحقق في ازمنة تانية وممكن يبقى قدر مصر الا يتحقق ع الاطلاق
    تحياتي واحتراماتي

    ReplyDelete
  21. انين الحزن:
    انتي عايزاهم يا وزة يمنعونا من الحلم كمان؟
    يا خبــــــــــــــر؟
    تخيلي ممكن يعملوها....توقعي اي حاجة في الزمن دة
    تحياتي يا وزة

    ReplyDelete
  22. للاسف الشديد

    مصر ليست ملكية عامة

    مصر بتاعة ناس معينة , و احنا كلنا في شكل او باخر ... عبيد في الوسية

    خالص التحية !

    ReplyDelete
  23. طب يا سيدي...اعتبرني ليبرالي علماني عشان ميبقاش فيها
    take it or leave it
    :)

    ReplyDelete
  24. الساحرة:
    بس خلينا واقعيين
    مش احنا الناس اللي هنحقق الاحلام دي
    جايز ييجي ناس تانيين في زمن تاني في ظروف تانية يحققوها
    تحياتي

    ReplyDelete
  25. shayma:
    فعلا
    نحن لا نملك الا الدعاء
    ولكن هل الدعاء وحده يكفي يا شيماء؟
    ان الله لا يغير ما بقوم حتى يغيروا ما بأنفسهم
    ممكن تسأليني هنعمل ايه طيب؟
    مش عارف
    تحياتي

    ReplyDelete
  26. سهر الليالي:
    اولا الف شكر ليكي على كلامك على مدونتي المتواضعة
    دة من ذوقك
    على فكرة انا اكتشفت ان مفيش حاجة اسمها كلام في السياسة وكلام اقتصادي وكلام اجتماعي
    انا اعتقد ان كله منفد على بعضه
    وان كل الطرق بتوصل في النهاية للبني ادم المصري وحياته وكرامته ومعيشته
    تحياتي واحتراماتي

    ReplyDelete
  27. انا حر:
    يا سيدي الفاضل:
    انت ليه حزب ديني بيجي في خيالك ميلشيات مسلحة وناس رافعة راية الجهاد والكلام دة
    انا ارفض الكلام دة اصلا
    انما انا اقصد بالحزب الديني هو اللي بيقوم على اسس دينية سواء كان اسلامي او مسيحي
    ماسمعتش عن الحزب المسيحي الالماني مثلا؟
    دي حاجة موجودة في جميع دول العالم المتقدم لان في تيارات في الشارع بتميل للاتجاه دة سواء مسلمين او اقباط
    تحياتي

    ReplyDelete
  28. لا لا لا مافيش أحلام، دا في حقائق بس لو عايزين، منجريش ورا الوهم (اخوان وكفاية ومعارضة) ونمنع اللي مش عايزينة يوصل يبقي ممكن نحقق الحلم

    ReplyDelete
  29. الكلام اللى انت بتقوله والحلم اللى بتتمناه هايكون صحيح وسليم و100 100 كمان فى حالة واحدة بس

    لو البشر ملائكة

    !!

    بس للأسف الشديد البشر بشر والملائكة ملائكة


    ...


    انت بتقول ان يبقى فى تعدد للأحزاب وتعدد للاّراء المختلفة وان مايبقاش فى فرض رأى فى اى مجال ..وان الكل ..مسيحى ومسلم ويهودى حتى يعيشوا فى مصر فى ظل مساواة
    بس على حسب اللى فهمته انا من كلامك ..فمش هايبقى فى حرية خالص !!

    اصل علشان المسيحين يعيشوا بطريقتهم وعلشان المسلمين يعيشوا بطريقتهم وكل طرف فيهم يعمل اللى يريحه ..كدة الدولة هاتنقسم اصلا ..وغير كدة لما كل حزب يطبق مبادئه اللى اكيد بتختلف عن مبادىء الحزب الاّخر ..كدة هاتنشأ حروب بين الأحزاب المختلفة ..كدة البلد مش هاتبقى بلد ..لان فى الأول او فى الاّخر لازم يبقى فى قوة توحد بينهم ..قوة تتحكم فيهم بس ماتقيدش حريتهم


    ...



    انا رأيى ده على حسب مافهمت من كلامك ..


    تحياتى


    :)

    ReplyDelete
  30. مصر كلها على بعضها عامله زى المحشى على كل لون يا طماطم

    ReplyDelete
  31. monzer:
    احنا في مجتمع لا يكره قدر الابداع
    ابداع يعني تفكير...تفكير يعني الشيطان يوزك وتفكر في الاوضاع الغلط اللي احنا عايشينها
    وبالتالي لا والف لا للحرية...لا والف لا للابداع
    تحياتي

    ReplyDelete
  32. شقاوة شعب:
    طب هما واخدينا من ضمن التوكيل؟
    ولا احنا فوق البيعة
    انا حاسس ان احنا بصراحة حمل على حكامنا ولازم نكون حسيسين ونخف شوية علشان يعرفوا يعيشوا
    تحياتي واحتراماتي

    ReplyDelete
  33. شيكابالا:
    ومين يا ترى اللي خلى الشعب دة ماينفعش معاه حرية؟
    هو مش برضة الشعب دة اللي بياخد على دماغه قامت علشانه ثورة سنة 1952 ووعدته بحياة ديمقراطية سليمة وعدالة اجتماعية وكام بق من اياهم
    بس فعلا انقلاب يولية اوفى ما وعد به
    حياة ديمقراطية في الحزب الوطني الديمقراطي وعدالة اجتماعية بس في القطامية هايتس والرحاب
    وبعدين مانا فعلا في حالي...مش انا وبس دة في حوالي 70 مليون غيري في حاله
    وهو اللي موصلنا للي احنا فيه دة حاجة غير اننا في حالنا؟
    تحياتي

    ReplyDelete
  34. الساحرة:
    شيكابالا يا فندم انسة مش استاذ
    وهي بالمناسبة خطيبتي
    رغم اختلافنا الشديد فكريا ورياضيا
    المهم اننا رديت عليها واعتقد اني وصلت ليها وجهة النظر وهي اعتقد انها عرفت غلطها وماعدتش هتعمل كدة تاني
    تحياتي

    ReplyDelete
  35. ابومفراح:
    يبقى البركة بقى في ابناء القرن ال22
    تحياتي واحتراماتي

    ReplyDelete
  36. شمس الدين:
    ياريت نحصل نكون حتى عبيد في الوسية
    دة احنا مالناش شغلانة في الوسية اساسا
    تحياتي

    ReplyDelete
  37. micheal:
    يا عم مايكل سواء ليبرالي علماني او ليبرالي بشرطة حتى
    خلينا انا وانت عايشين في واقعنا المؤلم
    تحياتي واحتراماتي

    ReplyDelete
  38. وجهة نظري:
    ماعملتش حساب السلبيين اللي لا عاجبهم حالهم ولا هم عايزين يتغيروا
    ماعملتش حساب الاغلبية الصامتة اللي مش ناويين يتكلموا
    تحيااااتي

    ReplyDelete
  39. oceaneyes:
    الكلام دة حقيقة فعلا وبيحصل في دول كتير في العالم اللي احنا عايشين فيه دة
    والغريب ان الدول دي لا يسكنها ملائكة
    امريكا فيها ملائكة...اوروبا فيها ملائكة؟؟؟
    الكلام دة مش مستحيل الكلام دة بيحصل بس في دول اسمها دول محترمة وشعوب اسمها شعوب راقية ومتحضرة
    الموضوع اتفهم غلط
    الحرية هي حرية الاعتقاد والديانة والتفكير ولكن في اطار نظم عامة بتكفل للمجتمع تماسكه ووحدته وصلابته
    تحياتي واحتراماتي

    ReplyDelete
  40. صوت من مصر:
    ههههههه
    حلوة وجديدة
    بس والله معبرة فعلا
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails